navarra.es

Castellano | Euskara | Français | English

Bilatzaile erabili!

76/2010 Foru Agindua, otsailaren 19koa, Landa Garapeneko eta Ingurumeneko kontseilariak emana, mahastietan nekazaritza eta ingurumen neurriak aplikatzeko laguntzak eman, kudeatu eta kontrolatzeko araubide orokorra arautzen duten arauak ezartzen ...

76/2010 FORU AGINDUA, otsailaren 19koa, Landa Garapeneko eta Ingurumeneko kontseilariak emana, mahastietan nekazaritza eta ingurumen neurriak aplikatzeko laguntzak eman, kudeatu eta kontrolatzeko araubide orokorra arautzen duten arauak ezartzen dituena

(Testu bateratua. Jatorrizkoa 2010eko 31. NAOn argitaratua, martxoaren 10ean. Aldaketak: 539/2010 Foru Agindua, abenduaren 16koa)

Atarikoa

Nafarroako Foru Komunitatean mahastiak antzina-antzinatik landatzen dira. Nekazaritza arloan ez ezik, ingurumen, kultura eta gizarte arloetan ere garrantzitsuak izan dira. Mahatsak ekoizteaz gain, sail horiek Nafarroako Foru Komunitateko paisaia itxuratu dute eta beren lurrak finkatu dituzte, horien higadura prozesuak arinduta. Mahastia Mediterraneoko zurezko landarea da, komunitate honetako hegoaldeko klima eta lurrik lehorrenetara egokitu dena.

Nafarroako mahastizaintzari dagokionez, klima atlantikoa, kontinentala eta mediterraneoa biltzeak, Kantauri itsasotik hurbil egoteak, Pirinioen eraginak eta Ebro haraneko eguraldi bareak Nafarroako paisaia sakon ukitzen duen era askotako klimatologia dakarte, eta bertan mahastiak mota guztietako ekosistemetan eta kokalekutan aurkitzen ditugu: mendi-mazelak, ibaiertzak, goi-lautadak eta lautadak. Aldi berean, horiek 5 ekoizpen eremu bereiziak zehazten dituzte: Mendialde Beherea, Izarbeibar, Lizarrerria, Erriberagoiena eta Erriberabarrena. Mahastiaren labore tradizionalek onura handiak dakartzate ingurumenaren eta paisaiaren ikuspuntutik. Horregatik, mahastizaintza tradizionalaren jardunbideek kontuan hartu behar dute lurzoruaren eta ingurumenaren kontserbazioa, eta ingurunerako jardunbide iraunkorrak sustatuz.

Laguntza horiek 2007-2013rako nekazaritza eta basogintza sektoreetarako Estatuko laguntzei buruzko Europar Batasuneko zuzentarauek arautzen dituzte. Landa Garapenerako Europako Nekazaritza Funtsaren (LGENF) bidez landa garapenerako laguntzari buruz Kontseiluak irailaren 20an eman zuen 1698/2005 Erregelamenduko Ingurumena eta landa ingurunea hobetzeari buruzko 2. ardatzaren neurrien barnean daude, betiere laguntza horiek Kontseiluaren 2009ko urtarrilaren 19ko 73/2009 (EE) Erregelamenduan Laborantzarako eta ingurumenerako baldintza egokien arloan ezarritako derrigorrezko baldintzek baino betekizun handiagoak ezartzen badituzte; erregelamendu horren bidez, nekazaritzako politika bateratuaren esparruan ematen diren nekazarientzako zuzeneko laguntzen araubideei aplikatzen zaizkien guztientzako xedapenak ezarri dira, baita nekazarientzako laguntzen araubide zehatz batzuk ere. Gainera, erregelamendu horrek 1290/2005 (EE) Erregelamendua, 247/2006 (EE) Erregelamendua eta 378/2007 (EE) Erregelamendua aldatu ditu eta 1782/2003 (EE) Erregelamendua indargabetu du, baita ongarrien eta produktu fitosanitarioen betekizun osagarriak ere.

Laguntza hori Nafarroako Foru Komunitatean modu antolatuan aplikatu ahal izateko, hura eman, kudeatu eta kontrolatzeko arauak ezarri behar dira.

Foru agindu honi Diru-laguntzei buruzko azaroaren 9ko 11/2005 Foru Legea aplikatuko zaio.

