navarra.es

Castellano | Euskara | Français | English

Bilatzaile erabili!

424/2009 Foru Agindua, urriaren 1ekoa, Berrikuntza, Enpresa eta Enpleguko kontseilariak emana, Eraikinetako Instalazio Termikoen Erregelamendua (EITE), uztailaren 20ko 1027/2007 Errege Dekretuak onetsia, garatzeko arauak ezartzen dituena ...

424/2009 FORU AGINDUA, URRIAREN 1EKOA, BERRIKUNTZA, ENPRESA ETA ENPLEGUKO KONTSEILARIAK EMANA, ERAIKINETAKO INSTALAZIO TERMIKOEN ERREGELAMENDUA (EITE), UZTAILAREN 20KO 1027/2007 ERREGE DEKRETUAK ONETSIA, GARATZEKO ARAUAK EZARTZEN DITUENA NAFARROAKO FORU KOMUNITATEAN.

(2009ko 127. NAOn argitaratutako testua, urriaren 14an)

Atarikoa

Eraikinetako Instalazio Termikoen Erregelamendua (EITE) onesten duen uztailaren 20ko 1027/2007 Errege Dekretuak indarra hartzearekin batera, irizpide tekniko eta administratibo berriak ezarri dira instalazio horien exekuzioa, muntaketa, mantentze-lanak eta ikuskapena egiteko.

Nafarroako Foru Komunitateko araudia erregelamendu horretara egokitzearren, beharrezkoa da eraikinetako instalazio termikoak arautzen dituen arau esparrua garatzea, Komunitate honetako beharretara egokitzeko.

Eraikinetako Instalazio Termikoen Erregelamendu berriak, 24. artikuluan, bai instalazio berriak bai berritu beharrekoak abian jartzeko prozedura ezartzen du. Irizpide berriak ezarri direnez, beharrezkoa da Industria eta Teknologia, Merkataritza eta Laneko kontseilariaren apirilaren 1eko 28/2004 Foru Agindua eguneratzea, eraikinetako instalazio termikoen esparruan. Agindu horren bidez, arauzko kontrola duten instalazioak abian jartzeko tramitazio administratiboan segitu beharreko prozedura ezarri zen.

Foru agindu honek jarduteko irizpideak zehazten ditu, instalazioak erregistratu eta abian jartzeko prozedura ezartzen du eta, horrekin batera, mugatu egiten ditu oniritzia jaso duten proiektuen gainbegiraketan esku hartzen duten agenteen eskumenak eta erantzukizunak.

Gainera, eta eraikinetako instalazio termikoen kontrola egiteko, horren ardura izanen duten agenteak zehaztu dira eta, bestalde, instalazio berrietan eta berrituetan hasierako ikuskapena egiteko irizpideak ezarri dira; halaber, aldizkako ikuskapenak arautu dira instalazio guztietarako.

Bestalde, erregelamenduaren arabera, eraikinetako instalazio termikoetan aritzen direnen egiaztagiri berria txartel profesional bat izanen da eta, hori hala, beharrezkoa da txartelak baliozkotzeko prozedura bat ezartzea, prestakuntzarako edukiak garatzea eta ikastaroak emanen dituzten prestakuntza entitateen betebeharrak zehaztea.

Azkenik, erregelamenduko zenbait ataletan ageri da erkidego bakoitzeko organo eskudunak ezarriko dituela diseinuari, exekuzioari, abian jartzeari, mantentze-lanei eta kontrolari buruzko agiri tekniko batzuk. Horretarako, jarduketa horietan aritzen diren agenteek Nafarroako Foru Komunitatean erabili beharreko agiriak onetsi eta eguneratzeko prozedura ezarri da.

Foru agindu hau industriaren segurtasunerako arau erregelamenduzkoa da, Nafarroako Foru Eraentza Berrezarri eta Hobetzeari buruzko abuztuaren 13ko 13/1982 Lege Organikoak 56.1 artikuluaren b) letran gure Foru Komunitateari industria arloan ematen dion eskumen esklusiboaren babesean.

Beste alde batetik, Industriari buruzko uztailaren 16ko 21/1992 Legeak industria segurtasunaren gaineko araudiari dagokion esparru juridiko berria ezarri zuen; horrela, 12.5 artikuluan dioenez, "Estatuko Gobernuak onetsiko ditu industria segurtasunari buruzko erregelamenduak, Estatuaren eremukoak direnean, baina industriaren gainean legeak egiteko eskumena duten autonomia erkidegoek baldintza gehigarriak eransten ahal dituzte gai horietan, beren lurretan kokatutako instalazioak direnean".

Horrenbestez, eta Nafarroako Gobernuari eta Lehendakariari buruzko abenduaren 3ko 14/2004 Foru Legearen 41.1 artikuluak ematen dizkidan eskudantziak erabiliz, agindu dut:

i. kapitulua. Xedapen orokorrak

1. artikulua. Xedea eta esparrua.

Foru agindu honen xedea da Eraikinetako Instalazio Termikoen Erregelamendua (EITE), uztailaren 20ko 1027/2007 Errege Dekretuak onetsia, garatzeko arau osagarriak ezartzea, Nafarroako Foru Komunitateko araudia egokitu eta aldatzeko beharrezkoa den arloetan.

2. artikulua. Organo eskuduna.

