navarra.es

Castellano | Euskara | Français | English

Bilatzaile erabili!

665/2014 Ebazpena, abenduaren 15ekoa, Hezkuntzaren, Lanbide Heziketaren eta Unibertsitateen zuzendari nagusiak emana, Nafarroako Foru Komunitateko Hezkuntza Sistemako Lanbide Heziketaren irakaskuntzen Oinarrizko Lanbide Heziketako ikasleen ...

665/2014 EBAZPENA, ABENDUAREN 15EKOA, HEZKUNTZAREN, LANBIDE HEZIKETAREN ETA UNIBERTSITATEEN ZUZENDARI NAGUSIAK EMANA, NAFARROAKO FORU KOMUNITATEKO HEZKUNTZA SISTEMAKO LANBIDE HEZIKETAREN IRAKASKUNTZEN OINARRIZKO LANBIDE HEZIKETAKO IKASLEEN EBALUAZIOA, TITULAZIOA ETA EGIAZTAPEN AKADEMIKOA ARAUTZEN DITUENA

(2015eko 2. NAOn argitaratutako testua, urtarrilaren 5ean. Akats zuzenketa, 2015eko otsailaren 12koa)

Atarikoa

Hezkuntzaren Kalitatea Hobetzeko abenduaren 9ko 8/2013 Lege Organikoak, artikulu bakarraren 3. idatz-zatian, 10. idatz-zatia gehitzen dio Hezkuntzari buruzko maiatzaren 3ko 2/2006 Lege Organikoaren 3. artikuluari, eta Oinarrizko Lanbide Heziketako zikloak sortzen ditu hezkuntza sistemako Lanbide Heziketan. Orobat, abenduaren 9ko 8/2013 Lege Organikoak, azken xedapenetako bosgarrenean, ziklo horiek ezartzeko egutegia ezartzen du. Horren arabera, Oinarrizko Lanbide Heziketako zikloetako lehen ikasmaila 2014-2015 ikasturtean ezarriko da.

Aurrekoa betetzeko, presako araubidea egin zen Oinarrizko Lanbide Heziketako irakaskuntzei dagokionez, hezkuntza sistemako Lanbide Heziketako irakaskuntzen araubidea baino lehen. Hezkuntza sistemako Lanbide Heziketako irakaskuntzen Oinarrizko Lanbide Heziketako berariazko alderdiak arautzen dituen otsailaren 28ko 127/2014 Errege Dekretuak, VI. kapituluan, determinazioak ezartzen ditu Oinarrizko Lanbide Heziketako zikloetan aritzen diren ikasleen ebaluazioari, baliozkotzeei eta salbuespenei buruz.

2014-2015 ikasturtean Hezkuntza Sistemako Lanbide Heziketako irakaskuntzen Oinarrizko Lanbide Heziketako zikloak ezarri behar direnez, Hezkuntzaren Kalitatea Hobetzeari buruzko abenduaren 9ko 8/2013 Lege Organikoa ezartzeko egutegiaren ondorioz, irakaskuntza horiei buruzko araudi orokorra prestatu aurretik, Hezkuntzako kontseilariaren maiatzaren 23ko 50/2014 Foru Aginduaren bidez, Hezkuntza Sistemako Lanbide Heziketako irakaskuntzen Oinarrizko Lanbide Heziketako zenbait puntu arautu dira, baita Nafarroako Foru Komunitatean ikasleak onartzeko prozeduraren oinarriak ere.

Oinarrizko Lanbide Heziketako zikloak, Nafarroan, dagokien foru dekretuaren bidez arautuko dira. Horretarako, Hezkuntzako kontseilariaren martxoaren 25eko 23/2014 Foru Aginduaren bidez, prozedura hasi da Nafarroako Foru Komunitatean Hezkuntza Sistemako Lanbide Heziketako irakaskuntzen Oinarrizko Lanbide Heziketaren antolamendua eta garapena arautzeko foru dekretuaren proiektua prestatzeko, eta Lanbide Heziketaren Zerbitzua izendatu da espedientea prestatu eta tramitatzeko organo arduradun. Espediente hori barneko hausnarketa fasean dago; hortaz, baliteke ebaluazioari buruzko foru aginduaren garapena, ondotik egin beharrekoa baita, argitaratuta ez egotea 2014-2015 ikasturte honetan Oinarrizko Lanbide Heziketako zikloetan lehendabiziko ebaluazioak egiteko moduan.

Aldi berean, Hezkuntza Sistemako Lanbide Heziketako irakaskuntzen Oinarrizko Lanbide Heziketaren antolamendua eta garapena arautzen dituen foru dekretua eta Oinarrizko Lanbide Heziketako ikasleen ebaluazioari, titulazioari eta egiaztapen akademikoari buruzko ondoko foru agindua onesten diren bitartean, bidezkoa da modu iragankorrean arautzea 2014-2015 ikasturterako horren ebaluazioari buruzko zenbait puntu, Nafarroako Foru Komunitatearen esparruan.

Lanbide Heziketaren Zerbitzuko zuzendariak aldeko txostena eman du, onets dadin Nafarroako Foru Komunitatean Hezkuntza Sistemako Lanbide Heziketako irakaskuntzen Oinarrizko Lanbide Heziketan aritzen diren ikasleen ebaluazio, titulazio eta egiaztapen akademikoaren prozesua modu iragankorrean arautzeko helburua duen ebazpen hau.

Hori horrela, Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1. artikuluko d) idatz-zatiak ematen dizkidan ahalmenak erabiliz, ebatzi dut:

1. Nafarroako Foru Komunitateko Hezkuntza Sistemako Lanbide Heziketaren irakaskuntzen Oinarrizko Lanbide Heziketako ikasleen ebaluazioa, titulazioa eta egiaztapen akademikoa arautzea, 1. eranskineko oinarrietan ezarritakoaren arabera.

2. Ebazpen hau eta eranskinak Nafarroako Aldizkari Ofizialari jakinaraztea, argitara daitezen.

3. Ebazpen hau eta eranskinak Lanbide Heziketaren Zerbitzura, Hezkuntzako Ikuskapen Zerbitzura, Antolamenduaren eta Aukera Berdintasunaren Zerbitzura, Lanbide Heziketaren Plangintza, Antolamendu eta Garapenerako Atalera, Eskolatze Bulegora eta Argibide eta Agiri Bulegora igortzea, behar diren ondorioak izan ditzaten.

4. Ebazpen honen eta eranskinen aurka gora jotzeko errekurtsoa jar daiteke, Hezkuntzako kontseilariari zuzendua, Nafarroako Aldizkari Ofizialean argitaratu eta biharamunetik hilabeteko epean.

