navarra.es
Castellano | Euskara | Français | English
Ezagutzera eman
51/2009 Ebazpena, otsailaren 20koa, Antolamenduaren, Kalitatearen eta Berrikuntzaren zuzendari nagusiak emana, Nafarroako Foru Komunitatean funts publikoen bidez finantzaturiko ikastetxeetako Lehen Hezkuntzan eta Bigarren Hezkuntzako eskolako ...
51/2009 EBAZPENA, otsailaren 20koa, Antolamenduaren, Kalitatearen eta Berrikuntzaren zuzendari nagusiak emana, Nafarroako Foru Komunitatean funts publikoen bidez finantzaturiko ikastetxeetako Lehen Hezkuntzan eta Bigarren Hezkuntzako eskolako laguntza emateko programaren eta Bigarren Hezkuntzako hezkuntza indartze eta sostengatze programaren antolaketa eta jarduna arautzeko jarraibideak ematen dituena
(2009ko 29. NAOn argitaratutako testua, martxoaren 9an)
Atarikoa
Hezkuntzari buruzko maiatzaren 3ko 2/2006 Lege Organikoak, atarikoan, ezartzen du aniztasunari arreta eskaintzearen printzipioak oinarrizko hezkuntza guztia iradoki behar duela. Horrela, ikasle guztiei beren ezaugarriei eta beharrei egokitutako hezkuntza emanen zaie.
Lehen Hezkuntzan ikasleen aniztasunari arreta berezia jarriko zaio ikaskuntzako zailtasunei aurrea hartzeko, eta zailtasunak aurkitu bezain laster ekin beharko zaio, ikaskuntza sendotzeko tresnei hasiera emateko.
Bigarren Hezkuntzako etapan printzipio hori ikasle guztiendako hezkuntza bateratuarekin lotu beharko da. Halaber, ikasteko zailtasunak, ezgaitasun iraunkorra edo goi mailako gaitasuna dituzten ikasleei eta hezkuntza sisteman berandu sartzen direnei laguntzeko antolaketa eta curriculum arloetako neurriak hartu beharko dira.
Xedatzen ere du hezkuntza administrazioek jarri beharko dituztela baliabide eta tresnak hezkuntza sostenguaren berariazko beharrak ikasleak hezkuntza etapa guztietan erabat sar eta integratu daitezen, kontuan hartuz familiek parte hartuko dutela ikasle horien eskolatzea eta hezkuntza prozesuak ukitzen dituzten erabakietan.
Hezkuntzako kontseilariak, ekainaren 13ko 93/2008 Foru Aginduaren bidez, Nafarroako Foru Komunitateko Haur eta Lehen Hezkuntzako eta Bigarren Hezkuntzako ikastetxeetan aniztasunari nola erantzun arautu zuen.
Foru agindu horren V. kapituluaren 28. artikuluaren 2. puntuan, Lehen eta Bigarren Hezkuntzako ikastetxe publikoetan eskolako laguntza emateko programa sortzen da; artikulu beraren 3. eta 4. puntuetan Derrigorrezko Bigarren Hezkuntzako institutuetan eta Bigarren Hezkuntzako institutuetan eskolako laguntza emateko programa eta indartze eta sostengatze programa sortzen dira, hurrenez hurren.
Lehen Hezkuntzako eta Bigarren Hezkuntzako eskolako laguntza emateko programen xede nagusia hezkuntza giroari dagokionez desabantailan dauden ikasleen eskolako perspektiba hobetzea da, eskolatik kanpoko orduetako lan edo sostengu antolatuaren bidez.
Bigarren Hezkuntzako indartze eta sostengatze programaren funtsezko xedea eskolako atzerapen metatuaren eta gizarteratze kaxkarraren ondorioz arlo gehienetan zailtasunak dituzten ikasleen ikaskuntza hobetzea da. Izan ere, ikasle horiek absentismorako eta eskolara joateari uzteko arriskua izaten dute.
Aniztasunaren, Orientazioaren eta Kultura-aniztasunaren Zerbitzuko zuzendariak aldeko txostena aurkeztu du Nafarroako Foru Komunitatean funts publikoen bidez finantzaturiko ikastetxeetako Lehen Hezkuntzan eta Bigarren Hezkuntzako eskolako laguntza emateko programaren eta Bigarren Hezkuntzako hezkuntza indartze eta sostengatze programaren antolaketa eta jarduna arautzeko jarraibideak onesteko.
