navarra.es

Castellano | Euskara | Français | English

Bilatzaile erabili!

1323/2009 Ebazpena, irailaren 15ekoa, Nafarroako Unibertsitate Publikoko errektoreak emana, Nafarroako Unibertsitate Publikoko Ikasketa Berekiak eta Unibertsitateko Master Titulu Ofizialak arautzen dituzten arauak onesten dituen erabakia argitaratzek

1323/2009 EBAZPENA, irailaren 15ekoa, Nafarroako Unibertsitate Publikoko errektoreak emana, Nafarroako Unibertsitate Publikoko Ikasketa Berekiak eta Unibertsitateko Master Titulu Ofizialak arautzen dituzten arauak onesten dituen erabakia argitaratzeko agintzen duena. Gobernu Kontseiluak 2009ko uztailaren 28an hartutako erabakiaren bidez onetsi zen

(2011ko 118. NAOn argitaratutako testua, irailaren 25ean)

Atarikoa

Maiatzaren 12ko 110/2003 Foru Dekretuak onetsitako Unibertsitateko Estatutuen 40. artikuluak ematen dizkidan ahalmenak erabiliz, 2009ko uztailaren 28an Gobernu Kontseiluak onetsi zuen erabakia, Unibertsitate Publikoko Ikasketa Berekiak eta Unibertsitateko Master Titulu Ofizialak arautzen dituzten arauak onesten dituena, argitaratzea agintzen dut. Hona hemen hitzez hitz.

NAFARROAKO UNIBERTSITATE PUBLIKOKO MASTER TITULU OFIZIALAK ETA IKASKETA BEREKIAK ARAUTZEN DITUZTEN ARAUAK

ATARIKO TITULUA

1. artikulua. Aplikazio-eremua.

1. Arautegi hau Nafarroako Unibertsitate Publikoan ematen diren ikasketa ofizialei dagokie, lurralde nazional osoan ofizialak eta baliodunak diren master tituluak eskuratzeko direnei.

2. Era berean. arautzen ditu Unibertsitateak antolatzen dituen bestelako ikasketak, ikaslearen garapen profesionala, zientifikoa, teknikoa edota artistikoa hobetzeko xedearekin, eta, lanbidean aplikatzeko aukerak ematen dituzten ikerketa alor berriak hedatzeko, edo hainbat jarduera garatzeko, barneko edo inguru sozialeko eskakizunei erantzungo dietenak. Nafarroako Unibertsitate Publikoko ikasketa horiek titulu eta ziurtagiri berekiak sortu ahalko dituzte, ofizialak diren horiez gain.

LEHEN TITULUA. GRADUONDOKO IKASKETA BATZORDEA

2. artikulua. Definizioa eta eginkizunak.

Graduondoko Ikasketa Batzordea da organo eskuduna aurreko artikuluan aipatzen diren ikasketei eragiten dieten auzietan. Bereziki, hauek dira dagozkion eginkizunak.

a) Gobernu Kontseiluari proposatzea Nafarroako Unibertsitate Publikoko Unibertsitate Master Titulu Ofizialetarako eta Nafarroako Unibertsitate Publikoko ikasketa berekietarako jarraibide orokorrak, haiek eztabaidatu eta onesteko.

b) Proposatutako Unibertsitate Master Titulu ofizialak eta Titulu Berekiak analizatzea, kasu bakoitzean aztertuta programaren bideragarritasuna, egokitasun estrategikoa, legeria indardunarekiko adostasuna eta kalitate akademikoa.

c) Gobernu Kontseiluari proposatzea aipatu irakasketen urteroko eskaintza, ezertan ukatu gabe arautegi honek ezartzen duena, titulu berekiak ematea ekartzen ez duten ikasketa berekiei buruz.

d) Unibertsitateko Master Titulu Ofizial guztien Irakaskuntza Batzordeak izendatzea.

e) Beste erakunde edo organismoekin, publiko zein pribatuekin, lankidetzan aritzeko erabakiei buruzko txostenak prestatzea, tituluaren Irakaskuntza Batzordeak proposatuta.

f) Ikasketa hauen kalitatea hobe dadin sustatzea eta horri laguntzea.

g) Arautegi hau aplikatzerakoan gertatzen diren gorabeherak konpontzea, eta, beharrezkoa balitz, haren aldaketa sustatzea edo garatzeko gainerako arau batzuk sortzeko proposamena egitea.

h) Arau indardunek esleitzen dioten beste edozein eginkizun, edo Unibertsitateko Gobernu Kontseiluak agintzen diona.

3. artikulua. Osaera.

1. Graduondoko Ikasketa Batzordeko kideak, Doktore titulua izan beharko dutenak, ondoko hauek izango dira.

a) Errektoreak edo hark eskuordeturiko errektoreordeak, batzordeburu izango dena.

b) Dekanoen eta Ikastegiko zuzendarien bi ordezkari, Gobernu Kontseiluak izendatuak.

c) Saileko zuzendari bat, arlo-multzo bakoitzeko, Ikerketa Batzordeko azpibatzorde bakoitzari dagokiona, gutxienez ere ikerketa-seiurteko bat duena, Gobernu Kontseiluak izendatua.

d) Irakasle bat, arlo-multzo bakoitzeko, Ikerketa Batzordeko azpibatzorde bakoitzari dagokiona, gutxienez ere bi ikerketa-seiurteko dituena, Errektoreak izendatua.

2. Graduondoko Ikasketen Batzordeko buruak, berak hala erabakita edo batzordeko gehiengoak eskatuta, gonbit egin ahalko die, bileretara etortzeko interesgarritzat jotzen diren pertsonei, eguneko gaietakoren bat aztertzeari begira.

3. Gai horretan eskumena duen arloko zuzendariak, halakorik izendatu bada, hizpidea izango du, baina botorik ez.

4. Batzordeko idazkari aritu ahalko da, hizpidea bai, baina botorik ez duela, Administrazio eta Zerbitzuetako langile bat, batzordeari dagozkion ikasketen kudeaketa administratiboa daraman zerbitzuari atxikia.

BIGARREN TITULUA. UNIBERTSITATEKO MASTER TITULU OFIZIALAK

LEHENBIZIKO KAPITULUA. Unibertsitateko Master ikasketa ofizialen egitura

4. artikulua. Ikasketen plangintza. Prestakuntza Programa. Ikasketa Plana.

1. Unibertsitateko Master Titulu Ofizial bat osatzen duten irakaskuntzen diseinuak kontuan hartu behar ditu sarrera-profil egokia, prestakuntza-programa eta unibertsitatetik ateratako ikasleen profila.

2. Prestakuntza-programan sartuko dira ikasleak titulua lortzeko eskuratu behar dituen ezagutza eta gaitasun berariazkoak, eta izaera orokorreko edo zeharkako gaitasunak. Honako hauek osatuko dute: Ikasketa Plana eta gainerako prestakuntza-jarduerak gaindituz, eta zehazten diren kalitatea bermatzeko prozeduren laguntzarekin, emaitza zehatzak eta zenbatekotzen ahal direnak lortzea ahalbidetzen duten helburu, gaitasun eta espero diren emaitzak.

3. Ikasketa-plan bat modulu, gai eta irakasgaien egitura zehatz bat da. Horretan irakasgaiak segidan antolatuta eta planifikatuta daude, eta 60tik 120ra ECTS kreditu bitartekoak dira. Aurreikusitako iraupena, arduraldi osoko ikasle batentzat, batetik bi ikasturte bitartekoa da.

5. artikulua. ECTS kredituak. Tutoretzak.

1. Prestakuntza Programa europar kreditutan (ECTS) egituratzen da, Europako unibertsitateetan egindako ikasketen balioa errazago onar dadin, eta alderantziz. Europar kredituak, ikasleak Ikasketa Planean aurreikusitako helburuak lortzeko egin beharreko ikasketa-lanaren eduki edo karga osoa neurtzen du.

2. Nafarroako Unibertsitate Publikoan europar kreditu bat emango da ikasleak egindako 25 lan-ordurengatik, horien barnean daudela ikasgelako orduak, teoriakoak eta praktiketakoak, tutoretza eta ikasketa-orduak, mintegiak, lanak, praktikak edo proiektuak egiteko erabilitako orduak eta ebaluazio-probak prestatu eta egiteko eskatutakoak.

3. Tutoretza, ECTS kreditu-sistemaren testuinguruan, titulazio berrien prestakuntza-programetan integratutako ikasketa-metodoa da, bidea ematen duena ikasleak bere kabuz egindako lana banakatu, gainbegiratu eta ebaluatzeko. Tutoretzako parte-hartzea programatuta dago, eta ikaslearen lan-ordu presentzialak balira bezala zenbatuko da.

6. artikulua. Unibertsitateko Master Titulu Ofizialak diseinatzeko baldintzak.

Unibertsitateko Master ikasketa ofizialen egiturak ondoko baldintzak beteko ditu.

a) Ikasketen hedapena 60tik 120ra ECTS kreditu bitartekoa izango da, batez ere 90etik 120ra; kreditu horiek ikasleak eskuratu beharreko prestakuntza teoriko eta praktiko osoa izango dute: nahitaezko eta aukerako irakasgaiak, mintegiak, kanpo-praktikak, atzerriko egonaldiak, Master Amaierako Lana eta beste prestakuntza-jarduera batzuk.

b) Aukera egon daiteke aldez aurretik prestakuntza osagarriak eskaintzeko, Unibertsitate Masterrera sartzeko titulazioaren arabera eskatuko liratekeenak. Prestakuntza osagarria ez da Masterreko kredituen parte izango, ez dakarrelako Unibertsitate Masterrari dagokion berezitasuneko gaitasunik. Unibertsitateko Master titulu Ofizialari dagokion irakastorduen kopurua ez da inoiz aldatuko hartara sartzeko titulazioaren arabera.

c) ECTS kredituen eskaintza osoaren % 65, gutxienez ere, presentziala izango da.

d) Ikasturte bakoitzaren lan karga 60 ECTS kreditukoa izango da, gehienez ere.

e) Gai bati dagozkion ikaslearen lan-ordu guztietatik, gehienez ere % 40 jarduera presentzialekoak izango dira, oro har. Eskola magistrala dagokion gaiari eskainitako ordu presentzial guztien % 70 izango da, gehienez, eta % 35 gutxienez. Gainerakoa, dagokion gaiaren ezaugarriei hobekien egokitzen diren praktikak, lantegiak eta mintegiak izango dira.

f) Ikasketak presentzialak edo erdipresentzialak izango dira. Edonola ere, aukera izango da eduki jakin batzuk "urrunetik" Ikasgelategi Birtual Partekatuan eman edo hartzeko, G9 taldeko unibertsitateek partekatutako Master Titulazio Ofizialetan etorkizunean izaten ahal den eskaintzaren barnean, edo bestela europar unibertsitateekin mugikortasun birtuala bultzatzeko programen barnean.

7. artikulua. Moduluak, gaiak eta irakasgaiak.

1. Unibertsitateko Master ikasketak modulutan egituratuko dira. Modulua helburu komun bat duen ikaskuntza-unitatea da. Ebaluazio-irizpide esplizitu eta koherenteak ditu, eta gaien edo irakasgaien multzo bat biltzen du, pentsatzen baita elkartuta egon behar direla, eskaintzari begira, eta ikasleak horien jarraipen sekuentzial, horizontal edo bertikala egiteari begira.

Moduluen definizioak Unibertsitate Master batean ibilbideak (berezitasunak edo aipamenak sortuko dituztenak) ezartzeko beharrari, gaitasun batzuen lan koordinatuari edo beste irakaskuntza-irizpide batzuei erantzuten ahal die.

2. Gaiei zientzia-diziplinen balioa ematen zaie, eta irakasgaietan banatzen ahalko dira; nolanahi ere, irakasgai bakarreko gaiak ere ezartzen ahal dira.

3. Ezarritako irakasgaien egituran hauek bereizi behar dira, gutxienez: prestakuntza-jarduera teorikoak, praktikoak, mintegiak, hitzaldiak eta banakako edo taldekako beste jarduera batzuk, bai eta banakako lana eta ebaluazio-probak ere.

4. Nahitaezko edo aukerako gisa eskainitako irakasgaiek 3, 4, 5 edo 6 ECTS kreditu izango dituzte.

8. artikulua. Master Amaierako Lana.

1. Unibertsitateko Master ikasketa ofizialen bukaeran ikasleek Master Amaierako Lan bat egin eta defendatu behar dute. Ikasketa planaren arabera, lan horrek 6, 12, 18, 24 edo 30 ECTS kreditu izango ditu.

2. Masterraren Amaierako Lana tituluarekin lotutako gaitasunak eskuratzeari eta horiek ebaluatzeari begira bideratu behar da.<0}.

