navarra.es
Castellano | Euskara | Français | English
Ezagutzera eman
57/2013 Foru Agindua, ekainaren 24koa, Hezkuntzako kontseilariak emana, Nafarroako Foru Administrazioko Hezkuntza Departamentuaren menpeko lanbide heziketako ikastetxe bateratu publikoetako zuzendariak hautatu, ebaluatu eta haien izendapena ...
57/2013 FORU AGINDUA, EKAINAREN 24KOA, HEZKUNTZAKO KONTSEILARIAK EMANA, NAFARROAKO FORU ADMINISTRAZIOKO HEZKUNTZA DEPARTAMENTUAREN MENPEKO LANBIDE HEZIKETAKO IKASTETXE BATERATU PUBLIKOETAKO ZUZENDARIAK HAUTATU, EBALUATU ETA HAIEN IZENDAPENA BERRITZEKO ARAUAK EMATEN DITUENA
(Testu bateratua. Jatorrizkoa 2013ko 141. NAOn argitaratua, uztailaren 24an; akats zuzenketa, 2013-08-26ko NAO; 24/2015 Foru Agindua, martxoaren 3koa)
Atarikoa
Hezkuntzari buruzko maiatzaren 3ko 3/2006 Lege Organikoaren 113.etik 139.era bitarteko artikuluetan araututa dago ikastetxe publikoetako zuzendariak hautatu eta izendatzeko prozesua.
Ikastetxe bateratu publikoetako zuzendariak hautatu, izendatu, kargutik kendu eta ebaluatzeko, honako hauetan ezarritakoari jarraituz eginen da: Kualifikazioei eta Lanbide Heziketari buruzko ekainaren 19ko 5/2002 Lege Organikoaren 11.5 artikulua, Lanbide heziketako ikastetxe bateratuen oinarrizko baldintzak arautzen dituen abenduaren 23ko 1558/2005 Errege Dekretua eta, Nafarroako Foru Komunitatearen esparruan, lanbide heziketako ikastetxe bateratuak arautzen dituen irailaren 4ko 63/2006 Foru Dekretua.
Hezkuntza Departamentuak abenduaren 2ko 202/2010 Foru Aginduaren bidez arautu zuen nola hautatu eta ebaluatu Nafarroako Gobernuko Hezkuntza Departamentuaren menpeko ikastetxe publikoetako zuzendariak eta nola berritu haien izendapena, eta 1.2 artikuluan aurreikusi zuen lanbide heziketako ikastetxe bateratuak eta lanbide heziketako erreferentzia nazionaleko ikastetxeak ez direla bere xede. Horregatik garatu behar dira Nafarroako Gobernuko Hezkuntza Departamentuaren menpeko ikastetxe bateratu publikoetako zuzendariak hautatu eta izendatzeko funtsezko alderdiak jasoko dituzten arauak, berdintasun, merezimendu, gaitasun eta publikotasun printzipioak betetzen direla bermatzen duen prozedura bat baliatuz.
Hezkuntza Departamentuak profesionalki egokienak direnak bultzatu behar ditu zuzendaritzara, Nafarroako Gobernuko Hezkuntza Departamentuaren menpeko ikastetxe bateratu publikoetan ari diren eragile guztien ahalik eta laguntza handiena dutela, aurrean dituzten erronka garrantzitsuei buru egiteko.
Hezkuntza Departamentuaren ardura da, orobat, sistema zorrotz bat finkatzea, izendatzeko proposatzen diren zuzendariak ebaluatzeko. Hezkuntzari buruzko maiatzaren 3ko 2/2006 Lege Organikoan ezarritakoari jarraikiz, ebaluazio hori positiboa bada, koordinatutako giza taldeak gidatzen segitu nahi duten zuzendari guztien kargua berrituko da, eta horrek aipatu lege organikoan aurreikusitako ondorioak izanen ditu.
Horregatik guztiagatik, eta Nafarroako Gobernuari eta Lehendakariari buruzko abenduaren 3ko 14/2004 Foru Legearen ) artikuluak ematen dizkidan ahalmenak erabiliz, agindu dut:
I. KAPITULUA. Xedapen orokorrak
1. artikulua. Xedea eta aplikazio eremua.
Nafarroako Gobernuko Hezkuntza Departamentuaren menpeko ikastetxe bateratu publikoetako zuzendariak hautatu, ebaluatu eta haien izendapena berritzeko arauak ematea du xede foru agindu honek.
2. artikulua. Printzipio orokorrak.
1. Zuzendaria hautatu eta izendatzeko, merezimendu lehiaketa eginen da ikastetxean ematen diren irakaskuntzetako batean irakaslana esleitua duten karrerako irakasle funtzionarioen artean, merezimendu, gaitasun eta publikotasun printzipioei jarraituz, ikastetxeko kide anitzeko organoei kontsultatu ondoren.
2. Hautapena berdintasun, publikotasun, merezimendu eta gaitasun printzipioei jarraikiz eginen da. Horretarako, batzorde bat osatuko da, non Hezkuntza Departamentuaren eta dagokion ikastetxe bateratuaren ordezkariak izanen diren. Horretarako, Hezkuntzaren, Lanbide Heziketaren eta Unibertsitateen Zuzendaritza Nagusiak proposatuta, Hezkuntza Departamentuak aldian behin deialdia eginen du zuzendari postuak hutsik gelditzen diren ikastetxeetako zuzendariak hautatzeko.
3. Hezkuntza Departamentuak Hasierako Prestakuntza Programa antolatuko du hautatzen diren zuzendarigaientzat.
4. Hezkuntza Departamentuak, foru agindu honen eta eranskinen bidez, irizpide objektibo batzuk ezartzen ditu aurkezten diren merezimenduak eta zuzendaritza proiektuak baloratzeko.
5. Hezkuntza Departamentuak irizpide objektibo batzuk ezarriko ditu zuzendariek egiten duten zuzendaritza lana ebaluatzeko.
3. artikulua. Parte hartzeko betebeharrak.
1. Merezimendu lehiaketan parte hartzeko, honako hauek bete beharko dira:
a) Organikoki Hezkuntza Departamentuaren menpe diren irakasle funtzionarioen kidegoetako batekoak izan beharko dute, eta gutxienez bost urteko antzinatasuna izan karrerako funtzionario gisa irakaskuntzaren funtzio publikoan.
b) Karrerako funtzionario gisa zuzenean irakatsi izana, bi urtez gutxienez, hautatu nahi den ikastetxe bateratuak ematen dituen irakaskuntzetako batean, Nafarroako lanbide heziketako ikastetxe publiko batean.
c) Zuzendaritza proiektu bat aurkeztea, honako hauek jasotzen dituena, gutxienez ere:
–Ikastetxe bateratuaren egoeraren analisia eta, bereziki, haren eta enpresen eta produkzio ingurunearen arteko harremanena.