1. ERANSKINA. Oinarriak

Xedea eta aplikazio eremua

1. Xedea.

Ebazpen honek helburu du Nafarroako Foru Komunitateko Hezkuntza Sistemako Lanbide Heziketaren irakaskuntzen Oinarrizko Lanbide Heziketako ikasleen ebaluazioa, titulazioa eta egiaztapen akademikoa arautzea.

2. Aplikazio eremua.

Ebazpen hau aplikatuko da Nafarroako Foru Komunitateko Hezkuntza Sistemako Lanbide Heziketaren irakaskuntzen Oinarrizko Lanbide Heziketako zikloak irakasteko baimena duten ikastetxe publikoetan, ikastetxe itunduetan eta irabazi asmorik gabeko erakundeetan.

Oinarrizko Lanbide Heziketaren ebaluazioaren ezaugarri orokorrak

3. Ebaluazioaren helburua.

1. Hezkuntza Sistemako Lanbide Heziketaren irakaskuntzen Oinarrizko Lanbide Heziketaren ebaluazioak helburu du ikasleek Oinarrizko Lanbide Heziketako zikloaren gaitasun orokorra, bere gaitasun profesionalak, pertsonalak eta sozialak eta lanbide kualifikazioak eta, hala balegokio, kasuan kasuko oinarrizko lanbide tituluan sartutako gaitasun unitateak bereganatzea. Halaber, helburu du ikasleen ikaskuntza baloratzea, kontuan izanik bizitza osoan zehar modu iraunkorrean ikasteko gaitasunak eskuratzea, baita zeharkako gaitasunak ere, hori guztia Europako Batzordeak zehaztutako eta hezkuntzako etapetako curriculumetan sartutako funtsezko gaitasunen barnean.

2. Ikaskuntza prozesuaren funtsezko elementuetako bat da ebaluazioa, bai irakasle eta ikasleentzat bai Hezkuntza Sistemako Lanbide Heziketako irakaskuntzen Oinarrizko Lanbide Heziketarako, ikaskuntzen kalitatearen erreferentzia baita eta horiek errazten baititu.

4. Ebaluazioaren alderdi orokorrak.

1. Oinarrizko Lanbide Heziketako zikloak ebaluatzeko, funtsezko gaitasunen garapena hartuko da kontuan, lanbide moduluen arabera, bai Lanbide Kualifikazioen Katalogo Nazionaleko gaitasun unitateei lotutako moduluen kasuan, bai irakaskuntza iraunkorreko gaitasunei lotutako moduluen kasuan. Prestakuntza unitateren bat ezarririk duten lanbide moduluetan, moduluaren ebaluazioak bat eginen du hari lotutako prestakuntza unitateen ebaluazioarekin.

2. Ikasleen ikaskuntza prozesua ebaluatzeko, kontuan hartuko dira funtsezko gaitasunak garatzeari buruzko oharrak nahiz haietako bakoitza ebaluatzeko irizpideei eta ikaskuntza emaitzei buruzkoak, betiere aintzat hartuta eskuratu direla kasuan kasuko gaitasun profesionalak, pertsonalak eta sozialak, ikaskuntza iraunkorraren arloko gaitasunak eta zeharkako gaitasunak, Hezkuntza Sistemako Lanbide Heziketako irakaskuntzen Oinarrizko Lanbide Heziketako berariazko alderdiak arautzen dituen otsailaren 28ko 127/2014 Errege Dekretuaren 11. artikuluan zehazten direnak.

3. Ikasleen ebaluazioa etengabea eta integratzailea izanen da Oinarrizko Lanbide Heziketan; funtsean prestakuntza izaera izanen du, ikasleen prestakuntza prozesu osoan eginen da eta ikaskuntzak bideratzeko modukoa izanen da. Ebaluazioa integratzailea izanen da; izan ere, funtsezko gaitasunak, Oinarrizko Lanbide Heziketako zikloaren helburu orokorrak hartu behar ditu kontuan, moduluen ikaskuntza emaitzetan adierazitakoaren bidez.

4. Ebaluazioaren prestakuntzarako izaera bermatzeko, aniztasunari arreta egiteko neurriak hartzeko bidea emanen da, otsailaren 28ko 127/2014 Errege Dekretuaren 13. artikuluan adierazi bezala, ikasleen hezkuntza premiei heltzeko. Ikastetxeek, eskura duten baliabideen arabera, ikasleen ezaugarrietara egokitutako irakaskuntzak antolatzen ahal dituzte, batik bat Komunikazioa eta gizartea I eta II lanbide moduluetako hizkuntza gaitasunak eskuratzeari buruzkoak.

5. Halaber, bermatua egon dadin ikasleen dedikazioa, esfortzua eta errendimendu akademikoak objektibotasun osoko irizpideen arabera ebaluatzeko eskubidea, irakasleek ikasleei jakinaraziko dizkiete, ikasturte bakoitzaren hasieran, funtsezko gaitasunak eskuratu direla egiaztatzeko aplikatuko diren ebaluazio irizpideak eta curriculumean ezarritako ikaskuntzak, baita ikaskuntzen helburuak, edukiak eta emaitzak ere, lanbide modulu desberdinetan ebaluazio positiboa eskuratzeko eska daitezkeenak, direla aurtengo kurtsokoak, direla aurreko kurtsoan gainditu gabe dauden modulukoak, halakorik balego. Ikasle adingabeen kasuan, informazio hori gurasoei edo legezko arduradunei ere jakinaraziko zaie, ikasturtearen hasierako taldeko bileran edo ikastetxeak erabakitzen dituen bideak erabiliz.

5. Etengabeko ebaluazioa.

1. Oinarrizko Lanbide Heziketako zikloen ebaluazioa etengabea izanen da eta ikaskuntza prozesu osoan eginen da, ikasleen hasierako ebaluazioarekin hasiko da, prozesu osoan jarraituko du ebaluazio partzialekin, funtsezko gaitasunen garapenari buruzko oharrak dituztela, eta azken ebaluazioarekin amaituko da.

2. Oinarrizko Lanbide Heziketako zikloetan aritzen diren ikasleei ezarritako ebaluazio sistema etengabeko ebaluazioa da. Etengabeko ebaluazioak eskatzen du moduluetarako programatutako jardueretara erregulartasunez bertaratzea ikasleak. Orokorrean, modulu bakoitzaren iraupen osoaren ehuneko laurogeita bost egin beharko dute gutxienez. Salbuespen gisa, ikastetxeko zuzendaritzak, irakasle-taldeak egindako proposamen arrazoituaren bidez, jardueretara bertaratzeko portzentaje txikiagoa ezartzen ahalko du.

