navarra.es
Castellano | Euskara | Français | English
Ezagutzera eman
28/2004 Foru Agindua, apirilaren 1ekoa, Industria eta Teknologia, Merkataritza eta Lan kontseilariak emana, arauzko kontrola duten instalazioak abian jartzeko tramitazio administratiboan segitu beharreko prozedura ezartzen duena
(Testu bateratua. Jatorrizkoa 2004ko 67. NAOn argitaratua, ekainaren 4an. Aldaketak: 425/2009 Foru Agindua, urriaren 1ean)
Atarikoa
Nafarroako Foru Komunitatean industri segurtasunaren eta arauzko kontrolaren arloko jarduketak arautzeko azaroaren 9ko 326/1998 Foru Dekretuko 25. artikuluak ezartzen duenaren arabera, erregelamenduetan aurreikusitako instalazioetan segurtasun baldintzak betetzen direla frogatzeko tramitazio administratiboa Industria eta Teknologia, Merkataritza eta Lan Departamentuak ezartzen duen prozedurari jarraikiz eginen da.
Foru dekretu horren 26. artikuluak, bestalde, ezartzen du prozedura horietan kontrol erakundeek esku hartzen ahalko dutela, araupeko instalazioak abian jartzeko tramitazioan, eta departamentu honi dagokiola erakunde horiek arlo horretan esku hartzeko bete beharreko baldintzak ezartzea.
Foru dekretu haren ondorioz, industriakoak ez diren eraikinetako zenbait instalazioren tramitazio administratiboa egiteko prozedura ezarri zen foru agindu batzuen bidez.
Haien ondoren izandako esperientziak erakutsi du lagungarria litzatekeela kontrol erakundeek instalazioak abian jartzeko tramitazio administratiboan duten parte hartzea handitzea, instalazio horiek lokal industrialetakoak izan ala ez.
Horrenbestez, agindu dut:
1. artikulua. Xedea.
Foru agindu honen xedea da segurtasun erregelamenduak dituzten instalazioak erregistratu eta abian jartzeko prozedurak ezartzea, bai eta instalazio horien kontrolari dagokion prozedura eta proiekzioan, exekuzioan eta kontserbazioan esku hartzen duten agenteei dagokiena ere ezartzea.
2. artikulua. Aplikazio eremua.
Foru agindu hau eranskinean ageri diren instalazioei aplikatuko zaie, ondoko jardueretarako zehazki:
a) Instalazio berriak.
b) Instalazioak handitzea, aldatzea edo berritzea.
c) Titulartasuna aldatzea.
d) Datuak berraztertzea.
3. artikulua. Erakunde jarduleak.
Erakunde jarduletzat hartzen dira Nafarroako Foru Komunitatean baimena duten kontrolerako erakundeak, Industria eta Teknologia, Merkataritza eta Lan Departamentuari espresuki adierazten badiote instalazioak abian jartzeko tramitazio administratiboan laguntzeko asmoa dutela, azaroaren 9ko 326/1998 Foru Dekretuan ezarritakoarekin bat.
Kontrolerako erakundeak, beren jarduketetan, Industria eta Teknologia, Merkataritza eta Lan Departamentuak ematen dituen jarraibideei lotuko zaizkie, eta departamentu horrek ezartzen dituen agiri eta inprimakiak erabiliko dituzte.
4. artikulua. Instalazioak erregistratzea eta/edo abian jartzea.
1. Foru agindu honen xede diren instalazioak abian jarri eta/erregistratzerakoan ezarrita dagoen prozedurari jarraituko zaio, eta kasu bakoitzean beharrezkoak diren agiriak aurkeztuko zaizkio erakunde jarduleari.
2. Eranskinean azaldu da instalazio bakoitzak zer agiri aurkeztu behar duen. Instalazio mota bakoitzean ondokoa bereiziko da:
a) Proiektua behar duten instalazioak.
