navarra.es
Castellano | Euskara | Français | English
Ezagutzera eman
1746/2011 Ebazpena, azaroaren 16koa, Nafarroako Unibertsitate Publikoko errektoreak emana, "Nafarroako Unibertsitate Publikoaren Ikastegi eta Sailetako Esparru Arautegia", Gobernu Kontseiluak 2011ko azaroaren 16an hartutako erabakiaren bidez onetsia,
1746/2011 Ebazpena, azaroaren 16koa, Nafarroako Unibertsitate Publikoko errektoreak emana, "Nafarroako Unibertsitate Publikoaren Ikastegi eta Sailetako Esparru Arautegia", Gobernu Kontseiluak 2011ko azaroaren 16an hartutako erabakiaren bidez onetsia, argitaratzeko agindua ematen duena
(2011ko 237. NAOn argitaratutako testua, azaroaren 30ean)
Atarikoa
Maiatzaren 12ko 110/2003 Foru Dekretuak onetsitako Unibertsitateko Estatutuen 40. artikuluak ematen dizkidan eskumenak erabiliz, 2011ko azaroaren 16an Gobernu Kontseiluak onetsi zuen Erabakia argitaratzeko agintzen dut. Erabaki horren bidez "Nafarroako Unibertsitate Publikoaren Ikastegi eta Sailetako Esparru Arautegia" onetsi zen, eta hona hemen hitzez hitz:
"NAFARROAKO UNIBERTSITATE PUBLIKOKO IKASTEGI ETA SAILETAKO ESPARRU-ARAUTEGIA
Unibertsitate honetako Ikastegi eta Sail guztietako Barne Eraentzako Arautegiak Ikastegi eta Sailetako Esparru Arautegiari egokitu behar zaizkio, eta, era berean, arautegi hau egokitu behar zaie martxoaren 12ko 110/2003 Foru Dekretuaren bidez onetsitako eta Nafarroako Gobernuak 2011ko martxoaren 21ean onetsitako Erabakiaren bidez aldatutako Unibertsitatearen Estatutuei, eta eremu mugatuko gobernu erakunde kolegiatuek beren barne funtzionamenduko arautegiak Estatutuen aldaketan eta Ikastegi eta Sailetako Esparru Arautegian ezarritako aginduei egokitu eta Gobernu Kontseiluari bidali beharko dizkiote honek onets ditzan.
LEHEN TITULUA. IKASTEGIAK
I. KAPITULUA. Izena, osaera eta eginkizunak
1. artikulua. Izena.
Ikastegiak eta Fakultateak gradu tituluak lortzeko irakaskuntzak eta irakaskuntza-, administrazio- eta kudeaketa-prozesuak antolatzen dituztenak dira. Halaber, Unibertsitateko Gobernu Kontseiluak esleitzen dizkien beste tituluak lortzeko irakaskuntzak emateko aukera izango dute. Halaber, Estatutuek eta gainerako arau aplikagarriek ezartzen dituzten beste eginkizun guztiak ere beteko dituzte.
2. artikulua. Osaera.
Ikastegia osatzen dute Ikastegian irakaskuntza ofiziala ematen duten irakasleek eta ikertzaileek, Ikastegiari atxikitako titulazio ofizialetan matrikulatutako ikasleek eta Ikastegiari atxikitako administrazio eta zerbitzuetako langileek.
3. artikulua. Eginkizunak.
Ikastegien eginkizunak dira:
a) Beren eskumeneko irakaskuntzaren ikasketa planetako irakasgaiak irakasteko programazioaren proposamena egitea.
b) Titulazio bakoitzeko ikasketa planei dagozkien programen jarraibide berariazkoak ezartzea, non orientabidea eta eduki oinarrizkoak eta bazterrezinak jasoko diren, bai eta koordinatzeko eskakizunak ere.
c) Sailek esleitutako irakasleekin erabakitzea irakasgaien egokitzea titulazioetara.
d) Irakasteko eta ikasteko metodologiak hobetzeko sustatzea eta laguntzea.
e) Kalitatearen ebaluaziorako eta ikasketen egiaztapenerako ekimen guztietan hurbiletik laguntzea.
f) Aurrekontuak, kudeaketarako eta zuzendaritzarako baliabideak eta bere esku jarritako gainerako baliabide materialak ikasketei esleitzea.
g) Irakaskuntza nola ematen den egiaztatzea.
h) Kredituak aitortu eta transferitzeko espedienteak tramitatu eta ebaztea, bai eta ikasketa ziurtagiriak ematea ere, bere eskumenei dagozkienak.
i) Beren ikasketen eskaintza sustatzea.
j) Etorkizuneko tituludunei laneratzen lagunduko dieten jarduerak burutzea.
k) Beste unibertsitate-erakundeekin eta zientzia erakunde batzuekin, eta bestelako entitate publiko zein pribatuekin harremanak sustatzea.
l) Sailaren barne eraentzako arautegia egitea.
m) Arau indardunek edo Unibertsitateko Estatutu hauek esleitzen dizkieten beste edozein eginkizun.
II. KAPITULUA. Organoak
1. atala. Ikastegiko Batzordea
4. artikulua. Ikastegiko Batzordea.
Ikastegiak duen ohiko gobernu erakundea da Ikastegiko Batzordea, eta ematen dituen ikasketak antolatzeko arduraduna, dauzkan eskumenen barnean.
5. artikulua. Osaera.
1. Hauek dira Ikastegiko Batzordeko kideak:
a) Dekanoa edo zuzendaria, batzordeburua izango dena.
b) Ikastegiko idazkaria.
c) Unibertsitatearekin lotura iraunkorra duten hiru irakasle, zuzendariak edo dekanoak izendatuak, Ikastegian irakaskuntza ematen dutenen artean.
d) Ikastegian irakasten ari diren irakasleak eta ikertzaileak ordezkatuko dituzten hiru irakasle. Horietatik bi Unibertsitateko irakaskidegoetakoak izango dira edo kontratupeko irakasle doktoreak izango dira, eta bat gainerako irakasle eta ikertzaileetakoa izango da.
e) Ikastegiari atxikitako titulazio ofizialetan matrikulatutako ikasleen bi ordezkari.
f) Ikastegiari atxikitako administrazio eta zerbitzuetako langileen ordezkari bat, eta hark ordezko bat izango du, ikastegiari atxikitako langile kopuruak horretarako aukera ematen badu.
2. c), d) eta e) letretan ezarritako izendapen eta ordezkari kopurua proportzionalki handitzeko aukera dago kopuru horiek hirukoizteraino, Ikastegiko titulazio eta ikasle kopuruak horrela eskatzen badu. Ikastegi bakoitzeko Barne Eraentzako Arautegiak ezarriko du izendapen eta ordezkarien kopuru zehatza.