9. artikulua. Nahitaezko eta aukerako kredituak.

1. Unibertsitateko Master Titulu Ofizialen Ikasketa Planek nahitaezko gaien kredituen % 50 izan beharko dute, gutxienez ere, haietan barne Masterraren Amaierako Lana.

2. Aukerako irakasgaien eskaintza, gehienez ere, izango da ikasleari Unibertsitateko Master Titulu Ofiziala lortzeko eskatzen zaizkion kredituen % 50.

10. artikulua. Kanpo praktikak.

1. Kanpo praktikek aukera emango diete ikasleei lanbide arloko trebetasunak bereganatzeko. Ikasleak lanbide-jarduera horretara hurbil daitezen, kanpo praktikek honako hauek beharko dituzte: kudeaketa egitura, Unibertsitatetik kanpoko entitateekin hitzarmen eta akordioak zehaztea ahalbidetuko duena; prestakuntza baliabideak, alegia, profesionalak eta irakasleak, tutoretza lanak egingo dituztenak, eta jardueren plangintza, lan mundura bideratutako prestakuntzarako gaitasunak bermatuko dituena.

2. Lanbide-orientaziorako Unibertsitateko Master Titulu Ofizialen kasuan, kanpo praktikak nahitaezkoak izango dira. Irakaskuntzara edo ikerketara bideratutako Unibertsitateko Master Titulu Ofizialen kasuan, kanpo praktikak izan daitezke nahitaezkoak edo aukerakoak.

3. Kanpo praktikak egiten dituzten ikasleek, berariazko estaldura duen asegurua sinatuko dute matrikulan.

11. artikulua. Aldez aurreko prestakuntza osagarriak.

1. Aldez aurreko prestakuntza osagarriei esker ikasleek, egin nahi duten Unibertsitate Masterrarekin zuzenean lotzen ez diren titulazioetatik datozenean, behar diren gaitasunak eskuratuko dituzte, gainditzeko bermearekin burutu ahal izateko beren masterrak.

2. Unibertsitateko Master Titulu ofizial bat egiteko onartuak izan diren ikasleak, aldez aurreko prestakuntza osagarriak egiten ari badira, Unibertsitate Masterreko ikasleak izango dira, ondorio guztietarako.

3. Berez Unibertsitate Masterrarenak diren irakasgaien aurretik egin ahalko dituzte, edo, bestela, Masterra egiten ari direnean, tutoreak egoki ikusten dituen irakasgaiekin batera.

4. Ikasleak ez du inoiz ere,Unibertsitateko Master Titulu Ofizial bat lortzeko, 120 ECTS kreditu baino gehiago egin beharko, aldez aurreko prestakuntza osagarriak barne.

12. artikulua. Egonaldiak atzerrian.

1. Ahal den guztietan, Ikasketa Planaren barnean atzerriko egonaldi bat aurreikusiko da, betiere, Unibertsitateko Master Titulu Ofizialarekin lotura duena.

2. Egonaldiek, gehienez ere, 18 ECTS kreditu izango dituzte, betiere 3 ECTS kredituko moduluetan, eta gutxienez ere 9 ECTS kreditu.

3. Ikasleak Goi Mailako Hezkuntzako Unibertsitate Ikastegietan emango du atzerriko egonaldia, ikasketak edo Masterraren Amaierako Lana egiten, edo gero kredituak lortzeko aukera emango dioten praktikak egiten enpresetan.

4. Ikasketa Planaren barnean sartzen ahalko da, halaber, tituluarekin lotutako Nazioarteko Mugikortasun Birtualeko Programak garatzea. Programa horiei esker, ikasleek eta irakasleek beren hizkuntza-gaitasuna sendotuko duen "urruneko" nazioarteko esperientzia lortzeko aukera izango dute.

13. artikulua. Hizkuntza gaitasuna.

NUPek, Unibertsitateko Master Titulu Ofizial berrien garapenean ikasleak atzerriko hizkuntza batean -ingelesak lehentasuna izango du- gaitasuna erdiesteko prestakuntza-jarduerak sustatuko ditu, Masterraren gaiei berez dagozkienak. Era berean, ikasleak euskara edo beste hizkuntza batzuetan hizkuntza-gaitasuna erdiesteko prestakuntza-jarduerak emango zaizkio aukeran. Hizkuntzen Goi Mailako Ikastegiak, e-learningeko tresnak abian jarri eta garatzeak, mugikortasun programek, eta mugikortasun birtualeko programek gaitasun hori eskuratzen lagunduko dute.

14. artikulua. Unibertsitateko Master titulu Ofizialen kalitatea bermatzeko sistema.

Unibertsitateko Master Titulu Ofizialen kalitatea bermatzeko sistemak, oinarri izango dira irakaskuntzen antolaketa berriak eraginkortasunez funtziona dezan eta konfiantza sor dadin, hori baita tituluen egiaztapen-prozesuaren funtsa. NUPeko Unibertsitateko Master Titulu Ofizialen diseinuan, Unibertsitatearen titulazioen kalitatea bermatzeko titulu horiei banan-banan aplikatzen zaien sistema orokorretik abiatuta, honako hauek zehaztuko dira.

a) Unibertsitateko Master Titulu Ofizialaren kalitatearen berme sistemaren arduraduna.

b) Irakaskuntzaren eta irakasleen kalitatea ebaluatu eta hobetzeko prozedurak.

c) Kanpo praktiken eta mugikortasun programen kalitatea bermatzeko prozedurak, kasua denean.

d) Unibertsitatetik atera direnen laneratze-datuak eta jasotako prestakuntzari buruzko gogobetetasun-maila analizatzeko prozedurak.

e) Gai horretan parte hartzen duten talde guztien (ikasleak, administrazio eta zerbitzuetako langileak, irakasle-ikertzaileak, e.a.) gogobetetasun-maila analizatu eta iradokizun edo erreklamazioei arreta emateko prozedurak.

f) Irizpide berariazkoak titulu bat iraungitzen bada.

BIGARREN KAPITULUA. Unibertsitateko Master titulu ofiziala berriak ezartzea

15. artikulua. Xedapen orokorrak.

Nafarroako Unibertsitate Publikoan ezarri nahi den unibertsitateko edozein master titulu ofizial NUPeko ikastegi bakar bati atxikiko zaio, eta ikastegi horrek egingo dio ezartzeko proposamena Graduondoko Ikasketen Batzordeari.

Graduondoko Ikasketen Batzordeak proposamena ebaluatuko du, hari buruzko txostena prestatuko du, eta Gobernu Kontseiluari igorriko dio. Gobernu Kontseiluaren ardura da Unibertsitateen Kontseiluari igortzea Unibertsitateko Master ikasketa berrietarako proposamenei dagozkien txostenak, hark egiazta ditzan ANECAk ezarritako protokoloei jarraikiz.

4. artikulu honen lehen eta bigarren ataletan ezarritako betebeharretako bat betetzen ez bada, Gobernu Kontseiluak dagokion Ikastegiari itzuliko dio Unibertsitateko Master Titulu Ofizial berrirako proposamena, hura berriz prestatu eta betebehar horietara egokitzeko.

16. artikulua. Unibertsitateko ikastegi bati atxikitzea.

1. Nafarroako Unibertsitate Publikoko ikastegiak arduratuko dira Unibertsitatean Master Titulu Ofizialen antolamendu eta funtzionamenduaren kudeaketaz, Master bakoitzari dagokion Irakaskuntza Batzordearekin lankidetzan. Horregatik, Unibertsitateko Master Titulu Ofizial bakoitza Unibertsitateko Ikastegi bakar bati atxikiko zaio, ezertan ukatu gabe titulu horiek unibertsitateartekoak izan daitezkeela. Azken kasu horretan, Unibertsitate honetako ikastegi bati atxikiak izateaz gain, lotura izango dute beste unibertsitate batzuekin, eta hori dagokien hitzarmenean jasoko da. Ikastegiek Unibertsitateko Master Titulu Ofizialei begira ondoko eginkizun hauek izango dituzte.

a) Ikastegiari Unibertsitateko Master Titulu Ofizialaren proposamen bakoitza atxikitzearen aldeko edo aurkako txostena egitea.

b) Komunikazio organo gisa aritzea, eta horretarako Graduondoko Ikasketen Batzordeari bidaltzea ikastegiari atxikitzeko eskatzen duten Unibertsitateko Master Titulu Ofizialen "Txosten Proiektua". 18. artikuluan deskribatua.

c) Unibertsitateko Graduondoko Ikasketen Batzordeari Unibertsitateko Master Titulu Ofizialak ezartzeko eskaera egitea, sailek, ikerketa taldeek edo irakasleen taldeek proposaturik.

d) Unibertsitateko Graduondoko Ikasketen Batzordeari igortzea Unibertsitateko Master Titulu Ofizial bakoitzeko irakaskuntza Batzordea osatzeko proposamena.

e) Laguntza eta erraztasunak ematea titulu ofizial horien irakaskuntza antolamendurako, prozesuen gardentasuna, funtzionaltasuna, kalitatea eta koherentzia zainduz.

f) Graduondoko ikasketen kalitatea bermatzeko jarraipena egitea, Ikastegiko Kalitatearen Berme Batzordearen bidez. Batzordean Unibertsitate Masterraren Kalitate Arduraduna egongo da.

g) Master Amaierako Lanen Epaimahaiko kideak izendatzea, Unibertsitateko Masterraren Irakaskuntza Batzordeak proposatuta.

17. artikulua. Unibertsitateko Master Titulu Ofizial berriak ezartzeko prozedura.

Jarraitu beharreko prozedura honela egituratuko da.

a) Unibertsitateko Master Titulu Ofizialaren Txosten Proiektua prestatzea.

b) Graduondoko Ikasketen Batzordearen aginduzko txostena, Txosten Proiektuari buruzkoa.

c) Unibertsitateko Master Titulu Ofizialaren Txostena prestatzea, kasua bada.

d) Graduondoko Ikasketen Batzordearen aginduzko txostena, Tituluaren Txostenari buruzkoa.

18. artikulua. Unibertsitateko Master Titulu Ofizialaren Txosten Proiektua.

1. Unibertsitateko Master Titulu Ofizial bat ezartzeko eskaera egiteko, lehenbizi Txosten Proiektu bat aurkeztu beharko da, arautegi honen I. eranskinean datorren inprimakiari jarraikiz. Txosten Proiektuaren helburua da proposatutako Unibertsitateko Master Titulu Ofizialaren oinarriak laburbiltzea, gutxienez ere ondoko 5 puntuei begira.

a) Proposatutako izenburua Unibertsitateko Master Titulu Ofizial gisa deskribatu eta identifikatzea.

b) Titulua ezartzearen egokitasuna justifikatzea.

c) Ikasleek, prestakuntzari eta gaitasunei dagokienez, bete beharreko helburuak laburbiltzea.

d) Tituluaren xedea den ikaslearen profila identifikatzea.

e) Ikasketen bideragarritasuna, ekonomiaren zein irakaskuntzaren aldetik, aztertzea.

2. Titulu bakoitzaren Txosten Proiektua zein ikastegiri atxikitzen zaion, horrek tituluari buruzko txostena prestatu eta Graduondoko Ikasketen Batzordeari igorriko dio.

3. Unibertsitateartekoak izateko proposatzen diren Tituluek, Txosten Proiektuarekin batera Asmoen Adierazpen bat aurkeztuko dute, parte hartzeko asmoa duten unibertsitate guztietako irakaskuntza-arduradunek sinatua. Adierazpen horretan bereziki aipatuko da Unibertsitate horiek ados datozela proiektu horietan lan egitearekin.

19. artikulua. Txosten Proiektua balioestea.

1. Unibertsitateko Graduondoko Ikasketen Batzordeak Txosten Proiektua balioetsiko du, Asmoen Adierazpenarekin batera, hala dagokionean, ondoko irizpideei jarraikiz (ikusi II. eranskina).

a) Masterraren izenburua eta ezaugarri orokorrak () artikulua) egokitzea ikasleek, prestakuntzari eta gaitasunei dagokienez, bete beharreko helburuetara.

Bereziki ondoko alderdi hauek balioetsiko dira: proposatutako izenburua bat etortzea ikasleek, prestakuntzari eta gaitasunei dagokienez, bete beharreko helburuekin, proposamenak jasotzea azalpen egokia, ikasketa mailarekin edo ondorioekin bat datorrena, nahasketarik sor ez dadin edukiari eta, kasua bada, ondorio profesionalei dagokienez, prestakuntza-helburuek argi identifikatzea ikasketa aurreratuak direla, graduko ikasketetan lortzen direnekin dagoen aldea erakutsita.

b) Proposatutako ikasketak ezartzearen egokitasuna justifikatzea (18.1.b artikulua).

