navarra.es
Castellano | Euskara | Français | English
Ezagutzera eman
190/2004 Foru Agindua, ekainaren 18koa, Vianako Printzea Erakundea-Kultura eta Turismo kontseilariak emana, turismoko establezimendu, enpresa eta entitateak Nafarroako Turismo Erregistroan inskribatzeko prozedura arautzen duena
(2004ko 124. NAOn argitaratutako testua, urriaren 15ean)
Atarikoa
Abuztuaren 25eko 502/2003 Foru Dekretuak Nafarroako Turismo Erregistroaren antolamendua eta funtzionamendua arautzen du, Turismoari buruzko otsailaren 14ko 7/2003 Foru Legean ageri diren aurreikuspenak garatuz.
Aipatu foru dekretuko 5. artikuluak dio erregistroan inskribatzeko prozedura Kultura eta Turismo Departamentuak finkatuko duela. Horrenbestez, bidezkoa da prozedura hori arautzea, espedienteak beren konplexutasunaren arabera bereiziz, xedapen horrek aurreikusten duen bezala.
Hori horrela, abuztuaren 25eko 502/2003 Foru Dekretuaren 5. artikuluarekin bat, eta Nafarroako Foru Komunitateko Gobernua eta Administrazioa arautzen dituen apirilaren 11ko 23/1983 Foru Legearen 36. artikuluak esleitzen dizkidan ahalmenez baliatuz, agindu dut:
I. KAPITULUA. Xedapen orokorrak
1. artikulua. Xedea.
Foru agindu honen xedea da Nafarroako Turismo Erregistroan inskribatzeko prozedura ezartzea.
2. artikulua. Inskripzioa nahitaez egin beharra.
Inskripzioa, jarduera hasi aurretik egin beharrekoa, nahitaezkoa izanen da ostatu, jatetxe eta bitartekotza jardueretan eta turismoko jarduera osagarri arautuetan aritzen diren turismoko enpresentzat eta beren establezimenduentzat, bai eta turismo partzuergoentzat eta turismoko enpresa elkarteentzat ere. Gainerako kasuetan inskripzioa aukerakoa izanen da.
3. artikulua. Organo arduraduna.
Turismorako eta Turismoaren Sustapenerako Zuzendaritza Nagusia Nafarroako Turismo Erregistroaren organo arduraduna izanen da, egoki aritzen den begiratuko du eta jardueraren emaitza hobetzeko eta proposatutako helburuak lortzeko komenigarriak iruditzen zaizkion neurriak proposatuko ditu.
4. artikulua. Interesatuentzako argibideak.
Turismorako eta Turismoaren Sustapenerako Zuzendaritza Nagusiak interesatuei argibideak eta orientazioa emanen dizkie indarra duten xedapenek egin nahi dituzten proiektu edo jarduerei ezartzen dizkieten baldintzei buruz, foru agindu honetan azaltzen dena ongi betetzen laguntzeko.
II. KAPITULUA. Nafarroako Turismo Erregistroaren antolamendua
5. artikulua. Atalak.
Nafarroako Turismo Erregistroa honako hauek osatuko dute:
a) Erregistroko inskripzioak eta idatzoharrak biltzen dituen Erregistroa. Turismorako eta Turismoaren Sustapenerako Zuzendaritza Nagusiak ezartzen dituen ataletan banatuko da, gutxienez ere hauek:
-Turismoko Ostatuen Atala.
-Jatetxe Atala.
-Bitartekotza Atala.
-Turismoko Jarduera Arautuen Atala.
-Turismoko Entitate eta Elkarteen Atala.
b) Erregistro idazpenei dagozkien agiriak gordeko dituen artxibo orokor bat.
6. artikulua. Azpiatalak.
Aurreko artikuluan aipatu atalek azpiatal hauek izanen dituzte:
1. Turismoko Ostatuen Atala:
-Hotelak.
-Landa hotelak.
-Apartamentu hotelak.
-Hostalak.
-Pentsioak.
-Turismoko kanpalekuak.
-Turismoko aterpetxeak.
-Landetxeak.
-Turismoko apartamentuak.
2. Jatetxe Atala:
-Jatetxeak.
