Zer etxebizitza jotzen dira desegokitzat?
- Prezio librekoak, familia-unitatearentzat tamaina egokia ez dutenak. Zehazki, azalera erabilgarri hau edo txikiagoa dutenak:
- 30 m², 1 edo 2 pertsonarentzat
- 50 m², 3 pertsonarentzat
- 65 m², 4 pertsonarentzat
- 80 m², 5 edo 6 pertsonarentzat
- 90 m², 7 pertsonarentzat
- 10 m² gehiago 7tik gorako pertsona bakoitzeko
- Prezio librekoak, baldin eta desgaitasuna duten pertsonen beharretara egokituak ez badaude. Zehazki, honako egoera hauetan:
- Hanketan % 40ko mugimendu-desgaitasuna edo handiagoa duen pertsona bat bizi bada etxebizitzan, eta bertara iristeko 12 zentimetrotik gorako zenbait maila dauzkaten eskailerak igaro beharra badago.
- Etxebizitzan % 65eko desgaitasuna edo handiagoa duen pertsona bat bizi bada, eta teknikoki edo ekonomikoki bideragarria ez bada etxea haren beharretara egokitzea.
- Bi urtez baino gehiagoz erabili ezin direnak, ezkontideak edo bikote egonkorra banantzeko edo dibortziatzeko epai judizial baten ondorioz.
- Aurri-adierazpena dutenak edo bizigarritasun-zedula modu iraunkorrean ukatu zaienak.
- Behin betiko desjabetze-espediente baten eraginpean daudenak.
- Antolamenduz kanpokotzat jotakoak edo behin betiko hirigintza-plangintza baten ondorioz hustu beharrekoak.
Gainera, zure etxebizitza desegokitzat jotzen da baldin eta % 50etik beherako zati proportzional baten jabetza edo gozamena baduzu eta zati horren merkatu-balioa 90.000 eurotik beherakoa bada. Honela kalkulatzen da balioa:
- Etxebizitza babestua bada, etxebizitza horietarako ezarritako gehienekoa hartu behar da erreferentziatzat. Kontsultatu etxebizitza babestuen gehieneko prezioa.
- Etxebizitza librea bada, kontuan hartzen da zer balio egiaztatu duen Administrazioak eskualdaketa zergapetzen duen zerga likidatzeko.
Nola eskaintzen zaizkio etxebizitzak Administrazioari, etxebizitza babestu bat eskuratzeko aukera izateko?
Etxebizitza babestu bat eskuratzeko aukera izateko, aldez aurretik etxebizitza desegokia eskaini behar diozu Administrazioari.
- Etxebizitza babestu bat alokatu nahi baduzu, alokairuan eskaini behar diozu Administrazioari, alokairuko poltsan sar dezan.
- Etxebizitza babestu bat erosi nahi baduzu, salmentan eskaini behar diozu.
Etxebizitza desegokia saltzeko gehieneko prezioa etxebizitza motaren araberakoa da:
- Etxebizitza babestua bada, etxebizitza horietarako ezarritako gehieneko prezioan sal dezakezu. Kontsultatu etxebizitza babestuen gehieneko prezioa.
- Etxebizitza librea bada, aukera hauen bidez ateratzen den preziorik handienean:
- Etxebizitzaren katastro-balioa.
- Biderketa hau eginez ateratzen den balioa: haztatu gabeko modulua bider 1,1 bider etxebizitzaren azalera erabilgarria. Garajearen eta trastelekuaren kasuan, haztatu gabeko modulua bider 0,44 bider eranskinen azalera erabilgarria. Kontsultatu haztatu gabeko moduluaren prezioa (aukera ezazu eskaintza egiten duzun urteari dagokion dokumentua; balioa taularen goiko eskuinaldean agertzen da).
Etxebizitza libreen prezioa handitu egin daiteke familia ugarien kasuan, Etxebizitza Zerbitzuak gainbegiratuta, baina prezioa ezin da izan eskuratu nahi den etxebizitza babestuaren balioa baino handiagoa.
Kasu batzuetan, etxebizitzaren gainerako titular edo erabiltzaileekin akordio batera iristen saiatu zarela frogatu behar duzu Administrazioari eskaini aurretik. Zehazki, honako egoera hauetan:
- Etxebizitzaren zati baten titularra bazara, zure zatia gainerako titularkideei eskaini behar diezu aldez aurretik.
- Etxebizitzaren jabetza soila badagokizu, gozamen-eskubidea duenari eskaini behar diozu aldez aurretik.
- Banantze- edo dibortzio-epai judizial baten ondorioz ezin baduzu etxebizitza bi urtez baino gehiagoz erabili, etxebizitzaren erabilera esleituta duen pertsonari eskaini behar diozu aldez aurretik.
Administrazioak eskaintza atzera bota dezake, horretarako arrazoiak emanez.
Ba al dut dirulaguntza jasotzeko eskubiderik, etxebizitza babestu bat erosi edo alokatzeagatik?
Administrazioak zure eskaintza onartu badu, litekeena da dirulaguntza jasotzeko aukera izatea. Horretarako, dirulaguntza bat jasotzeko oro har ezarritako baldintzak bete behar dituzu. Esteka hauetan kontsulta dezakezu:
Hala ere, ez duzu dirulaguntzarik jasotzeko eskubiderik honako kasu hauetan:
- Administrazioak zure eskaintza onartu ez duenean, honako kasuotan izan ezik: etxebizitza aurri-egoeran dagoela deklaratu bada, bizigarritasun-zedularik ez badu, antolamendutik kanpo badago edo desjabetze-espediente batek eragin badio. Kasu horietan, baduzu dirulaguntza jasotzeko eskubidea.
- Administrazioak eskaintza onartu badu, baina salmentarekin 60.000 eurotik gorako diru-sarrerak lortu badituzu.