navarra.es

Castellano | Euskara | Français | English

Bilatzaile erabili!

235/2015 Foru Agindua, ekainaren 16koa, Landa Garapeneko, Ingurumeneko eta Toki Administrazioko kontseilariak emana, Nafarroako Foru Komunitatean nekazari gazteei Eskualdeko Erreserbako landaketa eskubideak emateko prozedura ezartzen duena, ...

235/2015 FORU AGINDUA, EKAINAREN 16KOA, LANDA GARAPENEKO, INGURUMENEKO ETA TOKI ADMINISTRAZIOKO KONTSEILARIAK EMANA, NAFARROAKO FORU KOMUNITATEAN NEKAZARI GAZTEEI ESKUALDEKO ERRESERBAKO LANDAKETA ESKUBIDEAK EMATEKO PROZEDURA EZARTZEN DUENA, NAFARROAKO FORU KOMUNITATEAN MAHASTIAK LANDA DITZATEN

(2015eko 124. NAOn argitaratutako testua, ekainaren 29an)

 Nafarroako Foru Komunitateak nekazaritzako eta abeltzaintzako eskumenak bere gain har ditzake, ekonomiaren antolamendu orokorrarekin bat, Espainiako 1978ko Konstituzioaren 149.1.13 artikuluan ezarritakoaren arabera.

Halaber, Nafarroako Foru Komunitateak eskumen osoa du nekazaritza, abeltzaintza eta nekazaritzako elikagaien industria gaietan, ekonomiaren antolamendu orokorrarekin bat, Nafarroako Foru Eraentza Berrezarri eta Hobetzeari buruzko abuztuaren 10eko 13/1982 Lege Organikoaren 50. artikuluak ezartzen duenez.

Landa Garapeneko, Ingurumeneko eta Toki Administrazioko Departamentuaren egitura organikoa ezartzen duen uztailaren 25eko 70/2012 Foru Dekretuaren 25. artikuluaren arabera, Nekazaritza eta Abeltzaintza Zuzendaritza Nagusiko Erakunde Ordaintzailearen Koordinaziorako Zerbitzuko Nekazaritzako Erregistroen Atalari dagozkio Mahastien Erregistroari eta bere produkzio elementuei, kuotei eta eskubideei lotutako eskudantziak, besteak beste.

Bestetik, Europar Batasunaren eremuan, Nekazaritzako merkatu antolamendu bateratua sortu eta nekazaritzako zenbait produkturentzako berariazko xedapenak ezartzen dituen urriaren 22ko Kontseiluaren (EE) 1234/2007 Erregelamenduak (Merkatu Antolakunde Bateratuetarako erregelamendu bakarra), IV bis atalean, mahastizaintza eta ardogintza sektoreko ekoizpen ahalmena arautzen du. 85 undecies artikuluak ezartzen du ezen, nazioko edo eskualdeko mailan ekoizpen ahalmenaren kudeaketa hobetzeko, Estatu kideek landatzeko eskubideen Erreserba Nazional bat eratuko dutela, edo, kasua bada, Eskualdeko Erreserbak, eta 85 duodecis artikuluak erreserbetatik heldu diren landaketa eskubideak arautzen ditu.

Horri buruzko beste arau batzuk: Mahatsondoei eta Ardoari buruzko uztailaren 10eko 24/2003 Legea, eta Mahastietako ekoizpen ahalmena arautzen duen uztailaren 18ko 1244/2008 Errege Dekretua. Azken honek, VII. kapituluan, eskubideen erreserben funtzionamendua arautzen du.

Nafarroan, Mahastizaintza eta Ardogintza arautzeari buruzko abenduaren 5eko 16/2005 Foru Legea garatzen duen abuztuaren 16ko 56/2006 Foru Dekretuak, I. kapituluan, Nafarroako Erreserbako eskubideak emateko prozedura arautzen du. Ildo horretan, aipatu foru dekretuaren 5. artikuluak ezartzen du ezen Erreserbako eskubideak emateko, Landa Garapeneko, Ingurumeneko eta Toki Administrazioko kontseilariak foru agindu bat argitaratu beharko duela, deialdiak eta haien oinarri arautzaileak ezartzeko, 56/2006 Foru Dekretuaren 6. artikuluan eskubideak emateko ezartzen diren irizpideekin bat.

