navarra.es
Castellano | Euskara | Français | English
Ezagutzera eman
31/2012 FORU AGINDUA
31/2012 FORU AGINDUA, APIRILAREN 3KOA, HEZKUNTZAKO KONTSEILARIAK EMANA, NAFARROAKO GOBERNUKO HEZKUNTZA DEPARTAMENTUAREN MENPEKO IKASTETXE PUBLIKOETAKO LANBIDE HEZIKETAKO ETA ARTE PLASTIKOETAKO ETA DISEINUKO IRAKASKUNTZETAKO IKASLE ETA IRAKASLEEN ATZERRIKO PRESTAKUNTZA EGONALDIAK ARAUTZEN DITUENA
(2012ko 95. NAOn argitaratutako testua, maiatzaren 21ean)
Atarikoa
Europako herrialdeen ekonomia eta, horrenbestez, gehien eskatzen diren lanbideak, merkatu lehiakor eta globalizatu batean murgilduta daude eta, hor, gure enpresen nazioartekotzeak balioa hartzen du lehiakortasun estrategikoaren aldetik haien garapenerako.
Ildo horretan, maiatzaren 26ko 54/2008 Foru Dekretuak, lanbide heziketaren antolamendua eta garapena Nafarroako Foru Komunitatearen hezkuntza sisteman arautzen baitu, lanbide heziketaren nazioartekotzea ezartzen du, estrategia gisa, 27. artikuluan. Artikulu horretan zehazten da lanbide heziketako ikastetxeek ikasle eta ikasleentzako nazioarteko mugikortasun proiektuetan hartuko dutela parte, eta Hezkuntza Departamentuak bultzatuko dituela ekintza horiek.
Nazioarteratzeko estrategia gisa ere, abuztuaren 9ko 44/2010 Foru Dekretuaren 23. artikuluan, antzeko helburu eta ekintzak ezartzen dira; izan ere, dekretu horrek arte plastikoen eta diseinuaren lanbide ikasketen antolamendua eta garapena arautzen ditu Nafarroako Foru Komunitatearen esparruan.
Lanbide Heziketaren Zerbitzuak txostena aurkeztu du, Nafarroako Gobernuko Hezkuntza Departamentuaren menpeko ikastetxe publikoetako Lanbide Heziketako eta Arte Plastikoetako eta Diseinuko Irakaskuntzetako ikasle eta irakasleen atzerriko prestakuntza egonaldiak arautzearen alde.
Horrenbestez, Nafarroako Gobernuari eta lehendakariari buruzko abenduaren 3ko 14/2004 Foru Legearen 41. artikuluko 1. idatz-zatiko g) letran ematen zaizkidan ahalmenak erabiliz, hauxe, agindu dut:
1. artikulua
Nafarroako Gobernuko Hezkuntza Departamentuaren menpeko ikastetxe publikoetako Lanbide Heziketako eta Arte Plastikoetako eta Diseinuko Irakaskuntzetako ikasle eta irakasleen atzerriko prestakuntza egonaldietarako arauak onestea.
2. artikulua
Foru agindu hau eta eranskinak Nafarroako Aldizkari Ofizialean argitaratzea.
3. artikulua
Foru agindu hau eta eranskinak Hezkuntzaren, Lanbide Heziketaren eta Unibertsitateen Zuzendaritza Nagusiari, Ogasun Departamentuak Hezkuntza Departamentuan duen kontu-hartzaileari, Lanbide Heziketaren Zerbitzuari, Hezkuntzako Ikuskapen Zerbitzuari, Berrikuntzaren, Enpresaren eta Lanbide Heziketa Nazioartekotzearen Atalari, Aurrekontu eta Kudeaketa Ekonomikoaren Atalari, Lanbide Heziketa Nazioarteratzeko Bulegoari eta Kudeaketa Ekonomikoaren Bulegoari igortzea, behar diren ondorioak izan ditzaten.
I. ERANSKINA. Nafarroako Gobernuko Hezkuntza Departamentuaren menpeko ikastetxe publikoetako Lanbide Heziketako eta Arte Plastikoetako eta Diseinuko Irakaskuntzetako ikasleen atzerriko prestakuntza egonaldiak
Lehenbizikoa. Xedea.
Nafarroako Gobernuko Hezkuntza Departamentuaren menpeko ikastetxe publikoetako Lanbide Heziketako eta Arte Plastikoetako eta Diseinuko Irakaskuntzetako ikasleen atzerriko prestakuntza egonaldiak arautzea du xede eranskin honek.