Instalazioaren titularrak edo bere ordezkariak instalazioen edo ekipoen proiektu orokorra edo proiektu bereiziak aurkeztu beharko dizkio, horientzat nahitaezkoa izanez gero, kontrolerako erakunde bati, aplikatu beharreko erregelamenduan eskatzen denari jarraikiz. Teknikari eskudun batek prestatu eta sinatuko du proiektua, eta dagokion elkargo ofizialak ikus-onetsiko.
Oro har, proiektuarekin batera teknikari eskudun batek eman eta elkargo ofizial batek ikus-onetsitako ziurtagiria aurkeztuko da eta, bertan, obra proiektuaren arabera moldatu den azalduko da, instalazioak zein diren esan eta identifikatu eginen dira eta aplikatu beharreko erregelamenduan ezarritako baldintza tekniko eta agindu guztiak betetzen direla adieraziko da.
Erregelamenduan eskatzen diren segurtasun baldintzak betetzen direla frogatzen duten agiriak, aktak, buletinak eta/edo ziurtagiriak aurkeztuko dira aipatu den ziurtagiriarekin batera.
b) Proiektua behar ez duten instalazioak.
Proiektua behar ez duten instalazioen kasuan, memoria tekniko bat aurkeztu ahalko da horren ordez, instalatzaileak edo teknikari eskudunak sinatua; establezimenduaren datuak eta ezaugarriak azalduko ditu.
Erregelamenduan eskatzen diren segurtasun baldintzak betetzen direla frogatzen duten agiriak, aktak, buletinak eta/edo ziurtagiriak aurkeztuko dira aipatu den memoriarekin batera.
3. Dokumentazioa aurkeztu eta gero, kontrolerako erakundeak egiaztatuko du ea osorik dagoen eta instalaziorako eskatzen den erregelamenduarekin bat heldu den. Hala bada, hori guztia betetzen dela egiaztatu eta erregistroa eginen du, eta, egoki bada, instalazioa abian jartzeko adostasuna adieraziko.
Dokumentazioa osorik ez badago edo dagokion erregelamenduan ezarritakoarekin bat heldu ez bada, ez da instalazioaren erregistroa eginen, oker guztiak zuzendu arte.
5. artikulua. Tasak eta tarifak.
Dokumentazioa aurkeztu ondoren, tramitazioari hasiera eman aitzin, kontrolerako erakundeak adieraziko du jarduketengatik ordaindu beharreko tasa eta tarifa zenbatekoa den, eta ez zaio inolako tramiteri hasiera emanen titularrak edo haren ordezkariak ordaindu duela justifikatu arte.
Industria eta Teknologia, Merkataritza eta Lan Departamentuak ezarritakoak izanen dira kontrolerako erakundeei aplikatu beharreko tarifak.
Industria eta Teknologia, Merkataritza eta Lan Departamentuko Erregistroetan egin beharreko inskripzioei dagokien tasa aplikatu eta kobratuko dute kontrolerako erakundeek. Ezartzen den epean, departamentuak jartzen duen kontuan, tasengatik jasotako dirua sartuko da.
6. artikulua. Dokumentazioaren tratamendua egitea eta artxibatzea.
Kontrolerako erakundeek espediente bakoitzeko informazioa erregistratu behar dute, Industria eta Teknologia, Merkataritza eta Lan Departamentuak ezartzen duen modu eta euskarrian, eta informazio hori departamentu honen eskura jartzeko beharrezkoak diren jarduketak egin.
Kontrolerako erakundeek hantxe tramitatutako espedienteetako dokumentazioa artxibatu eta gordeko dute, argi eta garbi identifikatuta, eta aztertzeko edo berreskuratzeko moduan.
Espedientea ireki eta 10 urte igaro ondoren, espediente osoa Industria eta Teknologia, Merkataritza eta Lan Departamentuari igorriko zaio, berak ezartzen duen moduan.
7. artikulua. Espedienteak eta instalazioak ikuskatu eta kontrolatzea.