Bestetik, nekazaritzak, edozein sektore ekonomikok bezala, bere jarraitasuna bermatu behar du, lurralde garapenean laguntzen eta gizarteari ondasun eta zerbitzuak eskaintzen jarraitzeko. Nekazaritza eta abeltzaintza estrategikoak dira, jakiak produzitzen baitituzte.

Ildo horretan, Europako nekazaritzan eta abeltzaintzan, zehazki Espainian eta Nafarroan, belaunaldi aldaketa behar baino txikiagoa da, eta horregatik neurri batzuk abian jarri behar dira gazteak sektorean sartzea zailtzen duten oztopoak kentzeko.

Mahastietako ahalmenaren kontrola arautzen duen Europar Batasuneko araudiaren arabera, landaketa eskubideak erabili behar dira mahastiak landatzeko. Landare eskubideek merkatuan duten balioa oztopo handia da ustiategiaren titularra nekazari gazte bat bada, jardueraren lehen urteetan nekazari gazteak gastu handiak baititu, nekazaritzako enpresaburu gisa jarduera hastearen ondorioz.

Horregatik, administrazio eskudunek tresnak abian jarri behar dituzte gazteek mahastiak landatzeko eskubideak eskuratzeko aukera izan dezaten, kostua eta ustiategiaren karga handitu gabe, modu horretan ustiategia handituz eta haren bideragarritasuna erraztuz.

2016ko urtarrilaren 1ean mahastien landaketak baimentzeko sistema berri bat hasten da, 2030eko abenduaren 31 arte indarrean egonen dena, Nekazaritzako produktuen merkatu antolakunde bateratua sortzen duen Europako Parlamentuaren eta Kontseiluaren 2013ko abenduaren 17ko 1308/2013 (EB) Erregelamenduan ezartzen den bezala. Arau berri horrekin, landatzeko eskubideen Erreserbak desagertuko dira eta, zehazki, Nafarroako Erreserbako eskubideak.

Erreserbako eskubideak emateko lehentasunezko irizpideen artean, ondoko hau ezarri behar da: eskualde jakin batzuetan kalitateko ardoen ekoizpenerako lurzatietan egitea landaketak, Mahastizaintza eta ardogintza arautzeari buruzko abenduaren 5eko 16/2005 Foru Legea garatzen duen abuztuaren 16ko 56/2006 Foru Dekretuaren 6.e) artikuluan ezartzen den bezala.

Horregatik guztiagatik, Nafarroako Gobernuari eta Lehendakariari buruzko abenduaren 3ko 14/2004 Foru Legearen 41. artikuluak ematen dizkidan eskumenak erabiliz, agindu dut:

1. artikulua. Xedea.

1. Foru agindu honen xedea da Nafarroako Foru Komunitatean nekazari gazteei Eskualdeko Erreserbako landaketa eskubideak eskatzeko, tramitatzeko eta emateko prozedura ezartzea, Nafarroako Foru Komunitatean mahastiak landa ditzaten, Nafarroa Jatorrizko Deituraren eta/edo Errioxa Jatorrizko Deitura Kalifikatuaren eremu geografikoen barnean.

2. Erreserbako eskubideak gehienez 120 hektareatarako emanen dira Nafarroa Jatorrizko Deituran, eta 80 hektareatarako Errioxa Jatorrizko Deitura Kalifikatuan.

2. artikulua. Onuradunak.

