navarra.es
Castellano | Euskara | Français | English
Ezagutzera eman
15/1997 Foru Agindua, urtarrilaren 28koa, Hezkuntza eta Kultura kontseilariak emana, Nafarroako Foru Komunitatean Arte Plastikoetako eta Diseinuko Heziketa Zikloetan ari diren ikasleen ebaluazio eta kreditatze akademikoaren prozesua arautzen duena
15/1997 FORU AGINDUA, urtarrilaren 28koa, Hezkuntza eta Kultura kontseilariak emana, Nafarroako Foru Komunitatean Arte Plastikoetako eta Diseinuko Heziketa Zikloetan ari diren ikasleen ebaluazio eta kreditatze akademikoaren prozesua arautzen duena
(Testu bateratua. Jatorrizkoa 1997ko 21. NAOn argitaratua, otsailaren 17an. Aldaketak: 52/2009 Foru Agindua, apirilaren 8koa)
Atarikoa
Ikasketa eta Ikastetxeen Antolamendurako Zerbitzuko zuzendariak adostasun txostena aurkeztu du, Hezkuntza Sistemaren Antolamendu Orokorrari buruzko urriaren 3ko 1/1990 Lege Organikoan (1990-10-4ko "E.A.O.") aipatzen diren Arte Plastikoetako eta Diseinuko Heziketa Zikloetan ari diren ikasleen ebaluazio eta kreditatze akademikoaren prozesua arautzeko xedearekin.
Arte Plastikoen eta Diseinuaren irakaskuntzari buruzko irizpide berrien arabera, beharrezkoa da ebaluazioari heltzea kontuan hartuz irakaskuntza horien funtsa eta helburuak, horien artean nabarmentzen direlarik honako hauek: kalitatezko prestakuntza artistikoa eskuratzea, horren bidez baloratzen jakiteko arte plastikoen garrantzia adierazpide artistiko eta kultural bezala, sormen eta sentsibilitate artistikoa garatzearekin batera; lanbiderako gaitasuna eskuratzea; ekoizpen sistemaren antolaketa, ezaugarriak eta legeria ezagutzea, bai eta segurtasun baldintzetan lan egiteko behar diren ezagupenak edukitzea eta, kualifikazioetan gerta daitezkeen egokitzapenei aurre egiteko, autonomian, nortasunean, heldutasun pertsonalean eta profesionalean sakontzea ere.
Beharrezkoa da ebaluazioa eta kalifikazioa kontzeptuak bereiztea. Ebaluazioa da aurretik ezarritako profesionalizazio helburuen inguruan ikasleek lortutakoa neurtu eta baloratzea, eta kalifikazioa, aldiz, eskala baten barruan kategoria bat ematea ebaluazioaren emaitzan oinarrituz.
Irakaskuntza hauetan, ebaluazioaren xedea da ikasleei laguntzea zikloko helburu orokorrak eskura ditzaten. Horrez gain, profesionalizaziorako irakaskuntzak izanik, bereziki garrantzitsua da koordinatzea moduluetako irakasleak eta ekoizpen sektore desberdinetako profesionalak, alegia, enpresa, estudio eta tailerretan prestakuntza praktikoaz arduratzen diren haiek.
Ebaluazioak zenbait eginkizun betetzen ditu. Batetik, ikasle bakoitzaren nahiz talde osoaren ikaskuntzari dagozkion erabakiak hobetzen laguntzen du; halaber, motibagarria da, ikasleari haren lorpen eta aurrerapenei buruzko informazioa ematen baitio, haren gaitasunak hobeki garatzeko laguntza emanez eta, azkenik, ikasleek erdietsitakoarentzat, ebaluazioa da administrazioak emandako aitorpen garbia.
Ebaluazioak etengabea izan behar du, eta horretarako ikasleen ikaskuntza prozesuaren jarraipen unez unekoa egin beharko du. Irakasleek urratsez urrats bilduko dute informazioa, ebaluazio saioetan laburbildu eta kalifikazioaren gaineko erabakiak hartzeko baliagarria izanen dena.
Integratzailea ere izan beharko du, kontuan hartu behar baitira lanbide-modulu guztiak, enpresa, estudio edo tailerretan egindako prestakuntza praktikoa eta azken proiektu edo lana, horiek denek osatzen baitute heziketa zikloa, horien artean bereziki baloratuz tituluaren ezaugarri berezkoak beren baitan orokorki biltzen dituztenak. Ebaluazioa lanbide moduluka eginen da, bereiz, eta bide emanen du balorazio orokorra egiteko.
Bestalde, komeni da ezartzea zein diren ebaluazio prozesuan zehar lortzen den informazioa bildu eta laburtzen duten agiriak. Agiri hauek ikasleen hezkuntza prozesuaren jarraipena bermatzen dute.