Berrikuntza, Enpresa eta Enplegu Departamentuko Enpresa Zuzendaritza Nagusia izanen da Nafarroako organo eskuduna, EITEn eta foru agindu honetan xedatutakoa Nafarroako Foru Komunitatean betearazteko.

3. artikulua. Kontrol erakundeak.

Azaroaren 9ko 326/1998 Foru Dekretuan araututako kontrol erakundeek eginen dute eraikinetako instalazio termikoak erregistratu eta abian jartzeko tramitazio administratiboa.

4. artikulua. Eraikinetako instalazio termikoak abian jartzeko inprimakiak eta agiri teknikoak.

1. Eraikinetako instalazio termikoak diseinatu, exekutatu, abian jarri eta mantentzeko lanetan aritzen diren agenteek foru agindu honen arabera bete behar dituzten inprimakiak eta agiri teknikoak, EITEn ezarri gabeak, organo eskudunak onetsi eta aldatuko ditu.

2. Onesten diren ereduak Nafarroako Aldizkari Ofizialean eta Berrikuntza, Enpresa eta Enplegu Departamentuaren web gunean argitaratuko dira.

ii. kapitulua. Eraikinetako instalazio termikoen tramitazio administratiboa

5. artikulua. Eraikinetako instalazio termikoen dokumentazioa eta abian jartzea.

1. Bai instalazio termiko berriak bai berrituak abian jartzeko, beharrezkoa izanen da instalazioaren ziurtagiria kontrolerako erakunde baimenduetan erregistratzea. Horretarako agiri hauek aurkeztu beharko dira:

A.-70 kW-etik gorako potentzia termiko izendatuko instalazioak, beroa edo hotza sortzekoak.

a) Egiazki gauzatutako instalazioaren proiektua.

b) Instalazioaren ziurtagiria.

c) Hasierako ikuskapenaren ziurtagiria, aldeko kalifikazioa duena.

d) Instalazio termikoaren mantentze-lanetarako kontratuaren edo kontratuen kopia, horren barnan sartuz beroa/hotza sortzea, banaketa, igorpena eta erregulazioa/kontrola. Ez da nahitaezkoa agiri horiek aurkeztea instalazioaren titular bakoitzaren potentzia termiko izendatua 70 kW-ekoa edo txikiagoa denean.

B.-70 kW-ekoa edo txikiagoa den potentzia termiko izendatua duten instalazioak, beroa edo hotza sortzekoak.

a) Instalazioaren ziurtagiria.

b) Egiazki gauzatutako instalazioaren memoria teknikoa.

2. Aurreko atalean ezarritakoa ukatu gabe, telematika bidez aurkezten ahal dira proiektuak eta dokumentazio teknikoa, horretarako prestatu biltokia baliatuta, hartara jotzen ahal baita Nafarroako Gobernuko Zerbitzuen Katalogoaren bidez.

3. Instalazioaren instalatzaile baimenduak edo zuzendariak, azken horren parte-hartzea nahitaezkoa denean, honako agiri hauek eman beharko dizkio instalazioaren titularrari:

a) Kontrol erakundean aurkeztutako agirien kopia.

b) Egiazki gauzatutako instalazioa "Erabiltzeko eta mantentze-lanak egiteko eskuliburua".

c) Instalatutako materialen eta ekipamenduen zerrenda, bertan ezaugarri teknikoak eta funtzionamendukoak zehaztuta, eta, horrekin batera, jatorrizko dokumentazioa eta bermea.

6. artikulua. Zerbitzurik gabeko instalazioak.

Instalazio bat zerbitzurik gabe gelditzen denean, instalazio horren titularrak organo eskudunari jakinarazi beharko dio, egoera hori gertatu eta 30 eguneko epean gehienez.

7. artikulua. Instalazioen aldaketa.

1. EITEko 2. artikuluaren 3 c atalean ezarritakoarekin bat, beroa edo hotza sortzeko ekipamenduak aldatu, handitu edo murrizteak berarekin dakar instalazioa egin eta erregistratzeko erabilitako proiektua edo memoria teknikoa aldatzea

2. Aldaketa bat egiten denean EITE erregelamendua bete beharko da eta berrikuntza gisa tramitatu, foru agindu honen 5. artikuluan ezarritakoari jarraikiz.

8. artikulua. Proiektua eta obraren zuzendaritza.

1. Hotza edo beroa sortzeko instalazio termikoen potentzia termiko izendatua 70 kW-etik gorakoa denean, proiektu bat egin beharko da. Proiektu horretan instalazio termikoa osorik deskribatuko da eta exekuzioan zehar zalantzarik gabe baloratu eta interpretatzeko behar beste zehaztasun emanen da.

2. Oniritzia emateko, Lanbide Elkargoek egiaztatu beharko dute proiektua bat heldu den ala ez 1. eranskinean azaldutako egiturarekin eta edukiekin.

9. artikulua. Energiaz hornitzea.

1. Energiaz hornitzeko ardura duten enpresek ezin izanen dituzte EITEri lotutako instalazioak energiaz hornitu instalazioaren ziurtagiri erregistratua ez badute.

2. Energiaz hornitzeko ardura duten enpresek ziurtagiri horren kopia bat gorde beharko dute.

iii. kapitulua. Eraikinetako instalazio termikoen mantentze-lanak

10. artikulua. Instalazioaren mantentze-lanak.

