navarra.es
Castellano | Euskara | Français | English
Ezagutzera eman
511/2000 Foru Agindua, abenduaren 15ekoa, Hezkuntza eta Kultura kontseilariak emana, Nafarroako Lanbide Heziketaren Kontseiluko antolamenduaren eta funtzimendu araubidearen Erregelamendua onesten duena
(2001eko 13. NAOn argitaratutako testua, urtarrilaren 29an)
Atarikoa
Nafarroako Lanbide Heziketaren Kontseilua sortu eta arautzen duen uztailaren 3ko 247/2000 Foru Dekretuaren arabera (abuztuaren 23ko Nafarroako Aldizkari Ofizial), Kontseilua Lanbide Heziketaren arloan parte-hartze instituzional eta soziala izanen duen organoa da; Hezkuntza eta Kultura Departamentuari atxikiko zaio. Departamentuak finantziatuko du aurrekontuen bitartez.
Kontseilua garatzeko prozesuan, urriaren 30eko 351/2000 Foru Dekretuaren bidez (azaroaren 20ko Nafarroako Aldizkari Ofizial), organo horretako kideak izendatu dira; orain beharrezkoa da funtzionamenduaren Erregelamendua onestea.
Foru Agindu honen xedea da, 247/2000 Foru Dekretuko xedapen gehigarrian ezarritakoari jarraikiz, aipatu organo kolegiatuaren antolamenduaren eta funtzionamendu araubidearen Erregelamendua onestea. Erregelamendua bost Titulutan banatuta dago: izaera eta funtzioak, antolamendua, funtzionamendu araubidea, araubide ekonomikoa eta Erregelamenduaren beraren aldaketa dira titulu horiek, hurrenez hurren.
Horrenbestez, Nafarroako Lanbide Heziketaren Kontseiluak 2000ko abenduaren 14an eginiko Osoko Bilkuran proposaturik, Ikasketen Antolamendu eta Lanbide Heziketaren Zerbitzuko zuzendariaren adostasun txostena ikusirik, eta Nafarroako Foru Komunitateko Gobernua eta Administrazioa arautzen dituen apirilaren 11ko 23/1983 Foru Legeak emandako ahalmena erabiliz, agindu dut:
Lehena
Nafarroako Lanbide Heziketaren Kontseiluko antolamenduaren eta funtzionamendu araubidearen Erregelamendua onestea. Foru Agindu honi erantsi zaio.
Bigarrena
Foru Agindu hau igortzea Idazkaritza Teknikora, Ikasketen Antolamendu eta Lanbide Heziketaren Zerbitzura, Nafarroako Lanbide Heziketaren Kontseiluko kideei eta Nafarroako Aldizkari Ofizialera, argitara dadin.
Azken Xedapen Bakarra
Foru Agindu honek Nafarroako Aldizkari Ofizialean argitaratu eta biharamunean hartuko du indarra.
ERANSKINA. Nafarroako Lanbide Heziketaren Kontseiluko antolamenduaren eta funtzionamendu araubidearen Erregelamendua
I. TITULUA. IZAERA ETA EGINKIZUNAK
1. artikulua
Nafarroako Lanbide Heziketaren Kontseilua, Lanbide Heziketa arautuaren eta ez-arautuaren arloko aholkularitza organoa eta erakundeek eta gizarteak parte hartzekoa izanen da.
2. artikulua
Kontseiluak Hezkuntza eta Kultura Departamentuan izanen du egoitza, eta bilkurak Foru Komunitateko edozein tokitan egin ahalko ditu.
3. artikulua
Nafarroako Lanbide Heziketaren Kontseiluak bere jarduerak eginen ditu uztailaren 3ko 247/2000 Foru Dekretuan ezarritakoaren arabera (abuztuaren 23ko Nafarroako Aldizkari Ofizial); zehazki, dekretu haren 2. artikuluan aipatzen diren eginkizunak izanen ditu.