Horrenbestez, Nafarroako Gobernuari eta Lehendakariari buruzko abenduaren 3ko 14/2004 Foru Legearen 41. artikuluak ematen dizkidan eskumenak erabiliz, hauxe agindu dut:

Artikulu Bakarra. Mahastizaintzarako nekazaritza eta ingurumen arloko laguntzak onestea.

Mahastietan nekazaritza eta ingurumen neurriak aplikatzeko laguntzak eman, kudeatu eta kontrolatzeko araubide orokorra arautzen duten arauak onetsi dira, foru agindu honen I. eranskinean agertzen direnak.

Lehen Xedapen Gehigarria. Aurrekontuko kredituak.

Gobernuak 2010eko otsailaren 1eko Erabakiaren bidez onetsi du laguntza horietarako urte anitzeko gastua, honela banatua:

a) 2010erako 1.000.000 euroko gastua, 2010eko Aurrekontu Orokorretako "Mahastietarako nekazaritza eta ingurumen neurriak" izeneko 710001 71230 4700 414204 kontu-sailaren kargura.

b) 1.000.000 euroko gastua, hurrenez hurren 2011ko, 2012ko, 2013ko eta 2014ko aurrekontuetan aurreko kontu-sailaren baliokide izanen diren kontu-sailen kargura.

Bigarren Xedapen Gehigarria. Laguntzen eta merkatu bateratuaren bateragarritasuna.

1. Foru agindu honetan araututako laguntzak ordainduko dira, baldin eta Europako Batzordeak merkatu bateratuarekin bateragarriak direla erabakitzen badu, Europako Erkidegoa eratzeko Itunaren 88.3 artikuluan ezarritakoari jarraituz.

2. Landa Garapeneko eta Ingurumeneko Departamentuak konpromisoa hartu du laguntzen araubidea 1698/2005 (EE) Erregelamenduaren edo Batzordeak hura garatzeko onetsi dituen arauen edozein aldaketa garrantzitsutara egokitzeko.

Azken Xedapen Bakarra. Indarra hartzea.

Foru agindu honek Nafarroako Aldizkari Ofizialean argitaratu eta biharamunean hartuko du indarra.

I. ERANSKINA. Mahastietan nekazaritza eta ingurumen neurriak aplikatzeko laguntzak eman, kudeatu eta kontrolatzeko araubide orokorra arautzen duten arauak

1. artikulua. Xedea eta aplikazio esparrua.

1. Foru agindu honen xedea da hurrengo baldintzak betetzen dituzten mahastiaren laborantzetan nekazaritza eta ingurumen neurriak aplikatzeko laguntzak arautzen dituzten arauak ezartzea:

-Laguntzaren eskatzailearen izenean Nafarroako Mahastizaintzako eta Ardogintzako Erregistroan inskribaturik dauden eta "Nafarroa" Jatorrizko Deituraren barnean dauden mahastiak.

-Mahastiek 25 urteko adina edo handiagoa izanen dute, Nafarroako Mahastizaintzako eta Ardogintzako Erregistroak emandako informazioaren arabera.

-Mahastiak landatzeko egoera arruntean egon beharko dira.

-Nekazaritzako lurzatiak 1.000 m²-koak edo handiagoak izanen dira.

2. Laguntza honen ondorioetarako ez dira azalera onargarritzat joko haien oinagatik ureztalur iraunkorretan dauden mahastiak, izaera alubialekoak, emankortasun handikoak edo sustrai sistematik eskuratzen ahal den maila freatikokoak, "Nafarroa" Jatorrizko Deituraren Kontseiluaren esku dagoen informazioaren arabera.

3. Laguntza kudeatzeko behar diren Mahastizaintzako eta Ardogintzako Erregistroko datuak eskaera egiten den urteko abuztuaren 1ean agertzen direnak izanen dira.

2. artikulua. Laguntzen araubidearen baldintzak.

Ondoko baldintza hauek betetzen dituzten eskatzaileei soilik emanen zaizkie laguntzak:

a) Laguntzen eskaera aurkezteko epea amaitzen denean, pertsona fisikoa edo juridikoa eta Nafarroako Nekazaritza Ustiategien Erregistroan inskribaturiko nekazaritza ustiategi baten titularra izatea, Nekazaritza Ustiategien Erregistroari buruzko Foru Legearen testu bategina onesten duen uztailaren 2ko 150/2002 Legegintzako Foru Dekretuan ezarritakoaren arabera.

b) Nekazaritza eta ingurumen arloko laguntzen araubidetik baztertua ez izatea.

c) Legez kontrako mahastiei, indarra duen mahastizaintzako eta ardogintzako araudia betetzea.