1. Mantentze-lanetako enpresek eginen dituzte EITEri lotutako instalazioen mantentze-lanak.

2. Mantentze-lanetako enpresak mantentze-lanen ziurtagiria eginen du, organo eskudunak onetsitako eredua erabiliz, eta instalazioaren titularrari emanen dio. Ez da beharrezkoa izanen titularrak organo eskudunari igortzea.

iv. kapitulua. Eraikinetako instalazio termikoak ikuskatzea

1. atala. Hasierako ikuskapena

11. artikulua. Hasierako ikuskapena nahitaez egin beharra.

1. Hotza edo beroa sortzeko 70 kW-etik gorako potentzia termiko izendatua duten instalazioak abian jarri aurretik, hasierako ikuskapena egin beharko da, EITE erregelamendua betetzen den ala ez egiaztatzeko.

2. Eraikin batean beroa edo hotza edo biak sortzeko zenbait gailu daudenean, instalazioaren potentzia termiko izendatua lortzeko, zerbitzua emateko beharrezkoak diren bero sorgailuen edo hotz sorgailuen potentzia termiko izendatuak batuko dira, batuketa horretan eguzki energiako instalazio termikoa sartu gabe.

12. artikulua. Hasierako ikuskapena egiteko modua.

1. Ikuskapenak erregelamendu esparru honetarako baimendutako kontrol erakundeek eginen dituzte, eta instalazioaren titularrak berak aukeratuko ditu horiek.

2. Ikuskapena enpresa instalatzailea aurrean dela egin beharko da, eta horrek kontrol erakundearen lana erraztu beharko du.

3. Instalazioaren titularrak kontrol erakundearen eskura jarri beharko du instalatzaileak edo instalazioaren zuzendariak, azken horren parte-hartzea nahitaezkoa denean, emandako dokumentazioaren kopia bat.

13. artikulua. Eguzki energiako instalazioen hasierako ikuskapena.

Eguzki energiako instalazioetan euskarri-sorgailurik ez dagoenean, edo eguzki energia sartzeko besterik ez denean berritzen instalazio termikoa, hasierako ikuskapena egin beharko da baldin eta instalatutako eguzki-atzitzaileen eremu-zabaltzearen azalera koadrotik gorakoa bada.

14. artikulua. Hasierako ikuskapenaren ziurtagiria.

Ikuskapenaren ondoren, ziurtagiri bat emanen da eta bertan azalduko da proiektuak eta egindako instalazioak EITEn ezarritakoa betetzen duten, balizko akatsen zerrenda, sailkapena barne, eta instalazioaren kalifikazioa, EITEren 32. eta 33. artikuluetan ezarritakoaren arabera.

2. atala. Energia eraginkortasunaren aldizkako ikuskapenak

15. artikulua. Aldizkako ikuskapenak egin beharra.

1. Instalazio termikoak eta, bereziki, beroa eta/edo hotza sortzeko ekipamenduak, bai eta eguzki energiako instalazio termikoak ere, aldian-aldian ikuskatu behar dira beren balio-bizitzan, EITEn ezarritakoa betetzen den egiaztatzeko.

2. Ikuskapena koordinatu egin behar da ikuskapeneko beste jarduketa batzuekin, hots, instalazio termikoei dagozkienekin eta beste araudi sektorial batzuk eta, bereziki, Gas Erregaien Banaketari eta Erabilerari buruzko Erregelamendu Teknikoa aplikatuz egin beharrekoekin, ikuskapen lanak bikoiztu ez daitezen.

16. artikulua. Energia eraginkortasunaren aldizkako ikuskapenak.

1. Beroa edo hotza sortzeko 70 kW-etik gorako potentzia termiko izendatua duten instalazioetan, eta eguzki-energiako instalazioetan, instalatutako eguzki-atzitzaileen eremu-zabaltzearen azalera koadrotik gorakoak denean, energia eraginkotasunaren aldizkako ikuskapenak eginen dira, honako agente hauen bitartez:

a) Erregelamendu esparru horretarako baimendutako kontrol erakundeak.

b) Teknikari independenteak, pertsonei ziurtagiria emateko gaituta dagoen entitate batek emandako ziurtagiria daukatenak, abenduaren 28ko 2200/1995 Errege Dekretuan ezarritakoaren arabera, eta lan hauetarako bereziki.

2. Gainerako instalazioetan, instalazio termikoetako mantentze-lanak egiten dituzten eta Industria Establezimenduen Erregistroan erregistratuta dauden enpresek ere egiten ahalko dituzte energia eraginkortasunaren aldizkako ikuskapenak.

17. artikulua. Energia eraginkortasunaren aldizkako ikuskapena egitea.

1. Instalazioaren titularrak eskatuko du, behar den epean, energia eraginkortasunaren aldizkako ikuskapena egitea.

2. Ikuskapena mantentze-lanetako enpresa aurrean dela egin beharko da, eta horrek agentearen lana erraztu beharko du.

18. artikulua. Energia eraginkortasunaren aldizkako ikuskapenaren ziurtagiria.

1. Ikuskapen hori egiten duen agenteak ziurtagiria eginen du eta titularrari emanen dio, eta ez da beharrezkoa izanen organo eskudunari igortzea.

2. Instalazioaren titularrak aldizkako ikuskapenaren ziurtagiria gorde eta organo eskudunaren eskura edukiko du.

19. artikulua. Instalazio termikoen aldizkako ikuskapenak.

