Nafarroako Gobernua - Nafarroako Artxibo Garaikidea

Barne hartzen ditu, besteak beste, politika orokorrari buruzko dokumentazioa, Administrazioaren goi zuzendaritza eta ikuskaritzari buruzkoa, foru araubidearen osotasunaren defentsari buruzkoa, legegintza ekimenaren erabilerari buruzkoa —Nafarroako Parlamentura bidaltzeko foru legearen proiektuen onespenak— eta Estatuko Gobernuarekin hitzarmen ekonomikoak sinatzeari buruzkoa.

Nafarroako Foru Komunitateko Administrazioaren eta Sektore Publikoaren antolaketari, funtzionamenduari eta araubide juridikoari buruzko dokumentazioa jasotzen da, bai eta administrazioen arteko lankidetzari, kontratazioari eta informazioaren kudeaketari buruzkoa ere.

Administrazio publikoen zerbitzura dauden langileen (funtzionario publikoak, behin-behineko langileak eta kontratatutako langileak) arloko eskumenak baliatzetik datorren dokumentazio guztia da. Hauek barne hartzen ditu: kontratu lotura azkentzen den arteko hautaketa, eskubideak eta betebeharrak, ordainsariak, gizarte prestazioak eta prestakuntza.

Hauei buruzko dokumentazioa: aurrekontuak egitea, aurrekontuak kudeatzea eta exekutatzea, aurrekontuak likidatzea eta ixtea, finantza eragiketak, eta kudeaketa ekonomiko eta finantzarioaren kontrola.

Ondasun higigarri zein higiezinen arloko alderdi hauen analisiei buruzko dokumentazioa dakar: beharrak, eskuratzeak, babesa eta defentsa, erabilpena eta besterentzea, eta lagapena. Halaber, badakar enpresa-ondare publikoaren kudeaketari buruzkoa ere.

Aholkularitza juridikoari, jarduketa juridiko-administratiboei eta prozedura judizialei buruzko dokumentazioa jasotzen duten kodeak, bai eta araudia eta txosten juridikoak egiteari buruzkoak ere.

Herritarrek euskara ezagutzeko eta erabiltzeko duten eskubidearen babesera bideratutako politikari buruzko dokumentazioa jasotzen du, bai eta eskubide hori gauzatzeko eta hizkuntza hori berreskuratzeko eta garatzeko tresnak definitzeko politikari buruzkoa —erabilera sustatzeko neurriak adieraziz— eta euskararen erabilera eta irakaskuntza bermatzeari buruzkoa ere —borondatezkotasun, mailakotasun eta errespetu printzipioei jarraituz, Nafarroako errealitate soziolinguistikoaren arabera—.

Hauei buruzko eskumenen ondoriozko dokumentazioa biltzen du: jokoaren, establezimenduen, ikuskizun publikoen eta jolas jardueren kontrola, herritarren segurtasunerako politikak, bide segurtasuna, Foruzaingoa, eta babes zibila eta larrialdien kudeaketa.

Justizia Administrazioaren funtzionamendurako baliabide material eta ekonomikoen hornikuntzaren arloan Nafarroari dagozkion eginkizun eta zerbitzuek sortutako dokumentazioa dauka.

Talde horretan sartzen da finantza politikaren antolamenduari buruzko dokumentazioa, bai eta zerga kudeaketaren ondoriozkoa ere: zergadunen kontrola, zergen ohiko bilketa, derrigorrezko diru bilketa, zerga ikuskapena, zergadunarentzako laguntza, zehapenak eta lurralde aberastasuna (katastroa).

Foru Komunitateko Administrazioak honako hauetan esku hartzeari buruzko dokumentazioa jasotzen da: lurralde antolaketa eta funtzionamendua, lankidetza, toki erakundeen ondarearen kudeaketa, tokiko eginkizun publikoaren antolamendua, toki ogasunak, eta toki erakundeen jardueren aurkaratzea eta kontrola.