Kontuan harturik arau hauek: Hezkuntza Sistemaren Antolamendu Orokorrari buruzko urriaren 3ko 1/1990 Legearen 4. artikulua, Lehenbiziko Tituluko Laugarren Kapitulua eta Bigarren Tituluko Hirugarren Sekzioa (1990-10-4ko "E.A.O."), Lanbide Heziketako Tituluei eta gutxieneko irakaskuntzei buruzko jarraibide orokorrak ezarri zituen maiatzaren 7ko 676/1993 Errege Dekretua (1993-5-22ko "E.A.O."), urriaren 3ko 1/1990 Lege Organikoaren bidez araututako Arte Plastikoetako eta Diseinuko Heziketa Zikloetan ari diren ikasleen ebaluazio txostenen oinarrizko elementuak eta ebaluazio prozesuaren ondorioz ikasleen mugigarritasuna bermatzeko beharrezkoak diren betebehar formalak ezarri zituen 1996ko otsailaren 16ko Agindua (1996-02-23ko "E.A.O."), eta Nafarroako Foru Komunitatean Lanbide Heziketako eta Arte Plastikoetako eta Diseinuko irakaskuntzen egitura eta antolamenduari buruzko jarraibide orokorrak ezarri zituen otsailaren 13ko 35/1995 Foru Dekretua (1995-03-10eko Nafarroako Aldizkari Ofiziala).
Nafarroako Foru Komunitateko Gobernua eta Administrazioa arautzen dituen apirilaren 11ko 23/1983 Foru Legearen 36.2 b) artikuluaren bidez emandako ahalmenak erabiliz, agindu dut:
Lehena
Foru Agindu hau aplikatuko da Nafarroako Foru Komunitatean dauden eta Hezkuntza Sistemaren Antolamendu Orokorrari buruzko urriaren 3ko 1/1990 Legean araututako Arte Plastikoetako eta Diseinuko Heziketa Zikloak ematen dituzten ikastetxe publiko eta pribatuetan.
I. Ebaluazioaren ezaugarri orokorrak
Bigarrena
Arte Plastikoetako eta Diseinuko Heziketa Zikloen ebaluazioaren helburua izanen da ikasleen ikaskuntza baloratzea, prestakuntza mota honek dituen helburuen arabera, alegia, kontuan hartuz otsailaren 13ko 35/1995 Foru Dekretuan ezarritakoa, bai eta Nafarroako Foru Komunitatean Arte Plastikoetako eta Diseinuko irakaskuntzen arloko teknikari eta goi mailako teknikari tituluei dagozkien heziketa zikloen curriculumak onesten dituzten foru dekretuetan ezarritakoa ere.
Hirugarrena
1. Ebaluazioa etengabea eta integratzailea izanen da eta, beraz, batez ere hezitzailea izanen da.
2. Ebaluazioa etengabe eginen da ikaskuntza prozesu osoan zehar, eta hura aplikatzeko beharrezkoa izanen da ikasleak klaseetara eta Heziketa Zikloko lanbide modulu ezberdinetarako eta prestakuntza praktikorako programatutako jardueretara joatea erregulartasunez.
3. Ebaluazioa lanbide-moduluka eginen da, eta irakasleek heziketa ziklo bakoitzari dagozkion modulu guztiak hartuko dituzte kontuan, bai eta lanbide gaitasuna, hori baita heziketa zikloaren helburu orokorrak zehazteko jomuga, eta zikloa osatzen duten moduluen helburuak ere, ahalmen bezala adieraziak.
4. Lanbide modulu bat eskaintza partzial moduan ikasten den kasuetan, ebaluazioa lanbide modulu horretara bideratuko da bereziki, kontuan harturik tituluari dagokion lanbide gaitasun berezia.
Laugarrena
Ikaskuntzen ebaluazioa eginen da jomugatzat hartuz, batetik, tituluaren lanbide gaitasunaren ahalmenak, zeregin aipagarrienen bidez eta kasuan kasuko lanbide-eremuan islatzen direnak, eta bestetik ikaslearen heldutasuna, Arte Plastikoetako eta Diseinuko irakaskuntzetarako ezarritako xedeen arabera. Kontuan hartuko dira, orobat, Heziketa Zikloa osatzen duten lanbide moduluen helburuak, eta aplikatuko dira helburu horien araberako ebaluazio irizpideak. Ildo honetatik, ebaluazio irizpideek zehazten dute helburu bakoitzerako eskuratu beharreko maila eta, ondorioz, irakaskuntza-ikaskuntza prozesuan erdietsi beharreko gutxieneko emaitzak.
II. Ebaluazio prozesua
Bosgarrena
1. Heziketa Ziklo jakin batean ari den ikasle talde bakoitzaren irakasle taldearen eginkizuna da, tutoreak koordinaturik eta ikastetxeko orientabide departamentuak aholkatuta, ikasleen ebaluazioa egitea, modu kolejiatuan.
2. Tutoreak koordinatuko ditu ebaluazio saioak, hala hiruhilekoak nola finalak, eta horrela baloratuko da ikasleen aurrerapena, Heziketa Ziklo horri dagokion lanbide-gaitasunaren eta zikloko moduluen helburuen arabera. Saioen emaitzak ikaslearen ebaluazio eta kalifikazio liburuan paratuko ditu irakasle tutoreak.