3. artikulua. Laguntzen araubidearen konpromisoak.

Laguntzak jaso ahal izateko, eskatzaileek konpromiso hauek onartu beharko dituzte bost urterako:

a) Lehenbiziko urtean laguntza jasotzen duen azalera landuta izatea konpromiso-aldi osoan, foru agindu honen II. eranskinean ezarritako nekazaritza eta ingurumen teknikak aplikatuta.

b) Parte hartzea, hala ematen zaionean aditzera, hartarako Landa Garapeneko eta Ingurumeneko Departamentuak edo Nafarroako Mahastizaintza eta Enologia Estazioak (EVENA) neurriari buruz antolatzen dituen prestakuntza ekintzetan. Horri gagozkiola, konpromiso hori betetzat hartuko da laguntzaren onuradunaren partez haren ordezkari bat joaten bada, betiere pertsona horrek laguntzaren xede diren lurzatietako laborantzan aritzeko ardura baldin badu.

c) Nafarroan taldeka antola litezkeen babes fitosanitarioko programetan parte hartzea, baldin eta Landa Garapeneko eta Ingurumeneko Departamentuak berak, horren entitate instrumentalek edo EVENAk hala gomendatzen badute.

d) Ustiategiko liburua betetzea konpromisopeko lurzatietarako, zeinetan produkzio jarduerarekin lotura duten ekintza guztiak jasoko diren eta bai unitateei, datei, ongarri dosiei eta abarri buruzko datu osagarriak ere. Hartarako, ustiategiko liburu baliodunak izanen dira III. eranskineko ereduan eskatzen den informazioa, gutxienez, biltzen duten agiri guztiak.

e) Eman eta hartutako diru-laguntzak eta hartutako konpromisoak direla eta, Landa Garapeneko eta Ingurumeneko Departamentuak egiten dituen egiaztapen ekintza oro onartzea. Hartarako, Administrazioko ikuskatzaileei eta ziurtapen eta kontrol agintaritzari libre uztea lurzatietara sartzen, eta laguntzapeko jardueraren gainean eskatzen zaien informazio guztia ematea.

f) Helburu bereko beste diru-laguntza batzuk eskatu edo lortu izanaren berri ematea Landa Garapeneko eta Ingurumeneko Departamentuari.

g) Diru-laguntzei buruzko azaroaren 9ko 11/2005 Foru Legearen 9. eta 13. artikuluetan ezarritako baldintzak betetzea.

4. artikulua. Emakidaren azalera eta zenbatekoa zehaztea eta laguntza ordaintzea.

1. Eskatzaileek 2. eta 3. artikuluetako baldintzak eta konpromisoak betetzen badituzte, bost urteko epe osorako ematen ahalko zaie laguntza, eta urtero ordainduko zaie.

2. Unitateko zenbatekoa 700 eurokoa izanen da hektareako.

3. Emakidaren zenbatekoa eragiketa honen emaitza izanen da: unitateko zenbatekoa bider zehazturiko azalera, administrazio kontrolak egin ondoren eta lurraren gainean. Hurrengo mailaketa ere kontuan hartuko da:

-Lehenbiziko 10 hektareei unitateko zenbatekoaren %100 aplikatuko zaie.

-10 eta 20 hektarearen artean daudenei, unitateko zenbatekoaren %60 aplikatuko zaie.

-20 hektareako muga gainditzen dutenei, unitateko zenbatekoaren %30 aplikatuko zaie.

4. Ez da emanen 300 eurotik beherako zenbatekorik.

5. Hitzarturiko eremua eta onuradun bakoitzari emaniko laguntzaren zenbateko osoa gehieneko mugak izanen dira, konpromiso-aldiaren hurrengo urteetan ordaintzeko eskabideei aplikatuko zaizkienak.

6. Laguntzen araubide honen arabera emaniko diru-laguntzak ezin izanen dira erabili salerosketa kostuak ordaintzeko.

5. artikulua. Diru-laguntza emateko modua, lehentasunak eta irizpide objektiboak.