-Kafetegiak.
-Ezaugarri bereziak dituzten tabernak eta arauz ezartzen diren beste establezimendu batzuk.
3. Bitartekotza Atala:
-Bidaia agentziak.
-Turismo enpresen elkarteak.
-Erreserben zentralak.
-Kongresu, azoka eta konbentzioen antolamendu profesionala egiten duten enpresak.
4. Turismoko Jarduera Arautuen Atala:
-Turismo aktiboko zerbitzuen enpresak.
-Turismo kulturaleko zerbitzuen enpresak.
5. Turismoko Entitate eta Elkarteen Atala:
-Turismo partzuergoak.
-Turismo elkarteak.
-Beste elkarte batzuk.
III. KAPITULUA. Nafarroako Turismo Erregistroaren funtzionamendua
7. artikulua. Idazpen motak.
1. Turismoko establezimendu, enpresa eta jarduerei buruzko egintzek hiru idazpen mota izanen dituzte Erregistroan: inskripzioak, idatzoharrak eta deuseztatzeak.
2. Honakoak inskribatuko dira:
a) Establezimenduaren edo enpresaren inskripzio kodea.
b) Establezimenduaren edo jardueraren merkataritza izena.
c) Herria, udalerria, helbidea eta telefonoa.
d) Inskripzioaren eguna.
e) Establezimenduari dagokion sailkapena.
f) Plaza kopurua, hala badagokio. Bidezkoa denean, ostatu hartzeko unitateen kopurua zehaztuko da, hala nola bakoitzaren edukiera eta tipologia.
g) Jendearentzat irekitzeko egunak, aldi baterako itxialdiak eta berrirekitzeak.
h) Establezimenduan egindako berrikuntza lanen datak.
i) Zerbitzu osagarriak, horrelakorik badago.
j) Erabiltzailearendako interesgarriak diren gainerako datuak, establezimenduaren edo enpresaren titularrak berariazko baimena eman badu.
3. Honakoak azalduko dira idatzoharretan:
a) Establezimenduko titularraren izena, NANa edo IFKa, bai eta zuzendari, kudeatzaile edo antzekoarena ere, eta izaten diren aldaketak.
b) Dispentsak.
c) Establezimendu edo jardueren proiektuak eta dagokien sailkapena, hala denean; behin-behinekoak izanen dira jardueraren hasieraren inskripzioa egin arte, foru agindu honetan ezarritakoari jarraikiz.
d) Emandako dirulaguntzak.
e) Egindako ikuskapenak eta horien emaitzak.
f) Zehapenak.
g) Aseguru polizak, horrelakorik izanez gero.
h) Establezimenduaren edo jardueraren gaineko erreklamazio, kexa edo iradokizunak.
i) Turismoko establezimenduetan edo jardueretan eragina duen beste edozein egintza, Erregistroaren xedeetarako garrantzia baldin badu.
Turismoko jarduera bat baino gehiago garatzen duen establezimendua jarduera nagusia kontuan hartuta inskribatuko da. Oinarrizko zerbitzuak bereiziak dituen establezimendua bereizita inskribatu ahalko da interesatuak hala eskatzen badu. Bigarren mailako jarduerek dagokien araudia bete beharko dute.
Bigarren mailako jardueretan ustiapeneko titular desberdinak dituzten establezimenduek ezin izanen dute inskripzio bakarra izan.
4. Honakoak deuseztatuko dira:
a) Jarduera uzteak ukitzen dituen inskripzio eta idatzoharrak.
b) Zehapen espediente baten ondoren ezarritako zehapenak, legezko epea bukatu eta gero.
c) Erreklamazio, kexa eta iradokizunak, idatzoharra egin eta bi urtetara.
8. artikulua. Idazpenak egitea.
Idatzoharrak eta deuseztapenak ofizioz eginen dira, hala egin beharreko kasuetan, edo interesatuak eskatuta, organo eskudunak onetsiz gero.
Proiektuen behin-behineko inskripzioa hiru urteren buruan iraungiko da. Epe hori interesatuek eskatuta luzatu ahalko da.
