navarra.es
Castellano | Euskara | Français | English
Ezagutzera eman
1741/2011 Ebazpena, azaroaren 16an, Nafarroako Unibertsitate Publikoko errektoreak emana, Nafarroako Unibertsitate Publikoaren Hauteskunde Arautegia, Gobernu Kontseiluak 2011ko azaroaren 16an hartutako erabakiaren bidez onetsia, argitaratzeko agindua
1741/2011 EBAZPENA, azaroaren 16an, Nafarroako Unibertsitate Publikoko errektoreak emana, Nafarroako Unibertsitate Publikoaren Hauteskunde Arautegia, Gobernu Kontseiluak 2011ko azaroaren 16an hartutako erabakiaren bidez onetsia, argitaratzeko agindua ematen duena
(2011ko 230. NAOn argitaratutako testua, azaroaren 21ean)
Atarikoa
Maiatzaren 12ko 110/2003 Foru Dekretuak onetsitako Unibertsitateko Estatutuen 40. artikuluak ematen dizkidan eskumenak erabiliz, 2011ko azaroaren 16an Gobernu Kontseiluak hartu zuen erabakia argitaratzeko agintzen dut. Erabaki horren bidez Nafarroako Unibertsitate Publikoaren Hauteskunde Arautegia onetsi zen, eta hona hemen hitzez hitz:
NAFARROAKO UNIBERTSITATE PUBLIKOAREN HAUTESKUNDE ARAUTEGIA
Nafarroako Unibertsitate Publikoaren Hauteskunde Arautegi hau Gobernu Kontseiluak onetsi du, Nafarroako Unibertsitate Publikoaren Estatutuen 49.4 artikuluan xedatutakoari jarraituz, hauteskunde prozesuak egokitzeko Nafarroako Gobernuak, 2011ko martxoaren 21eko erabakiaren bidez, onetsi zuen Estatutuen aldaketara (70 zenbakidun NAOn argitaratu zen, 2011ko apirilaren 11n).
ATARIKO TITULUA
1. artikulua
Arautegi honen xedea unibertsitate komunitateko arlo guztien ordezkariak hautatzeko prozesuak arautzea da, ordezkariak hauetako edozein organotakoak direlarik: Klaustroa, Gobernu Kontseilua, Ikastegiko Batzordeak, Saileko Kontseiluak, Ikerketarako Unibertsitate Institutuak, pertsona bakarreko gobernu organoak, baita beren osaerarako hauteskundeak beharrezkoak diren eta Hauteskunde Batzorde Nagusiaren eta Tokiko Batzordeen eskumena diren gainerako organo kolegiatuak ere.
Arautegi honetatik salbuetsita daude Nafarroako Unibertsitate Publikoaren gobernu eta ordezkaritza organoetako ikasleen ordezkariak hautatzeko prozesuak, Ikasleen Kontseiluaren eskumenekoak badira.
2. artikulua
Aurreko artikuluak aipatzen dituen hauteskundeak arautegi honen Lehen Tituluan arautzen den hauteskunde prozedura orokorraren arabera egingo dira.
Arautegi honen Lehen, Bigarren, Hirugarren eta Laugarren tituluetan gobernu organo batzuen arau espezifikoak daude. Horien xedapenak nagusi izango dira lehen tituluan araututako hauteskunde prozedura orokorraren gainean.
Aurreko ataletan ezarritakoa gorabehera, Hauteskunde Batzorde Nagusiak zilegi izango du, halako kasu berezi batzuetan, hauteskunde prozedura laburtu bat onestea, dagokion hauteskunde kidegoaren berezitasunak kontuan hartuz.
LEHEN TITULUA. XEDPEN OROKORRAK
I. KAPITULUA. Botoa emateko eskubidea
3. artikulua
1. Unibertsitate komunitateko kide guztiek botoa emateko eskubidea eta hautagai izateko eskubidea dute, arautegi honetan ezartzen den moduan, eta eskubidea erabili ahalko dute, nork bere alorrean, salbu eta auzitegiko epai irmo batek eskubide horietaz gabetzen dituenak edo beren hautagarritasuna edo bateragarritasuna zalantzan jartzen dituzten auzietan sartuta daudenak.
2. Ikasleen alorrean, honako hauek dute botoa emateko eta hautagai izateko eskubidea: nazioko lurralde osoan baliagarriak diren titulu ofizialak lortzeko ikasketetan matrikulatuta daudenak, hauteskundeen deialdia egiten den egunean.
Diplomadun, Aditu, Espezialista eta Masterraren Titulu berekiak lortzeko ikasketetan matrikulatuta dauden ikasleek botoa emateko eskubidea dute errektorea hautatzeko hauteskundeetan, eta botoa emateko eta hautagai izateko eskubidea klaustrorako hauteskundeetan, ondotik datozen xedapenetan ezarritakoaren arabera.
3. Beste Administrazio batean zerbitzu berezietan edo zerbitzu emankizunean dauden Nafarroako Unibertsitate Publikoko funtzionarioek ez dute botoa emateko eta hautagai izateko eskubiderik Unibertsitateko hauteskunde prozesuetan, egoera horietan dauden denbora guztian.
4. Beste Administrazio bateko funtzionarioak direnek, baina Nafarroako Unibertsitate Publikoan zerbitzu emankizunean euren zerbitzuak ematen dituztenek botoa emateko eta hautagai izateko eskubidea edukiko dute, aipatu hauteskunde prozesuetan.
5. Botoa emateko edo hautagai izateko eskubidea edukitzeko hauteskundeen deialdia egiten den egunean bete behar dira eskakizunak.
II. KAPITULUA. Hauteskunde administrazioa
4. artikulua
1. Hauteskunde Batzorde Nagusiaren eskumena da Klaustroa, Gobernu Kontseilua eta errektorea hautatzeko prozesuak antolatzea, kontrolatzea, emaitzak aldarrikatzea eta erreklamazioak ebaztea. Halaber, Hauteskunde Batzorde nagusiaren eskumena da Tokiko Hauteskunde Batzordeen erabakien aurkako errekurtsoak ebaztea.
2. Hauek dira Hauteskunde Batzorde Nagusiko partaideak:
a) Unibertsitateko idazkari nagusia, batzordeburu izango dena.
b) Unibertsitatearekin lotura iraunkorra duten irakasle doktoreen bi ordezkari; zozketaz izendatuak.
c) Aurreko kategorian sartzen ez diren irakasle eta ikertzaileen ordezkari bat, zozketaz izendatua.
d) Ikasleen ordezkari bat, klaustrokideen artetik zozketaz izendatua.
e) Administrazio eta zerbitzuetako langileen ordezkari bat, zozketaz izendatua, Unibertsitatean zerbitzuan sei hilabetetan etengabe aritu direnen artetik.
f) Unibertsitateko zerbitzu juridikoetako administrazio arduraduna, Batzordeko idazkari lanetan arituko dena.
3. Tuterako campuseko hauteskunde prozesuak errazteko asmoz, Hauteskunde Batzorde Nagusiak delegatu bat izendatuko du; ordezkari hori ez da Batzordeko kidea izango, eta Unibertsitatearekin lotura iraunkorra izan eta Tuteran irakaskuntza lanaldi osoan ematen duten irakasle doktoreen artetik hautatuko dute.
4. Hauteskunde Batzorde Nagusiko buruak egingo du 2. b), c), d) eta e) atalak aipatzen dituen Hauteskunde Batzordeko kideak, eta hirugarren atalak aipatzen duen delegatua izendatzeko zozketa publikoa. Hauteskunde Batzorde Nagusian ordezkaritza izateko eskubidea duen talde bakoitzeko kide titular bat eta ordezko bat izendatuko dira, gutxienez ere.
5. Hauteskunde Batzorde Nagusiaren agintaldia lau urtekoa izango da, ikasleen ordezkariaren kasuan izan ezik, horrena bi urtekoa izango baita. Postu hutsak betetzeko, batzordekideak hautatzeko ezarritako prozedura erabiliko da.
6. Hauteskunde Batzorde Nagusiko kide izatea ez da bateragarria pertsona bakarreko gobernu-organo izaerarekin, artikulu honetako 3. ataleko a) letrak Idazkari Nagusiari buruz ezartzen duenaren salbuespenarekin.
7. Hauteskunde Batzorde Nagusiko kide bat Batzordearen menpe dagoen hauteskunde prozesu batean hautagai aurkezten bada, prozesuak dirauen bitartean ez da aipatu Batzordean arituko, eta bere ordez inolako bateraezintasun edo abstentzio auzirik ez duen ordezko bat arituko da.
8. Baldin eta Unibertsitateko idazkari nagusia hautagai aurkezten bada, edo jardun ezinean bada, Idazkariorde Nagusiak ordezkatuko du, eta halakorik ez badago, edo hau ere hautagaia bada, edo honek ere ezin badu jardun, b), c) eta e) atalek aipatzen duten Hauteskunde Batzordeko kide batek ordezkatuko du, baldintza hauek betetzen baditu: funtzionario publikoa izatea edo Unibertsitatean zerbitzua ematea lotura iraunkorrarekin, eta bertan sartzeko baldintza eduki izana doktore, lizentziadun, ingeniari, arkitekto edo baliokidea den tituluaren jabe izatea.
Ordezkoa Hauteskunde Batzorde Nagusiak izendatuko du, zozketaz. Hola aukeratutakoaren ordez aritzeko, dagokion alorreko ordezkoa arituko da.