Hori horrela, Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 d) artikuluak ematen dizkidan ahalmenak erabiliz, ebatzi dut:
1. Nafarroako Foru Komunitatean funts publikoen bidez finantzaturiko ikastetxeetako eskolako laguntza emateko programaren eta hezkuntza indartze eta sostengatze programaren antolaketa eta jarduna arautzeko jarraibideak onestea. 1., 2. eta 3. eranskinetan ageri dira.
2. Ebazpen hau eta beronen eranskinak igortzea Aniztasunaren, Orientazioaren eta Kultura-aniztasunaren Zerbitzuari, Hezkuntzako Ikuskapen Zerbitzuari, Antolamendu eta Berrikuntza Zerbitzuari, Ikastetxeen eta Ikasketetarako Laguntzen Zerbitzuari, Langileriaren Kudeaketarako Atalari eta Kultura-aniztasunaren Atalari, behar diren ondorioak izan ditzaten.
3. Ebazpen hau Nafarroako Aldizkari Ofizialean argitara dadila agintzea.
1. ERANSKINA. Lehen Hezkuntzan eta Bigarren Hezkuntzako eskolako laguntza emateko programa
1. Programaren xedea.
Programaren xedea Lehen Hezkuntzako azken zikloan edo Derrigorrezko Bigarren Hezkuntzako lehen mailetan hezkuntza giroari dagokionez desabantailan dauden ikasleen eskolako perspektiba hobetzea da, eskolatik kanpoko orduetako lan edo sostengu antolatuaren bidez, oinarrizko trebetasuna eskuratzeko, irakurtzeko ohitura hobetzeko eta ohiko lan erritmoari osorik eta arlo guztietako eskakizunei lotzeko.
2. Xede diren ikasleak.
Eskuarki, Lehen Hezkuntzako 5. eta 6. mailetako eta Derrigorrezko Bigarren Hezkuntzako 1. eta 2. mailetako ikasleak izanen dira onuradunak, ikasteko zailtasuna dutenak, bereziki kontu hauek horrekin loturik daudenean:
-Atzerapena norbera heltzeko prozesuan.
-Integrazio gutxi taldean eta ikastetxean.
-Lanerako ohituren eskasia, ikasteko motibazioaren urritasuna, eta abar.
-Atzerapena ikaskuntzan, oinarrizko arlo instrumentaletan.
Eskuarki, ikasle onuradunek ezin izanen dute behar adinako sostengu edo laguntza hartu familian berean. Hala ere, posible izanen da familiak espresuki konpromisoa har dezala programan parte hartzeko.
3. Ikasleak hautatzeko irizpideak.
Tutoreek eta irakasle taldeek proposatuko dituzte programan parte hartuko duten ikasleak, zuzendaritza taldearekin eta orientatzailearekin elkarlanean, irizpide hauek kontuan hartuz:
-Lan ordutegi zabaleko familietako ikasleak, ordutegi horrek seme-alabei ikasten eta etxeko lana egiten laguntzea eragozten dienean.
-Familian ikasteko egokiak diren baldintzak biltzen ez dituzten ikasleak.
Gainera, bestelakoak hartzen ahalko dira kontuan:
-Curriculumean atzeraturik egonik ere, ikasteko interesa eta motibazioa adierazten duten ikasleak.
-Irakas-hizkuntza ez dakiten ikasleak edo gutxi darabiltenak.
-Irakurri eta idazteko trebetasuna gutxi landu duten ikasleak.
-Eskola absentismorako arriskua duten ikasleak: pasiboak, familian espektatiba gutxi dutenak, klasera tarteka-marteka doazenak eta abar.
4. Programaren bilakaera.
Programa antolatzen duen Lehen Hezkuntzako ikastetxeek ikasle talde bat edo gehiago antolatuko dituzte. Horiek eskolaz kanpoko ordutegietan joanen dira ikastetxera, hiru egunez astean gutxienez. Hor laguntzako hiruzpalau saio hartuko dituzte, ikastetxean erabakitzen den antolaketaren arabera.
Programa antolatzen duen Bigarren Hezkuntzako ikastetxeek bi ikasle talde antolatuko dituzte. Horiek eskolaz kanpoko ordutegietan joanen dira ikastetxera, bi egunez astean gutxienez. Hor laguntzako lau saio hartuko dituzte.