3. Ikastegiko Batzordeko kideak hautatzeko, Nafarroako Unibertsitate Publikoaren Estatutuek eta Hauteskunde Arautegiek eta hau garatzen duten arauek ezartzen duten prozedurari jarraituko zaio.
4. Ikastegiko Batzordeko kideek kargua utziko dute Unibertsitatearen Estatutuetako 52. artikuluak ezartzen dituen arrazoiak gertatzen direnean. Arloetako ordezkarien artean betetzeko postu hutsik badago, Nafarroako Unibertsitate Publikoaren Estatutuek eta Hauteskunde Arautegiek ezartzen dutenari jarraituko zaio.
6. artikulua. Bilerak.
1. Ikastegiko Batzordearen bilerak Arautegi honetako Hirugarren Tituluak ezartzen duenaren arabera egingo dira.
2. Ikastegiko Batzordekoak ez diren dekanorde edo zuzendariordeak ere bileretara joan daitezke, hizpidearekin baina botorik gabe.
7. artikulua. Berritzea.
Ikastegiko Batzordea lau urtez behin berrituko da, ikasleen ordezkarien kasuan izan ezik, horiek bi urtez behin berrituko baitira.
8. artikulua. Eskumenak.
Hauek dira Ikastegiko Batzordearen eginkizunak:
a) Bere eskumeneko ikasketei buruzko urteko txostenak onestea, baita txosten horiek ekarriko dituzten hobetzeko proposamenak ere.
b) Ikastegiko Estrategia Plana eta bere aldaketak onestea.
c) Dauzkan titulazio eta zikloetan, ikasleen onarpen-mugei buruz argibideak ematea.
d) Ikastegiaren barne-eraentzako arautegia egitea, Gobernu Batzordeari onesteko emango zaiona.
e) Ikastegiaren zuzendaritzak proposatuta, 3.b) artikuluan aipatutako jarraibide berariazkoak eta 3 c) artikuluan aipatutako erabakia onestea, eta, behar denean, programetako desorekak ebaztea.
f) Gobernu Kontseiluari ikasketa planetarako eta horien aldaketarako proposamenak bidaltzea.
g) Aukerako irakasgaien eskaintza proposatzea, Gobernu Kontseiluak onetsitako irakaskuntza programazioaren jarraibide orokorrekin bat etorriz.
h) Jarraibide horien barnean, ikasketa planetako irakasgaiak emateko ardura Sailei esleitzea.
i) Gobernu Kontseiluari proposamenak bidaltzea, ikasketak sortu, aldatu edo kentzeari buruz, baita ikasketa horiekin zerikusia duten ikastegiak sortu eta aldatzeari buruz ere, hori guztia Estatutuetako 6.2 artikuluan jasotako Gobernu Kontseiluaren ekimen gaitasuna galarazi gabe.
j) Egoki jotzen dituen batzordeak sortzea, eta, behar denean, ukitutako Sailei beren ordezkariak izendatzeko eskatzea.
k) Sailen arteko edo unibertsitateen arteko doktoretza programak proposatzea.
2. atala. Dekanoa eta Eskola zuzendariak
9. artikulua. Dekanoa edo zuzendaria eta zuzendaritza taldea.
1. Dekanoa edo zuzendaria Ikastegiko agintari nagusia da. Hortaz, Ikastegia ordezkatzen du eta bere jarduerak zuzentzen eta koordinatzen ditu, Ikastegiko Batzordeko bileren burua da eta bere erabakiak betearazten ditu.
2. Honako hauek osatuko dute Ikastegiko zuzendaritza taldea: dekanoak edo zuzendariak, bere burua denak, idazkariak eta, behar denean, dekanordeek edo zuzendariordeek.
10. artikulua. Hautaketa eta kargu-uztea.
1. Ikastegiko dekanoa edo zuzendaria ondoko irakasle hauen artetik hautatuko da: Unibertsitatearekin lotura iraunkorra dutenak, lotura hori ematen dioten edozein kategoriatan gutxienez ere bost urteko antzinatasuna dutenak eta ikastegian irakaskuntza ematen dutenak. Erabiliko den prozedura Unibertsitateko Estatutuetan, Nafarroako Unibertsitate Publikoko Hauteskunde Arautegian eta bere garapen-araudian ezarritakoa izango da.
2. Hautagairik ez badago edo horiek ez badituzte beharrezkoak diren botoak lortzen, errektoreak eta Unibertsitatearekin lotura iraunkorra duen eta Ikastegian irakaskuntza ematen duen irakasle bati eskatuko dio zuzendariaren eginkizunak behin-behinean bete ditzan, eta horren berri jakinaraziko dio berehala Gobernu Kontseiluari. Dekanotza edo Ikastegiko zuzendaritza behin-behineko modu honetan aurrera eraman daitekeen epeak ez du kontatzen dekano edo zuzendari hautatua edo berriz hautatua izateko ondorioetarako.
3. Errektoreak gauzatuko ditu dekanoaren edo zuzendariaren izendapena edo kargugabetzea.
11. artikulua. Agintaldiaren iraupena.
Dekanoaren edo zuzendariaren agintaldia lau urtekoa izango da, behin baizik ezin izango delarik hurrenez hurreneko hauteskundeetan berriz hautatua izan.
12. artikulua. Ordezkapenak.
Dekanoa edo zuzendaria ez badago edo gaixo badago, dagokion dekanordeak edo zuzendariordeak beteko ditu behin-behinekoz bere eginkizunak. Ordezkapen hau Ikastegiko Batzordeari jakinaraziko zaio, eta ezin izango da sei hilabete baino gehiago luzatu, eta, hala gertatzen bada, beste hauteskunde prozesu bat deitu beharko da.
13. artikulua. Kargu-uztea.
1. Ikastegiko dekanoak edo zuzendariak kargua utziko du, Unibertsitatearen Estatutuetako 54. artikuluak ezartzen duenarekin bat etorriz, ondoren esaten diren arrazoiengatik:
a) Zuzenbidez aitortutako ezgaitasunagatik.
b) Agintaldia amaitzeagatik.
c) Berariaz uko egiteagatik.
d) Zentsura mozio baten onespenagatik, Unibertsitateko Estatutuetako 56. artikuluan xedatutakoarekin bat etorriz.
e) Nafarroako Unibertsitate Publikoko komunitatekoa edo dagokion Institutukoa nahiz Ikastegikoa izateari uzteagatik.
f) Heriotzagatik.
g) Arau indardunetan aurreikusten den beste edozein zergatiko dela-eta.
2. Lehen paragrafoko b), c), e) eta g) letretan aipatutakoa gertatzen bada, dekanoa edo Ikastegiko zuzendaria jardunean egon daiteke dagokion hauteskunde prozesua ebatzi arte, edo, bestela, berak izendatutako dekanordeak edo zuzendariordeak ordezka dezake, halakorik badago, eta, bestela, adinez handiena denak.
