navarra.es
Castellano | Euskara | Français | English
Ezagutzera eman
23/2014 Ebazpena, urtarrilaren 10ekoa, Nafarroako Unibertsitate Publikoko errektoreak emana. Haren bidez agintzen da argitaratzeko “Nafarroako Unibertsitate Publikoko Irakasleak eta Ikertzaileak kontratatzeko arautegia aldatzen duen Erabakia”...
23/2014 EBAZPENA, URTARRILAREN 10EKOA, NAFARROAKO UNIBERTSITATE PUBLIKOKO ERREKTOREAK EMANA. HAREN BIDEZ AGINTZEN DA ARGITARATZEKO “NAFARROAKO UNIBERTSITATE PUBLIKOKO IRAKASLEAK ETA IKERTZAILEAK KONTRATATZEKO ARAUTEGIA ALDATZEN DUEN ERABAKIA”. 2013KO ABENDUAREN 18KO GOBERNU KONTSEILUAK HARTUTAKO ERABAKI BATEN BIDEZ ONETSI ZEN
(2014ko 22. NAOn argitaratutako testua, otsailaren 3an)
Atarikoa
Maiatzaren 12ko 110/2003 Foru Dekretuak onetsitako Unibertsitateko Estatutuetako 40. artikuluak ematen dizkidan ahalmenak erabiliz, agintzen dut argitaratzeko “Nafarroako Unibertsitate Publikoko Irakasleak eta Ikertzaileak kontratatzeko arautegia aldatzen duen Erabakia”. Hona hemen hitzez hitz:
“Erabakia, Nafarroako Unibertsitate Publikoko Irakasleak eta Ikertzaileak kontratatzeko arautegia aldatzen duena.
Nafarroako Unibertsitate Publikoko Estatutuetako 83. artikuluak ezartzen du Unibertsitateak irakasleen eta ikertzaileen lan kontratazioa egiten ahalko duela. Hautaketa lehiaketa publikoaren bidez egingo da. 84. artikuluak ezartzen du irakasleen eta ikertzaileen lan kontratazioa irakasleak kontratatzeko arautegian arautuko dela. Gobernu Kontseiluak prestatu eta onetsi beharko du arautegi hau, edukiko dituena lehiaketak deitzeko eta egiteko beharrekoak diren arau guztiak, baita balioespen-irizpide orokorrak ere.
2009ko otsailaren 25ean, Gobernu Kontseiluak “Nafarroako Unibertsitate Publikoko irakasle eta ikertzaileak kontratatzeko arautegia” onetsi zuen (2009ko 44. N.A.O, apirilaren 13koa), gero, 2011ko maiatzaren 26ko Gobernu Kontseiluaren bileran aldatu zena (2011ko 111. N.A.O., ekainaren 9koa).
Bi urtez aplikatu eta gero, arautegi horren berrazterketa egin nahi da, hainbat gorabehera hobetzeko.
Beraz, Enpresa Batzordea entzun ondoren, ondoko hau da Gobernu Kontseiluak, 2013ko abenduaren 18ko bileran, Irakaskuntza Antolatzeko errektoreordeak proposaturik, hartu duen.
Erabakia:
Lehenengoa.–Onestea “Nafarroako Unibertsitate Publikoko irakasle eta ikertzaileak kontratatzeko arautegia”ren aldaketa, erabaki honen I. Eranskinean ageri den bezala.
Bigarrena.–Erabaki hau Irakaskuntza Antolatzeko Errektoretzari, Ikastegi eta Sailetako zuzendaritzei eta Giza Baliabideen Zerbitzuari jakinaraztea.
Hirugarrena.–Erabaki honek indarra hartuko du Nafarroako Aldizkari Ofizialean argitaratu eta biharamunean.”
NAFARROAKO UNIBERTSITATE PUBLIKOKO IRAKASLE ETA IKERTZAILEAK KONTRATATZEKO ARAUTEGIA
I TITULUA. XEDAPEN OROKORRAK
1. artikulua. Aplikazio eremua.
Arautegi hau aplikatuko da irakasle eta ikertzaile lanpostuak betetzeko honako kategoria hauetan: Laguntzailea, Irakasle Laguntzaile Doktorea, Irakasle Kontratatu Doktorea, Irakasle Elkartua, Irakaskuntza emateko ordezko kontratudun irakaslea, Irakasle Bisitaria eta Irakasle Emeritua.
2. artikulua. Printzipioak.
Aurreko artikuluan aipatzen den langileen hautaketa, lehiaketa publikoaren bidez egingo da eta beti bermatuko dira izangaien aukera-berdintasuna, merezimendu eta gaitasun printzipioekiko errespetua, eta gizon eta emakumeen arteko tratu eta aukera berdintasunaren printzipioa, irakasle emeritu eta bisitarientzako xedatutakoa ezertan kaltetu gabe.
3. artikulua. Lanpostuak atxikitzea.
Arau honek xedatzen duenaren araberako irakasle eta ikertzaileen lanpostuak Nafarroako Unibertsitate Publikoko Unibertsitate sail bati atxikiko zaizkio, baita sail horien barruan dauden jakintza arloetako bati ere.
4. artikulua. Kontratuak gauzatzea.
Lehen artikuluan jasotako irakasleen eta ikertzaileen kontratuak idatziz egingo dira, dagokien ereduan.
5. artikulua. Bateraezintasunak.
Kontratatutako irakasle eta ikertzaileei bateraezintasun erregimena aplikatuko zaie, Administrazio Publikoen zerbitzuko langileen bateraezintasunei buruzko Legeko oinarrizko arauekin eta aplikagarria den gainerako araudiarekin bat etorriz.
II. TITULUA. KONTRATU-IRUDIAK
6. artikulua. Laguntzaileak.
1. Nafarroako Unibertsitate Publikoak, nahi izanez gero, laguntzaile gisa kontratatuko ditu doktoretza programa batean onartuak izan direnak edo onartuak izateko baldintzak betetzen dituztenak.
2. Kontratuaren xedea izango da irakaskuntza eta ikerketa prestakuntza osatzea. Unibertsitateak behar diren neurriak hartuko ditu prestakuntza hori betetzen dela bermatzeko. Laguntzaileek irakaslanean laguntzen ahalko dute urtean gehienez ere 60 orduz. Unibertsitateak ziurtatuko du, curriculumari begira, laguntzaileak parte hartzen duela esleitzen zaizkion irakaslan zehatzetan.
3. Aldi baterako kontratua izango da, eta lanaldi osoko arduraldia izango du.
4. Gutxienez ere urtebete eta gehienez ere bost urteko iraupena edukiko du kontratuak. Kontratuaren iraupen-aldian sortzen diren aldi baterako ezgaitasun, amatasun, aitatasun, adopzio edo harrera egoerak direla medio eten egingo da haren zenbaketa.
7. artikulua. Irakasle Laguntzaile Doktorea.
1. Nafarroako Unibertsitate Publikoak Irakasle laguntzaile gisa kontratatu ahalko ditu Nafarroako Foru Komunitateko legeak xedatzen duen kanpo ebaluaziorako erakundearen ziurtapena duten doktoreak. Izendapen espresurik ezean, Kalitatea Ebaluatu eta Egiaztatzeko Agentzia Nazionalak emango du jardueraren ebaluazioa.
2. Kontratuaren xedea izango da irakaslana eta ikerlana garatzea.
3. Aldi baterako kontratua izango da, eta lanaldi osoko arduraldia izango du.
4. Gutxienez ere urtebeteko eta gehienez ere bost urteko iraupena edukiko du kontratuak, eta, nolanahi ere, kontratazio-irudi honek eta laguntzailearen kontratazio-irudiak, unibertsitate berean edo beste unibertsitate batean, zortzi urte iraungo ditu gehienez ere. Kontratuaren iraupen-aldian sortzen diren aldi baterako ezgaitasun, amatasun, aitatasun, adopzio edo harrera egoerak direla medio eten egingo da haren zenbaketa.
5. Lehentasunezko merezimendutzat hartzen da hautagaiak ikerketa egonaldia egitea berarekin lan edo prestakuntza harremana duen unibertsitatea edo ikerketa zentroa ez den ospe handiko unibertsitateetan edo ikerketa zentroetan, Espainian zein atzerrian.
6. Lehentasunezko merezimendutzat hartzen da kontratupeko irakasle doktore izateko edo unibertsitateko irakaskidegoetarako sarbide lehiaketetan parte hartzeko ziurtapena edukitzea.
8. artikulua. Lan kontratupeko irakasle doktorea.
1. Nafarroako Unibertsitate Publikoak Kontratupeko irakasle doktore gisa kontratatu ahalko ditu Foru legeak xedatzen duen kanpo ebaluaziorako erakundearen ziurtapena duten doktoreak. Izendapen espresurik ezean, Kalitatea Ebaluatu eta Egiaztatzeko Agentzia Nazionalak emango du jardueraren ebaluazioa.
2. Kontratuaren xedea izango da, irakasteko eta ikertzeko arduraldi osoarekin, irakaslana eta ikerlana garatzea edo, lehentasunez, ikerlana garatzea eta, beharrezkoa bada, kudeaketa.
