navarra.es
Castellano | Euskara | Français | English
Ezagutzera eman
76/2007 Ebazpena, otsailaren 6koa, Eskola eta Lanbide Irakaskuntzaren zuzendari nagusiak emana, udal titulartasuna eta Hezkuntza Departamentuaren eta toki entitateen arteko lankidetza hitzarmen bidezko finantzabidea izanik, Haur Hezkuntzako lehen ...
76/2007 EBAZPENA, otsailaren 6koa, Eskola eta Lanbide Irakaskuntzaren zuzendari nagusiak emana, udal titulartasuna eta Hezkuntza Departamentuaren eta toki entitateen arteko lankidetza hitzarmen bidezko finantzabidea izanik, Haur Hezkuntzako lehen zikloko ikastetxeetan 2007/2008 ikasturtean haurrak rtzeko prozedura arautzen duena
(2007ko 36. NAOn argitaratutako testua, martxoaren 23an)
Atarikoa
Hezkuntza kontseilariak 41/2005 Foru Agindua eman zuen otsailaren 28an, 0-3 urte bitarteko haurrentzako udal ikastetxeak finantzatzeko Hezkuntza Departamentuaren eta toki entitateen arteko lankidetza hitzarmenak egiteko oinarriak finkatzeko. Foru agindu horren 1.10 atalean ezartzen da Hezkuntza Departamentuak arau batzuk emanen dituela urtero, zentro horietan haurrak onartzeko prozedura erregulatzeko.
Arau hori aplikatuz, eta maiatzaren 3ko 2/2006 Lege Organikoak eskolatze arloan ezarri duen esparruaren barrenean, beharrezkotzat jo da lankidetza hitzarmenen bidez finantzaturiko udal titulartasuneko ikastetxe guztietan haurrak onartzeko irizpide eta prozedurak arautzea, deusetan galarazi gabe toki entitateek prozesua tokian tokiko ezaugarriei eta beharrei egokitzeko aukera.
Ikusirik Eskola Antolamendu eta Berriztapenerako Zerbitzuaren txostena, udalen titulartasuna eta Hezkuntza Departamentuaren eta toki entitateen arteko lankidetza hitzarmen bidezko finantzabidea izanik, 0-3 urte bitarteko haurrentzako ikastetxeetan 2007/2008 ikasturtean haurrak onartzeko prozedura proposatzen duena.
Hori horrela, Nafarroako Foru Komunitateko Administrazioari buruzko abenduaren 3ko 15/2004 Foru Legearen 21.1 artikuluko d) idatz-zatiak ematen dizkidan ahalmenak erabiliz, ebatzi dut:
1. Ebazpen honen xedea da, udal titulartasuna izanik, Hezkuntza Departamentuaren eta toki entitateen arteko lankidetza hitzarmen bidezko finantzabidea duten Haur Hezkuntzako lehen zikloko ikastetxeetan 2007/2008 ikasturtean haurrak onartzeko prozedura arautzea, ondoko badintza hauei jarraikiz:
1.-Ikastetxe horietan tokia eskatzen ahalko dute 2005. eta 2006. urteetan jaiotako haurren guraso edo tutoreek, hala nola 2007an sortutakoenek, baldin eta haien jaoitza 2007/2008 ikasturtea hasteko eguna baino 16 aste lehenagorako, gutxienez, aurreikusten bada. Bularreko haurrendako instalaziorik ez duten zentroetan, 2005eko urtarrilaren 1etik 2006ko abenduaren 31ra bitarte jaiotako haurrendako tokia eskatzen ahalko da. Ikastetxeetan hasteko beharrezkoa da gutxienez 16 aste beteak izatea.
2.-Ebazpen honetan ezarritako prozedura ikastetxean matrikulaturik ez dauden haurrei aplikatuko zaie. Ikastetxe baten barruan maila batetik beste batera igarotzeko ez da onarpen prozesurik egin behar.
3.-Toki entitate bakoitzak, indarreko arauekin bat, ikastetxe bakoitzean aurreikusten diren toki hutsen kopurua ezarriko du eta haurrak onartzeko eraginpeko eremu geografikoa zehaztuko.
4.-Toki entitate bakoitzak hautapen batzorde bat osatuko du onarpen prozesuan erabili beharreko inprimaki ofizialak prestatu eta deialdia herriko ikastetxe guztietarako ebazteko.