–Ikastetxe bateratuaren prestakuntza eskaintzaren analisia, haren lanbide orientazio eta informazio sistemarena eta lanbide gaitasunak atzemateko eta ebaluatzeko prozedurenak.
–Aurkeztutako zuzendaritza proiektuaren eta haren helburuen zerikusia ikastetxe bateratuaren proiektu funtzionalarekin.
–Jarduketaren lerro estrategikoak zehaztea, baita planak eta proiektuak ere, zuzendaritza proiektuaren helburuak lortu ahal izateko.
–Aurkezten den proiektua ebaluatzeko prozedurak.
d) Zuzendaritza taldeko gainerako kideen izendapen proposamena aurkeztea, interesdunek onartua. Proposamen eta onarpen horiek zuzendaritza proiektua osatuko dute, haren parte direla. 1. eranskinean ezarri da zuzendaritza taldeko gainerako kideak izendatzeko eta proposamen hori onartzeko eredua.
e) Izangaiak beharrezko espezialitatea izan beharko du aukeratu duen ikastetxe bateratuko plantilla organikoan ageri denaren arabera, ikastetxe horretan behar beste irakastordu eduki ahal izateko.
2. Deialdi bakoitzari dagozkion eskaerak aurkezteko epea bukatzen denerako bete beharko dira baldintza horiek.
II. KAPITULUA. Hautapen prozesua
4. artikulua. Hautapen batzordeak eta haien kideak izendatzea.
Hautapen batzorde bat eratuko da ikastetxe bateratu bakoitzeko, kide hauek izanen dituena:
–Lanbide Heziketaren Zerbitzuko zuzendaria edo hark izendatzen duen pertsona, batzordeburu arituko dena.
–Hezkuntzaren, Lanbide Heziketaren eta Unibertsitateen Zuzendaritza Nagusiari atxikitako funtzionario bat. Zuzendaritza Nagusi horrek izangaiak aukeratu duen ikastetxean edo haren jatorrizko ikastetxean behin betiko destinoa ez dutenen artean izendatuko du funtzionario hori. Funtzionario hori idazkari gisa arituko da.
–Hezkuntza Departamentuko ikuskatzaile bat, Hezkuntzako Ikuskapen Zerbitzuak izendatua.
–Klaustroaren ordezkari bat. Funtzionario hori ezin izanen da hautagai izan, ezta proposatzen diren zuzendaritza taldeko kide ere, eta Klaustroak aukeratuko du berariaz eginen den bilkura berezi batean, non onartzen diren izangai zerrendak jakitera emanen diren.
–Ikastetxe bateratuko gizarte kontseiluaren ordezkari bat.
5. artikulua. Irakasleen klaustroa ordezkatzen duena hautapen batzorderako izendatzea.
1. Klaustroaren ordezkaria klaustroko kideen artetik aukeratuko dute klaustroko kideek beraiek. Horretarako, ikastetxeko zuzendariak klaustroaren bilkura berezi baterako deia eginen du, non onartutako izangai guztiak jakinaraziko diren eta klaustroak hautapen batzordean izanen duen ordezkaritza aukeratuko den.
2. Horretarako, bozketa bat eginen da, hautatzaileek boto-paperean izen bakar bat adierazita.
3. Klaustroko kide guztiak izanen dira hautesle eta hautagarri, salbu eta zuzendaritzarako izangaiak eta aurkezten diren kandidaturetako zuzendaritza taldeetan aritzeko proposatzen direnak.
4. Boto kopuru handieneko pertsonak ordezkatuko ditu irakasleak hautapen batzordean, eta hurrengoa ordezkoa izanen da.
Berdinketa gertatuz gero, zozketa eginen da klaustro berezian berean.
5. Klaustroaren bilkura berezian zuzendaritzarako izangaiek beren zuzendaritza proiektuaren funtsezko alderdiak azalduko dituzte. Azalpen horrek informatzeko baino ez du balioko, eta ez da eztabaidarik izanen izangaien eta klaustroaren artean. Bi kandidatura edo gehiago izanez gero, zozketa eginen da jendaurrean ikastetxeko idazkariaren aurrean, izangaiek jarduteko ordena finkatzeko.
6. artikulua. Hautapen batzordeen izendapena eta eraketa.
1. Giza Baliabideen Zerbitzuak ebazpen batez bidez izendatuko ditu hautapen batzordeetako kideak, ikastetxe bateratuetako zuzendariek batzordekide titularrak eta ordezkoak izanen direnen datuak jakinarazi ondoren.
2. Hautapen batzordeak kandidaturak aurkezten diren ikastetxe bateratu guztietan eratuko dira.
3. Batzordea eratzeko eta hark jarduteko, batzordeburuak edo idazkariak egon beharko du eta, gainera, batzordeko kideetako batek.
4. Hautapen batzordeen funtzionamendua eta, abstentzio eta errefusatze kasuetarako, kideei aplikatzen ahal zaien araubidea Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 22. artikulutik 29.era bitarte dago ezarrita.
7. artikulua. Hautapen batzordearen eginkizunak.
Hautapen batzordeak eginkizun hauek izanen ditu:
a) Izangaien merezimenduak barematzea.
b) Izangaiei dei egitea zuzendaritza proiektuen defentsa egitera.
c) Aurkezten diren kandidaturen zuzendaritza proiektuak baloratzea eta kalifikatzea.
d) Izangaien zerrenda jendaurrean jartzea ikastetxean, izangaiek merezimenduen baremoan lortutako behin-behineko puntuazioa eta zuzendaritza proiektuari emandako kalifikazioa adierazita.
e) Hautapen prozesuko lehen faseko azken kalifikazioaren aurka aurkezten diren erreklamazioak ebaztea.
f) Aurkezten diren izangaien behin betiko zerrenda jendaurrean jartzea ikastetxean, atal bakoitzean lortutako puntuazioa adierazita.
g) Giza Baliabideen Zerbitzura igortzea izangai bakoitzaren behin betiko puntuazioa eta hautatu den izangaiaren proposamena, hau da, guztirako azken puntuazio handiena lortzen duena.
h) Izangaia aukeratu ondoren, aurkeztutako dokumentazioa eta hautapen prozesuan sortzen dena Giza Baliabideen Zerbitzuan uztea.
i) Batzordearen funtzionamendu egokia bermatzeko beharrezkoak diren gainerako eginkizunak.
8. artikulua. Hautapen prozesua.