3. Behin betiko kontratua izango da, eta lanaldi osoko arduraldia izango du.
4. Kontratazioa lehiaketa publikoaren bidez egingo da, beharrezkoa den publizitatea emanez, eta deialdia nahiko aurrerapenarekin jakinaraziko zaio Unibertsitateen Kontseiluari, Unibertsitate guztietan zabal dadin.
5. Lehentasunezko merezimendutzat hartuko da Unibertsitateko Irakaskidegoetarako lehiaketetan parte hartzeko ziurtagiria izatea.
9. artikulua. Irakasle Elkartua.
1. Nafarroako Unibertsitate Publikoak irakasle elkartu aritzeko kontratatzen ahalko ditu gaitasun ezagutuko adituak, jarduera profesionala Unibertsitateko irakaskuntza-esparrutik kanpo dutela egiaztatzen dutenak.
2. Kontratuaren xedea izango da irakaslana garatzea, eta lan horren bidez beren ezagutza eta lanbide-esperientziak eskainiko dituzte.
3. Aldi baterako kontratua izango da, eta lanaldi partzialeko arduraldia izango du.
4. Kontratuaren iraupena seihilekoa edo urtebetekoa izango da, eta beste hainbesteko iraupena izango duten epeetan luzatu ahalko da, betiere jarduera profesionala Unibertsitateko irakaskuntza-esparrutik kanpo dutela egiaztatzen jarraitzen badute.
5. Lehentasunezko merezimendutzat hartzen da kontratupeko irakasle doktore edo irakasle laguntzaile doktore izateko unibertsitateko irakaskidegoetarako sarbide lehiaketetan parte hartzeko ziurtapena edukitzea.
10. artikulua. Irakasle bisitaria.
1. Nafarroako Unibertsitate Publikoak irakasle bisitari aritzeko kontratatu ahalko ditu Espainiako eta atzerriko beste unibertsitate eta ikerketa zentroetako ospe handiko irakasle edo ikertzaileak.
2. Kontratuaren xedea izango da irakaslana edo ikerlana garatzea, eta lan horren bidez irakasleek unibertsitateari beren ezagutzak eta irakaskuntza-esperientziak eskainiko dizkiote.
3. Kontratua aldi baterako izango da, gehienez ere bi urtekoa eta gutxienez sei hilabetekoa, eta lanaldi partzialeko edo osoko arduraldiarekin.
11. artikulua. Irakasle emeritua.
1. Nafarroako Unibertsitate Publikoak, bere Estatutuekin bat etorriz, irakasle emerituak izendatzen ahalko ditu unibertsitatean zerbitzu aipagarriak eman dituzten irakasle erretiratuen artetik.
2. Kontratuak urtebete iraungo du, eta beste bi aldiz luzatuko ahalko da, urtebete luzapen bakoitzean, baldin eta Saileko Kontseiluak aldeko txostena egiten badu. Edonola ere, jatorrizko kontratuak eta bere luzapenek ez dute inola ere hiru urte baino gehiago iraungo.
12. artikulua. Obra edo zerbitzurako kontrataturiko irakasle eta ikertzaileak.
1. Nafarroako Unibertsitate Publikoak ikertzaileak, teknikariak edo bestelako langileak kontratatzen ahalko ditu obra edo zerbitzu zehatzeko kontratuaren bidez ikerketa zientifiko edo teknikoko proiektuak garatzeko.
2. 3. artikuluak ezarritakoaren kalterik gabe, langile hauek sail, ikastegi, institutu edo unitate bati atxikiko zaizkie.
3. Kontratua idatziz egin behar da, eta ikertu beharreko jarduera, eta lanaren iraupena zehaztasunez adieraziko dira. Kontratua iraungiko da jarduera amaitzen denean.
4. Kontratupeko irakaslea urtean gehienez ere 60 orduz aritzen ahalko da izaera praktikoko irakaslanetan, aurretik loturiko sailarekin adostasun batera iritsi eta gero, eta unibertsitateko irakaskidegoetako irakasle batek gainbegiratuta.
5. Kontratua lanaldi osokoa edo lanaldi partzialekoa izan ahalko da. Edonola ere, proiektuaren aurrekontu-prestasunaren mendekoa izango da.
6. Langileak proiektua egiteko ardura duen ikastegian, sailean, taldean edo ikerketa-taldean lan egingo du. Organikoki Kudeatzailetzaren menpe egongo da.
7. Erroldatutako ikerketa-taldeek proposatzen ahalko dute irakasleak eta ikertzaileak kontratatzea ikerketa zientifiko edo teknikoko proiektu jakin batzuk garatzeko, Unibertsitateko Ikerketa Batzordeak ezartzen duenaren arabera.
8. Ikerketa zientifiko edo teknikoko proiektu jakin batzuk garatzeari loturiko irakasle, ikertzaile, teknikari edo bestelako lanpostuen deialdia, baita berauek kontratatzeko prozedura ere, arautegi espezifikoen bidez arautuko dira.
13. artikulua. Ministerioaren programa sektorialen bidezko kontratupeko irakasleak.
Ramón y Cajal, Juan de eta Hezkuntza eta unibertsitate-gaietan eskumena duen ministerioak sortzen dituen beste programa batzuen bidezko kontratuek beren oinarri guztiak bete behar dituzte eta Nafarroako Unibertsitate Publikoko indarreko araudia. Kontratu horien oinarriak “Estatuko Aldizkari Ofizialean” argitaratuko dira.
14. artikulua. Irakaskuntzako ordezkapen kontratua duen irakaslea.
1. Nafarroako Unibertsitate Publikoak izenpetzen ahalko ditu irakaskuntzako ordezkapen kontratuak, lan araubidean, artikulu honetan ezartzen den xederako.
2. Xedea da lanpostua erreserbatzeko eskubidea duen irakasle baten irakaslana ordezkatzea, edo lehiaketa egin gabe dagoen lanpostu baten irakaslana betetzea, lehiaketa ebatzi arte, une horretan kontratua iraungiko baita.
3. Ordezko irakaslea lanaldi osoz kontratatuko da.
4. Ordezko irakaslea lizentziaduna, goi mailako ingeniari titulua, edo goi mailako arkitekto titulua, gradua, unibertsitate masterra edukiko du, edo doktorea izango da.
5. Asteko irakaskuntza-arduraldia zortzi ordukoa izango da, eskolako emateko, gehi beste sei ordu, tutoretzarako.
6. Lehentasunezko merezimendutzat hartzen da doktore titulua edukitzea eta irakasle laguntzaile doktore edo kontratupeko doktore izateko edo unibertsitateko irakaskidegoetarako sarbide lehiaketetan parte hartzeko egiaztagiria edukitzea.
III. TITULUA. OHIKO PROZEDURA
I. KAPITULUA. Deialdiak
15. artikulua. Deialdia egiten duen organoa.
Irakasle elkartuak, irakasle laguntzaile doktoreak, irakasteko ordezkapen kontratua dutenak eta irakasle kontratatu doktoreak, baita laguntzaileak ere, lehiaketa publikoen bidez egingo dira, irakasleen gaietarako eskumena daukan organoak hala proposaturik.
16. artikulua. Deialdien publizitatea.
1. Lehiaketen deialdiak Nafarroako Unibertsitate Publikoko ohol ofizialean eta web-orrialdean argitaratuko dira.
2. Kontratatzeko ohiko deialdien edukia finkatu baino lehen Enpresa batzordeari informazioa eman eta entzungo zaio, aldez aurretik.
3. Halaber, Unibertsitateen Kontseiluari deialdien berri emango zaio aldez aurretik, haietan guztietan jakinarazteko, Unibertsitateei buruzko Lege Organikoko 48. artikuluak ezartzen duen bezala. Iraupen mugagabea duten lanpostuen lehiaketen deialdiak Nafarroako Aldizkari Ofizialean argitaratuko dira.
17. artikulua. Deialdien edukia.
Erregelamendu honek arautuko ditu deialdiak eta beren oinarriak, eta ezarrita ez dauden gaietan, Herri Administrazioen Araubide Juridikoaren eta Administrazio Prozedura Erkideari buruzko azaroaren 26ko 30/1992 Legeak.
Deialdiotan honako hau jasoko da:
a) Deialdiko lanpostuen kopurua eta kategoria.
b) Kontratu-mota, iraupena ere adieraziz.
c) Arduraldia.
d) Zer saili atxikita dauden.
e) Halakorik bada, zer jakintza arlori atxikita dauden.
f) Izangaiek bete behar dituzten betebeharrekoak eta baldintzak.
g) Parte hartzeko eskaera-eredua eta aurkeztu beharreko agiriak.
h) Eskabideak aurkezteko epea eta tokia.
i) Eskabideak zer organori zuzendu behar zaizkion.
j) Lehiaketaren epeak, bukaera-datak eta garapen-aldiak.
k) Jartzen ahal diren errekurtsoak.
l) Aplikatu beharreko baremoak.
m) Kontratazio batzordearen osaera, Unibertsitatearen web-orrian eta iragarki-oholean argitaratuko dena, eta Nafarroako Aldizkari Ofizialean, kontratupeko irakasle doktoreen kasuan edo lanaldi osoko arduraldia edo iraupen mugagabea duten beste irudien kasuan.
n) Gobernu Kontseiluak eskatzen dituen gainerako baldintza guztiak.