Bigarrena. Atzerriko prestakuntza egonaldien ezaugarri orokorrak.
Hezkuntza Departamentuak, Lanbide Heziketan ari diren ikasleen prestakuntza atzerriko enpresetan bultzatzearren, proiektuak garatuko ditu Leonardo da Vinci, Erasmus edo beste programa batzuen esparruan.
Europako enpresetan prestakuntza osagarria izan nahi duten erdi edo goi mailako ikasleentzat da Leonardo da Vinci programa.
Beren heziketa zikloko Lantokiko Prestakuntzaren modulua Europar Batasuneko beste herrialde batean egin nahi dutenentzat da Erasmus programa.
Prestakuntza programa horiek garatzeko, kontratua edo hitzarmena eginen da dagokion finantza erakunde edo entitatearekin.
Egonaldi horiek, oro har, hamahiru astekoak izanen dira, eta Lanbide Heziketaren Zerbitzuaren bitartez kudeatuko dira.
Hirugarrena. Parte hartzaileak.
Atzerriko prestakuntza egonaldietan parte hartzeko interesa duten ikastetxe publikoek egonaldi horiek kudeatzen, garatzen eta ebaluatzen jardun beharko dute, baita atzerriko ikasleek Nafarroan egiten dituzten egonaldien harreran ere.
Proiektu horietan parte hartzeko, egonaldien aurreko ikasturteko lehen hiruhilekoan eginen dute ikastetxe interesdunek parte hartuko duten ikasleen eskaera. Eskaeran, datu pertsonalez gain, zein hizkuntzatan egin gogo den egonaldia, zer espezialitatetan ari diren eta zein herrialde hobesten diren zehaztuko da.
Ikastetxeak, eskatzen diren baldintzak betetzen direla egiaztatu ondoren eta, ikasle interesdunekin batean, eskaera eginen du zerbitzuen katalogoko inprimaki elektronikoaren bitartez.
Inprimaki elektronikoaz gain, egonaldi horien eskatzaileek dokumentu hauek aurkeztu beharko dituzte ikastetxean:
a) Parte hartzaileek bere egin behar dituzten konpromisoei buruzko dokumentua.
b) Curriculum Vitae Europass ingelesez.
c) Eskatutako baldintzen frogagiriak eta ezarritako baremorako behar den dokumentazio osagarria.
Curriculum Vitae Europass betetzen eta laguntzak hautatu eta esleitzeko prozesu guztia ulertzen laguntzeko, Nafarroako Gobernuaren Zerbitzuen Katalogoan argitaratuko dira informazioa eta dagozkion ereduak.
Laugarrena. Laguntzen esleipena.
Oro har, proiektu bakoitzean eta finantza entitatearekin izenpetutako hitzarmen edo kontratu bakoitzean zehaztuko da eskatzaileen artean guztira esleitzen ahal den plaza kopurua.
Dena dela, Hezkuntza Departamentuak laguntzen zenbatekoa eta plaza kopurua handitzen ahalko ditu finantzabide berekiaren bidez.
Laguntza horien onuradunek jasotzen duten zenbatekoa ostaturako, mantenurako eta destinoko herrialderainoko garraiorako izanen da. Parte hartzaile bakoitzak Nafarroako Gobernuaren Zerbitzuen Katalogoan argitaratutako tauletan ezarritakoa jasoko du; destinoa Europan denean, Hezkuntza eta Zientzia Ministerioak Europako Hezkuntza Programen Erakunde Autonomoaren bidez (OAPEE) destinoko herrialde bakoitzerako onesten duena izanen da.
Lanbide Heziketaren Zerbitzuak kudeatuko ditu esleitutako funtsak, egonaldiak antolatzeko, enpresak atzerrian bilatzeko eta hizkuntza prestakuntzarako, zerbitzu horiek Europako enpresa eta bazkideekin koordinatzearren.
Ikasleek parte hartzeko bete beharreko baldintzak:
1. Portaera faltarik ez izatea ikastetxean.
2. Parte hartu ez izatea beste prestakuntza egonaldi batean atzerrian, erakunde publikoek finantzaturik.
3. Egonaldia hasi ahal izateko adinako maila izatea destinoko herrialdeko hizkuntzan.
4. Atzerrira joateko behar diren dokumentazioa edo baimenak izatea.
5. Lantokietako Prestakuntza programa honen bidez egiten dutenei, egonaldien aurreko hiruhilekoan gehienez modulu bat gainditu gabe izatea eskatuko zaie.