Bereziki ondoko alderdi hauek balioetsiko dira: proposamena prestatzeko erabilitako barne zein kanpo aholkularitza prozedurak egokitzea, proposatutako tituluak, irakaskuntzaren, zientziaren edo lanbidearen aldetik duen norabidearen interesa erakusten duten frogak ematea, kanpoko erreferentziak egotea, proposamenaren egokitasuna bermatzen dutenak, antzeko ezaugarri akademikoak dituzten tituluetarako nazioan edo nazioartean diren irizpideei begira, lanbidera edo ikerketara bideratutako Masterren kasuan, proposamenak zer lotura duen dagokion lanbide sektoreko I+G+b-ren egoerarekin.

c) Bilatzen diren titulazio profilen bideragarritasuna (18.1.d).

Bereziki ondoko alderdi hauek balioetsiko dira: profilak egokitzea Nafarroako Unibertsitate Publikotik eta unibertsitate mugakideetatik ateratzeko behar diren profilen errealitatera; curriculumaren garapen ezberdinak proposatzen badira sarbide titulazioen arabera, garapen horien proposamenaren argitasuna, koherentzia eta egokitasuna.

d) Eskura dauden giza baliabideak eta materialak (18.1.e artikulua).

Nafarroako Unibertsitate Publikoan irakasle iraunkorrak egotea balioetsiko da, bai eta irakasle horien prestasuna ere.

e) Aurrekontuaren bideragarritasuna eta kanpoko finantzaketa (18.1.e artikulua).

Ikasketak garatzeko zenbatesten diren gastuak eta kanpoko finantzaketa edukitzeko egiazko aukerak balioetsiko dira.

2. Batzordeak txosten proiektu bakoitzaren gaineko txostena eta ebaluazioa egingo du. Kontrako txostena ematen badu, edo aldeko txostena emanda ere halako baldintza batzuk betetzera behartzen badu, erabaki hori arrazoitu beharko du eta horren berri eman titulua proposatu duen ikastegiari.

20. artikulua. Unibertsitateko Master Titulu Ofizialaren Txostena.

1. Graduondoko Ikasketen Batzordeak aldeko txostena ematen badio txosten proiektu baten proposamenari, hilabeteko epea izango da txosten osoa prestatzeko, Unibertsitateen Kontseiluari hura egiazta dezan eskatzeko.

2. Unibertsitateen arteko tituluak direnean, txosten osoa ematen den unean parte hartzen duten unibertsitateen arteko hitzarmena erantsi beharko da. Hitzarmenak finkatuko ditu, gutxienez ere, ondoko alderdi hauek.

a) Ikasleen matrikula eta espedienteen tramitazioa. .

b) Tituluaren kudeaketa ekonomikoa.

c) Irakaskuntzaren garapena.

d) Ikasleen eta irakasleen mugikortasuna.

e) Eman beharreko tituluaren ezaugarriak.

f) Hitzarmen horretan aginduko duten legeak.

3. Graduondoko Ikasketen Batzordeak ezarriko ditu txostena prestatzeko, oro har, bete beharreko jarraibideak. Unibertsitateko Master Titulu Ofizial berriak une horretan ematen zen beste bat ordezten badu, titulu berriaren txostenak irakasgaien egokitzapen taula bat jaso beharko du.

21. artikulua. Graduondoko Ikasketen Batzordearen aginduzko txostena.

1. Graduondoko Ikasketen Batzordeak titulu bakoitzaren proposamenaren txosten osoa ebaluatuko du. Ebaluaziorako, ANECAk ezarritako irizpideak erabiliko ditu. Batzordeak txosten bakoitza ebaluatu eta haren gaineko txostena egingo du; txosten hori Unibertsitateko Gobernu Kontseiluari bidaliko dio. Halaber, Gobernu Kontseiluari proposatuko dio Unibertsitateen Kontseiluari bidaltzeko, haiek egiazta ditzala, aldeko txostena jaso duten Unibertsitateko Master Titulu Ofizialen eskaerak.

3. Graduondoko Ikasketen Batzordeak, kontrako txostena ematen badu, edo aldeko txostena emanda ere halako baldintza batzuk betetzera behartzen badu, erabaki hori arrazoitu beharko du eta horren berri eman Titulua proposatu duen ikastegiari.

HIRUGARREN KAPITULUA. Antolamendua eta irakaskuntza

22. artikulua. Urteko eskaintza.

1. Urrian, urtero, Irakaskuntzaren arloan eskumena duen errektoreordeak, hurrengo ikasturterako Unibertsitateko Master Titulu Ofizialen eskaintza eskatuko die ikastegiei.

2. Unibertsitateko Gobernu Kontseiluak, irakasteko baliabideen arabera, urtero onetsiko du Unibertsitateko Master Titulu Ofizialen eskaintza.

23. artikulua. Unibertsitateko Masterraren Irakaskuntza Batzordea.

1. Irakaskuntza Batzorde bat arduratuko da Unibertsitateko Master Titulu Ofizial bakoitzaren irakaskuntza zuzendaritzaz. Graduondoko Ikasketen Batzordeak izendatuko du Irakaskuntza Batzordea, Ikastegiak proposatuta Unibertsitate Masterrean lanaldi osoz aritzen diren irakasle iraunkorren artetik.

2. Unibertsitateko Masterraren Irakaskuntza Batzordea osatuko dute, gutxienez, hiru irakaslek. Horietako bat Unibertsitateko Masterraren Irakaskuntza zuzendaria izango da, beste bat Kalitate arduraduna, beste bat idazkaria, eta gainerakoak, halakorik bada, batzordekideak izango dira.

3. Unibertsitatearteko Master Titulu Ofizialen kasuan, Masterraren Irakaskuntza Batzordearen osaera ezberdina izan ahalko da, parte hartzen duten unibertsitateek ikasketak koordinatzeko adosten dituzten erabakien arabera.

4. Irakaskuntza Batzordearen bilerak akten bidez erregistratuko dira eta Masterrerako idazkariak gordeko ditu aktak. Aktetan Irakaskuntza Batzordearen erabaki guztiak jaso beharko dira.

5. Unibertsitateko Masterraren Irakaskuntza Batzordearen eginkizunak dira.

a) Ikasturte bakoitzean behar den informazio eguneratua prestatzea Unibertsitateko Master Titulu Ofizialaren publizitatea eta ikasleen matrikulazioa errazteko.

b) Masterrean sartzeko betekizunak eta ikasle zehatzak onartzeko irizpideak ezartzea eta, beharrezkoa bada, jendeari jakinaraztea.

c) Unibertsitate Masterrera sartzeko ikasleen onarpenari buruz ebaztea.

d) Ikasketak garatzeko tutorea esleitzea matrikulatutako ikasle bakoitzari.

e) Unibertsitateko Masterraren Irakaskuntza Batzordearen bileretan hartutako erabakien berri ematea Unibertsitate Masterreko irakasleei.

f) Ikastegiko Irakaskuntza Batzordeari kredituak onartzeko eta transferentziak egiteko proposatzea.

g) Unibertsitate Masterraren garapenaren jarraipena egitea, Tituluen Kalitatearen Berme Sisteman identifikatutako prozesuak betetzen direla ziurtatzea eta haien emaitzak jaso, aztertu eta Ikastegiko Kalitatearen Berme Batzordeari horien berri ematea, bereziki eraginkortasunik eza edo disfuntzioak atzematen badira.

h) Ikastegiari proposatzea Master Amaierako Lanen epaimahairako kideak.

i) Programa, ikasketa egutegiari lotu dakion zaintzea, Master Amaierako Lanen defentsa barne eta, beharrezkoa bada, kanpoko praktikak egitea ere bai.

24. artikulua. Irakasleak.

1. Unibertsitateko Master Titulu Ofizialetako irakasgaien irakasle arduradunek Unibertsitatearekin lotura iraunkorra izan beharko dute. Hala ere, irakaskuntzan, beste kategoria batzuetako unibertsitateko beste irakasle edo ikertzaile batzuek eta unibertsitate kanpoko profesional adituek ere parte hartu ahalko dute, baina ezin izango dute prestakuntzazko irakasgaien ardura beren gain hartu.

2. Irakaskuntza Batzordeak, era berean, Unibertsitate Masterrean parte hartzeko baimena eman ahalko die Ramón y Cajal, Juan de , I3 edo antzeko programetako ikertzaileei, eta unibertsitate institutuei atxikitako langileei, edo Nafarroako Unibertsitate Publikoko Administrazio eta Zerbitzuetako Langileei, profesional aditu gisa.

3. Unibertsitatearteko Master Titulu Ofizialetan, unibertsitate bateko irakasleak izanik, irakaskuntza beste unibertsitate batean ematen duten irakasleek (Master beraren barnean), irakaskuntza hori kontabilizatzen ahalko dute jatorrizko Unibertsitateko Irakaskuntza Antolamenduaren Planaren barnean, Unibertsitate Masterra emateko Unibertsitateen arteko hitzarmenean horrela ezarri bada.

25. artikulua. Tutorea.

1. Unibertsitateko Masterraren Irakaskuntza Batzordeak, ikasle bat onartzen duen unean, irakasle tutore bat esleituko dio. Tutoretzak honako oinarrizko helburu hauek izango ditu.

a) Ikasle berriak igarotzeko eta horiek onartu eta integratzeko prozesua erraztea.

b) Ikastegien eta Unibertsitatearen zerbitzu, laguntza eta baliabideei buruzko informazioa ematea.

c) Tutoretzapeko ikasleen irakaskuntza aurrerabidea erraztea, banakako jarraipenaren bidez.

d) Ikasleei curriculum plana beren interes eta aukeren arabera diseinatzen laguntzea.

e) Ikasketetan dituzten zailtasunak identifikatzea eta aplika daitezkeen konponbideak aztertzea.

f) Laneratzeko eta irtenbide profesionalak aurkitzeko aholkuak ematea.

2. Tutoreak izan ahalko dira Nafarroako Unibertsitate Publikoko irakasleak, ahal dela lanaldi osoz aritzen direnak, eta ikaslea matrikulaturik dagoen Unibertsitateko Master Titulu Ofizialean irakaskuntza ematen dutenak.

26. artikulua. Irakaskuntza eskaintzaren bermea.

1. Unibertsitateko Master Titulu Ofizialaren ardura duen Ikastegiak, matrikulatutako ikasleei bermatuko die masterra ikasturte batean osatu ahalko dutela 60 kredituko ikasketak direnean, edo bi urtetan, 120 kreditura arteko ikasketak direnean.

2. 20. artikuluaren 4. idatz-zatian ezarritakoa kaltetu gabe, Unibertsitateko Master Titulu Ofizial bat emateari uzten zaionean, ardura duen ikastegiak, oraindik bukatu ez duten ikasleei bukatzeko ezinbestekoak dituzten irakasgaiak eman beharko dizkie. Eskaintza hori Unibertsitate Masterra behin betiko iraungi ondoren, hurrengo bi ikasturteetarako ere izango da.

LAUGARREN KAPITULUA. Unibertsitateko Master titulu ofizialetako ikasleak

Lehen atala. Sarbidea eta onarpena

27. artikulua. Sartzeko argibideak.

1. Unibertsitateko Master Titulu Ofizialen aurreinskripziorako aldi orokorraren aurretik, Unibertsitateak titulazio bakoitzaren irakaskuntza gidaliburua argitaratu beharko du, honako informazio hau emanez.

a) Aurreinskripzio, onarpen eta matrikula prozesuetarako bitartekoak, lekuak eta egunak.

b) Ikaspostuen eskaintza eta horietatik zenbat dauden erreserbaturik mugikortasun hitzarmenen bidez edo bestelako hitzarmenen bidez sartzen diren atzerriko ikasleentzat.

c) Izangaiak hautatzeko balioespen irizpideak eta onarpenerako betekizun espezifikoak.

d) Prestakuntza Programa.

e) Irakasgai bakoitzaren programa, honako hauek adierazita: deskribatzaileak, helburuak eta eskumenak, betekizunak eta gomendioak, testuingurua, gaitegia eta edukiak, metodologia eta lanerako plangintza, bibliografia eta baliabideak, aurreikusten diren irakasleak, eskola orduak, ebaluazio sistemak eta zein hizkuntzatan ematen den.

f) Ikasteko behar den arduraldia.

g) Irakaskuntza modalitateak.

h) Zein hizkuntzatan edo hizkuntzetan ematen den.

2. Ezgaitasunagatik hezkuntza-behar berariazkoak dituzten ikasleek Unibertsitatera jo ahalko dute, laguntza- eta aholkularitza-zerbitzuek balioets dezaten curriculumean egokitzapenak egitea beharrezkoa den edo ez.