1. Espedienteen ikuskapen eta kontroltzat hartzen dira kontrolerako erakundeek egiten dituzten jarduerak, hain zuzen ere espedientera biltzen den dokumentazioa begiratzea eta instalazioaren exekuzioa ikuskapen bidez egiaztatzea. Horretarako:
a) Foru agindu honen xede diren instalazioen titularrak behartuta daude instalazioak abian jartzeko espedientea tramitatu duen kontrol erakundeko langileei instalazioetan sartzen uztera.
b) Kontrolerako erakundeek Segurtasun Zerbitzuak ezartzen dituen portzentajeak ikuskatu behar dituzte beraiek tramitatu dituzten espedienteei dagozkien instalazioetan, aplikatu beharreko araudia betetzen dutela egiaztatzeko. Ausaz aukeratuko da ikuskatu beharreko lagina.
c) Industri Segurtasunerako Zerbitzuak ezarriko ditu kontrolean eta ikuskapenean segitu beharreko jarraibideak eta, edonola ere, berariazko erregelamendua betetzen den begiratuko da. Jarduketaren protokoloak zerbitzu horrek onetsiko ditu, erakunde jarduleek proposatuta.
d) Dokumentazio teknikoaren kontrolari eta instalazioen ikuskapenari buruzko aktak eginen dira. Akta horietan instalazioari buruzko irizpena emanen da, hots, aldekoa, baldintzatua edo ezezkoa. Aldekoa izanen da akatsik ez dagoenean; baldintzatua, berriz, akatsak arau-hauste ez direnean Industriako uztailaren 16ko 21/1992 Legeko V. tituluaren arabera edo Hidrokarburoen Sektoreari buruzko urriaren 7ko 34/1998 Legeko VI. tituluaren arabera; azkenik, ezezkoa, arau-hausteak izaten badira. Ikuskapen aktaren kopia emanen zaie instalazioaren titularrari, enpresa instalatzaileari eta, hala denean, proiektua egin duen teknikariari.
2. Aurreko atalean aipatu ikuskapenez gainera, Industria eta Teknologia, Merkataritza eta Lan Departamentuak beharrezkoak iruditzen zaizkion jarduketak eginen ditu, aplikatu beharreko araudia betetzen den begiratzeko. Instalazioak Industria eta Teknologia, Merkataritza eta Lan Departamentuko langileek aztertuko dituzte ikuskapena egitea egokia edo beharrezkoa iruditzen zaienean edo gobernuaren aginduz edo hirugarrenen salaketaren ondorioz; ikuskapena kontrolerako erakundeko teknikariek ere egin dezakete, eginkizun hori esleitzen zaienean.
8. artikulua. Gorabeherak.
1. Ikuskapena egitean erakunde jarduleak akatsak aurkitzen baditu eta horren ondorioz instalazioa baldintzatu gisa kalifikatu behar bada, titularrari dei eginen zaio akatsak hilabeteko epean konpon ditzan. Epe horretan, proiektua egin duen teknikariak edo, hala denean, instalatzaile baimenduak frogatu beharko du eskatutakoa bete duela. Hori hala izanik ere, titularrak epe luzeagoa behar duela frogatuz gero, erakunde jarduleak 3 hilabetera arte luzatu ahalko du.
2. Instalazioaren ezezko kalifikazioa sorrarazten duten arau-hausteen berri eman beharko diote kontrolerako erakundeek Industria eta Teknologia, Merkataritza eta Lan Departamentuari; horren ondorioz, Industriako uztailaren 16ko 21/1992 Legeko V. tituluak edo Hidrokarburoen Sektoreari buruzko urriaren 7ko 34/1998 Legeko VI. tituluak ezarritakoari jarraituko zaio.
3. Kontrolerako erakunde baten txosten edo ziurtagiriak ez badu egiaztatzen erregelamenduko baldintzen betetzea, interesatuek beren desadostasuna azaldu ahalko diote erakunde horri. Desadostasuna azaltzen denean, interesatuek Industria eta Teknologia, Merkataritza eta Lan Departamentuaren esku-hartzea eska dezakete; halakoetan, 326/1998 Foru Dekretuko 18. artikuluan ezarritakoari jarraikiz jokatuko du departamentuak.