II. TITULUA. NAFARROAKO LANBIDE HEZIKETAREN KONTSEILUKO ANTOLAMENDUA
I. KAPITULUA. Xedapen orokorrak
4. artikulua
Nafarroako Lanbide Heziketaren Kontseilua Hezkuntza eta Kultura Departamentuari atxiki zaio.
5. artikulua
247/2000 Dekretuko 3. artikuluan xedatutakoari jarraikiz, Nafarroako Lanbide Heziketaren Kontseilua kontseiluburuak, kontseiluburuordeak, kontseilukideek eta idazkariak osatzen dute.
6. artikulua
1. Kontseilukideek eskubide hauek izanen dituzte:
a) Kontseiluak eskaturik garatzen diren gai edo azterlanen berri izatea.
b) Osoko bilkura berezietarako deialdia egin dadila eskatzea.
c) Proposamenak eta iradokizunak aurkeztea eguneko gai zerrendan sartzeko, bai eta Osoko Bilkuran erabakiak hartzeko edo gai zehatz bat aztertzeko ere.
d) Kontseiluaren ordezkari izatea egintzetan, horretarako mandatua jasotzen duenean; horrek ez du galarazten kontseiluburuak ordezkari izateko duen eginkizun orokorra.
e) Organo bakoitzak behar den aurrerapenarekin bilkuren deialdiaren eta eguneko gai zerrendaren berri izatea, eta eskura izatea zerrendako agiriak eta informazioa eta aurreko bilkurako akta.
f) Boto eskubidea erabiltzea eta boto partikularra ematea, bai eta botoaren zentzua eta haren arrazoiak azaltzea ere.
g) Galdera eta erreguak egitea.
h) Dietei eta bilkurei dagozkien diru konpentsazioak jasotzea. Eskubide hori sindikatuen eta enpresarien elkarteen ordezkari diren kontseilukideek izanen dute.
2. Kontseilukideen betebeharrak dira Osoko Bilkuretan parte hartzea, bai eta, hala denean, dagozkien Lan Batzordeetan ere.
3. Artikulu honen 1. ataleko a), b) eta c) idatz-zatietan arauturiko eskubideak idatziz eta Kontseiluko Idazkaritzaren bitartez erabiliko dira; Idazkaritzak erregistratu eginen du.
7. artikulua
Kontseilukide izaera galdu eginen da:
a) Kontseiluko Idazkaritzan kreditazioa duten instituzio, konfederazio edo erakundeek erabakitako kargu uzteak edo ordezkatzeak izaten direnean.
b) Izendapen edo hautapeneko kargua uzten denean.
c) Kargu publikoetarako desgaitzea edo kargurik gabe uztea dakarren erabaki judizial irmoa izaten denean.
d) Uko egiten denean.
e) Heriotza dela eta.
8. artikulua
Antolamendu eta funtzionamenduari dagokionez, Nafarroako Lanbide Heziketaren Kontseilua ondoko hauek osatuko dute:
a) Osoko Bilkura.
c) Lan Batzordeak.
d) Kontseiluburutza.
e) Idazkaritza
II. KAPITULUA. Osoko bilkura
9. artikulua
1. Osoko Bilkura kontseilukide guztiek osatuko dute, eta eskumenekoak dituen gaien berri izatea eta iritzia azaltzea dagokio.
2. Osoko Bilkurari dagokio, halaber, honako arlo hauen berri izan eta erabakiak hartzea:
a) Erregelamendu hau aldatzeko proposamena, V. tituluan ezarritako prozedurari jarraikiz.
b) Bidezkotzat jotzen diren Lan Batzordeak sortzeko proposamena egitea, titulu honetako III. kapituluan ageri diren baldintzen arabera.
c) Urteko lan plana eta urtean egindako ekintzen memoria onestea.