3. Lehen paragrafoko a), f), e) eta g) letretan aipatutakoa gertatzen bada, dekanorde edo zuzendariorde bakarra baldin badago, automatikoki hasiko da dekanoaren edo zuzendariaren eginkizunak betetzen. Bat baino gehiago baldin badaude, antzinatasun handienekoa, eta antzinatasun berdinekoak badira, adinez handiena dena.
4. Dekanorderik edo zuzendariorderik ez baldin badago, dekanoaren edo zuzendariaren eginkizunak beteko ditu Ikastegian irakaskuntza ematen duen antzinatasun handieneko irakasle iraunkorrak eta antzinatasun berdinekoak badira, adinez handiena denak.
5. Dekanoaren edo zuzendariaren eginkizunak hartzen dituen dekanordeak edo zuzendariordeak dekano edo zuzendari posturako hautagai izateko eskakizunak bete beharko ditu.
14. artikulua. Eginkizunak.
Ikastegiko dekanoari edo zuzendariari dagokio:
a) Ikastegia ordezkatzea.
b) Zuzendaritza taldeko kideak Errektoreari proposatzea, honek izenda ditzan.
c) Ikastegiaren jarduerak zuzendu eta koordinatzea, bai eta administrazioa eta aurrekontuak kudeatzea ere.
d) Ikastegiko Batzordearen bilerak zuzentzea eta haietan buru izatea, baita bere erabakiak betearaztea ere.
e) Ikastegiari atxikitako administrazio eta zerbitzuetako langileak funtzionalki zuzentzea, lanpostu bakoitzaren funtzioak errespetatuz.
f) Ikastegiak ematen dituen ikasketen administrazio-antolaketa egitea, bai eta eskola ordutegiak eta azterketen egunak finkatzea ere.
g) Ikastegian irakaskuntza betetzen dela zaintzea.
h) Arautegi honetako 3.b) artikuluan adierazitako jarraibide berariazkoak proposatzea, bai eta Ikastegiko titulazioetako irakasgaien programen edukiak koordinatzea ere. Koordinazio horrek, gutxienez ere, irakasteko metodologia, gai-zerrenda eta ebaluazioa hartuko ditu.
i) Irakaskuntzaren kalitatea etengabe hobetzen saiatzea, horretarako beharrezkoak diren neurri guztiak sailei proposatuz.
j) Ikastegiari atxikitako aretoak, instalazioak, ekipamendua eta baliabide materialak kudeatzea.
k) Lege indardunek Ikastegiari eman eta Ikastegiko Batzordeari esleitzen ez dizkioten eginkizun guztiak betetzea.
3. atala. Dekanordeak edo zuzendariordeak
15. artikulua. Izendapena eta kargu-uztea.
1. Errektoreak izendatuko ditu Ikastegiko dekanordeak edo zuzendariordeak dekanoak edo zuzendariak proposatuta, Ikastegiko irakasleen artetik.
2. Ikastegiaren ardurako titulazio bakoitzeko edo titulazio talde bakoitzeko dekanorde edo zuzendariorde bat egon daiteke. Gobernu Kontseiluak zehaztuko du kopurua.
3. Dekanordeek edo zuzendariordeek karguari utziko diote:
a) Errektorearen ebazpenaren bidez, dekanoak edo zuzendariak hala proposaturik.
b) Heriotzagatik.
c) Zuzenbidez aitortutako ezgaitasunagatik.
c) Dekanoaren edo zuzendariaren agintaldia bukatu delako.
e) Dagokion Ikastegiko kidea izateari utzi diolako.
c) Norberak eskatuta.
g) Arau aplikagarrietan aurreikusitako beste arrazoi batzuengatik.
16. artikulua. Eginkizunak.
1. Dekanordeen edo zuzendariordeen eginkizuna da dekanoari edo zuzendariari Ikastegiko bere gobernu-lanetan eta kudeaketa arruntean laguntzea, eta esleitzen zaizkien eginkizunak koordinatu eta zuzentzea.
2. Dekanordeen eta zuzendariordeen eginkizuna da dekanoa edo zuzendaria ordeztea ez baldin badago edo gaixo badago. Dekanorde edo zuzendariorde bat baino gehiago badago, eta berariazko delegaziorik ez badago, ordezkapena hurrenkera honen arabera egingo da: antzinatasun handiena duen dekanordea edo zuzendariordea eta antzinatasun berdina badute, adinez handiena dena.
4. atala. Idazkaria
17. artikulua. Izendapena eta kargu-uztea.
1. Ikastegiko dekanoak edo zuzendariak, Ikastegiari atxikitako irakasleen eta administrazio eta zerbitzuetako langileen artetik, proposatzen duen pertsona izendatuko du idazkari errektoreak.
2. Ikastegiko idazkaria Ikastegiko Batzordeko idazkaria izango da, baita Batzorde guztietakoa ere, batzorde bakoitzaren arautegiak besterik ezartzen ez badu.
3. Idazkariak kargua uzten badu berak hala eskatuta, dekanoaren edo zuzendariaren erabakiagatik edo dekanoaren edo zuzendariaren agintaldia amaitzen denean, jardunean iraungo du idazkari berria karguaz jabetzen den arte.
18. artikulua. Idazkariaren eginkizunak.
Ikastegiko idazkariak ondoko eginkizunak izango ditu:
a) Dekanoari edo zuzendariari laguntzea ikastegiaren ohiko zuzendaritza eta kudeaketa lanak egiten.
b) Ikastegiko Batzordearen dekanoaren edo zuzendariaren eta Ikastegiko zuzendaritza taldearen egintzen eta erabakien fede-emaile lanak egitea.
c) Idazkari lanak egitea Ikastegiko Batzordeko bileretan, baita bere kargua dela-eta idazkari jardun behar duen batzorde guztietan ere, bileretako aktak idaztea, zaintzea eta artxibatzea.
d) Ikastegiko Batzordearen bileren deialdia egitea, dekanoak edo zuzendariak hala aginduta, baita kideei jakinaraztea ere, haietara joan daitezen.
e) Egintzen eta erabakien egiaztagiriak luzatzea, dekanoaren edo zuzendariaren oniritziarekin, baita Ikastegiko agiritegian edo espedienteetan dauden gainerako dokumentuen egiaztagiriak ere.
f) Ikastegiko irakaskuntza eta administrazio dokumentazioa zaintzea.
g) Ikastegiko Batzordeak hartutako erabakiak argitaratzea eta jakinaraztea, hala dagokionean.
h) Sarrera eta irteera erregistroa kontrolatzea, eta beren interesekoak izan daitezkeen agiriak eta argibide akademikoak Ikastegiko kideen artean banatzea.
i) Lege indardunek ematen dizkieten beste edozein eginkizun betetzea.