9. artikulua. Industria eta Teknologia, Merkataritza eta Lan Departamentuaren jarraipena eta kontrola.
Industria eta Teknologia, Merkataritza eta Lan Departamentuak beharrezkoak iruditzen zaizkion egiaztapenak egin ahalko ditu kontrolerako erakundeen jarduketari buruz, instalazioak abian jartzeko espedienteen tramitazioaren egokitasun material eta formala ziurtatzeko. Hala Departamentuko teknikariek nola kontrol erakundekoek ahalmena izanen dute instalazioaren diseinuan eta exekuzioan parte hartu duten proiektuegile, obra zuzendari eta instalatzaileei deitzeko ikuskapenean lagun dezaten.
Erakundeen kontrola auditoria sistemaren bidez ere egin daiteke. Auditoriak departamentuak egin ditzake zuzenean, edo gaituak dauden enpresa independienteek, lan hori egitea eskatzen bazaie.
Industria eta Teknologia, Merkataritza eta Lan Departamentuak noiznahi eska dezake kontrolerako erakunde baten aurrean irekitako espediente bat tramitatzea. Horrelako kasuetan, erakundea behartuta dago Departamentuari berehala igortzera berari aurkeztu zaion dokumentazioa.
10. artikulua. Erantzukizunak, arau-hausteak eta zehapenak.
Nafarroako Foru Komunitatearen esparruan industri segurtasunaren eta arauzko kontrolaren arloko jarduketak arautzen dituen azaroaren 9ko 326/1998 Foru Dekretuari jarraituko zaio.
Xedapen Gehigarri Bakarra
Ur hornidurarako barne instalazioetarako instalatzaile baimenduaren karnetak sei urterako balioa izanen du, eta iraungitze data baino lehen berritu beharko da Industria eta Teknologia, Merkataritza eta Lan Departamentuan.
Xedapen Indargabetzaile Bakarra
Indargabetu egin dira honako xedapen hauek:
1. Industria, Merkataritza, Turismo eta Lan kontseilariak martxoaren 25ean emandako 74/1999 Foru Agindua, industrietatik kanpoko establezimenduetan gasa hartu eta GLPa zenbait ezaugarri dituzten biltegi finkoetan biltzeko instalazioak abian jartzeko tramitazio administratiborako prozedura ezarri zuena. (53. Nafarroako Aldizkari Ofiziala, 99-4-30ekoa).
2. Industria, Merkataritza, Turismo eta Lan kontseilariak martxoaren 25ean emandako 76/1999 Foru Agindua, ur horniduraren barneko instalazioak abian jartzeko administrazioko tramiterako prozedura ezarri zuena, 8. eta 9. artikuluak eta IV. kapitulua izan ezik. (57. Nafarroako Aldizkari Ofiziala, 99-5-7koa).
3. Industria, Merkataritza, Turismo eta Lan kontseilariak martxoaren 25ean emandako 77/1999 Foru Agindua, berokuntza eta ur bero sanitariorako petroliozko instalazioak eraikin ez-industrialetan abian jartzeko administrazioko tramiterako prozedura ezarri zuena. (57. Nafarroako Aldizkari Ofiziala, 99-5-7koa).
4. Industria, Merkataritza, Turismo eta Lan kontseilariak martxoaren 25ean emandako 78/1999 Foru Agindua, instalazio termikoak eraikin ez-industrialetan abian jartzeko administrazioko tramiterako prozedura ezarri zuena. (57. Nafarroako Aldizkari Ofiziala, 99-5-7koa).
5. Industria, Merkataritza, Turismo eta Lan kontseilariak martxoaren 25ean emandako 79/1999 Foru Agindua, obretarako dorre-garabi desmuntagarriak abian jartzeko administrazioko tramiterako prozedura ezarri zuena. (57. Nafarroako Aldizkari Ofiziala, 99-5-7koa).
Azken Xedapen Bakarra
Foru agindu honek Nafarroako Aldizkari Ofizialean argitaratu eta hogei egunera hartuko du indarra.