A) Heziketa zikloetako etengabeko ebaluazioa
Seigarrena
1. Arte Plastikoetako eta Diseinuko Heziketa Zikloen ebaluaziorako beharrezkoa da modulu guztien etengabeko ebaluazioa egitea, ikaskuntza prozesu osoan zehar. Etengabeko ebaluazio honetarako, beharrezkoa da irakasleek ikasleen ikaskuntza prozesuari buruzko informazioa biltzea behaketa sistematikoaren bidez, lan profesionalak baloratuz eta proba bereziez baliatuz, ikaskuntza prozesuaren jarraipena erraztu eta ikasleak prozesu guztian zehar lortutako emaitzak ebaluatu ahal izateko.
2. Ebaluazio saioetan, etengabeko ebaluazioaren prozesuaren ondorioz, ikasle bakoitzaren kalifikazioak erabakiko dira, eta ikaskuntza prozesuari buruzko oharrak erantsiko zaizkie, beti ere ikaslearen ahalmenen eta errendimenduaren arteko egokitzapenari buruzko balorazioa barne. Kalifikazio hauek kontutan hartuko dira azken ebaluazioan, etengabeko ebaluazioaren ikuspuntua baztertu gabe.
3. Ikasleen aurrerapenak aurreikusitako helburuei erantzuten ez badie, irakasleek behar diren neurriak hartuko dituzte ikasleek erdietsi ahal ditzaten programatutako emaitzak.
B) Ikastetxean egindako moduluen azken ebaluazioa
Zazpigarrena
1. Ikastetxean emandako moduluen azken ebaluazioa eginen da enpresa, estudio edo tailerretako prestakuntza praktikoa egin baino lehen. Moduluak eman dituzten irakasleek azken kalifikazioa emanen dute ebaluazio saioan edo saioetan, ziklo bakoitzak duen kurtso kopuruaren arabera, eta horretarako kontutan hartuko dute, etengabeko ebaluazioaren emaitzez gainera, ikasleak lortu ote duen Tituluari dagokion gaitasun profesional berezia eta nola ote dagoen bere lantokian erdiesteko foru dekretuetan aipatzen diren xedeak, alegia Nafarroako Foru Komunitatean Arte Plastikoetako eta Diseinuko irakaskuntzen arloko teknikari eta goi mailako teknikari tituluei dagozkien heziketa zikloen curriculumak onesten dituzten foru dekretuetan ezarritakoak.
2. Enpresa, estudio edo tailerretako prestakuntza praktikoan hasteko, beharrezkoa izanen da ikastetxean egindako lanbide modulu guztietan ebaluazio positiboa izatea. Zenbait heziketa ziklotarako Hezkuntza eta Kultura Departamentuak baimena ematen ahalko du prestakuntza praktikoa egiteko lanbide-moduluak amaitu eta ebaluatu aurretik.
Arestikoa kendu gabe, heziketa zikloa emateaz arduratzen den irakasle taldeak egokitzat jo dezake ikaslea baimentzea enpresa, estudio edo tailerretako prestakuntza praktikoan hasteko, lanbide-modulu bakar bat oraindik gainditu gabe dagoenaren kasuan, baldin eta modulu horri dagozkion orduak kurtsoan egindako lanbide modulu guztien iraupenaren 100eko 25 baino gutxiago badira.
3. Aurreko puntuak aipatzen duen baimenaren kasuan, eta behar diren errekuperazio-jarduerak programatu ondotik, utzitako modulua gainditzea ezinbesteko baldintza izanen da azken proiektu edo lanaren ebaluazioa egiteko.
4. Foru Agindu honen 7. puntuaren 1. idazatian aipatzen den ebaluazio saioan, eta baldintzak betetzen ez dituzten edo prestakuntza praktikoan sartzeko baimena lortzen ez duten ikasleen kasuan, prestakuntza zikloa emateaz arduratzen den hezitzaileen taldeak erabakiko du, ikasle bakoitzaren kasuan, errekuperazio jarduera batzuk egiteko moduan ote dagoen, eta ondoren gainditu gabe dituen moduluen ebaluazio eta kalifikazio berezi baterako aukera izan edo, bestela, gainditu gabe dituen moduluetarako programaturiko jarduera guztiak errepikatu behar ote dituen. Lehenbiziko kasuan, informazioa eman beharko zaio, errekuperazio jarduera horietaz, noiz eginen diren eta zein egunetan izanen den ebaluazio berezia.
5. Lana-Prestakuntza modalitatean, prestakuntzan ari diren langileei aplikatzen zaienez, enpresa, estudio edo tailerretako prestakuntza praktikoa eginen da langileen eta entitate kontratatzailearen artean sinatutako kontratuetan ezarritakoaren arabera. Horretarako, entitate hauek txosten bat prestatuko dute, xehetasunak eta balorazioak izanen dituena, langileak kontratazioaldian egindako jarduerei buruz, tutoreak ebaluatu ahal izan dezan jarduera horiek ikasleari baliagarriak izan zaizkion prestakuntza fase honen xedeak erdiesteko.
