navarra.es
Castellano | Euskara | Français | English
Ezagutzera eman
151/2011 Foru Agindua, maiatzaren 12koa, Familia, Gazteria, Kirol eta Gizarte Gaietako kontseilariak emana, ofizialki rtutako unibertsitate titulazioei dagokien prestakuntzarako praktikak Kirolaren Azterlan, Ikerketa (Indargabetua)
151/2011 FORU AGINDUA, maiatzaren 12koa, Familia, Gazteria, Kirol eta Gizarte Gaietako kontseilariak emana, ofizialki rtutako unibertsitate titulazioei dagokien prestakuntzarako praktikak Kirolaren Azterlan, Ikerketa eta Medikuntzako Zentroan egiteari buruzkoa
(2011ko 118. NAOn argitaratutako testua, ekainaren 16an)
Atarikoa
Ikasleen jardun profesionala prestatzeko enpresetako praktikek duten garrantziaz jabeturik, unibertsitateek, beren ikasleak prestatzeko, enpresa eta erakundeekin hezkuntza lankidetzako programak ezartzeko aukera jasotzen du urriaren 29ko 1393/2007 Errege Dekretuak, unibertsitateko ikasketa ofizialak antolatzen dituenak. Horrek bide ematen du unibertsitateek kanpoko praktikak, kreditu gisa baloratzeko modukoak, programatu ahal izatea beren ikasketa planetako prestakuntza edukiekin, Unibertsitateko Graduatu edo Master titulua eskuratzeko.
Familia, Gazteria, Kirol eta Gizarte Gaietako Departamentuak lankidetza akordio bat izenpetuta du Nafarroako Unibertsitate Publikoarekin praktikak egiteko; hala ere, gero eta eskaera handiagoa da praktikak egiteko erkidego honetakoak izanik Nafarroatik kanpoko zentroetan ikasten duten ikasleen aldetik, hemen ezarri gabeko prestakuntzak direlako edo osasun arloekin zerikusia duten beste unibertsitate ikasketa batzuk direlako.
Aipatu praktikak sistema publikoaren baldintzekin bat heldu den esparru batean egin ahal izateko, Nafarroako Kirolaren Institutuak proposatuta, eta Nafarroako Gobernuari eta Lehendakariari buruzko abenduaren 3ko 14/2004 Foru Legeak eta Familia, Gazteria, Kirol eta Gizarte Gaietako Departamentuaren egitura organikoa ezartzen duen irailaren 3ko 125/2007 Foru Dekretuak emandako ahalmenak erabiliz, agindu dut:
1. Nafarroatik kanpoko unibertsitate eskola eta fakultateetan eta Nafarroan kokatuta baina berariazko hitzarmenen bidez lotu gabekoetan gradu aurreko edo ondoko ikasketak egiten dituzten ikasleek Familia, Gazteria, Kirol eta Gizarte Gaietako Departamentuko Nafarroako Kirolaren Institutuko Kirolaren Azterlan, Ikerketa eta Medikuntzako Zentroan egiten ahalko dituzte haien prestakuntza curriculumetan eskatzen zaizkien praktikak, erakunde autonomo horretako zuzendari kudeatzaileak baimendu ondoren, eta foru agindu honetan ezarritako baldintzak betetzen dituztela frogatutakoan.
2. Zein unibertsitate eskola edo fakultatetan egiten dituen ikasketak ofizialki, harena izanen da praktiketako erantzukizun akademikoa; hortaz, haietako hezkuntza arduradunei dagokie ikasleen praktikak egiteko eskaera Nafarroako Kirolaren Institutuko zuzendari kudeatzaileari igortzea, hartan ikaslearen, praktikako irakaslearen edo tutorearen eta Kirolaren Azterlan, Ikerketa eta Medikuntzako Zentroaren adostasuna adierazita.
Praktiketako egonaldia eskolaldian bakarrik egiten ahalko da.
3. Nafarroako Kirolaren Institutuko zuzendari kudeatzaileari igorritako eskaeran, honako hauek beharko dira egiaztatu:
a) Praktiken gaineko irakasgaiaren irakasle arduradunak, Kirolaren Azterlan, Ikerketa eta Medikuntzako Zentroan ikaslearen hezkuntzako arduradunarekin ados, ezarri dituela ikaslearen eta praktiketako irakaslearen edo tutorearen programa, ordutegia, ordu kopurua, ebaluatzeko moduak eta erantzukizunak; horiek guztiak irakasgaiaren curriculumekoak izaten ahal dira, ez bestelakoak.
b) Eskola aseguruak estaltzen duela ikaslearen osasun laguntza, eta izan lezakeen erantzukizun zibila ere estalita duela.
Kirolaren Azterlan, Ikerketa eta Medikuntzako Zentroko zuzendariak txostena egin ondoren, Nafarroako Kirolaren Institutuko zuzendari kudeatzaileak erabakiko du ebazpen bidez aurkeztutako eskaeraren gainean.
4. Kirolaren Azterlan, Ikerketa eta Medikuntzako Zentroko profesionalen irakaskuntza arloko laguntza borondatezkoa denez gero, unibertsitate zentroak zuzenean ezarriko du egiaztatze sistema irakasle tutoreekin hezkuntza lankidetzan.
5. Praktikak prestakuntzarako eginen dira, ez beste edozertarako, eta haien ondorioz ez da laneko lotura edo harremanik sortuko Nafarroako Kirolaren Institutuarekin edo haren zentroekin.
6. Foru agindu hau Nafarroako Aldizkari Ofizialean argitaratzea.
7. Foru agindu hau Familia, Gazteria, Kirol eta Gizarte Gaietako Departamentura, horren Idazkaritza Nagusi Teknikora, Nafarroako Kirolaren Institutura, bertako Kirol Azpizuzendaritzara eta Idazkaritza Nagusiko Zerbitzura, eta Kirolaren Organo Kolegiatuetara igortzea.
