navarra.es
Castellano | Euskara | Français | English
Ezagutzera eman
373/2008 Foru Agindua, azaroaren 25ekoa, Berrikuntza, Enpresa eta Enplegu kontseilariak emana, Nafarroako ekonomia suspertzeko 2009-2011 urteetarako neurriei buruzko azaroaren 6ko 18/2008 Foru Legearen esparruan inbertsioak finantzatzeko ...
373/2008 FORU AGINDUA, azaroaren 25ekoa, Berrikuntza, Enpresa eta Enplegu kontseilariak emana, Nafarroako ekonomia suspertzeko 2009-2011 urteetarako neurriei buruzko azaroaren 6ko 18/2008 Foru Legearen esparruan inbertsioak finantzatzeko hitzartutako kreditu eragiketetarako berme gisako laguntzak emateko araubidea ezartzen duena
(2008ko 154.NAOn argitaratutako testua, abenduaren 19an)
Atarikoa
Nafarroako ekonomia suspertzeko 2009-2011 urteetarako neurriei buruzko azaroaren 6ko 18/2008 Foru Legeak II. kapituluan, Nafarroako Ogasun Publikoari buruzko apirilaren 4ko 13/2007 Foru Legearen 75. artikuluan ezarrita dagoenaren babespean, Nafarroako Gobernuari baimena eman zion gehienez 30.000.000 euro eginen duten abalak emateko, horrela jarduera ekonomikoaren sektore jakin batzuk ardatz dituzten inbertsioak finantzatzen ahalko direlakoan. 11. artikuluan ezartzen denez, Nafarroako Gobernuak erabakitzen ahalko du II. kapituluan aurreikusitako araubidearen menpeko abalak helbide fiskala Nafarroan duen elkarren bermerako sozietate batek ematea; horretarako, sozietate horrekin itunduko dira baldintzak, zeinetan Nafarroako Gobernuak abal-emaileordearen izaera izanen baitu.
Nafarroako Gobernuak, 2008ko azaroaren 24ko Erabakiaren bidez, azaroaren 6ko 18/2008 Foru Legearen 6.d) artikuluan ezarrita dagoenaren arabera, Nafarroako ekonomiarentzat interes berezia izateagatik laguntza horiek eskuratzen ahal dituzten proiektuak zehaztu ditu. Laguntza hauek banakako ebaluazioaren bidez tramitatzeko baimena eman du, Diru-laguntzei buruzko azaroaren 9ko 11/2005 Foru Legearen 17. artikuluan ezarrita dagoenaren arabera. Eta azaroaren 6ko 18/2008 Foru Legearen 11. artikuluan aurreikusitako ondorioetarako, Sociedad Navarra de Garantía Recíproca-rekin lankidetza hitzarmena egitea onetsi du, sozietate hori helbide fiskala Nafarroan duen elkarren bermerako sozietatea den aldetik; sozietate horri dagokionez, Nafarroako Gobernuak abal-emaileordearen izaera izanen du.
Ekonomia eta Ogasun kontseilariak, azaroaren 24ko 205/2008 Foru Aginduaren bidez, berme horiek emateko prozedurazko eta kudeaketazko alderdiak zehaztu ditu, Nafarroako ekonomia suspertzeko 2009-2011 urteetarako neurriei buruzko azaroaren 6ko 18/2008 Foru Legearen 10. artikuluan ezarrita dagoenaren arabera.
Itunaren 87. eta 88. artikuluak "de minimis" laguntzei aplikatzeko moduari buruzko Europako Batzordearen 1998/2006/EE Erregelamenduak baimena ematen du enpresei laguntzak berme gisa Itun horren babespean emateko.
Lehenago azaldu denaren eta Diru-laguntzei buruzko azaroaren 9ko 11/2005 Foru Legearen arabera, bidezkoa da Nafarroako ekonomia suspertzeko 2009-2011 urteetarako neurriei buruzko azaroaren 6ko 18/2008 Foru Legearen esparruan inbertsioak finantzatzeko hitzartutako kreditu eragiketetarako berme gisako laguntzak arautzeko oinarriak ezartzea.
Horrenbestez, eta Nafarroako Gobernuari eta Lehendakariari buruzko abenduaren 3ko 14/2004 Foru Legearen ) artikuluak xedatzen duenarekin bat, agindu dut:
1. Xedea.
1. Foru agindu honen xedea Nafarroako ekonomia suspertzeko 2009-2011 urteetarako neurriei buruzko azaroaren 6ko 18/2008 Foru Legearen esparruan inbertsioak finantzatzeko hitzartutako kreditu eragiketetarako berme gisako laguntzak emateko deialdia eta oinarri arautzaileak ezartzea da.
2. Laguntzen funtsa hau izanen da: Nafarroako Gobernuak azpiabala ematea Foru Agindu honetan ezarritako eskakizunak betetzen dituzten abal eragiketei, baldin eta erakunde laguntzaile gisa jarduten duen Elkarrekiko Bermerako Nafarroako Sozietatearekin hitzartuta badaude.