C) Enpresa, estudio edo tailerretako prestakuntza praktikoaren azken ebaluazioa
Zortzigarrena
1. Zikloko hezitzaileen taldeak eginen du fase honetako ebaluazioa era kolegiatuan eta prestakuntza praktikoaz arduratzen den irakasleak koordinatuko, lantoki bakoitzak prestakuntza praktikorako izendatzen duen arduradunaren laguntza izanen duelarik. Hain zuzen ere, laguntza hori txosten bat prestatzea izanen da, eta bertan paratuko dira ikasle bakoitzak egindako jarduerak, beti ere prestakuntza praktiko honen funtsa diren eta foru dekretuetan, Nafarroako Foru Komunitatean Arte Plastikoetako eta Diseinuko irakaskuntzen arloko teknikari eta goi mailako teknikari tituluei dagozkien heziketa zikloen curriculumak onesten dituzten haietan, aipatzen diren xedeei begira.
Prestakuntza praktikoa egin baldin bada enpresa, estudio edo tailer bat baino gehiagotan, haietako bakoitzari eskatuko zaio txostena. Ikasleak prestakuntza praktikoko fase honetan gai kalifikazioa jaso ahal izateko, emandako txosten bakoitzaren eta guztien balorazio orokorrak aldeko izan beharko du.
2. Ikasleren batek ez-gai kalifikazioa jasotzen badu enpresa, estudio edo tailerretako prestakuntza praktikoan, fase hori errepikatzen ahalko du beste aldi batez.
D) Azken proiektu edo lanaren ebaluazioa
Bederatzigarrena
1. Arte Plastikoetako eta Diseinuko Heziketa Zikloak ematen diren ikastetxeetan epaimahai bana izanen da goi mailako eta erdi mailako heziketa ziklo bakoitzeko, azken proiektu edo lana zehaztu, zuzendu eta ebaluatzeko.
Epaimahai hau honako kide hauek osatuko dute:
-Mahaiburua. Ikastetxeko zuzendariak beteko du kargu, baina bere eginkizunak delegatu eta burutza hori ikastetxeko irakasle baten gain uzten ahal du, beti ere irakasle hori kasuan kasuko zikloko irakasleen taldekoa bada.
-Hiru mahaikide. Ikastetxeko zuzendariak izendatuko ditu kasuan kasuko zikloko irakasle taldekoen artean. Ikastetxeko zuzendariak, horietaz gain, beste mahaikide bat gehiago izenda dezake, Arte Plastikoen eta Diseinuaren arloko profesional, artista eta adituen artean.
-Mahaiburuak idazkari izendatuko du hiru mahaikideetako bat.
2. Epaimahaiak zehaztu eta mugatuko du ikasle bakoitzak egin beharreko azken proiektu edo lana, edo, bestela, berretsi eginen ditu ikasleek aurkeztutako aurreproiektuak, baldin eta haren iritziz betetzen badituzte prestakuntza fase honetako helburu orokorrak erdiesteko bete beharreko baldintzak. Erabaki horretarako kontuan hartuko ditu irizpide hauek:
a) Hura egin ahal izateko dokumentazioaren egokitasuna.
b) Haren interes orokorra, kontuan hartuz balio estetikoa, planteamenduaren jatorrizkotasuna eta haren egokitasuna benetako eskarirako ezinbesteei begira.
c) Aurreproiektua egiteko posibilitatea.
Epaimahaiak proposatu eta onartzen ahalko ditu ikasle bat baino gehiagok egindako azken proiektu edo lanak, baldin eta taldekideen egitekoak bereizten badira.
3. Epaimahaiak irakasle arduradun bat paratuko du azken proiektu edo lan bakoitzerako, eta arauak finkatuko ditu irakasle arduradun horrek arreta/aholku plan bat ezarri eta azken proiektu edo obra ikastetxean egiteko komenigarritzat jotzen diren instalazio eta baliabideen erabilera koordina dezan.
4. Azken proiektu edo obraren ebaluazioa honako irizpide orokor hauen arabera eginen da:
a) Kalitate maila, espezialitateari dagozkion teknikak gauzatu eta aplikatzerakoan.
b) Erakutsitako sentsibilitate artistikoa.
c) Moduluetan eta prestakuntza praktikoko fasean garatutako kontzeptu teoriko praktikoen asimilazio eta aplikazio integratua.
d) Lanbidean jarduteko gaitasuna.
Irizpide hauek aplikatuko zaizkio azken proiektu edo lanaren zatietako bakoitzari.
5. Azken proiektu edo lana ebaluatzeko, beharrezkoa izanen da aldez aurretik gainditzea ikastetxean emandako lanbide-modulu guztiak eta enpresa, estudio edo tailerretako prestakuntza praktikoko fasea. Azken proiektu edo lana aurkeztu ondotik, epaimahaiak ebaluatu eginen du, kontuan hartuz aurreko idazatian aipatu irizpideak.
6. Azken proiektu edo lana behin bakarrik errepikatzen ahalko da.
E) Kalifikazioak
Hamargarrena
1. Ebaluazioa kalifikaziotan adieraziko da. Kalifikazioa da ikasleari eskala baten barreneko kategoria bat emateko ekintza, ebaluazio prozesuaren emaitzak kontutan harturik.