Hautapen prozesuak bi fase izanen ditu:
a) Lehen fasea: merezimenduak baloratuko dira, eta zuzendaritza proiektua aurkeztu, defendatu eta kalifikatuko da, foru agindu honen bederatzigarren eta hamargarren artikuluetan ezarritakoaren arabera, hurrenez hurren.
b) Bigarren fasea: hasierako prestakuntza programa, foru agindu honen hamahirugarren artikuluan ezarritakoaren arabera.
9. artikulua. Merezimenduen balorazioa.
1. Hautapen batzordeak objektibotasunez baloratuko ditu izangaien merezimenduak, 10 puntuz gehienez ere, foru agindu honen 2. eranskinean ezarritako baremoari jarraituz.
2. Hautapen batzordeak dagokion ikastetxean eta Nafarroako Gobernuaren Zerbitzuen Katalogoan argitaratuko du merezimenduen baremoan izangai bakoitzak lortutako behin-behineko puntuazioa agertzen duen zerrenda.
3. Ikastetxeren batean kargu hutsa betetzeko izangai bakarra aurkeztuz gero, ez da merezimenduen balorazioa eginen.
10. artikulua. Zuzendaritza proiektua aurkeztu, defendatu eta kalifikatzea.
1. Izangaiek zein ikastetxe bateratutako zuzendaritza eskuratu nahi duten, haren Gizarte Kontseiluari azalduko dizkiote zuzendaritza proiektuaren funtsezko alderdiak. Horretarako, bilkura berezirako deia eginen da gai bakarra izanik eguneko zerrendan: izangaiek proiektuak aurkeztea. Gizarte kontseiluko idazkariak txosten batean jasoko ditu organo horretako kideek horren gainean egindako balorazioak. Txosten hori, gizarte kontseiluko kideek baliozkotu ondoren, hautapen batzordeko buruari igorriko zaio, hurrengo bi egunean.
2. Hautapen batzordeak zuzendaritza proiektuak azaldu eta defendatzeko egunak eta izangaiek jarduteko ordena argitaratuko ditu ikastetxean.
3. Hautapen batzordeak adierazitako egunean eta orduan defendatuko dituzte zuzendaritza proiektuak izangaiek haren aurrean. Izangaiak 30 minutu izanen ditu, gehienez ere, zuzendaritza proiektua hautapen batzordearen aurrean defendatzeko. Batzordeko kideek 15 minutu izanen dituzte, gehienez ere, izangaiari galderak egiteko, hark aurkezten duen zuzendaritza proiektuko zenbait alderdi argitu, zehaztu edo xehetasunak emateko.
4. Hautapen batzordeak, gehienez ere, hamar puntuz, kalifikatuko du zuzendaritza proiektua, bi dezimal adierazita. Zuzendaritza proiektuaren kalifikazioa bost puntutik beherakoa bada, izangaia ez-gaitzat hartuko da.
5. Hautapen batzordeko kide bakoitzak izangaiari eman diezaiokeen gehieneko puntuazioa 10 puntukoa izanen da, eta txikiena, puntu batekoa. Izangai bakoitzak zuzendaritza proiektuagatik lortzen duen azkeneko puntuazioa hautapen batzordeko kide guztiek emandako puntuazioaren batez besteko aritmetikoa izanen da, bi dezimalekin. Batzordeko kideen puntuazioetan 3 puntuko aldea edo handiagoa baldin bada, kalifikazio handiena eta txikiena kenduko dira, eta gainerakoen batez besteko aritmetikoaren bidez lortuko da behin betiko puntuazioa. Handieneko eta/edo txikieneko kalifikazio bat baino gehiago badaude besteekiko alde hori dutenak, bat baino ez da baztertuko. Batez bestekoak ateratzeko, biribiltzearen araua aplikatuko da.
11. artikulua. Hautapen prozesuko lehen faseko azken kalifikazioa.
1. Merezimenduen kalifikazioko puntuazioei zuzendaritza proiektuaren kalifikazioa gehituta aterako da hautapen prozesuko lehen faseko azken kalifikazioa, hogei puntu gehienez ere, bi dezimal adierazita. Berdinketak honako irizpide hauek, hurrenez hurren, kontuan hartuta hautsiko dira:
–Lehenik. Zuzendaritza proiektuan zeinek duen puntu gehien.
–Bigarrenik. Azpiataletan zeinek duen puntu gehien, foru agindu honen 2. eranskinean merezimenduak baloratzeko ezarritako ordenari jarraikiz.
2. Ikastetxe bateko lanpostu hutsa betetzeko izangai bat bakarra aurkeztuz gero, azken kalifikazioan zuzendaritza proiektuaren kalifikazioa jasoko da bakarrik, hamar puntukoa gehienez ere eta bi dezimal adierazita.
3. Azken kalifikazioaren aurkako erreklamazioak idatzita aurkeztuko zaizkio hautapen batzordeari, argitaratu ondoko hiru egun balioduneko epean. Erreklamazioak aurkezteko epea bukatu eta biharamunetik hasita, batzordeak hiru egun balioduneko epea izanen du ebazteko.
12. artikulua. Izangaiak hautatzea.
1. Hautatua izateko, izangaiak, gutxienez ere, 5 puntu lortu beharko ditu zuzendaritza proiektuaren balorazioan.
2. Hautapen batzordeak aurkeztutako izangaien zerrenda argitaratuko du, zein bere ikastetxean, merezimenduen baremoan eta azpiatal bakoitzean lortutako puntuazioa eta zuzendaritza proiektuan lortutako puntuazioa zehaztuta, baita aurreko horiek batu ondoren guztira lortutako puntuazioa ere. Guztirako puntuazio altuena lortzen duen izangaia hautatuko da izendatua izateko.
Izangai bakar bat aurkeztuz gero, zuzendaritza proiektuan ateratzen duen puntuazioa argitaratuko da bakarrik. Izangai hori hautatuko da izendatzeko.
3. Hautatutako izangaiaren aldeko proposamena igorriko du batzorde bakoitzeko buruak Giza Baliabideen Zerbitzura, eta hasierako prestakuntza programa egitetik salbuetsita dagoela jakinaraziko dio, hala badagokio.
13. artikulua. Hasierako prestakuntza programa.
1. Hautapen prozesuko bigarren fasean hasierako prestakuntza programa bat gainditu beharko da.
2. Ez dute hasierako prestakuntza programa egin beharko hautatuak izan eta ikastetxe publiko bateko zuzendari lanetan bi urteko esperientzia frogatzen dutenek.
3. Hasierako prestakuntza programa egitetik salbuetsiko dira, orobat, ikastetxe publikoetako zuzendari lanetan aritzeko onartuta egonik ere, karguan aritu ez diren izangaiak edo bi urte baino gutxiago aritutakoak, baita Hezkuntza Departamentuak antolatzen duen zuzendaritza taldeentzako prestakuntza programa egina dutenak ere.