2. Bermatutako eragiketak.
1. Foru agindu honetan aurreikusitako laguntza jasotzen ahalko dute ondoko inbertsioak finantzatzeko helburua duten eragiketak:
a) Industria inbertsiorako eskualde-xedeko laguntzen araubidean sartzen ahal direnak, Industria eta Teknologia, Merkataritza eta Lan kontseilariak emandako maiatzaren 17ko 155/2007 Foru Aginduan edo hori ordezten duen xedapen batean aurreikusitakoak.
b) Eskualde-xedeko laguntzen mapan sarturik ez dagoen eremuan ETEen industria inbertsiorako laguntzen araubidean sartzen ahal direnak, Industria eta Teknologia, Merkataritza eta Lan kontseilariak emandako maiatzaren 17ko 156/2007 Foru Aginduan edo hori ordezten duen xedapen batean aurreikusitakoak.
2. Leasing bitartez finantzatutako inbertsioek ez dituzte jasoko Foru Agindu honetan araututako laguntzak.
3. Bermatutako eragiketek baldintza hauek bete beharko dituzte:
a) Mailegu edo kredituen xedea 1. idatz-zatian adierazitako inbertsio proiektuak finantzatzea izanen da, eta ez besterik.
b) Abalen zenbatekoa 60.000 eta 600.000 euro bitartekoa izanen da, inbertsio proiektu bakoitzeko. Gehienez ere aurreikusita dagoen eta diruz lagun daitekeen inbertsioaren %60 estaliko dute.
c) Abalen gehieneko indarraldia hamar urtekoa izanen da, ematen diren egunetik aurrera zenbatuta.
4. Nafarroako Gobernuaren azpiabalak ez ditu inola ere estaliko interesak edo erakunde laguntzaileak bermatutako eragiketen ondoriozko beste gastu guztiak.
5. Artikulu honen 1. idatz-zatian adierazitako laguntzetako bat jaso duten eta 2008ko azaroaren 18a baino lehen amaitu ez diren inbertsio proiektuek jasotzen ahalko dute diru-laguntza, baita laguntzen eskabidea 2009ko abenduaren 31 baino lehen aurkeztuta dutenek ere.
3. Onuradunak.
Inbertsio proiektuak Foru Agindu honetan ezarritako baldintzetan burutzen dituzten pertsona fisiko eta juridikoak izaten ahalko dira laguntza hauen onuradunak.
4. Eskaeren aurkezpena eta ekarri beharreko agiriak.
1. Eskabideak ondorio horretarako ezarrita dagoen ereduaren arabera eginen dira, eta inbertsio proiektuaren memoriarekin batera aurkeztu beharko dira.
2. Aurkezteko epea 2009ko abenduaren 31n amaituko da. Eskabide hau eta eskualde-xedeko laguntzei edo ETEentzako laguntzei dagokiena aldi berean aurkeztuko dira, inbertsio proiektu berbererako badira.
3. Eskualde-xedeko laguntzak edo ETEentzako laguntzak Foru Agindu hau argitaratu baino lehenago eskatu badira, Foru Agindu honetan aurreikusitako eskabidea bi hilabeteko epean aurkeztuko da, argitaratzen denetik aurrera zenbatuta.
4. Eskaerak Berrikuntza, Enpresa eta Enplegu Departamentuko erregistroan aurkeztuko dira (Iruñeko Tomás Caballero parkeko 1ean, 31005 posta kodean), edo Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38.4 artikuluan ezarritako lekuetako batean.
Eskabidea posta bulego batean aurkezten bada, gutun-azal ireki batean egin beharko da, lehenengo orriko goiko aldean bulegoaren izena, eguna, tokia eta ordua (minutu eta guzti) adierazi ahal izateko. Datu horiek guztiak gordekinean ere azaldu beharko dira.
5. Laguntzen tramitazioa.
1. Aurreikusitako laguntzak banakako ebaluazioaren prozeduraren bidez tramitatuko dira.
2. Eskabideak jaso ondoren, Enpresa Sustapeneko Zerbitzuak aurkeztutako agiriak egokiak direla egiaztatuko du. Foru agindu honetan eskatzen dena betetzen ez badute, interesatuari eskatuko dio hamar eguneko epean akatsa konpon dezan; halaber, ohartaraziko zaio hala egin ezean bere eskaera baztertu eginen dela, bertan behera utzi duelakoan.
3. Eskabideak eskatzen diren baldintzak betetzen baditu, Enpresa Sustapeneko Zerbitzuak egiaztatuko du eskabideak foru agindu honetan laguntzak jasotzeko ezarrita dagoena betetzen duela eta azpiabalak baimentzeko muga agortu ez dela. Foru aginduan ezarrita dagoena betetzen badu eta muga hori gainditu ez bada, erakunde laguntzaileari bidaliko dio. Betetzen ez badu, edo muga gainditu bada, laguntzak ukatzea ebazten duen proposamena emanen du.
4. Erakunde laguntzaileak eragiketaren finantza azterlana eginen du, eta bidezkoa bada, abala ematea erabakiko du eta Enpresa Sustapeneko Zerbitzuari eskatutako bermea emateko edo ukatzeko erabakien berri emanen dio.
