navarra.es
Castellano | Euskara | Français | English
Ezagutzera eman
172/2009 Foru Agindua, abenduaren 24koa, Osasuneko kontseilariak emana, aldi baterako langileak hautatzeko arauak onesten dituena, Osasunbidea-Nafarroako Osasun Zerbitzuaren osasun zentro eta establezimenduetarako
(Testu bateratua. Jatorrizkoa 2010eko 7. NAOn argitaratua, urtarrilaren 15ean. Aldaketak: 12/2011 Foru Agindua, otsailaren 7koa)
Atarikoa
Osasunbidea-Nafarroako Osasun Zerbitzuari atxikitako langileen berariazko erregimenari buruzko urriaren 20ko 11/1992 Foru Lege Arauemailearen 29. artikuluak ezartzen du erakunde autonomo horrek zer egoera berariazkoetan kontratatzen ahal dituen langileak araubide administratiboan.
Bestalde, Osasunbidea-Nafarroako Osasun Zerbitzuan sartu eta bertako lanpostuak betetzea arautzen duen azaroaren 22ko 347/1993 Foru Dekretuaren III. kapituluak ere arautzen du langileak araubide administratiboan kontratatzea; orobat, irailaren 28ko 68/2009 Foru Dekretuak ere arautzen du Nafarroako Administrazio Publikoetan langileak araubide administratiboan kontratatzea.
2009ko ekainaren 9an, Akordioa sinatu zuten Administrazioaren ordezkariek eta Osasunbidea-Nafarroako Osasun Zerbitzuko Negoziazio Mahai Sektorialean ordezkaritza duten sindikatuetako (SATSE, USAE, SMN, UGT eta AFAPNA) ordezkariek, zehazteko nola kontratatuko diren Osasunbidea-Nafarroako Osasun Zerbitzuaren osasun zentro eta establezimenduetan aldi baterako hartuko diren langileak.
Foru agindu hau lanabes egokia da aipatutako Akordioko aurreikuspenei arau-maila egokia emateko.
Horrenbestez, eta Nafarroako Gobernuari eta Lehendakariari buruzko abenduaren 3ko 14/2004 Foru Legearen 41.1.g) artikuluak ematen dizkidan ahalmenak erabiliz, agindu dut:
1. artikulua. Xedea eta aplikazio eremua.
1. Foru agindu honen xedea da aldi baterako langileak hautatzeko eta administrazio araubidean kontratatzeko prozedura guztiak arautzea, betiere Nafarroako Osasun Zerbitzua-Osasunbideari atxikitako langileen berariazko erregimenari buruzko urriaren 20ko 11/1992 Foru Lege Arauemailearen eranskinean aipatutako estamentu eta espezialitateetarako badira, hurrengo ataletan adierazten diren zehaztapenen arabera, estamentua kontuan hartuta.
2. Osasunbidea-Nafarroako Osasun Zerbitzuaren mende dauden zentro guztietan izanen da aplikatzekoa foru agindu hau, langileak hautatzeko eta aldi baterako kontratatzeko kudeaketan.
2. artikulua. Zerrendak prestatzea.
1. Foru agindu honetan arautzen diren aldi baterako langileak hautatzeko prozedurek aukera eman beharko dute kontratazioak ahalik azkarren eta gardenen egiteko.
2. Aldi baterako langileak deialdi publiko bidez hautatuko dira, betiere berdintasun, merezimendu, gaitasun, gardentasun eta publizitate printzipioak bermatzen dituzten lehiaketa, oposizio edo oposizio-lehiaketa sistemen bitartez. Hona hemen irizpideak:
A) Kontratazio zerrendak lehentasun ordena hau izanen du:
1. Aldi baterako kontratatzeko lehentasuna izanen dute kategoria bereko lanpostu bat plantillako langile gisa betetzeko oposizioaldia gainditu baina lanposturik lortu ez duten izangaiek.
Horretarako, egindako azken deialdi publikoa baizik ez da kontuan hartuko.
Dena dela, kontratazio zerrendetatik ateratzeko eskatzen ahalko dute, kontratazio zentro edo unitate batean edo gehiagotan, eskabide bat zuzenduz Osasunbidea-Nafarroako Osasun Zerbitzuko Langileriaren Kudeaketa, Sarrera eta Barne Igoerarako Zerbitzuari.