1. Laguntzak emateko prozedura norgehiagokako araubidearen bitartez tramitatuko da.

2. 2010eko ekitaldian laguntzak emateko, onarturiko eskaeretarako kalkulatu den zenbatekoaren batura osoa aurrekontuko kontu-sailean dagoen kreditua baino handiagoa bada, laguntza lehentasunez emanen zaie hurrengo irizpideen arabera ordenatuta dauden eskatzaileei, dagoen kreditua amaitu arte:

a) Nagusiki nekazari direnak edo lehentasunezko ustiapena, eskatu den mahasti osoak 40 urteko adina edo handiagoa duela.

b) Nagusiki nekazari ez diren edo lehentasunezko ustiapenak ez diren eskatzaileak, eskatu den mahasti osoak 40 urteko adina edo handiagoa duela.

c) Nagusiki nekazari direnak edo lehentasunezko ustiapena, azaleraren %25 baino gehiago Natura 2000 sareko Batasunaren intereseko lekuetan dutenak eta eskatu den mahastiaren batez besteko adinaren arabera (zaharrenetik berrienera) ordenatuta daudenak.

d) Nagusiki nekazari direnak edo lehentasunezko ustiapena, azaleraren %25 baino gutxiago Natura 2000 sareko Batasunaren intereseko lekuetan dutenak eta eskatu den mahastiaren batez besteko adinaren arabera (zaharrenetik berrienera) ordenatuta daudenak.

e) Nagusiki nekazari ez diren edo lehentasunezko ustiapenak ez diren eskatzaileak, azaleraren %25 baino gehiago Natura 2000 sareko Batasunaren intereseko lekuetan dutenak eta eskatu den mahastiaren batez besteko adinaren arabera (zaharrenetik berrienera) ordenatuta daudenak.

f) Nagusiki nekazari ez diren edo lehentasunezko ustiapenak ez diren eskatzaileak, azaleraren %25 baino gutxiago Natura 2000 sareko Batasunaren intereseko lekuetan dutenak eta eskatu den mahastiaren batez besteko adinaren arabera (zaharrenetik berrienera) ordenatuta daudenak.

Aurreko talde bakoitzaren barnean, baldintzak berdinak badira, kontuan hartu beharreko ordena honakoa izanen da: zehaztutako azalera handienetik azalera txikienera.

3. 2011ko edo 2012ko ekitaldietan emakida berriak edo lehendik dauden emakiden gehikuntzak eskatzeko deialdia egiteko, onarturiko eskaeretarako kalkulatu den zenbatekoaren batura osoa aurrekontuko kontu-sailean dagoen kreditua baino handiagoa bada, laguntza lehentasunez emanen zaie hurrengo irizpideen arabera ordenatuta dauden eskatzaileei, dagoen kreditua amaitu arte:

a) Eskatzaile berriak.

b) Aurretiko emakida duten eskatzaileak.

Aurreko talde bakoitzaren barnean, baldintzak berdinak badira, kontuan hartu beharreko ordena 2. idatz-zatian zehaztutakoa izanen da.

6. artikulua. Laguntzen araubidearen eskaerak aurkeztea.

1. Foru agindu honetan aipatutako laguntzen araubideari atxikitzeko, ustiategiko titularrak bai laguntza emateko, bai 2010eko kanpainari dagokion zenbatekoa ordaintzeko eskatuko du, 2010eko kanpainaren laguntzetarako eskabide bakarrean. Laguntza zein SIGPAC barrutitarako eskatzen duen adierazi beharko du, eta foru agindu honen 2. eta 3. artikuluetan adierazi diren baldintzak eta konpromisoak horietan betetzeko konpromisoa hartuko du.

2. Konpromisoaren bigarren urtean eta hurrengoetan, onuradunak urtero eskatu beharko du laguntza hau ordaintzeko kanpaina bakoitzaren laguntzetarako eskabide bakarrean, eta konpromisopean segitzen duten lurzatien zerrenda erantsiko du.

3. Aurreikusitako laguntzak egindako jarduerak garatzeko baino ezin izanen dira eman, eta, edonola ere, hurrengo baldintzak bete ondoren:

a) Batzordeak araubidea bateragarritzat jotzea.

b) Eskaera agintaritza eskudunari aurkeztu izana.

c) Nekazaritza Zerbitzuak eskaera onartu izana.

7. artikulua. Laguntzen bateraezintasuna.

1. Laguntza honen bateraezintasunak, oro har, Landa garapenari FEADERen eta hura garatzen duen araubidearen bidez laguntzeari buruzko Batzordearen 1698/2005 (EE) Erregelamendutik sortzen direnak dira.