28. artikulua. Sartzeko betekizun orokorrak.

1. Unibertsitateko Master ikasketa ofizialetara sartzeko beharrezkoa izango da Espainiako unibertsitate titulu ofizial bat edukitzea, edo Europako Unibertsitate Eremuko goi mailako hezkuntza erakunde batek emandako bestelako bat, titulua eman den herrialdean Unibertsitate Master ikasketetara sartzeko aukera ematen duena.

2. Era berean, sarbidea izango dute Europako Unibertsitate Eremutik kanpoko hezkuntza sistemen bidez titulatutakoek, haien tituluak homologatu behar izan gabe, aldez aurretik Unibertsitateak baieztatuta titulu horiek egiaztatzen dituztenen prestakuntza maila Espainian dagokien unibertsitate tituluaren baliokidea dela, eta titulua eman den herrialdean Unibertsitate Masterreko ikasketetara sartzeko gaitzen dituztela.

Sarbidea era honetan edukitzeak ez du inola ere ekarriko tituludunak aldez aurretik duen tituluaren homologazioa, ez eta hura aitortzea ere; Unibertsitate Masterreko ikasketak Nafarroako Unibertsitate Publikoan burutzeko egiten da soilik.

29. artikulua. Ikaspostu kopuruen mugak eta erreserbatutako ikaspostuak.

1. Ikasturte bakoitza hasi aurretik, Gobernu Kontseiluak Unibertsitateko Master Titulu Ofizialen eskaintza eta horietarako dauden ikaspostu kopurua ezarriko ditu.

2. Gehienez ere Masterreko ikaspostuen % 25 gorde ahalko dira atzerriko ikasleen mugikortasuna errazteko aritzen diren erakundeekin egindako hitzarmenen bidez sartzen diren ikasleentzat.

30. artikulua. Onartuak izateko prozedura.

1. Ikasturte bakoitza hasi aurreko otsailean hasiko da aurreinskripzioa.

2. Ikasleek Graduondoko Ikasketen Bulegoan aurreinskripziorako eskabide bakarra aurkeztuko dute, eta horretan titulazio bat edo batzuk jarri ahalko dituzte, lehentasun hurrenkeran jarrita, eta Unibertsitateak, ikaspostua esleitzeko, horixe hartuko du kontuan.

3. Ikasle bakoitzak Unibertsitateko master bakar batean egin ahalko du matrikula. Hala ere, aurreko ikasturtean Unibertsitateko Master Titulu Ofizial batean matrikulatutako ikasle bat bada, errektoreari eskatu ahalko dio beste ikasketa batzuekin batera egitea, betiere, aurreko ikasketak bukatzeko gehienez ere 20 kreditu falta bazaizkio.

4. Unibertsitateko Master bakoitzeko Irakaskuntza Batzordeari dagokio Unibertsitateko Master Titulu Ofizial batean ikasleak onartzeko erabakia.

5. Masterreko Irakaskuntza Batzordeak prestatuko du eta argitaratuko du onartutako ikasleen eta zain daudenen zerrenda, Unibertsitateko Master bakoitzean sartzeko betekizunekin eta onartzeko berariazko irizpideekin bat.

6. Zerrenda Graduondoko Ikasketen Bulegoko iragarki oholean eta Unibertsitatearen Webgunean jarriko da. Bertan, ikasle bakoitzarentzat xehatuta jarriko da zein balioespen izan duen sartzeko betekizunei eta onartzeko irizpide berariazkoei begira.

7. Onarpena behin-behinekoa izango da eta izangai bakoitzak, matrikula egiteko unean, Master bakoitzean sartzeko berariazko betekizunak eta onartzeko irizpideak betetzen dituela frogatzen duenean, behin betiko onarpen bihurtuko da.

8. Interesdun ikasleek, aipatu zerrenden aurkako erreklamazioa aurkeztu ahalko dute, argitaratzen direnetik bost eguneko epean. Graduondoko Ikasketen Batzordeak erreklamazioak ebatziko ditu, epea bukatzen denetik, hilabete bateko epean gehienez ere.

Bigarren atala. Ikasleen arduraldia

31. artikulua. Ikasleen tipologia arduraldiaren arabera.

1. Nafarroako Unibertsitate Publikoan, ikasleari urteko matrikulan eskatzen zaizkion gutxieneko ECTS kreditu kopuruaren arabera, honako tipologia hau ezartzen da.

a) Arduraldi osoko ikaslea: gutxienez 60 ECTS kreditu kopuruaren matrikula egin beharko du, edo Unibertsitate Masterra bukatzeko falta zaizkion kredituen matrikula.

b) Arduraldi ez osoko ikaslea: gutxienez 20 ECTS kreditu kopuruaren matrikula egin beharko du ikasturte bakoitzean.

2. Ikasleek, matrikula egiteko unean erabakiko dute zer nolako arduraldia hautatu.

32. artikulua. Ikasle bisitariak.

1. Unibertsitateko Master Titulu Ofizial bateko ikasle bisitaritzat hartuko dira horren modulu batean edo batzuetan, edo ikasgai multzo jakin batean, era puntualean matrikulatuta dauden ikasleak. Horrela gainditzen diren irakasgaiak ziurtagiri batean jasota geldituko dira.

2. Ikasle bisitaria Nafarroako Unibertsitate Publikoan Unibertsitateko beste Master titulu ofizial bat egiten ari bada, kredituak Unibertsitateko Master honetan bere ikasketa espedientean aitortuak edo transferituak izan ahalko dira.

3. Ikasle bisitari gisa onartua izateko baldintza izango da postuak gelditzea, behin Unibertsitateko Master Titulu Ofizialaren ikasleen matrikularako ohiko epea bukatu eta gero. Ikasle bisitariak ez dira sartuko Unibertsitateko Masterraren adierazleen kalkuluan.

Hirugarren atala. Urteko irakaskuntza eta administrazio egutegia

33. artikulua. Urteko irakaskuntza eta administrazio egutegiaren onespena.

1. Unibertsitateko Graduondoko Ikasketen Batzordeak proposatuta, Gobernu Kontseiluak onetsiko du ikasturte bakoitzean behar den irakaskuntza egutegia, betiere ondoko artikuluan ezarritako jarraibideak betez.

2. Nafarroako Unibertsitate Publikoko errektoreak edo gai horretan eskumena duen errektoreordeak ikasturte bakoitzerako administrazio egutegia onetsiko du, betiere ondoko artikuluan ezarritako jarraibideak errespetatuz.

3. Master Amaierako Lan horien defentsa publikorako ohiko bi aldi ezarriko dira, seihileko bakoitzeko bana. Haietara aurkezteko ikasleek gainditu beharko dituzte titulua eskuratzeko behar diren gainerako ECTS kredituak. Halaber, ohiz kanpoko deialdia egongo da irailean, Master Amaierako Lanaren defentsa publikorako. Ikasleek, defentsa egiteko, inolaz ere ezin izango dute bi deialdi baino gehiago erabili ikasturte bakoitzean.

34. artikulua. Irakaskuntza egutegiaren egitura.

1. Irakaskuntza egutegia egiteko abiapuntutzat ikasturte bat edo bi kontuan hartuko dira, haietariko bakoitza bi seihilekotan garatua.

2. Arduraldi osoko ikasleek denboraldi horietan seihilekoaren garapenarekin lotutako jarduera guztiak egin beharko dituzte: ikasgelako eskola presentzialak, teorikoak edo praktikoak, mintegiak, tutoretzak, banakako edo taldekako lanak, kanpo praktikak, proiektuak, bakarka edo taldeka ikastea, eta ebaluazio probak prestatu eta egitea.

Laugarren atala. Matrikula

35. artikulua. Matrikula.

1. Matrikula, eta hura aldatzea edo deuseztea, Graduondoko Ikasketen Bulegoan egingo da, ikasturte bakoitzeko administrazio egutegian ezartzen den epeetan eta modu bakarrean edo mailakatuan.

2. Administrazio egutegiak onarpenerako eta matrikularako lehen aldi bat ezarriko du ekainetik uztailera bitartean, eta bigarren aldi bat irailean, matrikula osatuta egon dadin urriaren 1erako. Era berean, ikasturtea hasi ondoren matrikula aldia zabalik egongo da otsaileko lehen astera arte, legezko baldintzaren bat betetzeko baldintzapean onartuak diren ikasleen matrikula egin ahal izateko.

3. Master Amaierako Lanaren matrikula 56. artikuluan ezarritako epeetan egingo da.

4. Ezarritako epean matrikula gauzatzen ez duten ikasleek matrikula egiteko eskubidea galduko dute, ez bazaie, behintzat, galarazi dien zerbait larri gertatu ez agertzeko, eta hori behar bezala egiaztatzen badute. Horretarako eskabidea aurkeztuko dute errektorearen aurrean, edo haiek eskuordetutako errektoreordearen aurrean, eta berak ebatziko du.

36. artikulua. Matrikularen aldaketa.

1. Ikasleek, horretarako jarritako epean eta tutorearen adostasuna izanik, matrikula zabaldu ahalko dute oraindik ematen hasi ez diren irakasgaietan matrikulatuz.

2. Era berean, matrikulatik irakasgai batzuk ere kendu ahalko dituzte, eskoletara joatea galarazten dien zerbait larri gertatu bazaie eta hori behar bezala egiaztatzen badute. Errektoreak edo berak eskuordetutako errektoreordeak balioetsiko du. Lehen deialdian azken ebaluazioa izan duen irakasgairik ezin izango da ikasle baten matrikulatik ezabatu inolaz ere.

37. artikulua. Unibertsitatearen ofiziozko jarduna matrikula deuseztatzeari buruzko eskaerei dagokienez.

1. Nafarroako Unibertsitate Publikoak ikasleen espedienteak blokeatuko ditu honako kasu hauetan.

-Matrikularen prezio publikoak ezarritako epeetan ez ordaintzeagatik.

-Ikasleak ez badu aurkezten matrikula egiteko nahitaez eskatzen diren agirietakoren bat.

2. Espedientea blokeatzeak berarekin ekarriko du tituluak edo ziurtagiriak ezin luzatzea, espedientea beste unibertsitate batera ezin lekualdatzea, edo bestelako kudeaketa akademiko administratiborik egin ezin izatea.

3. Interesdunari espedientearen blokeoaren berri emango zaio, jakinaren gainean egon dadin, besterik gabe.

38. artikulua. Matrikula deuseztatzea.

1. Ikasleek matrikula deusezteko eskatzen ahalko dute ikasturtea hasten denetik hilabete bateko epean, justifikaziorik egiaztatu beharrik gabe, ofizioz onartuko baita.

2. Aurreko idatz-zatian ezarritakoa galarazi gabe, ikasleak eskatuta, matrikula deusezten ahalko zaio ikasturtearen edozein unetan, aurrerantzean ikasketak jarraitzea eragozten dioten aparteko egoeretan eta gertatzezkoetan, ikasleak behar bezala justifikatuta.

3. Estreinakoz matrikula eginda izanik, aparteko egoeretan eta gertatzezkoetan, eta ikasleak behar bezala justifikatuta, matrikula deuseztapena izan duten ikasleek, ikasketa horietan lehen bezala matrikulatzeko eskubidea izaten jarraituko dute, hurrengo aurreinskripzio prozesuan berriro parte hartu beharrik gabe. Ikaspostu horiek ez dira onarpen mugen barnean zenbatuko.

4. Kasu guztietan, errektorearen edo eskumena duen errektoreordearen ebazpen baten bidez ebatziko dira deuseztatzeak.

5. Matrikula deuseztatzeak matrikulatutako, onartutako edo baliokidetutako kreditu guzti-guztiei eragingo die, eta sortutako ondorio akademiko guztiak baliogabetuko dira, halakorik bada.

39. artikulua. Matrikula deuseztatzeko eskaeraren ondorio ekonomikoak.

1. Aurreko artikuluaren 1. idatz-zatian aurreikusitako kasuan, matrikula deuseztatzeak berarekin dakar matrikulatutako edo onartutako kredituei dagozkien prezio publikoen zenbatekoaren % 80a itzultzea.

2. Aurreko artikuluaren 2. idatz-zatian aurreikusitako kasuan, matrikula deuseztatzeak berarekin dakar matrikulatutako edo onartutako kredituei dagozkien prezio publikoen zenbatekoaren % 100a itzultzea.

3. Estreinakoz matrikula egin duten ikasleen kasuan, ikasleek eskubidea izango dute matrikulatutako, onartutako edo baliokidetutako kredituei dagozkien prezio publikoen zenbatekoaren % 100aren itzulketa jasotzeko, honako baldintza hauek betetzen direnean.

a) Deuseztatzearen arrazoia izatea ikaslea beste unibertsitate batean onartua izan dela, aurreinskripzio prozesuan ikaspostuen berresleipena egin delako.

b) Nafarroako Unibertsitate Publikoak hutsunea bete ahal izatea ikasketa horietan hasteko itxaron-zerrendan dauden ikasleekin.

