Eraikinen birgaitze energetikoa bultzatzea xede duen Biziberri Planak aholkularitza eta laguntza emateko talde teknikoak jarri ditu auzo-erkidegoen esku.

Nafarroako Gobernuko Etxebizitza Zuzendaritza Nagusiak eta Nasuvinsa elkarte publikoak Foru Erkidegoko eskualde guztietan zabaldu dituzte ELENA lantalde teknikoak (tokiko energia-laguntzako programa). 16 profesionalez osatuak, higiezinen birgaitze energetikorako proiektu bat erabakitzen eta sustatzen duten auzo-komunitateak dinamizatzea eta suspertzea izango da haien eginkizuna.

Talde horiek, Biziberri Planaren barruan daudenak, doako zerbitzu bat eskainiko diete komunitate sustatzaileei, jarraipena, aholkularitza eta laguntza emateko herritarren partaidetza-prozesuan, proiektu arkitektonikoen idazketan, laguntza publikoen izapidetzean, obren esleipenean, egikaritzean eta ziurtapenean edo finantzaketa-formulen azterketan, besteak beste.

Azken batean, herritarrek talde horretako profesionalen laguntza izango dute uneoro.