2. Oposiziora aurkeztu eta hautaprobaren bat gaindituta ere oposizioa gainditu ez duten izangaiek. Halakoetan, lehenik erabiliko dira hautaprobarik gehien gainditzen dituztenen zerrendak, lortutako puntuazio osoaren araberako ordena zorrotzari jarraikiz. Izangaien zerrendaren lehentasuna kalkulatzeko, bi hauek batuko dira: gainditutako proben puntuazioa eta kasuan kasuko baremoarena. Baremoan izangaiak edozein administrazio publikotan izan duen esperientzia profesionala baizik ez da adieraziko.
Izangaiek Osasunbidea-Nafarroako Osasun Zerbitzuko Erregistroan aurkeztu beharko dute edozein administrazio publikotan egindako zerbitzuen frogagiria, hautaproben behin betiko emaitza argitaratu eta 15 egun balioduneko epean. Kasuan kasuko deialdia argitaratu arte egindako zerbitzuak baloratuko dira. Horretarako, egindako azken deialdi publikoa baizik ez da kontuan hartuko.
3. Oposizioan aurkeztu baina hautaproba bat bera ere gainditu ez duten izangaiak. Halakoetan, zerrendan sartu ahal izateko, proba gainditzeko eskatutako puntuazioaren %30 lortu beharko dute gutxienez. Proban lortutako puntuazioaren ordena zorrotzari jarraikiz osatuko da zerrenda. Izangaien zerrendaren lehentasuna kalkulatzeko, bi hauek batuko dira: egindako probaren puntuazioa eta baremoarena. Baremoan izangaiak edozein administrazio publikotan izan duen lan eskarmentua baizik ez da adieraziko.
Atal hau ez da aplikatuko medikuen zerrenda osatzeko.
Izangaiek Osasunbidea-Nafarroako Osasun Zerbitzuko Erregistroan aurkeztu beharko dute edozein administrazio publikotan egindako zerbitzuen frogagiria, hautaproben behin betiko emaitza argitaratu eta 15 egun balioduneko epean. Kasuan kasuko deialdia argitaratu arte egindako zerbitzuak baloratuko dira. Horretarako, egindako azken deialdi publikoa baizik ez da kontuan hartuko.
B) Kontratazio zerrenda bat osatuko da, A atalean egindako zerrendaren ondotik emanen dena, zerrenda irekien sistema iraunkor baten bidez. Horren bitartez, izangai berriak urte osoan sartzen ahalko dira kontratazio zerrendetan. Halakoetan, eskaerak puntuazio ordenaren arabera antolatuko dira, horretarako ezarriko den baremoari jarraikiz. Baremoan izangaiak edozein administrazio publikotan egindako zerbitzuak baizik ez dira adieraziko.
Zerrendak 3 hilean behin eguneratuko dira.
Baremoan berdinketarik egonez gero, eskaerak erregistroan sartutako dataren eta orduaren arabera ordenatuko dira.
Medikuei dagokienez, lan eskarmentuaz gain, ikerketarako nahikotasuna eta doktoretza ere baloratuko dira.
C) Zerrenda bateko izangaiak agortzen badira edo beste kategoria bat sartzen bada, proba espezifikoak deituko dira, deialdi publiko bidez. Lehentasun ordenari dagokionez, A eta B ataletako irizpideei jarraikiz osatutako kontratazio zerrenden ondotik egonen dira.
D) Salbuespenez, pertsona egokienak kontratatzen ahalko dira, kontuan harturik bete beharreko lanpostura nola egokitzen diren eta hura noraino ezagutzen duten, betiere premiazko arrazoiek hala agintzen badute. Halakoetan, kontratazio organoak txosten arrazoitua igorriko du, idatziz. Kontratazio espedientean sartuko da.
Halako kontratazio bat egiten den bakoitzean, Jarraipen Mahaiko idazkariari jakinaraziko zaio, dagokion dokumentazioa mahaiko ordezkari sindikalei igortzeko.
3. Aldi baterako kontratatzeko zerrendetan %33ko edo gehiagoko desgaitasuna duten izangaiek, hautapen probak gainditzen badituzte eta egiaztatzen badute desgaitasuna zenbatekoa den eta desgaitasun hori lanpostuari dagozkion lan eta eginkizunekin bateragarria dela, lehentasuna izanen dute sartuta dauden zerrendetatik deituak izateko.
Aldi baterako kontratatzeko zerrendetan dauden 55 urtetik gorako izangaiek, Nafarroako Foru Komunitateko Administrazioan 15 urteko edo gehiagoko zerbitzualdia egina dutenek, lehentasuna izanen dute sartuta dauden zerrendetatik deituak izateko, salbu eta aurreko lerroaldean aipatutako egoeran dauden izangaien aldean.
