3.6.1 Arau garapenarekin lotutako jarduketak
Tributu arautegia prestatzea eta izapidetzea
5 Foru Lege proiektu, Tributu harmonizazioari buruzko Legegintzako 6 Foru Dekretu, 4 Foru Lege Dekretu, 4 Foru Dekretu eta 23 Foru Agindu prestatzeko eta izapidetzeko eginkizunetan parte hartu da.
Gainera, 2021. urtean Hitzarmen Ekonomikoa aldatzen parte hartu da, haren edukia Estatuko zerga araudian sartutako lege aldaketetara egokitzeko. Zehazki, finantza transakzioen gaineko zergaren eta zenbait zerbitzu digitalen gaineko zergaren konbentzioa gehituko da. Konbentzio horiek urriaren 15eko 5/2020 Legeak, finantza transakzioen gaineko zergari buruzkoak, eta urriaren 15eko 4/2020 Legeak, zenbait zerbitzu digitalen gaineko zergari buruzkoak, sortu zituzten hurrenez hurren. Halaber, gehituko da gas, petrolio eta kondentsatuen erauzketaren balioaren gaineko zergarena ere, Hidrokarburoen Sektoreari buruzko urriaren 7ko 34/1998 Legea aldatzen duen maiatzaren 21eko 8/2015 Legearen bidez sortua, eta hidrokarburoen esplorazio, ikerketa eta ustiapenari buruzko zenbait zerga neurri eta zergaz bestelako neurriak arautzen dituena. Era berean, hondakindegietan hondakinak biltegiratzeari, errausteari eta hondakinak batera erretzeari buruzko zergari buruzko hitzarmena gehituko da, ekonomia zirkular baterako hondakinei eta lurzoru kutsatuei buruzko apirilaren 8ko 7/2022 Legeak sortu berri duena. OSS araubide bereziei dagokienez, BEZaren kudeaketa eta ordainarazpena ere koordinatuko dira.
Ondoko eranskinean aurkezten da 2020an izapidetu eta NAOn argitaratu diren tributuei buruzko foru arauen zerrenda.
Tributu gaietarako interesa duten araudi, epai, kontsulta eta argitalpenen zabalkundea.
Hona hemen araudiak ezagutarazteko eginkizunarekin lotutako jarduketa nagusiak:
- Zerga araudia (indarrean dagoena eta osoa) html formatura migratzea (Word-etik).
- Tributu araudien arteko konparazioa.
- Tributu araudiei buruzko liburuak prestatzea.
- Araudiak eguneratzea.
- Argitalpen digitalak (bai NFOren web atarian, bai NFOko langileen barne ezagutzarako atarian): Nafarroako Foru Auzitegi Ekonomiko-Administratiboaren ebazpenak eta haiei buruz Administrazioarekiko Auzien Epaitegiek eta Nafarroako Justizia Auzitegi Nagusiko Administrazioarekiko Auzien Salak emandako epaiak, eta orobat, Hitzarmen Ekonomikoaren Arbitraje Batzordearen ebazpenak.
- NFOko langileen barne ezagutzarako atarian modu digitalean argitaratzea hamabost egunetik behin argitaratzen den Fiskalitate Aldizkaria, tributuei buruzko liburu eta aldizkari interesgarriekin, eta argitaratzea, orobat, kudeaketa arloko atalek erantzundako kontsultak.
- Prozeduren katalogoa, herritarrei zuzendutako tributu prozedurei dagokien informazioa kargatzea.