Laguntzako saioak, ondorio guztietarako, irakastordutzat joko dira irakasleendako, eta ikastetxean nahitaez egoteko orduetatik aparte eginen dira. Ikastetxeek, aniztasunari kasua emateko antolaketa arloko neurrien esparruan, irakaskuntza kudeatzeko autonomiaren arabera, erabakiko dute nola planifikatu eta proposatu.
Talde bakoitzean gehienez ere 12 ikasle izanen dira.
Ikastetxeek irekirik edukiko dute eskolako liburutegia, ikasleen eskura, programak dirauen orduetan.
Familiek espresuki konpromisoa hartuko dute beren seme-alabei eragiteko, ikastetxeetan maiz joan daitezen eta programa aski aprobetxa dezaten, eta dei egiten diren bilera eta elkarrizketetara joateko.
Ikasleek, ikasturtean, programa uzten ahalko dute eta beste batzuk sartzen ahalko dira bertan.
Ikasleek programa uzten ahalko dute:
-Arrazoirik eman gabe absentismoa gertatzen denean (saioen %20tan).
-Ikasle zein irakasleekin gaizki portatzen direnean.
-Jarrera pasiboa dutenean, irakasleen jarraibideei kasurik egin gabe.
5. Ikasleak eta haien eginkizunak.
Programa garatzen duten irakasleek gidatu eta orientatzeko eginkizunak burutuko dituzte eta behar diren materialak banatuko, bidezkoak badira. Zalantzak argituko dituzte eta lagunduko dute jarrerak, balioak eta denbora antolatzeko ohitura garatzen, lana planifikatzen eta prestatzen, eta arreta, kontzentrazioa eta erantzukizuna jorratzen.
Ez da behin ere programa aurrera eramaten duten irakasleen egitekoa izanen irakasleak eta tutoreak ordeztea, edo haien irakaskuntza eta haien eginkizunak bikoiztea, horien lana osatzea baizik, ikasleei ikastetxean izan ditzaketen edonolako zailtasunak konpontzen lagunduz.
Ikastetxeko irakasle bat edo bi arduratzen ahalko da talde bakoitzeko laguntzaz eta sostenguaz. Kultura-aniztasunaren Atalak aholkularitza eta prestakuntza egokia emanen die irakasle horiei.
6. Gelako programazioa.
Programa irakasten duten irakasleek gelako programazioa prestatuko du, oinarrizko gaitasuna garatzeko neurriak bilduko dituena, atal hauei jarraituz:
a) Testuingurua eta justifikazioa.
b) Taldearen orotariko helburuak.
c) Edukia.
-Denbora antolatu eta planifikatzea.
-Ikasketa eta eginkizunak.
-Ikasteko teknikak.
-Gaitasunak.
d) Metodologia. Epeak. Asteko ordutegia.
e) Langileak eta baliabideak. Bibliografia.
f) Ebaluazioa: hasieran, eten gabe eta bukaeran.
g) Familiekiko harremanak. Elkarrizketak. Epeak.
Programazioa institutu edo ikastetxeko ikasketa buruak eduki beharko du. 3. eranskinean azaltzen den laburpen-fitxa Kultura-aniztasunaren Atalera bidali beharko da, azaroaren lehen hamabostaldian.
7. Programa ezartzeko ikastetxeak zein irizpiderekin aukeratuko diren.
Programa, kultura aniztasunari eman beharreko erantzunaren arloaren barrenean, Hezkuntza Departamentuak erabakitzen duen Lehen edo Bigarren Hezkuntzako ikastetxeetan gauzatuko da, honako irizpide hauei jarraikiz:
-Programa planifikatu eta garatzeko interesa adierazi duten ikastetxeak.
-Hezkuntza sostengurako berariazko beharrak dituzten ikasleak dituzten ikastetxeak, programan laguntza eman dakiekeenak.
Hezkuntza Departamentuak programa ikastetxe batean segitzea edo beste batera eramatea erabakitzen ahalko du, ikasleek ikasturte bakoitzean dituzten premiak aztertu eta gero.
2. ERANSKINA. Bigarren Hezkuntzako indartze eta sostengatze programa
1. Programaren xedea.
Programak xede hauek ditu: ikasleek ikaskuntza hobetzea, haien eta haien familien ikastetxearekiko harremanak eta partaidetza sustatzea, absentismoa gutxitzeko eta eskola ez uzteko.