9. Zerbitzu juridikoetako administrazio arduraduna hautagai aurkezten bada, edo ezin badu jardun, zerbitzu juridikoetako kide bat arituko da bere ordez, Unibertsitatean duten antzinatasun hurrenkeraren arabera.
10. Hauteskunde Batzorde Nagusiko eta Hauteskunde Toki Batzordeetako kide izatea derrigorrezkoa da, eta ezin zaio uko egin, ez bada nahiko arrazoia dagoela, behar bezala demostratu beharko dena eta dagokion buruak ontzat eman beharko duena.
11. Unibertsitateko Hauteskunde Batzorde Nagusiak gehiengo soilez hartuko ditu erabakiak. Berdinketa gertatuz gero, batzordeburuak izango du boto erabakitzailea.
5. artikulua
4.1 artikuluan aipatzen direnez gain, ondoko hauek dagozkio Hauteskunde Batzorde Nagusiari:
a) Xedapenak ematea Unibertsitateko gobernu organo guztien hauteskunde prozesuak denboran koordinatzeko.
b) Hauteskunde arauak interpretatzeko irizpideak bateratzea, eta Tokiko hauteskunde Batzordeei betebeharreko jarraibideak ematea.
c) Ondoko hauen ereduak finkatzea: hauteskunde mahaiak eratzeko aktena, boto zenbaketaren aktena, hautagaiak aldarrikatzearena, baita hauteskunde prozesuan zehar erabiltzen den beste edozein agirirena ere, eta Tokiko Hauteskunde Batzordeei ematea.
d) Tokiko Hauteskunde Batzordeei behar duten aholkularitza ematea, dagozkien prozesuak era egokian garatzeko.
e) Tokiko Hauteskunde Batzordeek aurkezten dizkieten kontsultak ebaztea.
f) Tokiko Hauteskunde Batzordeen erabakien aurkako errekurtsoak ebaztea, arautegi honetan ezarritakoaren arabera.
g) Klaustrorako, Gobernu Kontseilurako eta errektorerako hauteskunde-prozesua behar bezala gara dadin zaintzea.
h) Klaustrorako, Gobernu Kontseilurako eta errektorerako hauteskunde-prozesuetan aurkezten diren erreklamazioak ebaztea, arautegi honetan ezarritakoaren arabera.
i) Dagozkion gainerako eginkizunak, Nafarroako Unibertsitate Publikoaren Estatutuetan eta haiekin lotutako xedapenetan ezarritakoari jarraituz.
6. artikulua
1. Tokiko Hauteskunde Batzordeen eskumena da Nafarroako Unibertsitate Publikoko fakultate, ikastegi, sail, unibertsitate-institutu eta batzordeetako pertsona bakarreko organoak eta organo kolegiatuak hautatzeko prozesuak antolatzea, kontrolatzea, emaitzak aldarrikatzea eta erreklamazioak ebaztea, salbu eta ikasleen ordezkariak hautatzeko prozesuetan, Ikasleen Kontseiluaren eskumenekoak badira.
2. Tokiko Hauteskunde Batzordeak fakultatekoak, ikastegikoak, sailekoak, unibertsitate-institutukoak eta batzordekoak izango dira, jarduera eremuaren arabera.
3. Tokiko Hauteskunde Batzordeetako kideak ondoko hauek izango dira:
a) Fakultate edo Ikastegiko Hauteskunde Batzordea: dekanoa edo zuzendaria, batzordeburua izango dena, dekanorde edo zuzendariorde bat eta ikastegiko idazkaria.
b) Sailetako eta Institutuetako Hauteskunde Batzordeak: zuzendaria, batzordeburua izango dena, zuzendariak izendatutako zuzendariorde bat eta saileko edo institutuko idazkaria.
c) Batzordeetako Hauteskunde Batzordeak: batzordeburu bat, batzordeburuorde bat eta idazkari bat, batzorde bakoitzeko buruak kideen artetik, batzordeburua kenduta, zozketaz izendatuko dituenak.
4. Tokiko Hauteskunde Batzordeetako kideen agintaldia lau urtekoa izango da.
5. Fakultate, Ikastegi edo Saileko Hauteskunde Batzordeetako buruek eta batzordeetako buruek gutxienez ere ordezko bat izendatuko dute Tokiko Hauteskunde Batzordeetako kide bakoitzeko, Fakultate edo Eskolako Batzorde, Saileko Kontseilu edo batzorde bakoitzeko kideen artetik.
Tokiko Hauteskunde Batzordeko kide bat Batzordearen menpe dagoen hauteskunde prozesu batean hautagai aurkezten bada, prozesuak dirauen bitartean ez da aipatu Batzordean arituko, eta bere ordez inolako bateraezintasun edo abstentzio auzirik ez duen ordezko bat arituko da.
6. Unibertsitateko Tokiko Hauteskunde Batzordeek gehiengo soilez hartuko dituzte erabakiak. Berdinketa gertatuz gero, batzordeburuak izango du boto erabakitzailea.
7. Hauteskunde prozesua amaituta, Tokiko Hauteskunde Batzorde bakoitzak Unibertsitateko hauteskunde Batzorde Nagusiari hautetsien behin betiko aldarrikapenaren erabakia bidaliko dio.
Saileko zuzendaria et ikastegiko zuzendaria edo dekanoa hautatzeko hauteskundeetan, halaber, aipatu erabakia errektoreari bidaliko zaio, hautagai hautetsiaren izendapenerako.
III. KAPITULUA. Hauteskunde erroldak
7. artikulua
1. Botoa emateko edo hautatua izateko eskubidea bete ahal izateko ezinbesteko baldintza da hauteskunde erroldan izena emanda egotea.
2. Unibertsitateko Kudeatzailetzak, zerbitzuen zuzendaritzen bidez, eta eskumena duen hauteskunde batzordeak, edo, kasua bada, hauteskundeetarako deialdia egin duen organoak eskatuta, hauteskunde erroldak prestatuko ditu, hauteskundeetarako deialdiko egunean eskura egon daitezen.
3. Unibertsitate komunitateko kideren bati bi arlo edo gehiago badagozkio, arlo batean bakarrik erabili ahal izango du botoa emateko eskubidea eta hautagai izatekoa. Arlo hori interesdunak aukeratuko du.
Halakorik gertatzen bada, interesdunak aldez aurretik idatziz besterik adierazi ezean, arlokako erroldak prestatzeaz arduratzen diren unitateek erroldetako batean sartuko dute, honako lehentasunezko hurrenkera aplikatuz:
1. Unibertsitatearekin lotura iraunkorra duten irakasle doktoreen arloa.
2. Aurreko kategoria edo arloan sartzen ez diren irakasle eta ikertzaileen arloa.
3. Administrazio eta zerbitzuetako langileen arloa.
4. Ikasleen arloan.
Alabaina, interesdunek, horretarako eskubidea badute, eskatzen ahalko dute sartu dituzten erroldan ez eta beste batean egotea, 8.2 artikuluak aurreikusten duen erreklamazioak aurkezteko epearen barruan.
8. artikulua
1. Klaustrorako, errektorerako eta ikastegiko dekanoak eta zuzendariak hautatzeko hauteskundeetan, behin-behineko hauteskunde erroldak argitara emango dira, Iruñeko campuseko erregistroan eta Tuterako campuseko erregistroan, hauteskundeetarako deialditik hurrengo bi eguneko epearen barruan, gutxienez ere, eta bost eguneko epearen barruan, gehienez ere. Aipatu epean, Nafarroako Unibertsitate Publikoaren web-orrialdean, unibertsitate komunitateko kideek aukera izango dute egiaztatzeko ba ote dauden edo ez behin-behineko erroldetan.
Gainerako hauteskunde prozesuetan, behin-behineko hauteskunde erroldak argitara emango dira, hauteskunde egutegian zehazten diren iragarki-oholetan, hauteskundeetarako deialditik hurrengo bi eguneko epearen barruan, gutxienez ere, eta bost eguneko epearen barruan, gehienez ere.
2. Behin-behineko hauteskunde erroldak jendaurrean dauden egunetan, interesdunek erreklamazioak aurkez ditzakete, hauteskunde erroldan behar izan gabe sartu edo bertatik baztertu dituztelako, edo erroldan beste akatsen bat egin dutelako.
3. Behin-behineko hauteskunde erroldak jendaurrean egoteko epea amaitu ondoren, eskumena duen Hauteskunde Batzordeak aurkeztu diren erreklamazioak ebatziko ditu, gehienez ere hurrengo bi eguneko epearen barruan, eta behin betiko errolda argitaratuko du. Erreklamaziorik ez badago, eskumena duen Hauteskunde Batzordeak erabakia argitaratuko du, behin-behineko erroldak behin betiko bihurtzeko.
Behin betiko erroldak behin-behinekoak argitaratzen diren iragarki-oholetan eta modu beretan argitaratuko dira, eta hauteskundeak bukatu arte egongo dira.
IV. KAPITULUA. Hauteskundeetarako deialdiak
9. artikulua
1. Gobernu-organo kolegiatuetan eta Unibertsitateko batzordeetan ordezkari izango direnen hauteskundeetarako deia, ordezkaritza utziko dutenei ordezkaritza aldia noiz iraungitzen zaien, gutxienez ere, egun hori baino hilabete lehenago egingo da, eta ondorengoen eskumena izango da:
a) Errektorearena, Klaustrorako eta Gobernu Kontseilurako deia egiteko.
b) Dekanoena eta Ikastegietako zuzendariena, Ikastegietako Batzordeetarako deia egiteko.
c) Sailetako zuzendariena, Sailetako Kontseiluetarako deia egiteko.
d) Unibertsitate Institutuetako zuzendariena, Institutuetako Kontseiluetarako deia egiteko.
e) Buruena, dagozkien batzordeetarako.
