navarra.es
Castellano | Euskara | Français | English
Ezagutzera eman
707/2006 Ebazpena, irailaren 25ekoa, Industria eta Teknologia, Merkataritza eta Lan Departamentuko Lan zuzendari nagusiak emana, "Nafarroako Foru Komunitateko Administrazioa" entitatearen akordio kolektiboa erregistratu, gorde ...
707/2006 EBAZPENA, IRAILAREN 25EKOA, INDUSTRIA ETA TEKNOLOGIA, MERKATARITZA ETA LAN DEPARTAMENTUKO LAN ZUZENDARI NAGUSIAK EMANA, "NAFARROAKO FORU KOMUNITATEKO ADMINISTRAZIOA" ENTITATEAREN AKORDIO KOLEKTIBOA ERREGISTRATU, GORDE ETA NAFARROAKO ALDIZKARI OFIZIALEAN ARGITARATZEA ERABAKITZEN DUENA (ESPEDIENTE ZENBAKIA: 4/2006-F).
(2006ko 124. NAOn argitaratutako testua, urriaren 16an)
Atarikoa
Ikusirik "Nafarroako Foru Komunitateko Administrazioa" entitatearen Akordio Kolektiboa, negoziazio batzordeak sinatua (espediente zenbakia: 4/2006-F).
Gertakariak:
1. 2006ko abuztuaren 20an, Departamentu honetan sarrera eman zaio Nafarroako Foru Administrazioaren eta sindikatuetako parte baten ordezkariek (AFAPNA eta CCOO) 2006ko uztailaren 21ean izenpeturiko dokumentazioari, aipatutako enpresaren eta langileen ordezkariek izenpeturiko Akordio Kolektiboa erregistratu eta Nafarroako Aldizkari Ofizialean argitaratzeko igorria. Akordio horretan Nafarroako administrazio publikoetako funtzionarioek eta estatutupeko langileek 2006-2007 aldian izanen dituzten lan baldintzak finkatu dira.
2. Espediente honen izapideak egitean, aplikatu beharreko lege eta erregelamenduen manuak bete dira.
Zuzenbideko oinarriak:
1. Industria eta Teknologia, Merkataritza eta Lan Departamentu honek bere esku du indarra duen Langileen Estatutuko III. Tituluan arautzen diren lan hitzarmen kolektiboak eta abuztuaren 30eko 251/1993 Legegintzako Foru Dekretuko 84. artikuluan aipatzen diren akordio kolektiboak erregistratu, gorde eta argitaratzea, eta hori, lan zerbitzuak Estatuko Administraziotik Nafarroako Foru Komunitatera eskualdatzen dituen apirilaren 11ko 937/1986 Errege Dekretuarekin bat, bai eta irailaren 23ko 334/1996 Foru Dekretuarekin ere, Departamentu honi Estatutik transferitutako lan zerbitzuak esleitzen dizkionarekin, alegia.
2. Akordio honek Nafarroako Administrazio Publikoetako Langileen Estatutuari buruzko abuztuaren 30eko 251/1993 Legegintzako Foru Dekretuan arautzen diren akordio kolektiboen baldintzak betetzen ditu. Hori dela eta, bidezko da Nafarroako Aldizkari Ofizialean argitaratzea, 251/1993 Legegintzako Foru Dekretuko 84. artikuluko 3. idatz-zatian, abenduaren 29ko 27/1994 Foru Legearen bidez emandako idazketan, xedatutakoarekin bat.
3. Hitzarmen eta akordio kolektiboak gordetzea, erregistratu ondoren, Industria eta Teknologia, Merkataritza eta Lan Departamentu honen eskumena da, zuzenbideko oinarrietako lehenbizikoan aipatutako manuen arabera.
Adierazitakoarekin bat, eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 artikuluaren bidez eman dizkidaten eskurantzak erabiliz, ebatzi dut:
Lehena
"Nafarroako Foru Komunitateko Administrazioa" entitatearen akordio kolektiboa erregistratzea, Lan Hitzarmen eta Akordio Kolektiboak Erregistratu eta Gordetzeko Bulegoan horretarako bereziki prestaturik dagoen liburuan, eta bertako administrazio unitatean testua eta dokumentazioa gordetzea.
Bigarrena
Ebazpen hau Hitzarmenen Erregistrora igortzea, behar diren ondorioak izan ditzan.