Energia eraginkortasunaren aldizkako ikuskapenen araubidea eta aldizkakotasuna hauek dira:

1.-Beroa sortzeko instalazioak:

POTENTZIA TERMIKO IZENDATUA kW	ERREGAI MOTA	IKUSKAPENAREN MAIZTASUNA
20 ≤ P ≤ 70	Gasa eta berriztagarriak	5 urtean behin
	Beste batzuk	5 urtean behin
P > 70	Gasa eta berriztagarriak	4 urtean behin
	Beste batzuk	2 urtean behin

2.-Hotza sortzeko instalazioak:

3. atala. Instalazio termiko osoaren aldizkako ikuskapenak

20. artikulua. Instalazio termiko osoaren ikuskapena egin beharra.

1. Instalazio termikoak hamabost urte baino gehiago baditu, instalazioaren lehen ziurtagiria eman zen egunetik hasita, eta instalatutako potentzia termiko izendatua 20 kW-ekoa edo handiagoa bada beroa sortzeko edo 12 kW-ekoa edo handiagoa hotza sortzeko, instalazio termiko osoa ikuskatuko da.

2. Instalazio termiko osoaren ikuskapena, EITEren 4.2.3 ITek ezarria, bero edo hotz sorgailuaren lehen ikuskapenarekin batera eginen da, instalazioak hamabost urte bete dituenean.

21. artikulua. Ikuskapenaren jarduketak.

1. Instalazio termiko osoaren ikuskapenean jarduketa hauek eginen dira, gutxienez:

a) Instalazioaren identifikazioa, honako datu hauek egiaztatuta: titularra, kokalekua eta abian jartzeko egin ziren erregistro administratiboak.

b) Erregistratutako diseinuko dokumentazioari dagokionez handitzerik edo aldaketarik ez dela egin egiaztatzea.

c) Sistema osoa ikuskatzea, ongizatearen eta higienearen, energia eraginkortasunaren eta segurtasunaren arloko beharkizunak, EITEren IT.1ean arautuak, betetzen diren egiatatzeko.

d) IT.3an ezartzen diren mantentze-lanen erregistro ofizialaren ikuskapena, instalazio termiko osorako, eta bete beharrekoa betetzen den egiaztatzea; halaber, "Instalazioa erabiltzeko eta mantentze-lanak egiteko eskuliburua" eginda dagoen instalazioaren arabera egokitzea.

e) Aldizkako ikuskapenak behar den epean eta moduan egin diren egiaztatzea.

2. Ikuskapenaren ondoren irizpen bat emanen da, instalazioaren titularrari aholkua emateko, eta, hala behar denean, instalazioan aldaketak egitea proposatuko zaio energia eraginkortasuna hobetzeko. Eguzki energia sartzea ere aztertzen ahal da.

Energiaren, ingurumenaren eta ekonomiaren arloko errentagarritasunean oinarrituta justifikatuko dira neurri teknikoak.

3. Ikuskapenaren emaitza gisa, ziurtagiri bat emanen da, non azalduko baitira akatsen zerrenda, sailkapena barne, eta instalazioaren kalifikazioa, EITEren 32. eta 33. artikuluetan ezarritakoaren arabera.

22. artikulua. Instalazio termiko osoen aldizkako ikuskapenak egitea.

1. Ikuskapenak erregelamendu esparru honetarako baimendutako kontrol erakundeek eginen dituzte, eta instalazioaren titularrak berak aukeratuko ditu.

2. Instalazioaren titularrak eskatuko du, behar den epean, instalazio termiko osoaren aldizkako ikuskapena egitea.

3. Ikuskapena mantentze-lanetako enpresa aurrean dela egin beharko da, eta horrek kontrol erakundearen lana erraztu beharko du.

23. artikulua. Instalazio osoaren ikuskapenaren ziurtagiria.

1. Ikuskapena egiten duen agenteak 21. artikuluaren 3. atalean aipatutako ziurtagiria egin eta instalazioaren titularrari emanen dio, eta ez da beharrezkoa izanen organo eskudunari igortzea.

2. Instalazioaren titularrak gorde eta organo eskudunaren eskura edukiko du.

4. atala. Ikuskapen guztietarako xedapenak

24. artikulua. Ikuskapena egiteko prozedurak eta protokoloak

1. Eraikinetako instalazio termikoak ikuskatzeko baimenduta dauden kontrol erakundeek hasierako ikuskapenen, aldizkako ikuskapenen eta instalazio osoen ikuskapenen prozedurak eta protokoloak aurkeztu beharko dituzte organo eskudunean, onets daitezen.

2. Onetsi eta gero, aldaketaren bat egiten bada organo eskudunari jakinarazi beharko zaio eta, aldaketa funtsezkoa bada, onespena beharko du berriz ere.

v. kapitulua. eraikinetako instalazio termikoak instalatu eta mantentze-lanak egiten dituzten enpresak

25. artikulua. Jarduera profesionalean aritzea.

1. Eraikinetako instalazio termikoak instalatu eta matentze-lanak egiteko jarduera profesionalean aritzeko, sozietatearen helbidea Nafarroan duten enpresek EITEren 37. artikuluan ezarritako baldintzak betetzen dituztela adierazteko erantzukizuneko aitorpena aurkeztu beharko dute organo eskudunean.

2. Gainera, inskribatuta egon beharko dute Industriari buruzko uztailaren 16ko 21/1992 Legearen 21. artikuluaren babesean sortutako eta apirilaren 28ko 697/1995 Errege Dekretuan araututako Industria Establezimenduen Erregistroan.