5. atala. Batzordeak
19. artikulua. Batzordeak.
1. Ikastegiko Batzordeak Batzorde Iraunkorra eratzea aurreikusi dezake barne eraentzako arautegian. Batzorde Iraunkorraren eginkizuna, hala badagokio, honako hau da: bere eskumeneko gaien azterketa eta erabakien eztabaida, prestaketa eta proposamena, eta berariaz delegatzen zaizkion eskumen betearazleak ere beteko ditu.
2. Barne eraentzako arautegiak ezarriko ditu Batzorde Iraunkorraren osaera, eginkizunak eta, hala badagokio, esleitzen zaizkion eskumen betearazleak, bere egitura organikoa eta bere agintaldiaren iraupena.
3. Edozein unetan, Ikastegiko Batzordeak bereganatzen ahalko du Batzorde Iraunkorrari delegatu zaion auzi baten gaineko ebazpen-ahalmena.
4. Batzorde Iraunkorraren bileren deialdiaren, garapenaren eta akten ondorioetarako, Ikastegiko barne eraentzako arautegiak ezartzen duenari jarraituko zaio, eta araurik ez badago Arautegi honetako Hirugarren Tituluak ezartzen dituen arauak aplikatuko dira, zeina, gainera, ordeztailea izango baita.
5. Halaber, Ikastegiko Batzordeak bere eskumenekoak diren gaietan, behar denean, hartu beharreko erabakiak aztertu, eztabaidatu, prestatu eta proposatzeko batzorde teknikoak eratu, aldatu eta desegin ahalko ditu. Nolanahi ere, Ikastegiko Kalitatearen Berme Batzordea sortu beharko du.
BIGARREN TITULUA. SAILAK
I. KAPITULUA. Izena, osaera eta eginkizunak
20. artikulua. Izena.
Sailak dira jakintza arlo bateko edo batzuetako ikasketak ikastegi batean edo gehiagotan koordinatzeko ardura duten irakaskuntza eta ikerketa atalak, beti ere, Unibertsitatearen irakaskuntza programazioaren arabera, eta irakasleen irakaskuntza eta ikerketa jarduerak laguntzeko ardura dutenak.
21. artikulua. Osaera.
1. Sailak osatzen dituzte Saileko kide diren irakasle eta ikertzaileek, Sailari atxikitako irakasle eta ikertzaileek eta Sailari esleitutako administrazio eta zerbitzuetako langileek.
Saileko kide dira Unibertsitatearekin lotura iraunkorra duten irakasle eta ikertzaileak edo, zehazten dituen estatuko legediak edo legedia autonomikoak doktore izatea eskatzen duten figuretakoak diren irakasle eta ikertzaileak.
Langile atxikiak dira gainerako irakasle eta ikertzaileak.
2. Karguak eta funtzio organikoak betetzeko, bilerak egiteko eta berorietan botoa emateko ondorioetarako, "zerbitzu bereziak" deituriko egoeran dauden funtzionarioek ez dute parte hartuko, ez eta, Sailekoak izanik ere, Sailetik kanpo "zerbitzu emankizunak" deiturikoan daudenek ere; alabaina, beste Administrazioetakoak edo administrazio unitatekoak izanik Sailean "zerbitzu emankizunak" deituriko egoeran daudenek, ordea, bai.
22. artikulua. Eginkizunak.
Hauek dira Sailaren eginkizunak:
a) Unibertsitatearen irakaskuntza programazioan esleituta daukaten eginbeharra garatzeko egokienak diren irakasleak eta baliabide berekiak esleitu eta koordinatzea.
b) Aurrekontuak eta esleitzen zaizkien bitarteko guztiak kudeatzea, haien eginbeharrak betetzeko.
c) Bertako langileen irakaskuntza-, ikerketa- eta kudeaketa-gaitasuna hobetzeko sustapena egitea eta laguntzea.
d) Ikerketa eta unibertsitate zabalpeneko jarduerak sustatu eta burutzea.
e) Beste unibertsitate-erakundeekin eta zientzia erakunde batzuekin, eta bestelako entitate publiko zein pribatuekin harremanak sustatzea.
f) Pertsonekin, unibertsitateekin edo entitate publiko zein pribatuekin kontratuak egitea, Unibertsitateei buruzko Lege Organikoaren 83.1 artikuluan aurreikusitakoari jarraikiz.
g) Sailaren barne eraentzako arautegia egitea.
h) Lege indardunek ematen dizkieten beste edozein eginkizun betetzea.
II. KAPITULUA. Organoak
1. atala. Saileko Kontseilua
23. artikulua. Saileko Kontseilua.
Saileko Batzordea Saileko ohiko gobernu-organo kolegiatua da, Sailari, bere eskumenen barruan, dagozkion eginkizunak betetzeko ardura duena.
24. artikulua. Osaera.
1. Hauek izango dira Saileko Kontseiluko kideak:
a) Saileko kide guztiak.
b) Saileko irakasle eta ikertzaileen ordezkariak, lehengo letrako kideen ehuneko 10 izango direnak; sekula ez bi kide baino gutxiago, baldin badaude.
c) Sailak ematen dituen ikasketetako ikasleen ordezkariak, artikulu honetako a) letrako langileen % 10 izango direnak, eta gutxienez ere ordezkari bat bermatuko da Sailak irakaskuntza ematen duen irakaskuntza-maila bakoitzeko.
d) Sailari atxikitako administrazio eta zerbitzuetako langileen ordezkari bat, eta haren ordezko bat egongo da, langile kopuruak horretarako aukera ematen badu.
2. Kideak hautatzeko, Unibertsitateko Estatutuek eta Hauteskunde Arautegiak eta hau garatzen duten arauek ezartzen duten prozedurari jarraituko zaio.
3. Saileko Kontseiluko kideek kargua utziko dute Unibertsitatearen Estatutuetako 52. artikuluak ezartzen dituen arrazoiak gertatzen direnean. Arloetako ordezkarien artean betetzeko postu hutsik badago, Nafarroako Unibertsitate Publikoaren Estatutuek eta Hauteskunde Arautegiek ezartzen dutenari jarraituko zaio.
4. Bete beharreko postuen kopurua Saileko kide-kopuruak zehazten duen arloetako kasuan, kide-kopuruak gora edo behera egiteak ez du arlo horietako ordezkarien kopurua aldaraziko, Kontseilua berritzeko hauteskundeak egiten diren arte.
25. artikulua. Bilerak.
1. Saileko Batzordearen bilerak Arautegi honetako Hirugarren Tituluak ezartzen duenaren arabera egingo dira.
2. Zuzendariordeak eta idazkaria, Saileko Kontseiluko kide ez badira, bileretara joaten ahalko dira irizpidearekin baina botorik gabe.
