navarra.es
Castellano | Euskara | Français | English
Ezagutzera eman
Foru Agindua, 2000ko azaroaren 13koa, Nekazaritza, Abeltzaintza eta Elikadura kontseilariak emana. Honen bidez finkatzen da mahastiak berregituratu eta birmoldatzeko laguntzak eman eta kudeatzeko FEOGAren bermearen atalak erabiliko duen prozedura
(2000ko 147. NAOn argitaratutako testua, abenduaren 6an)
Atarikoa
Kontseiluaren (EB) 1493/1999 Erregelamenduak, 1999ko maiatzaren 17koak, ardo eta mahastigintzaren merkatuaren antolamendu berria finkatu zuen.
Espainiako Estatuaren barne antolamenduaren esparruan, abuztuaren 4ko 1472/2000 Errege Dekretuak mahats produkzioaren ahalmena arautu zuen eta Europako Komunitatearen Erregelamenduaren aurreikuspenak garatu.
Errege Dekretu honen V. Kapituluak mahastiak berregituratu eta birmoldatzeko Europako Komunitatearen laguntzak ezartzen ditu FEOGAren Berme Atalaren kargura.
2000ko irailaren 15eko Foru Aginduaren bidez Nafarroako mahastiak berregituratu eta birmoldatzeko araubidearen aplikaziorako arau osagarriak eman ziren, araubide hori mahastigintzaren merkatuaren antolamendu batuan aurrez ikusia baitzen.
Europako Batasuneko Kontseiluaren maiatzaren 17ko 1258/1999 Erregelamenduaren arabera (nekazaritzako politika batuaren finantzazioari buruzkoa), FEOGAren Bermearen atalaren kargurako Europako Batasunaren laguntzen kudeaketa eta pagamendua nahitaez "erakunde ordaintzaile" izenekoen bidez egin behar dira. Erakunde horiek Europako Batasuneko kide diren estatuen erakunde edo zerbitzuak dira, dagozkien pagamenduei dagokienez, behar adinako bermeak eskaintzen dituztenak: a) ordaintzeko agindua eman aurretik, kontrolatzen dute eskaerak behar diren baldintzak betetzen dituen ala ez eta Batasunaren xedapenen araberakoa den ala ez; b) egindako ordainketak zehatz-mehatz eta zorrotz kontabilizatzen dituzte; eta c) eskatutako dokumentuak Batasunaren xedapenetan aurreikusitako epe eta moduan aurkezten dira. Nafarroan, Nekazaritza, Abeltzaintza eta Elikadura Departamentuak du erakunde ordaintzailearen izaera juridikoa, urriaren 6ko 274/1997 Foru Dekretuak xedatzen duenari jarraikiz (urtarrilaren 31ko 56/2000 Foru Dekretuak aldatua).
Ekainaren 9ko 8/1997 Foru Legeak arautzen du Nafarroako Foru Komunitateko Administrazioaren eta haren erakunde autonomoen dirulaguntzak eman, kudeatu eta kontrolatzeko araubide orokorra. Lege horrek ordezko balioa du helburu publikoak lortzea bultzatzera zuzendutako onura edo interes sozialeko jarduerak, osorik edo partez, finantzatzen dituzten fondoen kasuan.
Behar bezala uztartu behar dira bi betebehar mota: alde batetik, FEOGAren Bermearen kargura mahastiak berregituratu eta birmoldatzeko parte batean finantzatutako laguntzak arautzeko araudi komunitarioaren ondoriozko betekizunak; bestetik, dirulaguntza publikoen araubide orokorrari buruz Nafarroako legeriak dituen aurreikuspenak, besterik ezean erabilgarriak baitira. Horretarako, komenigarria da, beharrezkoa ere bai, segurtasun eta zehaztasun juridikoak erdiesteko, xedapen orokor bat ematea, ahalik zehatzena, Nafarroan FEOGAren Berme Atalak herri txikien garapenerako konfinantzatutako laguntzak emateko eta kudeatzeko prozedura definitzeko.
Horrenbestez, eta Nafarroako Foru Komunitateko Gobernua eta Administrazioa arautzen dituen apirilaren 11ko 23/1983 Foru Legearen 36.2 artikuluak esleitzen dizkidan ahalmenak erabiliz, agindu dut:
1. artikulua. Aplikazio eremua.
1. Foru Agindu hau pertsona fisiko edo juridikoek, publiko zein pribatuek, Nafarroan mahastiak berregituratu eta birmoldatzeko FEOGAko Bermearen atalak finantzatzen dituen laguntza- eskaerei lotuko zaie. Horren euskarri juridikoa honako arau hauetan datza: (EE) 1493/1999 Arautegia, Kontseiluak emana, 1999ko maiatzaren 17koa, ardo eta mahastigintzaren merkatuaren antolamendu batua ezartzen duena; 1472/2000 Errege Dekretua, abuztuaren 4koa, mahats produkzioaren ahalmena arautzen duena; 2000ko irailaren 15eko Foru Agindua, Nafarroan mahastiak berregituratu eta birmoldatzeko araubidea aplikatzeko arau osagarriak ematen dituena, ardoa eta mahastigintzaren merkatuaren antolamendu batuan aurrez ikusia.