Ikastetxe bakoitzak aurreko baldintzak betetzen dituzten ikasleak hautatu eta antolatuko ditu, hizkuntzaren, espezialitatearen eta destinoko herrialdearen arabera, baremo irizpide hauei jarraituz:
1. Aukeratzen den espezialitateko lehen kurtsoko ikasketa espedientea: 70 puntu, gehienez.
2. Lan esperientziaren balorazioa: 10 puntu, gehienez.
3. Prestakuntza egiaztatua hizkuntzetan: 20 puntu, gehienez.
Gainera, Lanbide Heziketa Nazioarteratzeko Bulegoak buruz buruko elkarrizketa eginen die ikastetxe bakoitzak proposatutako ikasleei, honako hauek egiaztatzeko:
1. Programarako interesa eta haren ezagutza.
2. Komunikaziorako eta hizkuntzetarako trebetasunak.
Egonaldietan parte hartu ahal izateko, elkarrizketatuek "gai" kalifikazioa lortu beharko dute.
Hautapen prozesuaren bi fase horietako emaitzekin, Hezkuntza Departamentuak izangaien behin-behineko zerrenda prestatuko du, hizkuntzaren eta espezialitatearen arabera, laguntzak ateratzen den ordenaren arabera esleitzearren.
Onartutako eskatzaileen zerrenda hori Nafarroako Gobernuaren Zerbitzuen Katalogoan argitaratuko da. Orobat, posta elektronikoz jakinaraziko zaizkie zerrenda horiek Lanbide Heziketako ikastetxeei, iragarki oholean jendaurrean jar ditzaten.
Zenbat plaza dauden harrerako enpresetan lanbide profil bakoitzerako, horren arabera esleituko zaizkie destinoak parte hartzaileei, hizkuntza, espezialitatea eta baremoa kontuan hartuta. Ahal den kasuetan, lehenetsitako herrialdea esleituko da.
Nafarroako Gobernuaren Zerbitzuen Katalogoan eta prestakuntzako ikastetxeetan emanen da onuradunen behin betiko zerrendaren eta herrialde bakoitzean esleitutako zenbatekoaren berri.
Bosgarrena. Laguntzen ordainketa.
Prestakuntza egonaldiak Europan egiten dituzten onuradunek Europar Batasunak eta Europako Hezkuntza Programen Erakunde Autonomoak (OAPEE) mugikortasun tauletan esleitutako zenbatekoa, Nafarroako Gobernuaren Zerbitzuen Katalagoan argitaratua, jasoko dute.
Prestakuntza egonaldia Europan ez beste herrialde batzuetan egiten dutenek lortutako laguntza ere Nafarroako Gobernuaren Zerbitzuen Katalogoan argitaratuko da, eta finantza erakundearekiko hitzarmenean edo kontratuan jasoko da.
Finantzabide horrekin ordaindu beharko dituzte bidaia, ostatua eta mantenua.
Seigarrena. Egonaldien garapena, antolaketa eta jarraipena.
Oro har eta guztira, hamahiru aste iraunen dute atzerriko prestakuntza egonaldiek, era honetan banatuta:
Lehen bi asteak hizkuntza prestakuntzarako izaten dira. Gainontzeko hamaika asteek osatzen dute enpresan egiten den prestakuntza egonaldia.
Hezkuntza Departamentuak izanen du ardura kudeaketa hauek egiteko:
-Destinoa esleitzea, ikasleak hartzeko gauza diren enpresak ikusita.
-Bidaia antolatzea.
-Istripu asegurua eta erantzukizun zibilekoa kontratatzea.
-Ostatua eta enpresa bilatzea, bazkideekin lankidetzan.
-Egonaldien jarraipen eta tutoretza lana egitea inprimaki elektronikoen bidez, onuradunek zenbait kudeaketa beren ikastetxearekin egitea edo jarraipen eta ebaluazioko beste dokumentu batzuk betetzea galarazi gabe, egonaldi horien kudeaketan ari diren Europako bazkideek eskatuta.
Zazpigarrena. Jarraipena eta ebaluazioa.