26. artikulua. Berritzea.
Saileko Kontseilua lau urtez behin berrituko da, ikasketetako ordezkarien ordezkaritzaren kasuan izan ezik, horiek bi urtez behin berrituko baitira.
27. artikulua. Eskumenak.
Honako hauek dira Saileko Kontseiluaren eskumenak:
a) Saileko Zuzendaria hautatu eta kargugabetzea proposatzea.
b) Sailaren urteroko irakaskuntza eta ikerketa lanen txostena onestea, irakaskuntza eta ikerketa planak finkatzea eta doktoretza programak proposatzea.
c) Saileko Plan Estrategikoa eta bere aldaketak onestea.
d) Saileko kideen ikerketa-lana bultzatzea eta sustatzea.
e) Irakaskuntza Antolatzeko Plana onestea.
f) Irakasle eta ikertzaileen lanpostu beharrak zehaztea, eta bete daitezen eskatzea, dauden moduen bidez, eta, halaber, administrazio eta zerbitzuetako langileen lanpostu beharrak proposatzea.
g) Estatutuek finkatzen duten esparruan, irakaskidegoetako irakasleen lanpostuak erdiesteko bidea ematen duten lehiaketak ebatziko dituzten batzordeetako kideak proposatzea.
h) Aurrekontu eta baliabideen esleipena banatzea, barne-eraentzako arautegian xedatuari jarraikiz.
i) Sailaren barne-eraentzako arautegia egitea, Gobernu Batzordeari onesteko emango zaiona.
j) Gobernu Kontseiluari bidaltzea Saileko kideek irakaskuntzak ematen dituzten ikastegiak sortu eta aldatzeari buruzko proposamenak, hori guztia Estatutuetako 6.2 artikuluan jasotako Gobernu Kontseiluaren ekimen gaitasuna galarazi gabe.
k) Gobernu Kontseiluari bidaltzea, Estatutuetako 9.2 artikuluaren esparruan, Sailak sortu, aldatu eta kentzeari buruzko proposamenak.
l) Egoki jotzen dituen batzordeak sortzea eta batzorde horietako kideak aukeratzea Arautegi honetako 19. artikuluak xedatutakoaren arabera.
2. atala. Saileko zuzendaria
28. artikulua. Zuzendaria eta zuzendaritza taldea.
1. Saileko zuzendaria Sailaren agintari nagusia da. Hori dela eta, ohiko agintaritza izango du bere esku, Saileko Kontseiluaren bileren buru izango da eta erabakiak betearaziko ditu.
2. Honako hauek osatuko dute Saileko zuzendaritza-taldea: burua izango den zuzendariak, idazkariak eta zuzendariordeak edo zuzendariordeek.
3. Gobernu Kontseiluak baimenduko du Sail bakoitzak eduki ditzakeen zuzendariorde-kopurua.
29. artikulua
1. Ikastegiko zuzendaria Saileko Kontseiluak hautatuko du, Unibertsitatearekin lotura iraunkorra izan eta kontseilukideak diren irakasle doktoreen artetik.
2. Saileko zuzendaria Nafarroako Unibertsitate Publikoaren Estatutuek, Hauteskunde Arautegiak eta berau garatzen duen araudiak ezartzen dutenaren arabera hautatuko da.
3. Hautagairik ez badago edo horiek ez badituzte beharrezkoak diren botoak lortzen, errektoreak Unibertsitatearekin lotura iraunkorra duen eta Saileko kidea den irakasle doktore bati eskatuko dio zuzendariaren eginkizunak behin-behinean bete ditzan, eta horren berri jakinaraziko dio berehala Gobernu Kontseiluari. Saileko zuzendaritza behin-behineko modu honetan aurrera eraman daitekeen epeak ez du kontatzen zuzendari hautatua edo berriz hautatua izateko ondorioetarako.
4. Errektoreak egingo du Saileko zuzendariaren izendapena, baita kargu uztea ere.
5. Saila erdibitzen bada, zuzendariak eta zuzendaritza taldeko gainerako kideek beren jardunean segituko dute Sail berrietan, Kontseilu berriak eratzen diren arte, ez bada errektoreak artikulu honetako 3. idatz-zatiak ematen dizkion eskumenak erabiltzen dituela.
30. artikulua. Agintaldiaren iraupena.
Saileko zuzendariaren agintaldia lau urtekoa izango da eta bata bestearen segidako agintaldi bat baizik ezin egingo ditu.
31. artikulua. Ordezkapenak.
Zuzendaria ez badago edo gaixo badago, dagokion zuzendariordeak beteko ditu behin-behinekoz bere eginkizunak. Ordezkapen hau Saileko Kontseiluari jakinaraziko zaio, eta ezin izango da sei hilabete baino gehiago luzatu, eta, hala gertatzen bada, beste hauteskunde prozesu bat deitu beharko da.
32. artikulua. Kargu-uztea.
1. Saileko zuzendariak kargua utziko du, Unibertsitatearen Estatutuetako 54. artikuluak ezartzen duenarekin bat etorriz, ondoren esaten diren arrazoiengatik:
a) Zuzenbidez aitortutako ezgaitasunagatik.
b) Agintaldia amaitzeagatik.
c) Berariaz uko egiteagatik.
d) Zentsura mozio baten onespenagatik, Unibertsitateko Estatutuetako 55. artikuluan xedatutakoarekin bat etorriz.
e) Unibertsitateko komunitateko kide izateari, edo hala badagokio, dagokion saileko kide izateari uzteagatik.
f) Heriotzagatik.
g) Arau indardunetan aurreikusten den beste edozein zergatiko dela eta.
2. Lehen paragrafoko b), c), e) eta g) letretan aipatutakoa gertatzen bada, dekanoa edo Saileko zuzendaria jardunean egon daiteke dagokion hauteskunde prozesua ebatzi arte, edo, bestela, berak izendatutako dekanordeak edo zuzendariordeak ordezka dezake, halakorik badago, eta, bestela, antzinatasun handienekoak.
3. Lehen paragrafoko a), f), e) eta g) letretan aipatutakoa gertatzen bada, zuzendariorde bakarra baldin badago, automatikoki hasiko da zuzendariaren eginkizunak betetzen. Bat baino gehiago baldin badaude, unibertsitatean antzinatasun handiena duena, eta antzinatasun berdinekoak badira, adinez handiena dena.
4. Zuzendariorderik ez baldin badago, zuzendariaren eginkizunak beteko ditu Ikastegiak unibertsitatean antzinatasun handiena duen saileko irakasle iraunkorrak eta antzinatasun berdinekoak badira, adinez handiena denak.