1. Nekazari gazteak izan daitezke Nafarroako Erreserbako landaketa eskubideen onuradun, betiere ondoko foru aginduetatik datozen Erreserbako landaketa eskubideak edo landaketa berriak egiteko eskubideak jaso ez badituzte:

–339/2009 Foru Agindua, ekainaren 19koa, Landa Garapeneko eta Ingurumeneko kontseilariak emana, mahats mota zurietako mahastiak landatzea baimentzeko prozedura ezartzen duena, Nafarroako Foru Komunitatean landatu ere, Errioxa Jatorrizko Deitura Kalifikatuak babesturiko mahastizaintza eremuan, deitura horrek babestuta ez dauden eremuetatik heldu diren eskubideekin eta Nafarroako Foru Komunitateko Erreserbako eskubideekin.

–264/2013 Foru Agindua, uztailaren 19koa, Landa Garapeneko, Ingurumeneko eta Toki Administrazioko kontseilariak emana, mahats mota zurietako mahastiak landatzea baimentzeko prozedura ezartzen duena, Nafarroako Foru Komunitatean landatu ere, Errioxa Jatorrizko Deitura Kalifikatuak babesturiko mahastizaintza eremuan, beste autonomia erkidego batzuetatik, beste jatorrizko deitura batzuetatik, heldu diren birlandaketa eskubideekin, eta Nafarroako Foru Komunitateko Eskualdeko Erreserbako landatzeko eskubideekin.

–191/2013 Foru Agindua, ekainaren 7koa, Landa Garapeneko, Ingurumeneko eta Toki Administrazioko kontseilariak emana, Mendabia IV-ko lurzati berrantolamenduan 42 hektareako mahasti landaketa berrirako eskubideak eskatzeko prozedura ezartzen duena.

2. Foru agindu horietako batetik Erreserbako landaketa eskubideak edo landaketa berriak egiteko eskubideak jaso dituzten nekazari gazteak ere onuradun izan daitezke, baldin eta 1. atalean aipatzen diren gainerako eskatzaileek eskatzen duten azalera osoak ez baditu gainditzen foru agindu honen 1.2 artikuluan ezarritako gehieneko azalerak.

3. artikulua. Aplikazio eremua.

1. artikuluan aurreikusitako landaketa eskubideen xedeko lurzatiek Nafarroan egon behar dute, Nafarroa Jatorrizko Deituraren edo Errioxa Jatorrizko Deitura Kalifikatuaren eremu geografikoan.

4. artikulua. Betebeharrak.

1. Eskatzaileak nekazari gaztea izan behar du, eta ondoko baldintzetako bat bete:

a) Nafarroako Nekazaritzako Ustiategien Erregistroan ustiapen baten titular gisa inskribatuta egotea, edo erregistro horretan inskribatzeko eskaera aurkeztu izana, eta nekazaritzako jardueran norbere konturako langile edo autonomoen Gizarte Segurantzako araubide berezian alta emanda egotea, hori guztia foru agindu honek indarra hartzen duen egunean.

b) Lehen instalazioa 2013ko urtarrilaren 1etik aurrera egin izana edo egiteko asmoa izatea, Nafarroako Landa Garapenerako Programa bateko lehen instalazioaren espediente baten esparruan, betiere eskaerak aurkezteko epearen azken egunean onetsi bada.

2. Eskatzaileek mahastizaintzako ustiategia osorik erregularizaturik izan beharko dute, foru agindu hau indarrean sartzen den egunean mahastizaintzari buruz indarrean dagoen araudiarekin bat.

3. Eskatzaileek ez dute mahastiak birlandatzeko eskubiderik lagata edo eskualdatuta izanen eskabideko kanpainaren aurreko bost kanpainetan, hau da, 2009ko abuztuaren 1etik aurrera, salbu lehen maila arteko ahaideentzako eskualdaketak izan badira.

4. Eskatzaileak ez dira diru-laguntzen onuradun izanen mahastia uzteagatik eskabideko kanpainaren aurreko bost kanpainetan, hau da, 2009ko abuztuaren 1etik aurrera.

5. Indarrean dauden birlandaketa eskubideak dituzten eskatzaileek eskatutako lurzatian erabili behar dituzte osorik, ematen diren eskubideekin batera. Betebehar hori ez zaie aplikatuko transferentzia batetik datozen edo landaketa eskaera batean dagoeneko konprometituta dauden birlandaketa eskubideen titularrei, betiere foru agindu hau argitaratu baino lehen aurkeztu bada Mahastien Erregistroan.