Hirugarrena
Ebazpen honen berri ematea negoziazio batzordeari eta adieraztea ebazpenak ez duela administrazio bidea agortzen eta honen aurka gora jotzeko errekurtsoa jartzen ahal duela Industria eta Teknologia, Merkataritza eta Lan kontseilariari zuzendua, jakinarazi eta biharamunetik hilabeteko epean.
Laugarrena
Ebazpen hau Nafarroako Aldizkari Ofizialean argitaratzea, orok jakin dezan.
ADMINISTRAZIOAK ETA SINDIKATUEK 2006 ETA 2007 URTEETARAKO NAFARROAKO ADMINISTRAZIO PUBLIKOETAKO LANGILEEN LAN BALDINTZEI BURUZ SINATU DUTEN AKORDIOA
Iruñean, 2006ko uztailaren 21ean.
1.-Aplikazio eremua.
A.-Langileak.
Akordio hau Nafarroako Foru Komunitateko Administrazioaren eta haren erakunde autonomoen zerbitzuko langileei aplikatuko zaie.
Era berean, bidezkoa den kasuetan eta indarreko arautegiarekin bat, Nafarroako gainerako administrazio publikoetako funtzionarioei ere aplikatuko zaie.
B.-Iraunaldia.
Akordio hau bi urterako sinatzen da, hots, 2006ko urtarrilaren 1etik 2007ko abenduaren 31ra arte.
2.-Ordainsariak.
A.-Igoera orokorra.
Nafarroako Administrazio Publikoen zerbitzuko ordainsari guztiak Nafarroako Aurrekontu Orokorrei buruzko Foru Legean ezartzen den igoera orokorraren arabera igoko dira.
B.-Ordainsarien arloko edo alderdi ekonomikoko beste neurri batzuk.
Aurreko atalean aipatutako ordainsarien igoera orokorraz gainera, Nafarroako Foru Komunitateko Administrazioaren eta haren erakunde autonomoen zerbitzuko langileen ordainsariei dagokienez, honako neurri espezifiko hauek aplikatzea erabaki da:
a) Lanpostu guztiei dagozkien ordainsarien osagarrietan (lanpostuaren osagarria, berariazko osagarria eta berariazkoa eta irakaskuntzako berariazko osagarria), Foruzaingoko langileak salbuetsita, ondoren adierazten diren portzentajeak igotzea, eragina 2006ko urtarrilaren 1etik aurrera, eta portzentaje bera gehituz 2007ko urtarrilaren 1etik aurrera.
-A mailako lanpostuak: %0,58.
-B mailako lanpostuak: %0,58.
-C mailako lanpostuak: %0,58.
-D mailako lanpostuak: %0,68.
-E mailako lanpostuak: %0,78.
b) Ordainsarien neurri horiek Udaltzaingoko langileei aplikatuko zaizkie, honela kalkulatuta: zenbateko osoa aurreko a) puntuan ezarritako irizpideak foruzainen kopuruaren arabera aplikatzearen emaitza izanen da, Akordio honen hamargarren atalean aurreikusitako Batzorde Paritarioan eginen den negoziazioaren xede izanen diren irizpideekin bat. Horrezaz gainera, Herritarrak Babesteko Dibisioko Aurrea Hartzeko Brigadako kideei Trafiko Dibisioko kideentzat finkatu den osagarria ordainduko zaie, 2006ko urtarrilaren 1eko eraginarekin.
C.-Ordainsari osagarrien egokitzapena.
Funts ekonomiko baten eraketa eta dotazioa egitea Akordioaren indarraldiko bi urteetan, Nafarroako Foru Komunitateko Administrazioaren eta haren erakunde autonomoen zerbitzuko langileen ordainsari osagarriak egokitze aldera.
Akordioaren indarraldiko bi urteetako bakoitzean, funts horren dotazio ekonomikoa honakoa izanen da: ekitaldi honi dagozkion ordainsari finkatu guztien gainean Nafarroako benetako KPIaren eta atal honetako A) letraren arabera aplikatutako ordainsarien igoera orokorraren arteko diferentzia aplikatzearen emaitza.
Ordainsarien osagarriak Akordio honen hamargarren atalean aurreikusitako Batzorde Paritarioan negoziatu ondoren egokituko dira, ekitaldi bakoitzeko urtarrilaren 1etik aurrerako eraginarekin.