II. KAPITULUA. Eskaerak
18. artikulua. Parte hartzeko baldintza orokorrak.
1. Nafarroako Unibertsitate Publikoak deitzen dituen lehiaketetan parte hartzera onetsiak izateko, izangaiek honako baldintza hauek bete beharko dituzte:
a) 16 urte baino gehiago izatea, eta erretiratzeko adina beteta ez izatea, irakasle emerituak izan ezik.
b) Deialdiko xede diren lanpostuak betetzea galarazten duen gaixotasunik, muga fisikorik edo psikikorik ez edukitzea.
c) Ez egotea bereizirik edozein Administrazio Publikotako zerbitzutik diziplinako espedientea dela kausa, ez egotea funtzio publikoak betetzeko ezgaitua, edo irakaskuntzarekin bateraezinak diren karguak edo funtzioak ez betetzea. Espainiako nazionalitatea ez duten izangaien kasuan, baldintza hau betetzeko beharrezkoa izango da norberaren Estatuan funtzio publikora sartzea galarazten duten diziplina-zehapen edo kondena penalik ez edukitzea.
d) Kategoria bakoitzeko betebeharreko baldintza espezifikoak betetzea, bereziki bakoitzean eskatzen den titulu akademikoa edukitzea. Espainiako Estatutik kanpo ikasi dutenentzat, beharrezkoa izango da atzerriko tituluak homologatzeko eskumena duen Ministerioak baliokidetzea titulazio akademikoa. Europako Batasuneko tituluak dituzten izangaien kasuan, homologazioa aurkeztuko da, edo bestela unibertsitateko irakaslea izateko gaitasuna aitortzen duen egiaztagiria.
e) Izangai guztiek izan behar dituzte lehiaketako lanposturako eskatzen diren hizkuntza ezagupenak.
2. Arautegi honek arautzen dituen lanpostuetan sartzeko beharrezkotzat jotzen diren bete beharreko baldintzak bete beharko dira deialdi bakoitzean eskabideak aurkezteko epea bukatzen denean, eta kontratua gauzatzen den arte mantendu beharko dira.
19. artikulua. Parte hartzeko eskaera.
1. Parte hartu nahi duten guztiek eskabidea bete eta aurkeztu beharko dute, Nafarroako Unibertsitate Publikoko errektoreari zuzenduz.
2. Eskabideak Nafarroako Unibertsitate Publikoko Erregistro Orokorrean aurkeztuko dira, edo azaroaren 26ko Herri Administrazioen Araubide Juridikoari eta Administrazio Prozedurari Erkideari buruzko 30/1992 Legearen 38.4 artikuluak ezartzen duen moduren batean.
3. Interesdunek eskabide bat aurkeztu beharko dute lehiatu nahi duten lanpostu bakoitzerako, dagokion dokumentazioarekin batera; profila, kategoria eta jakintza arlo berbera duten lanpostuetan, nahikoa izango da dokumentazioa behin aurkeztea. Eskabideak aurkezteko tasak ordaindu beharko dira, Nafarroako Foru Erkidegoko eta haren erakunde autonomoetako Tasa eta Salneurri Publikoei buruzko martxoaren 27ko 7/2001 Foru Legeak ezartzen duenarekin bat etorriz.
4. Eskaerak aurkezteko epea ez da hiru egun baliodun baino laburragoa izango, ezta 10 egun baliodun baino luzeagoa ere, deialdia prentsan argitaratzen den egunaren biharamunetik kontatzen hasita, edo, hala dagokionean, Nafarroako Aldizkari Ofizialean.
20. artikulua. Baldintzak eta agiriak.
Honako hau gehitu beharko zaio eskaera bakoitzari:
1. Lanpostu guztietarako komun diren agiriak:
a) Nortasun Agiri Nazionalaren edo pasaportearen fotokopia.
b) Eskatzen den titulazio akademiko ofizialaren jatorrizkoa edo fotokopia erkatua.
c) Ordaindu beharreko tasa ordaindu delako egiaztagiria.
d) Hautagaiaren curriculum vitae zehaztua, ohiko formatuetako edozeinetan. Curriculumean zerrendatzen diren eta agiriz justifikatzen diren egindako merezimenduak eskaerak aurkezteko epea bukatzen den egunera arte hartuko dira aintzat.
e) Egoki jotzen diren merituen justifikatzeko agiri guztiak, eta hala dagokionean, eskatzen den hizkuntza ezagutzaren mailaren egiaztagiri ofiziala.
f) Deialdi bakoitzean ezartzen diren gainerako agiri guztiak.
2. Kategoria bakoitzerako agiriak:
2.1. Irakasle Elkartuaren lanpostuak.
a) Gutxienez bi urtez lanpostuko jarduerarekin lotutako jarduera profesionala izan dutela eta lanbidea Unibertsitateko irakaskuntza-esparrutik kanpo dutela egiaztatzea, Gizarte Segurantzak edo Mutualitateak emandako egiaztagiriaren bidez, eskumena duen organoak luzatutakoa, baita beste edozein agiri osagarriren bidez ere, nola baitira lanbideari dagokion elkargoko kide izatea, Jarduera Ekonomikoen Zergan izena emanda egotea edo proposatzen den profilari egoki zaion beste edozein. Enplegatu publikoek (funtzionarioek edo lan kontratupekoek) aurretik eman dituzten zerbitzuen egiaztagiria aurkeztu beharko dute.
b) Deialdiko xedea den lanpostuan egin beharreko irakaskuntza-lanaren txosten laburra, dagozkion irakaskuntza-jardueren programa daukana: gaitegia, bibliografia, helburuak, irakaskuntza-metodologia, betiere dagokion ikasketa-planak ezartzen dituen helburuen barruan.
Oroitidazkia ez aurkeztea konponezina da.
2.2. Laguntzaile lanpostuak.
a) Zinpeko aitorpena, doktore ez dela lanpostuaren xede den gai berean, ezta deialdiko xede den lanpostuaren jakintza arlo bereko titulazio batean ere, aitortzen duena.
b) Izangaiak lehiaketaren xede den lanpostuan izandako irakaskuntzako eta ikerketako lankidetzari buruzko oroitidazki laburra.
2.3. Irakasle Laguntzaile Doktorearen lanpostuak.
a) Doktore tituluaren fotokopia.
b) Kalitatea Ebaluatu eta Egiaztatzeko Agentzia Nazionalak edo Nafarroako Foru Erkidegoak zehazten duen kanpo ebaluaziorako organoak jardunaren egiaztapen positiboa ematen duen agiriaren fotokopia erkatua.
c) Deialdiko xedea den lanpostuan egin beharreko irakaskuntza-lanaren txosten laburra, dagozkion irakaskuntza-jardueren programa daukana: gaitegia, bibliografia, helburuak, irakaskuntza-metodologia, betiere dagokion ikasketa-planak ezartzen dituen helburuen barruan.
Oroitidazkia ez aurkeztea konponezina da.
2.4. Irakasle Kontratatu Doktoreen lanpostuak.
a) Doktore tituluaren fotokopia.
b) Kalitatea Ebaluatu eta Egiaztatzeko Agentzia Nazionalak edo Nafarroako Foru Erkidegoak zehazten duen kanpo ebaluaziorako organoak jardunaren egiaztapen positiboa ematen duen agiriaren fotokopia erkatua.
2.5. Irakasteko ordezkapen kontratua duten irakasleen lanpostuak.
a) Behar den tituluaren fotokopia.
b) Deialdiko xedea den lanpostuan egin beharreko irakaskuntza-lanaren txosten laburra, dagozkion irakaskuntza-jardueren programa daukana: gaitegia, bibliografia, helburuak, irakaskuntza-metodologia, betiere dagokion ikasketa-planak ezartzen dituen helburuen barruan.
Oroitidazkia ez aurkeztea konponezina da.
3. Kontratazio Batzordeak prozesuaren edozein unetan eskatzen ahalko die izangaiei ekarri dituzten agirien autentikotasuna egiazta dezaten.
21. artikulua. Izangaiak onartzea.
1. Eskaerak aurkezteko epea bukatuta, gehienez ere 10 eguneko epean, irakasleen gaietan eskumena duen organoak jendaurrera zabalduko du, Unibertsitateko iragarki-ohol ofizialean, deitutako lanpostu bakoitzeko lehiaketan onartu eta baztertu diren izangaien behin-behineko zerrenda, azken kasu honetan baztertzearen arrazoiak azalduko direlarik.
Honako hauek izango dira baztertzeko arrazoiak: eskaera ezarritako epetik kanpo aurkeztea, lehiatzen den lanpostuan eskatzen diren baldintzak ez betetzea, lehiaketan parte hartzeko tasa ez ordaintzea edo baldintzak betetzen direla justifikatzen duten agiriak ez aurkeztea.
2. Baztertutako izangaiek, behin-behineko zerrenda argitaratu eta hurrengo 10 egun balioduneko epean, zilegi dute erreklamazioa eta, akatsen bat badago, akatsak zuzentzea.