4. Inolaz ere ez dira itzuliko espedientea irekitzeagatik ezarritako prezio publikoak ezta kudeaketa administratiboari dagozkionak ere.

Bosgarren atala. Kredituen balioa aitortu eta horiek transferitzea

40. artikulua. Aplikatu beharreko arautegia.

Kredituak eman eta transferitzeko sistema arautzeko Nafarroako Unibertsitate Publikoko Gobernu Kontseiluaren 2008ko urriaren 24ko Erabakian azaldutakoari jarraituko zaio. Erabaki horrek "Nafarroako Unibertsitate Publikoko kredituen balioa aitortu eta horiek transferitzeari buruzko arautegia" du izena, eta 2008ko azaroaren 14an NAOn argitaratu zen, Nafarroako Unibertsitate Publikoko errektorearen urriaren 29ko 1854/2008 Ebazpenaren bidez.

Seigarren atala. Ebaluazioa

41. artikulua. Deialdi kopurua.

1. Ikasleak sei deialditarako eskubidea du irakasgai bakoitza gainditzeko.

2. Irakasgai guztien matrikulak, Master Amaierako Lanarenak barne, ebaluazioaren ondorioetarako, bi deialditarako eskubidea emango dute matrikula egiten den ikasturte horretan.

3. Deialdia ez da kontuan hartuko irakasgaiaren aktan "Ez aurkeztua" kalifikazioa azaltzen denean. Kalifikazio hori soilik jarriko da ikasleak ez duenean parte hartu irakasgai horren prestakuntza programan ezarritako ebaluatzeko inolako jardueratan (praktikak, lanak, azterketak edo bestelakoak).

42. artikulua. Deialdien izaera.

1. Ohiko deialdiak izango dira irakasgai bakoitzaren lehen lau deialdiak.

2. Ohiz kanpoko deialdiak izango dira irakasgai bakoitzaren azken bi deialdiak.

43. artikulua. Ohiz kanpoko deialdiak.

1. Ikasleek, administrazio egutegian ezarritako epeetan, eskatzen ahalko dute azken bi deialdietako ebaluazioa epaimahai batekin egitea.

2. Errektoreak edo eskumena duen errektoreordeak ebatziko ditu eskaerak.

3. Epaimahaia osatuko dute irakaskuntza atxikitako saileko edo sailetako hiru irakaslek, dagokion ikastegiko dekanotzak edo zuzendaritzak izendatuak. Epaimahaiak, dagokion irakasgairako, oro har ezarritako ebaluazio sistema aplikatu beharko du.

44. artikulua. Ebaluazio modalitateak.

2. Ikasleak ikasturtean eskuratutako gaitasunen etengabeko ebaluaziorako modalitateak sustatuko dira. Nolanahi ere, irakasgai bakoitzaren irakaskuntza aldiaren bukaeran, beharrezkoa balitz, ebaluazio-proba orokor bat eskatzen duten irakasgaietako azken azterketak egingo dira.

3. Irakasgai bakoitza ebaluatzeko modua irakasgaiaren Prestakuntza Programan ezarriko da eta ikasleei jakinaraziko zaie irakaskuntza aldi bakoitza hasi baino lehen.

4. Ebaluaziorako probak ezgaitasuna duten ikasleen beharretara egokitu behar dira, eta beharrezko egokitzapen material eta metodologikoak egingo dira eskumena duen unitateak koordinatuta eta gainbegiratuta.

45. artikulua. Etengabeko ebaluazioa.

1. Ikasleen eskola-errendimenduaren ebaluazioa objektiboa izango da, etengabeko ebaluaziorako joera izango du, eta hezkuntzaren tresna ardurakide gisa eta irakaskuntza-ikaskuntza prozesuaren fase bat bezala ulertuko da.

2. Irakastaldian erabiltzen diren etengabeko ebaluaziorako mekanismoek, azken ebaluazioari begira, irakasgaiaren Prestakuntza Programan ezartzen den pisua izango dute.

3. Irakasgaiaren Prestakuntza Programarekin bat, etengabeko ebaluazioa azken ebaluazio batekin osatzen ahalko da, Unibertsitatearen irakaskuntza egutegian horretarako ezarritako esparruan.

4. Ikasleek aldiro izango dute etengabeko ebaluazioa osatzen duten jardueretan izandako emaitzen berri. Horretarako, irakasgaiaren Prestakuntza Programan ezarritako mekanismoak erabiliko dira.

46. artikulua. Azken ebaluazioa.

1. Azken ebaluazioa ahozkoa zein idatzizkoa izango da eta, beharrezkoa denean, irakaskuntza egutegian ezarritako epean egingo da; irakasgaian eskatzen diren gaitasunak eta helburuak lortu direla frogatuko da etengabeko ebaluazioan bezalaxe.

2. Azken ebaluazioa irakasgaiaren Prestakuntza Programan ezarritakoaren arabera egingo da. Proba bat gainditzea edo lan bat aurkeztea eskatzen ahalko da.

3. Azterketak, halakorik bada, horretarako ezarritako epean egingo dira eta ezin dira izan larunbata arratsaldetan, igandeetan ez eta jaiegunetan ere. Ohiz kanpoko edozein salbuespen egiteko, baimena eskatu beharko zaio idatziz Unibertsitate Masterra atxikita duen ikastegiko Zuzendaritzari edo Dekanotzari.

4. Azterketetarako deialdia Ikastegiko Idazkaritzan argitaratuko da seihileko bakoitza hasi baino lehen, eta tokia, eguna eta ordua adieraziko dira. Egun horiek Unibertsitateko Masterraren Irakaskuntza Batzordeak jarriko ditu, Gobernu Kontseiluak onetsitako azterketa-aldiaren barnean, eta irakasgaiak ematen dituzten irakasleei eta ikasleei entzun ondoren.

5. Edozein ebaluazio probatan iruzurrik atzemanez gero, ikasle horri proba baliogabetuko zaio. Beharrezkoa bada, ez gainditua kalifikazioa jartzen ahal zaio deialdi horretan, prozedura hori bukatu ondoren ezartzen ahal zaizkion bestelako erantzukizunak edozein izanik ere.

47. artikulua. Azterketa eguna aldatzeko banan-banako eskaera.

1. Ikasleak azterketa-eguna aldatzeko eskaera egin dezake, behar bezala arrazoitutako zergatikoak baldin baditu, esaterako.

a) Klaustroaren, Gobernu Batzordearen, Gizarte Kontseiluaren, Ikastegiko Batzordearen edo Saileko Kontseiluaren bilera eta azterketa egun berean izatea, ikaslea deialdia egin duen organoko kidea bada.

b) Ikasleak matrikula egina duen titulazioan bi azterketa edo gehiago egun eta ordu berean izatea.

c) Unibertsitateko kirol lehiaketak eta azterketa egun berean edukitzea, Unibertsitateak ofizialki parte hartzen badu horietan eta ikaslea Unibertsitatearen ordezkaria bada.

d) Beste edozein, irakasle arduradunaren iritziz nahikoa bada.

2. Kasu horietan, irakasleak eta interesdunak bien artean beste egun bat adostuko dute, Gobernu Kontseiluak onetsitako azterketa-aldiaren barnean. Adosten ez badute, ikasleak Unibertsitateko Masterraren Irakaskuntza Batzordeari eskatu ahal izango dio eguna aldatzea.

48. artikulua. Kalifikazioak berrikustea.

1. Ikasleek eskubidea dute ebaluazio proba eta lan guztien kalifikazioak berrikusteko, akta ofizialetan jarri aurretik.

2. Irakasgaiaren ardura duen irakasleak eta, beharrezkoa bada, epaimahaiburuak, kalifikazioak iragarki-oholetan jartzeaz gainera, azterketak berrikusteko egun-orduak ezarriko ditu. Gutxienez egun batean berrikusiko dira, goiz eta arratsaldez, baina berrikusketa ez da hasiko kalifikazioak jendaurrean jarri, eta hurrengo egun balioduna igaro baino lehenago.

3. Kalifikazioa berrikusi ondoren, ikaslea ados ez badago, errekurtsoa jar dezake; horretarako idazkia egin behar dio Unibertsitateko Masterraren Irakaskuntza Batzordeari eta bertan arrazoiak eman, berrikusketa egin ondoren, bi egun balioduneko epean. Horretarako, Batzordeak epaimahai bat izendatuko du, Unibertsitateko Masterraren hiru irakaslek osatua, non irakasgaiaren irakasle arduraduna ezin baita egon. Idazkia aurkeztu, eta, gehienez ere, hamar eguneko epean, Epaimahaiak ebazpena eman beharko du, eta horren aurka gorako errekurtsoa aurkez daiteke errektorearen aurrean.

4. Errekurtsoa izateak ez du geldiaraziko aktak osatu eta emateko prozedura.

49. artikulua. Azterketak gordetzea.

1. Irakasleek idatzizko azterketak gordeko dituzte, bai eta ahozko azterketen dokumentuak eta egindako praktikei buruzko txostenak ere, emandako kalifikazioa justifikatzen dutenak, Artxiborako Batzordeak ezartzen duen epean.

2. Kalifikazioaren aurkako errekurtsoa jartzen bada, dokumentu guztiak gordeko dira, gaia behin betikoz ebatzi arte.

50. artikulua. Aktak.

1. Irakasgaiaren aktak ondoko artikuluetan ezarritako moduan jasoko ditu kalifikazioak, eta ez ditu zuzenketak edo zirrimarrak edukiko; eta Unibertsitateak dituen baliabide tekniko eta informatikoen bidez bete beharko da.

2. Irakasgaiaren irakasle arduradunak aktaren orri guztiak sinatu beharko ditu.

3. Akatsen bat egonez gero, dagokion eginbidea dokumentuaren atzeko aldean idatzi beharko da, zuzenketa egunarekin batera, eta irakasgaiaz arduratzen diren irakasleek sinatu beharko dute. Egindako zuzenketak ikasleek egiaztatu ahal izango dituzte beren espedienteetan.

4. Akta eman, eta handik urtebetera, ezin izango da egin aktaren edukia aldatuko duen eginbiderik, erreklamazioa aurkeztu ez bada, behintzat.

5. Irakasleek akten jatorrizkoak eman beharko dituzte, gai horretan eskuduna den errektoreordeak deialdi bakoitzerako ezarritako epeetan eta prozedurari jarraikiz. Epeak ez betetzeagatik sortutako erantzukizuna irakasgaiaz arduratzen den irakaslearena da, edo epaimahaiarena, epaimahaia egonez gero.

51. artikulua. Kalifikazio sistema.

1. Nafarroako Unibertsitate Publikoan, irailaren 5eko 1125/2003 Errege Dekretuak arautuko ditu kalifikazioak, horrek ezartzen baitu kredituen sistema europarra eta lurralde nazional osoan ofizialak eta baliodunak diren unibertsitate titulazioetako kalifikazio sistema.

2. Erabilitako ebaluazio sistema edozein izanik ere, eta aurreko idatz-zatian adierazitakorekin bat, gai bakoitza 0tik 10era kalifikatuko da, hamarren bakar batekin.

-0-4.9: Ez Gainditua (EG).

-5.0-6.9: Gainditua (G).

-7.0-8.9: Oso Ongi (OO).

-9.0-10: Bikain (BK).

-Ohorezko Matrikula (OM).

3. "Ohorezko Matrikula" aipamena 9,0 kalifikazioa edo hura baino handiagoa atera duten ikasleei eman ahalko zaie. Haien kopurua ezin izango da ikasturte batean ikasgai batean matrikulaturiko ikasleen ehuneko bosta baino handiagoa, ez bada matrikulaturiko ikasleen kopurua 20tik beherakoa dela, eta kasu horretan "Ohorezko Matrikula" bakarra eman ahalko da.

52. artikulua. Kalifikazioen alderaketa eta gardentasuna.

Kalifikazioen alderaketa eta gardentasuna ahalbidetzeko, "ECTS eskala" izeneko letrazko eskala jarriko da horiekin batera, matrikulaturiko ikasle kopuruak horretarako bidea ematen badu, betiere.

-A: kalifikazioa % 10 onenen barnean dago.

-B: kalifikazioa hurrengo % 25 onenen barnean dago.

-C: kalifikazioa hurrengo % 30 onenen barnean dago.

-D: kalifikazioa hurrengo % 25 onenen barnean dago.

-E: kalifikazioa hurrengo % 10 onenen barnean dago.