2. Ikasleen Kontseiluaren eskumena izango da ikasleek Ikastegiko Batzordeetan eta Saileko Kontseiluetan dituzten ordezkarien hauteskundeetarako deialdia egitea, haren arautegian xedatutakoari jarraituz.
3. Pertsona bakarreko gobernu-organoetako hauteskundeak, agintaldia bukatzen delako deitzen direnean, pertsona bakarreko organoa aukeratu behar duen organo kolegiatuaren kide hautesleak berritu eta gero deituko dira. Ateratzera doan titularrak egingo du deialdia, bere agintaldia bukatu eta hilabete lehenago, gutxienez. Kargu uztea beste arrazoi batengatik gertatzen bada, kargua jardunean betetzen duenak egingo du deialdia, bere izendapena gertatu eta ondorengo hilabetearen barruan.
4. Aurreko ataletan ezarritakoa betetzen ez bada, errektoreak egingo du hauteskundeetarako deialdia, eta hauteskundeak errektorea hautatzeko badira, Gobernu Kontseiluak, Barne Erregimeneko Arautegiak xedatzen duenaren arabera deituko dena, eta arautegi horrek xedatzen duenaren araberako burua edukiko duena.
5. Ordezkaritzaren agintaldiaren sei hilabete baino gutxiago geratzen denean, ez da bidezkoa izango hauteskunde partzialetarako deialdia egitea.
10. artikulua
1. Organo eskudunak hauteskundeetarako deialdia onetsi eta gero, aipatu organoak berehala jakinaraziko die berria Unibertsitateko Hauteskunde Batzorde Nagusiari eta eskumena duen Tokiko Hauteskunde Batzordeari.
2. Hauteskundeetarako deialdiak, gutxienez ere, ondorengoak zehaztuko ditu:
a) Hauteskundeak zer organotan edo batzordetan egin behar diren.
b) Kasu bakoitzean hautatu beharreko ordezkarien kopurua.
c) Hauteskunde egutegia, bozketak egiteko eguna, tokia eta ordua zehaztuko dituena.
d) Eskumena duen Hauteskunde Batzordea.
3. Hauteskundeetarako deiak deialdia egiten duen organoak iragarriko ditu, horretarako dauden iragarki-oholetan, eta, kasua bada, Unibertsitatearen web-orrialdean.
Hauteskunde prozesuko gainontzeko egintzak eskumena duen Hauteskunde Batzordeak iragarriko ditu, iragarki-oholetan eta, kasua bada, Unibertsitatearen web-orrialdean, hauteskunde egutegian aurreikusitakoaren arabera.
V. KAPITULUA. Hauteskunde prozedura
Lehen atala. Hautagaitzak aurkeztea eta aldarrikatzea Xedapen orokorrak
11. artikulua
1. Hautagaitzak Unibertsitateko Erregistro Orokorretan aurkeztuko dira. Aurkezpen hori behin betiko hauteskunde errolda onetsi eta argitaratu eta ondorengo lau eguneko epearen barruan egingo da. Hautagaitza aurkezteko idazkian hautagaiaren datuak eta zer arlotan aurkezten den adierazi beharko da, eta Nortasun Agiri Nazionalaren fotokopia erantsiko zaio, edo, bestela, pasaportearena, Unibertsitatearen txartelarena edo argazkia duen gidatzeko baimenarena.
2. Hautagaitzak indibidualak izango dira, ikasleek Unibertsitateko Klaustroan eduki beharreko ordezkarien kasuan izan ezik, kasu horretan Unibertsitatearen Estatutuetako 25.2 artikuluak ezartzen duena aplikatuko baita.
3. Arlo edo talde bakoitzean hautagai-zerrenda bakar bat prestatuko da, alfabetoaren hurrenkeraren arabera ordenatuta, berauek aldarrikatzeko eta boto-txartelak prestatzeko, salbu eta Unibertsitateko Klaustroan ikasleek edukiko dituzten ordezkarien hauteskundeen kasuan, zeinak zerrenda itxiaren sistemaren arabera egingo baitira.
12. artikulua
1. Eskumena duen Hauteskunde Batzordeak argitara emango ditu hautagaien behin-behineko zerrendak, hautagaitzak aurkezteko epea bukatu eta ondorengo bi egunen barruan.
2. Hautagaien behin-behineko aldarrikapenaren erabakiaren aurka zilegi da errekurtsoa aurkeztea, eskumena duen Hauteskunde Batzordeari, argitaratu eta bi eguneko epean.
Hautagaiek aurkeztu duten dokumentazioa osatu gabe badago, edo zalantzaren bat sortzen badu, eskumena duen Hauteskunde Batzordeak zilegi izango du dokumentazioa osatzeko edo zuzentzeko eskatzea, behin-behineko aldarrikapenaren aurkako erreklamazioetarako epearen barruan.
3. Erreklamazioak aurkezteko eta zuzentzeko epea amaitu ondoren, eskumena duen Hauteskunde Batzordeak haiek ebatziko ditu, gehienez ere hurrengo bi eguneko epearen barruan, eta behin betiko hautagaitzak aldarrikatuko ditu.
Bigarren atala. Hautagaitzak aurkeztea eta aldarrikatzea Gobernu Organo Kolegiatuen eta Batzordeen xedapen espezifikoak
13. artikulua
1. Aurkezten diren hautagaien kopurua eta ordezkaritza eta gobernu organo kolegiatuetan bete beharreko postuen kopurua berdina denean, eskumena duen Hauteskunde Batzordeak automatikoki hautatutzat hartuko ditu, bozketarik egin beharrik gabe.
2. Hautagaien kopurua bete beharreko postuena baino txikiagoa denean, eskumena duen Hauteskunde Batzordeak automatikoki hautatutzat hartuko ditu, bozketarik egin beharrik gabe. Gainerako postuak betetzeko alor edo taldearen behin betiko errolda hartu eta zozketa egingo da, ordurako hautatutakoak zozketatik salbuetsiz.
3. Aurreko arauen arabera aurkeztutako hautagaitzarik ezean, dagokion behin betiko errolda osoa kontuan hartuz, eskumena duen Hauteskunde Batzordeak egingo duen zozketaren bidez izendatuko dira.
Hirugarren atala. Hauteskunde kanpaina
14. artikulua
Hauteskunde kanpaina egiteko aldia hautagaitzak behin betiko aldarrikatu eta hurrengo egunean hasiko da.
Laugarren atala. Postaren bidezko botoa eta boto aurreratua
15. artikulua
1. Errektorea, dekanoa edo ikastegiko zuzendaria hautatzeko eta Unibertsitateko Klaustrorako hauteskundeetan, finkatutako egunean bozketan parte hartu ezin duten hautesleek zilegi izango dute postaren bidezko botoa edo boto aurreratua erabiltzea, ondotik datozen ataletan ezarritakoari jarraituz.
Errektorea, dekanoa edo ikastegiko zuzendaria hautatzeko hauteskundeetan postaren bidezko botoa lehen aldian bakarrik onartuko da, eta boto aurreratua bigarren aldian bakarrik.
Halaber, irakasleen arloko eta administrazio eta zerbitzuetako langileen arloko ordezkarien hauteskundeetan, jarduera Iruñeko campusean eta Tuterako campusean garatzen duten Ikastegiko Batzordeetarako eta Saileko Kontseiluetarako, hauteskunde mahaiak campus bakar batean eratzen direnean, boto aurreratua onartuko zaie zerbitzua beste campusean ematen duten hautesleei, artikulu honen hirugarren atalean ezarritakoari jarraituz.
2. Postaren bidezko botorako eskaerak egiteko epea behin betiko errolda onesten den egunean hasiko da, eta hauteskundeak egin baino zortzi egun lehenago bukatuko. Postaren bidezko botoak zilegi izango dira behin betiko hautagaitzak aldarrikatzen diren egunaren biharamunetik bozketa-eguna baino egun bat lehenagora arte.
Postaren bidezko botoa ondoren zehazten den prozeduraren arabera egingo da:
a) Hautesleak eskatuko dio eskumena duen Hauteskunde Batzordeari hauteskunde erroldan izena emanda dagoelako egiaztagiria.
b) Hautesleak hautatu duen boto-txartela hauteskunde gutun-azalean, eredu ofizialekoan, sartu eta itxi egingo du. Gutun-azal hau, gehi erroldan izena emanda egotearen egiaztagiria eta NANaren kopia, gutun-azal arrunt batean sartuko ditu. Gero gutun-azala, eskumena duen Hauteskunde Batzordeari zuzendua, eta hauteskunde prozesua, arloa eta hauteskunde mahaia aipatuta, itxiko du. Boto emaileak azal-hegalean izenpetuko du eta zinta itsaskorrez prezintatuko da, eta Unibertsitateko Erregistro Orokorrera helaraziko du, ezarritako epean. Postaren bidezko botoak eskumena duen Hauteskunde Batzordeari helaraziko zaizkio, eta honek zainduko ditu hauteskunde mahaian eman arte, boto zenbaketa hasiko den unean.
c) Bozketa denbora bukaturik, eta hauteskunde mahaiko kideek beren botoa eman baino lehen, postaren bidezko kanpoko gutun-azal arruntak irekiko dira, eta hauteslea nor den egiaztatuko da. Hauteslea ez bada botoa ematera joan, hauteskundeko gutun-azala, emandako botoarekin, dagokion hautestontzian sartuko da.