5.-Hautapen Batzordeak, ezarritako ratioak kontuan hartuz, bete beharreko tokiak zehaztuko ditu eta onarpen prozesuan aplikatu beharreko baremoa 2007ko martxoaren 12an argitaratuko du ikastetxeko eta toki entitateko iragarki oholetan.
6.-Eskaerak ikastetxean edo udaletxean jaso eta aurkezten ahalko dira, 2007ko apirilaren 1etik 30era bitartean. Ordutegi edo hizkuntz eredu bat baino gehiago izanez gero, eskatzaileek horietatik zein lehenesten dituzten adierazi beharko dute.
7.-Onartuen behin-behineko zerrendak eta behin-behineko itxaron zerrendak ikastetxeko eta udaletxeko iragarki oholetan jarriko dira 2007ko maiatzaren 21ean, baldintza hauetako 5. puntuan ezarritako baremoa aplikatu ondoren lortutako puntuazioaren hurrenkerari jarraikiz.
8.-Erreklamazioak udaletxean aurkeztuko dira, Hautapen Batzordeari zuzenduta, behin-behineko zerrendetan agertutako puntuazioa berrikusteko zergatik eskatzen den azalduz. Aurkezteko epea 2007ko maiatzaren 21ean hasi eta ekainaren 1ean bukatuko da.
9.-Onartuen behin betiko zerrendak eta behin betiko itxaron zerrendak 2007ko ekainaren 8an argitaratuko dira ikastetxeko eta udaletxeko iragarki oholetan, lortutako puntuazioaren hurrenkeraren arabera.
10.-Eskabideak toki entitateetan egonen den eredu ofizialaren araberakoak izanen dira, eta haiekin batera ondoko dokumentazioa aurkeztuko da:
a) Lan egoera eta/edo ikasketak frogatzeko agiriak.
-Aitaren eta amaren 2007ko martxoko nomina edo lan egoeraren frogagiriak edo Gizarte Segurantzan altan izatearena, araubide orokorrekoa zein autonomokoa izan.
-Ikasten arituz gero, matrikularen frogagiria, ikasturteko egutegia eta ordutegia.
b) Familiaren osaera frogatzeko agiriak:
-Familia liburuaren fotokopia (gurasoak eta seme-alabak).
-Familia ugariaren dokumentu ofizialaren fotokopia.
-Haurra kenduta, familia unitateko beste edozein kideren minusbalioaren ziurtagiria.
c) Errenta mailak frogatzeko agiriak.
-Aitaren eta amaren azken errentaren aitorpenaren fotokopia. Aitorpena egin beharrik ez badute, beharkizun horretatik salbuetsita daudela frogatzeko agiria aurkeztu beharko dute, Nafarroako Gobernuak sinatua, eta horrekin batera, lan bizitzaren txostena eta familiak 2005. urtean izan dituen dirusarrerak finkatzeko agiriak, edo 2006. urtekoak, onarpen prozesua 2007ko ekainaren 30etik aurrera hasten bada.
-Interesatuak bi aukera izanen ditu: edo dokumentazioa berak aurkeztea, edo toki entitateari baimena ematea Nafarroako Foru Komunitateko Administrazioaren barrenean eskumena duen unitate organiko edo departamentuari behar den dokumentazioa eska diezaion. Baimen hori instantzia bidez eman beharko da, deialdian dokumentazioa aurkezteko ezartzen den epearen barrenean, eta agiria noiz eta zein organotan aurkeztu zen finkatu beharko da.
d) Etxea edo aitaren nahiz amaren lantokia hurbil izatearen frogagiriak.
-Aitaren edo amaren erroldatze agiria, baita haurrarena ere, Udalak emana.
-Haurrarentzako postua eskatzen den Haur Hezkuntzako lehen zikloko ikastetxe berean lanean ari dela frogatzen duen agiria, zentroko zuzendaritzak emana.
-Aitaren edo amaren lantokia zein den frogatzen duen dokumentazioa.
e) Zuzenean sartzeko baldintza bereziak betetzen direla frogatzen duen dokumentazioa.