4. Honela osatuko da hasierako prestakuntza programa:
a) Hezkuntza arloko legeriarekin, baliabideen kudeaketarekin eta hezkuntza sistemaren kalitatearekin zerikusia duten alderdietako prestakuntza.
b) Ikastetxe bateratuen antolaketari eta funtzionamenduari buruzko prestakuntza, haien xedeen garapena eta enplegurako prestakuntzaren kudeaketa.
5. Hezkuntza Departamentuak, irakasleen urteko prestakuntza planerako deialdiaren bidez, arautuko du ikastetxe bateratuetako zuzendarien hautapen prozesuko lehen fasean hautatzen direnen hasierako prestakuntza programa.
14. artikulua. Zuzendariaren eta zuzendaritza taldearen izendapena.
1. Hezkuntza Departamentuko Giza Baliabideen Zerbitzuko zuzendariak, hautapen batzordeak aukeratutako izangaiaren izena proposamentzat hartuta, izendatu eginen du.
2. Hasierako prestakuntza programa egin behar duten pertsona hautatuak praktiketako zuzendari izendatuko dira urte baterako. Hasierako prestakuntza programa bukatu eta “Gai” kalifikazioa lortzen duten pertsona hautatuak aukeratu duten ikastetxeko zuzendari izendatuko dira lau urterako, praktikaldiko urtea barne.
Hasierako prestakuntza programa egitetik salbuetsita dauden pertsona hautatuak lau urterako izendatuko dira zuzendari.
3. Hautatutako pertsonak izendatzeko Giza Baliabideen Zerbitzuaren ebazpena Nafarroako Aldizkari Ofizialean argitara dadila aginduko du Hezkuntza Departamentuak.
4. Zuzendari berriak ez badu behin betiko destinoa berak aukeratutako ikastetxean, zerbitzu eginkizunetan egonen da, ondorio guztietarako, zuzendari karguan dagoen denboran, eta ezin izanen dute lekuz aldatu irakastorduak murriztu edo kentzeagatik.
5. Zuzendaritza taldeko gainerako kideen izendapen proposamena zuzendariak eginen du ikastetxean destinoa duten irakasleen artetik.
6. Zuzendariak proposaturik eta Hezkuntzako Ikuskapen Zerbitzuak gainbegiraturik, Giza Baliabideen Zerbitzuak zuzendaritza taldeak izendatuko ditu ikastetxe bateratuko zuzendaria izendatzen den epe berbererako, betiere agintaldia bitartean haiek bete dezaketen lanpostu hutsik baldin badago, ikasturte bakoitzeko hezkuntza plangintzaren arabera.
7. Ezintasun iragankor batengatik, eszedentzia bereziagatik edo antzeko inguruabarrengatik, praktikaldia eten behar izanez gero, Giza Baliabideen Zerbitzuak praktiketako izendapena beste urte batez luzatzea erabakitzen ahalko du, agintaldi osoko lau urteko iraupenean eraginik izan gabe. Luzapen hori behin bakarrik emanen da.
15. artikulua. Izendapen bereziak.
1. Hautapen batzordeak izangai bakar bat ere aldarrikatzen ez badu edo ikastetxe batean zuzendaritzarako hautagairik ez badago, Hezkuntzako Ikuskapen Zerbitzuak eta Lanbide Heziketaren Zerbitzuak batera proposatuta, Giza Baliabideen Zerbitzuak lanbide heziketako irakaskuntza ematen den Hezkuntza Departamentuaren menpeko ikastetxe batean destinoa duen irakasle funtzionario bat izendatuko du zuzendari, lau urterako gehienez ere edo beste hautapen deialdi bat izan arte.
2. Horrela izendatzen diren pertsonek izendatu behar diren ikastetxe bateratuko plantilla organikoan ageri denaren arabera eskatzen den espezialitatea eduki beharko dute, ikastetxean bertan behar adina irakastordu eduki ahal izateko.
3. Sortzen diren ikastetxe bateratu berrien kasuan, artikulu honetako 1. atalean ezarritakoari jarraituko zaio.
4. Ikastetxe bateratuko zuzendaria zein epetarako izendatzen den, denbora bererako izanen da zuzendaritza taldeko kideen izendapen berezia; betiere, izendapen hori egiteko baldintza izanen da kargualdia bitartean bete dezaketen lanpostu hutsik egotea, ikasturte bakoitzeko hezkuntza plangintzaren arabera. Lanpostu huts hori badagoela Hezkuntzako Ikuskapen Zerbitzuak berretsi beharko du, txosten baten bidez.
16. artikulua. Zuzendaria kargutik kentzea.
1. Ikastetxe bateratu bateko zuzendaria kasu hauetakoren batean kenduko da kargutik:
a) Izendapen aldia edo haren luzapena, halakorik bada, bukatzean.
b) Ikastetxean zerbitzuak emateari uztean, borondatezko zein nahitaezko lekualdatzeagatik, zerbitzu berezietan hasteagatik, borondatezko edo nahitaezko eszedentzia hartzeagatik edo beste edozein inguruabarrengatik.
c) Uko egite arrazoitua, Lanbide Hezkuntzaren, Lanbide Heziketaren eta Unibertsitateen zuzendari nagusiak onartua.
d) Gerora sortutako ezintasun psikikoa edo fisikoa, karguari dagozkion zeregin nagusiak betetzea galarazten diona.
e) Karguari dagozkion eginkizunak betetzearen aurkako hutsegite larria, Hezkuntza Ikuskapen Zerbitzuaren eta Lanbide Heziketaren Zerbitzuaren txosten bateratuaren ondoren. Hezkuntza Departamentuak ofizioz egin dezake kargugabetze hori, edo ikastetxe bateratuko gizarte kontseiluak proposatuta. Dena dela, espedientea instruitu ondoren emanen da kargutik kentzeko ebazpena, aldez aurretik interesdunari eta Gizarte Kontseiluari entzunaldia emanda.
2. Zuzendariari diziplina espedientea irekitzen zaionean edo justifikatu gabeko absentziaren kasuan, Hezkuntza Departamentuko Hezkuntzaren, Lanbide Heziketaren eta Unibertsitateen Zuzendaritza Nagusiak haren eginkizunen kautelazko etendura proposatzen ahalko du, diziplina arloan indarra duen araudian agertzen den moduan. Kasu horretan zuzendariordeak edo, hala izan ezean, ikasketaburuak edo, bestelakoetan, ikastetxeko idazkariak hartuko ditu bere gain zuzendariaren eginkizunak.
