Finlandiako Satakunta eskualdea Nafarroan izan da berriki, elikadura alferrik ez galtzeko, ingurumen-inpaktuak murrizteko eta pertsona ahulenen bizi-kalitatea hobetzeko Nafarroan garatzen ari diren zenbait ekimen ezagutzeko.

Bisita Interreg Europe programaren LCA4Regions proiektuaren barruan egin zen. Proiektu horrek Europako eskualdeen arteko esperientzien trukea bultzatzen du, parte hartzen duten eskualdeetan politika publikoak hobetzeko.

Finlandiak antolatutako bidaia honetan, Nafarroako Elikagaien Bankuaren jardueren karbono-aztarnaren kalkuluaren jardunbide egokia ezagutu ahal izan zuten bisitariek. NEB-ren zeregin soziala ikusi ez ezik, bere jardueraren ingurumen-inpaktu positiboak ezagutu ahal izan zituzten; izan ere, horiek gabe berotegi-efektuko gas gehiago isuriko baitziren, eta horiek saihestu egin dira egiten duten jarduerari esker.

Horixe izan zen Finlandiak Nafarroara egin zuen bisitaren abiapuntua. Izan ere, Satakuntan ez dute elikagaiak biltzeko sistemarik (bederen, elikagaiak alferrik ez galtzeko xede dutenak), eta Nafarroan dauden esperientziak ezagutu nahi izan zituzten. Hala, bi egun antolatu ziren Nafarroako hainbat proiektu bisitatzeko.

Lehen eguneko bisitak Tuterako Villa Javier zentroan hasi ziren, Tudela Comparte Fundazioaren egoitzan. Besteak beste, honako hauek erakutsi zituzten: elikagaiak biltzeko duten zentroa, jantoki soziala, autozerbitzu-denda edo Lantegia, ekonomia zirkularreko eta inklusiboko azken proiektuetako bat. Lantegia proiektuaren helburu nagusia da ekintzailetza sortzea, emakumeen lidergoarekin, egoera ahulean dauden pertsonak gizarteratzeko eta laneratzeko, eta, horrela, artisau moduan, nekazaritzako elikagaien tokiko soberakinak kalitate organoleptiko eta nutrizional handiko elikagai berritzaile bihurtzea.

Bisitak jarraitu zuen Nafarroako Industriaren Elkartean (AIN), non FoodRus proiektua aurkeztu zuten. Proiektu horrek elikadura-sistema erresilienteak sortu nahi ditu Europan, elikagaiak galtzea eta alferrik galtzea prebenitzen duten soluzio zirkularren bidez. Eta, azkenik, bilera bat egin zen Smurfit Kappako Marketin zuzendariarekin. Nekazaritza eta elikadurarako enbalaje jasangarriko proiektuak azaldu zituen, bai eta enbalaje material desberdinak alderatzeko enbalajeen bizi-zikloaren analisirako tresna bat ere, ingurumenari kalte gutxien egiten diotenak zeintzuk diren ikusteko balio duena.

Bigarren eguna Nafarroako Elikagaien Bankuaren instalazioetara egindako bisitarekin hasi zen. Elikagaiak biltzeko, sailkatzeko, etiketatzeko eta banatzeko sistema ezagutu zuten bertan. Ondoren, ordezkaritza Nagrifoodeko bulegoetara joan zen, eta bertan proiektu nazional bat aurkeztu zuten, elikadura-galerak murrizteko estrategia berritzaile bat diseinatzeko. Azkenik, Finlandiako ordezkaritzak Deierriko BuruxKa proiektua ezagutu ahal izan zuen bere proiektu pilotu berritzailearekin. Proiektu horrek buruxkaketaren praktika berreskuratu du, uztaren ondoren soroan geratzen diren elikagaiak berriz aprobetxatzeko eta egoera zailean dauden pertsonei banatzeko.