3. artikulua. Zerrenden indarraldia.
2. artikuluko A ataleko zerrendak indarra hartuko du kasuan kasuko hautapen prozesuan parte hartu eta lanpostua lortu duen lehenbiziko izangaia postuaz jabetzen denean. Zerrenda itxia izanen da eta indarrean egonen da deialdi berriak direla-eta zerrenda berriak osatu arte.
2. artikuluko B eta C ataletako zerrendek indarra hartuko dute Osasunbidea-Nafarroako Osasun Zerbitzuko Giza Baliabideen zuzendariak kontratazio zerrendak ebazpen bidez onesten dituenean.
4. artikulua. Zerrenda motak eta zentroa aukeratzea.
Zerrendak aipatutako prozeduretan oinarrituko dira eta irizpide eta eremu hauen arabera osatuko:
1. Zerrenda motak:
Kategoria guztietarako, eta 2. atalean adierazten diren eremu bakoitzerako, bi zerrenda osatuko dira: bata, kontratu laburretarako, eta, bestea, luzeetarako.
Jardunean dauden plantillako langileen ordez aritzeko egiten direnak izanen dira kontratu laburrak, eta, oro har, hasierako aurreikuspenen arabera, sei hilabetetik beherako iraupena izanen dutenak. Kontratu laburrak izanen dira, halaber, etengabeko edo guardiako osasun laguntza emateko egiten direnak, alde batera utzita zenbat irauten duten, baita lanaldi partzialeko kontratuak ere.
Lanpostu hutsak bitarteko gisa betetzeko egiten diren kontratuak dira iraupen luzekoak, baita plantillako langileentzat erreserbatutako lanpostuak betetzeko egiten direnak ere eta, oro har, sei hilabeteko edo gehiagoko beste edozein egiturazko kontratazio.
Kontratazio laburren zerrendan sartuko dira horixe espresuki eskatzen duten izangaiak.
Kontratazio luzeen zerrendan sartuko dira 2. artikuluan aipatutako prozedurei jarraikiz hautatutako izangai guztiak.
Kontratazio zerrendak irekiak eta iraunkorrak izanen dira. Horretaz gainera, zerrendak eguneratuak egonen dira eta Nafarroako Gobernuak horretarako prestatzen duen web orrian argitaratu beharko dira.
2009ko ekainaren 9ko Akordioa sinatu eta gehienez ere urtebetean, Osasunbidea-Nafarroako Osasun Zerbitzuak izangaiei deitzeko sistema zentralizatu bat ezarriko du, lanpostu hutsak betetzeko, plazak gordetzeko, eszedentzietarako eta bestelako kontratu luzeetarako. Horretarako, 6 hilabeteko epean, dei zentralizatuen programa pilotu bat jarriko da abian.
2. Zentroa hautatzea.
a) Iraupen luzeko kontratazio zerrendak.
Iraupen luzeko kontratazio zerrendak prestatzeko prozeduretan, kategoria guztietan, izangai bakoitzak atal eta zentro guztiak hautatzen ahalko ditu; deialdian onartzeko eskabidean eginen du hautapen hori.
Osasunbidea-Nafarroako Osasun Zerbitzuko lanpostuak lehiaketa, oposizio edo oposizio-lehiaketa bidez betetzeko deialdietara aurkeztutako izangaiek deialdian onartuak izateko eskabidean hautatu beharko dute zentroa, betiere deialdian hala adierazten bada. Dena dela, deialdiko behin betiko emaitzak argitaratutakoan, interesdunek, argitaratu eta biharamunetik hamar eguneko epean, hasieran hautatutakoa aldatzen ahalko dute.
Hona hemen zentroa hautatzeko atalak:
-Nafarroako Ospitalegunea.
-Tuterako Osasun Barrutia.
-Lizarrako Osasun Barrutia.
-Osasunbidea-Nafarroako Osasun Zerbitzuko Kudeaketa Zuzendaritza, Kudeaketako Zuzendaritza, Prestazio eta Itun Zerbitzua, Ikerketa Biomedikoaren Zentroa eta Nafarroako Ehun eta Odol Bankua barne.
-Osasun Publikoaren Institutua.
-Oinarrizko Osasun Laguntzako Zuzendaritza, Nafarroako Iparraldeko (eremu euskalduna) Oinarrizko Osasun Laguntzako Taldeak salbu.
-Nafarroako Iparraldeko (eremu euskalduna) Oinarrizko Osasun Laguntzako Taldeak.
-Osasun Mentaleko Zuzendaritzaren sarea.
b) Iraupen laburreko kontratazio zerrendak.