3.-Lan publikoa antolatu eta arrazionalizatzeko neurriak.
A.-Guztientzako neurriak.
Zilegi izanen da Administrazioaren jarduera modernizatu eta arrazionalizatzeko neurriak hartzea, besteak beste: langileen berresleitzea, kudeaketa adierazleak ezartzea administrazio unitateetan, lanpostuak berrantolatzea eta berrantolaketen ondoriozko langileak birziklatzea beste eginkizun batzuetan aritzeko.
Neurri horietako bat hartu baino lehen Batzorde Paritarioan negoziatu beharko da, Langileen Estatutuko 83. artikuluan finkatutako irizpideei jarraikiz.
B.-Nafarroako Foru Komunitateko Administrazioaren eta haren erakunde autonomoen funtzio publikoa antolatzeko legezko erregulazioa.
Lan baldintzei buruzko Akordio honen indarraldian, hamargarren puntuan aurreikusitako Batzorde Paritarioak Foru Legearen zirriborro bat aztertu, negoziatu eta prestatuko du, zeinen helburua gaur egungo lanpostuen katalogo bat ordenatu eta arrazionalizatzea izanen baita eta, orobat, Foru Komunitateko Administrazioaren eta haren erakunde autonomoen zerbitzuko funzionarioak administrazioan sartzeko, lanpostuz mugitzeko eta mailaz igotzeko sistemen erregulazio orokorra zehaztea.
Gai honetako legezko erregulazioa egiteko proposamenerako irizpide hauek hartuko dira kontuan:
a) Funtzionarioen izendapenen katalogoari buruzko definizio itxia.
b) Langile guztien profil profesionalen eta akademikoen arteko korrespondentzia ezartzea, unibertsitate mailakoak izan nahiz lanbide heziketakoak.
c) Administrazioan sartzeko guztiek bete beharreko baldintzak zehaztea, izaera ofizialeko titulazio bat edo batzuk aipatuta eta, behar denean, eska daitezkeen titulazio eskakizun berriak pixkanaka-pixkanaka aplikatzeko neurriak ere jasoz.
d) Eginkizun administratibo orokorrari loturiko izendapenak eta lanpostuak finkatzea, berariazko izendapenak, izaera ofizialeko prestakuntza akademiko eta profesionalekin eta, kasua bada, eginkizun jakin batzuen berariazkotasunarekin lotzen direnak, egotearekin batera.
e) Eginkizun administratibo orokorra taxutzea, honako arlo hauek bereiziz:
-Eginkizun teknikoa edo kudeaketakoa (A eta B mailak).
-Eginkizun administratiboa edo laguntzakoa (C eta D mailak).
-Zerbitzu orokorretako eginkizuna (E maila).
f) Gaur egun mailaz igotzeko dauden sistemez gainera, maila igoera profesional berariazkoa ezartzea eginkizun tekniko edo kudeaketakoaren arloan (B eta A mailen artean) eta eginkizun administratiboaren edo laguntzakoaren barnean ere (D eta C mailen artean).
g) Administrazioan sartzeko hautapen prozesuei loturiko mailaz igotzeko prozeduren bitartez, berariazko izendapeneko langileak eginkizun administratibo orokorrean sartzeko modua erregulatzea.
h) Egungo izendapenak integratzea, honakoak: bakoitzaren maila, sartzeko eskatzen diren titulazio betebeharrak eta, C, D eta E mailen kasuan, betetzen dituzten eginkizunak kontuan hartuta eta, betiere, finkatutako eskubide ekonomikoak bermatuta.
4.-Lanbide- eta administrazio-karrera.
Lan baldintzei buruzko Akordio honen indarraldian, hamargarren puntuan aurreikusitako Batzorde Paritarioak lanbide eta administrazio-karrera baten proposamena aztertu eta prestatuko du, Foru Komunitateko Administrazioaren eta haren erakunde autonomoen zerbitzuko langile finko guztiei aplikatzekoa.
Batzorde Paritarioaren lanak 2006ko urrian hasiko dira eta bi alderdiek hitz eman dute 2007ko ekainaren 30erako bukatuko dituztela.