2. Helburutik eta izaeratik ondorioztatzen diren bateraezintasunei kalterik egin gabe, laguntzen xede diren lurzatiek otsailaren 12ko 33/2007 Foru Aginduak ezarritako nekazaritza ekologikoa sustatzeko nekazaritza eta ingurumen arloko laguntzak jasotzen badituzte, ordaindu beharreko laguntzatik kenduko da nekazaritza ekologikoa sustatzeagatik jasotako zenbatekoa.

3. Nolanahi ere, bi laguntzak batuta jaso beharreko zenbatekoa 700 eurokoa izanen da, gehienez, hektareako.

8. artikulua. Ebaluazio organoa.

Nekazaritza Zerbitzuak ebaluatuko ditu eskaerak.

9. artikulua. Deialdiaren antolamendua, prozedura eta ebazpena.

1. Eskabidea harturik, interesdunek 2. eta 3. artikuluetan onuradun izateko ezarritako betebehar eta baldintzak betetzen dituztela egiaztatuko da. Dokumentazioa osatu gabe badago, interesdunari eskatuko zaio hogeita hamar eguneko epean zuzen dezala, eta ohartaraziko zaio, hala egin ezean, eskaera bertan behera uzten duela ulertuko dela eta artxibatzeko ebazpena, hari jakinaraziko zaiona, emanen dela.

2. Eskaera ebaluatu ondoren, Nekazaritza Zerbitzuak ebazpena proposatuko du.

3. Nekazaritza eta Abeltzaintzako zuzendari nagusiak emanen du diru-laguntza, modu arrazoituan.

4. Prozeduraren gainean ebazteko epea sei hilabetekoa izanen da. Epea ebazpenik eman gabe bukatzen bada, eskaera ezetsitzat joko da.

9. artikulua. Neurria aplikatzen jarraitzea.

1. Landa Garapeneko eta Ingurumeneko Departamentuak konpromiso hori amaitzen ahalko du, onuraduna jasotako zenbatekoak itzultzera behartu gabe, 73/2009 (EE) Erregelamenduaren arabera laguntza berriak ezartzen direnean. Izan ere, haren esparruan zenbait arau aplikatuko dira, kendutako nekazaritza eta ingurumen neurriaren ingurumen ondorioen baliokideak sortzen dituztenak. Dena den, laguntza horiek onuragarriagoak izan beharko dira onuradunarentzat finantzaren ikuspuntutik eta onuradunari aukera horren berri eman beharko zaio, konpromisoak bere gain hartzen dituen unean.

2. Finantza baliabideek horretarako aukera ematen badute, etorkizuneko kanpainetarako deitzen ahalko da konpromisoak handitzeko eskaera, hurrengo baldintzei helduta:

a) Laguntzaren onuradunak eskatzen ahalko du bere emakida konpromiso-aldia bukatu arte handitzeko, neurriari dagokionez nekazaritza eta ingurumen arloko abantaila nabarmenak gertatzen badira, hasierako konpromiso-aldiaren hiru bosten baino gehiago iragan ez bada eta erantsitako eremua bi hektareatik gorakoa ez bada. Handitze espediente bakarra onartuko da onuradun bakoitzeko.

b) Laguntzaren onuradunak, hasierako konpromisoaren ordez, konpromiso handiago bat ezartzen ahalko du bost urteko aldi berrian, neurriari dagokionez nekazaritza eta ingurumen arloko abantaila nabarmenak gertatzen badira. Ordezpen espediente bakarra onartuko da onuradun bakoitzeko. Edonola ere, egiten den edozein aldaketak ingurumenerako abantailak zein dauden konpromisoak finkatzea ekarriko ditu, 1974/2006 (EE) Erregelamenduan xedatutakoari lotuta.

3. Konpromiso-aldian onuradunak laguntzaren xede den ustiategia osorik edo haren zati bat beste bati eskualdatzen baldin badio, lagapen-hartzaileak konpromisoari eutsi beharko dio hura amaitu arte, betiere foru agindu honetan azaltzen diren onuradunaren betebeharrak betetzen baldin baditu. Bestela, lagapen-emaileak eta lagapen-hartzaileak jasotako laguntzak itzuli beharko dituzte gehi dagozkion korrituak, zenbatekoa Espainia barrenean berreskuratzeko korritu-tasa aplikatuz, onuradunak diru-laguntza jaso zuenetik itzultzen duen arte kalkulatuak.