3. Eskaerak osatzeko eta zuzentzeko epea bukaturik, Unibertsitateko iragarki ohol ofizialean argitaratuko da lehiaketan onarturiko eta bazterturiko izangaien behin betiko zerrenda.
4. Lehiaketako onartuen zerrendak egoteak ez du esan nahi, inola ere, Unibertsitateak aitortzen duenik izangaiek deialdiko oinarrietan eskatzen diren baldintza orokorrak edo partikularrak betetzen dituztela. Kontratatzeko deitzen dituzten izangaiek ziurtatu eta egiaztatu beharko dituzte horiek, jatorrizko dokumentazioa aurkeztu beharko baitute kontratua sinatzen dutenean.
5. Epea bukaturik ez bada eskaerarik aurkeztu, izangai onarturik ez bada edo izangaiek lehiatzeari uko egiten badiote, irakasleen gaietan eskudun den organoak Sailari jakinaraziko dio, eta arrazoi horregatik lanpostua hutsik geratzen dela aldarrikatuko da.
III. KAPITULUA. Kontratazio batzordea eta Erreklamazio batzordea
22. artikulua. Kontratazio Batzordea.
1. Kontratazio Batzorde orotan kide guztiak doktore izango dira, unibertsitatearekin lotura iraunkorra daukatenak, eta lehiaketako lanpostuak duen kidegoaren kategoria berekoak, baliokideak edo goragokoak.
2. Irakasle laguntzaile doktoreen, irakasle elkartuen, laguntzaileen eta ordezkapen kontratua duten irakasleen lanpostuetarako kontratazio batzordeak honako hauek osatuko dituzte:
a) Irakasleen gaietan eskuduna den organoaa edo berak eskuordetutakoa.
b) Unibertsitateko irakaskidegoetako bi irakasle, unibertsitatearekin lotura iraunkorra daukatenak, Gobernu Kontseiluak izendatuak, batzordekide bakoitzaren bi ordezko ere izendatuko dituena.
c) Lanpostuari dagokion Saileko zuzendaria, edo hark eskuordetzen duen unibertsitatearekin lotura iraunkorra daukan irakasle doktorea, eta Saileko Kontseiluak izendaturiko unibertsitatearekin lotura iraunkorra daukan irakasle bat. Saileko Kontseiluak, halaber, bi ordezko izendatuko ditu bete beharreko lanpostu bakoitzetik. Lanpostua jakintza arlo bati atxikirik badago, aipatu irakasle horietako bat gutxienez, deituriko lanpostuaren jakintza arlokoa edo antzeko arlo batekoa izango da.
3. Unibertsitatearekin lotura iraunkorra daukaten hiru irakaslek eta haien ordezkoek, osatuko dituzte lan kontratuko irakasle doktoreen lanpostuak betetzeko lehiaketak ebatzi behar dituzten batzordeak, eta ondoren aipatzen den bezala izendatuko dira:
a) Titular bat, batzordeburu izango dena, eta bi ordezko, Unibertsitateko katedradunak denak, Gobernu Kontseiluak izendatuak irakasleen gaietan eskudun den organoak proposatuta.
b) Titular bat eta bi ordezko, Saileko Kontseiluak izendatuak.
c) Titular bat eta bi ordezko, Gobernu Kontseiluak zozketaren bidez izendatuak hamar irakasleren artetik, Saileko Kontseiluak proposatuta.
Batzordekide guztiak errektoreak izendatuko ditu, baita idazkaria ere.
4. Batzordeko kideak beste unibertsitate batekoak izan daitezke.
5. Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legeak arautuko du Kontratazio Batzordea.
Batzordeko kideek ez dute esku hartuko aipatu Legearen 28. eta 29. artikuluetan ezartzen diren gorabeheretako bat gertatzen denean.
6. Batzordearen osaera bere kideen inpartzialtasun eta profesionaltasun printzipioei egokitu behar zaie, eta gizonen eta emakumeen arteko osaera orekatua izateko ahalegina egin behar da, salbu eta ezinezkoa bada behar bezala arrazoitutako zio oinarritu eta objektiboengatik.
7. Kontratazio Batzordeko kideak errektorearen ebazpenaren bidez izendatuko dira eta batzordearen osaera argitaratuko da Unibertsitateko web-orrian eta iragarki ohol ofizialean, eratu baino 72 ordu aurretik, gutxienez.
8. Gobernu Kontseiluak kontratazio batzordeko kideak izendatuko ditu bi urte naturalerako, irakasle elkartuen, irakasle laguntzaile doktoreen, laguntzaileen eta irakaskuntzagatiko ordezkapen-kontratudun irakasleen lehiaketetarako.
23. artikulua. Kontratazio Batzordea eratzea.
1. Kontratazio Batzordea formalki eratuko da bere jardunetan hasi baino lehen. Ekitaldi horretarako, batzordekide guztiak bertaratu beharko dira.
2. Kontratupeko irakasle doktorearen lanpostuetarako, batzordeko buruak, gainerako batzordekideekin kontsulta egin ondoren, interesdunei jakinaraziko die, gutxienez 10 eguneko epearekin, zein egun eta ordutan egingo den ondokoa:
–Batzordearen eraketa, 21.3 artikuluan ezarritakotik gehienez ere hiru hilabeteko epean egin beharko dena. Eratzeko ekitaldian, batzordeak lehiakideak balioesteko erabiliko dituen irizpideak ezarriko ditu, baita horien zenbakizko balioespena ere.
–Lehiaketan parte hartzeko onartuak izan diren izangaien aurkezpen-ekitaldia. Ekitaldi horretan, izangaiek aurkeztuko diote Kontratazio Batzordeari, hirukoizturik, lehiaketako xedea den lanpostuaren jakintza-arloko irakasgai baten programa zehaztua, bere baitan honako hauek edukiko dituena: gaitegia, bibliografia, curriculum vitaea, irakaskuntzaren helburuak eta metodologia, eta egindako ikerketa-lanak eta izangaiak egin nahi duen ikerketa-jardunaren Proiektua. Horretaz gain, izangaiak lehen aldiko ahozko proba egiteko deituko ditu. Deialdiak zehaztuko du probak zer tokitan, egunetan eta ordutan egingo diren. Lehiatzaile bat baino gehiago bada, proba egiteko hurrenkera zozketatu egingo da. Azkenik probetarako deialdia eta probak egiteko hurrenkera argitaratuko dira.
24. artikulua. Erreklamazio Batzordea.
1. irakasle elkartuen, irakasle laguntzaile doktoreen, laguntzaileen eta irakaskuntzagatiko ordezkapen-kontratudun irakasleen lanpostuetarako, erreklamazio-batzorde bat izango da, irakaskidegoetako bost irakaslek osatua. Irakasle hauek Gobernu Kontseiluak aukeratuko ditu, hainbat jakintza-arlotakoak izango dira eta irakaskuntzan eta ikerketan esperientzia handia edukiko dute. Agintaldia lau urtekoa izango du, eta bi urtetik behin zati batean berrituko da.
2. Lan kontratupeko irakasle doktoreen lanpostuetarako hainbat jakintza arlotako unibertsitateko zazpi katedradunek osatutako erreklamazio batzorde bat izango da. Irakasle hauek Gobernu Kontseiluak aukeratuko ditu, eta irakaskuntzan eta ikerketan esperientzia handia edukiko dute. Batzordeburua eta idazkaria nortzuk izango diren esango du Gobernu Kontseiluak, baita ere. Agintaldia lau urtekoa izango du, eta bi urtetik behin zati batean berrituko da.
IV. KAPITULUA. Balioespena, kontratazio proposamenak
25. artikulua. Irakasle laguntzaile doktoreen, irakasle elkartuen, laguntzaileen eta ordezkapen kontratua duten irakasleen lanpostuetarako balioespen eta aukeraketa prozedura.
Irakasle eta laguntzaile-irudi guztiak kontratatzeko baremoak, eta lehiaketak ebazteko balioespen-irizpideak Arautegi honetako V. Tituluan biltzen dira. Nolanahi ere, erabakietan izangai bakoitzaren balioespena azalduko da, arrazoiak eman eta zenbakizko puntuazioa esleitzen duena.
26. artikulua. Irakasle kontratatu doktorearen lanpostuak balioesteko eta aukeratzeko prozedura.
Irakasle kontratatu doktorearen lanpostuetarako, izangaiak aukeratzeko prozedurak bi proba edukiko ditu:
1. Lehen proban, gehienez ere ordubete iraungo duen ahozko azalpena egingo da Batzordearen aurrean, eta gehienez ere ordubete iraungo duen eztabaida izango da berarekin honako hauei buruz: izangaiaren curriculum vitaea, irakaskuntza programa eta aurkeztutako ikerketa-proiektua.
2. Lehen proba bukatuta, Batzordeko kide bakoitzak Batzordeko buruari txosten arrazoitu bat emango dio, izangai bakoitzak azaldu dituen curriculum vitaea, eta irakaskuntza eta ikerketa-proiektuak balioesteko, eta zenbakizko puntuak emango zaio. Batzordeak emandako puntuazioen batez bestekoa egin eta hurrenez hurreneko lehiakideen zerrenda bat prestatuko du, baremoak ezartzen zuen gutxieneko puntuazioa gainditu eta bigarren probara pasatzen direnena.