Lanbide eta administrazio-karrerarako proposamena aztertzean irizpide hauek hartuko dira kontuan:
a) Gaur egun indarrean den ordainsarien egitura berrikusi eta bateratuko da eta, nolanahi ere, hori ezartzen den momentuan enplegatu bakoitzak finkatuak dituen lansariak bermatuko zaizkio.
b) Lanbide eta administrazio-karreraren sistemak (ezartzen diren mailen arteko igoerari dagokionez) batez ere aktibitate eta errendimendu helburuak betetzearekin loturiko elementuak hartuko ditu kontuan, indibidualak ez ezik baita bakoitzaren unitatekoak ere eta, orobat, enplegatuak zinez ematen dituen zerbitzuei buruzko irizpideak.
Batzorde Paritarioaren baitan akordiorik lortzen bada, adosten den proposamen hori Nafarroako Foru Komunitateko Administrazioaren eta haren erakunde autonomoen zerbitzuko langileen enplegu baldintzak 2008. urterako eta ondorengoetarako negoziatzeko prozesuan sartuko da, kasua bada, onetsia izan dadin aipatu negoziazio prozesuaren esparru ekonomikoan eta akordioan zehazten den egunetik aurrerako eraginarekin.
5.-Bizitza pertsonala, familiakoa eta lanekoa bateragarri egiteko neurriak.
Akordio honen indarraldian, behar diren jarduketak bultzatuko dira, araudia aldatzeari buruzkoak barne, enplegatu publikoen bizitza pertsonala, familiakoa eta lanekoa bateragarri egiteko ondorengo neurriak aplikatu ahal izan daitezen:
A.-Seme edo alaba baten jaiotza, etxean hartzea edo adopzioagatik aitarentzako baimen ordaindua bost egunetik hamarrera luzatuko da.
B.-Lanetik ateratzeko eskubidea ernalketa lagunduaren teknikak jasotzeko, beharrezkoa den denborarako eta lan orduetan egin beharra aldez aurretik frogatuta.
C.-Aitatasun eta amatasun baimenetan prestakuntza ikastaroetan parte hartzea, bai eta familia arazoengatiko eszedentzietan ere.
D.-Bi hilabeteko baimena hartzeko eskubidea, tarte horretan oinarrizko ordainsariak besterik kobratzeke, nazioarteko adopzioen kasuetan, gurasoek adoptatu nahi duten umearen jatorrizko herrialdera aurrez joan beharra baldin badute.
E.-Sei urtetik beherako seme-alaben legepeko zaintza dela-eta, lanaldi murrizketa onartzeko gaur egun dauden baldintzak hamabi urteko seme-alabak zuzenean zaintzeko kasuetara hedatuko dira.
F.-Ezgaitasun psikiko, fisiko edo sentsorialeko seme-alabak dituzten langileak lanetik ateratzen ahal dira, beharrezkoa duten denborarako, seme-alabek tratamendua hartzen duten hezkuntza bereziko zentroan koordinazioko bileratan parte hartzeko edo haiei laguntzeko, osasun arloan laguntza gehigarria hartu behar baldin badute.
G.-Genero indarkeriaren kontrako babes integrala emateko neurriak bultzatuko dira, Foru Komunitateko Administrazioaren eta haren erakunde autonomoen barnean eta, kasua bada, beste administrazio publikoen barnean, ukitutako langileen mugigarritasuna errazten duten neurriak ez ezik baita, Justiziako Gizarte Zerbitzuak proposatuta, beharrezkotzat jotzen diren bestelako neurriak ere, aipatu babesa lortze aldera.
H.-Indarrean dagoen araudiaren arabera, baimen egun ordainduak kalkulatzeko, ahaideen ospitalizazioan, ospitalean sartzen den egunetik hasiko da kontatzen edo, egun hori laneguna ez bada, biharamunetik aurrera.
6.-Barne igoera.
C mailara barne igoerako txanda murriztuko deialdia egitea erabaki da. Guztira 130 lanpostu izanen dira administrariak, telefonistak eta SOS Nafarroako operadoreak barne direla.
Deialdi hori 2005. urteko enplegu eskaintzari dagozkion lanpostuak hartzeko prozeduren ebazpena eman aurretik argitaratuko da.
Mailaz igotzeko prozedura oposizio-lehiaketa sistema izanen da, eta horren oposizioaldian gaur egun egiten diren ezagutza proba guztiak proba bakar batean bilduko dira.
7.-Lan publikoaren eskaintza.
Honako hau sinatzen duten bi alderdien asmoa da lan publiko egonkorra lortzea eta behin betikoz bete daitezkeen lanpostuak betetzea.