Iraupen laburreko kontratazio zerrendak osatzeko prozeduretan, kategoria guztietan, izangai bakoitzak, salbu hautaprobak gainditu baina lanposturik lortu ez dutenek, A, B eta C ataletako zentro bakar bat hautatu beharko du (ez du atal guztietan hautatu beharrik).
Osasunbidea-Nafarroako Osasun Zerbitzuko lanpostuak lehiaketa, oposizio edo oposizio-lehiaketa bidez betetzeko deialdietara aurkeztutako izangaiek deialdian onartuak izateko eskabidean hautatu beharko dute zentroa, betiere deialdian hala adierazten bada. Dena dela, deialdiko behin betiko emaitzak argitaratutakoan, interesdunek, argitaratu eta biharamunetik hamar eguneko epean, hasieran hautatutakoa aldatzen ahalko dute.
Hona hemen zentroa hautatzeko atalak:
A atala:
-Nafarroako Ospitalegunea.
-Oinarrizko Osasun Laguntzako Zuzendaritza, Nafarroako Iparraldeko (eremu euskalduna) Oinarrizko Osasun Laguntzako Taldeak salbu.
B atala:
-Osasunbidea-Nafarroako Osasun Zerbitzuko Kudeaketa Zuzendaritza, Kudeaketako Zuzendaritza, Prestazio eta Itun Zerbitzua, Ikerketa Biomedikoaren Zentroa eta Nafarroako Ehun eta Odol Bankua barne.
-Osasun Publikoaren Institutua.
-Nafarroako Iparraldeko (eremu euskalduna) Oinarrizko Osasun Laguntzako Taldeak.
-Osasun Mentaleko Zuzendaritzaren sarea.
C atala:
-Tuterako Osasun Barrutia.
-Lizarrako Osasun Barrutia.
c) Egoera bereziak.
Beren eginkizunak betetzean erasoa jasan duten izangaiek, eta hala jaso bada Erasoen Erregistroan, aldaketa berehala egiteko eskatzen ahalko dute nahi dituzten osasun zentroak hautatzeko eskabidean.
Genero bortizkeriaren biktimek, aldi baterako kontratuak dituztenek, hautatzen duten herrira aldatzeko eskatzen ahalko dute, eta ordura arteko lan baldintza berberak izaten jarraituko dute.
Epai irmo bidez biktimaren lanpostutik urruntzeko agindua duten izangaiak kanporatu eginen dira kasuan kasuko zentroetako kontratazio zerrendetatik, epaia betetzeko.
3. Zerrenden ordena.
Zerrendak osatu eta gero, kontratu motaren arabera eta adierazitako eremu bakoitzerako, izangaiak 2. artikuluko irizpideei jarraikiz ordenatuko dira.
5. artikulua. Deitzea.
Aldi berean kontratazio eskaintza bat baino gehiago dagoenean, hautaprobak gainditu baina lanposturik lortu ez dutenek lehentasuna izanen dute, gainerako izangaien aldean, sei hilabetetik gorako kontratuak eskaintzeko, betiere kontratua hasteko unean kontraturik ez badute Osasunbidea-Nafarroako Osasun Zerbitzuarekin.
Eskaintzen den postuaren kategoriari dagokion zerrendako ordena zorrozki jarraikiz deituko zaie Osasunbidea-Nafarroako Osasun Zerbitzuarekin indarreko kontraturik ez duten izangaiei.
Kontratu laburretarako, interesdunak adierazitako helbide elektronikoa edota telefono finko zein mugikorra erabiliko da (deia edo web mezularitza) harekin harremanetan jartzeko. Bi abisu eginen zaizkio egun bereko bi ordutan (gutxienez 2 orduko aldearekin), eskabidean adierazitako helbide elektronikoaren edo telefonoaren bidez, izangaia jakinaren gainean jarriko dela bermatzen duten baldintza guztiak betez.
Kontratu luzeetarako, interesdunak adierazitako helbide elektronikoa edota telefono finko zein mugikorra erabiliko da (deia edo web mezularitza) harekin harremanetan jartzeko. Hiru abisu eginen zaizkio egun baliodun desberdinetako ordu desberdinetan (gutxienez 2 orduko aldearekin), eskabidean adierazitako helbide elektronikoaren edo telefonoaren bidez, izangaia jakinaren gainean jarriko dela bermatzen duten baldintza guztiak betez.