Erregistratu beharreko egintzetan Turismoko Administrazioak parte hartu badu, horien berri hogei eguneko epean emanen zaio Erregistroari.
9. artikulua. Beste baimen batzuei lotu beharra.
1. Erregistroan inskripzioa edo idatzoharra egiteak ez ditu baliozkotzen antolamendu juridikoaren kontrakoak diren egintzak.
2. Turismo Erregistroan inskripzioa egiteak ez du alde batera uzten beste erakunde batzuek beren eskumenen esparruan eska ditzaketen baimenak lortu beharra.
10. artikulua. Publizitatea.
Nafarroako Turismo Erregistroko inskripzioei dagozkien idazpenak publikoak izanen dira. Erregistroko datu publikoak ikusi ahal izateko agiriak nahiz ziurtagiriak erakutsiko dira edo teknologia berriak erabiliko.
Ziurtagirien bidez egiaztatuko da Erregistroko idazpenen edukia, eta erreprodukzioko edozein baliabide mekanikoren bitartez baimendu ahalko da.
11. artikulua. Idazpenak egitea.
Idazpenak labur eginen dira eta gero Artxibora igorriko, non idazpenaren xede den agiria agertuko baita.
IV. KAPITULUA. Nafarroako Turismo Erregistroan inskribatzeko prozedura
1. Atala. Prozedura orokorra
12. artikulua. Behin-behineko inskripzioa.
1. Establezimendu bat eraiki edo instalatu aurretik, Erregistroko behin-behineko inskripzioa eskatu beharko zaio Turismorako eta Turismoaren Sustapenerako Zuzendaritza Nagusiari, ondoko agiri hauekin batera:
-Eskaera normalizatua, interesatuak edo bere legezko ordezkariak sinatua, zeinetan establezimenduaren kategoria eta modalitatea zehaztuko baitira.
-Lurzati zedula.
-Teknikari eskudun batek prestatu eta sinatutako proiektua, Lanbide Elkargoak ikus-onetsia. Establezimenduari aplikatu beharreko arauak bete beharko ditu proiektuak, dagokion sektoreko araudian ezarritakoaren arabera.
Proiektuan gutxienez ere azaldu beharrekoa:
a) Memoria teknikoa, eta horren barnean:
1. Hirigintza egoera eta lurzoruaren erabilera.
2. Proiektatu den establezimenduaren eraikuntza mota.
3. Elektrizitate, ur hornidura eta hondakin uren hustuketa zerbitzuen egoera.
4. Proiektatuko establezimenduaren modalitatea eta kategoria.
5. Establezimendurako aurreikusi den edukiera, ostatu mota ezberdinak kontuan hartuta, eta bertako osasun zerbitzuak zehaztea.
6. Establezimenduaren zerbitzu orokorrak.
b) Planoak eskalan:
-Planta bakoitzeko banaketa, gela edo ostatu unitate bakoitzaren azalera erabilgarri osoa adierazita.
-Plantako plano akotatuak.
-Altxaera orokorrak.
-Sekzioa (maila kotak eta garaiera libreak zorutik sabaira)
-Instalazioen planoak (iturgintza, saneamendua, berokuntza eta elektrizitatea).
-Suteen kontra babesteko hartu diren neurri zuzentzaileen planoak.
2. Turismorako eta Turismoaren Sustapenerako Zuzendaritza Nagusiak, eskaera aurkeztu eta hiru hilabeteko epean, establezimenduaren behin-behineko inskripzioari, dagokion sailkapenari eta, hala denean, emandako dispentsei buruzko ebazpena eman eta interesatuari jakinarazi beharko dio. Epe hori eten eginen da interesatuari eskatzen zaionean akatsak zuzen ditzala eta beharrezkoak diren agiriak eta bestelako datuak aurkez ditzala.
3. Obrak eta instalazioak egiten ari direnean komenigarria bada funtsezko aldaketak egitea proiektutako establezimenduaren sailkapenari begira, aldaketa horiei buruz egokia eta beharrezkoa den dokumentazioa (proiektu berritua, epigrafeak edo eranskinak) aurkeztu beharko da, teknikari eskudun batek sinatuta, Turismorako eta Turismoaren Sustapenerako Zuzendaritza Nagusian. Artikulu honetako 1. eta 2. ataletan ezarritakoa aplikatuko zaio.