10. artikulua
1. Osoko Bilkura arrunta urtean bitan eginen da gutxienez; bilkura berezia egin ahalko da kontseiluburuak erabakitzen duenean edo eskubidea duten kideen laurdenak kontseiluburuari zuzendutako idazki bidez eskatzen duenean.
Eskaera idazkian arrazoiak eta zerrendan sartu nahi diren gaiak adierazi beharko dira. Ondoren, kontseiluburuak Osoko Bilkurarako dei eginen du, eskaera Idazkaritzan aurkeztu eta ondoko hilabetearen barruan.
2. Nafarroako Lanbide Heziketaren Kontseiluko jardueraren inguruko gai orokorrak aztertzeko egin ahalko dira osoko bilkurak, baina baita osoko bilkura monografikoak ere, interesa duten gai zehatzei buruz aritzeko.
11. artikulua
1. Osoko Bilkurarako deialdia kontseiluburuak eginen du, eta gutxienez zazpi egun natural lehenago jakinarazi beharko da, ez badu behintzat kontseiluburuak presakotzat jotzen, halakoetan beharrezkoa eta aski izanen baita berrogeita zortzi ordu lehenago egitea. Hala gertatzen denean, presaren arrazoiak azaldu beharko dira deialdian.
2. Osoko Bilkuraren eraketa baliozkoa izanen da, nahiz eta deialdiko baldintzak ez bete, kide guztiak bertan direla aho batez erabakitzen denean.
12. artikulua
1. Osoko Bilkuraren eraketa lehen deialdian baliozkoa izateko behar den quoruma kideen erdiek osatuko dute gutxienez.
2. Quorum hori lortzen ez bada, Osoko Bilkura bigarren deialdian eratuko da, lehenengo deialdia egin eta hogeita lau ordu geroago.
3. Osoko Bilkuraren eraketa bai lehenengo deialdian bai bigarrenean baliozkoa izateko, 1. puntuan ezarritako gehiengoaz gainera, ezinbestekoa izanen da kontseiluburua eta idazkaria edo ordezkoak bertan izatea.
4. Ordezko kontseilukideek eskubide osoko kide gisa jokatuko dute titularrak falta direnean.
13. artikulua
1. Eguneko gai zerrenda kontseiluburuak zehaztuko du. Horretarako kontuan izanen ditu gainerako kideen eskaerak; deialdi eguna baino berrogeita zortzi ordu lehenago, gutxienez, eginen dira eskaera horiek.
2. Aurreko lerroaldeko baldintza beterik, kontseiluburuak gai zerrendan sartuko ditu beti, Kontseiluan eskubidea duten kideen laurdenak edo sindikatuen edo enpresarien ordezkariek batera idatziz aurkeztutako gaiak. Kideen portzentaje txikiagoak aurkezten dituen gaiak sartzea aukerakoa izanen du kontseiluburuak.
14. artikulua
1. Osoko Bilkura bakoitzean akta eginen da; idazkariak fede emanen du eta kontseiluburuak oniritzia.
2. Bilkuren aktetan ondokoa bilduko da:
a) Bertaratuen izen-deiturak, arrazoiren bat emanda bertaratu ez direnak eta arrazoia eman ez eta azaldu ez direnak.
b) Bilkuraren tokia eta denbora.
c) Bilkurako gai zerrenda.
d) Aztertzen diren gaiak eta eztabaidetako puntu garrantzitsuenak.
e) Kontseiluburuak bozketarako jarri dituen proposamenak.
f) Bozketa modua.
h) Harturiko erabakien edukia.
i) Kontseilukideek eskaturik, harturiko erabakiaren kontrako botoa, abstentzioa eta arrazoiak, edo aldeko botoaren azalpena.
3. Kontseilukideek esan edo proposatu dutena aktan hitzez hitz bil dadila nahi badute, ahoz adierazi beharko dute eta idazkariari idatzirik aurkeztu, berrogeita zortzi orduko epean, beren hitzaldiari fidelki dagokion testua.