Dei-egitearen zuzeneko erantzuleek idatziz adieraziko dute, Jarraipen Mahaiak eskura izanen duen abisuen erregistro batean aurkeztutako eginbide bidez, izangai bakoitzari zein inguruabarretan, egunetan eta ordutan deitu zaion.
Kontratu laburren kasuan, izangaiari 24 ordu emanen zaizkio erantzuteko, eta, luzeen kasuan, 48 ordu. Erantzuteko gutxieneko denbora alde batera utziko da, eskainitako kontratuak hurrengo 72 orduen barnean hasi behar duenean.
Ezinezkoa bada izangai batekin arestian aipatutakoari jarraikiz harremanetan jartzea, hurrengoari deituko zaio, eta horrela jarraituko da postua bete arte.
5. bis artikulua. Deiak amatasunaren edo adopzioaren lizentzia kasuetan.
1. Amatasunaren edo adopzioaren lizentzia hartzeko ezarrita dagoen epearen barruan aldi baterako kontratu bat sinatzeko deia jaso eta kontratua onartzen duten izangaiei lanpostu hori erreserbatuko zaie lanean benetan hasten diren arte, orduan sinatuko baitute kontratua.
2. Kontratua onartzen ahalko dute, bakar-bakarrik, baldin eta aurreikusitako iraupenak bide ematen badie lanpostuan hasteko.
3. Lanpostuan sartuko dira amatasunaren edo adopzioaren lizentziarako ezarritako epea bukatzen den egunean, edo lehenago, interesdunak eskatzen badu, baina betiere erditu ondoren amarentzat ezarritako nahitaezko atsedenaldia bukatuta.
4. Horrelakoetan, amatasuna edo adopzioa gertatu izan ez balitz lanpostuan hasiko zatekeen egunetik lanpostuan benetan hasten den egunera arte doan epea Administrazioan emandako zerbitzu gisa onartuko da. Aldi hori onartuko zaio kontratua sinatzen baldin badu eta ondorioak izanen ditu lanpostuan hasten den unetik aurrera.
6. artikulua. Prestasuna.
Kontratazio zerrendetan dauden izangaiek edozein unetan kontratatzeko prest egon beharko dute, salbu eta kontratu harremana hasteko unean egoera hauetakoren batean badira:
a) Beren eginkizunen betetzearekin bateraezinak diren kargu politikoetan edo ordezkaritzakoetan aritzeko izendatu edo hautatu dituztenean.
b) Administrazio Publikoan izendapen libreko lanpostu bat betetzeko izendatu dituztenean.
c) Nazioarteko erakundeetako batzordeetan, atzerrian dauden osasun arloko GKEetan edo nazioarteko lankidetza programetan parte hartzen dutenean.
d) Gorte Nagusiek organo konstituzionaletako kide izateko hautatu dituztenean, edo Ganberek hautatu beharreko beste organo batzuen kide izateko.
e) Osasun arazoak izaten direnean, baldin eta osasun laguntza jaso bada eta txosten mediko bidez frogatzen bada, eta haurdunaldirako edo edoskitze naturalerako arriskua dagoenean.
f) Aldi baterako lan batean aritzean.
g) Ezkontzearen edo bikote egonkor izatearen ondorioz dagokion lizentzia gozatzen ari direnean, arau honekin bat: otsailaren 9ko 11/2009 Foru Dekretua, Nafarroako Administrazio Publikoetako funtzionarioen opor, lizentzia eta baimenen erregelamendua onesten duena.
h) Otsailaren 9ko 11/2009 Foru Dekretuan ezarritako epean bigarren gradura arteko odol edo ezkontza bidezko ahaideren bat hiltzen denean edo gaixotasun larriren bat duenean.
i) Otsailaren 9ko 11/2009 Foru Dekretuan ezarritako epean amatasun, aitatasun edo adopzio zein harrera arrazoiak daudenean.
j) Erakunde ofizial baten beka bat jasotzen hasi denean.
k) Zentro ofizialetan lanbide heziketako, doktoretzako edo masterreko ikastaroak egitean.
l) Hiru urtez beherako adingabe bat zaintzean.
m) Izangaiak, legezko zaintza dela eta, zuzeneko zaintzapean duenean ezgaitasun fisikoa, psikikoa edo sentsoriala duen pertsonaren bat, %33ko edo hortik gorako minusbalioa duena, eta lan ordaindurik ez duena. Hori frogatzeko, egoki diren frogagiriak aurkeztu beharko ditu.
n) Izangaiak bere kargura duenean bigarren gradura arteko odol edo ezkontza bidezko ahaideren bat, bere kasa bizitzeko gauza ez dena adinagatik (65 urtetik gorakoa), istripuagatik edo gaixotasunagatik, eta lan ordaindurik egiten ez duena. Hori frogatzeko, egoki diren frogagiriak aurkeztu beharko ditu.
o) Izangaiak hala erabakitzen duenean, urtebetez genero indarkeriaren biktima izatearen ondorioz.
p) Izangaiak lanaldiko 1.592 orduak egin dituenean urte naturalaren barnean.
q) Kontratu harremana hasi baino 24 ordu baino gutxiagoko epearekin egin denean eskaintza.
r) Jarraipen Mahaiaren ustez aski garrantzitsua den beste egoeraren bat gertatzen denean.