26. artikulua. Eraikinetako instalazio termikoen arloko enpresa ziurtagiria.

1. Organo eskudunak onetsitako eredu ofizialean aurkeztuko da baldintzak betetzearen gaineko erantzukizuneko aitorpena.

2. Organo eskudunaren egiaztatzeko ahalmenak baztertu gabe, erantzukizuneko aitorpena aurkeztean enpresak baimena eskuratuko du jarduera hasteko.

3. Erantzukizuneko aitorpena aurkeztutakoan, eraikinetako instalazio termikoen arloko enpresa ziurtagiria emanen du organo eskudunak, eta ofizioz eginen du behar den idatzoharra Industria Establezimenduen Erregistroan, eta ziurtagirian agertuko du.

4. Erantzukizuneko aitorpenari erantsitako funtsezko edozein datu, azalpen edo dokumentutan zehazkabetasun edo faltsutasunik badela ikusiz gero, organo eskudunak ukatu eginen du instalazio termikoen arloko enpresa ziurtagiria, arrazoitutako ebazpen baten bidez, eta jardueran aritzea debekatuko du, erantzukizun administratiboak edo bestelakoak baztertu gabe.

5. Gainera, jarduera hasi aurretik zegoen egoera juridikora itzultzera behartzen ahal da interesduna, baita, ebazpenak zehazten duen epean, erantzukizuneko beste aitorpenik aurkezteko debekua ezarri ere; epe hori ez da urtebetetik gorakoa izanen, ebazpena irmo bihurtzen denetik.

6. Ziurtagiriak balio mugagabea izanen du, hura emateko baldintzak mantentzen diren bitartean EITE aplikatzeko eremuan.

7. Ziurtagiria emateko ezarritako baldintza eta beharkizunetan edozein aldaketa izanez gero, organo eskudunari jakinaraziko zaio, gertatu eta hilabeteko epean, eguneratu dadin.

27. artikulua. Eraikinetako instalazio termikoen arloan beste autonomia erkidego batzuek emandako ziurtagiria duten enpresak.

1. Eraikinetako instalazio termikoak egiteko eta bertako mantentze-lanetan aritzeko jarduera Nafarroako Foru Komunitatean egin gogo duten enpresek, beste autonomia erkidego batean eskuratu badute ziurtagiria, erantzukizuneko aitorpena aurkeztu beharko dute organo eskudunean, jatorrizko autonomia erkidegoan emandako ziurtagiria dutela eta indarrean dagoela adieraziz.

2. Organo eskudunak onetsitako eredu ofizialean aurkeztuko da erantzukizuneko aitorpena.

vi. kapitulua. eraikinetako instalazio termikoetako profesionalak

1. atala. Jardueran aritzea

28. artikulua. Erantzukizuneko aitorpena.

Eraikinetako instalazio termikoak egin eta bertako mantentze-lanak eginen dituzten profesionalek erantzukizuneko aitorpena aurkeztu behar dute organo eskudunean, EITEren 42. artikuluan eta foru agindu honetan ezarritako baldintzak betetzen dituztela adierazteko.

29. artikulua. Eraikinetako instalazio termikoen arloko txartel profesionala.

1. Organo eskudunak onetsitako eredu ofizialean aurkeztuko da baldintzak betetzearen gaineko erantzukizuneko aitorpena.

2. Organo eskudunaren egiaztatzeko ahalmenak baztertu gabe, erantzukizuneko aitorpena aurkeztean profesionalak baimena eskuratuko du jarduera hasteko.

3. Erantzukizuneko aitorpena aurkezturik, organo eskudunak eraikinetako instalazio termikoen arloko txartel profesionala emanen du.

4. Erantzukizuneko aitorpenari erantsitako funtsezko edozein datu, azalpen edo dokumentutan zehazkabetasun edo faltsutasunik badela ikusiz gero, organo eskudunak ukatu eginen du txartel profesionala, arrazoitutako ebazpen baten bidez, eta jardueran aritzea debekatuko du, erantzukizun administratiboak edo bestelakoak baztertu gabe.

5. Gainera, jarduera hasi aurretik zegoen egoera juridikora itzultzera behartzen ahal da interesduna, baita, ebazpenak zehazten duen epean, erantzukizuneko beste aitorpenik aurkezteko debekua ezarri ere; epe hori ez da urtebetetik gorakoa izanen, ebazpena irmo bihurtzen denetik.

30. artikulua. Txartelaren balioa.

1. Txartelak balio mugagabea izanen du, hura emateko baldintzak mantentzen diren bitartean EITE aplikatzeko eremuan.

2. Txartela emateko ezarritako baldintza eta beharkizunetan edozein aldaketa izanez gero, organo eskudunari jakinaraziko zaio, gertatu eta hilabeteko epean, eguneratu dadin.

2. atala. Jarduera profesionalean aritzeko baldintzak

31. artikulua. Prestakuntza osagarria.