2. Xede diren ikasleak.
Derrigorrezko Bigarren Hezkuntzako ikasleak, betebehar hauek betetzen dituztenak:
-Arlo gehienetan ikasteko zailtasunak izatea, lan egiteko ohiturarik ez izategatik, ikasteko motibazio gutxi izateagatik, eskolan metaturiko atzerapenagatik eta gizarteratze kaxkarra izateagatik.
-Gelan jarduera pasiboa izatea, familiaren perspektiba gutxi izatea, tarteka-marteka agertzea eta, horregatik, absentismorako eta eskolara joateari uzteko arriskua izatea.
3. Ikasleak hautatzeko irizpideak.
Tutoreek eta irakasle taldeek proposatuko dituzte programan parte hartuko duten ikasleak, ikastetxeko zuzendaritza taldearekin eta orientatzailearekin elkarlanean.
Ikasleak irizpide hauek kontuan hartuz hautatuko dira:
-Curriculumari dagokionez, atzeratu xamar dabiltzan ikasleak, bi ikasturte edo gehiago, arlo instrumentaletan.
-Espektatiba akademiko gutxi duten ikasleak, ohiko jardueretan gutxi parte hartzen dutenak, lanerako ohiturarik ez dutenak eta abar.
-Eskolako ohiko jardueretara egokitzerik ez duten ikasleak, berariazko sostengua dutenak.
-Absentismoa duten ikasleak eta eskolara joateari uzteko arriskua dutenak.
4. Programaren bilakaera.
Ikastetxeek ikasle guztien, bereziki, eskolan desabantaila nabarmenean daudenen, emaitzak hobetzeko duten gaitasunean eragin garrantzitsua duten hiru esparrutan burutuko da esku-hartzea. Hona hemen hiru esparru horiek:
-Ikastetxea bera, antolaketa eta jarduna aldatuz, baita ikasle guztien hezkuntza erantzuna antolatzeko dituen prozedura eta baliabideak ere.
-Familiak, ikastetxearekiko harreman estuagoak lortzeko eta haien seme-alaben hezkuntza sustatzeko eta bertan parte hartzeko.
-Ikastetxeko giroa, auzoko edo herriko eskolaz kanpoko hezkuntza eskaintza eta gizarte zerbitzu oinarrizkoekiko eta bestelako entitateekiko lankidetza kontuan hartuz.
Indartze eta sostengatze programa garatzen duten ikastetxeek ikasturterako prestatuko dute esku-hartzeko proiektua, gutxienez atal hauek bilduko dituena:
-Proposaturiko indartze eta sostengatze programaren ereduaren justifikazioa.
-Programaren helburuak.
-Esku-hartzearen jarduketa eta esparruak.
-Programaren antolaketa: baliabideak eta langileak.
-Jarraipen eta ebaluazio adierazpenak: hasieran, eten gabe eta bukaeran.
Ikastetxeek prestaturiko proiektua azaroaren lehen hamabostaldian igorriko da Kultura-aniztasunaren Atalera.
Programa garatzen duten ikastetxeek, oro har, helburu, zehatz, pedagogiko eta sozializaziokoekin banatu eta antolatuko dituzte ikasleak. Ikastetxearen barruan ez da talde itxi bat izanen, ez eta bereizia ere, eta, programako irakasleek erabakirik, orientatzailearekin eta ikasketaburuarekin adosturik, sar-ateratzeak izaten ahalko dira.
Ikasleek programa utziko dute jarrera kaltegarri etengabe bat dutenean, gelako dinamika hausten duena, eta jarduera pasiboa adierazten dutenean, irakasleen jarraibideei kasurik egin gabe. Ikasle horiek aldez aurretik orientazioko eta tutoretzako esku-hartzea hartu dutela, aldatzeko jarrera sustatuko duena eta programatik ateratzea eragotziko diona.
Programa garatzen duten irakasleek gehienez ere 12 ikasleko taldearekin eginen dute lan, 14 saiotik 16 saiora bitarte, batez beste, ikastetxean berean toki egoki bat edukirik.
Taldekatzea malgua izanen da osaerari dagokionez eta unean-unean egokia. Ikasleek bertan egiten dituzten aurrerapausoen arabera iraunen dute.
Programan dirauten bitartean, arlo instrumentaletako oinarrizko edukiak ikasten eta beren gaitasunak garatzen lagunduko zaie. Gainera, gaitasunak eta denbora antolatzeko ohiturak sustatuko dira, lana planifikatzekoak, lana egiteko eta aurkezteko kalitatea eta hura prestatzeko arreta eta ahaleginak.