2. artikulua. Eskabideen aurkezpena.
1. Aurreko 1 zenbakiak aipatzen dituen laguntza-eskaerak leku hauetan aurkezten ahal dituzte interesatuek:
-Nafarroako Mahastigintza eta Enologi Zentroa (EVENA) erakunde autonomoa.
Nekazaritza, Abeltzaintza eta Elikadura Departamentuan, zuzenean bere bulego nagusietan edo eskualdeko edo zonako bulegoetan.
-Nafarroako Gobernuko Erregistro Orokorrean edo Administrazio Publikoen Araubide Juridikoari eta Guztientzako Administrazio Prozedurari buruzko Legearen arabera baimena duen beste edozein erregistro administratibotan.
2. Eskabidearekin batera kasu bakoitzean eskatzen den dokumentazioa aurkeztu behar da.
3. Eskabideak aurkeztu eta berehalaxe erregistratuko dira.
3. artikulua. Egiaztapen administratiboa.
1. Eskabideak jasorik, Nafarroako Foru Komunitateko Erakunde Ordaintzailean baimena emateko gaitasuna duen unitateko langileek egiaztatu beharra dute eskatutako dokumentazio guztia dagoela.
2. Eskabideak eskatu direnak betetzen ez baditu edo oso-osorik ez badago, baimena emateko gaitasuna duen unitateak interesatuari eskatuko dio zuzentzeko edo falta dena aurkezteko epe bat emanen zaio, gutxienez hamar egunekoa eta gehienez hilabetekoa, eta ohartaraziko zaio epean egin ezean eskaerari uko egiten diola eta espedientea artxibatuko da, behar den ebazpen administratiboaren bidez.
3. Behar den dokumentazioa oso-osorik dagoenean, baimena emateko gaitasuna duen unitateak konprobatuko du eskabideek dirua lortzeko baldintzak betetzen ote dituzten, bai Europako Batasunak ezarritakoak bai Foru Komunitateak eskatutakoak.
4. artikulua. Ebazpen-proposamena.
1. EVENAk eskabideak konprobatuko ditu, aplikatu beharreko arauetan ezarritako balorazio irizpide, modu eta lehentasunen arabera, eta dirulaguntzak emateko ebazpen-proposamena eginen du.
2. EVENAk ebazpen-proposamena egiteko, behar adina kontrol egin beharko ditu eskabideak administratiboki araudi indardunarekin bat datorrela egiaztatzeko.
3. Halaber, EVENAk txosten bat eginen du, zeinean adieraziko baita proposatutako eskatzaileek dirulaguntza jasotzeko baldintza guztiak betetzen dituztela.
5. artikulua. Dirulaguntzak emateko ebazpena.
1. Ebazpen-proposamena ikusirik, Nafarroako Foru Komunitateko Erakunde Ordaintzaileko zuzendariak laguntzak emateko ebazpena sinatuko du.
2. Ebazpenak dirulaguntza izateko eskubidea aldarrikatzen du, baina betiere eskabidea aplikatu beharreko araudiaren araberakoa baldin bada. Eskubide hori, hortaz, dirulaguntzaren oinarri den jarduera egitearen edo jokabidea hartzearen menpe egonen da, eta egin dela egiaztatutakoan bakarrik emanen da ordaintzeko baimena eta erabakiko da eskatzaileei eman beharreko dirulaguntzen kopurua.
3. Ebazpena arrazoitua izanen da, Administrazio Publikoen Araubide Juridikoari eta Guztientzako Administrazio Prozedurari buruzko Legeari jarraikiz, hau da, ematen den ebazpenean erabakia hartzeko kontuan hartutakoak aipatuko dira.
4. Ebazpenean aipatu beharrekoa da zein den eskatzailea edo eskatzaileen zerrenda, eta espres agertaraziko da, halakorik baldin bada, zein eskaerari esan zaien ezetz.
5. Ebazpena Administrazio Publikoen Araubide Juridikoari eta Guztientzako Administrazio Prozedurari buruzko Legeak aurreikusitako moduan jakinaraziko zaie interesatuei.
6. Araudi berariazkoak ezarritako gehieneko epea iraganik, ebazpenaren jakinarazpenik eman ez bada, interesatuak eskaerari ezezkoa eman zaiola ulertu behar du, hau da, isiltasun administratiboa gertatu dela.