1. EITEren 42. artikuluan ezarritakoa baztertu gabe, eguzki energiako instalazio termikoen antolaketan eta proiektuetan 3. mailako lanbide ziurtagiria duten profesionalek, edo Eraikineko eta prozesuko instalazioak mantendu eta muntatzeko lanen goi mailako teknikari titulua dutenek edo Hozteko, girotzeko eta berotzeko instalazioak muntatu eta mantentzeko lanen teknikari titulua dutenek (goi eta erdi mailako lanbide heziketako tituluak, hurrenez hurren, lanbide heziketako ikastetxe ofizial batean lortuak) gainditu egin beharko dute Eraikinetako Instalazio Termikoen Erregelamendua (EITE), uztailaren 20ko 1027/2007 Errege Dekretuak onetsia, aplikatu eta garatzeari buruzko ikastaro bat.

2. Baimendutako entitate batek emanen du ikastaroa, foru agindu honen 35. artikuluan ezarritakoari jarraikiz.

3. Ikastaroaren iraupena 120 ordukoa izanen da, gutxienez.

32. artikulua. Azterketa.

Azterketa teoriko-praktikoa, EITEren 42.1.c artikuluan ezarria, jarraibide hauen arabera eginen da:

1. Organo eskudunak argitara emanen du, Departamentuaren web gunean, interesdunek egiten ahal dituzten azterketen deialdia. Deialdian tokia, eguna eta orduak zehaztuko dira.

2. Organo eskudunak azterketak baloratzeko izendatutako teknikariek emaitzak igorriko dizkiote organo eskudunari, onets ditzan.

3. Emaitzen zerrenda, puntuazioaren arabera ordenatua, Berrikuntza, Enpresa eta Enplegu Departamentuaren iragarki oholean jarriko da ikusgai, eta Departamentuaren web gunean argitaratuko da.

4. Lortzen duten puntuazioa inpugnatzen ahal dute interesdunek gora jotzeko errekurtsoa jarriz, organo eskudunari zuzenduta.

vii. kapitulua. Prestakuntza entitateak

33. artikulua. Erantzukizuneko aitorpena.

Eraikinetako instalazio termikoei buruzko prestakuntza ikastaroak, foru agindu honetan arautuak, eman behar dituzten entitateek erantzukizuneko aitorpena aurkeztu beharko dute organo eskudunean, hurrengo artikuluan ezarritako baldintzak betetzen dituztela adierazteko.

34. artikulua. Eraikinetako instalazio termikoen arloko prestakuntza entitateak.

Nafarroako Foru Komunitatean instalazio termikoen arloko ikastaroak emateko onarpena lortu nahi duten prestakuntza entitateek baldintza hauek beharko dituzte bete:

a) Behar adinako baliabide egokiak izatea, teknika, pertsona eta material aldetik, prestakuntza eraginkorra eta kalitatezkoa eskaintzeko ikastaroetan.

b) Prestakuntza entitateko norbait ikastaroen arduradun izendatzea.

c) Erantzukizun zibileko aseguru bat kontratatzea, profesional eta ikasleek ikastaroa ematen den zentroan prestakuntza prozesuan izan ditzaketen istripuak estaltzeko.

d) Berdintasuna bermatzea antolatzen dituen ikastaroak egiteko.

35. artikulua. Onarpena.

1. Organo eskudunak onetsitako eredu ofizialean aurkeztuko da erantzukizuneko aitorpena.

2. Organo eskudunaren egiaztatzeko ahalmenak baztertu gabe, erantzukizuneko aitorpena aurkezteak baimena emanen dio entitateari jardueran hasteko, eta eraikinetako instalazio termikoen arloko prestakuntza entitate gisa onartua izatea suposatuko du, foru agindu honetan ezarritako ondorioetarako.

3. Erantzukizuneko aitorpenari erantsitako funtsezko edozein datu, azalpen edo dokumentutan zehazkabetasun edo faltsutasunik badela ikusiz gero, organo eskudunak ukatu eginen du eraikinetako instalazio termikoen arloko prestakuntza entitate gisa onartua izatea, arrazoitutako ebazpen baten bidez, eta jardueran aritzea debekatuko du, erantzukizun administratiboak edo bestelakoak baztertu gabe.

4. Gainera, ebazpen horretan erantzukizuneko beste aitorpen bat epe zehatz batean aurkezteko debekua ezartzen ahal da; epe hori ez da urtebetetik gorakoa izanen, ebazpena irmo bihurtzen denetik.

36. artikulua. Onarpenaren balioa.

1. Eraikinetako instalazio termikoen arloko prestakuntza entitate gisa onartua izateak mugagabeko balioa izanen du, hura eskuratzeko baldintzek dirauten bitartean.

2. Prestakuntza entitate gisa onartua izateko ezarritako baldintza eta beharkizunetan edozein aldaketa izanez gero, organo eskudunari jakinaraziko zaio, gertatu eta hilabeteko epean, eguneratu dadin.

37. artikulua. Prestakuntza entitateen betebeharrak.

Prestakuntza entitateek betebehar hauek izanen dituzte:

a) Ikastaroak hasi baino lehen, programazioa eta noiz hasiko diren jakinaraztea organo eskudunari, baita zenbat ikasle dauden inskribatuta ere. Ez dira hogei baino gehiago izanen ikastaro bakoitzean.

b) Ikastaro bukaeraren berri ematea organo eskudunari, eta gainditzen duten ikasleen zerrenda aurkeztea.

Lehen Xedapen Iragankorra. Eginak dauden instalazio termikoetan ikuskapenak egiteko epeak.