13. artikulua. Behin betiko inskripzioa.
1. Establezimendua edo enpresa, funtzionamenduan hasi aurretik, Erregistroan behin betikoz inskribatzeko, eskaera normalizatua aurkeztu beharko da, honako agiri hauekin batera:
a) Ustiapeneko titularraren nortasun fisiko edo juridikoaren egiaztagiria, eta ordezkariaren edo ahalordedunaren NANa, pertsona juridikoak izanez gero.
b) Dagokion Udalaren ziurtagiria, behar diren udal lizentziak dituela frogatzen duena.
c) Obra bukaeraren ziurtagiria.
d) Higiezinaren erabilgarritasunari buruzko egiaztagiria.
e) Zuzendaritzaz edo kudeatzailetzat arduratuko denaren izendapena.
f) Araudian jarduera mota bakoitzerako ezartzen den aseguru polizaren kopia.
g) Ziurtagiria, fakultatibo eskudun batek emana, obrak jakinarazitako proiektuaren eta aldaketaren -behin-behineko sailkapenaren oinarri izandakoaren arabera egin direla frogatzen duena.
h) Obrako azken planoak euskarri informatikoan.
i) Establezimendua eta/edo jarduerak deskribatzen dituen memoria.
j) Beste edozein agiri, interesatuaren ustez establezimenduaren edo jardueraren berme izaten laguntzen badu Erregistroan behin betikoz inskribatzerakoan.
k) Establezimendu edo enpresa mota bakoitzeko araudian eskatzen diren agiri guztiak.
2. Turismorako eta Turismoaren Sustapenerako Zuzendaritza Nagusiak, eskaera aurkeztu eta hiru hilabeteko epean, establezimenduaren behin betiko inskripzioari, dagokion modalitate sailkapenari eta, hala denean, emandako dispentsei buruzko ebazpena eman eta interesatuari jakinarazi beharko dio. Epe hori eten eginen da interesatuari eskatzen zaionean akatsak zuzen ditzala eta beharrezkoak diren agiriak eta bestelako datuak aurkez ditzala.
Obrak egin badira behin-behineko inskripzioa ekarri zuen proiektuan edo, hala denean, jakinarazitako aldaketetan zehaztutakoari jarraikiz, inskripzioa ezin izanen da ukatu edo geroratu jada aztertu diren datuak oinarri hartuta; horrek ez du alde batera uzten Administrazio Publikoen Araubide Juridikoari eta Guztiendako Administrazio Prozedurari buruzko azaroaren 26ko 30/1992 Legearen VII. tituluko lehen kapituluan ezarritakoa.
Hala ez bada, berriz sailkatu ahalko da establezimendua, baita bere tipologia ere ahal denean, edo inskripzioa ukatu.
3. Establezimendu edo enpresa baten inskripzioaren ondoren behar diren idatzoharrak eginen dira.
2. Atala. Prozedura erraztua
14. artikulua. Aplikazio eremua.
Prozedura erraztua aplikatuko da, interesatuak Erregistroan prozedura orokorraren arabera inskribatzeko eskatzen duenean izan ezik, ondoko hauei dagozkien espedienteen tramitazioan:
a) Izar bat edo bi eta 40 plaza baino gutxiago dituzten hotelen inskripzioak.
b) Pentsioen inskripzioak.
c) 40 plaza baino gutxiago dituzten hostalen inskripzioak.
d) Giltza bat eta 40 plaza baino gutxiago dituzten apartamentuen, bungalowen eta antzekoen inskripzioak.
e) 3. mailakoak diren eta 50 lurzati baino gutxiago dituzten turismoko kanpalekuen inskripzioak.
f) Kafetegien eta jatetxeen inskripzioak.
g) Bidaia agentzietako bulegoen inskripzioak.
h) Landetxeen inskripzioak.
i) Turismoko aterpetxeen inskripzioak.
j) Establezimendu kontrolatugabeen inskripzioak, horrelakotzat jo badira zehapen prozedura batean.
k) Turismoko jarduera arautuen inskripzioak.
l) Aurreko ataletan aipatzen ez den turismoko edozein establezimendu edo jardueraren inskripzioak, dagokien araudian horixe ezartzen duenean.