-Gaia gainditu ez bada, F izendapena aplikatzen da. FX kalifikazioa erabiltzen ahal da gaia ikaslea gainditzetik hurbil dagoela adierazteko, eta F oraindik hori lortzetik urrun dagoela adierazteko.

53. artikulua. Ikasketa espedientean kredituak sartzea eta ziurtatzea.

1. Ikasleak lortutako kredituak, transferituak, balioa aitortu zaienak, eta dagokion titulua lortzeko gainditu diren guztiak bere ikasketa espedientean sartu eta Tituluaren Europako Gehigarrian ezarriko dira.

2. Ikasketa espedientearen ziurtagirian kalifikazioak arautegi honetako aurreko artikuluetan ezarritako zehaztasunekin adieraziko dira.

3. Ikasketa ziurtagirietan espedientearen batez bestekoa adieraziko da, ondoko artikuluan ezarritakoarekin bat.

54. artikulua. Ikasketa espediente bukatutakoen balioespena.

1. Ikasle bakoitzaren ikasketa espedientearen batez bestekoa irailaren 5eko 1125/2003 Errege Dekretuan ezarritako formularen arabera ateratzen da, ondoko idatz-zatian ezarritakoa kaltetu gabe.

2. Ikasketa espediente batean kalifikazio sistema bat baino gehiago (kuantitatiboa eta kualitatiboa) erabili dela ikusten bada, edo ikasleen ikasketa espedienteek kalifikazio sistema berdinak erabiltzen ez dituzten lehiakortasun prozesuetan, ikasleen ikasketa espedienteen balioespena homogeneizatzeko, nahitaez erabili beharko da ondoan deskribatzen den prozedura eta zenbakizko eskala.

Ikasketa espedientearen batez bestekoa ateratzeko, 1044/2003 Errege Dekretuaren I. eta II. eranskinetako 4.5 puntuan ezarritako zenbakizko eskala erabiliko da, tituludunaren kalifikazio osoari dagokiona, eta espedientea osatzen duten irakasgai edo ikasmaila guztiekin alderatuta, irakasgai edo ikasturte bakoitzaren balioa haztatzeko ezartzen den formula, honako irizpide hauekin bat.

-Irakasgaien edo ikasmailen zenbakizko kalifikazioak, ondoko baliokidetza taularekin bat aterako dira.

Kalifikazioa Baliokidetza puntuetan.

5.0-6.9 Gainditua - 1.

7.0-8.9 Oso ongi - 2.

9.0-10 Bikain - 3.

9.0-10 Bikain Ohorezko Matrikularen aipamenarekin - 4.

-Aitortzen diren kredituak jatorrizko ikastegian lortutako kalifikazioaren baliokideak dira puntutan.

-Ez dira zenbatuko kalifikaziorik gabe aitortutako kredituak, kreditu transferituak, "gai" kalifikazioa dutenak ez beste edozein adierazpen duten guztiak ere.

-Irakasgai bakoitzaren edo gainditutako ikasmaila bakoitzaren kalifikazioa haztatuko da, osatzen duten kredituen arabera, honako formula honekin bat.

V= P x Nca / NCs.

Non.

V= irakasgaiaren edo ikasmailaren balio haztatua.

P= irakasgaiaren edo ikasmailaren puntuazioa, baliokidetza taularen arabera.

Nca= irakasgaia edo ikasmaila osatzen duten kreditu kopurua.

NCE = gainditutako kredituak, guztira.

-Espedientearen batez besteko nota ateratzeko, gainditutako irakasgai edo ikasmaila guztien balio haztatua batzen da.

55. artikulua. Jabetza intelektuala.

1. Euskarri material bakarra duten lanak, Masterraren Amaierako Lana barne, eta praktiken oroitidazkiak, balioetsi ondoren itzuliko zaizkie sinatzen duten ikasleei, hala eskatuta, irakasgaiaren azken kalifikazioaren aurkako erreklamazioak egiteko epea amaitu ondoren, ez bada errekurtso bat ebazteko dagoela.

2. Aurreko idatz-zatian aipatzen diren lanen argitalpena edo erreprodukzioa, osoa zein zati batekoa, edo erabat akademikoa ez den beste helburu batekin erabiltzeko, egilearen edo egileen berariazko baimena beharko da, jabetza intelektualari buruzko legeriarekin bat.

Zazpigarren atala. Masterraren Amaierako Lana

56. artikuluan. Matrikula Masterraren Amaierako Lanean.

1. Masterraren Amaierako Lanean matrikula egin ahalko dute titulua lortzeko gainerako irakasgaiak gaindituta dituzten ikasleek, edo irakasgai horien matrikularekin batera masterraren matrikula egiten dutenek.

2. Masterraren Amaierako Lanaren defentsa inolaz ere ezin izango da egin, aldez aurretik ez badira gainditu titulua lortzea ahalbidetzen duten gainerako irakasgai guztiak.

3. Ikasleek Masterraren Amaierako Lanean matrikula egin ahalko dute Graduondoko Ikasketen Bulegoan, edozein egun baliodunetan ikasturtea hasten denetik eta ikasturte horretako otsaileko azken egun baliodunera bitartean.

57. artikulua. Masterraren Amaierako Lana defendatzeko izena ematea.

1. Ikasleek inskripzioa egin beharko dute Ikastegiko Idazkaritzan, horretarako jarritako epeetan. Inskripzioa egiteko, Masterraren Amaierako Lana aldez aurretik eginda eta ordainduta eduki beharko da.

2. Inskripzioa egiteko unean Masterraren Amaierako Lanaren bi ale erantsi beharko dira.

58. artikulua. Epaimahai kalifikatzailea.

1. Unibertsitateko Masterraren Irakaskuntza Batzordeak proposatuko du Masterraren Amaierako Lana epaitu behar duen epaimahaia, eta Ikastegiak izendatuko du.

2. Izendatzen den epaimahaia bakarra izango da Unibertsitateko Masterraren Titulu Ofizial bakoitzerako, eta Unibertsitateko Masterrean irakasten duten hiru doktorek osatuko dute. Hala ere, hiru epaimahaikideetako bat Unibertsitateko Masterraren kanpokoa izan ahal da, baita Nafarroako Unibertsitate Publikotik kanpokoa ere.

3. Unibertsitateen arteko masterrak direnean, epaimahaiaren osaeraren eta izendapenaren gaietarako, dagokion hitzarmenean xedatutakoari jarraituko zaio.

59. artikulua. Defentsa egitea.

1. Ikastegiek izena eman duten ikasle guztiei banaka deituko diete, nahikoa denborarekin aldez aurretik, eta bakoitzari adieraziko diote defentsara zein leku, egun eta ordutan egingo duen, baita egoki iruditzen zaizkien aurkezteko arau berariazkoak ere.

2. Lana jendaurrean defendatuko da, horretarako eraturiko epaimahaiaren aurrean. Izangaiak, gehienez ere, 30 minutu izango ditu aurkeztu duen lanaren laburpena azaltzeko.

3. Epaimahaiak ikasle bakoitzak proba gainditzearen edo ez gainditzearen akta egingo du eta eman dioten balioespena jasoko du, dagokion kalifikazioarekin, prozesua bukatu ondoren argitaratuko dena.

4. Ikasleak proba gainditzen ez badu, epaimahaiak horri buruzko txosten arrazoitua egingo du. Horretarako, Unibertsitateko Masterraren Irakaskuntza Batzordeak, epaimahaiak egindako txostena ikusirik, eta ikaslearen tutoreari entzun ondoren, egokiak iruditzen zaizkion neurri guztiak proposatu ahal izango dizkio ikasleari (lanen gehipenak, praktikak etab.) Masterraren Amaierako Lana gainditu ahal izateko beste deialdi batean.

HIRUGARREN TITULUA. NAFARROAKO UNIBERTSITATE PUBLIKOKO IKASKETA BEREKIAK

LEHENBIZIKO KAPITULUA

60. artikulua. Xedapen orokorrak.

1. Nafarroako Unibertsitate Publikoak ikasketa berekiak eman ahal izango ditu, Unibertsitateen Kontseiluak homologatutako ikasketa planetan ez badaude, eta ikasleen prestakuntza eta berezitasun akademikoa eta profesionala osatzeko badira. Horiek egin ondoren, lurralde nazional osoan baliodunak eta ofizialak diren tituluez bestelako titulu bereki, diplomak eta irakaskuntza ziurtagiriak emango ditu.

2. Nafarroako Unibertsitate Publikoak urtero ezarriko du berak ematen dituen ikasketa berekien eskaintza.

BIGARREN KAPITULUA. Ikasketa Berekien Egitura

61. artikulua. Ikasketa berekien tipologia.

1. Hauek izan daitezke Nafarroako Unibertsitate Publikoko ikasketa berekiak.

a) Titulu bereki hauek eskuratzeko bidea ematen dutenak: diplomadun titulu berekia, aditu titulu berekia, espezialista titulu berekia, master titulu berekia.

b) Etengabeko prestakuntzako edo berezitasuneko ikastaroak. Ikastaro horiek egiteak titulu berekia lortzeko modurik ez du emango. Bai, ordea, behar diren ziurtagirien jaulkipena lortzeko modua.

2. ECTS izenekoa ezarri da balioespen neurritzat, eta ikasketa hauei 5.1 eta 5.2 artikuluan ezarritakoa aplikatuko zaie.

3. Unibertsitateko master titulu ofizialetarako 7. artikuluan ezarritakoaren antzera, titulu berekiak lortzeko ikasketak modulu, gai eta irakasgaietan egituratuko dira.

4. Titulu berekiak eskuratzeko ikasketen moduluak bereizirik egin daitezke, proposamenak hala badio. Modulu bakoitzak berezitasun ikastaroen balioa izan dezake. Titulu bereki bat lortzeko ikasketa baten modulu osoen zatiren bat egiteak dagokion ziurtagiria lortzeko modua emango du, betiere proposamenean hori aipatzen bada.

5. Titulu berekitzat hartuko dira Unibertsitateko master titulu ofizial baten babesean diseinatzen diren eta titulu bereki moduan eskaintzen diren moduluak.

62. artikulua. Etengabeko prestakuntzako edo berezitasuneko ikastaroak.

1. Etengabeko prestakuntzako edo berezitasuneko ikastaroak egunean-eguneko prestakuntza berariazkoa emateko dira, zientziaren, teknikaren eta giza zientzien alorretan. Gehienez ere 15 ECTS kreditu izango dituzte.

2. Ikastaro horiek dagozkien ziurtagiriak eskuratzeko bidea emango dute, bertaratzeagatik edo etekina ateratzeagatik.

63. artikulua. Diplomadun titulu berekia.

Gutxienez ere 30 ECTS kredituko ikastaroak izango dira diplomadun titulu berekiak, sartzeko profilek ez dute nahitaez unibertsitatekoak izan behar, eta izaera ofizialeko ikasketek betetzen ez dituzten gizarte inguruaren beharrei erantzuten diete.

64. artikulua. Aditu eta espezialista titulu berekia.

1. Zientzia, teknika eta giza jakintzaren esparruetan espezializatzera bideratutako graduondoko ikasketek aditu titulu berekia lortzeko modua emango dute, baldin eta 30 eta 60 kreditu bitarteko irakastorduak baldin badituzte, eta gehienez ere kreditu horien % 10 eman ahalko dira proiektu edo lan bat egiteko.

2. Graduondoko ikasketa berek espezialista titulu berekia lortzeko modua emango dute, 15 eta 30 kreditu bitarteko irakastorduak baldin badituzte, eta burutu beharrekoen artean ez da eskatuko proiektu edo lan bat egitea.

65. artikulua. Master titulu berekia.

1. Master titulu berekiek graduondoko ikasketak edukiko dituzte, maila handiko prestakuntza berezitua edo diziplina anitzekoa emateko, ezagupen horiek irakaskuntzan edo lanbidean aplikatzeari begira.

2. Gutxienez ere, ikasturte batekoak izango dira, eta ikasleek titulua eskuratzeko egin beharko duten kreditu-kopurua 60 eta 120 ECTS kreditu bitartekoa izango da, eta horietatik % 10 proiektu edo lan bat egiteagatik eman ahal izango dira.

3. Ikastaro horiek gainditzeak eskubidea emango du master titulu berekia eskuratzeko.

4. Master titulu berekia eskuratzeko ikasketak emango dira, betiere, titulurako finantzabidea emango duten beste erakunde publiko edo pribatuekin sinatutako hitzarmenen arabera, eta titulua Unibertsitateko master titulu ofizialen arautegi honetan ezarritakoaren arabera antolatu eta irakatsi nahi ez bada.

66. artikulua. Ikasketa partekatuak.