4. Kontseilukideek beren boto partikularra aktan biltzea nahi badute, Erregelamendu honen 32. artikuluan ezarritako baldintzen arabera egin ahalko dute.
5. Aktak hurrengo bilkuran onetsiko dira; zenbait gaitarako bilkura berean erabaki ahalko da aktan agertuko den behin betiko erredakzioa.
III. KAPITULUA. Lan Batzordeak
15. artikulua
Nafarroako Lanbide Heziketaren Kontseiluko Osoko Bilkurak Lan Batzordeak proposatu ahalko ditu azterlanak edo proiektuak egiteko. Horretaz gainera, lanbide heziketaren arloko programen jarraipen eta ebaluazioaren inguruko txostenak eskatu ahalko ditu.
16. artikulua
Batzordeetan kontseilukideek ez ezik, Batzordeak aztertu beharreko arloan adituak direnek ere parte hartu ahalko dute.
17. artikulua
Sortzen diren Lan Batzordeetan bi kontseilukide izanen dira gutxienez; horietako bat batzordeburua izanen da, Osoko Bilkurako gehiengoak proposatu eta kontseiluburuak izendaturik. Kontseiluko erakunde edo parte bakoitzeko ordezkari batek ere, gutxienez, parte hartu ahalko du.
18. artikulua
Batzorde bakoitzerako zehaztu beharko dira, kide kopuruaz gain, xedeak, eta lanak egiteko gutxi gorabeherako denbora.
Batzordeburuak lanen eboluzioaren berri eman beharko dio aldian-aldian Kontseiluari eta, betiere, Kontseiluak eskatzen dionean.
19. artikulua
Batzordeburuek eginkizun hauek izanen dituzte:
a) Lan Batzorderako dei egitea beharrezkoa den aldizkakotasunez, lan egutegiaren, presaren eta emandako lanaren ezaugarrien arabera.
b) Egindako azterlan eta txostenak eta jardueren laburpen memoria igortzea Nafarroako Lanbide Heziketaren Kontseiluari; horrekin bat ez datozen erabaki eta iritziak ere bilduko dira, baldin eta alde interesatuak eskatzen badu.
c) Kontseiluari proposatzea xedeak eta jarduerak aldatzea, eta Batzordeari lanerako beharrezkoak iruditzen zaizkion adituak sartzea.
d) Bilkuren laburpenak egitea.
IV. KAPITULUA. Kontseiluburutza
20. artikulua
Nafarroako Lanbide Heziketaren Kontseiluko Osoko Bilkuraren buru Hezkuntza eta Kultura kontseilaria izanen da.
21. artikulua
Kontseiluburuari dagozkio, 247/2000 Dekretuko 4. artikuluaren 2. puntuan aipatu eskurantzez gain, ondoko hauek:
a) Kontseiluari dagokion arautegia eta, zehazki, Erregelamendu hau betearazteaz arduratzea.
b) Kontseiluaren eginkizun eta erabakiak betearazteaz eta zerbitzuen funtzionamendu onaz arduratzea.
c) Kontseiluko idazkaria izendatu eta kargutik kentzea.
d) Organo eskudunari proposatzea Osoko Bilkuraren edo Batzordeen erabakiak gauzatzeko beharrezkoak diren aurrekontuko diru kopuruak.
e) Erregelamendu honek eta aplikatu beharreko arauek emandako beste edozein eta, oro har, Erregelamendu honek beste organo batzuei esleitzen ez dizkienak.
22. artikulua
Kontseiluburua eri edo kanpoan dagoenean edo kargua hutsik, kontseiluburuordeak ordezkatu eta haren eskurantza guztiak hartuko ditu.
V. KAPITULUA. Idazkaritza
23. artikulua
Idazkaritzaren eginkizunak arlo ekonomiko eta administratibokoak izanen dira.
Hauek dira Idazkaritzaren eginkizunak:
-Atxikiak dituen baliabideak antolatzea.
-Kontseiluan sortzen diren gai ekonomikoak gainbegiratzea.