5. Jarduneko zuzendariak zuzendari berria izendatzeko hauteskundeetarako deialdia egingo du, Unibertsitatearen Hauteskunde Arautegiaren arabera. Honela hautatutako zuzendariaren agintaldiak ateratzen denaren agintaldiak bukatzeko falta zuen beste iraungo du, eta ez du kontatzen zuzendaria hautatua edo berriz hautatua izateko ondorioetarako.
6. Saileko Kontseiluak zuzendariaren aurkako zentsura-mozioa onesten badu, Estatutuetako 55. artikuluarekin bat etorriz, errektoreak bere kargu uztea xedatuko du. Mozioa izenpetzen dutenek proposatzen duten hautagaia hautatu aldarrikatuko da automatikoki, eta errektoreak izendatu egingo du. Kasu honetan, zuzendariaren agintaldiak ordezkatzen denaren agintaldia bukatuko zen arte iraungo du, eta ez du kontatzen zuzendari hautatzeko edo berriz hautatzeko ondorioetarako.
33. artikulua. Eginkizunak.
Hauek dira Saileko zuzendariaren eginkizunak:
a) Saila ordezkatzea.
b) Lagunduko dion zuzendaritza taldeko kideak proposatzea errektoreari, izendatu ditzan.
c) Saileko irakaskuntzako eta ikerketako jarduerak koordinatzea.
d) Saileko Kontseilurako deiak egin eta haren buru izatea, bai eta haren erabakiak bete eta betearaztea ere.
e) Saileko kideen eskaerak zein iradokizunak jaso eta bideratzea.
f) Saileko administrazio eta aurrekontuen kudeaketa zuzentzea.
g) Sailari atxikitako administrazio eta zerbitzuetako langileriaren zuzendaritza funtzionala betetzea, langile horien lanbide-eskumenen kalterik gabe.
h) Idazkariarekin batera, Sailaren urteko txostena egitea.
i) Irakaskuntza eta ikerketa beharrak bete daitezen zaintzea.
j) Hurrengo ikasturtean emango diren irakasgaien programak Ikastegietara igortzea. Programetan, gutxienez ere, hauek jasoko dira: helburuak, gai-zerrenda, irakasteko eta laneko metodologia, ebaluazio sistema eta bibliografia erreferentziak.
k) Dauzkan eskumenen barnean, bekadun eta ikertzaile bisitariei baimena ematea Sailean egon eta hango baliabideak erabil ditzaten, Nafarroako Unibertsitate Publikoko langileen izaera hartu gabe ere, irakasteko edo ikertzeko lanetan aritzen direnean.
l) Sailari atxikitako aretoak, instalazioak, ekipamendua eta baliabide materialak kudeatzea.
m) Lege indardunek Sailari esleitzen dizkioten beste eskumen guztiak, beti ere Estatutuetan Saileko Kontseiluari esleitzen ez bazaizkio.
3. atala. Saileko zuzendariordeak
34. artikulua. Izendapena eta kargu-uztea.
1. Errektoreak izendatuko du zuzendariordea edo zuzendariordeak, zuzendariak proposatuta, Saileko kideen artetik.
2. Zuzendaria ordezkatu edo zuzendariaren eginkizunak beteko dituen zuzendariordeak zuzendari posturako hautagai izateko eskakizunak bete beharko ditu.
3. Zuzendariordeak edo zuzendariordeek kargua utziko dute ondoko arrazoiren bat gertatzen denean:
a) Errektorearen ebazpenaz, zuzendariak hala proposaturik.
b) Heriotzagatik.
c) Zuzenbidez aitortutako ezgaitasunagatik.
d) Zuzendariaren agintaldia bukatu delako.
e) Dagokion Saileko kidea izateari utzi diolako.
c) Norberak eskatuta.
g) Arau aplikagarrietan aurreikusitako beste arrazoi batzuengatik.
35. artikulua. Eginkizunak.
1. Zuzendariordeen eginkizuna da zuzendariari Saileko bere gobernu-lanetan eta ohiko kudeaketa lanetan laguntzea, eta ematen zaizkien eginkizunak koordinatu eta zuzentzea.
2. Zuzendariordearen eginkizuna da zuzendaria ordezkatzea, hau ez badago edo gaixo badago. Zuzendariorde bat baino gehiago badago, eta berariazko delegaziorik ez badago, ordezkapena hurrenkera honen arabera egingo da: unibertsitatean antzinatasun handiena duen zuzendariordea eta antzinatasun berdina badute, adinez handiena dena.
4. atala. Saileko idazkaria
36. artikulua. Izendapena eta kargu-uztea.
1. Errektoreak izendatuko du idazkaria, zuzendariak proposatuta, Saileko kideen artetik.
2. Saileko idazkaria Saileko Kontseiluko idazkaria izango da, baita Batzorde guztietakoa ere, arautegiek besterik xedatzen ez duten artean.
3. Idazkariak kargua uzten badu berak hala eskatuta, zuzendariaren erabakiagatik edo zuzendariaren agintaldia amaitzen denean, jardunean iraungo du idazkari berria karguaz jabetzen den arte.
37. artikulua. Idazkariaren eginkizunak.
Saileko idazkariak ondoko eginkizunak izango ditu:
a) Zuzendariari laguntzea sailaren ohiko zuzendaritza eta kudeaketa lanak egiten.
b) Saileko Kontseiluaren, zuzendariaren eta saileko zuzendaritza taldearen egintzen eta erabakien fede-emaile lanak egitea.
c) Idazkari lanak egitea Saileko Kontseiluko bileretan, baita bere kargua dela-eta idazkari jardun behar duen batzorde guztietan ere, bileretako aktak idaztea, zaintzea eta artxibatzea.
d) Saileko Kontseiluko bileren deialdia egitea, zuzendariak hala aginduta, baita kideei jakinaraztea ere, haietara joan daitezen.
e) Egintzen eta erabakien egiaztagiriak luzatzea, zuzendariaren oniritziarekin, baita Saileko agiritegian edo espedienteetan dauden gainerako dokumentuen egiaztagiriak ere.
f) Saileko irakaskuntza eta administrazio dokumentazioa zaintzea.
g) Saileko Kontseiluak hartutako erabakiak argitaratzea eta jakinaraztea, hala dagokionean.
h) Sarrera eta irteera erregistroa kontrolatzea, eta beren interesekoak izan daitezkeen agiriak eta argibide akademikoak Saileko kideen artean banatzea.
i) Idazkariaren eginkizunei dagokien edo zuzendariak ematen dion beste edozein eginkizun.
5. atala. Saileko Batzordeak
38. artikulua
1. Saileko Kontseiluak Batzorde Iraunkorra eratzea aurreikus dezake barne eraentzako arautegian. Batzorde Iraunkorraren eginkizuna, hala badagokio, honako hau da: bere eskumeneko gaien azterketa eta erabakien eztabaida, prestaketa eta proposamena, eta berariaz delegatzen zaizkion eskumen betearazleak ere beteko ditu.