4. Onuradunak nekazarien eta nekazaritza langileen erretiro aurreraturako laguntzei heltzen badie emakida eskatu denetik hiru urte baino gehiago iragan ondoren eta ondorengoak ezin baditu konpromisoak bere gain hartu, ez dira jasotako laguntzak itzuliko.

5. Onuradunak ezin badu hartutako konpromisoak betetzen segitu, ustiategian lurzatiak berrantolatu behar direlako edo antolamenduaren antzeko beste interbentzio publikoren bat egin behar delako, ustiategiaren egoera berrira egokituko dira konpromisoak, baita haien ondoriozko laguntzaren zenbatekoa ere. Egokitzapen hori ezinezkoa bada, konpromisoa amaitutzat emanen da, eta ez da konpromisoa bukatu bitarteko laguntza itzultzeko eskatuko.

6. Hartutako konpromisoekin aurrera egitea eragozten duten ezinbesteko kasuetan, ez da inolako diru-itzultzerik eskatuko. Ezinbesteko kasuak honako hauek izanen dira:

a) Onuradunaren heriotza.

b) Onuradunaren lanerako ezintasun luzea.

c) Neurria aplikatu zaion ustiategiaren parte handi bat desjabetzea, konpromisoa hartu zen egunean desjabetze hori ezin bazen aurreikusi.

d) Hondamendi natural larriak laguntzaren xedeko alorrean, lagundutako laborantza egitea galarazten dutenak.

e) Berrogeialdia eskatzen duten gaitz edo izurriteak, horiek desagerrarazi edo menean hartzeko neurriak hartu beharra dakartenak (betiere Nekazaritza, Abeltzaintza eta Elikadura Departamentuak gainbegiratuta).

7. Landa Garapeneko eta Ingurumeneko Departamentuari eman beharko zaio ezinbestekoen berri hamar egun baliodunean, gehienez ere, ezinbestekoa gertatzen denetik hasita.

10. artikulua. Jarraipena eta kontrola.

1. Nekazaritza Zerbitzuak jarraipena eginen die neurriari eta onuradunen jarduketei. Horretarako egokitzat jotzen dituen kontrol administratiboak eta landakoak eginen ditu, eta onuradunak egiten utzi beharko dio.

2. Nekazaritza Zerbitzuak ongarrien, gai fitosanitarioen edo bestelako sargaien erabilera mugatzeko konpromisoak kontrolatuko ditu ustiatze koadernoaren bitartez eta, zein den kasua, laginak alorretan hartuta.

11. artikulua. Ordaintzeko modua eta epeak.

Urte bakoitzeko diru-kopurua urtea amaitu aurretik ordainduko da.

12. artikulua. Jasotako laguntzen murrizketak, bazterketak eta itzulketa.

1. 2. artikuluan aipatzen den edozein baldintza bete ezik, laguntzak ukatuko dira.

2. Nekazaritza eta ingurumen arloko tekniken aplikazioari dagokionez, 3. artikuluaren a) letran adierazitako konpromisoak bete ezik, zenbait murrizketa eta bazterketa aplikatuko dira, Batzordeak abenduaren 7an emandako 1975/2006 (EE) Erregelamenduaren 16. artikuluan xedatutakoarekin bat. Erregelamendu horren bidez, Kontseiluaren 1698/2005 (EE) Erregelamendua aplikatzeko xedapenak ezarri ziren, landa garapenerako neurriak hartzeko kontrol prozeduren eta baldintzen aplikazioari buruz.

3. 3. artikuluaren e) letrako konpromisoa bete ezik, araubidetik baztertu, eta kobraturiko dirua itzuli beharko da.

4. 3. artikuluaren a) letran konpromiso-aldian azalerari eusteari dagokionez eta c) eta d) letretan ezarritako konpromisoetako edozein bete ezik, kasuan kasuko kanpainaren urtean ez da deus kobratuko. Konpromiso-aldian bi urtez, elkarren segidan edo ez, bete ezik, titularra laguntzen araubide honetatik baztertu, eta harturiko dirua itzuli beharko du.