2. Kalifikazioak 1etik 10era bitarteko zifratan emanen dira, hamarrenik gabe, modulu profesional bakoitzaren azken ebaluazioaren kasuan, eta hamarren bakar batekin azken proiektu edo obraren azken ebaluazioan eta heziketa zikloaren azken kalifikazioan. Positibotzat hartuko dira bost puntuko edo hortik gorako kalifikazioak eta negatiboak gainerakoak.
3. Enpresa, estudio edo tailerretako prestakuntza praktikoko fasearen kalifikazioa gai/ez-gai moduan emanen da.
4. Curriculumetan erabat edo hein batean progresibotzat hartzen diren edukiak biltzen dituzten moduluen aurreko moduluak gainditzen ez badira, ez dira kalifikatuko ondoko moduluak, eta ebaluazio- agirian "Kalifikatu gabe" paratu beharko da horiei dagokien lekuan, eta, beraz, gainditu gabekotzat joko dira aurreko modulua gainditzen ez den bitartean.
5. Baliozkotu diren moduluen kasuan, hori hala izan dela adierazteko "Baliozkotua" idatziko da kalifikazioaren lekuan.
6. Lan praktikarekin baliokidetu diren moduluentzat eta enpresa, estudio edo tailerretako prestakuntza praktikoarentzat "Salbuetsia" idatziko da kalifikazioaren lekuan.
7. Heziketa Zikloaren azken kalifikazioa ikastetxeko idazkariak edo administratzaileak aterako du, behin gainditu eta gero ikastetxean emandako moduluak, enpresa, estudio edo tailerretako prestakuntza praktikoko fasea eta azken proiektu edo lana, horretarako aterako duelarik batez-besteko aritmetikoa, hamarren bakar batekin, honako bi kalifikazio hauetatik: heziketa zikloa osatzen duten moduluen kalifikazioen batez-besteko aritmetikoa eta azken proiektu edo lanaren kalifikazioa.
Hamaikagarrena
1. Eskolako errendimendua irizpide objektiboekin baloratua izateko ikasleek duten eskubidea bermatzeko, ikastetxeek ezagutzera emanen dituzte modulu profesionalen programazio didaktikoak, zeinetan adierazi beharko baitira, gutxienez, helburuak, ebaluazio irizpideak eta edukien garapena, modulu bakoitzean kalifikazio positiboa lortzeko eskatzen ahal diren gutxieneko betebehar bezala.
2. Ikasleek edo haien legezko ordezkariek erreklamazioak aurkezten ahalko dituzte eskuratutako azken kalifikazioen kontra, indarra duen arautegian ezarritako moduan.
III. Ebaluazio agiriak
Hamabigarrena
1. 1996ko otsailaren 16ko Aginduaren bigarren artikuluan ezarritakoarekin bat, Arte Plastikoetako eta Diseinuko Heziketa Zikloei dagokienez, honako hauek izanen dira ebaluazio prozesuaren agiriak:
-Ikasketa espediente pertsonala.
-Ebaluazio aktak.
-Arte Plastikoetako eta Diseinuko kalifikazioen liburua.
-Banakako ebaluazio txostenak, ondotik aipatzen direnak:
* Ikaslearen ebaluazio eta kalifikazio erregistroa.
* Familiei bidali beharreko txostenak.
* Ebaluazio bereziaren txostena, ikaslea tokiz aldatzen den kasuetan.
2. Ebaluazioaren emaitzak islatu beharko dira kasuan kasuko ebaluazio agirietan, aurreko idazatian aipatu horietan, Foru Agindu honetan eta hau garatzeko onesten den arautegian ezarritakoaren arabera.
Hamahirugarrena
1. Ikaslearen ikasketa espedientean agertuko da, laburbildurik, ebaluazio prozesuari dagokion informazio guztia. Ikasketa espedientean paratuko dira, ikastetxearen identifikazio datuekin eta ikaslearen datu pertsonalekin batera, espediente zenbakia eta matrikula-eguna, ebaluazioaren emaitzak eta promozio eta titulazioko erabakiak.
2. Arte Plastikoetako eta Diseinuko Heziketa Ziklo batean sartzen diren ikasleen ikasketa espedientea bete beharko da eta egon beharko du ikaslea matrikulatzen den ikastetxean. Espedientearen oinarrizko diseinua Foru Agindu honetako I. Eraskinean ageri den ereduaren araberakoa izanen da.
3. Ikastetxeko idazkariak edo administrariak izanen du espedienteak zaindu eta artxibatzeko ardura, eta ikastetxean gordeko dira. Ikastetxea desagertzen bada, Hezkuntza eta Kultura Departamentuak horiek gorde edo tokiz aldatzeko behar diren neurriak ezarriko ditu.
4. Hezkuntza sistemaren antolamendu berriaren aurreko ikasketa-planetatik etorritako ikasleen kasuan, ikasketa espedienteari erantsiko zaio dagokion ikasketa ziurtagiria, aipatu plan horien arabera egindako ikasketei buruzkoa.