Nafarroak hezkuntzaren arloan dituen eskumenak honako hauei buruzko dokumentuetan islatzen dira: hezkuntza sistemaren plangintzen eta irakaskuntzen antolamendua, titulazioak, berrikuntza proiektuak, ikasketen sustapena eta bultzatzea, eskolaz kanpoko ekintzak, ekintza osagarrien eta ez-akademikoen sustapena eta finantzaketa, ikastetxeen kudeaketa, antolaketa eta funtzionamendua, euskararen sustapena eta koordinaketa eskolan, bai eta hezkuntza eta ekipamendu azpiegituren obren planifikazioa, egikaritzea eta kontrola ere. Funtsean gordetzen da, halaber, garai bateko Hezkuntzako Batzorde Nagusiaren (1936-1997) eta zenbait ikastetxeren dokumentazioa (San Frantzisko eskolak, Hegoaldeko ikastolak, Bernat Etxepare eta Amaiur ikastolak eta José Vilá Marqués IP).

Kulturari dagokionez, Artxibo Garaikideak kultur ondarea (historikoa, museografikoa, bibliografikoa eta dokumentala) antolatzeko, planifikatzeko, babesteko, sustatzeko eta zabaltzeko politikei buruzko dokumentazioa gordetzen du, bai eta kultur jardueren laguntzei eta sustapenari buruzkoa ere.

Talde horretan sartzen da turismo sektorearen plangintzatik eta antolaketatik, sektore hori sustatzetik eta bultzatzetik, eta sektore hori kontrolatzetik eta ikuskatzetik datorren dokumentazioa.

Arlo horretako eskumenak honako arlo hauei buruzko espedienteetan islatzen dira: ingurumen prebentzioa eta ebaluazioa, biodibertsitatearen kontserbazioa, basoen, ehizaren eta arrantzaren kudeaketa, uraren, hondakinen eta lurzoru kutsatuen kudeaketa, eta ingurumen informazioko eta hezkuntzako gaiak, bai eta ikuskapena eta dagozkion zehapen prozedurak ere.

1986az geroztik, Estatuak arlo hauetan eskualdatutako eskumenak betetzen ditu Nafarroako Gobernuak: lurralde antolamendua, hirigintzako plangintza, aholkularitza eta toki erakundeei arlo horretan emandako laguntza, bai eta legezkotasunaren kontrola ere. Garai bateko Lurralde Ikasketetarako Institutuaren (IET) dokumentazioa ere gordetzen da.

1986an ere, Nafarroak bere gain hartu zituen etxebizitzaren arloko eskumenak, hala nola plangintza politikak, eraikuntza kalitatearen kontrola eta etxebizitzaren bizigarritasun baldintzen bermeak, merkatuen esku-hartzea lurzoruaren eta eraikuntzaren arloan, etxebizitzen eskualdaketaren erregulazioa, kalifikazioa eta ziurtapena, jarduketa babesgarrien garapena eta etxebizitzarako sarbidearen sustapena, bai eta arlo horretako kontrola eta ikuskapena ere.

Honako arlo hauetako espedienteei buruzkoak dira kode horiek: industria sektorearen plangintza, produkzioaren sustapena eta garapena (industrialdeak), garapen teknologiko eta zientifikoa eta energiaren erabileraren arrazionalizazioa. Dokumentazioaren artean, nabarmentzekoa da industria segurtasunari buruzkoa (ur, berokuntza, elektrizitate, petrolio, hozkailu, gas, kimika, erradioaktibitate eta abarreko enpresak eta instalazioak), bai eta meatze ustiategien kontrolari eta segurtasunari buruzkoa ere.

Arlo hauetako eskumenen ondoriozko dokumentazioa dakar: merkataritza sektorearen antolaketa eta analisia, kanpo merkataritzaren sustapena, eta barne merkataritzari eta artisautzari emandako laguntza. Bestalde, merkataritza arloko zehapen araubidetik etorritako dokumentazioa ere badakar.