Foru agindu honek indarra hartu orduko eginak dauden instalazio termikoen titularrek honako epe hauek izanen dituzte aldizkako lehen ikuskapena eskatzeko:

1.-Instalazio termiko osoaren ikuskapena:

2.-Energia eraginkortasunaren aldizkako ikuskapena:

Bigarren Xedapen Iragankorra.-Txartel profesionalak.

1. Uztailaren 31ko 1751/1998 Errege Dekretuaren bidez onetsitako Eraikinetako Instalazio Termikoen Erregelamenduaren (EITE) 15. artikuluan ezarritako txartel profesionaletakoren bat dutenek baliozkotu egin dezakete Eraikinetako Instalazio Termikoen Erregelamendu berriaren 41. artikuluan agertzen den txartel profesionalarekin; horretarako, prestakuntzako ikastaro osagarri teoriko-praktiko bat gainditu beharko dute. Ikastaro horren iraupena eta edukia foru agindu honen 2. eranskinean ageri dira.

2. Foru agindu honen 35. artikuluan ezarritakoaren arabera organo eskudunak onartutako prestakuntza entitateek emanen dituzte prestakuntza ikastaroak.

Xedapen Indargabetzaile Bakarra

Arau hauek indarrik gabe utzi dira:

a) Industria eta Teknologia, Merkataritza eta Laneko kontseilariaren ekainaren 10eko 62/2004 Foru Agindua. Horren bidez, Nafarroako Foru Komunitatean berokuntza, ur bero sanitarioa eta klimatizazioa instalatu eta mantentze-lanak egiteko baimena eskuratzeko baldintzak ezarri ziren. Baldintza horiek Eraikinetako Instalazio Termikoen Erregelamendua (RITE) onesten duen uztailaren 31ko 1751/1998 Errege Dekretuan daude arautuak.

b) Industria eta Teknologia, Merkataritza eta Laneko kontseilariak apirilaren 1ean emandako 28/2004 Foru Agindua foru agindu honetan ezarritakoaren kontrakoa den orotan. Foru agindu horren bidez arauzko kontrola duten instalazioak abian jartzeko tramitazio administratiboan segitu beharreko prozedura ezarri zen.

Azken Xedapenetako Lehena. Indarra hartzea.

Foru agindu honek Nafarroako Aldizkari Ofizialean argitaratu eta biharamunean hartuko du indarra.

I. ERANSKINA. Proiektuaren egitura eta edukia

1. agiria: memoria

Identifikazio datuak.

Instalazioaren datuak. Instalazioaren xede den jardueraren deskribapena, instalazioaren helbide zehatza, probintzia, PK.

Titularra. Pertsona fisikoaren izena edo sozietatearen izena, IFK/IFZ, kudeatzailearen edo ahaldunaren eta harremanetarako pertsonaren izena, jakinarazpenetarako helbidea, harremanetarako telefonoa, faxa.

Aurrekariak.

Proiektuaren helburua.

Aplikatu beharreko legedia.

Eraikinaren deskribapen orokorra.

Erabilerak, erabiltzeko ordutegiak.

Instalazioaren deskribapena.

Energia eskaria mugatzearen justifikazioa.

Eranskineko kalkuluei buruzko aipamena. Amaierako emaitzen laburpena.

Ongizatearen eta higienearen arloko eskakizunak betetzearen justifikazioa.

Kalitate termikoa. Diseinuko baldintzak.

Airearen kalitatea. Barneko airearen sailkapena (IDA), airearen kalitatearen sailkapena (ODA), ateratzen den airearen sailkapena (AE).

Higiene betebeharrak.

Ingurune akustikoaren kalitatea eskatzea. Justifikazioa.

Energia eraginkortasunari buruzko eskakizuna betetzen dela justifikatzea.

Beroa eta hotza sortzea.

Beroa sortzea. Galdararen ezaugarriak (potentzia, potentziaren zatikatzea, potentzia izendatuaren errendimendua, %30eko kargako errendimendua), bulkadako tenperatura, itzulerako tenperatura, jauzi termikoa, uraren batez besteko tenperatura eta erregailuaren erregulazioa potentziaren arabera.

Hotza sortzea. Sorgailuen energia eraginkortasuna (EER koefizientea, COP koefizientea eta etiketa energetikoa).

Hodien eta konduktuen sarea.

Hodien isolamendu termikoa.

Konduktuen isolamendu termikoa.

Konduktuen estankotasuna. Mota zehaztea.

Kontrola.

Instalazio termikoen kontrola justifikatzea. Kontrol sistemaren, eginkizunen eta osagaien deskribapena.

Kontsumo kontrola justifikatzea.

Energia berreskuratzea. Sistemaren deskribapena.

Energia berriztagarriak erabiltzea. Eguzki energia termikoa justifikatzea DB HE4.

Ohiko energiaren erabilera mugatzea. Justifikazioa.

Energia kontsumitzen duten ekipamenduen zerrenda.

Energia eraginkortasunaren aldetik aukeratutako girotze sistema eta ur bero sanitarioarena justifikatzea.

S > 1.000 m²-rako, aukeratutako sistema beste batzuekin konparatzea.

Segurtasunari buruzko eskakizuna betetzen dela justifikatzea.

Beroa eta hotza sortzea.

Baldintza orokorrak.

Makinen gela.

Ezaugarri komunak.

Makinen gelak, gasezko bero sorgailuak dituztenak (gelaren kokalekua, hausturako azalera ahula, aireztapena, gas detekzioa).

Arrisku handiko makinen gelak. Koadro elektrikoaren edo etengailu elektrikoen egoera.