Nafarroako Unibertsitate Publikoko ikasketa berekiak antolatu ahalko dira nazioko edo atzerriko beste entitate edo unibertsitate batzuekin. Ikasketa bakoitza bere hitzarmenak arautuko du eta Gobernu Kontseiluak onetsi behar ditu, Graduondoko Ikasketen Batzordeak proposatuta.

67. artikulua. Ikasketa berekietako irakasleak.

1. Ikasketa berekietako irakasleak Nafarroako Unibertsitate Publikoko eta beste unibertsitate batzuetako irakasleak izango dira, lehentasunez doktoreak. Nolanahi ere, eta ikasketa berekiaren ezaugarrien arabera, beste kategoria batzuetakoak diren unibertsitatetik kanpoko profesional adituek, irakasleek edo ikertzaileek ere eman ahalko dituzte eskolak.

2. Unibertsitateekin loturarik ez duten ikertzaile eta profesionalek "venia docendi" izenekoa eskuratu behar dute, irakaskuntza zuzendariak edo ikasketen arduradunak eskatuta, eta programaren irakasle batek/batzuek gainbegiratuko du/dute haien lana.

3. Ikasketa berekietarako baimena emateko kontuan hartu beharreko irizpidea izango da Nafarroako Unibertsitate Publikoko irakasleek horiekin lotura izatea edo parte hartzea maila jakin batean.

68. artikulua. Finantzabidea.

1. Ikasketa berekiak autofinantzatuak izan beharko dira. Hauek izan daitezke diru-sarrerak.

a) Prezio publikoak.

b) Erakunde publiko nahiz pribatuen dirulaguntzak edo ekarpenak.

Finantzabide osoak kontuan hartuko du % 10eko kanon baten ezarpena Unibertsitatearen gastu orokorretarako. Kanona ezartzeko, titulu berekiaren diru-sarrera gordinetatik kenduko dira idazkaritza-gastuak, espedienteak irekitzeko gastuak eta tituluak edo diplomak emateko gastuak. Aurreko diru-kopuruak kenduta, diru-sarrera garbia lortuko da, eta haren arabera ordainduko zaio Nafarroako Unibertsitate Publikoari aipatu kanona. Ikasketak Unibertsitate-Gizarte Fundazioak kudeatzen baldin baditu, kanon hau Fundazioari itzuliko zaio.

61.5 artikuluko titulu berekiek, aurrekontuei begira, titulua emateko eskubideak sortuko dituzte bakarrik. Tituluak eskaini dituen unibertsitateko master titulu ofizialean ezarritako irakaskuntza-arauketa aplikatuko zaie (matrikula-tasak, irakaskuntza-mandatua Unibertsitateko irakasleei, irakasle gonbidatuak, etab.). Kasu honetan, ez da bidezkoa aplikatzea aipatu kanona.

2. Salbuespen gisa, ikasketen garrantzia edo interes estrategikoa dela eta, Unibertsitateak finantzabidearen zati bat hartu ahal izango du bere gain, Unibertsitatearen dirusarreren aurrekontuaren kargura.

3. Aurrekontua betetzeari begira, onesten den titulu eta ikasketa bereki bakoitza Gastu Unitate Funtzional bat izango da. Horren arduraduna beti izango da Nafarroako Unibertsitate Publikoarekin lotura iraunkorra duen irakasle doktore bat, eta, kasuaren arabera, Unibertsitateko zerbitzuen edo Unibertsitate-Gizarte Fundazioaren administrazio laguntza izango du.

HIRUGARREN KAPITULUA. Titulu Berriak eta Ikasketa Berekiak onetsi eta ezartzea

69. artikulua. Titulu berekiei buruzko proposamenen edukia.

1. Titulu berekiak eskuratzeko graduondoko irakaskuntzen proposamenak Graduondoko Ikasketen Batzordeari zuzenduko zaizkio, eta III. eranskinean aipatzen diren edukiak jaso behar dituzte gutxienez ere.

2. Batzordeak proposamen bakoitza ebaluatu eta haren gaineko txostena egingo du; txosten hori Unibertsitateko Gobernu Kontseiluari bidaliko dio. Halaber, Unibertsitateko Gobernu Kontseiluari proposatuko dio aldeko txostena jaso duten titulu berekien proposamenak ezartzea onets dezala.

3. Graduondoko Ikasketen Batzordeak, kontrako txostena ematen badu, edo aldeko txostena emanda ere halako baldintza batzuk betetzera behartzen badu, erabaki hori arrazoitu beharko du eta horren berri eman Titulua proposatu duen irakasleari.

3. Gobernu Kontseiluak ezezkoa ematen ahalko dio ikasketa berekien programa bat ezartzeari, betiere, programa horien helburuak eta edukiak funtsean elkarren antzekoak badira edo lurralde nazional osoan ofizialak eta baliodunak diren tituluak eskuratzeko beste edozein ikasketaren helburu eta edukien antzekoak badira.

70. artikulua. Titulu berekiak eskuratzeko ikasketak berritu eta kentzea.

1. Unibertsitateak urtero onetsiko du titulu berekien eskaintza. Eskaintzan sartuko dira azken ikasturtean emandako titulu berekiak. Haien eskaintza berritu egingo da, proposamen-egileek horretarako ezarritako epean hala eskatzen badute; nolanahi ere, prezio publikoak Gizarte Kontseiluak onetsi beharko ditu urtero. Titulu berekiaren azken edizioaren txosten ekonomikoarekin batera aurkeztuko da eskaintza berritzeko eskaera.

2. Aurreko idatz-zatian ezarritakoa galarazi gabe, Unibertsitateko Gobernu Kontseiluak, Graduondoko Ikasketen Batzordeak proposatuta, ikasketa horien eskaintza ez berritzea erabaki dezake, justifikaturiko arrazoiak baldin badaude. Erabakiak ezarri beharko du matrikulatutako ikasleek nola egin behar dituzten titulu berekia bukatzeko geratzen zaizkien kredituak.

3. Titulu berekiak eskuratzeko ikasketak berritu, eta horrek programaren, finantzaketaren edo beste alderdiren baten aldaketa ekartzen badu, Graduondoko Ikasketen Batzordeari jakinarazi behar zaio aldez aurretik, ikasketa proposamen berri baten bidez. Proposamen horretan beharrezkoak diren aldaketak soilik jasoko dira, eskumena duten organoek balioesteko eta onesteko.

71. artikulua. Etengabeko prestakuntzako edo berezitasuneko ikastaroak proposatu eta onestea.

1. Interesa duten irakasleek egingo dituzte etengabeko prestakuntzako edo espezializazioko ikastaroak ezarri, berritu eta kentzeko proposamenak, eta horrelakoetan dagokien saileko txostena eskatuko da halabeharrez.

2. Etengabeko prestakuntzako edo berezitasuneko ikastaroak ezartzeko, berritzeko eta kentzeko proposamenak gai horietan eskumena duen errektoreordeak aztertu eta onetsiko ditu, eta jasotako eskaera guztien berri emango dio aldizka Graduondoko Ikasketen Batzordeari.

LAUGARREN KAPITULUA. Irakaskuntza Berekien antolaketa eta irakaskuntza

Lehen atala. Sarbidea, onarpena eta matrikula

72. artikulua. Ikasketa berekietarako sarbidea.

1. Ikasketa berekietan sartzeko, Unibertsitatean sartzeko behar diren legezko eskakizunak bete behar dira.

2. Graduondoko ikasketa berekietan sartzeko, Graduko titulu ofizial bat edo haren baliokidea eduki behar da.

3. Hala ere, Graduondoko Ikasketen Batzordeak, Ikasketa Berekien Irakaskuntza Zuzendaritzak proposatuta, ikasketetako espezialitatearekin lotura zuzena duten eta Unibertsitatean sartzeko titulaziorik edo Gradu titulaziorik edo baliokiderik ez duten profesionalak onetsi ahalko ditu, betiere, agirien bidez egiaztatzen badute profesionaltasun hori eta egin nahi dituzten ikasketa berekietan eskatutako gainerako eskakizun berariazkoak betetzen badituzte.

Baimen honen arabera titulu bereki bat egiten duten ikasleek ezin izango dute Master, aditu edo espezialista titulu berekia jaulkitzea eskatu, Graduko titulu ofizialik edo baliokiderik lortzen ez badute. Nolanahi ere, egindako ikasketen ziurtagiria lortzeko eskubidea izango dute.

73. artikulua. Titulu berekiak eskuratzeko ikasketetan onartzeko eta matrikula egiteko prozedura.

1. Nafarroako Unibertsitate Publikoan titulu berekiak egin nahi dituztenek dagokien administrazio unitatean aurkeztuko dute onartuak izateko eskaera, aurretik horretarako ezarritako epean.

2. Onartzeko epea amaitu eta hurrengo hamabost eguneko epean jarriko da jendaurrean onartuen eta ez onartuen zerrenda, ikasketa berekiaren proposamenean onartuak izateko ezarritako irizpideen arabera.

3. Onartutako ikasleek dagokien epean egingo dute matrikula, eta eskatutako dokumentazioa aurkeztuko dute.

4. Ezarritako prezioa ordaindutakoan gauzatuko da matrikula, ikasketa berekiaren deialdiak zehazten duen moduan.

Bigarren atala. Ikasketa berekien zuzendaritza eta kudeaketa

74. artikulua. Irakaskuntza zuzendaritza.

Nafarroako Unibertsitate Publikoarekin lotura iraunkorra duen irakasle doktore baten esku egongo da ikasketa berekien irakaskuntza-zuzendaritza.

75. artikulua. Ikasketa berekien kalitatearen jarraipena eta ebaluazioa.

1. Nafarroako Unibertsitate Publikoak, berak ematen dituen ikasketen babes akademikoa, kontrola eta jarraipena egiteko lana izango du, eta hori Graduondoko Ikasketen Batzordearen bidez egingo du, nahiz zuzenean, nahiz beste hainbat erakunderekin elkarlanean.

2. Graduondoko Ikasketen Batzordeak mekanismoak eta prozedurak ezarriko ditu ikasketa berekien irakaskuntzaren kalitatearen jarraipena eta ebaluazioa egiteko, eta Gobernu Kontseiluari emango dio horien berri.

3. Ebaluazio hori irakaskuntza helburuak nola bete diren aztertzen duten prozesuen bidez egingo da urtero. Horretarako, gutxienez balioetsiko dira ikasleek jasotako prestakuntzarekin izan duten satisfazioa, parte hartzen duten irakasleen eta ikasketa berekien Irakaskuntza Zuzendaritzaren iritzia.

4. Ebaluazio negatiboa izanez gero, proposamenak aurkeztea eskatuko da, hurrengo ikasturtean horri berehala konponbidea emateko. Konponbidea emateko proposamenik ez bada, edo horiek eskasak direla uste bada, Graduondoko Ikasketen Batzordeak Gobernu Kontseiluari emango dio horren berri, hala behar izanez gero, ikasketa horiekin jarraitzeko baimena ez ematea erabaki dezan.

76. artikulua. Irakaskuntza eta administrazio kudeaketa.

1. Ikasketa berekien Irakaskuntza Zuzendaritzak hartuko du bere gain irakaskuntza kudeaketaren ardura.

2. Ikasketa berekien gaiei buruzko ebazpen guztien aurka, gorako errekurtsoa jar daiteke errektorearen aurrean.

3. Onartzeko eta matrikula egiteko prozedurak, bai eta administrazio tramite eta kudeaketako beste edozein gai ere, kasu bakoitzaren arabera, Nafarroako Unibertsitate Publikoko edo Unibertsitate-Gizarte Fundazioko administrazio zerbitzuek kudeatuko dituzte.

77. artikulua. Tituluak eta ziurtagiriak.

1. Interesatuek eskaturik eta dagozkien prezioak aldez aurretik ordainduta, Unibertsitateak bere administrazio unitatearen bidez jaulkiko du harako Titulu edo Ziurtagiria. Tituluak edo ziurtagiriak ikasketa berekietarako Unibertsitateak duen erregistroan jasota egongo dira.

2. Unibertsitateak izendatuko duen administrazio unitatean gordeko dira ikasketa bereki bakoitzaren datuak, behin betiko matrikulaturiko ikasleen zerrenda, asistentziaren azken akta eta, halakorik denean, ebaluazio akta, administrazio kudeaketaz arduratzen den unitateak emango dituen ereduen arabera.

Lehen Xedapen Gehigarria

Arautegi honetan jaso ez diren egoerak errektoreak edo eskumena duen errektoreordeak ebatziko ditu.

Bigarren Xedapen Gehigarria

Espainian araututako lanbide-jardueretarako gaitzen duten tituluak direnean, arautegi hau aplikatuko da, baldin eta bateragarria bada Gobernuak ezarritako baldintzekin 1393/2007 Errege Dekretuaren 15. artikuluko 4. idatz-zatian ezarritako moduan.