6. Nafarroako Erreserbako landaketa eskubideen eskaeraren xedeko azalerak ez du mahastirik landatuta izan behar foru agindu honek indarra hartu baino lehen, salbu eta dagokion aldibereko erauzketaren deklarazioa badu, foru agindu hau argitaratu baino lehen aurkeztua Mahastien Erregistroan.

7. Eskatzaileek mahastizaintzako lurzatia erabiltzeko eskubidea (jabetza, jabekidetza, gozamena, errentamendua, herrilurren esleipena) izan behar dute, eskaerak aurkezteko epea bukatu aurretik, eta hamar urterako gutxienez ere, landaketa egin zenetik.

Landa lurzatien errentamenduek Nafarroako Gobernuko Landa Errentamenduen Erregistro Berezian inskribatuta egon behar dute, eskaerak aurkezteko epea bukatu aurretik.

8. Eskatutako eskubideen xedeko mahastizaintzako lurzatiaren bukaerako azalerak hektarea batekoa izan beharko du gutxienez, lurzatian zegoen mahasti azalera barne.

Mahastizaintzako lurzatitzat hartuko da katastroko ondoz ondoko barruti edo lurzatiak, titular berak landatutako mahasti azalera jarraitua bada.

9. Eskatutako betebeharren bat betetzen ez bada, edo aurkeztutako dokumentu edo datuak okerrak eta faltsuak badira, eskaera ukatu eginen da.

5. artikulua. Erabilgarri dagoen azalera banatzeko irizpideak.

1. Lehenik, foru agindu honen 2.1 artikuluan adierazten diren deialdietako batetik Erreserbako landaketa eskubideak edo landaketa berriak egiteko eskubideak jaso ez dituzten eskatzaileek jasoko dituzte eskubideak.

2. Erabilgarri dagoen azaleraren banaketa lehentasun ordena honen arabera eginen da:

a) 2010eko urtarrilaren 1etik aurrera lehenbizikoz instalatu diren nekazari gazteak, edo, Nafarroako Landa Garapenerako Programa bateko lehen instalazioaren espediente baten esparruan, lehen instalazioa 2013ko urtarrilaren 1etik aurrera egin dutenak edo egiteko asmoa dutenak.

b) Nekazaritzako ustiategi lehenetsien titularrak diren nekazari gazteak.

c) Ogibide nagusia nekazaritza duten nekazari gazteak.

d) Gainerako nekazari gazteak.

Orden horren arabera eginen da banaketa, Nafarroako Nekazaritzako Ustiategien Erregistroari buruzko Foru Legearen testu bategina onesten duen uztailaren 2ko 150/2002 Legegintzako Foru Dekretuarekin bat.

3. Talde bakoitzaren barnean, ustiategiko Nekazaritzako Lan Unitate gutxien duenari emanen zaio lehentasuna. Berdinketarik bada, azalera gutxien eskatzen duen mahastizainari emanen zaio lehentasuna. Berdinketak irauten badu, erabilgarri dagoen azalera hainbanatuko da, betiere 4.8 artikuluko betebeharra betetzen bada.

4. Artikulu honen 1., 2. eta 3. puntuetan adierazten diren lehentasun irizpideak aplikatzeko eta 4.1 artikuluko betebeharrak egiaztatzeko, ondoko hau hartuko da kontuan:

a) Nekazari gaztea da eskaera aurkezten den urtean gutxienez 18 urte eta gehienez 40 urte dituen pertsona fisikoa.