Proiektuko parte hartzaileek jarraipenerako material batzuk izanen dituzte, enpresako tutorearekin bete ditzaten prestakuntza egonaldian. Material horiek hiru eredu dira, batez ere: asteko txostena betetzeko eredua, enpresan agertu izana frogatzen duen eredua eta azken ebaluaziorako eredua. Eredu horiek Nafarroako Gobernuaren Zerbitzuen Katalogotik behera kargatzen ahalko dira.
Dokumentu horiez gain, prestakuntza egonalditik itzulita Hezkuntza Departamentuan aurkeztu beharko baitira, parte hartzaileek inprimaki elektroniko hauek beteko dituzte:
1. Enpresaren datu guztiak jasotzen dituen inprimakia, Nafarroako Gobernuaren Zerbitzuen Katalogoan sartuta.
2. Egonaldien jarraipenaren hiru txosten, parte hartzaileek praktiketan egindako bideari buruzko datuak izateko. Nafarroako Gobernuaren Zerbitzuen Katalogoan eskuratzen ahal dira horiek ere.
3. Egonaldiari buruzko balorazio soil bat Hezkuntza Departamentuarentzat, helbide elektroniko berean eskuragarri.
4. Leonardo da Vinci programari lotutako egonaldien kasuan, egonaldiari buruzko azken txostena aurkeztuko zaio Leonardo da Vinci Agentzia Nazionalari (Europako Hezkuntza Programen Erakunde Autonomoaren parte da), Europar Batzordeak diseinatutako Mobility Tool izeneko aplikazioa beteta. Nahitaezkoa da azken txosten hori betetzea.
Gainera, Europan egindako egonaldietan, Lanbide Heziketako ikastetxeekin lankidetzan, EUROPASS ziurtagiria eskatuko da Europass Agentziak prestatutako aplikazio informatikoaren bidez. Ziurtagiri horren kudeaketan proiektuko agente guztiak sartuko dira: Hezkuntza Departamentua, Lanbide Heziketako ikastetxea, Europako enpresa eta interesduna.
Zortzigarrena. Onuradunaren betebeharrak.
1. Prestakuntza egonaldia egiaztatzeko behar den dokumentazioa betetzea.
2. Hezkuntza Departamentuak prestakuntza egonaldirako ezarritako antolaketa eta baldintzak onartzea.
3. Nahitaez joatea hizkuntza klaseetara destinoko antolaketan ezarritako epealdietan. Klaseak arrazoi justifikaturik gabe hiru egunez huts eginez gero, kurtsotik botako da eta egonaldiaren ziurtagirian jasoko da.
4. Kortesiazko ohiko arauak betetzea familia, errentari eta auzoekin, eta ondasun higiezinak errespetatzea. Bizikidetasun arauak betetzen ez badira, programatik kanporatuta izan daiteke.
5. Nahitaez joatea enpresara ezarritako epealdian, laneko orduetan. Edozein ausentziagatik, parte hartzaileak frogagiri bat (osasun arlokoa edo bestelakoa) aurkeztu beharko du harrerako enpresan. Justifikatu gabeko hutsak enpresaren txostenean jasoko dira.
Bederatzigarrena. Ez-betetzeak eta laguntza deuseztatzea.
Hezkuntza Departamentuak laguntza baliogabetzen ahalko du edo hura osorik edo zati bat itzultzeko eskatu, onuradunek arau honetan edo egonaldiak finantzatzen dituen erakundearen arauetan ezarritako betebeharrak eta antolaketa betetzen ez dituztenean.
Beren kabuz eta Hezkuntza Departamentuak berariaz baimendu gabe egonaldia uzten duten parte hartzaileek nahiz bazkideek edo harrerako enpresek modu justifikatuan kanporatzen dituztenek laguntza osorik ordaindu beharko dute.
Prestakuntza egonaldian, parte hartzailea Lantokietako Prestakuntzaren modulua egiten ari bada, beharkizunak betetzen ez baditu, laguntza baliogabetzeaz gain, "ez gai" kalifikazioa emanen zaio prestakuntza modulu horretan, eta behartua egonen da berriro egitera bere espezialitateko titulua lortuko badu.
Orobat, parte hartzaileak egonaldia hasi aurreko hiru hilabetean uzten badu programa, hura prestatzen eragindako gastuak ordaindu beharko ditu.
II. ERANSKINA. Nafarroako Gobernuko Hezkuntza Departamentuaren menpeko ikastetxe publikoetako Lanbide Heziketako eta Arte Plastikoetako eta Diseinuko Irakaskuntzetako irakasleen atzerriko prestakuntza egldiak
Lehenbizikoa. Xedea.