7. Ematen den ebazpenaren edo ezespenaren kontra, interesatuek gora jotzeko helegitea jartzen ahal dute, Nafarroako Gobernuari zuzendua, beranduenez hilabeteko epean, Administrazio Publikoen Araubide Juridikoari eta Guztientzako Administrazio Prozedurari buruzko Legeari jarraikiz.
6. artikulua. Zerbitzu teknikoak egintzak egiaztatzeko prozedura
1. Dirulaguntzak ez dira ordaintzen ahal harik eta jarduera egina dela egiaztatu den arte edo kontzesioaren oinarri izan zen jokabidea hartu arte, salbu Foru Agindu honen 10. artikuluan araututako aurrerakinen kasuan.
2. Aurreko zenbakian xedatutakoaren ondorioetarako, EVENAren zerbitzu teknikoak eskatzaileei ordainketa egiteko araubide diren egintzak egiaztatzeari ekinen dio. Horretarako, beharrezko diren kontrol teknikoak eta ikuskapenak eginen ditu.
3. Jarduera motarengatik posible den guztietan, gastuaren justifikazioa eta ordainketa horien dokumentuak aurkeztuta egin beharko dira, laguntza mota hori arautzen duen erregelamenduan zehazten direnak, jakina. Ordainketaren justifikazioek dirulaguntzaren zenbatekoa hartuko dute gutxienez. Fondo publikoen bidez subentzionatu gabeko gainerako gastuak ez du justifikazioaren beharrik.
Diru-kopuru handiko edo eragin ekonomiko-sozial nabarmeneko dirulaguntzen kasuan, aurretik eskatutako dokumentazioaz gainera, auditoretza-txosten bat aurkeztu beharko da, aditu independenteek egina. Txosten horretan ohartarazi beharko da hartutako dirulaguntza zuzen erabili dela.
4. Bost milioi pezetatik beheitiko dirulaguntzak direnean, beharrezkoa izanen da baimena emateko EVENAk inbertsioaren konprobazio materiala egitea. Espedientean konprobazioaren berri eman beharko da, akta baten bidez edo konprobazio txosten baten bidez.
Salbuespen gisa, aurreko konprobazioaren ordez dokumentu bidezko konprobazioa egin liteke, baldin eta dokumentuek modu zuzenean eta zentzuzkoan justifikatzen badute diruz lagundutako jarduera.
5. Dirulaguntzen araudian aurreikusia baldin badago diru-kopurua zatika edo aurrerakinekin ordaintzea, aurreko atalean aipatzen den konprobazioa azkeneko likidazio eta pagamenduarekin batera eginen da.
7. artikulua. Ordaintzeko baimena.
1. Ordaintzeko baimena, Europako Batasunaren araudiaren ondorioetarako, EVENAk emanen du, eta eskatzaileari eman beharreko laguntzen diru-kopurua zehaztuko. Zenbateko horrek izanen du lehentasuna Foru Agindu honen 5. artikuluak aipatzen duen ebazpenaren aurrean, hots, dirulaguntza onesten duen ebazpenaren aurrean.
2. Eskabide baten ordaintzeko baimena EVENAk behar adina kontrol egin eta gero emanen da, hau da unitateak ziurtatu eta gero dena araudi indardunaren araberakoa dela. Horretarako, baimenaren ardura duen funtzionarioak egin behar dituen egiaztapen kontrol- zerrenda bat izanen du.
3. Akreditazioa eta ondoriozko pagamendua, laguntza motaren arabera betiere, dena batera egin liteke jarduera bukatzean, edo zatika, zatikako justifikazioen ondoren, laguntzak arautzen dituen erregelamendu berariazkoan agertzen diren prozedura eta baldintzak betez.
4. Ordaintzeko baimena Batasuneko Aferetarako eta Europako Batasunaren Nekazaritza Politika Begiratzeko Atalak gainbegiratuko du.
8. artikulua. Ordainketaren ebazpen-proposamena.
1. EVENAk laguntzak ordaintzeko ebazpen-proposamena eginen du.
2. Proposamen horrekin batera, aipatu unitateak txosten bat aurkeztuko du, zeinean egiaztatuko baita betetzen direla laguntza emateko helburuak eta dirua jasotzeko eskubidea ematen duten baldintzak.
9. artikulua. Laguntzen ordainketen ebazpena.
1. Ebazpen-proposamena ikusirik, Nafarroako Foru Komunitateko Erakunde Ordaintzaileko zuzendariak laguntzen ordainketa ebatziko du.
2. Ebazpenean onuraduna edo onuradunen zerrenda agertaraziko da.
3. Ebazpenean diru-kopuru bat azalduko da. Hori hala izanik ere, FEOGA-Bermearen Ordainketak Burutzeko Bulegoak onuradunei Fondo horretako Zordunen Erregistroan dituzten zorren zenbatekoak deskonta liezazkieke, Foru Agindu honen 11. artikuluko 3. zenbakiaren arabera.