15. artikulua. Eskaera.
1. Erregistroan prozedura erraztuaren bidez inskribatzeko, honako agiri hauek aurkeztu beharko dira Turismorako eta Turismoaren Sustapenerako Zuzendaritza Nagusian:
-13.1 artikuluan aipatutakoa, g) atalean esandakoa izan ezik.
-Obren proiektua, beharrezkoa denean.
-Lurzati zedula.
-Establezimendu edo enpresa mota bakoitzeko araudian eskatzen diren agiri guztiak.
2. Turismorako eta Turismoaren Sustapenerako Zuzendaritza Nagusiak, eskaera aurkeztu eta hiru hilabeteko epean, establezimenduaren inskripzioari, dagokion sailkapenari eta, hala denean, emandako dispentsei buruzko ebazpena eman eta interesatuari jakinarazi beharko dio. Epe hori eten eginen da interesatuari eskatzen zaionean akatsak zuzen ditzala eta beharrezkoak diren agiriak eta bestelako datuak aurkez ditzala.
3. Atala. Prozedura orokorraren eta erraztuaren xedapen komunak
16. artikulua. Sailkapena.
Ematen den sailkapenari eusteko bete egin beharko dira beti kasuan kasuko araudiak ezartzen dituen baldintzak; ofizioz berrikusi ahalko da, interesatuari entzun ondoren.
Era berean, establezimendu edo enpresetako titularrek sailkapena aldatzeko eskaria egin dezakete, horretarako arrazoiak ongi justifikatuta.
17. artikulua. Inskripzio baldintzatua.
Agiriren bat ez aurkeztea edo baldintzak ez betetzea garrantzi gutxikoa denean eta zerbitzuaren kalitatean eragin handirik ez duenean, Erregistroan inskribatzea erabaki ahalko da eta horrek establezimendu edo enpresari bere jardueran hasteko aukera emanen dio, nahiz eta falta den agiria aurkeztu edo akatsak zuzendu beharko dituen ezartzen den epean.
18. artikulua. Administrazioaren isiltasuna.
1. Interesatuak ez daude behartuta Turismorako eta Turismoaren Sustapenerako Zuzendaritza Nagusian lehendik dauden agiriak aurkeztera, baina zein espedientetan aurkeztu zituzten adierazi beharko dute eta agiri horiek indarra izaten segitu.
2. Aurreko 12, 13 eta 15. artikuluetan ezarritako epeak bukatu eta ebazpenik jakinarazi ez bada, eskaerak administrazioaren isiltasunez onartutzat joko dira.
19. artikulua. Deuseztatzeak.
Deuseztatzeak interesatuei jakinarazi behar zaizkie.
4. Atala. Turismoko entitate eta elkarteak inskribatzeko prozedura
20. artikulua. Eskaera.
1. Turismoko partzuergoek, enpresa elkarteek eta gainerako elkarteek, Erregistroan inskribatzeko, agiri hauek aurkeztu beharko dituzte behar bezala betetako eskaerarekin batera:
-Estatutuak.
-Lehendakaria eta kudeatzailea edo antzekoak izendatzea.
-Entitate parte-hartzaileen zerrenda.
2. Turismorako eta Turismoaren Sustapenerako Zuzendaritza Nagusiak, eskaera aurkeztu eta hiru hilabeteko epean, inskripzioari buruzko ebazpena eman eta interesatuari jakinarazi beharko dio. Epe hori eten eginen da interesatuari eskatzen zaionean akatsak zuzen ditzala eta beharrezkoak diren agiriak eta bestelako datuak aurkez ditzala.
Epealdi horretan eskatzaileari berariazko ebazpenik jakinarazi ezean, eskabideak administrazio isiltasunaren bidez onartu direla ulertuko da.
V. KAPITULUA. Aldaketak
21. artikulua. Tramitazioa.