-Era guztietako dokumentuen txostenak eta transkripzio mekanizatua ematea.
-Gutunen sarrera-irteeren erregistroaz arduratzea.
-Oro har, bere eginkizunak betetzeko beharrezkoak diren eskurantzak.
24. artikulua
Kontseiluko idazkariari dagozkio, 247/2000 Dekretuan ezarritako eskurantzez gain, ondoko hauek:
a) Kontseilukideek edo hirugarren pertsonek Kontseiluari aurkeztu nahi dizkioten gai, txosten, proposamen edo dokumentuak hartu, antolatu eta bideratzea, eta bidezkoa den tramitazioa egitea; hori da Osoko Bilkurak aztertzeko arauzko bidea.
b) Kontseilukideen eskura edukitzea eguneko gai zerrendan sartu diren gaien inguruko dokumentuak, behar izanez gero azter ditzaten.
c) Osoko Bilkuren akta egitea.
d) Fede-emaile izatea, kontseiluburuaren oniritziarekin, eta Kontseiluaren kontsulta, irizpen eta erabakiak ziurtatzea.
e) Bere ardurapean dauden espedienteak eta artxiboa antolatu eta zaintzea, eta, berdin, dokumentuen sarrera-irteeren erregistroa.
f) Kontseiluburuak ematen dizkion edo karguari dagozkion kudeaketa eta koordinazio egintzak.
25. artikulua
Kontseiluko idazkaria kanpoan dagoenean, kontseiluburuak izendatzen duen pertsonak beteko ditu haren eginkizunak.
III. TITULUA. FUNTZIMENDU ARAUBIDEA
I. KAPITULUA. Osoko bilkurak
26. artikulua
1. Erregelamendu honetan ezarritako hitzaldi txandari jarraituko zaio bilkuretan.
2. Kontseilukideek ez dute hitz egiterik izanen kontseiluburuak hitza ematen ez badiete. Hitzaldiak pertsonalki eta ahoz eginen dira, nahiz eta hizlariak behar dituen agiri eta bitartekoak erabili ahalko dituen.
3. Ezin izanen da inoren hitzaldia eten, non ez duen kontseiluburuak egiten emandako denbora bukatu dela ohartarazteko, hitza kentzeko edo jarrerari buruzko ohartarazpenak egiteko.
27. artikulua
Kontseiluburuak zehaztuko ditu hitzaldien txandak eta iraupena.
28. artikulua
Kontseiluburuak gai edo eztabaida bat bukatutzat jo ahalko du, gaia behar beste aztertu dela iruditzen zaionean. Halakoetan, bozketa egin ondoren, eguneko zerrendako hurrengo puntuari helduko zaio.
II. KAPITULUA. Osoko Bilkurako Bozketak
29. artikulua
Kontseiluaren Osoko Bilkurako erabakiak aho batez hartzeko ahalegina eginen da. Bozketak, egin behar direnean, arruntak, izendunak eta isilekoak izan ahalko dira.
a) Arruntak dira baiezkoa, ezezkoa edo abstentzioa adierazteko zeinu konbentzionalak erabiliz egiten direnak.
b) Izendunak dira deituren araberako hurrenkera alfabetikoan deituz egiten direnak; azkena kontseiluburua izaten da beti, eta Osoko Bilkurako kide bakoitzak, deitzen dutenean, ahotsez esan behar du "bai", "ez" edo "abstenitu egiten naiz".
c) Isilekoak dira boto-txartelaren bidez egiten direnak; Osoko Bilkurako edo Batzorde Iraunkorreko kide bakoitzak hautestontzi edo poltsa batean utziko ditu.
30. artikulua
1. Bozketen ohiko sistema bozketa arrunta izanen da.
2. Bozketa izenduna egiteko Osoko Bilkurako kideen herenaren eskaria beharko da eta kideen gehiengoak onetsi beharko du.
3. Isileko bozketa eginen da erabakia pertsona bati buruzkoa denean edo kontseilukide batek eskatzen duenean, betiere kontseiluburuak gaiari buruzko bozketa egitea erabakitzen badu eta Osoko Bilkurak kideen gehiengoz onesten.