Xedapen Indargabetzaile Bakarra

1. Arautegi hauek indarrik gabe geratu dira.

a) Nafarroako Unibertsitate Publikoaren Graduondoko Ikasketa Ofizialei buruzko Esparru Arautegia, Unibertsitateko Gobernu Kontseiluak 2005eko azaroaren 28an hartutako erabakiaren bidez onetsitakoa.

b) Nafarroako Unibertsitate Publikoaren Ikasketa Berekiei buruzko Esparru Arautegia, Unibertsitateko Gobernu Kontseiluak 2006ko azaroaren 28an hartutako erabakiaren bidez onetsitakoa, eta Unibertsitateko Gobernu Kontseiluak 2009ko apirilaren 1ean onetsitako erabakiaren bidez aldatutakoa.

c) Master ikasketa berriei buruzko txostenak onesteko jarraibideak, Unibertsitateen Kontseiluari bidali beharrekoak kontseilu horrek egiaztatzeko, Unibertsitateko Gobernu Kontseiluak 2008ko azaroaren 28an hartutako erabakiaren bidez onetsitakoak.

d) Master ikasketa ofizialak diseinatu, prestatu eta ezartzeko jarraibide orokorrak, Unibertsitateko Gobernu Kontseiluak 2008ko azaroaren 28an hartutako erabakiaren bidez onetsitakoak.

2. Indarrik gabe geldituko dira arau hauetan xedatutakoaren kontraesanekoak edo kontrakoak diren lerrun bereko edo txikiagoko arau guztiak.

Azken Xedapen Bakarra. Indarra hartzeko eguna.

Arautegi honek Nafarroako Aldizkari Ofizialean argitaratu eta biharamunean hartuko du indarra.

I. ERANSKINA. Txosten proiektua, Nafarroako Unibertsitate Publikoan Unibertsitateko Master titulu ofizial berri bat ezar dadila eskatzeari buruzkoa

1.-Unibertsitateko Master Titulu Ofiziala deskribatu eta identifikatzea.

2.-Ikasketa horiek ezartzearen egokitasuna eta egokiera justifikatzea.

3.-Ikasleek, prestakuntzari eta gaitasunei dagokienez, bete beharreko helburuen laburpena.

4.-Masterraren xedea den ikaslearen profila identifikatzea.

5.-Proposamenaren irakaskuntza eta ekonomia bideragarritasunari buruzko azterketa.

1.-Proposatutako tituluaren deskribatu eta identifikatzea.

Unibertsitateko master titulu ofizialaren izena:
Unibertsitateko zein ikastegiri atxikitzen zaion:
Proposatutako irakaskuntza-zuzendaria:
Irakaskuntza-mota: presentziala, erdipresentziala, urrutikoa
Masterraren orientazioa: lanbide, irakaskuntza eta ikerketa arlokoa
Unibertsitatearteko masterren kasuan
Unibertsitate parte-hartzaileak	Koordinazioaz arduratuko litzatekeen unibertsitatea

2.-Proposatutako Unibertsitateko master titulu ofizialaren justifikazioa.

-Ikasketa hauek ezartzearen egokitasuna eta egokiera justifikatu behar da, aurreko esperientzietako datuetan (tituluetan), egungo aukeretan eta abarretan oinarrituz.

-Berariaz adierazi proposamena kalitate doktoretza bat edo beste titulu bat eraldatzetik heldu den. Proposamena harremanetan jarri ahalko da izaera profesionaleko edo ikerketako Masterretarako arlo zientifiko-profesionaleko I+G+b-ren esparruan dagoen egoerarekin. Proposamena nazioko eta nazioarteko irizpideetara egokitzen dela bermatuko duten unibertsitatetik kanpoko erreferenteak erabiltzea titulua ezarri ahal izateko.

-Masterraren orientazioa justifikatzea (profesionala, irakaskuntzakoa edo ikerketakoa) eta, doktore titulua onartzen bada, gutxienez ere doktoreek emandako 60 kreditu izango direla bermatzea.

(750 hitz gehienez ere).

3.-Ikasleek, prestakuntzari eta gaitasunei dagokienez, bete beharreko helburuen laburpena.

-Tituluaren xedeak izan behar du ikasleei prestakuntza aurreratua ematea, berezitua eta diziplina anitzekoa. 1393/2007 Errege Dekretuaren I. Eranskineko deskribatzaileetan oinarritzea.

(350 hitz gehienez ere).

4.-Masterraren xedea den ikaslearen profila identifikatzea.

-Ikasketa horietan sartzeko modua eman dezaketen egungo unibertsitateko titulu ofizialak adieraztea, bai eta etorkizuneko gradu tituluak ere, ahal bada.

-Adierazi aurretiazko prestakuntza edukiak aurreikusi diren sarbide titulazio ezberdinetarako eta, horrela bada, deskribatu era modu laburrean.

(350 hitz gehienez ere).

5.-Irakaskuntza eta ekonomia bideragarritasunaren azterketa.

-Balioestea erabilgarri dauden giza baliabideak eta baliabide materialak. NUPeko irakasleei aipamena egiten zaienean, idatziz jaso beharko da irakasle horiek egun duten karga/gaitasuna harremana.

-Matrikulaz gain egon daitezkeen diru-sarrera gehigarriak eta haien bideragarritasuna identifikatzea.

-Espero diren gastuen zerrenda laburra egitea.

(500 hitz gehienez ere).

(Dokumentuaren luzera gehienez ere: 6 orrialde).

II. ERANSKINA. Unibertsitateko Master titulu ofizialak ezartzeko txosten proiektuei buruzko balioespen irizpideak

Graduondoko Ikasketen Batzordeak balioetsiko ditu Unibertsitateko master titulu ofizialak ezartzeko "txosten proiektuan" jaso behar diren bost atalak.

Erabilitako balioespen irizpideak jarraian deskribatzen dira. Proposamen batek aurrera egin ahal izateko, nahitaezkoa izango da irizpide horietan guztietan aldeko balioespena lortzea.

1.-Masterraren izenburua eta ezaugarri orokorrak (proiektuaren 1. puntua) egokitzea ikasleek, prestakuntzari eta gaitasunei dagokienez, bete beharreko helburuetara (proiektuaren 3. puntua).

Proposatutako izenburua ikasleek bete beharreko prestakuntza eta gaitasun helburuekin koherentea den balioetsiko da, eta, halaber, proposamenak irakaskuntza maila edo ondorioetarako egokia edo koherentea den deskribapena jasotzen duen, halako moldez non ez baitu nahasmenik sortuko bere edukiari buruz, edo, baldin badaude, ondorio profesionalei buruz. Prestakuntza helburuek ikasketen izaera aurreratua argi eta garbi identifikatzea balioetsiko da, halako moldez non egungo ikasketetako lehen eta bigarren zikloetan lortuetakoetatik ezberdinduko baitira.

2.-Proposatutako ikasketak ezartzearen egokitasuna justifikatzea (proiektuaren 2. puntua).

Aurreko doktoretza programak aldatu, edo aurretiaz NUPen ezarritako graduondoko programak egokitzen badira, kontuan hartuko dira izenburu horien arrakasta parametroak: kalitateko doktoretzak, urteko matrikula kopurua, defendatutako tesi kopurua .. baldin badaude.

Honako hauek balioetsiko dira: proposamena prestatzeko erabilitako barne zein kanpo aholkularitza prozedurak egokiak izatea, ematen diren frogek erakustea proposatutako tituluak irakaskuntzaren, zientziaren edo lanbidearen aldetik duen orientazioaren interesa, kanpoko erreferentziak egotea, proposamenaren egokitasuna bermatzen dutenak, antzeko ezaugarri akademikoak dituzten tituluetarako nazio edo nazioarteko irizpideei begira eta lanbidera edo ikerketara bideratutako Masterren kasuan, proposamena lotu ote den lanbide sektoreko I+G+b-ren egoerarekin.

3.-Bilatzen diren titulazio profilen bideragarritasuna (proiektuaren 4. puntua).

Balioetsiko da nola egokitzen diren profil horiek NUPetik eta unibertsitate mugakideetatik ateratzeko profilen errealitatera. Aurretiazko prestakuntza edukiak proposatzen badira sarbide titulazio ezberdinetarako, horien proposamenaren argitasuna, koherentzia eta egokitasuna balioetsiko da.

4.-Eskura dauden giza baliabideak eta materialak (proiektuaren 5. puntua).

NUPeko irakasle iraunkorrak egotea balioetsiko da, bai eta irakasle horien prestasuna ere (irakasle horiek egun duten karga/gaitasuna harremanetik abiatuta).

5.-Aurrekontuaren bideragarritasuna eta kanpoko finantzabidea (proiektuaren 5. puntua).

Ikasketak garatzeko zenbatesten diren gastuak eta kanpoko finantzaketa edukitzeko egiazko aukerak balioetsiko dira.

III. ERANSKINA. Titulu Bereki Berriak ezartzeko proposamenek nahitaez izan behar dituzten edukiak

a) Proposatzen duena.

b) Ikasketekin eskuratzen den titulu berekiaren izena, sailkapena "Ikasketa berekien tipologiak" artikuluan eta hurrengoetan ezarritakoaren arabera, eta, halakorik bada, baita titulu bereki baten modulu oso bat edo batzuk egiteko bidea ematen duten ziurtagiriena ere.

c) Titulu berekiaren justifikazio arrazoitua, tituluak ekonomian eta gizartean duen beharrari, egokitasunari eta bideragarritasunari buruz.

d) Tituludunen prestakuntza profila, gaitasunak eta programak ikasleari eman dakiokeen irakaskuntzarako eta lanbiderako gaitasunak.

e) Irakaskuntzen hedapena ECTS kredituetan.

f) Programa, zeinetan ECTS kredituen kopuru osoa eta ikasketa programari aurreikusten zaion iraupena adieraziko baitira. Behar denean, titulu berekia eskuratzeko ikasketaren moduluak modu berezian egin daitezkeenean, horiek beren artean duten harremana. Halaber, modulu, gai eta irakasgai zerrenda bat edukiko du, eta horretan iraupena, gaitasunen azalpena, edukia eta kredituen araberako iraupena, izaera teorikoa edo praktikoa.

g) Ikasketa ebaluatzeko irizpideak.

h) Irakaskuntza zuzendaria eta, beharrezkoa bada, Gastu Unitate Funtzionalaren arduraduna den eta unibertsitatearekin lotura iraunkorra duen irakaslea.

i) Parte hartzen duten irakasleen izen-zerrenda, haien titulazioa, irakaskuntza edo lanbide egoera eta ikastaroan emango duten ordu kopurua zehaztuz. Unibertsitateko irakaslea ez bada justifikatu egingo da haren curriculum vitaea aurkeztuz.

j) Ikasleen gutxieneko eta gehieneko kopuruak ikasketak ezartzeko, irakasteko baliabideen eta baliabide materialen arabera, Unibertsitateak, hala dagokionean, ezarriko dituen irizpideen arabera. Irakaskuntzarako eskakizunak, bai eta salbuespenak, matrikula-epea eta aurreinskripzioa ere, behar balitz. Eskaera kopurua ikaspostu kopurua baino handiagoa bada, ikasleak hautatzeko prozedura atal honetan adieraziko da. Era berean, bekak edo ikasteko laguntzak emateko aukerarik dagoen adieraziko da.

k) Zein egunetan eta non garatuko den.

l) Titulua irakasteko behar diren azpiegiturak, bai eta giza baliabideak eta baliabide materialak ere.

m) Bideragarritasun ekonomikoaren txostena, ikasleek matrikula eta beste zerbitzuen kontzeptupean ordaindu behar dituzten prezio publikoak eta beste edozein finantzabide barne. Atal honetan, aurreikusitako diru-sarrerak eta gastuak zehaztuko dira. Irakasleen ordainsaria orduko 60 eta 150 euro artean ibiliko da, eta zenbateko horrek tituluaren bideragarritasun ekonomikoa bermatu beharko du edozein kasutan.

n) Izaera: sailen artekoa, fakultateen artekoa, unibertsitateen artekoa -Estatuko edo nazioarteko unibertsitateak-. Halakorik bada, titulu edo ikasketa berekia egiteko beste erakunde publiko zein pribatuekin egindako hitzarmena erantsi, arautegi honetako 20.2 artikuluan ezarritakoarekin bat etorriz.

o) Proposatutako programaren kalitatea ziurtatzeko egokitzat ematen diren iritzi guztiak, eta horien artean, nahi bada, autoebaluazioa egiteko proposamen bat.

Jar zaitez gurekin harremanetan | Erabilerraztasuna | Lege abisua | Webaren mapa