3. Bigarren proban, gehienez ere ordubete iraungo duen ahozko azalpena egingo da Batzordearen aurrean, eta gehienez ere ordubete iraungo duen eztabaida izango da berarekin, izangaiak bere irakaskuntza programan aurkeztutako eta berak hautatutako gai bati buruz. Batzordeak izangai bakoitzaren balioespen arrazoitua egingo du, eta zenbakizko puntuak esleituko dizkio.
4. Bi alditako zenbakizko puntuazioak batu eta gero, Batzordeak lehiakideen zerrenda egingo da, hurrenkeraren arabera, eta kontratazio-proposamena egingo du. Berdinketarik badago, Batzordeko kideek bozketa bat egingo dute kontratazio-proposamenaren hurrenkera erabakitzeko; bozketa honetan berdinketarik badago, batzordeburuaren kalitatezko botoak erabakiko du.
27. artikulua. Proposamena.
1. Agiriak jaso eta 3 egun balioduneko epean, edo hala dagokionean, ahozko aldia egin eta geroko 3 egun baliodunetan, Kontratazio Batzordeak irakasleen gaietan eskudun den Errektoreordetzari aurkeztuko dio proposamena, balioespen handiena lortu duen izangaiak lanpostua bete dezan. Ordezkoak ere izendatu ahalko dira, merezimenduen puntuazioaren hurrenkeran.
Kontratupeko irakasle doktoreen lanpostuetarako, ezin izango du proposatu lehiaketaren xede den lanpostu-kopurua baino izangai gehiago, baina bai ordea txikiagoa den kopurua. Txosten horretan jaso beharko da izangai bakoitzak, baremoa aplikatzean, lortu dituen kalifikazioen zerrenda ordenatua.
2. Kontratazio Batzordeak proposatzen ahalko du lanpostua hutsik geratzea, lanpostuaren baremo espezifikoa aplikatu eta izangaietako inork ez duenean lortzen eskatzen den gutxieneko puntuazioa.
3. Aukeraketa prozesua bukaturik, Kontratazio Batzordeak kontratazio proposamena argitaratuko du Nafarroako Unibertsitate Publikoko iragarki ohol ofizialean. Argitaratze horrek, ondorio guztietarako, interesdunei egiten zaien jakinarazpenaren balioa edukiko du.
4. Proposamenarekin batera, Kontratazio Batzordeak argitaratuko du, hala badagokio, lanpostu bakoitzean eskatzen den gutxieneko puntuazioa berdindu edo gainditu duten izangaien zerrenda hurrenkeraren arabera ordenatua. Unibertsitateak aipatu zerrenda erabiltzen ahalko du, hurrenez hurren gainditu duten izangaiak kontratatzeko, baldin eta proposatzen den izangaiak uko egiten badu.
5. Irakasle elkartuaren lanpostuetarako, hurrenkeran zerrendaturiko izangaiak, kontratuak izateko proposatu ez direnak, lanpostua atxikia dagoen sail bereko lanpostuen lehiaketetan eta kategoria bereko presazko prozeduraren bidezko lehiaketetan kontratatuak izateko lan-poltsa batera pasatuko dira. Hautagai-poltsa honen iraupena hiru urtekoa izango da, orokorrean.
28. artikulua. Kontratazio Batzordearen proposamenaren aurkako erreklamazioa.
1. Interesdunek zilegi dute erreklamazioa Kontratazio Batzordeak egiten dituen proposamenen aurka, Nafarroako Unibertsitate Publikoko errektorearen aurrean, hamar laneguneko epean, argitaratzen den egunaren biharamunetik kontatzen hasita.
2. Arautegi honetako 24. artikuluan aipatutako Erreklamazio Batzordeak aztertuko ditu erreklamazioak, hurrengo artikuluan ezarritakoarekin bat etorriz.
29. artikulua. Erreklamazio Batzordearen berrikuspena.
1. Erreklamazioa aurkeztu ondoren, Unibertsitateko Giza Baliabideen Zerbitzuak dagokion iragarkia jarriko du Unibertsitateko iragarki ohol ofizialean eta web-orrialdean, eta interesdunek hurrengo hamar lanegunetan epea izango dute egoki iruditzen zaizkien alegazioak aurkezteko. Aipatu iragarkian interesdunei jakinaraziko zaizkie gai honetan Erreklamazio Batzordeak hartzen dituen erabakiak, hurrengo idatz-zatian ezarritakoarekin bat etorriz.
2. Erreklamazio Batzordeak, aurkeztu den erreklamazioa ikusirik, erabaki hauetakoren bat hartuko du zuzenbidearen arabera:
2.1. Eskumenik ez daukala uste badu, aurkeztutako erreklamazioa ez onartzea.
2.2. Erreklamazioa jarri duen alderdia babesik gabe utzi duen prozedura akatsen bat dagoela uste badu, hautaketa prozedura atzera eramatea aipatu forma haustearen unera.
2.3. Baremoaren aplikazioan akats material edo kalkulu-akats ageriko eta bistakoa egin dela uste badu, Kontratazio Batzordearen proposamenean atzemandako akats materiala zuzentzea, horrek dakartzan ondorio guztiekin, Kontratazio Batzordeak proposatutako hautagaien hurrenkera aldatzeari dagokionez.
2.4. Egindako alegazioek halako oinarri bat badutela uste badu, alegazio horiek dagokion lehiaketako Kontratazio Batzordeari igortzea, txosten osagarri bat egin dezan aurkeztutako erreklamazioan dauden uzi edo argudiaketa guztiei edo batzuei buruz. Alde horretatik, aurkeztutako erreklamazioaren arabera, emandako puntuazioak arrazoitzeko edo berrikusteko, edota bi gauzak batera egiteko, eskatuko dio Erreklamazio Batzordeak Kontratazio Batzordeari.
Kontratazio Batzordeak igorritako txostena eta lanpostua betetzeko gainerako izangaiek aurkeztutako alegazioak ikusirik, Erreklamazio Batzordea Kontratazio Batzordearen proposamen berria berretsiko du edo ez. Ez du berretsiko, betiere, proposatutako hurrenkera zehazteko arbitrariotasun bistakoaz jokatu bada, eta, beraz, agerikoa bada ez direla errespetatu berdintasun, merezimendu eta gaitasun printzipioak.
Kontratazio Batzordearen proposamena berresten ez bada, lanpostua hutsik geratuko da. Nolanahi ere, Kontratazio Batzordearen proposamenean atzemandako arbitrariotasun arrazoiak jaso beharko ditu Erreklamazio Batzordeak.
2.5. Berdintasun, merezimendu edo gaitasun printzipioak urratu direla esateko arrazoi nahikorik ez dagoela, eta, beraz, arbitrariotasun-arrazoirik ez dagoela uste badu, Kontratazio Batzordearen proposamena berretsiko du zuzenean Erreklamazio Batzordeak.
3. Erreklamazio Batzordeak bere kideen gehiengoz hartuko ditu erabakiak, eta, berdinketa izanez gero, batzordeburuak izango du boto erabakitzailea; beharrezkotzat jotzen dituen txostenak eskatuko ditu eta berariaz txosten juridikoa Unibertsitateko Zerbitzu Juridikoari.
Gehienez ere hilabeteko epea dauka Erreklamazio Batzordeak, erreklamazioa aurkezten den egunetik kontatzen hasita, erabakia hartzeko. Abuztua hil baliogabea izango da horretarako.
4. Aurkeztutako erreklamazioari buruz Erreklamazio Batzordeak erabakitzen duena loteslea izango da errektorearentzat, eta honek ebazpen bat emango du aurkeztutako erreklamazioa ebazteko. Ebazpen horrek administrazio-bidea amaitzen du, eta bere aurka zilegi da administrazioarekiko auzi errekurtsoa, Nafarroako Administrazioarekiko Auzien Epaitegian, bi hilabeteko epean.
30. artikulua. Behin betiko proposamena.
Kontratazio-proposamena daukan errektorearen ebazpena horretarako esleitzen den Nafarroako Unibertsitate Publikoko iragarki ohol ofizialean jarriko da jendaurrean. Argitaratze horrek, ondorio guztietarako, interesdunei egiten zaien jakinarazpenaren balioa edukiko du.
Ebazpen horrek administrazio-bidea agortzen du, eta bere aurka zilegi da administrazioarekiko auzi errekurtsoa Nafarroako Administrazioarekiko Auzien Epaitegian bi hilabeteko epean.
V. KAPITULUA. Kontratuak gauzatzea eta izenpetzea
31. artikulua. Dokumentazioa.