3. Zikloko kurtso bakoitzean zehar, modu jarraituan, irakasleek informazioa bilduko dute ikasleen ikaskuntza prozesuari buruz, lanbide modulu desberdinetarako programatutako jardueren behaketaz eta balorazio sistematikoaz, helburua izanik prozesu horren jarraipena erraztea kurtso bakoitzean eta prestakuntza ziklo osoan. Horretarako, nahitaezkoa izanen da ikasleak bertaratzea aurreko atalean ezarritako moduan programatzen diren jardueretara. Hori horrela, ikasle bat klaseetara joaten ez bada, ezin ditu proposatutako prestakuntza jarduerak egin, eta horiek ezin dira ez behatu ez baloratu.

Alabaina, klaseetara joateko betebeharra betetzen ez duten ikasleek ez dute galduko klasera joateko eskubidea, ez eta prestakuntzarako edo ebaluaziorako eskubidea ere. Horrenbestez, ikasleek prestakuntza jasotzeko eta behar bezala ebaluatua izateko duten eskubidearen alde egin beharrez, ebaluazio tresnak eta sistema moldatuko dira, ikasleen egoera pertsonalera egokitzeko. Horixe da etengabeko ebaluazioaren zentzua, bai eta etengabeko ebaluazio hori izaterik ez duten ikasleendako beste ebaluazio sistema batzuk ezartzearena ere.

Etengabeko ebaluazioa egin ezin denean, hura jasota geldituko da banakako ebaluazio txostenean eta ekarriko du ikasleek egin ezin izatea irakasleen taldearen iritziz beren buruarentzat, ikastaldeko gainerakoentzat edo ikastetxeko instalazioetarako arriskugarriak izan daitezkeen jarduera praktikoak.

4. Ikastetxeko zuzendaritzak hura eta horren ondorioak jakinaraziko dizkio egoera horretan dagoen ikasleari eta, adingabea bada, haren legezko ordezkariei.

Etengabeko ebaluazioaren prozesuan, ikaslearen aurrerapena egokia ez denean, neurri zuzentzaileak ezarriko dira, ikaskuntza prozesua ikaslearen ezaugarri pertsonalen eta hezkuntza premien arabera egokitzeko.

6. Programazio didaktikoak eta ebaluazioa.

1. Programazio didaktikoetan, arreta berezia emanen zaie ebaluazio prozesua planifikatzeko irizpideei eta horretan erabakiak hartzeari, bereziki honako hauei:

a) Ikasleen ikaskuntza prozesua ebaluatzeko prozedurei eta ebaluazio tresna orokorrak ebaluazio irizpideen arabera moldatzeari.

b) Gainditu gabeko lanbide moduluak errekuperatzeko jardueren plangintzari eta, espresuki, ikasleek beren kabuz egin ditzaketen jardueren plangintzari.

c) Etengabeko ebaluazioa izaterik ez duten ikasleentzako ebaluazio sistemen eta tresnen garapenari.

2. Zenbait lanbide modulu, zio pedagogikoak eta antolamendukoak direla eta, prestakuntza unitate desberdinetan egon daitezke antolaturik. Prestakuntza unitate bakoitzak bere programazio didaktikoa izanen du, eta kasuan kasuko lanbide modulua osatzen duten beste prestakuntza unitateekin koherentzia gordeko du.

3. Halaber, irakasle batek baino gehiagok ematen ahal ditu zenbait lanbide modulu. Modulu horien programazio didaktikoan irizpideak ezarriko dira horien azken kalifikazioa egiteko.

7. Ebaluazioaren egokitzapena.

1. Ebaluazio prozesuak ikasleen behar metodologikoei eta bilakaerari egokituko zaizkie, batez ere desgaitasunen bat dutenentzat, horientzat irisgarritasun neurriak ezarriko baitira, inor baztertzen ez duen parte-hartzea bermatua izan dadin.

2. Halaber, Hezkuntzako kontseilariak ekainaren 18an eman 65/2012 Foru Aginduan Lanbide Heziketako irakaskuntzetara ezarritakoari jarraituko zaio. Haren bidez, ikastearen nahasmenduengatik eta arreta faltagatiko nahasmenduarengatik (hiperaktibitatearekin) hezkuntza premia bereziak dituzten ikasleei eman beharreko erantzuna arautzen da Haur Hezkuntzan, Lehen Hezkuntzan, Derrigorrezko Bigarren Hezkuntzan, Batxilergoan eta Lanbide Heziketan, Nafarroako Foru Komunitatean.

8. Deialdi arruntak eta azken ebaluazioaren aparteko deialdia.

1. Matrikula ikasturte bakoitzerako eginen da eta, horrekin batera, ikasleek eskubidea izanen dute azken ebaluazioaren bi deialdi arrunt izateko ikasturte bakoitzean, matrikulatuta dauden moduluetan, Lantokietako prestakuntzako moduluan izan ezik, non eskubidea izanen baita gehienez ere bi deialdi izateko irakaskuntza horietan matrikulatzen den ikasturte guztietan. Azken ebaluazioko saioetan garatuko dira deialdi horiek.

2. Salbuespen gisa, modulu batean edo batzuetan azken ebaluazioaren deialdi arrunt guztiak agortu dituzten ikasleek, ikasketak normaltasunez garatzea galarazten dien salbuespeneko egoera batean badaude, ikastetxeko zuzendariari eska diezaiokete azken ebaluazioaren aparteko deialdia egin diezaieten. Zuzendariak eskaera hori ebatzi eta interesdunei jakinaraziko die. Adingabeen kasuan, legezko ordezkariei ere jakinarazi beharko zaie.

Ebaluazio-prozesua

9. Irakasle taldea.

1. Oinarrizko Lanbide Heziketako zikloko irakasle taldea izanen da ebaluazio prozesuaren arduraduna, hau da, talde bateko ikasleei eskola ematen dieten irakasle guztien multzoa.

2. Oinarrizko Lanbide Heziketako prestakuntza zikloa osatzen duten lanbide modulu guztiak kontuan hartuta, modulu horiek ematen dituen irakasle taldeak ebaluatuko du ikasleen ikaskuntza, irakasle tutoreak zuzenduta eta ikasketa burutzak koordinatuta. Ebaluazio saioetan zehaztu eta sistematizatuko da.

10. Ebaluazio saioak.

1. Ebaluazio saiotzat joko dira irakasleek eta, halakorik balego, moduluetako profesional espezialista batek edo batzuek emandako informazioa egiaztatzeko egiten diren bilerak. Ebaluazio saio horietan baloratuko da ikasleek nolako aurrerapena egin duten funtsezko gaitasunak, tituluko gaitasun orokorra, gaitasun profesionalak, pertsonalak eta sozialak, irakaskuntza iraunkorrerako gaitasunak eta zeharkako gaitasunak lortzeari dagokionez eta lanbide moduluetan aurreikusitako irakaskuntza emaitzak lortzeari dagokionez.