3. Boto aurreratuak zilegi izango dira hautagaiak aldarrikatzen diren egunaren biharamunetik bozketa-eguna baino egun bat lehenagora arte.
Boto aurreratua ondoren zehazten den prozeduraren arabera egingo da:
a) Hauteslea dagokion idazkaritzara joango da boto aurreratua ematera, gutun-azal arrunt batean. Bertan bere bi deiturak eta izena, eta behar den arloa eta hauteskunde mahaia agertuko dira. Boto-emaileak gutun-azal arruntaren azal-hegalean sinatuko du, eta gutun-azala zinta itsaskorrarekin zigilatuko da. Gutun-azal horrek edukiko ditu hauteslearen NANaren kopia eta eredu ofizialeko hauteskunde gutun-azala, hautatu duen boto-txartelarekin.
Hauteslea Tuterako campusekoa bada, gutun-azala Hauteskunde Batzorde Nagusiko ordezkariari emango dio.
b) Eskumena duen idazkaritzan, hauteslea behar den arloko eta mahaiko hauteskunde erroldan dagoela egiaztatu ondoren, boto aurreratua eskumena duen Hauteskunde Batzordeko buruari emango zaio, eta horrek zainduko du, hauteskunde mahaian eman arte, bozketa egiten den egunean.
c) Bozketa egunean eskumena duen Hauteskunde Batzordeak hauteskunde mahaiari emango dizkio boto aurreratuak, botoen zenbaketa hasi aurretik.
Bozketa denbora bukaturik, eta hauteskunde mahaiko kideek beren botoa eman baino lehen, boto aurreratuen kanpoko gutun-azalak irekiko dira, eta hauteslea nor den egiaztatuko da. Hauteslea ez bada botoa ematera joan bozketa egunean, boto aurreratua duen gutun-azala dagokion hautestontzian sartuko da.
Bosgarren atala. Hauteskunde mahaiak
16. artikulua
1. Eskumena duen Hauteskunde Batzordeak zehaztuko du hauteskunde prozesu bakoitzean zenbat hauteskunde mahai eratu behar den, unibertsitateko arlo bakoitzarentzako mahai bana egongo delarik, gutxienez.
2. Eskumena duen hauteskunde batzordeak, kontuan hartuz ukitutako hautesleen kopurua eta bete beharreko postuena, erabakitzen ahalko du arlo edo talde guztietako hautesleek mahai berean boto ematea, baina hautestontzi ezberdinetan.
3. Mahaiburu batek eta bi kidek osatuko dute hauteskunde mahai bakoitza, dagokien arloko hautesleen artetik zozketaz izendatuak. Buruak eta mahaikideek beren lehen eta bigarren ordezkoak, gutxienez ere, edukiko dituzte, hauek ere zozketaz izendaturik.
Zozketan ez dira sartuko ondoko hauek: hautagai aldarrikatu dituzten pertsonak, batzordeetako buruak, eremu orokorreko pertsona bakarreko gobernu-organoak eta eskumena duen hauteskunde batzordeetako kide titularrak.
Aurreko atalean aurreikusten den kasuan, hauteskunde mahaiaren eraketan arlo, azpi-arlo edo talde guztiak egongo dira ordezkaturik.
4. Inork ezin dio hauteskunde mahaiko kide izateari uko egin, ez bada horretarako arrazoi justua dagoela, behar bezala adierazita idatziz, eskumena duen Hauteskunde Batzordearen aurrean, eta ordezkoa bilatu ahal izateko nahiko denboraz gaztigaturik. Kide titularrek edo ordezkoek beren betebeharrak ez betetzeak indarrean diren arauek ezartzen duten erantzukizuna sorraraziko du.
17. artikulua
1. Klaustrorako eta errektorea eta dekanoak edo ikastegiko zuzendariak hautatzeko hauteskundeetan, hautagaiek zilegi izango dute ikuskatzaile bat eskatzea, dagokion prozeduran eratzen den hauteskunde mahai bakoitzeko.
Eskumena duen Hauteskunde Batzordeari dagokio hauteskunde mahai bakoitzean ikuskatzaileak izendatzea, bat horrelakorik eskatu duen hautagaitza bakoitzeko.
2. Hautagaiek egingo dituzte ikuskatzaileak izendatzeko eskaerak, eskumena duen Hauteskunde Batzordearen buruari egindako idatziaren bidez, hautagaiak behin betiko aldarrikatu ondorengo bi eguneko epean, proposatzen direnen izena, deiturak NAN edo pasaporte zenbakia eta berauek lokalizatzeko datuak emanez. Idazki hori proposatutako ikuskatzaile bakoitzak sinatu beharko du.
3. Ikuskatzaileak dagokion hauteskunde mahaiaren boto-emaileen erroldan egon behar dira.
4. Eskumena duen Hauteskunde Batzordeak kredentzial bat egingo die izendatutako ikuskatzaileei, eta kredentzial hauen bi kopia jasoko dute ikuskatzaileek. Kontu-hartzaile bakoitzak jardungo duen mahaiko buruari aleetako bat emango dio eta ale hori mahaia eratzeari buruzko aktari erantsiko diote.
5. Ikuskatzaileak ez dira hauteskunde mahaietako kideak, eta ez dute parte hartuko hauek hartzen dituzten erabakietan. Hala ere, hauteskunde mahaia eratzen denean bertan egon behar dute, baita bozketa egiten den bitartean eta boto-zenbaketan ere, eta aktak izenpetu beharko dituzte. Ikuskatzaileek idatzarazi ahalko dute aktan bozketa bitartean edo boto-zenbaketan gertatu diren gorabeheren berri.
18. artikulua
1. Hauteskunde mahaietako kide titularrak eta ordezkoak bozketak hasi baino lehen bilduko dira, eskumena duen Hauteskunde Batzordeak esango dien lekuan eta orduan.
2. Hauteskunde Mahaiko kide titularren bat ez bada agertzen esandako orduan, ordezkoa arituko da bere partez. Hori ezinezkoa bada, eskumena duen Hauteskunde Batzordeak mahaikide izendatuko du une hartan han egon eta arloko hauteslea den norbait.
3. Mahaia eratzeko, bozketak amaitzeko eta boto-zenbaketa egiteko, mahaikide guztiak egon behar dira. Bozketa bitartean bertan egon beharko dute, gutxienez, bi kidek.
4. Bozketa hasi baino lehen, hauteskunde mahaiko buruak mahaiaren eratze-akta idatziko du, berak, bi mahaikidek eta ikuskatzaileek -halakorik badago- sinatuta.
19. artikulua
Hauteskunde mahaiak hartu behar dituen erabakiak botoen gehiengo soilaz hartuko dira. Berdinketa ematen bada, mahaiburuaren botoak erabakiko du.
Seigarren atala. Bozketak
20. artikulua
1. Klaustrorako eta errektorea eta dekanoak eta ikastegiko zuzendariak hautatzeko hauteskundeetan bozketa egingo da hautagaitzak behin-betiko aldarrikatu eta hurrengo zazpigarren eta bederatzigarren egunen artean.
Gainerako hauteskunde prozesuetan bozketa egingo da hautagaitzak behin-betiko aldarrikatu eta hurrengo laugarren eta zazpigarren egunaren artean.
2. Botoa librea, pertsonala, sekretua eta ordezkaezina da. Ezein hauteskunde prozesutan ez da boto delegatua onartuko.
3. Botoa eman baino lehen, hautesleek euren nortasuna frogatuko dute, hauetako baten bidez: N.A.N., pasaportea, Nafarroako Unibertsitate Publikoko txartela edo argazkia duen gidabaimena.
4. Hauteslea dagokion zerrendan dagoela egiaztatu ondoren, hautesleak berak botoa duen gutun-azala mahaiburuari eman, eta horrek sartuko du hautestontzian.
5. Mahaiburuak txartelak hautestontzian sartu ahala, mahaikide batek botoa emateko eskubidea erabili duten hautesleen izenak markatuko ditu zerrendan.
6. Bozketa egiteko egunean 11:00etatik 18:00etara artekoa, gehienez, eta etenik gabekoa izango da botoa emateko aldia, hauteskundeetarako deialdian aurreikusitakoari jarraituz.
7. Hauteskunde prozesu batean eratzen diren mahaietarako, aukera izango da mahai bakoitzerako ordutegi edo egun ezberdinak ezartzeko, beti ere aurreko atalean ezarritako gehieneko eta gutxieneko mugak gordetzen badira.
8. Bozketa aldia amaitzeko ezarritako orduan, mahaiburuak ozenki iragarriko du bozketa amaitzear dela, eta inori gehiagori ez dio utziko gelan sartzen. Alabaina, gela barruan daudenei utziko zaie botoa ematen. Ondoren gela itxi egingo da. Ondoren, postaren bidezko botoak, edo aurreratuak, sartuko dira hautestontzian, halakorik badago. Azkenik, mahaiko kideek eta ikuskatzaileek emango dute botoa.
9. Hauteskunde saioa garatzeko oztopo larria den gertaeraren bat izanez gero, mahaiburuak berehala emango dio horren berri eskumena duen Hauteskunde Batzordeari, eta dagokion aktan ere jasoko du.
Zazpigarren atala. Boto-zenbaketa
21. artikulua
1. Bozketa bukaturik, boto-zenbaketa egingo da. Zenbaketa publikoa izango da, eta etenik gabe egingo. Mahaiburuak banan-banan aterako ditu gutun-azalak hautestontzitik, ozenki irakurriko du boto emandako hautagaitzak edo hautagaiak, eta irakurri eta gero boto-txartela erakutsiko die mahaikideei eta ikuskatzaileei.