5. 3. artikuluaren b) eta f) letretako konpromisoak bete ezean, lehenbiziko urtean laguntzaren zenbatekoa %20 murriztuko da, konpromiso bat betetzen ez bada, eta %40, bi konpromiso betetzen ez badira. Bigarren urtean arrazoi horiengatik aplikatu beharreko murrizketak honako hauek izanen dira: laguntzaren zenbatekoaren %40koa, konpromiso bat betetzen ez bada, eta %80, bi konpromiso betetzen ez badira. Hirugarren urtean, aldiz, laguntza %100 murriztuko da eta jasotako kopuruak itzuli beharko dira.

6. Jasotako zenbatekoak itzuli beharra eragiten duten ez betetzeek berekin dakartzate berandutze interesak, Diru-laguntzei buruzko azaroaren 9ko 11/2005 Foru Legearen 35. artikuluan xedatutakoaren arabera.

13. artikulua. Arau-hausteak eta zehapenak.

Arau-hausteen eta zehapenen araubidea Diru-laguntzei buruzko azaroaren 9ko 11/2005 Foru Legean xedatutakoa izanen da.

14. artikulua. Laguntzen publizitatea.

Foru agindu honetako laguntzak hartzen dituztenen zerrenda Landa Garapeneko eta Ingurumeneko Departamentuko iragarki oholean argitaratuko da, Iruñeko Tutera kaleko 20an.

II. ERANSKINA. Mahastizaintzarako nekazaritza eta ingurumen arloko baldintzak

1. Ongarritzea.

Ongarritzean honako baldintza hauek kontuan hartu beharko dira:

-Ez dira aplikatuko hiri hondakin solidoetatik edo araztegietatik datozen lohiak, mindak edo abeltzaintza ustiategietako bestelako hondakin likidoak edo erdi likidoak, ezta haragi irinak edo animalien proteinak dituzten ongarri organikoak ere.

-Ezin izanen da ongarri mineralik erabili ur ibilgu naturaletatik 5 metrora baino hurbilago. Ezin izanen da ongarri organikorik erabili ur ibilgu naturaletatik 55 metrora baino hurbilago.

-Ezin izanen da aplikatu ongarri nitrogenaturik abenduan, urtarrilean eta otsailean, landarerik ez duen lurrean.

-Hona hemen mantenugai nagusien gehieneko ekarpenak:

• 20 OU nitrogeno (N) hektareako.
• 40 OU fosforo (P2O5) hektareako.
• 60 OU potasio (K2O) hektareako.

-Ongarri dosia handitzen ahalko da analisi baten bidez lurzoruaren emankortasun maila kontuan hartzen bada, honela:

• Lurzoruan 12 ppm fosforo (Olsen) edo gutxiago badago, laborearen erauzketaren arabera kalkulatu den fosforo ekarpena %20 handitzen ahalko da.
• Lurzoruan 100 ppm potasio edo gutxiago badago, laborearen erauzketaren arabera kalkulatu den potasio ekarpena %20 handitzen ahalko da.

2. Landare estaldura eta belar txarren kontrola.

Uztailaren 1etik azaroaren 1era bitartean landare estaldura naturala edo ereina egonen da kaleetan eta ezin izanen da landatu data horietan. Urteko gainerako egunetan, gehienez, 20 cm-ko sakonera duen laborantza egiten ahalko da.

Kaleetan ezin izanen da herbizidarik erabili, malda %15etik gorakoa izan ezean.

3. Izurri eta gaitzen kontrola.

Ezin izanen da tratamendurik egin aurrez ezarritako egutegi bati jarraituz.

Gaitz zehatz baten kontrako produktu berariazkoak erabiliko dira gaitz hori garatzeko tenperatura eta hezetasun egokiak daudenean edo lehen zantzuak agertzen direnean. Ondorio horietarako, EVENAren abisuak kontuan hartu beharko dira, berariazko eremuko ohiz kanpoko zirkunstantziak direla eta teknikari eskudun batek aldeko txostena egin ezean.

Gaitz zehatz baten kontrako produktu sistemiko bera ez da segidako bi tratamendutan baino gehiagotan erabiliko.

4. Ustiategiko liburua.

Ustiategiko liburua nahitaezkoa da. Euskarri informatikoan edo paperean egin daiteke eta beti egonen da eskura ikuskatu ahal izateko.

Prozesuak ongi funtziona dezan, eragiketak egiten diren aste berean jasoko dira liburuan, eta lan, eragiketa eta laborantzaren gorabehera guztien berri zehatza idatziko da.

Ustiategiko titularra izanen da ustiategiko liburuan jasotako eragiketen egiazkotasunaren eta eguneratzearen erantzulea.