Aurrekoez gain, nekazari gaztetzat hartuko dira pertsona juridikoak, betiere partaidetzaren %50 edo gehiago aurreko lerroaldean eta 4.1 artikuluan nekazari gaztea izateko ezartzen diren betebeharrak betetzen dituen pertsona fisika batena bada.

b) Lehentasunezko nekazaritza ustiategitzat eta ogibide nagusia nekazaritza duten nekazaritzat hartzeko, eskaerak aurkezteko epearen azken egunean Nafarroako Nekazaritzako Ustiategien Erregistroan dagoen kalifikazioa hartuko da kontuan.

c) Ustiategiko Nekazaritzako Lan Unitate kopurua zehazteko, martxoaren 20ko 111/2015 Foru Aginduaren 4. artikuluan ezarritakoa hartuko da kontuan, eskaerak aurkezteko epearen azken egunean. Haren bidez, Nekazaritzako Ekoizpenaren Erregistro Orokorraren eta Nafarroako Nekazaritzako Ustiategien Erregistroaren arteko koordinazioa arautu zen, eta Nafarroako Nekazaritzako Ustiategien Erregistroan inskribatutako nekazaritzako ustiategien kalifikaziorako irizpideak ezarri ziren.

6. artikulua. Onuradun bakoitzari emanen zaion gehieneko azalera.

1. 2 hektarea izanen da onuradun bakoitzari emanen zaion gehieneko azalera.

2. Eskatutako hektareen kopuru osoak eman beharreko eskubideen azalera osoa gainditzen badu, gehienez hektarea bat banatuko da onuradun bakoitzeko. Eskuragarri dagoen azalera agortzen ez bada, bigarren banaketa eginen da, hektarea batekoa gehienez hori ere, betiere artikulu honen 1. puntuan ezarritako muga errespetatuz.

7. artikulua. Konpromisoak.

1. Eskatzailearentzat, eskatutako lurzatirako, esleitutako azalerarako eta emakida eragin zuten helburuetarako bakarrik izanen da Nafarroako Erreserbako landaketa eskubideen esleipena. Eskubideak esleitu ondoren, ez dira baimenduko lurzati aldaketak.

2. Esleipenaren ondoko bigarren mahastizaintza kanpaina bukatu aurretik erabili beharko dira Nafarroako Erreserbako landatze eskubideak, hau da, 2018ko abuztuaren 1a baino lehen. Epe hori igaro ondoan, iraungiko dira landaketa eskubideak.

3. Nafarroako Erreserbatik heldu diren landaketa eskubideak, esleitu ondoren, ezin izanen dira eskualdatu.

4. Emandako Eskualdeko Erreserbako landaketa eskubideekin egin beharreko landaketek dagokion kontseilu arauemailearen indarreko araudia bete beharko dute, eta dagokien erregistroan inskribatuta egon.

5. Onuradunak zuzenean landu beharko du Eskualdeko Erreserbako eskubideekin landatutako mahastia, landaketa ondoko mahastizaintzako hamar kanpainetan, eta ezin da errentatu, laga edo eskualdatu, non ez den ezinbesteko arrazoirik. Gainera, ez da epe horretan mahastia erauziko, ezinbesteko kasuetan izan ezik.

6. Eskualdeko Erreserbako landatze eskubideen onuradunek ezin izanen dituzte errentan eman, laga edo eskualdatu, inola ere, mahastizaintzako ustiategiaren gainerako zatia, mahasti lurzatiak eta bere jabetzako birlandaketa eskubideak, landaketa ondoko bost mahastizaintza kanpainetan, salbu eta lehen maila arteko ahaideen alde badira eskualdatzeak, errentamenduak edo lagapenak, edo ezinbesteko kasua bada. Gainera, ezin izanen dute epe horretan primarik eskatu beren mahastizaintzako ustiategiaren gainerakoan mahastia uzteko, ezinbesteko kasuetan izan ezik.

7. Onuradunek konpromisoak betetzen ez badituzte, eskubide guztiak galduko dituzte, dagokion espedientea tramitatu ondoren.

8. artikulua. Nafarroako Erreserbako landaketa eskubideen eskaerak.

1. Foru agindu honen eranskinak jasotzen duen eredu ofizialaren arabera beteko dira eskabideak. Eskabide bat aurkeztu beharko da mahastizaintzako lurzati bakoitzeko.