1. Kontratazio-proposamena argitaratu eta bost laneguneko epean, lanpostuak lortu dituztenek aurkeztu beharko dituzte Langileen Kudeaketako Atalean, Arautegi honetako 21.4 artikuluan ezartzen den moduan, deialdiko oinarrietan eskatzen diren baldintza orokor edo partikularrak egiaztatzen dituzten jatorrizko agiriez, edo kopia erkatuez aparte, ondoren aipatzen diren agiriak, dagokion kontratua gauzatzeko:
a) Gizarte Segurantzako Erregimen Orokorreko afiliazio-txartelaren fotokopia, hala dagokionean.
b) Bankuko datuak nomina sartzeko.
c) Txartel tamainako argazkia, berriki egindakoa.
d) Bateraezintasunik ez izatearen aitorpena.
2. Kontratatuak izateko eskubidea galduko dute ezarritako epearen barruan, eta ezinbesteko arrazoirik egon ezean, agiriak aurkezten ez dituztenek, edo eta agiriak azterturik, lanpostua betetzeko eskatzen den betebeharreko baldintzaren bat falta dutenek.
32. artikulua. Kontratua gauzatzeko modua.
1. Arautegi honen eta dagozkion deialdien ondorio diren lan-kontratuak Unibertsitateei buruzko Lege Organikoaren 48. artikuluak eta ondorengoek ezartzen dutenaren mende egongo dira.
2. Kontratua izenpetzea pertsonala eta besterenganaezina da eta Nafarroako Unibertsitate Publikoko Giza Baliabideen Zerbitzuan egingo da.
3. Kontratua lanean hasi baino lehen izenpetuko da, 10 egun naturaleko gehieneko epean, lanpostuaren ebazpena argitaratzen den egunaren biharamunetik kontatzen hasita.
4. Irakasle elkartuen kontratuak eta behin-behineko kontratuak ikasturteka edo seihilekoka gauzatuko dira, eta ezarritako epean bukatuko dira. Inoiz ezin izango da ulertu automatikoki luzatzen direla, eta langile kontratatuek ez dute edukiko kontratuak luzatzeko inolako eskubiderik.
Irakasleen gaietan eskumena duen organoari dagokio kontratuak luzatzeko ekimena Unibertsitateko errektoreari proposatzea, dagokion Saileko Kontseiluak aldeko txostena egin eta gero.
5. Kontratatua dagokion saileko zuzendariaren aurrean aurkeztu beharko da, kontratuak ezartzen duen egunean lanari ekiteko. Kontratuak ezartzen duen egunean lanean hasten ez bada langilea eta Nafarroako Unibertsitate Publikoak uste badu horretarako bidezko arrazoirik ez dagoela, kontratua baliogabetuta geratuko da, eta jardun guztiak deuseztaturik.
6. Kontratua izenpetzen ez bada edo lan-kontratuduna lanean hasten ez bada, goiko lerroaldeetan aipatzen diren epeetan, interesdunak lanpostuari uko egiten diola ulertuko da. Bi kasuetan, Kontratazio Batzordeak lanpostu horretarako proposatzen duen ordezkoen zerrendan hurrengoa dagoen izangaiari deituko zaio, eta honek epe berdina edukiko du kontratua gauzatzeko.
IV. TITULUA. PRESAZKO PROZEDURAREN BIDEZKO KONTRATAZIOA
33. artikulua. Premiazko kontratazioak.
1. Nafarroako Unibertsitate Publikoak presazko prozeduraren bidezko lehiaketarako deialdia egiten ahalko du gerora sortutako arrazoiak direla-eta, ikasturte barruan irakasle bat ordezkatzea, edo azken lehiaketako hautagaiek lanpostuari uko egin edo lehiaketa hutsi geratu denean, eta irakaskuntza-beharrek hala justifikatzen dutenean. Presazko prozeduraren bidez soilik kontratatzen ahalko dira irakasle elkartuak. Kontratazio horretarako, jarraian azaldu bezala jokatuko da.
a) Deialdiren batean proposatu diren izangaien zerrendaren bat badago, eta deialdiak hiru urte baino gutxiago baditu, beharra sortu duen lanpostuaren maila bereko edo handiagoko eta sail bereko irakasle eta ikertzaileak kontratatzeko, punturik gehien duen izangaia kontratatuko da, edo honen ondorengoak, betiere ezarri den gutxieneko puntuazioa gainditu badu. Izangaien zerrenda bat baino gehiago badago, Sailaren txostenak erabakiko du lanpostuari hobekien egokitzen zaion zerrenda zein den.
b) Aurreko deialdietan sorturiko izangaien zerrendarik ez badago, Nafarroako Unibertsitate Publikoak beste lehiaketa baterako deialdia egiten ahalko du presazko prozeduraren bidez.
2. Saileko Kontseiluak, irakasle bat ordeztu behar bada, eta maila bereko edo handiagoko lehiaketaren batean gutxieneko puntuazioa lortu duen izangairik ez badago, berehala eskatzen ahalko du lehiaketarako deialdia egiteko irakasle elkartu bat kontratatzeko. Irakasleen gaietarako organo eskudunak kasu bakoitzean erabakiko du kontratazioaren premiaren gainean.
3. Presazko prozeduraren bidez egiten diren kontratuen iraupena, ordezten den irakaslearen ausentziaren iraupenaren bestekoa izango da, hala badagokio.
4. Prozedura honetan ezartzen ez den orotan, arautegi honetan arautzen den ohiko prozedurak ezartzen duenari jarraituko zaio.
34. artikulua. Presazko prozeduraren epeak.
Presazko prozedurako lehiaketetan, ezarritako epeak honako hauek izango dira:
–3 egun baliodun eskaera aurkezteko.
–2 egun baliodun behin-behineko zerrendak argitaratzeko, eta,
–5 egun baliodun behin-behineko zerrendari erreklamazioak aurkezteko, izangai baztertuak edo azaldu gabeak baldin badaude.
35. artikulua. Kontratazio Batzordea.
Premiazko izaera duten lehiaketetan Kontratazio Batzordea ohiko prozedurarako ezartzen den berbera izango da.
V. TITULUA. IRAKASLE-MOTA GUZTIAK KONTRATATZEKO BAREMOAK
36. artikulua. Irakasle Elkartuaren lanpostuak.
Unibertsitateei buruzko 6/2001 Lege Organikoaren 53. artikuluak arautzen dituen irakasle elkartuaren lanpostuetarako, honako baremo hau finkatuko da: Irizpide orokor gisa, honako elementu hauek balioetsiko dira, eta beti kontuan hartuko da, atal guztietan, lanpostuaren jardueraren eta profilaren arteko harremana:
a) Lanbide-jarduera. Lanbide-jardueratzat hartuko da lanpostuaren profilarekin loturiko edozein lanbide jarduera (gehienez ere 11 puntu).
b) Ikasketa-espedientea (gehienez 4 puntu). Espedientea eskatzen den titulazioari dagokiona izango da, 0 eta 1 arteko faktore batez biderkatzen ahalko dena, lehiaketaren xede den lanpostuaren titulazioari egokitzen zaion neurriaren arabera. Gainditu bakoitzak puntu 1 balioko du, Oso Ongi bakoitzak: 2 puntu, Bikain bakoitzak: 3 puntu eta Ohorezko matrikula bakoitzak: 4 puntu. Guztira ateratzen den puntuazioa egindako irakasgai-kopuruaren artean zatituko da, eta horretarako ez dira kontuan hartuko “ez aurkeztuak” eta “ez gaindituak”. Kredituen arabera egituratzen diren ikasketa planen kasuan, espedientearen batez bestekoa honela aterako da: irakasgai bakoitzaren kalifikazioa bider irakasgai bakoitzaren kreditu-kopurua, biderkadura horien emaitzak batu, eta ateratzen dena zati kreditu-kopurua, guztira. Puntuazioa zenbakizkoa bada, 0tik 4ra hainbanatzen da.
c) Gehienez ere 2 puntu emango dira doktoretzagatik, hautagaiak ateratako puntuzioaren arabera.
d) Irakaskuntza-programa (gehienez 3 puntu). Honako hauek edukiko ditu: gaiak, bibliografia, helburuak eta irakasteko metodologia.
e) Irakaslanak unibertsitatean (gehienez 2 puntu).
f) Ikerketaren arloko lan eta jarduerak (gehienez 5 puntu).
g) Irakasle laguntzaile doktoreen, kontratupeko irakasle doktoreen edo unibertsitateko edozein irakaskidegoren lanpostuetarako akreditatua izatea deialdiko lanpostuari dagokion jakintza arloan (gehienez ere, 4, 6 eta 8 puntu, hurrenez hurren, eta bakarrik maila handieneko akreditazioa balioetsiko da.
h) Beste merezimendu batzuk (gehienez 4 puntu). Atal honetan, Batzordearen irizpidearen arabera, ondokoak balioetsiko dira: hizkuntzak, jasotako berezitasun-ikastaroak, atzerriko egonaldiak, beste titulazio batzuk, bekak, sariak eta eta lehiakideak ematen duen beste edozein datu.
Batzordeak elkarrizketa egin ahalko du, behin betiko proposamena egiteko, eta gehienez 2 puntu eman ahalko ditu horregatik.
Kontratazio batzordearen erabakietan izangai bakoitzaren balioespena azalduko da, arrazoiak eman eta zenbakizko puntuazioa esleitzen duena.
Kontrataziorako proposamena egiteko, azken puntuazioa 12 puntukoa edo gehiagokoa izango da.