2. Mahaikideren batek edo ikuskatzaileren batek zalantza badu txartel baten edukiari buruz, orduantxe mahaiburuari eska diezaioke, eta mahaiburuak erakutsi egingo dio azter dezan.
3. Honako kasu hauetan botoak baliogabeak izango dira:
a) Ofizialak ez diren gutun-azal edo boto-txartelean emandakoa.
b) Gutun-azalik gabeko txartel-botoan emandakoa, edo hautagaitza bat baino gehiagoko boto-txartelak dauzkana.
c) Hautagaitzako hautagaien izenik aldatuta, gehituta edo zirriborratuta daukan boto-txartelean emandakoa, edo beste edozein aldaketa duen boto-txartelean emandakoa.
d) Kasu bakoitzean ezartzen den muga gaindituz, behar dena baino hautagai gehiagori ematen dion boto-txartela.
4. Baldin eta gutun-azalaren barruan hautagaitza bereko boto-txartel bat baino gehiago badago, boto baliodun bat zenbatuko da.
5. Honako hauek izango dira boto zuriak, baino baliodunak:
a) Boto-txartelik ez duen gutun-azala.
b) Ezein hautagairen aldeko aztarnarik ez duten boto-txartelak.
6. Boto guztiak irakurri eta gero, boto-zenbaketa egiten hasiko da, eta ondoren mahaiburuak emaitzak ozenki irakurriko ditu, boto baliodunak, boto zuriak, boto baliogabeak eta hautagai bakoitzak lortutako botoak zehaztuz.
7. Mahaiburuak behar diren neurriak hartuko ditu boto-zenbaketa modu normalean gerta dadin, inork ez dezan galaraz edo asalda.
22. artikulua
1. Boto-zenbaketa bukatu eta gero, hauteskunde mahaiak akta bat egingo du, ale bikoiztuan, honako hauek bilduz: hautesle-kopurua, emandako boto-kopurua, bereiziz boto baliodunak eta baliogabeak, hautagaitza bakoitzak eskuratutako botoak, bai eta erreklamazioak, akordioak eta gorabeherak ere, halakorik badago. Boto baliodunen artean, boto zurien kopurua zehaztuko da.
2. Boto baliogaberik duten boto-txartelak eta edozein erreklamazioren gai izan direnak aktari erantsiko zaizkio, eta aktarekin artxibatuko dira, behin mahaikideek izenpetu eta gero.
3. Zenbaketa aktaren bi aleak bete ondoren, aurreko atalean aipatzen diren boto-txartelekin batera, eskumena duen Hauteskunde Batzordeko kide bati emango zaizkio, eta horrek ale sinatu bat itzuliko dio hauteskunde mahaiko buruari. Halaber, eratze akta emango diote, eta ikuskatzaileen akreditazioak, kasua bada. Gainerako txartelak suntsitu egingo dira.
Hautagaiek eskatzen ahal diote eskumena duen Hauteskunde Batzordeko buruari boto-zenbaketaren aktaren kopia bat, eta berau lortzeko eskubidea dute.
Zortzigarren atala. Boto-zenbaketa orokorra eta hautatuak aldarrikatzea
23. artikulua
1. Boto-zenbaketa egin eta ondorengo bi eguneko epean, eskumena duen Hauteskunde Batzordeak aurkeztu diren erreklamazioak ebatziko ditu, eta ondoren, behin betiko boto-zenbaketa egingo du, baita behin behinean hautatutako hautagaiak aldarrikatuko ere, akta jasoz eta emaitzak iragarki-oholetan, eta, kasua bada, Unibertsitatearen web-orrialdean, argitaratuz.
2. Kasu bakoitzean, botorik gehien lortu duten hautagaiak hautatuko dira unibertsitate komunitateko arlo bakoitzean.
3. Gobernu-organo kolegiatuetarako hauteskundeetan, hautagaien arteko berdinketa gertatuz gero, hautatuak nortzuk izango diren erabakitzeko, honako irizpide eta lehentasun-ordena hauek hartuko dira aintzat:
a) Irakasle doktore iraunkorren arloan: lerrun handiena, antzinatasun handiena Nafarroako Unibertsitate Publikoan, eta adin handiena.
b) Gainerako irakasle eta ikertzaileen arloan: antzinatasun handiena Nafarroako Unibertsitate Publikoan, eta adin handiena.
c) Administrazio eta zerbitzuetako langileen arloan: antzinatasun handiena Nafarroako Unibertsitate Publikoan, eta adin handiena.
24. artikulua
1. Ordezkaritza edo gobernu organo kolegiatuen hauteskundeetan, aurkezten diren hautagaitzetatik batek ere ez badu boto baliodunik eskuratzen, eskumena duen Hauteskunde Batzordeak zozketaz izendatuko ditu ordezkariak, arautegi honen 13.3 artikuluan ezartzen den prozedurari jarraituz.
2. Ordezkaritza edo gobernu organo kolegiatuen boto-zenbaketa egin ondoren hautagai hautatuen kopurua betetzeko dauden postuak baino txikiagoa bada, aurreko idatz-zatian ezarritakoa aplikatu beharko da postu horiek betetzeko.
25. artikulua
1. Bi eguneko epean, hautagai hautatuen behin-behineko aldarrikapenari erreklamazioak aurkezteko epea bukatzen denetik kontatzen hasita, eskumena duen Hauteskunde Batzordeak erreklamazioak ebatziko ditu, eta hautetsien behin betiko aldarrikapena egingo du.
2. Gobernu-organo kolegiatuetako kide hautatuak beren karguaz jabetzen ez diren arte, edo organoak eratzen diren arte, aurreko kideek segituko dute, jardunean. Pertsona bakarreko gobernu-organoei dagokienez, Unibertsitatearen Estatutuek xedatzen dutenari jarraituko zaio.
VI. KAPITULUA. Erreklamazioak eta errekurtsoak
26. artikulua
1. Behin-behineko errolden eta hautagaitzen behin-behineko aldarrikapenaren aurkako erreklamazioak ebazten dituzten Tokiko Hauteskunde Batzordeen erabakien aurka ezin da inolako errekurtsorik jarri, ezertan ukatu gabe hautetsien behin betiko aldarrikapenaren aurka errekurtsoa ezartzea Hauteskunde Batzorde Nagusiaren aurrean.
2. Tokiko Hauteskunde Batzordeek hautetsien behin betiko aldarrikapena 25.1 artikuluak ezartzen duenari jarraituz eginda, hurrengo bi eguneko epean errekurtsoa jartzen ahal da Unibertsitateko Hauteskunde Batzorde Nagusiaren aurrean, zeinak beste bi eguneko epea baitu, gehienez ere, errekurtsoa ebazteko. Epe hori bukatu delarik eta berariaz ebazpenik ematen ez bada, aurkatzea ez dela aintzat hartu ulertuko da.
27. artikulua
Behin-behineko errolden eta hautagaitzen behin-behineko aldarrikapenaren aurkako erreklamazioak ebazten dituzten Hauteskunde Batzorde Nagusiaren erabakien aurka ezin da inolako errekurtsorik jarri.
Hauteskunde Batzorde Nagusiaren erabaki adieraziek nahiz presuntziozkoek, Tokiko Hauteskunde Batzordeen hautetsien behin betiko aldarrikapenaren aurkako errekurtsoak ebazten dituztenek, eta haren eskumeneko prozesuetako hautetsien behin-behineko aldarrikapenaren aurkako erreklamazioak ebazten dituztenek, administrazio bidea bukatzen dute, eta Administrazioarekiko Auzi-eskumenaren aurrean aurkatu ahal dira zuzenean.
28. artikulua
1. Arautegi honek ezartzen dituen epeetan, bakarrik egun baliodunak kontatuko dira. Epeak kontatzeko, larunbatak ez dira egun balioduntzat hartuko.
2. Hauteskunde partzialetarako deialdietan, kontuan hartuz hautesleen kopurua eta hautatu beharreko ordezkariena, deialdia egiten duen organoak zilegi izango du arautegi honetan agertzen diren epeak erdira murriztea.
BIGARREN TITULUA. GOBERNU-ORGANO KOLEGIATUETARAKO HAUTESKUNDEEN XEDAPEN BEREZIAK
I. KAPITULUA. Unibertsitateko klaustrorako hauteskundeak
29. artikulua
Unibertsitateko Klaustroa osatzen duten 120 hautetsiak honela banatzen dira unibertsitate komunitateko lau arloetan:
a) Unibertsitatearekin lotura iraunkorra duten irakasle doktoreen 71 ordezkari.
b) Aurreko kategorian sartzen ez diren irakasle eta ikertzaileen 13 ordezkari. Arlo honetan bi azpi-arlo egongo dira: Irakasle funtzionario ez doktoreen azpi-arloa eta gainerako irakasle eta ikertzaileen azpi-arloa.
Azpi-arlo bakoitzari bere hautesleen kopuruaren proportzioko ordezkari kopurua dagokio. Kopuru hori Hauteskunde Batzorde Nagusiak finkatuko du, hauteskunde prozesu bakoitzean.
c) Ikasleen 24 ordezkari.
d) Administrazio eta Zerbitzuetako langileen 12 ordezkari.