Nafarroako Gobernuaren menpeko ikastetxe publikoetako Lanbide Heziketako eta Arte Plastikoetako eta Diseinuko Irakaskuntzetako irakasleen atzerriko prestakuntza egonaldiak arautzea du xede eranskin honek.
Bigarrena. Irakasleen atzerriko prestakuntza egonaldien ezaugarri orokorrak.
Hezkuntza Departamentuak, Lanbide Heziketako edo Arte Plastikoetako eta Diseinuko irakaskuntzetako irakasleen eguneratze teknologikoa eta hizkuntzetako hobekuntza bultzatzeko helburuz, proiektu bat edo gehiago garatuko ditu Leonardo da Vinci programaren edo beste batzuen esparruan.
Finantzabidearen ardura duen erakundeak edo entitateak proiektua onetsitakoan, hitzarmena edo kontratua eginen da, eta onartutako plazak esleituko dira, zein den erabilitako hizkuntza, zein herrialdetarako den eta zer baremo ezarri den arau honetan kontuan hartuta. Dena dela, Hezkuntza Departamentuak plaza kopurua handitzen ahalko du finantzabide berekiaren bidez.
Prestakuntza egonaldia bukaturik eta, parte hartzaileak arau honetan eta finantzabidearen beraren araudian ezarritako betebehar guztiak beterik, egonaldian sortutako gastuen zenbatekoa jasoko du (erakunde horrek destinoko herrialde bakoitzerako tauletan ezarritako zenbatekoa, gehienez ere), eta Nafarroako Gobernuaren zerbitzuen katalogoan argitaratuko dira.
Hirugarrena. Eskaerak.
Interesdunek egonaldiaren aurreko ikasturteko urrian eskatuko dute proiektuan parte hartzeko.
Ezinbestekoa da dokumentazio hau aurkeztea, proiektuan parte hartzeko:
1. Eskabidea.
2. Curriculum vitae-a.
3. Egin gogo den jardueraren deskripzio zehatza, denboraren arabera.
4. Enpresarekiko lankidetza akordioa, sinatua eta zigilatua.
Ikastetxe bakoitzeko nazioarteratze arloko arduradunak eman ditzake eskaera egiteko aipatu lehen hiru dokumentuen ereduak, edo zerbitzuen katalogoan deskargatzen ahal dira, eta Hezkuntza Departamentuaren erregistroan aurkeztuko dira, baita posta elektronikoz ere Lanbide Heziketa Nazioarteratzeko Bulegoan.
Enpresarekin lankidetzan aritzeko akordioa formatu digitalean igortzen ahalko da posta elektronikoaren helbide berera. Laguntza esleitzen den unean aurkeztu beharko da dokumentu horren jatorrizkoa.
Laugarrena. Laguntzen esleipena.
Izangaien betebeharrak:
-Jardunean izatea, bai eskatzeko unean bai egonaldian, Nafarroako Gobernuko Lanbide Heziketako edozein ikastetxe publikotan edo Arte Eskolatan.
-Behar adinako hizkuntza maila izatea egonaldia hasteko.
-Eskatzailearen espezialitateari edo irakaslanari zuzenean lotutako lan programa bat aurkeztea.
Egonaldia irakasaldian eginez gero, ontzat eman beharko du ikastetxeko zuzendaritzak. Gainera, aldeko txostena beharko da, Ikuskapen Zerbitzuak emana.
Aurreko baldintzak betetzen dituzten izangaiak honela ordenatuko dira:
-Lehendabizi: prestakuntza ikastetxean behin betiko destinoa duten izangaiak.
-Bigarrenik: ikastetxean behin betiko destinorik ez duten izangaiak.
Atal bakoitzaren barrenean, beren profilari egokitutako enpresarekin hitzarmena duten izangaiak hobetsiko dira.
Plaza baino eskatzaile gehiago izatera, baremoaren arabera lehenetsiko da atal bakoitzean:
-Eskatzailearen parte-hartzea berrikuntza proiektuetan, Nafarroako Gobernuko Hezkuntza Departamentuaren deialdien esparruan. 20 puntu, garatzen den proiektu bakoitzeko.
-Egonaldian programatutako prestakuntza teknologikoaren maila. 10 puntu, gehienez.