Prestasunik eza justifikatuta dagoenean, hori idatziz alegatu eta frogatu beharko da, hala egiteko eskatu eta hamar egun balioduneko epean.
Arestian aipatutako egoeretan daudela alegatzen duten izangaiek zerrendako postu berari eutsiko diote, egoerak dirauen bitartean.
Prestasunik eza justifikatzen duen arrazoia amaitzean, egoera berriaren berri eman beharko dio kontratazio organo eskudunari. Jakinarazi eta biharamunean izanen ditu ondorioak.
7. artikulua. Zerrendatik kanporatzea.
1. Zerrendetatik kanporatuko dira honako inguruabarretakoren batean dauden izangaiak:
a) Ez betetzea ez betekizun orokorrak eta titulazioari lotutakoak, ez lanpostuan aritzeko beharrezkotzat jotzen diren gainerako baldintzak.
b) Lanbidean jarduteko edo eginkizun publikoetan aritzeko desgaitua izatea edo Osasunbidea-Nafarroako Osasun Zerbitzutik edo edozein administrazio publikotatik diziplinako espediente bidez baztertua izatea, haren indarraldiak irauten duen bitartean.
c) Epe luzerako bi lan eskaintzari edo indarreko bi kontratu luzeri uko egitea, bidezko arrazoirik gabe. Foru agindu honen 6. artikuluan jasoko da arrazoia. Ez dira zerrendatik kanporatuko indarreko kontratu bati uko egiten diotenak kontratu hobea lortzeko, 9. artikuluan aipatu arrazoiak direla medio.
2. Honako hau izanen da kanporatzeen prozedura baldin eta izangaiak lanpostuan aritzeko beharrezko baldintzak betetzen ez baditu:
Unitate Organikoko Burutzak txosten bat eginen du, azalduz zer arrazoirengatik ez dituen betetzen izangaiak lanpostuan aritzeko baldintzak, eta zentroko Langileriaren Zuzendaritzara igorriko du.
-Zentroko Langileriaren Zuzendaritzak txostena baloratu eta kanporatze espediente bat tramitatzea bidezko den ala ez erabakiko du. Proposamena hamar egun naturaleko epean igorriko zaio interesdunari (hartu izanaren adierazpena eta guzti), bai eta Jarraipen Mahaiari ere. Interesdunari entzuteko tramitea eginen da, egoki deritzon alegazioak egin ditzan 10 egun balioduneko epean.
-Izangaia zein zentrotan sartuta dagoen, zentro horretako Langileriaren Zuzendaritzak egindako kanporatze proposamena Jarraipen Mahaiari igorriko zaio.
-Jarraipen Mahaiaren proposamenari jarraikiz, Osasunbidea-Nafarroako Osasun Zerbitzuko Giza Baliabideen zuzendariak kanporatzeko ebazpena emanen du, hala behar denean.
3. Kanporatzeko ebazpena idatziz jakinaraziko zaio interesdunari gehienez ere 10 egun balioduneko epean, eta espresuki adieraziko zaio kanporatua izateko arrazoia. Kopia bat Jarraipen Mahaiari igorriko zaio.
Izangaiak 3 hilabetez egonen dira kontratazio zerrendetatik kanpo. Ondoren, izangaia aldez aurretik zegoeneko zerrendetako azkeneko postura pasatuko da.
8. artikulua. Lehentasun ordena.
1. Kontratu laburren eta luzeen zerrenden funtzionamendua ezberdina izanen da.
Kasuan kasuko kontratuak amaitzean, izangai bakoitzak azkeneko kontratua sinatu baino lehen zuen lehentasun ordenari eutsiko dio.