2. Bidezko diren ebaluazio saioetan, irakasle taldeak ikasleak mailaz igotzeari, haien titulazioari eta egiaztapen akademikoari buruzko erabakiak hartuko ditu.

3. Ebaluazio saioen emaitza ebazpen honen 24. oinarrian zehaztutako ebaluazio agirietan jasoko da, eta ikasleei eta, hala denean, gurasoei edo legezko ordezkariei horren berri eman beharko zaie.

4. Ebaluazio prozesua hiru saio motatan antolatuko da: hasierakoa, partziala eta azkena.

11. Hasierako ebaluazio saioa.

1. Oinarrizko Lanbide Heziketako zikloaren hasieran, nahitaez, irakasle taldeak ikasleen hasierako ebaluazioaren saio bat eginen du, tutorearen ardurapean, ikaskuntza prozesua ikasleen ezaugarrietara eta ezagutzetara egokitu dadin baliogarria izanen den informazioa biltzeko asmoz.

2. Hasierako ebaluazioan kontuan hartu beharko da ikasleen jatorrizko ikastetxean erabilitako informazioa Oinarrizko Lanbide Heziketan onartua izateko prozesuan: irakasleen taldearen txosten-proposamena, aholku orientatzailea eta gurasoak edo legezko tutoreak informatzeko agiria, bai eta Derrigorrezko Bigarren Hezkuntzako ikasketen historiala ere.

3. Ikasturte hasieran, moduluetako irakasleek hasierako ebaluazioa eginen diete bere eskumeneko ikasleei. Irakasleen taldeak, ikastetxeen autonomia pedagogikoa eta antolakuntzakoa baliatuz, erabaki dezake informazio hori osatzea ikasturteko lehendabiziko hilabetean irakaskuntzarekin lortutako datuez. Hasierako ebaluazio horrek ez du inola ere ikasleen kalifikazioa ekarriko, eta horren emaitza hasierako ebaluazioaren txostenean jasoko da.

12. Ebaluazio partzialeko saioa.

1. Ebaluazio partzialeko saioak Oinarrizko Lanbide Heziketako zikloko kurtso bakoitzean eta talde bakoitzerako eginen dira. Horietan, irakasleek ikasleen ikaskuntza prozesuari buruzko informazioa jasoko dute etengabe, sistematikoki behatuz, lanak baloratuz, berariazko probak eginez eta beste prozedura batzuen bidez, prozesu horren jarraitutasuna errazteko asmoz.

2. Ebaluazio partzialeko saioen helburua izanen da bai ikasleen ikaskuntza prozesua eta aurrerapen akademikoa aztertzea, bai taldearen azterketa orokorra egitea eta ikasleen aurrerapen egokiari laguntzen dioten erabakiak hartzea.

3. Irakasle tutoreak zuzendutako ebaluazio saio horietan irakasle taldeak ikasleen kalifikazioa erabakiko du modulu eta, hala denean, prestakuntza unitate bakoitzeko, betiere etengabeko ebaluazioaren ikuspegia aintzat hartuta. Ikasleen ikaskuntza prozesuari buruzko oharrak eransten ahalko dira. Garrantzi berezia izanen dute jarrerari buruzko gaitasun alderdiek, garatutako lan eta elkarbizitza ohiturekin ikusteko dutenek. Irakasleen taldeak erabakiko du, bere autonomia pedagogikoa baliatuz, alderdi horiei dagokien kalifikazioaren portzentajea. Inola ere ezin izanen da %50etik gorakoa izan.

4. Ebaluazio partzialeko saioa amaitu ondoren, tutoreak ikasleei eta, hala badagokio, gurasoei edo legezko ordezkariei haien errendimenduaren berri emanen die, ebazpen honen 3. eranskinean zehaztutako ebaluazio partzialaren txostenaren bidez.

5. Ebaluazio partzialeko saioen kopurua ondokoa izanen da:

a) LPrik ez dagoen kurtsoetan edo hura kurtso osoan barna garatzen denetan, ebaluazio partzialeko hiru saio eginen dira modulu bakoitzean, eta horietako azkena kasuan kasuko azken ebaluazioaren saioan izanen da.

b) LPa duten kurtsoetan, kurtsoaren azken hiruhilekoan egiten bada, ebaluazio partzialeko hiru saio eginen dira modulu bakoitzean, eta haietako azkena ikastetxeko moduluen azken ebaluazioaren saioan izanen da, Lantokietako prestakuntzako modulua egin baino lehenago.

13. Azken ebaluazioko saioa.

1. Azken ebaluazioko saioak, moduluen azken ebaluazioko saioen kasuan, modulu bakoitzaren prestakuntza aldia bukatutakoan eginen dira, eta, Oinarrizko Lanbide Heziketako prestakuntza zikloaren azken ebaluazioko saioaren kasuan, hori osatzen duten modulu guztiak amaitutakoan.

2. Moduluen azken ebaluazioko saioa horien prestakuntza aldia amaitutakoan eginen da, eta kurtsoaren ebaluazio prozesuaren balorazio-sintesitzat joko da. Horretan, irakasleen taldeak, tutorearen gidaritzapean, baloratuko du noraino eskuratu diren funtsezko gaitasunak, ikaskuntzaren emaitzak eta lanbide moduluen helburuak. Halaber, modulu bakoitzeko ikasleen balorazioa erabakiko du irakasleen taldeak. Bestalde, baloratuko da noraino bete diren Lantokietako prestakuntzako moduluaren irakaskuntzaren emaitzak eta helburuak, eta hala denean, prestakuntza unitateenak ere bai. Kalifikazioa “Gai” edo “Ez gai” izanen da. Lantokietako prestakuntzako modulua ebaluatzeko orduan, ikaslearen prestakuntzaren arduradunak lagunduko du, zein kasuan kasuko lan-zentroak bertako egonaldirako izendatuko baitu. Horrenbestez, azken ebaluazio horrek oinarri izanen ditu, halakorik denean, hura osatzen duten prestakuntza unitateak, ikastetxeak izendatutako tutore-irakasleak egindako jarraipena, eta lan zentroko prestakuntzaren arduradunak egindako txostena.

3. Lehen kurtsoan bukatutako lanbide moduluetarako. Azken ebaluazioko saioan irakasleen taldeak, aurreko paragrafoan adierazitakoaz gain, ikasleak bigarren mailara igarotzea baloratuko du, ebazpen honen 18. oinarrian ezarritako irizpideei helduz.

