navarra.es
Castellano | Euskara | Français | English
Ezagutzera eman
81DEP/2011 Foru Agindua, abuztuaren 26koa, Landa Garapen, Industria, Enplegu eta Ingurumeneko kontseilariak emana, enpresa inbertsiorako laguntzen esparruan energia berriztagarrien iturriak aprobetxatzeko diru-laguntza jaso dezaketen jarduerak...
81DEP/2011 FORU AGINDUA, abuztuaren 26koa, Landa Garapen, Industria, Enplegu eta Ingurumeneko kontseilariak emana, enpresa inbertsiorako laguntzen esparruan energia berriztagarrien iturriak aprobetxatzeko diru-laguntza jaso dezaketen jarduerak zehazten dituena
(2011ko 181. NAOn argitaratutako testua, irailaren 13an)
Atarikoa
Berrikuntza, Enpresa eta Enpleguko kontseilariaren azaroaren 10eko 488/2009 Foru Aginduak enpresako inbertsiorako laguntzen araubidea ezarri zuen, eta Enpresako zuzendari nagusiaren azaroaren 11ko 2603/2009 Ebazpenak enpresako inbertsiorako laguntzak emateko oinarri arautzaileak onetsi zituen, haren eskumenen esparruan.
Ebazpen horren 2. oinarriaren 1.b) atalak ezartzen du laguntza horiek jaso ditzaketela honetan aritzen direnek: "Berrikuntza, Enpresa eta Enpleguko kontseilariak apirilaren 16an emandako 195/2009 Foru Aginduan ezarri diren energia berriztagarriko iturriak aprobetxatzea". Berrikuntza, Enpresa eta Enpleguko kontseilariak apirilaren 29an emaniko 140/2010 Foru Aginduak indargabetu zuen 195/2009 Foru Agindu hori, enpresa inbertsiorako laguntzen esparruan energia berriztagarrien iturriak aprobetxatzeko diru-laguntza jaso dezaketen jarduerak zehazten zituena.
Gaur egun, bidezkoa da foru agindu berri bat onestea, diru-laguntza jaso dezaketen jardueren zehaztapena 2020rako Nafarroako III. Energia Planean, Nafarroako Gobernuak 2011ko maiatzaren 9ko Erabakiaren bidez onetsitakoan, ezarritakora egokitzeko, plan horretan ezarritako helburuak eta sektorean berriki gertatu diren bilakaera teknologikoak kontuan harturik.
Nafarroako Gobernuari eta Lehendakariari buruzko abenduaren 3ko 14/2004 Foru Legearen ) artikuluarekin bat, agindu dut:
1. artikulua. Industria inbertsiorako laguntzen esparruan, energia berriztagarrien iturriak aprobetxatzeko diru-laguntza jaso dezaketen jarduerak.
1. Araudi horretan eskatzen diren betebeharrak betetzen dituzten enpresak izaten ahalko dira arlo horretan eskumena duen departamentuak arauturiko enpresa-inbertsiorako laguntzen onuradunak, energia berriztagarrien aprobetxamenduko jarduera hauetan badihardute:
a) Energia termikoa eta/edo elektrikoa ekoiztea, Energia elektrikoa araubide berezian ekoizteko jarduera arautzen duen maiatzaren 25eko 661/2007 Errege Dekretuko b.6.1.b) eta b.6.3 azpimultzoetan eta b.7 eta b.8 multzoetan sailkaturik dauden biomasa eta biogas motak erabiliz.
Nolanahi ere, b.6.1.b) azpimultzoaren barruan, basogintzako aprobetxamendua egin beharko da indarreko legeen arabera eta aplikatzekoak zaizkien antolamenduko proiektuekin, basogintzako plangintza agiriekin edo kudeaketa jarraibideekin bat, baliabidearen iraunkortasuna eta, beraz, bere izaera berriztagarria bermatzeko.
Biomasaz eta/edo biogasez energia elektrikoa ekoizteko sistemek maiatzaren 25eko 661/2007 Errege Dekretu horretan ezarritako eraginkortasun mailak izan behar dituzte.
Ez da diru-laguntzarik emanen 2 MW-etik gorako potentzia elektrikoa duten instalazioetarako.
b) Biomasaren tratamendua aprobetxamendu termikorako.
Kontzeptu horren baitan sartzen dira instalazio termikoetan erregai gisa erabiltzeko biomasari azken propietateak (granulometria, dentsitatea, hezetasuna, etab.) emanen dizkioten instalazioez gain, biomasa jasotzeko eta garraio kostua merkatzeko biomasa landan tratatzeko berariazko makinetan gauzatzen diren inbertsioak.
Ez dira diru-laguntzen xede izanen fardo-makinak, birringailuak eta berariaz energia lortzeko biomasa ekoizteko erabiltzen ez den beste edozein elementu.
c) Bigarren belaunaldiko bioerregaien ekoizpena (hondakin eta material lignozelulosikoetatik abiatuta lortutakoak).
d) Eguzki-energiaren tenperatura baxuko aprobetxamendu termikoa.
e) Lurraren barneko tenperaturaren aprobetxamenduaren bidez energia erabilgarria ekoiztea. Diruz lagunduko dira bai erauzketa-putzuei eta jariakin primarioa lurraren azpian berriro injektatzeari dagozkien kostuak, baita kolektorea eta bero-ponpa ere. Bero-ponpek 3,75etik gorako COPa (eragiketa koefizientea) izan behar dute.
f) Energia elektrikoa ekoiztea gehienez ere 10 MW-eko potentzia instalatua duten zentral elektrikoen bidez (minihidraulikoa), bai instalazio berrien kasuan, bai zerbitzurik eman gabe bost urte baino gehiago egin dituzten zentralak abian jartzeko behar diren instalazioen kasuan.
g) Eguzki erradiaziotik abiaturik energia elektrikoa ekoiztea, teknologia fotovoltaikoaren bidez, 100 kW-eko potentzia gainditzen ez duten instalazioekin, toki hauetan kokaturik badaude:
-Eraikin finko eta itxietako teilatu eta fatxadetan, baldin eta material sendoen bidez eginak badaude eta etxebizitza, zerbitzu, merkataritza edo industriarako erabiltzen badira, nekazaritza eta abeltzaintza sektorekoak barne.