2. Hauek dira kasuan kasuko zerrendan lehentasun ordena galtzeko arrazoiak:
a) Epe laburreko bi eskaintzari uko egitea bidezko arrazoirik gabe.
b) Indarreko kontratu labur bati uko egitea. Salbuespenak: kontratua hobetzea, 9. artikuluan ezarritakoari jarraikiz, edota bidezko arrazoiren bat izatea, foru agindu honen 6. artikuluan ezarritako irizpideei jarraikiz.
c) Prestasun eza ez justifikatzea, 6. artikuluarekin bat.
d) Epe luzerako lan eskaintza bati edo indarreko kontratu luze bati uko egitea, bidezko arrazoirik gabe.
Hurrenkera ordenaren galera, behar bezala egiaztatua egon beharko dena, interesdunei idatziz jakinaraziko zaie gehienez ere 10 egun balioduneko epean. Kopia bat Jarraipen Mahaiari igorriko zaio, izangaiak zerrendan duen postu berria adierazita, eta berehala eguneratuko da Nafarroako Gobernuaren web orrian.
9. artikulua. Kontratua hobetzea.
Kontratua hobetzen dela ulertuko da baldin eta langileak indarreko kontratu bati uko egiten badio Osasunbidea-Nafarroako Osasun Zerbitzuarekin beste kontratu bat sinatzeko.
Kasu hauetan baizik ez da onartuko:
a) Izangaiak indarreko kontratu labur bat duenean eta kontratu luze bat eskaintzen zaionean, 4. artikuluaren 1. puntuan ezarritako definizioen arabera.
b) Izangaiak kategoria zehatzeko indarreko kontratu bat duenean eta beste kategoria bateko kontratu bat eskaintzen zaionean, betiere izangaia bi kategorietako kontratazio zerrendetan badago.
Kontratua hobetzea zilegi izanen da baldin eta izangaia kontratatua dagoen eremuan berean sortzen bada kontratu berriaren eskaintza. 4. artikuluaren 2. ataleko eremuak hartuko dira kontuan.
Aurrekoa gorabehera, langileak kontratatzeko deiak zentralizatu eta gero, kontratua hobetzea beste eremu batzuetara hedatuko da pixkanaka.
10. artikulua. Zerrenda bereziak.
1. Jarduera bereziak kontuan hartuta eta ordezkapen eta behin-behinekotasun premiei erantzuteko, berariazko zerrendak osatzen ahalko dira. Unitateetako puntuazio ordenari eta foru agindu honen I. eranskinean zehaztutako postu bereziei jarraikiz antolatuko dira. Zerrenda hauek Osasunbidea-Nafarroako Osasun Zerbitzuko zentro guztietarako balioko dute eta 2. artikuluko (Zerrendak egitea) A), B) eta C) ataletan xedatutakoari jarraikiz egindako kontratazio zerrendetako izangaiek osatuko dituzte.
Zerrenda berezietan sartzeko ezinbestekoa izanen da kasuan kasuko espezialista tituluaren jabe izatea, baldin eta espezialitate hori badago edo egon bada, edo nahitaezkoa izanen da frogatzea graduatu ondoko heziketa jaso dela eta/edo alor horietan aritu dela, gutxienez ere 6 hilabetez azken 3 urteotan. Frogagiriak aurkeztu beharko dira.
Aldian-aldian, laguntza premien arabera eta laguntza premia gutxiagoko epeetan, epe bat jartzen ahalko da berariazko prestakuntzarik gabeko langileen unitateetan sartzeko eta berariazko prestakuntzako ikastaroak eginen dira Osasunbidea-Nafarroako Osasun Zerbitzuaren kargura.
Zerrenda osatzen dutenek lehentasuna izanen dute foru agindu honen I. eranskinean zehaztutako unitateetako kontratazio eskaintzetan, artikulu honen lehenbiziko lerroaldean aipatutako kasuetan, eta gutxienez ere hiru hilabeteko kontratua bermatuko zaie. Zerrenda berezietan dauden izangaiek, horiek osatzen dituzten bitartean, zerrenda orokorretatik kanpo geratuko dira, hautaprobak gainditu baina lanposturik lortu dutenek izan ezik, bi zerrendetan egonen baitira.
Dena dela, kontratazio zerrendetatik ateratzeko eskatzen ahalko dute, kontratazio zentro edo unitate batean edo gehiagotan, eskabide bat zuzenduz Osasunbidea-Nafarroako Osasun Zerbitzuko Langileriaren Kudeaketa, Sarrera eta Barne Igoerarako Zerbitzuari.