Hamalaugarrena
1. Ikastetxean emandako moduluei dagozkien ebaluazio aktak prestatu eta itxiko dira ikastetxean egiten den azken ebaluazioko saio bakoitzaren bukaeran.
2. Ikastetxean emandako moduluen ebaluazio aktetan paratuko dira talde eta kurtso bakoitzeko ikasleen izenen zerrendak, alfabetoaren arabera, eta horiekin batera moduluen ebaluazioa eta baliozkotutako moduluen edo lan praktikarekin baliokidetutakoen aipamena. Haien oinarrizko diseinua Foru Agindu honetako II. Eraskinean ageri den ereduaren araberakoa izanen da.
3. Enpresa, estudio edo tailerretako prestakuntza praktikoko faseari dagozkion ebaluazio aktak prestatu eta itxiko dira ikastetxean, ikasle-talde bakoitzak fase hori amaitu ondoren, kasuan kasuko azken ebaluazioko saioa egiten denean.
4. Enpresa, estudio edo tailerretako prestakuntza praktikoko fasearen ebaluazio aktetan paratuko dira talde eta kurtso bakoitzeko ikasleen izenen zerrendak, alfabetoaren arabera, eta horiekin batera enpresa, estudio edo tailerretako prestakuntza praktikoko fasearen ebaluazioa. Haien oinarrizko diseinua Foru Agindu honetako III. Eraskinean ageri den ereduaren araberakoa izanen da.
5. Azken proiektu edo lanari dagozkion ebaluazio aktak itxiko dira bukatzen denean azkeneko ebaluazio saioa, zeina kasuan kasuko epaimahaiak finkatuko baitu.
6. Azken proiektu edo lanaren ebaluazio aktetan paratuko dira dagokien matrikula formalizatu duten ikasleen izenen zerrendak, eta horiekin batera ebaluazio-gai diren haren ataletako bakoitzean ateratako kalifikazioa eta azkeneko batez-bestekoa, eta bertan sartuko da kasuan kasuko titulua luzatzeko proposamena. Haien oinarrizko diseinua Foru Agindu honetako IV. Eraskinean ageri den ereduaren araberakoa izanen da.
7. Ebaluazio aktak bete ondoren, zuriuneak marren bidez baliogabetuko dira.
8. Ikasle taldearen hezitzaileen talde osoak sinatuko ditu ebaluazio aktak edo, bestela, azken proiektu edo lanaren epaimahaiko kideek, tutoreak eta prestakuntza praktikoko fasearen arduradunek, sinatzaileen izen-deiturak espreski adierazita eta ikastetxeko zuzendariak ikus-onetsita.
9. Baimendutako zentroetan akta bakoitzaren bina ale beteko dira, bat zentroarentzat eta beste bat bera atxikia dagoen zentro publikoarentzat.
10. Aurreko idazatietan aipatutako akta-ereduak, Foru Agindu honetako II., III. eta IV. Eraskinetan heldu direnak, eredu bakar izanen dira deialdi arrunt nahiz berezi guztietarako.
11. Aktetan paratutako emaitzetan oinarriturik txosten bat prestatuko da, ikasleen azken ebaluazioaren emaitzei buruzkoa. Txosten horren kopia bat Zerbitzuak Ikuskatzeko eta Ikuskapen Teknikorako Zerbitzura igorriko da, jatorrizkoa ikastetxeko idazkaritzan utzita.
Hamabosgarrena
1. Arte Plastikoetako eta Diseinuko kalifikazioen liburua da oinarrizko agiri ofiziala, Arte Plastikoetako eta Diseinuko Heziketa Zikloetan ikasleak egin dituen ikasketak egiaztatzen dituena, bertan islatzen baitira erdietsitako kalifikazioak, baliozkotutako moduluak edo lan-praktikarekin baliokidetu direnak.
2. Liburuak aukera ematen dio ikasleari ikastetxe batetik bestera mugitzeko, beti ere Arte Plastikoetako eta Diseinuko ikasketak ematen direnetan, eta bertan paratuko da, horrela gertatuz gero, zentro aldaketari buruzko informazioa, bai eta matrikulari uko egitea eta ikasleak dagokion titulua luza dakion egindako eskaera ere, behin gainditu eta gero lanbide-modulu guztiak, enpresa, estudio edo tailerretako prestakuntza praktikoa eta goi mailako heziketa zikloetako azken proiektua edo erdi mailako heziketa zikloetako azken lana.
3. Ikastetxe pribatuetako ikasleen liburuetan, teknikari edo goi mailako teknikari titulua luzatzeari dagokion diligentzia atxikirik dauden Arte Eskolak beteko du, liburuan dauden kalifikazioak eta aktetakoak alderatu ondotik.