-Eusteko egitura finkoetan, aparkalekuak estaltzeko edo itzala emateko erabiltzen badira, bi kasuetan lehenagoko erabileraren batean eta hiri katastroko erreferentzia duen lurzati batean kokaturik badaude.
h) Banaka edo batera 100 kW-eko potentzia gainditzen ez duten aerosorgailuen bidez energia elektrikoa ekoiztea.
Instalazio horiek toki hauetan kokaturik egon beharko dira:
-Eraikin finko eta itxietako estalkietan, baldin eta material sendoen bidez eginak badaude eta etxebizitza, zerbitzu, merkataritza edo industriarako erabiltzen badira, nekazaritza eta abeltzaintza sektorekoak barne.
-Eraikuntza horietatik gehienez 30 metrora kokatutako zutabe edo dorreetan.
2. Artikulu honen 1. ataleko g) eta h) letretan deskribatutako instalazioen xedea autokontsumoa izan beharko da, edo neurketa garbiaren edo balantze garbiaren printzipioaren arabera jardun beharko dira, eta jarduketa modu hori ziurtatzen duten sistema elektrikoez hornituak.
Ez da diru-laguntzarik emanen autokontsumoa ekoizpen fotovoltaikoaren edo minieolikoaren zati txikiena den tokietan kokatutako instalazioetarako, hau da, sareari saltzeko instalazioa denean. Hori hala dela zehazteko irizpidea eragimenaren eta energia berriztagarrien arloko eskumena duen atalak ezarriko du.
3. Energia elektrikoa ekoizteko proiektuak diru-laguntza jaso ahalko dute, betiere kontzesioa baino lehen eskatzaileak banaketa sareetara sarrerako eskubidea lortu izana frogatzen badu. Ulertuko da instalazio horien potentzia energia elektrikoa araubide berezian sortzeko jarduera arautzen duen arautegian xedaturikoarekin bat datorrela.
2. artikulua. Instalazio fotovoltaikoen inbertsioetarako laguntzen muga.
Instalazio fotovoltaikoek gainerako inbertsioen aldean dituzten ezaugarri bereziak direla eta, aurreko artikuluko 1.g) atalean ezarritako baldintzak betetzen dituzten instalazioetarako diru-laguntzaren %7ko laguntza berariazkoaren muga ezartzen da.
Nafarroa guztirako izanen da diru-laguntza hori, enpresa onuradunaren tamaina edozein izanik ere. Eskualdeko laguntzen mapan sarturik ez dagoen eremuko udalerrietan enpresa handiek egindako inbertsioak (Berrikuntza, Enpresa eta Enpleguko kontseilariak azaroaren 10ean emandako 488/2009 Foru Aginduaren Eranskinaren 2. atala) salbuespena dira, ezin izanen baitute diru-laguntzarik jaso.
Xedapen Gehigarri Bakarra. Laguntzen bateraezintasuna.
Foru agindu honetan energia berriztagarrien aprobetxamendu jardueretarako enpresa inbertsiorako ezarritako laguntzak bateraezinak izanen dira arloan eskumena duen Landa garapen, industria, enplegu eta Ingurumen Departamentuak energia berriztagarrien aprobetxamendurako instalazio txikien urteroko deialdian aurreikusitako laguntzekin.
Xedapen Indargabetzaile Bakarra. Arauak indargabetzea.
Foru agindu honek indarra hartzean, indarrik gabe geldituko dira bertan xedatutakoaren kontrako maila bereko edo txikiagoko xedapen guztiak eta, zehazki, Berrikuntza, Enpresa eta Enpleguko kontseilariak apirilaren 29an emandako 140/2010 Foru Agindua, enpresa inbertsiorako laguntzen esparruan energia berriztagarrien iturriak aprobetxatzeko diru-laguntza jaso dezaketen jarduerak zehazten dituena, eta Enpresako zuzendari nagusiaren ekainaren 23ko 1696/2010 Ebazpena, instalazio fotovoltaikoetan inbertitzeko proiektuetarako laguntzen mugak ezartzen dituena, enpresako inbertsiorako laguntzen esparruan.
Xedapen Iragankor Bakarra. Tramitazioan dauden instalazioetarako eskabideen aurkezpena.
Foru agindu hau argitaratu eta biharamunetik hasita 30 egun balioduneko epea ezartzen da, apirilaren 29ko 140/2010 Foru Aginduan ezarritako baldintzak betetzen dituzten instalazio fotovoltaiko eta minieolikoen sustatzaileek foru aginduan aipatzen den diru-laguntza aurkez dezaten.
Azken Xedapen Bakarra. Indarra hartzea.
Foru agindu honek Nafarroako Aldizkari Ofizialean argitaratu eta biharamunean hartuko du indarra.
