navarra.es
Castellano | Euskara | Français | English
Ezagutzera eman
234/2005 Foru Agindua, otsailaren 28koa, Ingurumen, Lurraldearen Antolamendu eta Etxebizitza kontseilariak emana, Nafarroako abeltegietan simaurra sortu, bildu eta kudeatzeko baldintzak ezartzen dituena
(2005eko 52. NAOn argitaratutako testua, maiatzaren 2an)
Atarikoa
Ekainaren 23ko 148/2003 Foru Dekretuak abeltzaintzako instalazioek Nafarroako Foru Komunitatean ingurumenaren aldetik bete beharreko baldintza teknikoak ezarri zituen.
Foru dekretu horretako 7. artikuluko 2. puntuak adierazten duenez, erregelamenduen bidez zehaztuko da simaurtegien eta simaur isurkariko hobien tamaina, kokalekuaren inguruabarrak zein diren ikusita. Halaber, 7. artikuluko 5. puntuak dioenaren arabera, simaur isurkaria metatzen duten kanpoko biltegiak egiteko, dekretu hau garatzean ezarriko diren baldintza teknikoak beharko dira bete. Azkenik, 8. artikuluko 1. puntuan adierazten da dekretu hau garatzean finkatuko dela simaurra sortu eta kudeatzeko planaren edukia, eta instalazioen ezaugarrien arabera kontuan hartu beharreko alderdiak zehaztuko dituela.
Gainera, foru dekretu horretako azken xedapenetariko lehenbizikoak ahalmena ematen dio Ingurumen, Lurraldearen Antolamendu eta Etxebizitza kontseilariari foru dekretua garatu eta betetzeko behar diren xedapenak agindu ditzan.
Ingurumenaren Integrazioko Zerbitzuak proposamen bat prestatu du, honakoak dauzkana: simaurra ekoiztu eta kudeatzeko planek bildu behar dituzten datuak, simaur isurkariaren biltegiak eraikitzeko baldintza teknikoak eta simaurtegien eta simaur isurkariko hobien tamaina, kokalekuaren inguruabarrak zein diren ikusita.
Horrenbestez, egindako proposamena ikusirik eta 148/2003 Foru Dekretuaren azken xedapenetako lehenbizikoak ematen didan eskumena erabiliz, agindu dut:
Lehena
Baldintza hauek ezartzen dira simaur gotorrak biltzeko:
1.1. 600 mm-tik beheitiko euri-tasak dituzten eremuetan ez da beharrezkoa izanen simaur gotorren biltegia material artifizialak paratuz irazgaiztea, baldin eta behar bezala eginiko ikerlan tekniko batek frogatzen badu irazgaitza dela eta biltegia osorik garbitzen bada urtero behin gutxienez ere.
Inguruabar horiek ezin erabiliko dira foru dekretuen bidez espresuki kutsakortzat jo diren eremuetan.
1.2. Aldi baterako biltegitzat hartuko dira bakarrik lurzati hartzaileen ondo-ondoan egin litezkeen simaurtegiak, lur hartzaileen berezko beharrak asetzeko modukoak baino handiagoak ez diren kopuruak metatuz eta erabili baino lehen behar-beharrezkoa den denborarako mantenduz.
Simaurra bestelako baldintzetan bilduz gero, berariazko biltegietan bildu beharko da, alegia, 148/2003 Foru Dekretuko ) artikuluan aipatzen diren baldintza teknikoak betez. Simaurra eten gabe toki batean bilduz gero, edozein une, herri eta lurretan, ez da aldi baterako biltegitzat joko.
Bigarrena
Baldintza hauek ezartzen dira simaur isurkariak biltzeko:
2.1. Simaur isurkarien teilaturik gabeko biltegien edukiera neurtzeko, simaurra biltzeko gehieneko aldian izaniko euri-tasa kontuan hartuko da, 25 urteko birgertatze-aldian hileroko besteaz besteko euri-tasen arabera.
2.2. Simaur isurkarien biltegiak eraikitzeko baimenerako agirietan honakoak egin beharko dira:
a) Irazgaizte eta egonkortze mekanikoaren baldintza egokiak zehatz-mehatz frogatzea, berariazko eraikuntzari buruzko arautegiarekin bat.
b) Biltegietako, hodi sistemetako eta zama-lanetarako sistemetako agiri grafikoak, eraikuntzako frogagiriak eta agiri deskriptiboak aurkeztea.
2.3. Simaur isurkariaren kanpoko eta teilaturik gabeko biltegiak gutxienez ere sakon izanen dira.
2.4. Biltegia polibinilo klorurozko (PVC), polietilenozko (PE) edo kautxuzko (EPDM) xaflak dituzten putzuek osatzen dutenean, honakoak hartu beharko dira kontuan:
-Ezponden egonkortasuna, lurraren ezaugarrien araberakoa. Malda ez da behin ere 2:1 baino gehiago izanen (ezkerretik eskuinera: goitik behera).
