navarra.es
Castellano | Euskara | Français | English
Ezagutzera eman
178/2012 Foru Agindua, apirilaren 19koa, Gizarte Politika, Berdintasun, Kirol eta Gazteriako kontseilariak emana, unibertsitateko ikasleek kanpoko praktika akademikoak Kirolaren Azterlan, Ikerketa eta Medikuntzako Zentroan egiteari buruzkoa
(2012ko 105. NAOn argitaratutako testua, ekainaren 4an)
Atarikoa
Jakinik zer garrantzi duten unibertsitateko ikasleen kanpoko praktika akademikoek, prestakuntza akademikoan hartutako ezagutzak aplikatzeko eta osatzeko, modu horretan gaitasunak hartzen baitira jarduera profesionaletarako prestakuntza gisa, enplegagarritasuna errazten baita, eta haien ekiteko gaitasuna sustatzen, bada, azaroaren 18ko 1707/2011 Errege Dekretuak unibertsitateko ikasleen kanpoko praktikak arautzen ditu; horiek unibertsitatean berean egin daitezke, edo entitate laguntzaileetan, esaterako enpresetan, erakundeetan eta entitate publiko eta pribatuetan, nazio mailan nahiz nazioartean, eta jasotzen du badela aukera unibertsitateek entitate laguntzaileekin hezkuntzako lankidetza hitzarmenak ezartzeko. Horri esker, unibertsitateek kanpoko praktika akademikoak programa ditzakete, eta kreditu gisa balora daitezke haien ikasketa planen prestakuntza-edukietan.
Gizarte Politika, Berdintasun, Kirol eta Gazteria Departamentuak lankidetza akordio bat izenpetuta du Nafarroako Unibertsitate Publikoarekin, honelako praktikak egin ditzaten hango ikasleek; hala ere, gero eta eskaera handiagoa dago praktikak egiteko, hemen ezarri gabeko prestakuntzak direlako edo osasun arloekin zerikusia duten beste unibertsitate ikasketa batzuk direlako, erkidego honetakoak edo beste batzuetakoak (Espainiakoak nahiz atzerrikoak) izanik Nafarroatik kanpoko zentroetan ikasten duten ikasleen aldetik.
Aipatutako kanpoko praktikak sistema publikoaren baldintzekin bat heldu den esparru batean egin ahal izateko, Nafarroako Kirolaren eta Jarduera Fisikoaren Institutuak proposatuta, eta Nafarroako Gobernuari eta Lehendakariari buruzko abenduaren 3ko 14/2004 Foru Legeak eta Gizarte Politika, Berdintasun, Kirol eta Gazteria Departamentuaren egitura organikoa ezartzen duen abuztuaren 24ko 136/2011 Foru Dekretuak emandako ahalmenak erabiliz, agindu dut:
Lehenbizikoa
Unibertsitateak edo unibertsitateari atxikitako zentroek ematen dituzten ikasketetan matrikulaturik dauden ikasleek, eta Espainiako nahiz atzerriko beste unibertsitate batzuetako ikasleek, zeinak, ikastetxeen arteko mugikortasun programen arabera, edo ikastetxeen arteko hitzarmenen arabera, Unibertsitatean edo hari atxikitako zentroetan ikasten ari baitira, dagokien prestakuntza curriculumetan eskatutako kanpoko praktikak Kirolaren Azterlan, Ikerketa eta Medikuntzako Zentroan egin ditzakete (Gizarte Politika, Berdintasun, Kirol eta Gazteria Departamentuko Nafarroako Kirolaren eta Jarduera Fisikoaren Institutuari atxikia dago), aldez aurretik erakunde autonomo horretako zuzendari kudeatzaileak baimena emanda, behin frogatu ondoren foru agindu honetan ezarritako beharkizun guztiak betetzen dituztela.
Bigarrena
Praktika akademikoak egiteko, lankidetza hitzarmen bat ezarriko da dagokion unibertsitate edo entitatearen eta Nafarroako Kirolaren eta Jarduera Fisikoaren Institutuaren artean, Kirolaren Azterlan, Ikerketa eta Medikuntzako Zentroarekin loturik, azaroaren 18ko 1707/2011 Errege Dekretuaren 7. artikuluan aurreikusi bezala (errege dekretu haren bidez unibertsitateko ikasleen kanpoko praktika akademikoak arautu ziren).