2. Barne eraentzako arautegiak ezarriko ditu Batzorde Iraunkorraren osaera, eginkizunak eta, hala badagokio, esleitzen zaizkion eskumen betearazleak, bere egitura organikoa eta bere agintaldiaren iraupena.
3. Edozein unetan, Saileko Kontseiluak bereganatzen ahalko du Batzorde Iraunkorrari delegatu zaion auzi baten gaineko ebazpen-ahalmena.
4. Batzorde Iraunkorraren bileren deialdiaren, garapenaren eta akten ondorioetarako, Saileko barne eraentzako arautegiak ezartzen duenari jarraituko zaio, eta araurik ez badago Arautegi honetako Hirugarren Tituluak ezartzen dituen arauak aplikatuko dira, zeina, gainera, ordeztailea izango baita.
5. Halaber, Saileko Kontseiluak bere eskumenekoak diren gaietan, behar denean, hartu beharreko erabakiak aztertu, eztabaidatu, prestatu eta proposatzeko batzorde teknikoak eratu, aldatu eta desegin ahalko ditu.
HIRUGARREN TITULUA. ORGANO KOLEGIATUEN ERAKETA ETA BILEREN DEIALDIA, GARAPENA ETA AKTAK
I. KAPITULUA. Eraketa
39. artikulua. Eraketa.
Ikastegiko Batzordeko edo Saileko Kontseiluko kideen aukeraketa eta aldarrikapena egin ondoren, dekanoak edo zuzendariak bilera deituko du organo kolegiatuko kideen behin betiko aldarrikapena egiten denetik hilabeteko epean gehienez ere. Bilera baliozkoa izateko, kideen gehiengo absolutua bertan izan behar da, eta bileraren eguneko aztergai bakarra izango da organo kolegiatuaren eraketa.
II. KAPITULUA. Organo kolegiatuen bileren deialdia, garapena eta aktak
40. artikulua. Bilerak.
1. Ikastegiko Batzordea edo Saileko Kontseilua bilduko da:
1.-Ohiko bileran, hiruhilean behin gutxienez, irakaskuntza-aldiaren barruan.
2.-Ezohiko bileran:
a) Dekanoak edo zuzendariak hala erabakitzen duenean.
b) Organo kolegiatuko kide guztien ehuneko 30ek hala eskatzen dutenean. Kasu honetan, dekanoak edo zuzendariak eskaera egiten den egunaren ondoko hiru egun baliodunen epearen barruan egingo du deialdia, eta bilera eskaera jaso zen egunaren ondoko zazpi egun baliodunen epearen barruan egingo da. Eskaera idatziz egingo da, eztabaidatu behar diren aztergaiak zein diren adieraziz.
41. artikulua. Deialdia.
1. Dekanoari edo zuzendariari dagokio organo kolegiatuaren bilera deitzea.
2. Ohiko bilerak badira, gutxienez ere berrogeita zortzi ordu lehenago jakinarazi behar zaie deialdia organo kolegiatuko kideei, eta hogeita lau ordu lehenago premiaz deitutako ohiz kanpoko bilerak badira, beti ere arrazoi pisuzkorik bada. Eguneko aztergaien gaineko agiriek Batzordeko edo Kontseiluko kideen eskura egon behar dute nahikoa aurrerapenaz.
3. Deialdiaren berri jakinaraziko da organoko kideak deialdiko agiriaren ezagutza zuzena eduki duela egiaztatzeko modua ematen duen edozein bitartekoren bidez.
42. artikulua. Eguneko aztergaiak.
1. Dekanoari edo zuzendariari dagokio bileretako eguneko aztergaiak ezartzea, kontuan hartuta, behar denean, gainerako kideek behar den aurrerapenarekin egindako eskariak.
2. Eguneko aztergaietan, azken puntu bezala, eskari-galderen atala agertu beharko da, eta bertan ezin izango da erabakirik hartu, aztertutako gaiari buruz eztabaidatutakoa galarazi gabe.
3. Ezin izango da erabaki eguneko aztergaietan agertzen ez den gairik, kide guztiak bertaraturik eta gehiengoaren aldeko botoen bidez gaiaren premia aitortzen ez bada.
43. artikulua. Bileretara joatea, boto-delegazioa, gonbidatuak.
1. Bakarrik organo kolegiatuko kideek dute bileretara joan eta parte hartzeko eskubidea.
2. Dekanoak edo zuzendariak aztergaiak direla-eta interesgarriak izan daitezkeen pertsonak gonbidatzeko aukera izango du, bileretara joan daitezen. Bilerako aktan gonbidatuak bezala, hau da, hizpidearekin baina botorik gabe, egon direla jasoko da.
3. Ez da boto-delegaziorik onartuko, ezta ordezkapenik edo bilera baterako unean uneko ordezkapenik ere, Nafarroako Unibertsitate Publikoko Estatutuetako ) y 31.1 d) artikuluek xedatutakoa galarazi gabe.
44. artikulua. Eraketa balioduna.
Organo kolegiatuaren eraketa balioduna izango da, bilera egin, eztabaidatu eta erabakiak hartu ahal izateko ondorioetarako, lehen deialdian, baldin eta bertan badaude dekanoa edo zuzendaria eta idazkaria (edo beren funtzioak betetzen dituztenak), eta kideen erdiak, gutxienez.
Bigarren deialdian, lehenengorako ezarritako egun-orduak igaro eta hogeita hamar minutu geroago gutxienez ere, aski izango da dekanoa edo zuzendaria eta idazkaria bertan egotea (edo beren funtzioak betetzen dituztenak) eta kideen heren bat.
Eraketa baliodunaren ondorioetarako, hizpidea eta botoa duten kideak bakarrik hartuko dira kontuan.
Alabaina, gobernu-organo kolegiatua eratuta geratuko da, deialdiaren baldintzak bete ez direnean ere, baldin eta bere kide guztiak bildurik badaude eta aho batez horrela erabakitzen dutenean.
45. artikulua. Bileren eta bozketen garapena.
1. Dekanoa edo zuzendaria izango da bileretako burua. Edozein arrazoi dela-eta zuzendariak zuzentzen ez badu, zuzendariordeak zuzenduko du. Bat baino gehiago badago, berariaz delegatutakoa izango da, eta, halakorik ez badago, irizpide hauen arabera eta hurrenkera honetan: antzinatasun handiena eta adin handiena.
2. Idazkaria ez badago bertan, bileraburuak izendatuko du Batzordeko edo Kontseiluko kide bat bilerako idazkari-lanak egin ditzan.