-Haurraren minusbalioa kalifikatzeko ziurtagiria eta/edo profesional batek egindako txostena, dituen ezaugarriengatik hezkuntza berezia behar duela dioena.
f) Jaio gabeko haurrak: gutxi gorabehera noiz jaiotzekoa den zehazten duen ziurtagiria (gehienez 16 aste ikasturtea hasi baino lehen).
g) Beste edozein inguruabar berezi baloratzeko, medikuaren, psikologoaren, gizarte-langilearen edo zerbitzu espezializatu ofizialen txostena aurkeztu beharko da, inguruabar hori frogatzeko.
Alegatzen den egoerari buruzko ziurtagiriak aurkezten ez badira, 0 bat jarriko da onarpen baremoan dagokion atalean.
Eskabidean edo gainerako dokumentazioan jarritako datuak faltsuak badira, emandako plaza kentzen ahalko da.
Hautapen Batzordeak zilegi izanen du edozein momentutan ziurtagiri gehiago eskatzea hautapen baremoan puntuazioa duten egoerei buruz.
11.-Eskabideak baloratu eta tokiak esleitzeko, haurren guraso edo tutoreek aurkeztutako dokumentazioaren arabera, Hautapen Batzordeak ondoko baremoa aplikatuko du:
BAREMOA
a) Gurasoen lan egoera (15 puntu gehienez):
a.1) Haurren gurasoak edo tutoreak ondoko egoeretako batean daudenean, 15 puntu.
-Gurasoak edo tutoreak lanaldi osoan biak.
-Guraso edo tutoreetako bat lanaldi osoan eta bestea dedikazio handia behar duten ikasketa arautuak egiten ari denean, egunez, behar bezala frogaturik.
-Aita eta ama dedikazio handia behar duten ikasketa arautuak egiten ari direnean, egunez, behar bezala frogaturik.
a.2) Haurren gurasoak edo tutoreak ondoko egoeretako batean daudenean, 11 puntu.
-a.1 atalean zehaztutako egoerak, baina dedikazio partziala izanik.
-Aita edo ama jardunaldi osoan lanean edo ikasten eta bestea jardunaldi partzialean.
a.3) Lan egoeraren kontzeptuari buruzko zehaztapenak:
a.3.1. Gizarte Segurantzan alta eman edo lizentzia fiskalik izan gabe egindako lana ez da kontatuko.
a.3.2. Nominarik edo Gizarte Segurantzarik ez duten lanbide liberalen kasuan, lanbidean aritzeari buruzko frogagiria edo lizentzia fiskala aurkeztuko da.
a.3.3. Martxoan lan egina bada eta nominarik edo hilabete horretan aritu izana erakusten duen agiririk ez bada, apirileko lan jardueraren agiria onartuko da, alegia: lan-kontratua, Gizarte Segurantza, etab. edo bestela, lan bizitzaren ziurtagiria.
a.3.4. Eszedentzian baldin badago, eszedentziaren jakinarazpena aurkeztuko da eta idatziz azalduko da lanera itzuliko dela ikasturtea hasi baino lehen. Seme-alaba baten jaiotzagatik lanean ez egotea, lanpostu finkorik izan gabe, hau da, ordezkoen zerrenden eta antzekoen kasuetan, ez da eszedentziatzat hartuko.
a.3.5. Lanaldiaren mota baloratzeko, lanaldi osotzat hartzen da lanaldi erdia baino gehiago hartzen duena.
a.3.6. Ikasketak baloratzeko, ikasketa araututzat hartzen dira titulu akademiko ofizialak eskuratzeari begira egiten direnak (DBH, Batxilergoa, Lanbide Heziketa, unibertsitateetako titulazioak eta abar).
b.1) Familiaren osaera (8 puntu, gehienez)
-Bikiak, hirukiak, laukiak...., edo 6 urtez beheitiko hiru seme-alaba edo gehiago: 6 puntu
-Adin desberdineko bi anai-arrebarentzat edo gehiagorentzat tokia eskatzea deialdi berean (tokiaren erreserba sartzen da): 4 puntu.
-Familia ugaria izatea: puntu bat.