Lantokietako prestakuntzako modulua hasi baino lehenago, bigarrenean bukatutako lanbide moduluetarako. Aurreko paragrafoan adierazitakoaz gain, azken ebaluazioko saioan, irakasleen taldeak baloratuko du, halakorik denean, Lantokietako prestakuntzako moduluan sartzerik baden ala ez, ebazpen honen 20. oinarrian ezarritako irizpideei helduz.

4. Kurtsoa errepikatu behar duten ikasleen kasuan, irakasleen taldeak, halaber, errepikatzeko aukerari buruzko erabakia hartuko du, ebazpen honen 19. oinarrian ezarritako irizpideei helduz.

5. Oinarrizko Lanbide Heziketako prestakuntza zikloaren azken ebaluazioko saioan, betiere hura osatzen duten modulu guztiak bukatutakoan, irakasleen taldeak ikasle bakoitzari dagozkion titulazioari eta egiaztapenari buruzko erabakia hartuko du, kontuan izanik noraino eskuratu diren tituluko gaitasun orokorra, gaitasun profesionalak, pertsonalak eta sozialak, ikaskuntza iraunkorrerako gaitasunak eta zeharkako gaitasunak.

6. Azken ebaluazioko saioak amaitu ondoren, tutoreak ikasleei eta, hala badagokio, gurasoei edo legezko ordezkariei emaitzaren berri emanen die azken ebaluazioaren txostenaren bidez, ebazpen honen 3. eranskinaren arabera.

14. Azken ebaluazioko saioen epeak.

1. LPrik ez duten kurtsoetan edo hura kurtso osoan zehar garatzen denetan, azken ebaluazio arrunteko lehenbiziko saioa ekainean eginen da, Hezkuntzaren, Lanbide Heziketaren eta Unibertsitateen zuzendari nagusiak urtero ematen duen ebazpenean zehazten diren egunetan, Hezkuntza Sistemako Lanbide Heziketako irakaskuntzak ematen dituzten ikastetxeei dagozkien eskolako egutegia eta ordutegi orokorra prestatzeko jarraibideak ikasturte bakoitzerako onesten dituen ebazpen horretan.

LPa duten kurtsoetan, kurtsoko azken hiruhilekoan garatzen bada, ikastetxean emandako moduluen azken ebaluazioko lehen saioa oro har eginen da Lantokietako prestakuntzako modulua hasi baino lehenago.

2. Ikaslearen aurrerapena moduluetarako aurreikusitako helburuekin bat ez datorrenean, horiek ematen dituzten irakasleek neurri egokiak hartuko dituzte programatutako emaitzak lor ditzaten ikasleek. Ekainean eginen da gainditu gabeko modulu horietako azken ebaluazioaren hurrengo deialdia, lehenengo kurtsoan edo bigarrenean amaitutako moduluetan, aurreko idatz-zatian aipatutako urteroko ebazpenean adieraziko diren egunetan.

3. Ikaslea bigarren mailara igarotzen denean lehenengo mailako zenbait modulu gainditu gabe, lantokietako prestakuntza modulua egin baino lehen egiten den azken ebaluazioko saioarekin batean eginen da gainditu gabeko modulu horien azken ebaluazioa.

4. Ikasleak moduluak gainditu gabe kurtsoa errepikatu behar badu, deialdiak eta ebaluazio saioak dagokion ikasturterako antolatu direnak izanen dira.

5. Lantokietako prestakuntzako moduluan “Ez gai” kalifikazioa lortu bada, modulu hori behin bakarrik errepikatzen ahal da. Horrenbestez, Oinarrizko Lanbide Heziketako ziklo bakoitzean bi deialdi arrunt daude azken ebaluaziorako, gehienez, Lantokietako prestakuntzako moduluan, eta bi deialdiak ikasturte berean egin daitezke.

6. Lantokietako prestakuntzako moduluan zehar, Oinarrizko Lanbide Heziketako zikloko irakasleak gainditu gabeko moduluak dituzten ikasleen eskura egonen dira, kurtsoko ordu eta leku berberetan.

15. Ebaluazio prozesua gainbegiratzea.

Hezkuntzako Ikuskapen Zerbitzuari dagokio ebaluazio prozesua gainbegiratzea, ikastetxeei aholku ematea eta hura hobetzeko behar diren neurriak proposatzea.

Oinarrizko Lanbide Heziketako zikloaren eta lanbide moduluen kalifikazioa

16. Kalifikazioak.

1. Ebaluazio partzialeko saioetan, ikasleen kalifikazioak ezartzen dira modulu bakoitzerako eta, halakorik denean, prestakuntza unitateetarako. Horiekin batera, ikaskuntza prozesuari buruzko oharrak eransten ahal dira eta, betiere, baloratuko da errendimendua ikaslearen gaitasunei zer neurritan egokitu zaien. Kalifikazioak zenbakiz emanen dira, batetik hamarrera bitartean.

2. Ikasturte bakoitzean, ebaluazio partzialetako kalifikazioak kontuan hartuko dira moduluaren azken ebaluazioan, baina etengabeko ebaluazioaren ikuspegia aintzat hartuta. Prestakuntza unitate desberdinetan antolaturik dagoen modulu bat gainditzeko, ezinbestekoa izanen da prestakuntza unitate guztiak gainditzea.

3. Prestakuntza unitate desberdinetan antolaturik dauden lanbide moduluen azken kalifikazioa eginen da haietako bakoitzean lortutako kalifikazioak kontuan harturik, prestakuntza unitate bakoitzaren ordu kopuruarekiko proportzionala izanda. Orobat, irakasle batek baino gehiagok ematen dituzten moduluetan, haien azken kalifikazioa kalkulatzeko, edota kontuan hartuko dira irakasle bakoitzak emandako kalifikazioak, ordu kopuruari pisu proportzionala emanez, edota modulu horien programazio didaktikoan zehaztutako beste irizpide batzuk aplikatuko dira.

4. Modulu bakoitzaren azken kalifikazioa zenbakia izanen da, batetik hamarrera bitartekoa (dezimalik gabe); salbuespena izanik Lantokietako prestakuntzako modulua, hartan, kalifikazioa “Gai” edo “Ez gai” izanen baita. Bosteko kalifikazioa edo hortik gorakoak positibotzat joko dira. Gainera, gizartean maila pertsonalean, sozialean eta profesionalean moldatzeko moduan garatu beharko dituzte funtsezko gaitasunak.

5. Oinarrizko Lanbide Heziketako zikloaren azken kalifikazioa zikloaren moduluetan lortutako kalifikazioaren batez besteko aritmetikoa izanen da, bi hamartarrekin. Gainditutako lanbide modulu baten kalifikazioa moduluan dagoen edozein ziklotara igortzen ahalko da. Prestakuntza zikloaren azken kalifikazioa lortzeko, baliozkotutako lanbide moduluei 5eko kalifikazioa emanen zaie.