37. artikulua. Laguntzaile lanpostuak.
1. Unibertsitateei buruzko 6/2001 Lege Organikoaren 49. artikuluak arautzen dituen laguntzaile lanpostuetarako, honako baremo hau finkatuko da:
Irizpide orokor gisa, honako elementu hauek balioetsiko dira, eta beti kontuan hartuko da, atal guztietan, lanpostuaren jardueraren eta profilaren arteko harremana:
a) Ikasketa-espedientea (gehienez 12 puntu). Batez besteko nota 36 (b) artikuluan ezarritako irizpidearen arabera kalkulatuko da, 1 eta 3 arteko faktore batez biderkatua, lanpotuaren profilera egokitzen den neurriaren arabera.
b) Unibertsitateko irakaslanak, behar bezala egiaztaturik kontratuaren bidez eta jarduera balioesteko txostenaren bidez (gehienez 2 puntu).
c) Entitate publikoetako lankidetza-bekak (gehienez 2 puntu).
d) Ikerketarako bekak eta zientziaren arloko argitalpenak (gehienez 8 puntu).
e) Irakaskuntzako eta Ikerketako lankidetzari buruzko oroitidazkia (gehienez 2 puntu).
f) Beste merezimendu batzuk (gehienez 4 puntu). Atal honetan, Batzordearen irizpidearen arabera, ondokoak balioetsiko dira: unibertsitatekoak ez diren beste lanbide-jarduera batzuk, hizkuntzak, jasotako berezitasun-ikastaroak, atzerriko egonaldiak, beste titulazio batzuk, bekak, sariak eta lehiakideak ematen duen beste edozein datu.
2. Batzordeak elkarrizketa egin ahalko du, behin betiko proposamena egiteko, eta gehienez 2 puntu eman ahalko ditu horregatik.
3. Kontratazio batzordearen erabakietan izangai bakoitzaren balioespena azalduko da, arrazoiak eman eta zenbakizko puntuazioa esleitzen duena.
Kontrataziorako proposamena egiteko, azken puntuazioa 12 puntukoa edo gehiagokoa izango da.
38. artikulua. Irakasle Laguntzaile Doktorearen lanpostuak.
Unibertsitateei buruzko 6/2001 Lege Organikoaren 50. artikuluak arautzen dituen irakasle laguntzaile doktorearen lanpostuetarako, honako baremo hau finkatuko da:
Irizpide orokor gisa, honako elementu hauek balioetsiko dira, eta beti kontuan hartuko da, atal guztietan, lanpostuaren jardueraren eta profilaren arteko harremana:
a) Ikerketa lanak eta zientziaren arloko argitalpenak (gehienez 12 puntu).
b) Hautagaiaren ikerketa egonaldiak berarekin lan edo prestakuntza harremana duen unibertsitatea edo ikerketa zentroa ez den ospe handiko unibertsitateetan edo ikerketa zentroetan, Espainian zein atzerrian (gehienez 4 puntu).
c) Entitate publikoetako ikerketa-bekak (gehienez 2 puntu).
d) Ikasketa-espedientea (gehienez 4 puntu). Batez besteko nota 36 (b) artikuluan ezarritako irizpidearen arabera kalkulatuko da, 0 eta 1 arteko proportzionaltasun koefizientea aplikatzen ahal dela, titulazioa lanpostuaren profilera egokitzen den neurriaren arabera.
e) Gehienez ere 2 puntu emango dira doktoretzagatik, hautagaiak ateratako puntuazioaren arabera.
f) Unibertsitateko irakaslanak, kontratuaren bidez behar bezala justifikaturik (gehienez 4 puntu).
g) Irakaskuntza eta ikerketa proiektua (gehienez 5 puntu).
h) Kontratupeko irakasle doktoreen edo unibertsitateko edozein irakaskidegoren lanpostuetarako akreditatua izatea deialdiko lanpostuari dagokion jakintza arloan (gehienez ere, 6 eta 8 puntu, hurrenez hurren, eta bakarrik maila handieneko akreditazioa balioetsiko da.
i) Beste merezimendu batzuk (gehienez 2 puntu). Atal honetan, Batzordearen irizpidearen arabera, ondokoak balioetsiko dira: unibertsitatetik kanpo egindako lana, hizkuntzak, jasotako berezitasun-ikastaroak, beste titulazio batzuk, bekak, sariak eta lehiakideak ematen duen beste edozein datu.
Batzordeak elkarrizketa egin ahalko du, behin betiko proposamena egiteko, eta gehienez 2 puntu eman ahalko ditu horregatik.
Kontratazio batzordearen erabakietan izangai bakoitzaren balioespena azalduko da, arrazoiak eman eta zenbakizko puntuazioa esleitzen duena.
Kontrataziorako proposamena egiteko, azken puntuazioa 18 puntukoa edo gehiagokoa izango da.
39. artikulua. Irakasteko ordezkapen kontratua duten irakasleen lanpostuak.
Unibertsitateei buruzko Lege Organikoa aldatzen duen Lege Organikoaren 48. artikuluak arautzen dituen irakaskuntzarako ordezkapen kontratua duten irakasleen lanpostuetarako, honako baremo hau finkatuko da:
Irizpide orokor gisa, honako elementu hauek balioetsiko dira, eta beti kontuan hartuko da, atal guztietan, lanpostuaren jardueraren eta profilaren arteko harremana:
a) Ikasketa-espedientea (gehienez 8 puntu). Balioespena eskatzen den titulaziorako 36 (b) artikuluan aplikatzen den irizpidearekin proportzionala izango da.
b) Gehienez ere 5 puntu emango dira doktoretzagatik, hautagaiak ateratako puntuzioaren arabera.
c) Entitate publikoetako lankidetza-bekak (gehienez 2 puntu).
d) Irakaskuntza-programa (gehienez 8 puntu). Programak honako hauek edukiko ditu: gaiak, bibliografia, helburuak eta irakasteko metodologia.
e) Irakaslanak, lehentasunez unibertsitatean (gehienez 4 puntu).
f) Ikerketaren arloko lan eta jarduerak (gehienez 4 puntu).
g) Irakasle laguntzaile doktoreen, kontratupeko irakasle doktoreen edo unibertsitateko edozein irakaskidegoren lanpostuetarako akreditatua izatea deialdiko lanpostuari dagokion jakintza arloan (gehienez ere, 4, 6 eta 8 puntu, hurrenez hurren, eta bakarrik maila handieneko akreditazioa balioetsiko da.
h) Beste merezimendu batzuk (gehienez 4 puntu). Atal honetan, Batzordearen irizpidearen arabera, ondokoak balioetsiko dira: unibertsitatekoak ez diren beste lanbide-jarduera batzuk, hizkuntzak, jasotako berezitasun-ikastaroak, atzerriko egonaldiak, beste titulazio batzuk, bekak, sariak eta lehiakideak ematen duen beste edozein datu.
Kontrataziorako proposamena egiteko, azken puntuazioa 18 puntukoa edo gehiagokoa izango da.
40. artikulua. Irakasle Kontratatu Doktorearen lanpostuak.
Unibertsitateei buruzko 6/2001 Lege Organikoaren 52. artikuluak arautzen dituen irakasle kontratatu doktorearen lanpostuetarako, honako baremo hau finkatuko da:
1. Lehen aldiko ahozko proba (gehienez 40 puntu). Gutxienez 20 puntu lortzen ez dituzten lehiakideak baztertu egingo dituzte.
Jardueraren eta lanpostuko eskakizunen arteko harremanari dagokionez, honako elementu hauek balioetsiko dira:
a) Ikerketa lanak eta zientziaren arloko argitalpenak (gehienez 18 puntu).
b) Unibertsitateko irakaslanak, behar bezala egiaztaturik kontratuaren bidez eta jarduera balioesteko txostenaren bidez (gehienez 10 puntu).
c) Irakaskuntza-proiektua (gehienez 8 puntu). Honako hauek edukiko ditu: gaiak, bibliografia, helburuak eta irakasteko metodologia.
d) Beste merezimendu batzuk (gehienez 4 puntu). Atal honetan, Batzordearen irizpidearen arabera, ondokoak balioetsiko dira: unibertsitatetik kanpo egindako lana, hizkuntzak, jasotako berezitasun-ikastaroak, beste titulazio batzuk, bekak, sariak eta lehiakideak ematen duen beste edozein datu.
Batzordekide bakoitzak balioetsiko ditu izangaien merezimenduak, eta aldi honetako puntuazioa izangai bakoitzari ematen zaion puntuazioaren batez besteko aritmetikoa izango da.
2. Bigarren aldiko ahozko proba (gehienez 20 puntu). Irizpide orokor gisa, balioetsiko dira bai azaldutako edukiak bai azalpenaren beraren irakaskuntza kalitatea. Gutxienez 10 puntu lortzen ez dituzten lehiakideak baztertu egingo dituzte.
3. Azken puntuazioa bi aldietako zenbakizko puntuazioen batura izango da.
Kontrataziorako proposamena egiteko, azken puntuazioa 30 puntukoa edo gehiagokoa izango da.