4. Arte Plastikoetako eta Diseinuko kalifikazioen liburua taxutuko da 1996ko otsailaren 16ko Aginduaren Eraskinean ezarri ereduaren arabera; Agindu haren bidez ezarri ziren urriaren 3ko 1/1990 Lege Organikoaren bidez araututako Arte Plastikoetako eta Diseinuko Heziketa Zikloetan ari diren ikasleen ebaluazio txostenen oinarrizko elementuak eta ebaluazio prozesuaren ondorioz ikasleen mugigarritasuna bermatzeko beharrezkoak diren betebehar formalak (1996-02-23ko "E.A.O."). Kalifikazio liburu hori Nafarroako Gobernuko Hezkuntza eta Kultura Departamentuak argitaratuko du.
5. Arte Eskolei dagokie beraien ikasleen Arte Plastikoetako eta Diseinuko kalifikazioen liburuak bete eta zaintzea, bai eta haiei atxikitako ikastetxe baimenduetako ikasleenak ere. Ikasketak gaindituta, liburua ikasleari emanen zaio. Horrela adieraziko da Kalifikazioen Liburuan dagokion diligentzian.
Halaber, ikasketa espediente pertsonalean agertaraziko da liburua eman dela, hartu izana frogatzen duen ikaslearen sinaduraren bidez.
6. Heziketa Zikloa gainditzen ez duten ikasleen kalifikazio liburuak geldituko dira ikasketak egin zituzten eskolaren edo ikastetxe pribatua atxikia dagoen haren zaintzapean.
7. Zerbitzuak Ikuskatzeko eta Ikuskapen Teknikorako Zerbitzuak gainbegiratuko du Kalifikazioen Liburua betetzeko eta zaintzeko prozesua.
Hamaseigarrena
1. Ikasleen ebaluazio eta kalifikazio erregistroan bilduko dira ikasleari buruzko garrantzizko datu eta informazioak, Arte Plastikoetako eta Diseinuko ikasketak hasi eta bukatu arte. Edozein kasutan, ebaluazio etengabeari eta azkenekoari dagozkien kalifikazioak eta oharrak sartuko dira, eta Foru Agindu honetako V. Eraskinean ezarritako ereduari lotuko zaio.
2. Irakasle tutoreak idatziz emanen die ikasleei edo haien legezko ordezkariei ebaluazio etengabearen eta azkenekoaren emaitzen berri. Informazio hau emanen da hiru hilabetetik behin, gutxienez, eta ebaluazio saioa amaitu eta ahalik eta azkarren eginen da.
Txosten horien edukia eta formatoa ikastetxeek erabakiko dituzte haien Curriculum Proiektuetan.
3. Ikasle bat beste ikastetxe batera joanez gero Arte Plastikoetako eta Diseinuko heziketa ziklo bati dagozkion ikasketak amaitu gabe, irakasle tutoreak Ebaluazio Bereziaren Txostena prestatuko du, eta bertan paratuko da ikasketa prozesuak aurrera segitzeko beharrezkoa den informazio guztia. Irakasleek eta praktiketako tutoreak emandako datuak erabiliz prestatuko da, eta honako elementu hauek izanen ditu, gutxienez:
a) Iritzia, helburu komunetan egindako lorpenei buruz, Arte Plastikoetako eta Diseinuko ikasketei dagokienez, helburu berariazkoei buruz, erdi edo goi mailako heziketa zikloei dagokienez, bai eta zikloko helburu orokorrei buruz ere, eta moduluen eta prestakuntza praktikoko fasearen helburuei buruz.
b) Iritzia, edukiak asimilatzen lortutako mailari buruz.
c) Kalifikazio partzialak edo ikasketaren balorazioa, ebaluazioa antolatzen den denbora-tarteen arabera.
d) Hezkuntza-neurri osagarriak aplikatzea, hala behar denean.
Zentro jasotzaileak txostenetik ikasketa espediente pertsonalera pasako ditu egokitzapenerako neurri posibleei buruzko datuak, eta txostena utziko du ikaslea sartzen den taldeko tutorearen esku.
IV. Ikasleen Sustapena
Hamazazpigarrena
1. Ikasleek, presentzia erregimenean, gehienez ere hiru aldiz egiten ahalko dituzte modulu profesional baterako programaturiko jarduerak, eta lau aldiz gehienez aurkezten ahalko dira modulu profesional baten azken ebaluazio eta kalifikaziora, deialdi arruntak eta bereziak batuta.
2. Enpresa, estudio edo tailerretako prestakuntza praktikora sartzeko, Foru Agindu honetako 7. puntuko 2. eta 3. idazatietan ezarritako bideari segituko zaio.
Fase hau behin bakarrik errepikatzen ahalko da.
3. Azken proiektu edo lana ebaluatzeko, aldez aurretik gainditu beharko dira ikastetxean emandako lanbide-modulu guztiak eta enpresa, estudio edo tailerretako prestakuntza praktikoko fasea. Azken proiektu edo lana egiteko gehienez ere bi deialdi izanen dira. Azken proiektu edo lana errepikatzen bada, ikasleak matrikula berriz egin beharko du ikastetxeak ezartzen duen epearen barrenean.