2. Eskabide ereduak bidez eskuratzen ahalko dira, www.navarra.es helbidean, Nafarroako Aldizkari Ofizialetik edo, Nafarroako Gobernuaren web orrian, “Tramiteak” atalean dagoen deialdiaren aipamenetik.

3. Eskaerak Landa Garapeneko, Ingurumeneko eta Toki Administrazioko Departamentuaren erregistroetan aurkezten ahalko dira, Iruñeko González Tablas kaleko 9an diren bulegoetan, Erriberriko Valle de Orba kaleko 34ko bulegoetan, departamentuko arloko bulegoetan, Nafarroako Gobernuaren gainerako erregistro bulegoetako edozeinetan, edo Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38.4 artikuluan aurreikusitako edozein tokitan. Halaber, ekainaren 23ko 70/2008 Foru Dekretuan xedatutakoarekin bat, eskabidea telematika bidez aurkezten ahalko da, Nafarroako Foru Komunitateko Administrazioaren Erregistro Orokor Elektronikoaren bitartez. Erregistro hori Nafarroako Gobernuaren web orrian dago (www.navarra.es). Kasu horretan, eskabidearekin batera aurkeztu beharreko agiriak eransteko, Erregistro Orokor Elektronikoan artxiboak eransteko aurreikusita dauden formatuetatik edozein erabil daiteke.

4. Eskabidea posta bulego batean aurkezten bada, gutun-azal ireki batean egin beharko da, lehenbiziko orriko goiko aldean bulegoaren izena, eguna, tokia eta ordua (minutu eta guzti) adierazi ahal izateko. Datu horiek guztiak gordekinean ere azaldu beharko dira.

5. Hilabeteko epea dago eskaerak aurkezteko, foru agindu hau Nafarroako Aldizkari Ofizialean argitaratzen denetik hasita.

6. Betetako eskabidearekin batera honako dokumentazio hau aurkeztuko da:

a) Eskatzailearen eta lurzatiaren jabearen NANaren/IFKren fotokopia; pertsona juridikoen kasuan, ordezkariaren NANaren fotokopia, notario-ahalordea edo baimena ematen duen idazkia (pertsona juridikoaren kide guztiek sinatua).

b) Herrilurretako lurzatien esleipenak badira, udalaren ziurtagiria, honako hauek adierazita: esleipen hartzailea, esleipen eguna eta emakidaren iraupena.

7. Eskabidearekin batera ez bada eskatutako dokumentazioa aurkezten, interesdunari errekerimendua eginen zaio, hutsegitea zuzendu edo agintzen diren agiriak aurkeztu ditzan 10 eguneko epean. Akatsak zuzentzen ez badira, eskaera ezesten eta artxibatzen duen ebazpena emanen da.

9. artikulua. Eskabideen gaineko ebazpena.

1. Nekazaritza eta Abeltzaintzako zuzendari nagusiari dagokio deialdi honetako eskaerak ebaztea 6 hilabeteko epean, gehienez ere, eskabidea aurkezten denetik. Epe hori berariazko ebazpenik eman edo jakinarazi gabe bukatzen bada, eskaera ontzat hartua izanen da, 56/2006 Foru Dekretuaren 3. artikuluaren arabera (56/2006 Foru Dekretua, abuztuaren 16koa, Mahastizaintza eta Ardogintza arautzeari buruzko abenduaren 5eko 16/2005 Foru Legea garatzen duena).

2. Deialdia ebatzi ondoren, eskubideen onuradunen zerrenda, emandako azalera hektareatan adierazia, eta eskaera ukatu egin zaienen zerrenda argitaratuko da Nafarroako Gobernuaren web orrian (www.navarra.es), “Tramiteak” atalean, deialdiaren aipamenean, Erregistroan eskabideari emandako sarrera zenbakia adierazia.

3. Eskualdeko Erreserbako eskubideen onuradunek, 4. artikuluko betebeharrak betetzen badituzte, landaketa eskubideak jasoko dituzte, finantza ordainik gabe.

Azken xedapen bakarra.–Indarra hartzea.