Hirugarrena
Unibertsitateko ikasleek zein unibertsitate eskola edo fakultatetan egiten dituzten ikasketak ofizialki, harena izanen da kanpoko praktiketako erantzukizun akademikoa; hortaz, haietako hezkuntza arduradunei dagokie unibertsitateko ikasleen kanpoko praktikak egiteko eskaera Nafarroako Kirolaren eta Jarduera Fisikoaren Institutuko zuzendari kudeatzaileari igortzea, hartan adierazita ikaslearen, praktikako irakaslearen edo tutorearen eta Kirolaren Azterlan, Ikerketa eta Medikuntzako Zentroaren adostasuna.
Unibertsitateko ikasleen kanpoko praktiketako egonaldia eskolaldian bakarrik egiten ahalko da.
Laugarrena
Eskaeraren tramitazioa:
1. Nafarroako Kirolaren eta Jarduera Fisikoaren Institutuko zuzendari kudeatzaileari zuzendutako eskaera bat bidali beharko da, eta hartan honako hauek frogatu beharko dira:
a) Praktiken gaineko irakasgaiaren irakasle arduradunak, Kirolaren Azterlan, Ikerketa eta Medikuntzako Zentroan ikaslearen hezkuntzako arduradunarekin ados, ezarri dituela ikaslearen eta praktiketako irakaslearen edo tutorearen programa, ordutegia, ordu kopurua, ebaluatzeko moduak eta erantzukizunak; horiek guztiak irakasgaiaren curriculumekoak izanen dira, ez bestelakoak.
b) Ikaslearen eskola aseguruak -edo, hala behar bada, bidezkoa den osasun laguntzarako eta istripuetarako aseguruek- estalita izatea izan litekeen edozein gorabeheratik eratorritako osasun eta ekonomia prestazioak, eta, halaber, izan litekeen erantzukizun zibila ere estalita izatea.
2. Nafarroako Kirolaren eta Jarduera Fisikoaren Institutuko zuzendari kudeatzaileak ebatziko du aurkeztutako eskaeraren gainean, ebazpen bidez, aldez aurretik Kirolaren Azterlan, Ikerketa eta Medikuntzako Zentroko zuzendariak txostena egin ondoren.
Bosgarrena
Kirolaren Azterlan, Ikerketa eta Medikuntzako Zentroko profesionalen irakaskuntza arloko laguntza borondatezkoa denez gero, unibertsitate zentroak zuzenean ezarriko du, irakasle tutoreekin batera, nola aitortuko duen unibertsitateak entitate laguntzaileko tutoreek egindako lana.
Seigarrena. Kanpoko praktika akademikoek prestakuntza izaera dute soil-soilik, eta ez dakarte inolako lan lotura edo harremanik ez Nafarroako Kirolaren eta Jarduera Fisikoaren Institutuarekin ez haren zentroekin, eta praktiken edukiek ez dute ekarriko berez lanpostu batenak diren lanak ordeztea. Unibertsitateko ikasleen kanpoko praktika akademikoak arautu zituen azaroaren 18ko 1707/2011 Errege Dekretuaren lehen xedapen gehigarriak dioen bezala, Gizarte Segurantzan sartzeko urriaren 24ko 1493/2011 Errege Dekretuan jasotako mekanismoak (dekretu horrek prestakuntza programetan parte hartzen dutenak Gizarte Segurantzako Araubide Orokorrean nola eta zein baldintzatan sartzen diren arautzen du, Gizarte Segurantzaren sistema eguneratu, egokitu eta modernizatzeari buruzko abuztuaren 1eko 27/2011 Legearen hirugarren xedapen gehigarrian aurreikusitakoa garatuz) ez dira aplikatzekoak izanen foru agindu honetan aipatutako kanpoko praktika akademikoak egiten dituzten unibertsitateko ikasleen kasuan.
Xedapen Indargabetzaile Bakarra
Indargabeturik gelditzen da Familia, Gazteria, Kirol eta Gizarte Gaietako kontseilariaren maiatzaren 12ko 151/2011 Foru Agindua, ofizialki onartutako unibertsitate titulazioei dagokien prestakuntzarako praktikak Kirolaren Azterlan, Ikerketa eta Medikuntzako Zentroan egiteari buruzkoa, bai eta foru agindu honen aurka jotzen duten maila bereko edo apalagoko xedapen guztiak ere.
Azken Xedapen Bakarra
Foru agindu honek Nafarroako Aldizkari Ofizialean argitaratu eta biharamunean hartuko du indarra.