-Haurraz aparte, familia unitateko edozein kideren minusbaliotasun fisiko, psikiko edo sentsoriala onartua izatea, puntu bat.
b.2) Familiaren osaeraren kontzeptuari buruzko zehaztapenak:
b.2.1. Atal honetan lortutako puntuazioen baturak gehieneko puntuazioa gainditzen baldin badu, 8 puntu emanen dira.
b.2.2. Familia unitatearen kideen kopurua Familia liburuaren bidez egiaztatuko da. Familia gunean Familia liburuan ageri ez diren seme-alabak baldin badaude, bestelako dokumentuen bidez egiaztatu beharko dira, adibidez, jaiotza agirien, banantze edo dibortzioko epaien eta abarren bidez.
b.2.3. 6 urtez beheitiko hiru seme-alaba edo gehiago daudela ezartzeko, 2001eko urtarrilaren 1etik aurrera jaiotako seme-alabak hartuko dira kontuan.
b.2.4. "Bi anai-arrebarentzat edo gehiagorentzat tokia eskatzea deialdi berean" kontzeptuagatik emandako puntuazioa galdu eginen da matrikula egiterakoan berresten ez bada.
c.1) Errenta maila (12 puntu, gehienez): urteko per capita errentaren arabera baloratuko da:
2.699,99,99tik beherako per capita errenta: 12 puntu.
2.700 eta 3.199,99 euro bitareko per capita errenta: 11 puntu.
3.200 eta 3.799,99 euro bitarteko per capita errenta: 10 puntu.
3.800 eta 4.499,99 euro bitarteko per capita errenta: 9 puntu.
4.500 eta 6.199,99 euro bitarteko per capita errenta: 8 puntu.
6.200 eta 6.999,99 euro bitarteko per capita errenta: 7 puntu.
7.000 eta 7.999,99 euro bitarteko per capita errenta: 6 puntu.
8.000 eta 9.399,99 euro bitarteko per capita errenta: 5 puntu.
9.400 eta 10.899,99 euro bitarteko per capita errenta: 4 puntu.
10.900 eta 12.899,99 euro bitarteko per capita errenta: 3 puntu.
12.900 eta 14.999,99 euro bitarteko per capita errenta: 2 puntu.
15.000 euroko errentak edo gehiagokoak: puntu 1.
c.2) Errenta mailen kontzeptuari buruzko zehaztapenak:
c.2.1. Kasu guztietan, aitaren eta amaren aitorpenak hartuko dira aintzat, bereizi nahiz dibortziatzeko epaia edo ezkontzaz kanpoko seme-alabarentzako legezko neurriak daudenean izan ezik. Kasu horietan haurraren zaintza eta ardura duen gurasoaren aitorpena hartuko da aintzat, eta haren zerga-oinarriari epaian ezarritako urteko diru kopurua erantsiko zaio.
c.2.2. Urteko per capita errenta kalkulatzeko eragiketa hau eginen da: aitaren eta amaren PFEZren zerga-oinarria, edo bestela haien dirusarrera justifikatu guztiak, zati eskaera egiten denean familiak duen kide kopurua, eskatutako plazaren xede den haurra barne.
d) Aitaren edo amaren etxearen edo lantokiaren hurbiltasuna (gehienez ere 50 puntu).
-Eskatzen den ikastetxea dagoen herrian bizitzea, 45 puntu.
-Aitaren edo amaren lantokia non dagoen:
-Eskatzen den ikastetxean berean: 45 puntu.
-Eskatzen den ikastetxea dagoen herri berean, 5 puntu.
e) Bestelako irizpideak. Hautapen Batzordeak beste behar larri batzuk, pertsonalak, familiakoak edo sozialak, behar bezala frogatuak eta aurreko ataletan bildu gabeak, hartzen ahal ditu kontuan; 10 puntu, gehienez ere.
f) Baremoko ataletan xedatutakoa gorabehera, hezkuntza premia bereziak dituzten haurrak zuzenean sartuko dira 0 eta 3 urte bitarteko haurrendako ikastetxeetan.
g) Baremoa aplikatuta, adin talde bakoitzeko azken tokia eskaintzean berdinketa gertatuz gero, irizpide hauek aplikatuko dira, bata bestearen ondoren:
-Per capita errenta txikiena.
-Adin handiena.
12.-Matrikulak toki entitateak finkatzen duen tokian eginen dira, 2007ko ekainaren 8tik 15era.
13.-Matrikula egiteko honako dokumentazio hau aurkeztu beharko da:
-Aitaren eta amaren NANaren, pasaportearen edo gidabaimenaren fotokopia.
-Gizarte Segurantzako kartillaren edo txartelaren fotokopia, haurra inskribatua dela frogatzeko.