1. Establezimenduen egitura, ezaugarriak, sailkapena edo gaitasuna ukitzen duten aldaketak 12, 13 eta 15. artikuluetan ezarritako prozedurei jarraikiz tramitatuko dira, kasuen arabera, nahiz eta 13.1 artikuluan aurreikusitako dokumentazioa b), c), g) eta h) ataletan aipatutakora murriztuko den.
Turismorako eta Turismoaren Sustapenerako Zuzendaritza Nagusiaren ustez garrantzi gutxikoak diren aldaketei dagozkien eskaeren kasuan, baimena eman ahalko da, interesatuen eskariz, obra proiektuaren ordez xede beretsuko beste dokumentu bat aurkezteko.
2. Titulartasun aldaketak Turismorako eta Turismoaren Sustapenerako Zuzendaritza Nagusiari jakinarazi beharko zaizkio, aldaketak izan eta hamabost eguneko epean, eta 13.1 artikuluko a), d), e) eta f) ataletan aipatutako agiriak, titular berriari dagozkionak, aurkeztuko dira. Titulartasun aldaketa Erregistroan inskribatutakoan, horri dagokion jakinarazpena igorriko zaio interesatuari.
3. Jarduera uzten bada, edo Turismo Erregistroan inskribatu edo idatzi beharreko datuetan aldaketaren bat izaten bada, Turismorako eta Turismoaren Sustapenerako Zuzendaritza Nagusiari horren berri eman beharko zaio, aldaketa izan eta hamabost eguneko epean, behar diren agiriekin batera.
VI. KAPITULUA. Ikuskapena eta zehapen araubidea
22. artikulua. Turismo diziplina.
1. Administrazioko organo eskudunek beharrezkoak iruditzen zaizkien ikuskapenak egin ahalko dituzte, horrela egiaztatuko baitute establezimendutik edo jardueratik hartutako datuak bat datozen Nafarroako Turismo Erregistroan ageri direnekin, eta beharrezkoa den beste edozein egiaztapen egin ahalko baitute indarra duten xedapenetan ezarritakoa ongi bete dadin, Turismoari buruzko otsailaren 14ko 7/2003 Foru Legeari jarraikiz.
2. Establezimenduaren edo jardueraren titularrak foru agindu honetako betebeharrak betetzen ez baditu, Turismoari buruzko otsailaren 14ko 7/2003 Foru Legean ezarritakoaren arabera dagozkion zehapenak jarriko zaizkio.
VII. KAPITULUA. Errekurtsoak
23. artikulua. Erregistroaren inguruko egintzak inpugnatzea.
Foru agindu hau betetzearen ondoriozko egintzen kontra errekurtsoa jar daiteke, Administrazio Publikoen Araubide Juridikoari eta Guztiendako Administrazio Prozedurari buruzko azaroaren 26ko 30/1992 Legean ezarritakoarekin bat.
Lehen Xedapen Iragankorra
Turismorako eta Turismoaren Sustapenerako Zuzendaritza Nagusiak ofizioz sartuko ditu, Nafarroako Turismo Erregistroan, foru agindu honek indarra hartu aurretik baimendutako establezimendu eta enpresei buruz dituen datuak, eta eskatu egin ditzake ez dituenak.
Bigarren Xedapen Iragankorra
Turismoko establezimendu eta enpresek turismo arloko administrazio baimena lortzeko egindako eskaerak ebatzi gabe badaude eta eskaera horiek foru agindu honek indarra hartu aurretik aurkeztu baziren, honako foru agindu honen arabera tramitatu ahalko dira interesatuek horixe eskatzen badute.
Aurreko 14. artikuluan aipatu ez diren establezimenduak eraikuntza fasean baldin badaude, sei hilabeteko epea izanen dute, foru agindu honek indarra hartzen duenetik hasita, Nafarroako Turismo Erregistroan inskribatzeko, horretarako ezarri den prozedurari jarraikiz.
Xedapen Indargabetzaile Bakarra
Indargabetu egin dira foru agindu honetan ezarritakoaren aurkako maila bereko edo apalagoko xedapen guztiak.
Azken Xedapen Bakarra
Foru agindu honek Nafarroako Aldizkari Ofizialean argitaratu eta biharamunean hartuko du indarra.