Ustiategiko liburuaren eredua III. eranskinean dago.

III. ERANSKINA. Nafarroako Mahastizaintzarako ustiategiko liburua

Ustiategiko liburuaren eredua hurrengo orrialdeetan zehaztu da.

NAFARROAKO MAHASTIZAINTZARAKO
USTIATEGIKO LIBURUA

20....(e)ko kanpaina

Identifikazio datu orokorrak:

Ustiategiaren erregistro zenbakia:

Ustiategiko titularra: ................................... IFZ:

Helbidea:

Posta kodea: .......... Udalerria:

Telefono zk.: ........ Sakelako telefono zk.: ............... Fax zk.: ........... Helbide elektronikoa:

Badu karnet fitosanitariorik? (behar dena azpimarratu) BAI / EZ Baiezkoan, iraungitze eguna:

Mahastiak dituzten lurzatien zerrenda eta haien ezaugarriak: Ustiategiko titularra: ............................................................................................................................................................
LINEA ZK.	LURZATIAREN IDENTIFIKAZIO KODEA	KATASTROKO DATUAK					LANDATUTAKO AZALERA (ha)	BARIETATEA	LANDATZEKO ESPARRUA	SIGPAC-EKO MALDA
UDALERRIA	POLIGONOA	LURZATIA	BARRUTIA	PARAJEA
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36
37
38
39

Lurzoruaren analisia:

Lurzoruaren azken analisiaren kopia erantsiko da. Bertan agertu behar da zein laborategik egin duen, data, eta nekazaritzako zein lurzatiri dagokien.

LURZATIAREN IDENTIFIKAZIO KOD.	ANALISI ORRIAREN ZK.	ppm P (OLSEN)	ppm K

Nekazaritzako lurzatiaren identifikazioa:

Lurzatiaren identifikazio kodea

Ongarri mineral eta organikoak:

• Lurzoruaren analisia.
• Hostoen analisia.
• Teknikariaren gomendioa.

-Urte anitzeko ongarritzea (azken ekarpenak):

EGUNA (zehaztu hila eta urtea)	ONGARRI MOTA (ABERASTASUNA)	DOSIA (kg/ha)	OHARRAK

-Kanpainako ongarritzea:

EGUNA	ONGARRI MOTA (ABERASTASUNA)	DOSIA (kg/ha)	OHARRAK

Nekazaritzako lurzatiaren identifikazioa:

Lurzatiaren identifikazio kodea

Izurri eta gaitzei buruzko oharrak eta gorabeherak:

Eguna	Izurri eta gaitzak	Aztertutako landare kop.	Jotako landare kop.	Erasoaren maila	Tratamendua behar du (Bai/Ez)

Tratamendu fitosanitarioak:

Mota (1)	Eguna	Lurzorua/ Mahats.	Kontrolatu beharreko izurria, gaitza edota belar txarra	Produktua		Dosia kg (edo l)/ha	Aplikatzailearen IFZ/IFK (2)	Oharrak
Erreg. zk.:	Izen komertz.
(1) H = Herbizida; I = Intsektizida; F = Fungizida. (2) Ustiategiko titularrak berak ez badu egin tratamendua, adierazi aplikatzailearen IFZ/IFK.

Nekazaritzako lurzatiaren identifikazioa:

Lurzatiaren identifikazio kodea

Bilketa:

EGUNA		EKOIZPENA (KG)	ONTZI MOTA
BILKETA	EMATEA

Laborantzari buruzko ohar orokorrak:

Erantzukizuna hartzea:

Behean sinatzen duenak, ustiategiko liburu honen titularrak, bertan dauden oharren egiazkotasunaren erantzukizuna bere gain hartzen du.

..................................(e)n, 20....(e)ko ............... aren ........... (e)(a)n.

Sin.: IFZ:

Berrikuspena (kontrol organoak bete beharrekoa):

Behean sinatzen duenak adierazten du liburu hau berrikusi duela eta bertan jarritako oharrak:

[ ] BAT DATOZELA / [ ] EZ DATOZELA BAT mahastia landatzeko nekazaritza eta ingurumen neurrian ezarritako betekizunekin.

..................................(e)n, 20...(e)ko ....................aren ......(e)(a)n.

Sin.:

NAN/IFZ:

Jar zaitez gurekin harremanetan | Erabilerraztasuna | Lege abisua | Webaren mapa