30. artikulua
1. Irakasle eta ikertzaileen eta administrazio eta zerbitzuetako langileen Klaustrorako ordezkariak gehiengo sistemaren bidez hautatuko dituzte. Hautesle bakoitzak, gehienez, ondoren aipatzen den hautagai-kopuruari ematen ahal dio botoa:
a) Unibertsitatearekin lotura iraunkorra duten irakasle doktoreen arloa: 50 hautagai, gehienez.
b) Aurreko kategorian sartzen ez diren irakasle eta ikertzaileen arloa: 10 hautagai, gehienez.
c) Administrazio eta Zerbitzuetako langileen arloa: 9 hautagai, gehienez.
2. Arlo bakoitzean bete beharreko postuak betetzeko hautatuak boto-kopururik handiena lortu duten hautagaiak izango dira.
3. Agintaldian zehar hautatutako ordezkariren batek bere funtzioei uzten badie, haren ordez hauteskundeetan botorik gehien lortu zuen bigarrena arituko da, eta halakorik ez balego, arloko hauteskundeetarako deialdia egingo da postu hutsa betetzeko. Agintaldiak ordezkatzen den hautagaiaren agintaldiak iraungo zuen beste iraungo du.
31. artikulua
1. Ikasleen klaustrokideen hautaketa zerrenda itxiko sistema proportzional baten bidez egingo da, eta zerrenda hori arlo horrek hautatu behar duen klaustrokide kopuruari lotu beharko zaio.
2. Hautagaitzaren idazkia hautagai bakoitzaren onarpen idazkiarekin batera aurkeztu beharko da eta, gainera, bakoitzaren Nortasun Agiri Nazionalaren fotokopia erantsiko zaio, edo, bestela, pasaportearena, Nafarroako Unibertsitate Publikoaren txartelarena edo argazkia duen gidatzeko baimenarena, zerrenda osatzen duten guztiena. Halaber, hautagaitzako kideen artetik, Hauteskunde Batzorderako ordezkari bat izendatuko da, haren helbidea eta harremanetarako telefonoa adierazita.
3. Ikasle batek klaustrokide kargua uzten badu, hautatua izan zen zerrendan hurren dagoenak ordezkatuko du, halakorik bada. Ez baldin bada, ez da egoki izango beste bat hautatzea, hautatuari egokitu zitzaion agintaldia bukatu arte.
II. KAPITULUA. Dekanoek edo ikastegietako zuzendariek, unibertsitate institutuetako zuzendariek eta saileko zuzendariek gobernu kontseiluan dituzten ordezkariak hautatzeko hauteskundeak
32. artikulua
Dekanoek edo ikastegietako zuzendariek, Saileko zuzendariek, eta, kasua bada, unibertsitateko ikerketa institutuetako zuzendariek, Nafarroako Unibertsitate Publikoko Gobernu Kontseiluan dituzten ordezkariak hautatzeko hauteskundeetarako zilegi izango da hauteskunde prozedura laburtu bat erabiltzea, hauteskunde kidego horren berezitasunen arabera espresuki diseinatua eta aldez aurretik Hauteskunde Batzorde Nagusiak onetsi beharko duena.
33. artikulua
1. Dekanoek edo ikastegietako zuzendariek, edo, hala badagokio, ikerketarako unibertsitate institutuetako zuzendariek Nafarroako Unibertsitate Publikoko Gobernu Kontseiluan dituzten ordezkariak hautatzeko hauteskundeetan, kargu horiek betetzen dituzten pertsonek edukiko dute botoa emateko eta hautagai izateko eskubidea, estatutuetan ezarritakoari jarraituz behin-behineko izendapena dutenak edo jardunean ari direnak ere barne.
2. Hauteskunde sistema gehiengoaren bidezkoa izango da, betebeharreko lanpostu huts bakoitzean botorik gehien eskuratu duen hautagaiak hautatuko direlarik.
3. Fakultateko dekanoen, eskola zuzendarien, eta, hala badagokio, ikerketarako unibertsitate institutuetako zuzendarien bi ordezkariak hautatzeko hauteskundeetan, hautesleek, zenbat diren hautatu beharreko ordezkariak, beste hainbeste hautagairi ematen ahalko diote botoa.
Saileko zuzendariek Gobernu Kontseiluan dituzten lau ordezkariak hautatzeko hauteskundeetan, hautesleek gehienez ere hiru hautagairi ematen ahalko diote botoa.
4. Agintaldian zehar hautatutako ordezkariren batek bere funtzioei uzten badie, haren ordez hauteskundeetan botorik gehien lortu zuen bigarrena arituko da, eta halakorik ez balego, arloko hauteskundeetarako deialdia egingo da postu hutsa betetzeko. Agintaldiak ordezkatzen den hautagaiaren agintaldiak iraungo zuen beste iraungo du.
III. KAPITULUA. Ikastegiko batzordetarako hauteskundeak
34. artikulua
Ikastegiko Batzorderako hauteskundeetan ikastegian irakaskuntza ematen duten irakasle eta ikertzaile guztiek edukiko dute botoa emateko eta hautagai izateko eskubidea, eta ikastegian zerbitzua ematen duten administrazio eta zerbitzuetako langileek ere.
35. artikulua
1. Hautatu behar diren irakasle eta ikertzaileen ordezkariak, estatutuen 28.2 eta 3 artikuluan ezarritakoari jarraituz, azpi-arloen arabera hautatuko dira, ikastegi bakoitzeko barne eraentzako arautegian ezartzen den kopurua kontuan hartuz.
2. Hau dela kausa, bi errolda prestatuko dira, bat azpi-arlo bakoitzeko, eta bi hauteskunde mahai eratuko dira, ez bada 16.2 artikuluak ezartzen duena aplikatzen, behintzat.
3. Hauteskunde-sistema gehiengo soilaren bidezkoa izango da. Irakasleen azpi-arlo bakoitzeko hautesleek hautatu beharreko ordezkariak hiru baino gutxiago badira, zenbat ordezkari hautatu behar den, beste hainbeste hautagairi eman ahalko diote botoa.
Azpi-arlo batean hautatu behar diren ordezkariak hiru edo gehiago badira, hautesle bakoitzak hautatu beharreko ordezkariak zenbat diren, kopuru horren ehuneko hirurogeita hamarrari, gehienez, eman ahal izango dio botoa.
Botorik gehien daukatenak izango dira hautatuak, bete beharreko postu-kopurua muga dela.
4. Agintaldiak lau urte iraungo du, gehienez. Alabaina, aldi honetan hautatutako ordezkariren batek bere eginkizunak egiteari uzten badio, hautatua izan zen hauteskundeetan botorik gehien atera zuen hurrenak ordezkatuko du. Horrelakorik ez badago, arloko hauteskundeen deialdia egingo da postu hutsa betetzeko, eta honela hautatutako ordezkarien agintaldiak ordezkatutako ordezkariarenak iraungo zuen beste iraungo du.
36. artikulua
1. Ikastegiari atxikitako administrazio eta zerbitzuetako langileen ordezkari bat Ikastegiko Batzordeko kide izango da, eta haren ordezko bat egongo da, ikastegiari atxikitako langile kopuruak horretarako aukera ematen badu.
Langile bakar bat badago, automatikoki Batzordeko kide izatera pasatuko da.
2. Administrazio eta zerbitzuetako langileen ordezkaria hautatzeko hauteskundeetarako, zilegi izango da hauteskunde prozedura laburtu bat erabiltzea, hauteskunde kidego horren berezitasunen arabera espresuki diseinatua.
3. Agintaldiak lau urte iraungo du, gehienez. Alabaina, aldi honetan hautatutako ordezkariak bere eginkizunak egiteari uzten badio, hautatua izan zen hauteskundeetan botorik gehien atera zuen hurrenak ordezkatuko du. Horrelakorik ez badago, arloko hauteskundeen deialdia egingo da postu hutsa betetzeko, eta honela hautatutako ordezkariaren agintaldiak ordezkatutako ordezkariarenak iraungo zuen beste iraungo du.
IV. KAPITULUA. Saileko kontseiluetarako eta ikerketarako unibertsitate institutuetako hauteskundeak
37. artikulua
1. Saileko Kontseilurako hauteskundeetan sailari atxikitako irakasle eta ikertzaile guztiek edukiko dute botoa emateko eta hautagai izateko eskubidea, eta sailari atxikitako administrazio eta zerbitzuetako langileek ere.
2. Bete beharreko postuen kopurua saileko kide diren irakasle eta ikertzaileen kopuruak zehazten duen arloetako kasuan, horien kopuruak gora edo behera egiteak ez du arlo horietako ordezkarien kopurua aldaraziko, Kontseilua berritzeko hauteskundeak egiten diren arte.
38. artikulua
1. Saileko Kontseiluko kide izango dira sailari atxikitako irakasle eta ikertzaileen ordezkariak, saileko kide guztien kopuruaren ehuneko 10 egingo dutenak; sekula ez bi kide baino gutxiago, baldin badaude.
2. Sailean arlo horretako kideen kopurua hautatu beharreko ordezkariena bezalakoa edo txikiagoa bada, automatikoki Kontseiluko kide izatera pasatuko da, hautaketarik egin behar izan gabe.
3. Gehiengo soilarena izango da erabiliko den hauteskunde-sistema, Estatutuetako 49.2 artikuluak ezartzen duen arauari jarraituz.
4. Alabaina, bere agintaldian, hautatutako ordezkariren batek bere eginkizunak egiteari uzten badio, hautatua izan zen hauteskundeetan botorik gehien atera zuen hurrenak ordezkatuko du. Horrelakorik ez badago, arloko hauteskundeen deialdia egingo da postu hutsa betetzeko, eta honela hautatutako ordezkariaren agintaldiak ordezkatutako ordezkariarenak iraungo zuen beste iraungo du.