3. Diziplina espediente batean egiaztatzen bada zuzendariaren eginkizunak ez betetzea hutsegite larria edo oso larria izan dela, eta aplika daitezkeen arau orokorren arabera ezar daitezkeen zehapenak galarazi gabe, Hezkuntzaren, Lanbide Heziketaren eta Unibertsitateen Zuzendaritza Nagusiak zuzendaria kargutik kentzea proposatuko du, eta jarduneko beste zuzendari bat izendatzea, hurrengo deialdian beste bat hautatu bitarte.
III. KAPITULUA. Ebaluazioa eta izendapena berritzea
17. artikulua. Zuzendaritza lanaren ebaluazioa.
1. Zuzendaritza lanaren ebaluazio prozeduraren bidez zuzendaritza lana nola egin den aztertuko da eta praktika hori hobetzen laguntzeko pizgarria izan nahi du. Ebaluazio sistematikoa izanen da, prestakuntza hobetzeko egina, eta eraginkortasunaren, efizientziaren eta objektibotasunaren printzipioak hartuko ditu aintzat.
2. Zuzendaritza lanaren ebaluazioa zuzendariaren kargualdi osoan eginen da modu sistematikoan. Prozedura arruntaren bidez hautatuak izan diren ikastetxe bateratuetako zuzendariei egin beharko zaie.
18. artikulua. Zuzendaritza lana ebaluatzeko irizpide objektiboak.
1. Zuzendaritza lana ebaluatzeko, honako eremu hauek hartuko dira kontuan:
–Zuzendaritza proiektuaren garapena ikastetxe bateratuko proiektu funtzionalarekin eta, kasua bada, ikastetxeko helburu, ikuspegi eta balioekin alderatuta.
–Lidergo partekatua izan ote den.
–Ikastetxeko irakaskuntza-ikaskuntza prozesuaren plangintza, antolaketa eta ebaluazioa.
–Lana taldeka antolatzea eta ikastetxe bateratuko organoen arteko lankidetza.
–Bizikidetzaren tratamendua ikastetxean.
–Lanbide heziketako ikastetxe bateratuei dagozkien irakaskuntza eta jardueren garapenarekin zerikusia duten proiektuak sustatu eta kudeatzea.
–Ikastetxe bateratua kudeatu eta ordezkatzea. Harremanak erakundeekin.
2. Foru agindu honen 3. eranskinean ezarritakoak dira aurreko puntuan azaldutako eremuak baloratzeko erabiliko diren adierazleak.
19. artikulua. Zuzendaritza lana ebaluatzeko prozedura.
1. Prozedura arruntaren bidez hautatzen diren zuzendariak haien kargualdia bukatutakoan ebaluatuko dira.
2. Ebaluazioa Hezkuntzako Ikuskapen Zerbitzuak izendatzen duen ikuskatzaile batek eginen du.
3. Zuzendari lana gainbegiratzeko, Hezkuntzako Ikuskapen Zerbitzuak izendatutako ikuskatzaileak honako hauek eginen ditu:
a) Ebaluatzen den zuzendariak egindako lanari buruzko balorazio txosten bat eskatuko dio Lanbide Heziketaren Zerbitzuari.
b) Jarraipena eginen dio lau urteko kargualdiari, dokumentuak analizatuz eta zuzendariari, zuzendaritza taldeko gainontzekoei, ikastetxeko koordinazio organoetako ordezkariei eta gizarte kontseiluko kideei elkarrizketak eginez. Orobat, bisitak egiten ahalko ditu, ikastetxe bateratuko kide anitzeko zein koordinazioko organoen funtzionamendua aztertzeko.
4. Jarraipen horren ondorioz, Hezkuntzako Ikuskapen Zerbitzuak izendatutako ikuskatzaileak detektatzen badu zuzendaritza lanean hobetu daitezkeen arloak badirela, zuzendariari jakinaraziko dio kargualdiko urte bakoitza bukatzen denean, ebaluazioa egiteko ebazpenean zehazten diren prozedurak erabiliz, behar diren neurriak har daitezen.
5. Kargualdia bukatutakoan, Hezkuntzako Ikuskapen Zerbitzuak izendatutako ikuskatzaileak jarraipen horren arabera egiaztatutako emaitzen azken ebaluazioa eginen du.
6. Hezkuntzako Ikuskapen Zerbitzuak izendatutako ikuskatzailearen azken txostena negatiboa bada, aurkeztu baino lehen, entzunaldia emanen zaio zuzendariari. Bertan, txosten negatiboaren oinarri diren kausen berri emanen zaio, eta kalifikazioarekiko desadostasuna argudiatzeko dokumentuak aurkezteko eta egokiak iruditzen zaizkion alegazioak egiteko aukera emanen zaio.
Dokumentazio eta alegazio horiek aintzat hartuko dira azken txostena egin baino lehen. Hala ere, negatiboa baldin bada, behar bezala argudiatu beharko da.
7. Hezkuntzako Ikuskapen Zerbitzuak izendatutako ikuskatzaileak ebaluazioari buruzko azken txostena eginen du, eta bertan adieraziko da “Gai” edo “Ez gai” kalifikazioa lortu den. Zuzendariak “Gai” kalifikazioa lortzen badu, ebaluazioa positibotzat hartuko da, eta “Ez gai” kalifikazioa lortzen badu, berriz, negatibotzat joko da.
8. Hezkuntzako Ikuskapen Zerbitzuak zeinen zuzendaritza lana ebaluatu den eta ebaluazio horien emaitza jakinaraziko dizkio Hezkuntza Departamentuan dagokion Zuzendaritza Nagusiari.
20. artikulua. Izendapena berritzea.
1. Ebaluazio positiboa lortzen duten zuzendari guztien izendapena lau urterako berrituko da, non eta interesdunak berariaz eta idatziz azaltzen ez duen berritzearen kontra dagoela.
2. Aurreko puntuan aipatzen den berritzea iraupen bereko bi agintalditarako egin daiteke, zuzendaritza lanetan aritzeko ebaluazio positiboa jasoz gero.
3. Izendapena berritutako bi agintaldiak iraganik, zuzendariak karguan segitu nahi izanez gero, beste merezimendu lehiaketa batean parte hartu beharko du ikastetxe bateratuetako zuzendariak hautatzeko.
Lehen Xedapen Iragankorra. Lehenago izendatutako zuzendarien ebaluazioa.
Foru agindu hau argitaratu baino lehen, Hezkuntzari buruzko maiatzaren 3ko 2/2006 Lege Organikoan xedatutakoaren arabera izendatu ziren ikastetxe bateratu publikoetako zuzendariak III. kapituluan ezarritakoaren arabera baloratuko dira, eta ebaluazio prozesua agintaldia bukatu bitarte falta den denborari egokituko zaio.