Ikastetxeek familiei espresuki konpromisoa eskatuko diete beren seme-alabei eragiteko, ikastetxeetan maiz joan daitezen eta programa aski aprobetxa dezaten, eta dei egiten diren bilera eta elkarrizketara joateko.
5. Ikasleak eta haien eginkizunak.
Talde batean garatzen den programa ikastetxeko irakasle batek edo bik eramaten ahalko dute aurrera. Eginkizun hauek izanen dituzte:
-Hezkuntza arloko indartzea eta sostengatzea jasotzen duen talde zehatzari zuzenean irakastea. Aste osoko ordu osagarriak, departamentuaren bilerarako erabiltzen dena izan ezik, programa osatzen duten bestelako neurriak hartzeko erabiliko ditu, bertan parte hartzen duten besteekiko koordinazioa (orientatzaile, tutore, zuzendaritza talde, familia eta gizarte eragileekikoa) barne.
-Programa egituratu, antolatu eta abiarazteko ardura beren gain hartzea, ikastetxeko zuzendaritza talde, orientatzaile eta tutoreekiko elkarlanean.
-Beste irakasleekin elkarlanean aritzea, absentismorako edo eskolara joateari uzteko arriskua duten ikasleen beharrekin bat datozen hezkuntza programak garatzen.
-Familiekin aritzea, tutoreekin elkarlanean, programan kasu ematen zaien ikasleen absentismoa gutxitu eta gizarte eta hezkuntzako integrazioa hobetzeko.
-Ikastetxeko zuzendaritza taldeari ekimenak proposatzea, irakasle, ikasle eta familien arteko bizikidetza eta berrigunea sustatzen dutenak.
-Herri edo auzo horretan diharduten gizarte zerbitzu oinarrizko eta entitateekiko harremanak (elkarte, gobernuz kanpoko erakunde eta abarrekikoak) bideratzea. Ikastetxeak, Gizartearendako Zerbitzuetako irakaslerik badu, horrexek gauzatuko du elkarlana.
Kultura-aniztasunaren Atalak aholkularitza eta prestakuntza egokia emanen die irakasle horiei.
7. Programa ezartzeko ikastetxeak zein irizpiderekin aukeratuko diren.
Programa, kultura aniztasunari eman beharreko erantzunaren arloaren barrenean, Hezkuntza Departamentuak erabakitzen duen Lehen Hezkuntzako edo Derrigorrezko Bigarren Hezkuntzako institutuetan gauzatuko da, honako irizpide hauei jarraikiz:
-Programa planifikatu eta garatzeko interesa adierazi duten ikastetxeak.
-Hezkuntza sostengurako berariazko beharrak dituzten ikasleak dituzten ikastetxeak, programan laguntza eman dakiekeenak.
Hezkuntza Departamentuak programa ikastetxe batean segitzea edo beste batera eramatea erabakitzen ahalko du, ikasleek ikasturte bakoitzean dituzten premiak aztertu eta gero.
3. ERANSKINA. Programazio Didaktikoarekiko adostasun agiria
|
IKASTETXEA: |
HERRIA: |
|
MAILA: |
ESKOLA LAGUNTZARAKO PROGRAMA. |
Programazio Didaktikoak ondoko atal hauek izanen ditu:
(X batez adierazi).
|
|
Testuingurua eta justifikazioa. |
|
Edukiak: azterlana, eginkizunak, ikasteko teknikak, gaitasunak eta abar. |
|
Bibliografia. Material didaktikoak (testu liburuak barne). |
|
|
Taldearen orotariko helburuak. |
|
Metodologia. Epeak. |
|
Ebaluazioa: hasieran, eten gabe eta bukaeran. |
|
|
Antolaketa eta ordutegia. |
|
Langileak eta baliabideak. |
|
Familiekiko harremanak. Elkarrizketak. Epeak. |
|
|
IGIren jarraibide didaktikoak betez egina. | ||||
|
|
Ikasleei jakinarazia helburuei, edukiei eta ebaluazioari dagokienez. | ||||
|
OHARRAK: | |||||
|
| |||||
Programazio didaktikoa aplikatzekoa den arautegian ezarritakoarekin bat egin da, eta bertan adierazitako aginduzko atal guztiak hartzen ditu bere baitan.
Data:
PROGRAMAZ ARDURATZEN DIREN IRAKASLEAK ZUZENDARIAK ONTZAT EMANA
(Izen-deiturak)
KULTURA-ANIZTASUNAREN ATALA.