-Pertsona Fisikoen Errentaren gaineko Zergaren 2006. urteko aitorpenaren fotokopia edo, bestela, 2006. urtean lortutako dirusarreren frogagiriak, aitarenak zein amarenak. Agiri hori aurkezteko epea 2007ko uztailaren 1ean bukatuko da.
-Errezibuak helbideratuko dituen banku entitateko kartilla orriaren fotokopia, titularra eta zenbakia agertzen dituena.
-Jateko edo osasuneko behar bereziak izanez gero, haiek biltzen dituen txosten medikoa.
14.-Ezarritako epean egiten ez diren matrikulen ondorioz, beste adjudikazioaldi bat eginen da itxaron-zerrendako ordenari jarraituz.
15.-Tarifak familien 2007/2008 ikasturteko tarifak arautzeko Hezkuntza Departamentuak onetsitako araudian ezarritakoaren arabera aplikatuko dira.
16.-Itxaron zerrendan sartutako haurrek tokiren bat hutsik gelditzen denean egiten ahalko dute matrikula, zerrendan ageri den hurrenkerari zorrozki jarraikiz.
17.-Ikasturtea hasi eta hamabost egun natural iraganik ikastetxera azaltzen ez den haurrari baja emanen zaio; orobat, ikastetxean hasi eta, jakinarazpen edo frogagiririk gabe, hamabost egun naturalean jarraian agertzen ez denari.
Aurreko egoera horietan, Udalak idatziz jakinaraziko dio familiari ikastetxean baja eman zaiola haurrari.
18.-Haurren gurasoek edo tutoreek idatzita jakinaraziko dizkiote ikastetxeko zuzendaritzari ikasturtean gertatzen diren borondatezko bajak, kuotak ordaintzeari noiztik aurrera utziko dioten finkatzeko.
19.-Ikasturtea hasita delarik, eskaera berriak aurkezten ahalko dira, hots, horretarako ezarritako ohiko epetik kanpo, hurrengo ikasturterako epea hasi arte, betiere haurrek 16 aste bete badituzte, edo bularreko haurrendako instalaziorik ez duten zentroetan, eskaera egiten den unean 12 hilabete badituzte.
Eskaera horiek kontuan hartuko dira tokiren bat hutsik gelditzen bada, onarpen prozesu arruntean sortutako itxaron zerrenda agortu ondoren. Tokiak eskaera aurkeztu ziren egunaren arabera esleituko dira.
20.-Toki entitateek, hala behar baldin bada, 2006/2007 ikasturtean ikastetxera joan diren haurrentzat tokia erreserbatzeko epea eta prozedura ezartzen ahalko dituzte eta, orobat, ebazpen honen 4., 5., 6., 7., 8., 9. eta 12. ataletan aipatutako epeak egokitzen ahalko dituzte. Era berean, Hezkuntza Departamentuaren baimena izanez gero, baremoa moldatzen ahalko dute, baina betiere atal hauek sartu beharko dira:
-Gurasoen lan edo ikasketa egoera.
-Familiaren osaera.
-Errenta mailak, familia unitateko kideen kopuruaren arabera.
-Aitaren eta/edo amaren helbidearen edo lantokiaren hurbiltasuna, ikastetxearen eragin eremuaren barruan.
21.-Sarbide zuzena emateko, edozein kasutan, beharrezkoa izanen da Hezkuntza Departamentuak adostasun txostena ematea, alde batera utzita eskaerekin batera aurkezten diren txostenak.
Bigarrena
Ebazpen hau Nafarroako Aldizkari Ofizialean argitaratzea.
Hirugarrena
Ebazpen honen aurka gora jotzeko errekurtsoa jartzen ahal da, Hezkuntza kontseilariari zuzendua, argitaratu eta biharamunetik hilabeteko epean.
Laugarrena
Ebazpen hau igortzea Eskola Antolamendu eta Berriztapenerako Zerbitzura, Zerbitzuak Ikuskatzeko eta Ikuskapen Teknikorako Zerbitzura, Ikastetxeen eta Ikasketetarako Laguntzen Zerbitzura, Dibertsitate, Kultura-aniztasun eta Immigraziorako Zerbitzura eta Haur Hezkuntzako lehen zikloko ikastetxeen Programari, behar diren ondorioak izan ditzan.