4. Ebazpena interesatuei jakinaraziko zaie, Administrazio Publikoen Araubide Juridikoari eta Guztientzako Administrazio Prozedurari buruzko Legeak aurreikusitako moduan.
5. Ebazpenaren kontra gora jotzeko helegitea jartzen ahal da, Nafarroako Gobernuari zuzendua, hilabeteko epean, Administrazio Publikoen Araubide Juridikoari eta Guztientzako Administrazio Prozedurari buruzko Legeari jarraikiz.
10. artikulua. Aurrerakinak.
1. Onartutako dirulaguntzaren ordainketaren aurrerakinak araudian espresuki aurreikusita daudenean baizik ez dira eginen. Aurrerakinak araudian ezarrita dauden epe, betebehar eta bermeekin eginen dira.
2. Hamar milioitik goitiko aurrerakinen kasuan berme egokiak hartuko dira ezinbestean, salbu onuraduna Administrazio Publiko bat edo kapital gehiena publikoa duen elkarte bat baldin bada.
3. Berme hauek baizik ez dira onartuko: Europako Batasuneko Batzordearen 2220/1985 Erregelamenduak ezarritako baldintzak betetzen dituzten finantza erakundeek emandakoak, erakunde eskudunek baimenduak eta likidatu edo eskatu arte balio duten bermeak eskaintzen dituztenak.
11. artikulua. Ordainketak egitea.
1. Ordaintzeko baimena Ordainketak Burutzeko Bulegoari bidaliko zaio. Horri eskabide mota bakoitzerako edo eskabide multzo bakoitzerako egindako kontrolak egin izanaren ziurtagiria erantsiko zaio, funtzionario baimentzaileak luzatua.
2. Baimena jasorik, Ordainketak Burutzeko Bulegoak dokumentazioa oso-osorik dagoela egiaztatuko du.
3. Dokumentazioa beterik, eta Europako Batasuneko araudiari segituz ordaintzeko agindua eman aurretik, Ordainketak Burutzeko Bulegoak konprobatu beharko du laguntzen onuradunak FEOGAren zordunak diren, edo atxikipenik egin behar zaien edo bahitura egoeran. Horrela bada, laguntzatik zorrari dagokion zenbatekoa deskontatuko zaie.
4. Ordainketak Burutzeko Bulegoak ordaintzeko agindua emanen dio Ekonomi eta Ogasun Departamentuko Dirubilketa Unitateari. Agindua Europako Batasuneko Batzordearen 1995eko uztailaren 7ko 1663/1995 Erregelamenduan esan bezala egin beharko da.
5. Ordainketak Burutzeko Bulegoak ziurtatu beharko du ordainketa onuradunaren alde egin dela, bere bankuko kontuan edo bere lagapen- hartzailearenean.
12. artikulua. Ordainketaren kontabilitatea.
FEOGA-Bermearen Kontabilitate Bulegoak Fondo horren kargura egindako pagamenduak erregistratuko ditu, Erakunde Ordaintzaileak horretarako dituen kontabilitate-liburuetan. Erakundeak horretarako sistema informatiko bat izanen du.
13. artikulua. Itzulketa, arau-hausteak eta zehapenak.
1. FEOGAren Bermearen kargura Foru Agindu honetan aipatzen diren laguntzen itzulketa, arau-hauste eta zehapenei dagokienez, Europako Batasuneko araudian xedatutakoa ez dagoen horretan, ekainaren 9ko 8/1997 Foru Legearen 21, 27 eta 28. artikuluei segituko zaie (Nafarroako Foru Komunitateko Administrazioaren eta haren erakunde autonomoen dirulaguntzak eman, kudeatu eta kontrolatzeko araubide orokorra arautzen duena).
2. Nafarroako Foru Komunitateko Erakunde Ordaintzailearen zuzendaria izanen da organo eskuduna, herri txikien garapenerako laguntzen araubidearen kontrako arau-hauste administratiboak zehatzeko prozedurari hasiera eman eta ebazteko.
3. Arau-hausteak zein diren erabakitzeko eta zehapenak jartzeko prozedura administratibo zehatzailea abenduaren 9ko 369/1997 Foru Dekretuari lotuko zaio (nekazaritzaren, abeltzaintzaren eta nekazaritzako elikagaien arloetan zehapenak ezartzeko administrazio prozedura onesten duen Foru Dekretua).
Azken Xedapenetako Lehenbizikoa
Indarrik gabe geldituko dira Foru Agindu honetan ezarritakoari kontra egiten dioten maila bereko edo beheragoko xedapen guztiak.
Azken Xedapenetako Bigarrena
Foru Agindu honek Nafarroako Aldizkari Ofizialean argitaratu eta biharamunean hartuko du indarra.