Lehen Xedapen Gehigarria. Ikastetxe bateratu bihurtzen diren bigarren hezkuntzako institutuetako zuzendariak.
Bigarren hezkuntzako institutu izatetik lanbide heziketako ikastetxe bateratu izatera iragan diren ikastetxeetako zuzendariek beren izendapenari dagokion agintaldia bukatuko dute.
Bigarren Xedapen Gehigarria. Zuzendariordetzaren, ikasketa burutzaren eta idazkaritzaren arduradunak.
1. Ikastetxe bateratuko ikasketa burutzaren eta idazkaritzaren arduradunek eta, zuzendariordetzarik bada, horren arduradunak beren eginkizunak utziko dituzte inguruabar hauetakoren bat emanez gero:
a) Uko egite arrazoitua, zuzendaritzak onartua eta Hezkuntza Departamentuko Hezkuntzaren, Lanbide Heziketaren eta Unibertsitateen Zuzendaritza Nagusiak berretsia.
b) Aldi baterako edo behin betiko lekualdatzea, borondatezkoa edo behartua, zerbitzu berezietan sartzea, erretiroa, borondatezko edo behartutako eszedentzia, edo eginkizunen etendura, indarra duen legerian xedatutakoaren arabera.
c) Izendatu zituen ikastetxe bateratuko zuzendariak kargua uztea.
d) Ikastetxe bateratuko zuzendaritzaren proposamen arrazoitua, idazki baten bidezkoa, Hezkuntza Departamentuko Hezkuntzaren, Lanbide Heziketaren eta Unibertsitateen Zuzendaritza Nagusiak berretsia.
e) Karguari dagozkion eginkizunak betetzearen aurkako hutsegite larria, ikastetxe bateratuko zuzendariak txostena egin ondoren. Hezkuntza Departamentuak ofizioz egin dezake kargugabetze hori, edo ikastetxe bateratuko zuzendariak edo gizarte kontseiluak proposatuta. Dena dela, espedientea instruitu ondoren emanen da kargutik kentzeko ebazpena, aldez aurretik interesdunari eta Gizarte Kontseiluari entzunaldia emanda.
3. Ikasketa burutzaren eta idazkaritzaren arduradunak eta, zuzendariordetzarik bada, horren arduraduna kanpoan egonez gero edo gaixotuz gero, ikastetxeko zuzendaritzak izendatzen duen irakasleak hartuko ditu eginkizun horiek bere gain, aldi baterako.
4. Aurreko atalean aipatu arrazoiengatik, ikastetxe bateratuko ikasketa burutzaren eta idazkaritzaren arduradunek eta, zuzendariordetzarik bada, horren arduradunak beren eginkizunak uzten dituztenean, ikastetxe bateratuko zuzendariak proposatzen duen irakaslea izendatuko du Hezkuntza Departamentuak.
Xedapen Indargabetzaile Bakarra. Arauak indargabetzea.
Indarrik gabe gelditu dira foru agindu honetan ezarritakoaren kontrakoak diren maila bereko edo apalagoko arau guztiak.
Azken Xedapen Bakarra. Indarra hartzea.
Foru agindu honek Nafarroako Aldizkari Ofizialean argitaratu eta biharamunean hartuko du indarra.
1. ERANSKINA
Zuzendaritza taldeko kide izateko izendapen proposamena, eta zuzendaritza taldean parte hartzeko proposamena onartzea
................................................................................... jaunak/andreak, ...................................... ikastetxe bateratuko zuzendaritzarako hautagaiak, honako proposamen hau aurkezten du zuzendaritza taldea osatzeko:
1. Zuzendariordea (kargu hori dagoen ikastetxeetan soilik):
Izena: ..................................................................................................
Deiturak: .............................................................................................
Behin betiko destinoko ikastetxea: .....................................................
Destinoko ikastetxea ikasturte honetan: .............................................
Nire aldeko izendapena onartzen dut.
Sinatua:
2. Ikasketaburua:
Ikasketaburua/Alboko ikasketaburua izateko proposatua (kargu hori dagoen ikastetxe bateratuetan baino ez):
Izena: ..................................................................................................
Deiturak: .............................................................................................
Behin betiko destinoko ikastetxea: .....................................................
Destinoko ikastetxea ikasturte honetan: .............................................
Nire aldeko izendapena onartzen dut.
Sinatua:
3. Idazkaria:
Idazkaria/Alboko idazkaria izateko proposatua (kargu hori dagoen ikastetxe bateratuetan baino ez):
Izena: ..................................................................................................
Deiturak: .............................................................................................
Behin betiko destinoko ikastetxea: .....................................................
Destinoko ikastetxea ikasturte honetan: .............................................
Nire aldeko izendapena onartzen dut.
Sinatua:
............................(e)n, 20...ko ........................aren ...........(e)an
(Sinadura)
2. ERANSKINA
Baremazioa. Merezimendu lehiaketa, ebazpen honetan adierazitako ikastetxe bateratu publikoetako zuzendarigaiak hautatzeko
Merezimendu profesionalen eta akademikoen balorazioan 10 puntu lortzen ahalko dira gehienez.
1. atala. Zuzendari lanetako esperientziaren balorazioa (4 puntu gehienez).
1.1. Ikastetxe bateratu publiko batean zuzendari karguan aritutako urte bakoitzeko:
–0,70 puntu.
1.2. Ikastetxe publiko batean zuzendari karguan aritutako urte bakoitzeko:
–0,50 puntu.
1.3. Ikastetxe bateratu publiko batean, ikasketaburu, zuzendariorde edo idazkari karguan aritutako ikasturte bakoitzeko:
–0,40 puntu.
1.4. Ikastetxe publiko batean, ikasketaburu, zuzendariorde edo idazkari karguan aritutako ikasturte bakoitzeko:
–0,30 puntu.
1.5. Ikastetxe bateratu publiko batean alboko zuzendaritza karguetan aritutako urte bakoitzeko:
–0,30 puntu alboko ikasketaburu edo alboko idazkari gisa aritutako urte bakoitzeko.
1.6. Ikastetxe publiko batean alboko zuzendaritza karguetan aritutako urte bakoitzeko:
–0,40 puntu alboko zuzendari gisa aritutako urte bakoitzeko.
–0,20 puntu alboko ikasketaburu edo alboko idazkari gisa aritutako urte bakoitzeko.
Urte zatiak baloratu behar direnean, 1/12 puntu emanen da hilabeteko.
2. atala. Lanbideko esperientziaren balorazioa (4 puntu gehienez).
2.1. Ikastetxe bateratu publiko batean karrerako funtzionario gisa egindako irakasle lana, baldintza gisa eskatzen diren bi urteetatik gorako urte bakoitzeko:
–0,20 puntu.