Onuradunak hautaturik, Hezkuntza Departamentuak hautatu diren izangaien zerrenda jarriko du ikusgai Hezkuntza Departamentuaren iragarki oholean eta Nafarroako Gobernuaren Zerbitzuen Katalogoan.
Hautatzen diren irakasleek dokumentazio hau aurkeztu beharko dute Lanbide Heziketa Nazioarteratzeko Bulegoan:
-Ikastetxeko zuzendariaren ikus-onetsia, irakaslearen zereginen kargu egiten dela dioena, hura kanpoan denean, egonaldia irakasaldian bada.
-Europako laguntza onartzen dela dioen dokumentua, laguntzaren onuradunak sinatua.
Bosgarrena. Egonaldien garapena, antolaketa eta jarraipena.
Egonaldia, ahal dela, irakaslana egiteko beste irakasle batzuk kontratatu beharrik ez den epealdietan izanen da.
Egonaldi horiek astebetetik sei astera bitartekoak izanen dira.
Parte hartzaileek laguntza onartzeko dokumentu bat sinatuko dute; hartan, laguntzaren ezaugarriak, duten finantzabidea eta egonaldirako kudeaketan eta dokumentazioan lan egiteko konpromisoa jasoko dira.
Parte hartzaileak berak kudeatu beharko ditu harrerako enpresaren bilaketa, garraiobidea eta erabili nahi duen ostatua.
Dena dela, Hezkuntza Departamentuak entitate laguntzaileekiko harremanean laguntzen ahal du, kudeaketa horiek errazteko.
Parte hartzaileek, egonaldia hasi aurreko 15 egunean gutxienez ere, Hezkuntza Departamentuan jasoko dute hartarako behar den dokumentazioa: baimena, kontratua, memoriaren eredua, aseguru poliza eta jarraipenerako materialak.
Atzerriko enpresa bateko prestakuntza egonaldia bukatu ondoren, irakasleek hurrengo dokumentazioa emanen dute Lanbide Heziketa Nazioarteratzeko Bulegoan:
-Prestakuntzaren kontratua eta akordioa, alderdi guztiek sinatua.
-Egonaldiaren memoria, Europar Batzordearen Mobility Tool erreminta bidez prestatua.
-Enpresaren ziurtagiria egonaldiari buruz, prestakuntzaren programa eta burututako jarduerak zehaztuta; Europako Hezkuntza Programen Erakunde Autonomoak egonaldia egin aurretik emanen du horretarako eredua.
-Europass Mobility.
-Izandako gastuen fakturak edo ordainagiriak. Zerrenda bat gehituko zaio, kontzeptu hauek zehaztuta dituela:
- Ostatua.
- Garraioa.
- Hizkuntza prestakuntzaren ikastaroa.
- Ontziratzeko txartela (garraiobide hori erabili bada).
Egonaldia bukatutakoan, Lanbide Heziketa Nazioarteratzeko Bulegoak parte hartzaile bakoitzak hartu beharreko diru-laguntza kalkulatuko du, onuradunak kontzeptu bakoitzeko dituen frogagiriei buruz, laguntzaren zenbatekoaren arabera.
Nafarroako Gobernuaren Zerbitzuen Katalogoan argitaratutako tauletan ezarritakoa da parte hartzaile bakoitzak gehienez ere izanen duen finantzaketa; Europako egonaldietarako, Europako Hezkuntza Programen Erakunde Autonomoak ezarritakoa izanen da.
Dagozkion zenbatekoak onuradunaren kontuan ordainduko dira, ebazpen arrunt baten bidez.
Seigarrena. Egonaldien ebaluazioa.
Lanbide Heziketa Nazioarteratzeko Bulegoak irakasleen prestakuntza egonaldiei jarraipena egin eta ebaluatzeko sistema bat ezarriko du.
Zazpigarrena. Onuradunaren betebeharrak.
Laguntzen onura jasotzen duten irakasleek, oinarri hauetan ezarritakoa betetzeaz gain, kudeaketan, dokumentazioan eta honelako proiektuetarako baldintzak betetzeko behar diren beste ekintza guztietan hartuko dute parte.
Zortzigarrena. Ez-betetzeak eta laguntza deuseztatzea.
Hezkuntza Departamentuak laguntza baliogabetzen ahalko du edo hura osorik edo zati bat itzultzeko eskatu, onuradunek arau honetan edo egonaldiak finantzatzen dituen erakundearen arauetan ezarritako betebeharrak eta antolaketa betetzen ez dituztenean.