Foru agindu honek Nafarroako Aldizkari Ofizialean argitaratu eta biharamunean hartuko du indarra.

ERANSKINA. Eskualdeko Erreserbako landaketa eskubideen eskabidea, Nafarroako Foru Komunitateko mahastiak landatzeko

Eskatzailearen datuak:

Izen-deiturak / sozietatearen izena		Mahastizainaren zk.
NANa/IFZ	Jaioteguna	Helbidea
Posta kodea	Herria/Udalerria (Probintzia)	Telefonoak
Legezko ordezkariaren izen-deiturak		Legezko ordezkariaren NANa

DEKLARATZEN DU Nafarroako Nekazaritzako Ustiategien Erregistroan betebehar hauek betetzen dituela:

r Nekazari gaztea, 2010. urtetik aurrera instalatua, edo 2013. urtetik aurrera instalatua eta Nafarroako Landa Garapenerako 2007-2013 Programa bateko espediente onetsia duena.

r Ustiategi lehenetsiaren titularra den nekazari gaztea.

r Ogibide nagusia nekazaritza duten nekazaritzat katalogatutako nekazari gaztea.

r Gainerako nekazari gazteak.

ESKATZEN DU Nafarroako Erreserbako landaketa eskubideen azalera hau:

Erreserbako eskubideekin proiektatutako landaketa:

UDALERRIA	POLIGONOA	LURZATIA¹	BARRUTIA	O edo P²	ESKATUTAKO AZALERA
					Ha	a	ca
(1) Deialdia ebatzi ondoren egiten diren lurzati aldaketak ez dira baimenduko. (2) O: Osoa; P: Partziala.

r BAI r EZ. Eskatzailea mahastiaren titularra da eskatutako mahastizaintzako lurzatian.

Foru agindu honen 7. artikuluko konpromisoen BERRI BADUELA eta haiek betetzeko HITZA EMATEN DUELA.

.................(e)n, 2015eko .............aren ..............(e)an.

Sinadura: .........................

Datu Pertsonalak Babesteari buruzko abenduaren 13ko 15/1999 Lege Organikoaren 5. artikulua betez, adierazten dizu(e)gu eskatutako informazioa beharrezkoa dela Eskualdeko Erreserbako landaketa eskubideen eskaera, Nafarroako Foru Komunitateko mahastiak landatzeko asmoz, tramitatzeko, eta ez dela beste helburu batzuetarako erabiliko.

Landa Garapeneko, Ingurumeneko eta Toki Administrazioko Departamentuaren kudeaketa fitxategietan sartuko da informazio hori. Datuak ikusi, zuzendu eta ezabatzeko eta horien aurka jotzeko eskubideak erabiltzen ahalko dituzu(e), eta, horretarako, Landa Garapeneko, Ingurumeneko eta Toki Administrazioko Departamentuko idazkaritza tekniko nagusira jo beharko duzu(e) (González Tablas kalea, 9 - 31005 Iruña).

NEKAZARITZA ETA ABELTZAINTZAKO ZUZENDARI NAGUSIA.

ADIERAZTEN DU honela justifikatzen dela proiektatutako landaketarako lurzatia erabiltzeko eskubidea:

r Jabetza.

r Jabekidetza.

r Gozamena.

r Errentamendua.

r Herrilurren esleipena.

Lurzatiaren jabearen edo jabekideen datuak.

Deiturak eta izena / sozietatearen izena	NANa/IFZ	Data
Helbidea	Posta kodea	Jabearen edo jabekideen sinadura
Herria/udalerria	Probintzia

Gurutze bat jarri aukera egokian:

r BAI r EZ. Eskatzaileak birlandaketa eskubideak ditu.

r BAI r EZ. Eskatzaileak birlandaketa eskubideak deklaratu ditu mahasti landaketak baimentzeko eskaera batean, foru agindu hau argitaratu baino lehen aurkeztua Mahastien Erregistroan.

Jar zaitez gurekin harremanetan | Erabilerraztasuna | Lege abisua | Webaren mapa