2.2. Ikastetxe publiko batean karrerako funtzionario gisa egindako irakasle lana, baldintza gisa eskatzen diren bost urteetatik gorako urte bakoitzeko:
–0,15 puntu.
2.3. Ikastetxe publiko batean, departamentuko buru gisa egindako zerbitzu-urte bakoitzeko:
–0,15 puntu.
2.4. Ikastetxe publiko batean, lanbide heziketako heziketa zikloaren koordinatzaile gisa egindako zerbitzu-urte bakoitzeko.
–0,15 puntu.
2.5. Nafarrroako Hezkuntza Departamentuan, ikuskatzaile edo bulegoburu gisa edo hortik gorako karguetan, edo irakaskuntzako aholkulari lanetan eta Estatuko Hezkuntza Administrazioan horien baliokideak diren karguetan, aritutako urte bakoitzeko:
–0,40 puntu.
Urte zatiak baloratu behar direnean, 1/12 puntu emanen da hilabeteko.
3. atala. Prestakuntza eta hobekuntza (1 puntu gehienez).
3.1. Ikastetxe bateratuen kudeaketarekin, antolaketarekin eta zuzendaritzarekin edo ikastetxe horien eginkizun, helburu eta xedeekin zerikusia duten prestakuntza jarduerengatik:
–0,10 puntu, egiaztatutako 10 prestakuntza orduko.
3.2. Ikastetxe bateratuen kudeaketarekin, antolaketarekin edo zuzendaritzarekin edo ikastetxe horien eginkizun, helburu eta xedeekin zerikusia duten prestakuntza jardueretan irakasle gisa aritzeagatik:
–0,20 puntu, egiaztatutako 10 prestakuntza orduko.
Xede horrekin, jarduera guztietako prestaketa orduen batuketa eginen da, eta ez da puntuaziorik emanen 10 ordutik beheitikoengatik. Prestakuntza jarduerak kreditutan –eta ez ordutan– adierazten badira, kreditu bakoitzak 10 orduren balioa izanen du.
3.3. Ikastetxeen kudeaketarekin, antolaketarekin eta zuzendaritzarekin, hezkuntza kalitatearen ezarpenarekin edo eskolako bizikidetzarekin zerikusia duten prestakuntza jarduera gaindituengatik:
–0,10 puntu, egiaztatutako 30 prestakuntza orduko.
3.4. Ikastetxeen kudeaketarekin, antolaketarekin eta zuzendaritzarekin, hezkuntza kalitatearen ezarpenarekin edo eskolako bizikidetzarekin zerikusia duten prestakuntza jardueretan irakasle gisa aritu izateagatik:
–0,20 puntu, egiaztatutako 30 prestakuntza orduko.
Xede horrekin, jarduera guztietako prestaketa orduen batuketa eginen da, eta ez da puntuaziorik emanen 30 ordutik beheitikoengatik. Prestakuntza jarduerak kreditutan –eta ez ordutan– emanak badira, kreditu bakoitzak 10 orduren balioa izanen du.
3.5. Ikastetxeen kudeaketa, antolaketa eta zuzendaritzarekin, hezkuntza kalitatearen ezarpenarekin edo eskolako bizikidetzarekin zerikusia duten argitalpenengatik, ISBNa edo ISSNa baldin badute:
–0,5 puntu arte.
3.6. Ikastetxe bateratuari dagozkion jardueren kudeaketa eta mantentze-lanentzat beharrezkoa den sinestamendu bakoitzeko:
–0,5 puntu arte.
4. atala. Merezimendu akademikoak (1 puntu gehienez).
4.1. Unibertsitate titulu ofizial bakoitzeko, dagokion irakaskuntza kidegoan sartzeko alegatutakoaz gainera:
–0,50 puntu.
4.2. Unibertsitateko master titulu ofizial bakoitzeko edo ikertzeko nahikotasunaren sinestamendu bakoitzeko, dagokion irakaskuntza kidegoan sartzeko alegatutakoaz gainera:
–0,25 puntu.
4.3. Unibertsitate bateko unibertsitate-titulu bereki bakoitzeko:
–0,15 puntu.
4.4. Doktore titulu bakoitzeko:
–0,40 puntu.
4.5. Hizkuntzak jakiteagatik (hizkuntza bakoitzean, hautagaiak aurkezten duen maila altueneko ziurtagiria hartuko da kontuan bakarrik):
–0,50 puntu B2 mailako edo balio bereko ziurtagiri bakoitzeko.
–0,40, puntu C1 mailako edo balio bereko ziurtagiri bakoitzeko.
–0,30 puntu B2 mailako edo balio bereko ziurtagiri bakoitzeko.
3. ERANSKINA
Ikastetxe bateratu publikoetako zuzendaritza lana ebaluatzeko arloak eta adierazleak
Arloak eta adierazleak.
1. Zuzendaritza proiektuaren garapena, ikastetxe bateratuko proiektu funtzionalaren garapena, eta, kasua bada, ikastetxe bateratuko helburu, ikuspegi eta balioena.
–Indarrean izan den bitartean, bai klaustroak bai eskola kontseiluak zuzendaritza proiektuaren ildo orokorrak ezagutzen dituzte.
–Ikastetxe baterako urteko jarduketa plana eta haren atal guztiak bat datoz zuzendaritza proiektuarekin eta proiektu funtzionalarekin, eta horietan ezarritakoa gauzatzen dute.
–Zuzendariak, aldian behin, proiektuaren berri ematen die ikastetxe bateratuko organoei.
–Ikasturte osoan zehar, zuzendariak bere zuzendaritza proiektuaren ebaluazio sistematikoa egiten du.
2. Zuzendariak lidergoa partekatzen du.
–Zuzendariak lanak partekatu eta eskuordetzen dizkie ikastetxe bateratuko beste organo batzuei, erregelamenduzko bideei segituz.
–Zuzendariak behar diren mekanismoak ezartzen ditu ikastetxe bateratuko bilerak eraginkorrak eta eragimenekoak izan daitezen.
–Zuzendariak berrelikadura handia ematen die irakasleei, eta informazioa trukatzeko kultura sortzen da.
–Zuzendariak erabiltzen dituen kudeaketa sistemek sormena, berrikuntza eta ezagutzaren kudeaketa dinamikoa sustatzen dute, bikaintasuna bilatzeko politika baten barnean.
–Zuzendariak, irakasleak lanaren bidez gogobete daitezen, eskura jartzen dizkie baliabide funtzional, teknologiko eta materialak.
–Zuzendariak ikastetxe bateratuko eskola-elkartearekin komunikatzeko bide errazak sortzen ditu.
–Zuzendariak ikastetxeko ebaluazioak, bai barnekoak bai kanpokoak, bultzatzen ditu eta/edo haietan hartzen du parte.