Izangai batek zerrenda orokorretan sartu nahi badu, lortutako puntuazioari dagokion ordenan, zerrenda berezietan egoteari uko egin beharko die. Ukoa aurkeztuta, hura eskatu eta hurrengo 2 hilabeteak igaro ondoren izanen ditu ondorioak. Halakoetan, Osasunbidea-Nafarroako Osasun Zerbitzuak hautagai horri beste prestakuntza bat eskainiko dio foru agindu honen I. eranskinean aipatutako jarduera bereziren batean.
Unitate eta postu berezi horiek zeintzuk diren erabakitzeko, Jarraipen Mahaiak irizpide egokiak zehaztuko ditu.
2. Kontratazio organoek premien arabera egoki deritzoten prestakuntza teoriko-praktikoa eskaintzen ahalko dute, artikulu honetan ezarritakoari jarraikiz. Prestakuntza hori jasotzen duten izangaiak dagozkien zerrenda berezietan sartuko dira nahitaez, salbu eta hautaprobak gainditu baina lanposturik lortu ez duten izangaiak badira.
Osasunbidea-Nafarroako Osasun Zerbitzuak erabakiko du prestakuntza teoriko-praktikoaren iraupena.
Prestakuntza eskaintza horrek zerrenden ordena bera gorde beharko du.
11. artikulua. Jarraipena.
Jarraipen Mahai bat eratuko da, eta 2009ko ekainaren 9ko Akordioa sinatu duten Administrazioko eta sindikatuetako kideek osatuko dute. Akordioa aplikatzearen ondoriozko gorabehera eta eztabaida orokor eta partikularrak ebazteko eskumena izanen du, foru agindu honetan esplizituki aitortutakoak alde batera utzi gabe. Jarraipen Mahaiak bere erregelamendua izanen du.
Administrazioak izendatutako mahaikideetako bat izanen da mahaiburu, eta ordezkarietako bat arituko da idazkari.
12. artikulua. Publizitatea.
Hiru hilean behin, kontratazio zerrenden egoeraren kopia bat igorriko zaie ordezkari sindikalei. Pixkanaka gero eta zerrenda gehiago jarraitzen eta kontsultatzen ahalko dira Internet bidez.
Zerrendek informazio hau bilduko dute: lehentasun zenbakia, izen-deiturak, kontratuaren hasiera eta amaiera datak, eta kontratatzeko modua (lanpostu hutsa, egiturazkoa eta ordezkapena).
Kontratazio zerrenda guztiak Nafarroako Gobernuaren web orrian argitaratuko dira.
13. artikulua. Osasunbidea-Nafarroako Osasun Zerbitzuko zentro eta establezimenduetako aldi baterako kontratuak berritu eta iraungitzea.
Osasunbidea-Nafarroako Osasun Zerbitzuko aldi baterako kontratuak Osasun administrazioak eta zentral sindikalek 2003ko ekainaren 9an sinatutako Akordioan ageri diren irizpideen arabera berritu eta iraungiko dira.
Lehen Xedapen Iragankorra
Foru agindu honek arautuko ditu Osasunbidea-Nafarroako Osasun Zerbitzuko lanpostuak oposizio-lehiaketa bidez betetzeko deialdiak baldin eta foru agindu honek indarra hartzean amaitu ez badira eta osatu beharreko kontratazio zerrendak egiteke badaude.
Bigarren Xedapen Iragankorra
2001eko urtarrilaren 9ko Akordioan ezarritakoari jarraikiz osatutako zerrendek indarrean jarraituko dute, zerrenda berriak egiten ez diren bitartean.
Xedapen Indargabetzaile Bakarra
Indargabetu eginen dira foru agindu honetan ezarritakoaren aurkako maila bereko edo apalagoko xedapen guztiak.
Azken Xedapen Bakarra
Foru agindu honek Nafarroako Aldizkari Ofizialean argitaratu eta biharamunean hartuko du indarra.
I. ERANSKINA. Zerrenda bereziak
OLT-EUD:
-Dialisia.
-Psikiatria.
-Operazio gelak.
-ZIU (Zainketa Intentsiboen Unitatea)-ABU (Anestesia Ondoko Bizkorketarako Unitatea)-EZBU (Erreanimazioaren eta Zainketa Berezien Unitatea)-ZIU (Zaintza Intentsiboen Unitatea) ibiltaria
-Larrialdiak.
-Neonatologia.
Erizaintzako laguntzailea:
-Dialisia.
-Operazio gelak.
-ABU (Anestesia Ondoko Bizkorketarako Unitatea)-EZBU (Erreanimazioaren eta Zainketa Berezien Unitatea)-ZIU (Zaintza Intentsiboen Unitatea).
-Psikiatria.
-Neonatologia.
-Erditzeak.
-Larrialdiak.