39. artikulua
1. Sailari atxikitako administrazio eta zerbitzuetako langileen ordezkari bat Saileko Kontseiluko kide izango da, Eta haren ordezko bat egongo da, langile kopuruak horretarako aukera ematen badu.
Langile bakar bat badago, automatikoki Kontseiluko kide izatera pasatuko da.
2. Administrazio eta zerbitzuetako langileen ordezkaria hautatzeko hauteskundeetarako zilegi izango da hauteskunde prozedura laburtu bat erabiltzea, hauteskunde kidego horren berezitasunen arabera espresuki diseinatua.
3. Agintaldiak lau urte iraungo du, gehienez. Alabaina, aldi honetan hautatutako ordezkariak bere eginkizunak egiteari uzten badio, hautatua izan zen hauteskundeetan botorik gehien atera zuen hurrenak ordezkatuko du. Horrelakorik ez badago, arloko hauteskundeen deialdia egingo da postu hutsa betetzeko, eta honela hautatutako ordezkariaren agintaldiak ordezkatutako ordezkariarenak iraungo zuen beste iraungo du.
40. artikulua
Ikerketarako Unibertsitate Institutuko Kontseiluko kideen hauteskundeak Kapitulu honetan Saileko Kontseiluei buruz aurreikusi diren xedapenen arabera egingo dira, Gobernu Kontseiluak, bere izaera berezia dela eta, egiten dituen egokitzapenekin.
HIRUGARREN TITULUA. Pertsona bakarreko gobernu-organoen hauteskundeen xedapen bereziak
I. KAPITULUA. Errektorea hautatzeko hauteskundeak
41. artikulua
Unibertsitateko komunitateak aukeratzen du errektorea, hautaketa zuzenaren eta sufragio unibertsal, libre eta isilaren bidez, Nafarroako Unibertsitate Publikoan aritzen diren unibertsitateko katedradunen artetik, beti ere jardunean badaude eta zerbitzuak bertan ematen badituzte.
Hautesle bakoitzak hautagai bakar bati emango dio botoa.
42. artikulua
1. Errektorea hautatzeko botoa haztatua izango da, Unibertsitateko Komunitatearen arloetan, ondorengo ehuneko hauen arabera:
a) Ehuneko 59, Unibertsitatearekin lotura iraunkorra duten irakasle doktoreentzat.
b) Ehuneko 11, aurreko kategorian sartzen ez diren irakasle eta ikertzaileentzat.
c) Ehuneko 20, ikasleentzat.
d) Ehuneko 10, administrazio eta zerbitzuetako langileentzat.
2. Aurreko ehunekoak mantendu egingo dira, arlo bakoitzean ematen diren botoen kopurua kontuan hartu gabe.
3. Arlo bakoitzaren haztatze koefizientea honela aterako da: arloari dagokion ehunekoa zati arloan ematen diren boto baliodun guztien kopurua. Lau hamarrenekin doituko da.
4. Hautagai bakoitzari arlo bakoitzean dagozkion boto haztatuen kopurua honela kalkulatuko da: hautagaiak lortu duen boto-kopurua bider arloko haztatzeko koefizientea. Hautagai batek arlo bakoitzean lortutako botoen baturak zehaztuko du dagozkion boto haztatuen guztirako kopurua.
43. artikulua
1. Lehenengo aldian, errektore izendatuko dute hautagaitzei proportzioz emandako boto baliodunen erdia baino gehiago lortzen duen hautagaia, aurreko artikuluan aurreikusitako haztapenak aplikatu ondoren.
2. Lehen aldiaren emaitza iragarki-oholean eta Unibertsitatearen web-orrialdean aldarrikatuko eta argitaratuko da. Haren aurka zilegi izango da erreklamazioa egitea, Hauteskunde Batzorde Nagusiaren aurrean, argitaratu eta bi eguneko epean.
3. Gehienez ere bi eguneko epean, erreklamazioak aurkezteko epea bukatzen denetik kontatzen hasita, Hauteskunde Batzorde Nagusiak erreklamazioak ebatziko ditu, eta lehen aldiko emaitzaren behin betiko aldarrikapena egingo du.
Hautagaietan inork ez badu gehiengoa erdiesten, bigarren bozketari ekingo zaio, eta horretan botoen proportzio handiena izandako lehen bi hautagaiek bakarrik hartuko dute parte, aipatu haztapenak kontuan harturik:
Bigarren aldi honetan lehen aldiko hauteskunde mahai berberak eratuko dira, eta kide berek osatuko dituzte.
4. Hautagaitza bakarra baldin bada, bozketa bakarra egingo da.
44. artikulua
1. Bigarren aldian botoen proportzio handien eskuratu duen hautagaiaren behin-behineko aldarrikapena egingo da, kontuan hartuz lehen aldiko haztapen berak. Bigarren aldi honetan berdinketa gertatzen bada, Nafarroako Unibertsitate Publikoan antzinatasun handiena duen hautagaia hautatuko da, eta honetan ere berdinketarik bada, adinez nagusiagoa dena.
2. Hautagai hautetsiaren behin-behineko aldarrikapenaren hurrengo bi egunetako epean erreklamazioak aurkeztu ahal izango dira Hauteskunde Batzorde Nagusiaren aurrean. Batzorde horrek erreklamazioak ebatzi eta hautagai hautetsiaren behin betiko aldarrikapena egin beharko du, gehienez ere hurrengo bi egunetan.
45. artikulua
1. Hauteskunde Batzorde Nagusiak hautagaiei, hauek eskatzen dutenean, hauteskunde erroldaren kopia, boto-txartel eta gutun-azal nahikorik emango dizkie, Batzordeak zehaztuko duen epearen barruan.
Unibertsitateko kudeatzailetzak hautagaiei hauteskunde kanpaina egiteko beharrezkoak diren lokalak utziko dizkie, eta, halaber, toki bat Unibertsitatearen webgunean, posta elektronikoko kontu bat eta egokitzat jotzen den gainerako edozein baliabide.
2. Hauteskunde kanpainaren finantzaketa Unibertsitatearen aurrekontuan eratzen den kontu-sailaren menpe egongo da, eta hautagaiei berdintasunez banatuko zaie. Esleitutako zenbatekoa, bakar bakarrik hautagaiaren eta haren programaren promozio eta komunikaziorako erabiliko da, eta osorik justifikatu beharko da. Horretarako, dagozkion fakturak aurkeztuko dira Unibertsitateko Kudeatzailetzan, hilabeteko epean, azken bozketatik hasita.
II. KAPITULUA. Dekanoak eta ikastegiko zuzendariak hautatzeko hauteskundeak
46. artikulua
Dekanoa edo zuzendaria ondoko irakasle hauen artetik hautatuko da: Unibertsitatearekin lotura iraunkorra dutenak, lotura hori ematen dioten edozein kategoriatan gutxienez ere bost urteko antzinatasuna dutenak eta ikastegian irakaskuntza ematen dutenak. Hautesle bakoitzak hautagai bakar bati emango dio botoa.
47. artikulua
1. Dekanoa edo ikastegiko zuzendaria hautatzeko hauteskundeetako botoen haztapena, arloen arabera, honela egingo da:
a) Ehuneko 59, Unibertsitatearekin lotura iraunkorra izan eta ikastegian irakaskuntza ematen duten irakasleentzat.
b) Ehuneko 21, ikastegian irakaskuntza ematen duten gainerako irakasle eta ikertzaileentzat.
c) Ehuneko 20, ikastegian ematen diren titulazioetan matrikulatuta dauden ikasleentzat.
2. Aurreko ehunekoak mantendu egingo dira, arlo bakoitzean ematen diren botoen kopurua kontuan hartu gabe.
3. Arlo bakoitzaren haztatze koefizientea honela aterako da: arloari dagokion ehunekoa zati arloan ematen diren boto baliodun guztien kopurua. Lau hamarrenekin doituko da.
4. Hautagai bakoitzari arlo bakoitzean dagozkion boto haztatuen kopurua honela kalkulatuko da: hautagaiak lortu duen boto-kopurua bider arloko haztatzeko koefizientea. Hautagai batek arlo bakoitzean lortutako botoen baturak zehaztuko du dagozkion boto haztatuen guztirako kopurua.
48. artikulua
1. Lehenengo aldian, dekano edo zuzendari izendatuko dute hautagaitzei proportzioz emandako boto baliodunen erdia baino gehiago lortzen duen hautagaia, aurreko artikuluan aurreikusitako haztapenak aplikatu ondoren.
2. Lehen aldiaren emaitza iragarki-oholean eta Unibertsitatearen web-orrialdean aldarrikatuko eta argitaratuko da. Haren aurka zilegi izango da erreklamazioa egitea, Tokiko Hauteskunde Batzordearen aurrean, argitaratu eta bi eguneko epean.
3. Gehienez ere bi eguneko epean, erreklamazioak aurkezteko epea bukatzen denetik kontatzen hasita, Tokiko Hauteskunde Batzordeak erreklamazioak ebatziko ditu, eta lehen aldiko emaitzaren behin betiko aldarrikapena egingo du.
4. Tokiko Hauteskunde Batzordearen lehen aldiko behin betiko aldarrikapenaren aurka, hurrengo bi eguneko epean errekurtsoa jartzen ahal da Unibertsitateko Hauteskunde Batzorde Nagusiaren aurrean, zeinak beste bi eguneko epea baitu, gehienez ere, errekurtsoa ebazteko. Epe hori bukatu delarik eta berariaz ebazpenik ematen ez bada, aurkatzea ez dela aintzat hartu ulertuko da.