–Zuzendariak ebaluazioetatik heldu diren zuzenketak eta hobetzeko neurriak aplikatzen ditu.
3. Zuzendaritzak malgutasun, eraginkortasun eta motibazio irizpideen arabera antolatzen du ikaskuntza-irakaskuntza prozesua, giltzarri den prozesua.
–Programazio didaktikoak eta ikastetxe bateratuaren baliabideak koordinatuta daude.
–Giza kapitala eraginkortasunez eta eragimenez kudeatzen du.
–Ikastetxe bateratuko ikasleen hezkuntza laguntzarako berariazko premiei arreta eraginkorra emateko behar diren baliabideak eta estrategiak artikulatzen ditu.
–Ikasleen eta irakasleen ordutegiak irizpide pedagogikoei jarraikiz kudeatzen dira.
–Sistematikoki ebaluatzen ditu emaitza akademikoak, helburuen betetze maila eta interesa duten talde guztien gogobetetasuna.
–Ebaluazioetatik heldu diren zuzenketak egiten ditu eta hobetzeko neurriak hartzen ditu.
4. Taldekako lana eta ikastetxe bateratuko organoen arteko lankidetza.
–Zuzendariak erregelamenduzko egitura batzuk beste batzuekin elkartzen ditu, taldekako lana eta elkarlana bermatzeko.
–Bere jardunean negoziazioaren eta adostasunaren bidez lortutako erabakiei ematen die lehentasuna.
–Erabakiei jarraipena eta ebaluazioa egiteko mekanismoak jartzen dira.
–Ikastetxe bateratuan parte hartzeko organoek eta koordinaziorako organoek koordinaturik eta eraginkortasunez jarduten dute.
–Klaustroko bilerak ongi programatuta daude eta kide guztien parte-hartzea sustatzen da.
–Ikastetxe bateratuko organoek behar adina baliabide operatibo dituzte (giza baliabideak eta baliabide teknologikoak, funtzionalak eta materialak) beren lana eraginkortasunez egiteko.
5. Zuzendariak egoki zaintzen ditu ikastetxe bateratuko elkarbizitza harremanak.
–Zuzendaritzak ikastetxe bateratuaren balioak eta gatazken prebentzioa sustatzen ditu.
–Ikastetxe bateratuko zuzendaritzak elkarbizitza sustatzen du, bitartekotza bermatzen du gatazkak konpontzeko, eta ikasleei behar dituzten hezkuntza neurriak ezartzen dizkie.
–Ikastetxe bateratuko zuzendaritza sentibera da eta, gatazkak sortzen direnean, haietan parte hartzen du bitartekaritza guneak sortuz.
–Ikastetxeak gainbegiratzeko mekanismoak ditu, bizikidetza erregelamenduko arauak betetzea errazteko.
–Zuzendariak irakasleen eta bestelako langileen arteko harremana ona izan dadila zaintzen du, baita informazio bide eta bitarteko eraginkorrak izan daitezela ikastetxeko kide guztiek bizikidetza plana ezagut dezaten.
–Bizikidetza arazoak egoki konpontzen dira, gatazkan sartutako pertsona guztien bertsioak kontuan hartuz.
6. Zuzendariak lanbide heziketako ikastetxe bateratuei dagozkien irakaskuntzaren eta jardueren garapenarekin zerikusia duten proiektuak sustatu eta kudeatzen ditu.
–Zuzendariak behar duena egiten du ikastetxe bateratuak parte har dezan Hezkuntza Departamentuak edo beste erakunde batzuek antolatzen dituzten berrikuntza, ekimen, nazioarteratze eta mugikortasun proiektuetan.
–Zuzendariak behar duena egiten du ikastetxe bateratuak dagozkion jarduerak egin ditzan (osoko prestakuntza, lanbide arloko informazio eta orientazioa, ebaluazio prozesua, lanbide gaitasunak egiaztatzea edo dagokion beste edozein jarduera).
–Zuzendariak Hezkuntza Departamentuak proposatutako prestakuntza eskaintza eta modalitateak sustatu eta kudeatzen ditu ikastetxe bateratuan.
–Zuzendariak berrikuntza metodologiko eta didaktikoa sustatzen du ikastetxe bateratuan.
–Ikastetxe bateratuko zuzendariak pertsonen lanbide kualifikaziorako ekintza eta ekimenak lagundu eta sustatzen ditu, irakaskuntza eta ikaskuntza prozesuak enpresan eta ikastetxe bateratuan konbinatuz.
–Ikastetxe bateratuak lanbide arloko informazio eta orientazioa bermatzeko erraztasunak ematen ditu zuzendariak, hala ikasleentzat nola ikastetxeari lotutako pertsona guztientzat.
–Zuzendariak lankidetza hitzarmenak sustatzen ditu, ikastetxe bateratuaren eta enpresen, erakundeen, enplegu zerbitzuen eta beste administrazio batzuen artekoak.
–Zuzendariak egoki kudeatzen du aurrekontua.
7. Zuzendariak ikastetxe bateratuaren ordezkaritza instituzionala bere gain hartzen du.
–Administrazioek eta, bereziki, Hezkuntza Departamentuak eskatutako aginduzko dokumentazioa epe barnean betetzen eta bidaltzen du.
–Baliabide osagarriak lortzeko prozedurak ezartzen ditu.
–Dokumentuen kudeaketari lotutako erantzukizunak behar bezala finkatuta daude, hala inprimakietan, nola euskarri informatikoetan.
–Agiriak prestatzen dira Hezkuntza Departamentuak dokumentuak kudeatzeko ezartzen dituen irizpideei jarraikiz.
–Ikastetxe bateratuak bere jarduerak garatzeko behar duen dokumentazio osagarria ongi finkatua du.
–Hezkuntza, Kultura eta Kirol Ministerioarekin, Nafarroako Foru Komunitateko Administrazioko Hezkuntza Departamentuarekin eta gainerako hezkuntza administrazioekin lankidetzan aritzeko estrategia egokiak ezartzen ditu.
–Nafarroako Foru Komunitateko gainerako ikastetxe bateratuekin eta Erreferentzia Nazionaleko gainerako ikastetxe bateratuekin lankidetzan aritzeko estrategia egokiak ezartzen ditu.
–Ikastetxe bateratuari dagokion lanbide sektorearen gizarte eragile eta profesionalekin lankidetzan aritzeko estrategiak egokiak ezartzen ditu, hala nola: enpresaburuen elkarteak eta sindikatuak, lanbide elkarte eta elkargoak, sektoreko enpresaburuen elkarteak eta enpresak, toki entitateak eta lanbide heziketarekin zerikusia duen beste edozein entitate.
