Nafarroako Gobernuko Ingurumeneko Zuzendaritza Nagusiak, Baso eta Ehiza Zerbitzuaren bitartez, prestakuntza ikastaroa eta gaitasun agiria lortzeko probak deitu ditu, ehizarako administrazio baimena lortzeko Nafarroan.

Izena emateko epea uztailaren 20ra arte egongo da zabalik. Horretarako, eskabideaz gain, hiru dokumentu aurkeztu behar dira: inskripzio-inprimakia, NANaren fotokopia eta dagokion tasaren ordainketa-gutuna. Beharrezko jarraibide eta dokumentu guztiak Nafarroako Gobernuaren webgunean aurki daitezke.

Nafarroako Ehiza eta Arrantzari buruzko abenduaren 22ko 17/2005 Foru Legeak 13. artikuluan adierazten duen bezala, Nafarroako Foru Komunitateko lehen ehiza-baimena lortzeko, beharrezkoa da ehizarekin zerikusia duten gaien gaitasun- eta ezagutza-probak gainditu izana, berariazko prestakuntza-ikastaro batera nahitaez joan behar izan ondoren.

• Urtero bi deialdi izaten dira proba horietarako, eta 2023an irailaren 16an (larunbata) eta urriaren 1ean (igandea) egingo dira, aurrez aurre, Landa Garapeneko eta Ingurumeneko Departamentuak Iruñean duen egoitzan.

Behin proba hori gaindituta, ehiza-baimena eskatu ahal izango da, hori baita Nafarroan jarduera hori egiteko ezinbesteko baldintza.

Berritasuna: Online prestakuntza ikastaroa

Azterketa egin aurretik, aurkeztu direnek prestakuntza-ikastaro bat egin behar dute. Aurten, berrikuntza gisa, online egingo da oso-osorik. Izena emandako pertsonek prestakuntza-plataforma batera sartzeko aukera izango dute. Plataforma horretan, beren erritmoan ikasi ahal izango dute, eta gaitasun-proba egiteko erabiliko diren edukiak eta ikasgaiak nahi beste aldiz aztertu ahal izango dituzte.
Aurrez aurreko ikastarotik online ikastarora aldatzearen helburua da batzuetan Iruñean aurrez aurreko ikastaro batera joateak ekar ditzakeen mugak ezabatzea, data eta ordutegi zehatz eta mugiezinetan. Horrenbestez, Ingurumeneko Zuzendaritza Nagusiaren asmoa da interesdun guztiek derrigorrezko prestakuntza hori jaso ahal izatea.

Horrela, online modalitate berri horri esker, interesdunek nahi duten unean eta lekuan egin ahal izango dute ikastaroa, edozein gailuren bidez, hala nola mugikorraren, tabletaren edo ordenagailuaren bidez.
Izena eman duten pertsonei sarbidea emango zaie onartuen behin betiko zerrenda argitaratzen denetik azterketa presentziala egin arte.