6. Irakasle tutorea arduratuko da ikasleek lortutako kalifikazioak ebazpen honen 24. oinarrian zehaztu diren ebaluazio agirietan idazteaz.

7. Kalifikazio negatiboei dagokienez, ikasleek, eta, adingabeen kasuan, haien gurasoek edo legezko ordezkariek, horiek errekuperatzeko antolatu diren jardueren berri izan beharko dute, baita horiek egiteko aldiaren, epeen eta ebaluazio dataren berri ere.

17. Erreklamazioak.

Ikasle adindunek, edo, adingabeen kasuan, haien legezko ordezkariek, erreklamazioak egin ditzakete ebaluazio prozesuaren ondorioz hartzen diren kalifikazioei eta erabakiei buruz, Hezkuntzako kontseilariak maiatzaren 21ean eman 49/2013 Foru Aginduaren IV. kapituluan ezarritakoarekin bat, zeinek Nafarroako Foru Komunitateko ikastetxeetan ematen diren unibertsitateaz kanpoko irakaskuntzetako ikasleak ebaluatzeko prozesuan erreklamazioak egiteko sistema ezartzen baitu.

Ikasleak zikloan jarraitzea, hurrengo mailara igarotzea eta lantokiko prestakuntza modulura sartzea

18. Ikasleak zikloan jarraitzea eta hurrengo mailara igarotzea.

1. Gehienez ere, lau ikasturte akademikoz iraunen dute ikasleek Oinarrizko Lanbide Heziketako zikloetan. Lau ikasturte horien kalkuluan sartuko da ikasturtea baldin eta ikasleak matrikulatu formalizatu badu.

2. Ikasleak bigarren kurtsora pasa daitezke gaitasun unitateei lotutako eta gainditu gabeko lanbide moduluak ez badira zikloaren asteko ordutegiaren %20tik gorakoak. Halaber, bigarren kurtsora pasatzeko, ikasleak Komunikazioa eta gizartea I izeneko lanbide modulua edo Zientzia aplikatuak I izenekoa gainditurik izan beharko du, irakasleen taldeak zehazten badu ikasketekin aurrera egin dezakeela probetxuz.

Gaitasun unitateei lotutako lanbide moduluak prestakuntza unitateetan antolatzen badira, moduluak balira bezala konputatuko dira mailaz igotzeari dagokionez.

Ikaslea bigarren mailara igotzen bada lehenengo mailako zenbait modulu gainditu gabe, gainditu gabeko lanbide moduluak berreskuratu eta ebaluatzeko beharrezko jarduerak antolatu beharko dituzte ikastetxeek.

3. Oinarrizko Lanbide Heziketako zikloan maiatzaren 23ko 50/2014 Foru Aginduaren 4. artikuluan ezarritako prozeduraren bidez sartu diren ikasleak, derrigorrezko eskolatzeko adinean badaude, iraunkortasunerako ezarritako gehiena gainditu gabe, kurtso bakoitza behin errepika dezakete gehienez, nahiz eta, salbuespenez, kurtso bat bigarren aldiz errepikatzea duten, irakasleen taldeak aldeko txostena egin ondoan.

4. Derrigorrezko eskolatzeko adinean ez dauden ikasleek, otsailaren 28ko 127/2014 Errege Dekretuaren 18. artikuluan eta maiatzaren 23ko 50/2014 Foru Aginduaren 4. artikuluan ezarritako prozeduraren bidez sartu badira Oinarrizko Lanbide Heziketako zikloan, bi kurtso horietako bakoitza behin gehienez daukate errepikatzea, baldin eta zikloaren asteko ordutegiaren %20 gainditzen duten eta gaitasun unitateei lotuta dauden lanbide moduluak gainditu badituzte, baita Komunikazioa eta gizartea I izeneko modulua edo Zientzia aplikatuak I izenekoa ere.

5. Lehenengo kurtsoko modulu guztiak gainditu gabe bigarren kurtsora igarotzen direnek lehenengo kurtsoan gainditu gabe dituzten moduluetan ere matrikulatu beharko dute. Lehenengo kurtsoko modulu gainditu gabeen irakasle titularrek jarduerak antolatuko dituzte modulu horiek ebaluatzeko prozedura eta berreskurapenera begira.

19. Kurtsoa errepikatzea.

1. Kurtsoa errepikatzen duten ikasleak derrigorrezko eskolatzeko adina duenean, modulu guztietan matrikulatuko da, gaindituak edo gainditu gabeak izan, eta prestakuntza jarduera eta eskola guztietara joan beharko du nahitaez. Gainditutako moduluetan, lehenago lortutako kalifikazioari eutsiko zaio gutxienez.

2. Kurtsoa errepikatzen duen ikasleak ez duenean derrigorrezko eskolatzeko adina eta otsailaren 28ko 127/2014 Errege Dekretuaren 18. artikuluan eta maiatzaren 23ko 50/2014 Foru Aginduaren 4. artikuluan xedatuaren ondorioz sartu direnean Oinarrizko Lanbide Heziketako zikloan, irakasleen taldeak ondoko bi aukera hauetako bati helduko dio:

a) Ikasleak modulu guztietan matrikulatzea, gaindituak edo gainditu gabeak izan. Aukera honetan, ikasleak prestakuntza jarduera eta eskola guztietara joan beharko du nahitaez. Gainditutako moduluetan, lehenago lortutako kalifikazioari eutsiko zaio gutxienez.

b) Ikasleak gainditu gabeko moduluetan matrikulatzea soilik.

20. Lantokietako prestakuntza modulura sartzea.

1. Lantokietako prestakuntzako moduluan sartzeko, lanbide modulu guztiak gainditurik eduki beharko dira. Nolanahi ere, irakasleen taldeak sarrera hori baimendu diezaioke ikaskuntza iraunkorrerako gaitasunei lotutako lanbide modulu bat gainditu gabe gehienez duen ikasleari.

2. Hezkuntza Departamentuak onartzen ahalko du gainerako lanbide moduluak amaitu eta ebaluatu baino lehen Lantokiko prestakuntza modulua egitea Oinarrizko Lanbide Heziketako zenbait prestakuntza ziklotarako, berariazko ezaugarriak kontuan hartuta.

Lanbide moduluak baliozkotzea eta lantokiko prestakuntza modulutik salbuestea

21. Moduluak baliozkotzea.

1. Oinarrizko lanbide tituluetan sartutako lanbide moduluak baliozkotzearen eta salbuestearen arloan indarra duen araudia aplikatuko da, Hezkuntza Sistemako Lanbide Heziketako irakaskuntzetarako oro har ezarritako prozeduren eta baldintzen arabera.