4. Ziklo bat Lana-Prestakuntza modalitatean egitea aukeratzen dutenek gaindituta eduki beharko dituzte modulu guztiak, enpresa, estudio edo tailerretako prestakuntza praktikoko fasea eta azken proiektu edo lana, era horretan dagokien titulua eskuratu ahal izateko. Lanbide-modulu guztiak gainditzea lortzen ez duten modalitate honetako ikasleek, modulu horiek hiru baino gehiago ez badira, gainditu gabeko modulu horiek egiten ahalko dituzte bigarren aldiz, eskaintza partzialaren modalitatearen bidez.
5. Salbuespen gisa, Hezkuntza eta Kultura Departamentuak deialdi berezi bat egiten ahalko du, ikasketen garapen arrunta eragozten duen eritasun kasuetan, edo antzeko beste batzuetan.
Hamazortzigarrena
1. Ikastetxeko irakaskuntzen iraupena ikasturte bat baino handiagoa duten heziketa zikloen kasuan, lehenbiziko ikasturtea amaituta tituluaren curriculumean dauden irakaskuntzetako zatiren bat gainditu gabe duten ikasleak hurrengo ikasturtera igarotzen ahalko dira, gainditu gabe dutena, ordutan kontatuta, lehenbiziko ikasturteari dagozkion modulu profesionalen multzo osoaren iraupenaren 100eko 25 baino txikiagoa bada. Portzentaia handiagoa baldin bada, gainditu gabe dituzten modulu profesionaletarako programatutako jarduerak berriz egin beharko dituzte.
2. Lehenbiziko kasuan, ikasleak informazioa jaso beharko du gainditu gabeko moduluak berreskuratzeko jarduerez, egiteko epeaz eta ebaluazio bereziak noiz eginen diren. Bigarren kasuan, ikasleak gainditu gabe dauzkan moduluetarako programatutako jarduera guztiak errepikatu beharko ditu.
3. Ikasturte batean baino gehiagotan ematen diren lanbide-moduluak kontuan hartuko dira kurtsoz igotzeko.
V. Ikasleen Lekualdaketak
Hemeretzigarrena
1. Ikasle bat beste ikastetxera lekualdatzen bada heziketa zikloa amaitu gabe, sorburuko ikastetxeak xedekora igorriko ditu, honek eskaturik, Ebaluazio Bereziaren Txostena, Foru Agindu honetako 16. puntuko 3. idazatian aipatzen dena, eta ikaslearen kalifikazio liburua, behar den diligentzian jasoaraziko duelarik kalifikazio horiek bat datozela ikastetxean dauden aktekin. Ikastetxe pribatuetako kalifikazio liburuetan, ikastetxea atxikia dagoen Eskolak beteko du diligentzia hau.
2. Ikastetxe jasotzaileak bere gain hartuko du kalifikazio liburua, eta ikasleari dagokion ikasketa espedientea ireki eta bertara pasako ditu kalifikazio liburuko datuak.
VI. Titulazioak
Hogeigarrena
1. Erdi mailako prestakuntza ziklo bat osatzen duten lanbide-modulu guztien, enpresa, estudio edo tailerretako prestakuntza praktikoko fasearen eta azken lanaren kalifikazio positiboak teknikari titulua eskuratzeko eskubidea emanen du.
2. Goi mailako prestakuntza ziklo bat osatzen duten lanbide-modulu guztien, enpresa, estudio edo tailerretako prestakuntza praktikoko fasearen eta azken proiektuaren kalifikazio positiboak goi mailako teknikari titulua eskuratzeko eskubidea emanen du.
3. Luzatzeko proposamena prestakuntza zikloaren azken ebaluazioaren aktetan agertarazi beharko da.
Xedapen Gehigarri Bakarra
Edozein unetan, Arte Plastikoetako eta Diseinuko Heziketa Zikloetan ari diren ikasleen espedienteak dauden zentroek luzatu beharko dute, interesatuek hala eskaturik, egindako ikasketen ziurtagiria, bertan agertuko dituztelarik egindako ikasketa guztiak eta ateratako kalifikazioak. Ziurtagiriak ikastetxeko idazkariaren edo administratzailearen sinadura izan beharko du eta zuzendariaren ikus-onespena, eta Foru Agindu honetako VI. Eraskineko ereduaren arabera taxutuko da.
Azken Xedapenetako Lehenbizikoa
Hezkuntza zuzendari nagusiari baimena ematen zaio Foru Agindu honetan xedatutakoa aplikatu eta garatzeko behar diren xedapen guztiak eman ditzan.
Azken Xedapenetako Bigarrena
Foru Agindu hau igortzea Ikasketa eta Ikastetxeen Antolamendurako Zerbitzura, Pedagogi Berrikuntzako Zerbitzura eta Zerbitzuak Ikuskatzeko eta Ikuskapen Teknikorako Zerbitzura, eta Ikasketak Antolatzeko Atalera, Lanbide Heziketa Antolatzeko Atalera, Prestakuntza Lantokietan Bideratzeko Atalera eta Nafarroako Aldizkari Ofizialera.
Azken Xedapenetako Hirugarrena
Foru Agindu honek Nafarroako Aldizkari Ofizialean argitaratu eta biharamunean hartuko du indarra.