Makinen gelen neurriak.

Makinen gelak aireztatzea.

Tximiniak. Diseinua eta neurriak.

Hodi sareak.

Elikatze hodiaren diametroa kalkulatzea.

Hustekoaren diametroa.

Espantsioko gailuaren kalkulua (eranskina).

Dilatazioa.

Iragazketa.

Konduktu sareak. Diseinuaren ezaugarriak eta abiadura.

Suteen kontrako babesa. Justifikazioa. Makinen gelak eta sektorizazioa.

Erabiltzeko segurtasuna.

Ur bero sanitarioa. Deskribapena.

Instalazio elektrikoa. Deskribapena.

2. agiria: kalkuluak (eranskinak).

Transmisio-faktoreak kalkulatzea.

Energia eskariaren mugaketa kalkulatzea. HE1.

Karga termikoak kalkulatzea.

Ur bero sanitarioa ekoiztea eta eguzki energia termikoaren ekarpena HE4.

Beroa eta hotza sortzeko gailuak aukeratzea.

Terminal-ekipamenduak aukeratzea.

Airearen tratamenduko unitateak.

Barneko airearen kalitatea HS3.

Zirkuitu hidraulikoa eta ponpak kalkulatzea.

Espantsio-ontziak kalkulatzea.

Aire konduktuak kalkulatzea.

Aire difusioa kalkulatzea.

Kontrol seinaleak.

Kalkulu elektrikoak.

3. agiria: baldintza agiria.

Administrazio baldintzen agiria.

Baldintza teknikoen agiria.

Ekipamenduek eta materialek izan behar dituzten gutxieneko ezaugarriak.

Hornidurako eta exekuzioko baldintzak.

Obrako harreraren kalitate eta kontrolaren bermeak.

Muntaketa. Proben protokoloa.

Instalazioaren exekuzioaren kontrola.

Bukatutako instalazioaren kontrola.

4. agiria: Planoak.

Egoera eta kokalekua.

Oinplanoak. Instalazio hidraulikoaren trazadura.

Oinplanoak. Konduktuen trazadura.

Instalazioaren hasierako eskema.

Eskema lerrobakar elektrikoa.

Makinen gela.

5. agiria: aurrekontua.

6. agiria: segurtasunari eta osasunari buruzko azterlana / Oinarrizko azterlana

7. agiria: instalazioa erabiltzeko eta mantentze-lanak egiteko eskuliburua.

8. agiria: instalatutako materialen eta ekipamenduen zerrenda.

Horien ezaugarri teknikoak eta funtzionamendukoak azalduko dira, jatorriaren eta bermearen dokumentazioarekin batera.

9. agiria: abian jartzeko proben emaitzak.

II. ERANSKINA. Eraikinetako instalazio termikoen txartel profesila baliozkotzeko ikastaroak

Ikastaroen edukia:

Uztailaren 31ko 1751/1998 Errege Dekretuaren bidez onetsitako Eraikinetako Instalazio Termikoen Erregelamenduan (EITE) ezarri ziren txartel profesionalak eraikinetako instalazio termikoen txartel profesionalarekin baliozkotzeko prestakuntza osagarriaren ikastaroek eduki hauek izanen dituzte:

Instalatzaile txartela baliozkotzeko gai zerrenda:

1. Airea girotzeko instalazioak eta ekipamendua (A espezialitaterako); (30 ordu).

2. Berokuntzarako eta ur bero sanitariorako instalazioak eta ekipamenduak (B espezialitaterako); (30 ordu).

3. Instalazio termikoetan energia berriztagarriak erabiltzea; (10 ordu).

4. Instalazio termikoetan probak egitea eta abian jartzea; (10 ordu).

5. Instalazio termikoetan mantentze-lanak egitea; (20 ordu).

6. Kalitatea eta segurtasuna ekipamenduen edo instalazio termikoen mantentze-lanetan; (5 ordu).

7. Instalazio termikoen energia ustiapena; (5 ordu).

8. Eraikinetako Instalazio Termikoen Erregelamendua, Hozte Planten eta Instalazioen Segurtasuneko Erregelamendua, aplikatu beharreko arloetakoa, Europako 842/2006 Erregelamendua, berotegi efektuko gas fluordun batzuei buruzkoa, eta aplikatu beharreko beste araudi batzuk: (40 ordu).

Mantentzaile txartela baliozkotzeko gai zerrenda:

9. Airea girotzeko instalazioak eta ekipamendua (A espezialitaterako); (30 ordu).

10. Berokuntzarako eta ur bero sanitariorako instalazioak eta ekipamenduak (B espezialitaterako); (30 ordu).

11. Instalazio termikoetan energia berriztagarriak erabiltzea; (10 ordu).

12. Kalitatea eta segurtasuna instalazio termikoen muntaketan; (5 ordu).

13. Instalazio termikoen energia ustiapena; (5 ordu).

14. Eraikinetako Instalazio Termikoen Erregelamendua, Hozte Planten eta Instalazioen Segurtasuneko Erregelamendua, aplikatu beharreko arloetakoa, Europako 842/2006 Erregelamendua, berotegi efektuko gas fluordun batzuei buruzkoa, eta aplikatu beharreko beste araudi batzuk; (40 ordu).

Jar zaitez gurekin harremanetan | Erabilerraztasuna | Lege abisua | Webaren mapa