2. Komunikazioa eta gizartea I eta II izeneko moduluak eta Zientzia aplikatuak I eta II izenekoak gainditu dituztenek, maiatzaren 3ko 2/2006 Lege Organikoaren babesean ezarritako tituluei dagokien Oinarrizko Lanbide Heziketako edozein prestakuntza ziklotan, modulu horiek baliozkoturik izanen dituzte Oinarrizko Lanbide Heziketako beste edozein prestakuntza ziklotan.

3. Komunikazioa eta gizartea I izeneko lanbide moduluaren baliozkotzea lor dezakete Hasierako Lanbide Kualifikazioko Programa bat egin duten ikasleek, komunikazioaren eta esparru sozialaren arloko nahitaezko prestakuntza moduluak gainditurik badituzte eta, halaber, atzerriko hizkuntzaren modulu bat gainditurik badute, hezkuntzako administrazioek ezarritakoa edo ikastetxeek beren eskumenak baliatuz eskainitakoa izan.

4. Orobat, Zientzia aplikatuak I izeneko lanbide moduluaren baliozkotzea lor dezakete arlo zientifiko-teknologikoaren nahitaezko prestakuntza modulua gainditurik dutenek.

22. Lantokietako prestakuntzako modulutik salbuestea.

1. Lantokietako prestakuntzako modulua salbuetsita gera daiteke (osorik edo zati bat), boluntario edo bekadun gisa lanean edo zerbitzuan egindako lanagatik, baldin eta ikasleak frogatzen badu behar bezala menperatzen dituela Lantokietako prestakuntzako moduluaren bitartez lortu beharreko gaitasunen inguruko ezagutzak. Laneko edo zerbitzuetako esperientzia urtebetekoa izan behar da gutxienez, lanaldi osoan, eta Lantokietako prestakuntzako modulua bere baitan duen Oinarrizko Lanbide Heziketako zikloarekin lotuta egon behar da.

2. Aurreko atalean aipatzen den lan esperientzia honako agiri hauen bidez frogatuko da:

a) Besteren konturako langileak eta beren konturako langileak:

–Lan esperientzia hartu duten enpresaren edo erakundearen ziurtagiria, datu hauek berariaz adierazita: kontratuaren iraupena, egindako jarduera eta zenbat denbora egin duen lan horretan. Bere kontura ari diren langileen kasuan, tributupekoen zentsuan izena emanak daudela frogatzea, urtebeteko antzinatasunarekin gutxienez, eta jarduera adierazgarrienei buruz interesdunak egindako aitorpena.

–Gizarte Segurantzako Diruzaintza Orokorraren edo langilea afiliatuta dagoen Lan Mutualitatearen ziurtagiria, non enpresa, lanbide kategoria, kotizazio taldea eta kontratazioaldia, edo, betiere, Langile Autonomoen Araubide Bereziko kotizazioaldia adieraziko baitira edo, bestela, Zuzenbidearen araberakoa den beste edozein frogabide.

b) Boluntario edo bekadun gisa aritu diren pertsonen kasuan:

–Zerbitzuak zer erakundetan eman diren, hark emandako ziurtagiria, berariaz adierazita honakoak: betetako jarduerak eta eginkizunak, zer urtetan bete diren eta horietan emandako orduen kopuru zehatza.

23. Baliozkotzeen eta salbuespenen prozedura.

1. Lantokietako prestakuntza eta lanbide moduluak baliozkotzeko eta salbuesteko eskaerak egiten direnean, laneko praktikarekin bat datozelako, ikasleak aurretik matrikulaturik egon beharko du Hezkuntza Sistemako Lanbide Heziketako irakaskuntzen Oinarrizko Lanbide Heziketako zikloak emateko baimenduta dagoen ikastetxe batean.

2. Balizko baliozkotzeak eta salbuespenak ikastetxeko zuzendaritzari eskatuko dio ikasleak, adinduna bada, edo, adingabea bada, gurasoek edo legezko ordezkariek eskatuko diote. Ikastetxeko zuzendaritzak eskaera horiek aintzat hartuko ditu edo ez.

3. Eskaerarekin batera, egindako ikasketen ziurtagiri ofiziala aurkeztuko da, edo, hala badagokio, profesionaltasunaren edo egiaztagiri partzialen ziurtagiria.

4. Ikaslearen ikasketa espedientean, ebaluazio aktetan eta ikasketen ziurtagirian erregistratuko da bidezkoa den lanbide moduluen baliozkotzea edo salbuespena, honela:

a) Baliozkotua, lanbide moduluak baliozkotu direnean.

b) Salbuetsia, lantokiko prestakuntza lanbide modulua salbuetsi denean.

5. Moduluren bat baliozkotu edota salbuesteko zain dauden ikasleek klaseetara joan behar dute. Baliozkotzeak eta salbuespenak aldeko ebazpena ematen denean hasiko dira ondorioak sortzen.

6. Baliozkotutako lanbide moduluen kalifikazioa 5 izanen da, Oinarrizko Lanbide Heziketako zikloaren azken kalifikazioa kalkulatzeko ondorioetarako.

Ebaluazio agiriak eta ikasketen ziurtagiriak

24. Ebaluazioaren dokumentuak.

1. Honako hauek dira Hezkuntza Sistemako Lanbide Heziketako irakaskuntzen Oinarrizko Lanbide Heziketako zikloetako ikasketen ebaluazio prozesuko agiriak:

a) Ikaslearen espediente akademikoa, ebazpen honen 2. eranskineko ereduaren araberakoa, eta ikaslearen egiaztapen akademiko ofiziala, ebazpen honen 5. eranskineko ereduaren araberakoa.

b) Ebaluazio akta, ebazpen honen 4. eranskineko ereduaren araberakoa.

c) Banakako ebaluazio txostena, partziala edo azkena izan, ebazpen honen 3. eranskineko ereduaren araberakoa.

Ebaluazio txostenak eta ikasketen ziurtagiriak dira ikasleen mugigarritasuna bermatzen duten oinarrizko agiriak.

2. Ebaluazioa etengabea izanda, ikasleek beren ikaskuntza prozesuaren eboluzioa ezagutzea komeni denez, ikasleei bi ebaluazio txosten emanen zaizkie, gutxienez, ikasturtearen barnean.