-Dikearen gailurraren sakonera garbitu eta konpontzeko modukoa izanen da. Gutxienez ere 3 metrokoa izanen da.
-Drainatze bat eginen da PVCzko hodi dranaitzaileen bidez (hareaz eta hartxindarrez inguraturik) edo drainatze zangen bidez, 15-20 m-ra, zeinak bere irteera edukita, edo denek irteera bera edukita, orotariko erregistrorako kutxeta baterantz, izan litezkeen jarioak atzeman ahal izateko.
-Xafla iragaizgarriaren eta lur trinkotu leunaren bidez, lurrez eta ehunez eginiko xafla izanen da, artekak ixteko.
Hirugarrena
Simaurra sortu eta kudeatzeko planaren ezaugarriak eta haren gutxieneko edukia ondoren ezarriko dira:
3.1. Hogei abelburu larri baino gehiago biltzen ahal dituzten abeltegiek aurkeztu beharko dute simaurra sortu eta kudeatzeko plana, simaurra ongarri gisa alorretan badarabilte.
3.2. Simaurra sortu eta kudeatzeko planak Ingurumen, Lurraldearen Antolamendu eta Etxebizitza Departamentuan aurkeztuko dira, bai paperean, bai sistema informatikoan. Teknikari eskudun baten izenpea eduki beharko dute.
3.3. Plan baten sustatzailea abeltegi baten titularra edo hondakin-kudeatzailea izan daiteke.
Abeltegi batzuetako simaurra kudeatzen eta banatzen arduratzen dena hondakin-kudeatzailea izanez gero, abeltegi bakoitzak aurkezturiko planetik abiatu, bere plana abeltegi guztiena izanen bailitzan prestatu eta lurraldeko plana, banaketa plana eta erregistro liburua eginen ditu.
3.4. Abeltzainak, bere simaurra simaur-kudeatzaile bati ematen badio, sustatzailearen datuak, plana eta hondakin-kudeatzaile hartzailearen datuak bakarrik biltzen dituen plan bat aurkeztu beharko du.
3.5. Simaurra sortu eta kudeatzeko planek seina zati izanen dituzte:
A) Sustatzailearen orotariko datuak:
a) Sozietatearen izena.
b) Helbidea.
c) Herria.
d) Udalerria.
e) Posta kodea.
f) Telefonoa.
g) Posta elektronikoa (izanez gero).
h) NAN edo IFZ.
i) Plana osatzen duten abeltegien zenbakiak.
B) Plana, abeltegian sorturiko hondakinen zenbatekoa eta nolakoa zehaztuko dituena. Zati horrek argibide hauek bildu beharko ditu:
a) Abeltegiaren edukia. Postu kopurua, abereen adinaren eta ekoizpenerako garaiaren arabera (eme ugaltzaileak, ar ugaltzaileak, ordezpenerakoak, adinaren arabera eta gizendegi kopurua, haragitakoak izanez gero...).
b) Erabiliriko ekoizpen sistema: intentsiboa, estentsiboa, erdibidekoa.
c) Simaurra sortzeko eragina duten instalazioen ezaugarriak: aska mota, elikadura mota, garbiketa sistemak, aireberritze mota, barneko eta kanpoko hobien diseinua. Horren edukia lurraldeko planaren eta banaketa planaren araberakoa izanen da. Patioen ezaugarriak. Euri-ura biltzeko sistema.
d) Paratu eremuko eta bildu beharreko eremuko euri-tasa.
e) Simaurra sortzeko eragina duten ekoizpen erabileraren ezaugarriak: pentsuaren osaera, asketako uraren emaria, garbitu beharreko uraren emaria, abeltegi osoko ur kontsumoaren erregistroa.
f) Sortzen den simaur mota: gotorra, isurkaria, zatiki isurkaria eta gotorra, bereizgailurik edukiz gero. Etzauntzen eranstea, nolakoak eta zenbat.
g) Toki bakoitzean sortzen den simaur mota bakoitzaren kopurua, aberearen adinaren arabera. (adinik kontrakoena hartuko da kontuan).
h) Simaur mota bakoitzaren osaera, nekazaritzarako ongarrien arabera: nitrogenoa, fosforoa, potasioa, kobrea, zinka eta abar.
i) Erabilera estentsiboa edo erdibidekoa, artzaintzarako ohiko aro eta lurzatiak adierazi, urtean ukuiluan egoteko denbora zehaztu eta urtaroak, abereen ekoizpen unearen arabera.
j) Jarduerari erantsiriko instalazioak, hala nola, esnetegiak, jetzitegiak eta abar.