Era berean, Nafarroak eskualdatuta ditu lanaren eta enpleguaren arloko eskumenak, hala nola haiei buruzko politiken plangintza; lan harremanei buruzkoak (hauteskundeak, grebak, hitzarmenak, etab.); segurtasunari eta laneko arriskuen prebentzioari buruzkoak eta gizarte ekonomiari buruzkoak (kooperatibak eta lan sozietateak). Beste arlo hauetako eskumenak ere eskualdatuta ditu: enpleguaren eta okupazioaren sustapena, enplegurako prestakuntza, eta, 1990az geroztik, eskaintzaren eta eskariaren arteko bitartekaritza.

Talde horrek honako arlo hauei buruzko espedienteak biltzen ditu: landa garapenaren antolamendua eta plangintza, landare ekoizpena eta osasuna, animalien ekoizpena eta osasuna, nekazaritza politika bateratuko laguntzen kudeaketa, nekazaritzako azpiegituren eta ustiategien kontrola eta sustapena, nekazaritzako elikagaien industria, nekazaritzako elikagaien segurtasuna eta kalitatea, informazioaren kudeaketa, nekazaritza ikerketa eta gainerako zerbitzu teknikoak eta aholkularitzakoak, bai eta nekazaritzaren eta abeltzaintzaren arloko ikuskapena eta zehapena ere.

Halaber, Artxibo Garaikideak zaintzen du gizarte politiken arloko eskumena duen departamentutik datorren dokumentazioa, honako hauei buruzkoa: gizarte politiken antolamendua eta plangintza, ikuskaritza eta zehapena, gizarte zerbitzuen sistema publikoko zentroen eta itunpeko zentro edo gizarte zerbitzuen kudeaketa eta finantzaketa, gizarte prestazioen aitorpena, prestazio ekonomiko asistentzialen kudeaketa, familiari laguntzeko politikak, garapenerako nazioarteko lankidetza eta boluntariotza, eta genero berdintasunaren aldeko politika espezifikoak nahiz gazteei zuzendutakoak.

Honako hauei buruzko espedienteak sartzen dira hemen: kirol politikaren plangintza; Foru Diputazioaren kirol azpiegituren eraikuntza eta udal azpiegituren babesa; kirol prestakuntza; kirol justizia, kirolariaren babesa eta entrenamendu baldintzen hobekuntza; eta kirol jardueren sustapena. Behe Erdi Eskualdeko Kirol Batzordetik datorren dokumentazioa ere gordetzen da.

Multzo horretan sartzen dira garraio plan eta baimenei eta jarduera lagungarri eta osagarriei buruzko dokumentazioa, txartelen oniritzia, garraio publiko erregularreko emakidak, akreditazio profesionalak, etab., bai eta Garraioen Arbitraje Batzordearen espedienteak, garraio publikoa sustatzeko dirulaguntzen kudeaketa eta arlo horretako ikuskaritza eta zehapenak ere.

Foru Diputazioaren garaikoak dira Nafarroak herri lanen arloan dituen eskumenak. Eskumena duen departamentua arduratzen da herri lanak planifikatzeaz eta antolatzeaz, bai eta obra horiek proiektatzeaz eta gauzatzeaz, kontserbatzeaz eta mantentzeaz ere. Departamentu horri dagozkio, halaber, geologiari eta geotekniari buruzko zereginak (txostenak eta memoriak egitea, ikerketa eta abar).

1990ean Nafarroako Gobernuari eskualdatu zitzaizkion ordura arte Osasuneko Institutu Nazionalak garatzen zituen eginkizunak eta eskumenak. Artxibo Garaikidean osasunari buruz gordetzen den dokumentazioa administratiboa da (zentroak eraikitzea, mantentzea eta kudeatzea, irakaskuntza eta ikerketa, pazientearentzako informazioa eta arreta, etab.), salbu eta ospitale zaharretik datozen eta kronologikoki 1990 baino lehenagokoak diren historia kliniko eta txosten mediko batzuk, baita Bideko Ama Birjina ospitaleko pazienteen fitxa batzuk ere.