25. Ikasketa ziurtagiriak.

1. Ikasketa ziurtagiriak inprimaki ofizial normalizatuetan emanen dira, interesdunak eskatu ondoren (edo gurasoek edo legezko ordezkariek, adingabea bada interesduna). Ziurtagiri horiek ematen diren egunera arte ikasleak lanbide moduluetan lortutako kalifikazioak azalduko dituzte, ebazpen honen 5. eranskinaren arabera, datu hauekin batera: zenbatgarren deialdia den edo, hala denean, aparteko deialdia dela adieraztea, ikasturtea, lanbide heziketako eskaintzaren modalitatea eta ziurtagiriaren data.

2. Oinarrizko Lanbide Heziketako prestakuntza ziklo bakoitzeko ikasketak guztiz gainditzen ez dituzten ikasleek, gainditu dituzten lanbide moduluen ikasketen ziurtagiri partziala jasoko dute, ebazpen honen 5. eranskineko ereduaren arabera. Ziurtagiri horrek, ondorio akademikoak izateaz gain, lortutako lanbide gaitasunen egiaztapen partzialeko ondorio metagarriak izanen ditu, Kualifikazioen eta Lanbide Heziketaren Sistema Nazionalaren arabera.

3. Lanbide modulua osatzen duten prestakuntza unitate laburragoak gainditzen dituztenek ziurtagiri partzial metagarria jasoko dute, Nafarroako Foru Komunitatean bakarrik izanen dena baliozkoa.

4. Ikaslearen ikasketa espedientea daukan ikastetxeko idazkariak izanen du eskatzen diren ziurtagiriak ematearen ardura.

26. Ikasleen mugigarritasuna.

1. Ikasle bat ikastetxe batetik bestera lekualdatuz gero, Oinarrizko Lanbide Heziketako ziklo bat egiten duen ikaslearen ikasketa espedientea daukan ikastetxeak ikastetxe hartzaileari bidali beharko dizkio, hark eskatuta, ikasketen ziurtagiri akademikoa, banakako ebaluazio txostena eta ikasketa espedientea. Halaber, eginbidean adierazi beharko du kalifikazioak bat datozela ikastetxeak gordetzen dituen ebaluazio aktekin.

2. Ikastetxe hartzaileak bidali zaizkion ebaluazio txostenen ardura hartuko du eta ikaslearen ikasketa espedienteari hasiera emanen dio.

3. Artikulu honetan aipatzen den informazioa jasotzeko, “EDUCA” aplikazio informatikoa edo beste baliabide batzuk erabil daitezke.

Tituluen ematea, erregistroa eta ondorioak

27. Oinarrizko lanbide titulua.

1. Oinarrizko Lanbide Heziketako ziklo bat gainditzeak eskubidea ematen du kasuan kasuko oinarrizko lanbide titulua lortzeko, Espainia osoan dituena balio akademikoa eta profesionala eta baliozkotasuna.

2. Oinarrizko lanbide tituluak egiaztatzen ditu lanbide kualifikazioak, hartan dauden gaitasun unitateak eta horrek dakarren prestakuntza, jardun profesionalaren erregulazioa izan gabe.

28. Oinarrizko lanbide tituluaren ondorioak.

1. Oinarrizko lanbide tituluak bide ematen du erdiko mailako prestakuntza zikloetan sartzeko, horri buruzko araudiarekin bat.

2. Maiatzaren 3ko 2/2006 Lege Organikoaren 44.1 artikuluan ezarritakoaren indarrez:

a) Oinarrizko lanbide titulu bat daukatenek Derrigorrezko Bigarren Hezkuntzako graduatu titulua eskura dezakete, maiatzaren 3ko 2/2006 Lege Organikoan aurreikusitako bi bideetako edozein baliatuz, Derrigorrezko Bigarren Hezkuntzaren azken ebaluazioko proba gaindituz, lege organiko horretan aurreikusitako baldintzetan.

b) 22 urtetik gorakoek, oinarrizko lanbide titulu bateko gaitasun unitate guztiak egiaztaturik badituzte, kasuan kasuko oinarrizko lanbide titulua jasoko dute, Hezkuntzaren, Lanbide Heziketaren eta Unibertsitateen zuzendari nagusiaren ebazpenaren bidez ezarriko den prozeduraren arabera.

3. Oinarrizko lanbide tituluak Derrigorrezko Bigarren Hezkuntzako graduatu tituluaren lan arloko ondorio berberak izanen ditu enplegu publikoetan zein pribatuetan sartzeari dagokionez.

29. Erregistroa eta titulua luzatzea.

Ikasketa eta lanbide tituluak emateari buruzko estatuko oinarrizko araudiaren arabera erregistratu eta luzatuko dira oinarrizko lanbide tituluak.

30. Zainketa.

Espedienteak ikastetxeko idazkaritzak zaindu eta artxibatu behar ditu; bertan gordeko dira. Ikastetxea desagertuz gero, Hezkuntza Departamentuak behar diren neurriak ezarriko ditu agiri horiek zaintzeko edo lekualdatzeko.

31. Ikasleen datu pertsonalak.

Ikasleen datu pertsonalak lortzeari, datu horiek ikastetxe batetik bestera lagatzeari eta datuen segurtasun eta konfidentzialtasunari dagokienez, datu pertsonalak babestearen arloan indarra duten arauetan ezarritakoari jarraikiz jokatuko da, eta betiere Hezkuntzari buruzko maiatzaren 3ko 2/2006 Lege Organikoaren hogeita hirugarren xedapen gehigarrian ezarritakoaren arabera.

1. Matrikula bakoitzak orri osagarri bat sortzen du.

2. O orokorra, B berezia, U urrutikoa, LP duala (lana eta prestakuntza).

3. OS osoa, P partziala.

4. A arrunta, PT titulua lortzeko probak.

5. Nafarroako Foru Komunitatean Oinarrizko Lanbide Heziketako zikloari esleitutako kodea eta curriculumaren foru dekretua.

6. 1.a edo 2.a.

7. Lanbide moduluaren kodea.

9. Moduluaren azken ebaluazioaren data.

10. Deialdiaren zenbakia edo, bestela, aparteko deialdia.

11. Zikloko azken ebaluazioaren kalifikazioa eta data.

12. Hainbat gertakariri buruzko oharrak: matrikula baliogabetzea, baja, baliozkotzeak, salbuespenak, hurrengo mailara igarotzeari buruzko erabakiak, araubide bereziko matrikulari eta titulazioari buruzko erabakiak, Oinarrizko Lanbide Heziketako titulua eskatzea.

1 Modalitatea: O: orokorra, B: berezia, U: urrutikoa, LP: duala (lana eta prestakuntza).

Mota: OS: osoa, P: partziala.

Bidea: A: arrunta, PT titulua lortzeko probak.

Jar zaitez gurekin harremanetan | Erabilerraztasuna | Lege abisua | Webaren mapa