VI. TITULUA. IRAKASLE EMERITUAK ETA IRAKASLE BISITARIAK SARTZEARI BURUZ
I KAPITULUA. Irakasle emerituak
41. artikulua. Kontratazioa.
Nafarroako Unibertsitate Publikoak aldi baterako kontratatzen ahalko ditu irakasle emeritu gisa Unibertsitatean zerbitzu nabarmenak egin dituzten irakasle funtzionario erretirodunak, aurrekontu aurreikuspenen barruan eta lanpostuen zerrendan ezarritakoarekin bat.
42. artikulua. Irakasle emerituak kontratatzeko eskaera egiteko baldintzak.
Irakasle emeritu gisa kontratatua izateko, ezinbesteko baldintzak dira honako hauek:
–Doktore izatea,
–Erretiroa nahitaez hartua izana, adinagatik eta.
–Nafarroako Unibertsitate Publikoan zerbitzu nabarmenak egin izana.
43. artikulua. Irakasle emerituak kontratatzeko proposamena.
a) Irakasle emerituen lanpostuetarako eskaerak urte bakoitzaren urrian egingo dira. Erretiroa hartuko den ikasturtean bertan edo behin erretiroa hartu ondoren egin ahalko da eskaera.
b) Interesdunak errektoreari zuzenduko dio eskaera. Irakasle emerituen lanpostuetarako eskaera bakoitzak curriculum vitaea eta garatu beharreko jarduerei buruzko memoria erantsi beharko du.
c) Errektoreak edo irakasleen gaietan eskumena duen organoak eskaera igorriko du eskatzaileari dagokion sailera.
d) Dagokion Saileko Kontseiluak txosten bat egingo du irakasle emeritua kontratatzeko eskaerari buruz eta eskatzaileak garatu nahi dituen jarduerak sailaren irakaskuntza eta ikerkuntza jarduerekiko duten egokitzapenari buruz. Txosten hori irakasleen gaietan eskumena duen organoari igorriko zaio.
44. artikulua. Prozedura.
a) Irakaskuntza Batzordeak honako elementu hauek balioetsiko ditu, egindako eskaerari buruzko informazioa emateko:
1.–Hautagaiaren ikerketa-curriculuma: gehieneko puntuazioa 30 puntu.
2.–Hautagaiaren irakaskuntza-curriculuma: gehieneko puntuazioa 20 puntu.
3.–Unibertsitateko kudeaketa-jarduna: gehieneko puntuazioa 15 puntu.
4.–Sariak eta bestelako merezimendu nabarmenak: gehieneko puntuazioa 10 puntu.
5.–Irakasle emeritu izendatua izanez gero, garatu beharreko jarduerei buruzko txostena: gehienez ere 5 puntu.
6.–Jarduera atzerrian garatu duten irakasleen irakaskuntza eta ikerkuntza merezimenduak Unibertsitateei buruzko Lege Organikoko 89. artikuluak xedatzen duen bezala balioetsiko dira.
b) Irakaskuntza Batzordeak eskaera baten aldeko txostena eman dezan, 1. eta 2. ataletako puntuazioak batuta, gutxienez 40 puntu eduki beharko dira, eta, puntuazio osoan, gutxienez 50 puntu.
c) Irakaskuntza Batzordeak txostena igorriko dio irakasleen gaietan eskuduna den organoari. Hark, bere aldetik, eskatzaileari igorriko dio, eta eskatzaileak irakasle emeritu gisa kontratatua izateko eskaera erretiratzeko eskubidea izango du, prozesuaren edozein unetan.
d) Irakasleen gaietarako organoak errektoreari igorriko dio irakasle emeritua kontratatzeko proposamena, aldekoa edo aurkakoa.
e) Errektoreak ebatziko du erretirodun irakaslea irakasle emeritu gisa kontratatzea bidezkoa den edo ez.
45. artikulua. Kontratuaren iraupena eta luzapena.
a) Irakasle emerituen kontratuak urtebeteko iraupena izango du gehienez ere.
b) Kontratua, aldez aurretik interesdunak hala eskatuta, urtebeteko luzapena edukitzen ahalko du, bi aldiz gehienez. Eskaera horretan luzapenaren beharra adieraziko da, irakasle emerituaren kontratuaren eskaeran aurkezturiko garatu beharreko jarduerei buruzko oroitidazkiarekin bat. Edonola ere, jatorrizko kontratuak eta bere luzapenek ez dute inola ere hiru urte baino gehiago iraungo.
c) Dagokion Saileko Kontseiluari emango zaio luzapen eskaeraren berri.
d) Luzapena emateko beharrezkoa izango da Gobernu Kontseiluaren irakaskuntza batzordearen adostasun txostena, irakasle emerituak garatutako jarduerei buruz, eta Saileko Kontseiluak adierazitako luzapenaren beharra.
e) Edozein kasutan, errektoreak ebatziko du luzapenaren berritzea.
f) Alabaina, kontratu harremana amaitu arren, irakasle emerituaren izendapena biziartekoa eta ohorezkoa izango da.
46. artikulua. Eskubideak eta betebeharrak.
Irakasle emerituen eskubideak eta betebeharrak irakasle kontratatuentzat oro har ezarritakoak izango dira, kontratu bakoitzeko klausuletan ezarritakoa galarazi gabe.
Sailek irakaskuntzako, egonaldiko eta ikerketako betebeharrak ezartzen ahal dizkiete irakasle emerituei, gainerako irakasleek ez dituztenak hain zuzen.
II. KAPITULUA. Irakasle bisitariak
47. artikulua. Irakasle bisitariak.
Nafarroako Unibertsitate Publikoak irakasle bisitariak kontratatzen ahal ditu, aurrekontu aurreikuspenen barruan. Hauek, ospe handi eta ezaguneko irakasleak eta ikertzaileak izango dira, beste hainbat unibertsitatetan edo ikerketa-zentrotan zerbitzu nabarmenak ematen ari direnak, zentro hauek Espainiakoak edo atzerrikoak izanik.
48. artikulua. Irakasle bisitariak kontratatzeko proposamenak.
a) Irakasle bisitaria kontratatu nahi duen sailak kontrataziorako proposamena igorriko dio irakasleen arloan eskumena duen organoari.
b) Proposamen bakoitzean azaldu beharrekoa:
–Saileko Kontseiluak hartutako erabakiaren ziurtagiria, bertako idazkariak emana.
–Beharren oroitidazkia, Sailak egina,
–Curriculum vitaea, irakaskuntza eta ikerketa proiektuarekin batera, proposatutako irakasleak aurkeztua.
49. artikulua. Irakaskuntza Batzordearen balioespena.
a) Gobernu Kontseiluaren Irakaskuntza Batzordeak memoria eta proiektua aztertuko ditu, eta proposamenaren aldeko edo kontrako txostena egingo. Irakasleen arloan eskumena duen organoak errektoreari igorriko dio Irakasukuntza Batzordearen txostena.
b) Irakasle bisitaria kontratatzea erabaki aurretik, batzorde akademikoaren txostena ikusiko du errektoreak.
50. artikulua. Kontratuaren iraupena eta luzapena.
a) Irakasle emerituen kontratuek bi urteko iraupena izango dute gehienez ere.
b) Kontratua gutxienez 6 hilabetekoa izango da.
c) Salbuespenez, beste urte baterako luzatzen ahal da kontratua, gehienez ere hiru urte egin arte. Luzapena emateko, Gobernu Kontseiluaren Irakaskuntza Batzordeak balorazio positiboa egin beharko du irakaskuntza eta ikerketako hasierako proiektuaren garapenari eta sailaren beharrei buruz.
d) Luzapena emateko beharrezkoa izango da irakaskuntza batzordearen adostasun txostena, irakasle bisitariak garatutako jarduerei buruz, eta saileko kontseiluak adierazitako luzapenaren beharra.
e) Edonola ere, errektoreak erabakiko du Irakasle bisitariaren kontratuaren luzapena, irakaskuntza batzordearen txostena entzun ondoren.
51. artikulua. Eskubideak eta betebeharrak.
Irakasle bisitarien eskubideak eta betebeharrak irakasle kontratatuentzat oro har ezarritakoak izango dira, kontratu bakoitzeko klausuletan ezarritakoa galarazi gabe.
Sailek irakaskuntzako eta ikerketako betebeharrak ezartzen ahal dizkiete irakasle bisitariei, gainerako irakasleek ez dituztenak hain zuzen.
Lehenengo Xedapen Gehigarria
Sailek hartuko dute bere gain bere irakaskuntza-planaren ondorio diren irakaskuntza-beharrak, hasteko edo bidean dauden kontratazio-prozedurak alde batera utzita.
Bigarren Xedapen Gehigarria
Araudi honetan, gaztelaniazko testuan, genero maskulinoan agertzen diren pertsonak, kolektiboak edo kargu akademikoak, horrela agertzen dira markarik gabeko genero gramatikala delako. Hala dagokionean, genero femeninoa duten formak ere baliozkoak izango dira aginduen aipamenetan.
Azken Xedapena
Bakarra.–Nafarroako Aldizkari Ofizialean argitara eman, eta biharamunean hartuko du indarra Erregelamendu honek.