C) Lurraldeko plana, simaurra erabiliko den lurzati multzoa zehaztuko duena. Argibide hauek bilduko ditu:
a) Simaur gotorra erabiltzeko eremu erabilgarria.
b) Simaur isurkaria erabiltzeko eremu erabilgarria.
c) Lurzatiaren identifikazioa, katastroaren arabera.
d) Lurzatiko nekazaria: abeltzainak berak lantzen duenetz adieraziko da.
e) Titularraren baimena simaurra botatzeko.
D) Sorturiko simaurra banatzeko plana, argibide hauek bilduko dituena.
a) Simaurra hartzen duten lurrak eta horien beharrak nutrizioaren aldetik.
b) Simaurra erabiltzeko aroa, lur motaren arabera.
c) Noizero erabiltzen den (urtean behin, bi urtean behin, eta abar)
d) Simaur bakoitza erabiltzeko dosia, lur hartzailearen arabera.
e) Simaur mota bakoitza banatzeko tresnen deskripzioa eta ezaugarriak. Lan egiteko erabiltzen den dosia.
E) Simaurra kudeatzeko erregistroko liburua. Zelaiko agiri bat, kudeaketaren jarraipena egiteko balio duena, abeltzainak edo simaurra banatzen arduratzen denak bete beharko duena.
Liburuak, komeni den moduan eguneraturik, formaturik egokienean eta, ahal bada, euskarri informatikoan, simaur banaketa guztiak identifikatu eta zehatz-mehatz deskribatzeko behar diren argibideak bilduko ditu liburuak, simaurra sortu eta kudeatzeko planarekin bat datorrela egiaztatzeko moduan. Argibide horiek Ingurumenaren Integrazioko Zerbitzuari igorri beharko zaizkio, baldintza hauei jarraituz:
a) Zerritegi intentsibo, esnetako behitegi, haragitako behien gizendegi eta hegaztitegi intentsibo handiek urtean behin gutxienez aurreko aurkezte egunetik eginiko oharrak igorri beharko dituzte. Urtero lehen hiru hilabeteetan aurkeztu beharko dituzte aurreko urteko oharrak.
b) Haragitako behitegi, behortegi, untxitegi eta esnetako artegi handiek eta aurreko lerroaldean aipatzen diren abeltegi txikiek gutxienez ere bi urtean behin igorri beharko dituzte erregistroko liburuko oharrak.
c) Haragitako behitegi, behortegi, untxitegi eta esnetako artegi txikiek eta haragitako artegi eta hegaztitegi estentsiboek gutxienez ere lau urtean behin igorri beharko dituzte erregistroko liburuko oharrak.
3.6. Ingurumenaren Integrazio Zerbitzuak hiru hilabeteko epean onetsiko du simaurra sortu eta kudeatzeko plana, agiri guztiak aurkezten direnetik hasita. Epe hori espresuki ebazpenik eman gabe bukatzen bada, plana onetsitzat joko da.
3.7. Planak abeltegietan edo erabileran aldaketarik gertatzean aldatu egin beharko da, aldaketa horiek berekin badakarte jarduera sailkatuaren lizentzia edo ingurumenaren baimen integratua gaurkotzea.
Berritzeko egin beharreko izapidaketa lehenbizikoz onesteko behar den bera izanen da.
3.8. Planak aldatu eta eguneratzen ahalko dira, abeltegian edo erabileran aldaketarik gertatuz gero, aldaketa horiek plana burutzeko eragina badute, baina kasuan kasuko baimena gaurkotzera behartzen ez badute. Aldaketaren eskaera Ingurumen, Lurraldearen Antolamendu eta Etxebizitza Departamentuan aurkeztuko da. Horrek hiru hilabeteko epean emanen du ebazpena. Epe hori espresuki eman gabe bukatzen bada, aldaketa baimendutzat jotzen ahalko da.
3.9. Simaurra sortu eta kudeatzeko planen aldatzeak eta berritzeak Ingurumenaren Integrazioko Zerbitzuak ofizioz eskatzen ahalko dute, abeltegian aldatze edo berritze hori egitera behartzen duen aldaketarik gertatu dela atzematen badu.
3.10. Plana jarduera bukatzean edo, aldatu edo berritu ondoren, beste batek ordeztean indargabetuko da.
Laugarrena
Foru agindu hau Nafarroako Aldizkari Ofizialean argitara dadila agintzea.
Bosgarrena
Foru agindu hau Ingurumenaren Integrazioko Zerbitzuari igortzea, behar diren ondorioak izan ditzan.