5. Hautagaietan inork ez badu gehiengoa erdiesten, bigarren bozketari ekingo zaio, eta horretan lehenengo bozketan botoen proportzio gehien izandakoek bakarrik hartuko dute parte, aipatu haztapenak kontuan harturik. Bigarren bozketa egin ahal izateko, Tokiko Hauteskunde Batzordeak honako hauek zehaztuko eta argitaratuko ditu: eguna, ordutegia, tokia eta bigarren bozketa egiteko beharrezkoak diren gainerako guztiak.
Bigarren aldi honetan lehen aldiko hauteskunde mahai berberak eratuko dira, eta kide berek osatuko dituzte.
49. artikulua
1. Bigarren aldian botoen proportzio handien eskuratu duen hautagaiaren behin-behineko aldarrikapena egingo da, kontuan hartuz lehen aldiko haztapen berak. Bigarren aldi honetan berdinketa gertatzen bada, Nafarroako Unibertsitate Publikoan antzinatasun handiena duen hautagaia hautatuko da, eta honetan ere berdinketarik bada, adinez nagusiagoa dena.
2. Hautagai hautetsiaren behin-behineko aldarrikapenaren hurrengo bi egunetako epean erreklamazioak aurkeztu ahal izango dira Tokiko Hauteskunde Batzordearen aurrean. Batzorde horrek erreklamazioak ebatzi eta hautagai hautetsiaren behin betiko aldarrikapena egin beharko du, gehienez ere hurrengo bi egunetan.
3. Gehienez ere bi eguneko epean, erreklamazioak aurkezteko epea bukatzen denetik kontatzen hasita, Tokiko Hauteskunde Batzordeak erreklamazioak ebatziko ditu, eta hautagai hautetsiaren behin betiko aldarrikapena egingo du.
4. Tokiko Hauteskunde Batzordearen hautetsiaren behin betiko aldarrikapenaren aurka, hurrengo bi eguneko epean errekurtsoa jartzen ahal da Unibertsitateko Hauteskunde Batzorde Nagusiaren aurrean, zeinak beste bi eguneko epea baitu errekurtsoa ebazteko. Epe hori bukatu delarik eta berariaz ebazpenik ematen ez bada, aurkatzea ez dela aintzat hartu ulertuko da.
Errekurtso horren ezespen adieraziak edo presuntziozkoak administrazio bidea bukatzen du, eta Administrazioarekiko Auzien jurisdikzioaren aurrean aurkatu ahal da zuzenean.
5. Hautagaitza bakarra baldin bada, lehenengo txanda besterik ez da egingo.
6. Hautagairik ez badago, Estatutuetako 44.6 artikuluak ezartzen duenari jarraituko zaio.
III. KAPITULUA. Saileko zuzendariak hautatzeko hauteskundeak
50. artikulua
1. Ikastegiko zuzendaria Saileko Kontseiluak hautatuko du, Unibertsitatearekin lotura iraunkorra izan eta kontseilukideak diren irakasle doktoreen artetik.
2. Arautegi honetako Lehen Tituluak xedatzen duenaren arabera egingo dira deialdia, berau onestea eta argitaratzea, eskatutako baldintzak eta behin behinean aldarrikatzea, salbu eta erroldei dagokiena, ez baita onespenik behar, kontseilukide guztiek lehen saioan onesten dutelako.
51. artikulua
1. Behin betiko hautagaitzak aldarrikatu eta gero,Tokiko Hauteskunde Batzordeko buruak berauen berri emango dio, berehala, saileko zuzendariari, zeinak, hiru eguneko epean Saileko Kontseilurako deialdia egingo baitu, hautaketa eguneko aztergaien zerrendan dagoela. Deialdia egin denetik bost egun baliodun pasa eta gero, hautaketa egingo da. Bozketa isilpekoa izango da.
2. Saileko Zuzendaria hautagaia bada, ez du parte hartuko Saileko Tokiko Hauteskunde Batzordean, eta Saileko Kontseiluaren saioaren burutza bere ordezkoa izan behar denari utziko dio, dagokion sailaren Ikastegi eta Sailetako Esparru Arautegiak eta Saileko Barne Eraentzako Arautegiak xedatzen dutenari jarraituz.
3. Hautagai bakarra baldin badago, lehen bozketan izango da hautatua baldin eta aldeko botoak Saileko kontseilukideen erdiak baino gehiago badira, eta bigarren bozketan aldeko botoak kontrako botoak baino gehiago badira.
4. Hainbat hautagai badago, horietako bateon batek Kontseiluko kideen gehiengo absolutua lortzen badu, huraxe hautatuko dute zuzendari. Inork lortzen ez badu, hurrenez hurreneko bozketak egingo dira botorik gehien lortu duten bi hautagaien artean, eta gehiengo soila lortzen duena hautatua izango da.
5. Hautagairik ez badago, Estatutuetako 46,4 artikuluak ezartzen duenari jarraituko zaio.
LAUGARREN TITULUA. BATZORDEAK
I. KAPITULUA. Unibertsitateko ikerketa batzorderako hauteskundeak
52. artikulua
1. Ikerketa Batzordeko kide izateko hauteskundeak jakintza-arloen taldeen arabera egingo dira, Gobernu Kontseiluak ezartzen duenarekin bat etorriz, Unibertsitatearen Estatutuetako 68. artikuluak ezartzen duena aplikatuz.
2. Talde bakoitzean hautesleak izango dira lotura iraunkorra duten irakasle doktoreak, dagokion taldearekin duten afinitateagatik.
3. Talde bakoitzean hautagai izango dira lotura iraunkorra duten irakasle doktoreak, haien afinitateagatik taldeari badagozkio eta, gutxienez ikerkuntza jardueraren aldeko bi ebaluazio lortu eta egiaztatzen badituzte.
4. Ikerketa Batzordeko kideen hautaketa gehiengo soilaren bidez egingo da, talde bakoitzaren barruan botorik gehien biltzen duen hautagaia hautatuko delarik.
5. Talde bakoitzean, hautatu beharreko ordezkariak hiru baino gutxiago badira, zenbat ordezkari hautatu behar den, beste hainbeste hautagairi eman ahalko dio botoa hautesle bakoitzak. Hautatu behar diren ordezkariak hiru baino gehiago badira, Estatutuetako 49,2 artikuluak xedatzen duenari jarraituko zaio.
6. Ikerketa Batzordeko kideak lau urteko eperako hautatuko dituzte. Bi urtez behin batzordekideen erdiak berrituko dira, haien barne eraentzako arautegiak zehazten duen eran.
Lehenengo Xedapen Gehigarria
Gobernu Kontseiluak Nafarroako Unibertsitate Publikoko Gizarte Kontseiluan edukiko dituen ordezkarien hautaketa Gizarte Kontseilua arautzen duen Foru Legearekin, Unibertsitatearen Estatutuekin eta Unibertsitateko Barne Eraentzako Arautegiarekin bat etorriz egingo da.
Gobernu Kontseiluaren Barne Eraentzako Arautegiak ezarriko du Gizarte Kontseiluko bere ordezkarien hutsuneak betetzeko eta ordezkapenak egiteko modua.
Bigarren Xedapen Gehigarria
Gobernu Kontseiluak Kalitate Batzordean edukiko dituen ordezkarien izendapena Estatutuetan eta bere Barne Erregimeneko Arautegian ezartzen denaren arabera egingo da.
Xedapen Iragankor Bakarra
Estatutuetako Bigarren Xedapen Iragankorra bis horrek xedatzen duenari jarraituz, gobernu eta ordezkaritzako organo kolegiatuak eta kide bakarrekoak, titularren agintaldia amaitzeagatik, erabat berritu behar diren bitartean, hautaketa prozesuak Unibertsitatearen Hauteskunde Arautegiak arautuko ditu. Arautegi hori Gobernu Kontseiluak onetsi zuen, 2003ko irailaren 19an hartutako erabakiaren bidez (134 zenbakidun NAOn argitaratu zen, 2003ko urriaren 20an).
Xedapen Indargabetzaile Bakarra
Arautegi honetan xedatutakoari aurka egiten dioten lerrun bereko edo gutxiagoko xedapen guztiak indargabeturik daude eta, bereziki, ondokoak:
-Unibertsitatearen Hauteskunde Arautegia, Gobernu Kontseiluak onetsi zuena, 2003ko irailaren 19an hartutako erabakiaren bidez (134 zenbakidun NAOn argitaratu zen, 2003ko urriaren 20an).
-Proiektuetarako kontratatutako langileen ordezkaritza, Gobernu Kontseiluak 2006ko irailaren 15ean hartu zuen erabakiaren bidez onetsi zuen arautegiaren 12.2 artikuluan aurreikusten dena (2006ko urriaren 23ko NAOn argitaratu zen, errektoreak 2006ko irailaren 22an hartu zuen 1133/2006 Ebazpenaren bidez).
Azken Xedapenetako Lehenengoa
Arautegi honek aurreikusten ez dituen gaietan, Administrazio Publikoen eta Guztiendako Administrazio Prozeduraren Erregimen Juridikoari buruzko Legea eta izaera orokorreko gainontzeko arauak izango dira osagarritzat aplikatzekoak.
Azken Xedapenetako Bigarrena
Arautegi honek Nafarroako Aldizkari Ofizialean argitaratu eta biharamunean hartuko du indarra.