5. Erakunde laguntzaileak abala ematea erabaki badu, Enpresa Sustapeneko Zerbitzuak erabakia Ondare Zerbitzuari bidaliko dio, eta azken horrek bidezkoak diren tramiteak eginen ditu azpiabala emateko eta abala egiteko. Erakunde laguntzaileak eragiketa bermatzen ez badu, Enpresa Sustapeneko Zerbitzuak laguntza ukatzeko proposamena igorriko du.
6. Enpresa zuzendari nagusiak, espedientearen instrukzioaren ondorioz bidezkoa bada, eskabidea ukatzeko edo artxibatzeko ebazpena emanen du. Berariazko ebazpenik eman gabe bi hilabete igaro ondoren, eskabidea ezetsi dela ulertuko da.
7. Aurkeztutako eskaeraren berariazko edo presuntziozko ezespenaren aurka interesdunek zilegi izanen dute gora jotzeko errekurtsoa jartzea, Berrikuntza, Enpresa eta Enplegu kontseilariari zuzendua, administrazio prozedura erkideari buruzko legeriari jarraikiz.
8. Ebazpenaren bitartez eskabidea onesten bada, Nafarroako Gobernuak Gobernuaren Erabakia emanen du. Erabaki horretan, eragiketan abal-emaileorde izatea onartuko du, Nafarroako Ogasun Publikoari buruzko apirilaren 4ko 13/2007 Foru Legearen 76.1 artikuluan aurreikusita dagoenaren arabera.
6. Jarraipena.
Enpresa Sustapeneko Zerbitzuak inbertsio proiektuaren betetze maila egiaztatzeko jarduerak eginen ditu.
7. Onuradunen betebeharrak.
Hona hemen onuradunen betebeharrak:
a) Erakunde laguntzaileari bidezkoak diren diru kopuruak ordaintzea aztertzeko gastuengatik, urteko komisioarengatik eta sozietateko partaidetzak harpidetu eta ordaintzeagatik. Halaber, bermea emateko erabakian ezartzen diren eskakizunak eta gainerako baldintzak bete beharko ditu, baita erakunde laguntzaileak eskatzen dizkion berme pertsonalak, errealak edo kreditu bermeak ere, eta dagokion kontratua sinatu. Kontratu hori eta bermearen xede den mailegu edo kreditua aldi berean eginen dira.
b) Eskualde-xedeko inbertsiorako laguntzak edo ETEentzako laguntzak arautzen dituen araudian ezarrita daudenak, kasu bakoitzean bidezkoa dena.
c) Diru-laguntzei buruzko azaroaren 9ko 11/2005 Foru Legean ezarrita daudenak.
8. Diru-laguntzen bateragarritasuna eta "de minimis" izaera.
1. Foru agindu honetako diru-laguntzak bateragarriak dira Nafarroako Foru Administrazioaren, beste administrazio publiko batzuen eta nazioko zein nazioarteko erakunde publiko edo pribatuen eta norbanakoen diru-laguntzekin. Kasu horretan, ondasun berberetarako emandako laguntzen zenbatekoak laguntzak metatzeko erkidegoko araudian ezarritako mugak ezin izanen ditu gainditu.
2. Deialdiko dirulaguntzak "de minimis" laguntzak dira, Europako Batzordeak abenduaren 15ean eman 1998/2006 Erregelamenduan xedaturikoarekin bat. Erregelamendu hori Tratatuko 87. eta 88. artikuluak "de minimis" laguntzei aplikatzeko moduari buruzkoa da.
9. Arau-hausteak eta zehapenak.
Foru agindu honetan aurreikusitako eragiketei Diru-laguntzei buruzko azaroaren 9ko 11/2005 Foru Legean arau-hauste eta zehapenetarako ezarrita dagoen araubidea aplikatuko zaie.
10. Laguntzak inbertsioari aplikatzea, bermatutako eragiketaren zenbatekoa murrizteko.
1. Eskualde-xedeko laguntzak edo ETEentzako laguntzak ordaindu aurretik, Enpresa Sustapeneko Zerbitzuak finantza-erakundearen egiaztagiria eskatuko du, erakunde laguntzaileak foru agindu honen babespean bermatutako mailegu edo kredituak egun horretan duen egoerari buruz. Mailegu edo kreditu horren saldo bizia diruz lagundutako inbertsio proiektuaren azken kostuaren %60tik gorakoa bada, laguntzaren ordainketa mailegu edo kredituaren gehiegizko zatia murrizteko aplikatzen ahalko da.
2. Foru agindu honetan aurreikusitako laguntzen eskabidea aurkezteak esan nahi du eskualde-xedeko laguntzak edo ETEentzako laguntzak inbertsio proiektu berbererako ematearen ondoriozko kreditua finantza erakunde mailegu-emailearen alde lagatzea onartu dela, aurreko idatz-zatian ezarrita dagoena aplikatzea bidezkoa denean.
11. Errekurtsoak.
Deialdi honen eta deialdirako arauen kontra gora jotzeko errekurtsoa jar daiteke, Nafarroako Gobernuari zuzendua, argitaratu eta biharamunetik hasita hilabeteko epean.