31. artikulua
1. Osoko Bilkurako erabakiak botoen gehiengoz hartuko dira.
2. Ez da bozketarik eginen ondoren ageri diren gaien inguruko ezein proposameni buruz, baldin eta bozketa baino lehen horien testu idatzia aurkeztu ez bada:
a) Nafarroako Lanbide Heziketari buruzko Plana onestea, Foru Komunitateko Gobernu Kontseilura igortzeko.
b) Nafarroako Lanbide Heziketari buruzko Planaren aplikazioaren eta betetze mailaren ebaluazioa azalduko duen urteko txostena onestea.
c) Kontseilukideen kargu-uzterako proposamenak, Erregelamendu honen 7. artikuluan ezarritakoaren arabera.
d) Kontseiluaren Lan Plana onestea.
e) Lan Batzordeak sortu eta desegitea.
f) Antolamenduaren eta Funtzionamendu Araubidearen Erregelamendua aldatzeko proposamena onestea.
32. artikulua
Osoko Bilkuran gehiengoaren bidez hartutako erabakiarekin ados ez dauden kideek beren boto partikularra aktan agertarazi ahalko dute.
Boto horiek, arrazoiak barne, Osoko Bilkuraren proposamen, txosten eta irizpenetan azalduko dira. Erregelamendu honen arabera boto partikulartzat jotzen da, kontseilukide batek bere botoaren bidez azaltzen duen ezadostasuna eta horren arrazoiak aktan bildu nahi izatea. Boto partikularra idatziz eginen da berrogeita zortzi orduko epean, eta dagokion testua aktan jasoko.
III. KAPITULUA. Lan Batzordeen funtzionamendu araubidea
33. artikulua
Lan Batzordeen funtzionamendu araubidea kideek eratze bilkuran erabakitzen dutena izanen da. Hala ere, interpretazioak egitean denak bat ez badatoz, Erregelamendu honetan Kontseiluarentzat berarentzat ezarritakoa aplikatuko da subsidiarioki.
IV. TITULUA. ARAUBIDE EKONOMIKOA
34. artikulua
1. Kontseiluaren funtzionamendurako egokiak diren baldintzak badirela eta kideei emandako eginkizunak betetzen direla bermatzearren, behar diren giza baliabideak eta baliabide material eta ekonomikoak ezarriko dira Hezkuntza eta Kultura Departamentuaren urteko aurrekontuetan.
2. Aurreko puntuan ezarritakoaren osagarri, Administrazioko beste organo batzuek edo beste entitate publiko edo pribatu batzuek emandako baliabideak bildu ahalko dira, azterlanak edo irizpenak egiteko.
35. artikulua
Kontseiluaren baliabide ekonomikoak eta horien kudeaketa Hezkuntza Zuzendaritza Nagusiak bideratuko ditu, Foru Komunitatean indarra duten legeek eta aurrekontu arauek ezarritakoari jarraikiz.
V. TITULUA. ANTOLAMENDUAREN ETA FUNTZIMENDU ARAUBIDEAREN ERREGELAMENDUA ALDATZEA
36. artikulua
Antolamenduaren eta funtzionamendu araubidearen Erregelamendu hau aldatzeko prozedura honi jarraituko zaio:
a) Kontseiluko Osoko Bilkurak izanen du horretarako ekimena, gutxienez ere kideen erdiek proposaturik.
b) Aldaketa proposamenarekin batera beste testu artikulatu bat eta arrazoiak aurkeztu beharko dira; onetsi, Kontseiluko botoen gehiengoaren bidez onetsiko da.
c) Hezkuntza eta Kultura kontseilariari dagokio Erregelamenduaren aldaketa onestea.