3. Bileraburu gisa, dekanoari edo zuzendariari dagokio bilerei hasiera eta amaiera ematea, eztabaidak zuzentzea, hitza ematea eta kentzea, bilerak behar bezala garatzen direla bermatzea, eta arrazoi justifikaturik badago bertan behera utz ditzake, esanez non eta zer ordutan jarraituko den.
4. Eztabaidak eguneko aztergaien zerrendaren hurrenkeran egingo dira. Alabaina, eguneko aztergaien zerrenda aldatu ahalko da, organo kolegiatuaren gehiengoaren erabakiaz, bilerako buruak hala proposaturik.
5. Organo kolegiatuko kideek edozein unetan plazaratu ahalko dituzte erazko auziak, horretarako bilerako buruari eskatuz hitz egiteko baimena, zeinak ebatziko baititu.
46. artikulua. Erabakiak hartzea.
1. Erabakiak gehiengo soilaz hartuko dira, arautegiak bestelako gehiengoa eskatzen duen kasuetan salbu.
2. Hitzarmenak mota hauetakoak izan daitezke:
a) Dekanoak edo zuzendariak proposatutako erabakiari buruzko gaiari baiezkoa emanez, eta Batzordeko edo Kontseiluko kide bakar batek ere ez badu oztoporik jarri.
b) Bozketa arruntak eta jendaurrekoak, dekanoak edo zuzendariak egindako galderari erantzungo diotenak.
c) Isilpeko bozketak pertsonak ukitzen badituzte, arau indardunek hala xedatzen badute eta bileraburuak hala erabakitzen badu, berak eskatuta edo Batzordeko edo Kontseiluko kide batek eskatuta.
3. Bozketan berdinketa badago, bigarren bozketa bat egingo da, eta berriz ere berdinketa badago, dekanoaren edo zuzendariaren botoak erabakiko du.
4. Organo kolegiatuko kide bakoitzak boto bat edukiko du. Ez da boto-delegaziorik onartuko, ezta postaren bidezkoa ere.
5. Lege aplikagarrien arabera interesduntzat jotzen ahal denak eskubidea du idazkariak erabakien egiaztagiria eman diezaion.
47. artikulua. Bileren aktak.
1. Idazkariak bileraren akta idatziko du, ondoko hauek jasoz: bertaratuen izena, tokiaren eta denboraren inguruabarrak, joan ez diren baina ez joatea justifikatu dutenena, eguneko aztergaiak, eztabaidetako punturik garrantzizkoenak eta hartutako erabakien behin betiko edukia.
2. Organo kolegiatuko edozein kidek dauka haren parte hartze edo proposamenaren transkripzio osoa eskatzeko eskubidea, beti ere bilera amaitzean edo dekanoak edo zuzendariak ezartzen duen epearen barruan parte hartzearen testu zehatza ematen badu, aktan horrela adieraziz edo bertan kopia bat erantsiz.
3. Batzordeko edo Kontseiluko kideek hala eskatuta, aktan agertuko dira hartutako erabakiaren kontrako botoa, abstentzioa eta bera justifikatzen duten arrazoiak, nahiz emandako aldeko botoaren azalpena ere.
4. Batzordearen edo Kontseiluaren gehiengoak harturiko erabakiarekin bat ez datozen kideek idatziz eman dezakete boto partikularra berrogeita zortzi orduko epean, eta onetsitako erabakiari erantsiko zaio.
5. Batzordeak edo Kontseiluak onetsi behar ditu aktak, Batzordearen edo Kontseiluaren bilera berean edo hurrengo bileran, eta idazkariak izenpetuko ditu, dekanoaren edo zuzendariaren oniritziarekin.
6. Idazkariak, behar denean, bileretako akta egitea errazteko beharrezkoak diren tresna teknikoak erabiltzeko modua izango du, eta egiten diren grabazioak zaindu eta deuseztatuko ditu dagokion aktaren onarpenarekin eta formalizazioarekin.
LAUGARREN TITULUA. BATZORDEAREN/KONTSEILUAREN EDO DEKANOAREN/ZUZENDARIAREN ERABAKIEN AURKAKO ERREKURTSOAK
48. artikulua. Errekurtsoak.
1. Batzordearen edo Kontseiluaren edo dekanoaren edo zuzendariaren egintzen eta erabakien aurka, interesdunek gorako errekurtsoa jartzen ahal dute errektorearen aurrean, Nafarroako Unibertsitate Publikoko Estatutuetako 144.2 artikuluan ezarritakoarekin bat etorriz.
2. Errektorearen ebazpenek administrazio bidea bukatzen dute, eta Administrazioarekiko Auzien jurisdikzioaren aurrean aurkatu ahal dira zuzenean, uztailaren 13ko 29/1998 Administrazioarekiko Auzien jurisdikzioari buruzko Legearekin eta gainerako lege aplikagarriekin bat etorriz.
BOSGARREN TITULUA. BARNE ERAENTZAKO ARAUTEGIAK BERRITZEA
49. artikulua. Aldaketak.
1. Barne eraentzako arautegiak aldatu daitezke, dekanoaren edo zuzendariaren ekimenez, edo Batzordeko edo Kontseiluko kideen ehuneko hogeita hamarraren ekimenez.
2. Batzordeak edo Kontseiluak gehiengo absolutuaren bidez onetsi beharko du aldatzeko nahiz eraberritzeko proposamena, eta Unibertsitateko Gobernu Kontseiluari igorri beharko dio onets dezan.
Xedapen Gehigarri Bakarra
Arautegi honetako pertsona bakarreko organoei, beren titularrei eta unibertsitate komunitateko kideei buruz maskulinoan egindako izendapenak femeninoan egindakoak direla ulertuko da, izendapen horiek ukitutako pertsonen sexuaren arabera.
Xedapen Iragankor Bakarra. Barne eraentzako arautegiak egokitzea.
Ikastegiko Batzordeek eta Saileko Kontseiluek beren barne funtzionamenduko arautegiak egokitu beharko dituzte aldaketara eta Gobernu Kontseiluari bidali, onets ditzan. Arautegi berriak Unibertsitatearen web-orrialdean jarriko dira horien berri hobeki eman eta izateko.
Barne eraentzako arautegi berriak onetsi bitartean oraingoek indarrean jarraituko dute.
Xedapen Indargabetzaile Bakarra
Esparru Arautegi honek indarra hartzen duenean, Gobernu Kontseiluak 2003ko irailaren 19an hartutako erabakiaren bidez (137. zenbakiko NAO, 2003ko urriaren 27koa) onetsitako Nafarroako Unibertsitate Publikoko Ikastegi eta Sailetako Esparru Arautegia indargabetuko du.
Azken Xedapen Bakarra
1. Nafarroako Aldizkari Ofizialean argitara eman, eta biharamunean hartuko du indarra Esparru Arautegi honek.
2. Esparru Arautegi hau aldatu ahalko da Gobernu Kontseiluaren erabaki bidez.