Hori helburu, Batzorde paritarioak 2006-2007 urteetako lan eskaintza publikoan sartu beharreko lanpostu kopurua finkatuko du (Administrazio-erroa, Osasunbidea-Nafarroako Osasun Zerbitzua eta Hezkuntza Departamentua), irizpide hauei jarraikiz:
a) Aldi baterako lan kontratudunekin betetzen ari diren lanpostu hutsak, oro har, lan eskaintza publikoan sartzea.
b) Behin betikoz bete daitezkeen egungo egiturazko lanpostu iraunkorrak plantilla organikoan agertzea eta lan eskaintza publikoan sartzea.
8.-Bestelakoak.
A.-Osasunbidea-Nafarroako Osasun Zerbitzuko Mahai Sektorialak 2005eko azaroaren 22an hartutako Akordioa berrestea, zeinen bidez Oinarrizko Laguntzako Mahai Teknikoak ateratako ondorioak onetsi baitziren.
B.-Lan baldintzei buruz etorkizunean har daitezkeen akordioak negoziazioan sartzeko asmoz, bidezkoa baldin bada, Akordio honen hamargarren atalean aurreikusitako Batzorde Paritarioaren baitan ondorengo gai hauek aztertuko dira:
a) Basozainen egoera, azaroaren 3ko 132/2005 Foru Dekretuan aurreikusitako araubidean sartzeko helburuarekin.
b) Lanaldi partzialeko kontratua duten liburutegietako langileen dedikazioa.
c) Langileak birsailkatzea.
C.-Aukera Berdintasunaren Batzordea eratuko da Foru Komunitateko Administrazioaren eta haren erakunde autonomoen eremuan. Paritarioa izanen da eta eratzeko unean adostasunez zehaztuko diren antolakuntza eta eginkizunak izanen ditu.
D.-Nafarroako Foru Komunitateko Administrazioan eta haren erakunde autonomoetan sindikatuen funtzionamendurako diren kontusailak indarrean dirauen urte bakoitzean gaurkotuko dira aurreko urteko Nafarroako benetako KPIa gehituz.
E.-Nafarroako Administrazio Publikoetako langileen lan baldintzei buruzko negoziazioa, 2008. eta hurrengo urteetarako, 2007ko urrian hasiko da.
9.-Mahai sektorialen eskumenak.
Langileen Estatutuaren 83.3 artikuluan esleitutako eskumena erabiliz, hitzarmen honen sinatzaileek Mahai Orokorraren eskuetan eta ez beste inon uzten dute lanpostuei esleitutako lansariak handitzea ekartzen duten lan baldintzen negoziazioa. Hortaz, hitzarmen honek indarrean dirauen bitartean, mahai sektorialetan, akordioan aipatu ez eta negoziatu beharrekoak diren lan baldintzen alderdiak jorratuko dira bakarrik, betiere dagokion sektorekoak badira eta haien aplikazio eremuko langileei esleitutako lansariak handitzea ekartzen ez badute.
10 -Batzorde Paritarioa.
Akordio hau sinatu eta hurrengo hilabetean, Batzorde Paritarioa eratuko da. Batzorde hori Administrazioaren ordezkariek, akordio hau sinatu duten sindikatuen ordezkariek eta Negoziazio Mahai Orokorra osatzen dutenen artean akordioa sinatu ez duten sindikatuen ordezkariek osatuko dute eta akordio honetan jasotakoa interpretatu, jarraitu, begiratu eta garatzea izanen dute eginkizun. Batzordearen eraketa bileran lan-egutegia finkatuko dute.
Funtzionamenduari dagokionez, Batzorde Paritarioan berean finkatuko da bileren aldizkakotasuna. Dena den, Batzordeko sindikatuen gehiengoak eskatuz gero, eskatu ondoko hamabost eguneko epean egin beharko da bilerarako deia.
11.-Akordioa formalizatu eta argitaratzea.
Administrazioak kasuan-kasuan egokitzen den arau-indarra emanen die akordio honetako atalei eta bai ondorengo garapenei ere, formalki onetsi eta indarra har dezaten.
Hori horrela bada ere, Akordioa oso-osorik Nafarroako Aldizkari Ofizialean argitaratuko da, orok jakin dezan.
Iruñean, 2006ko uztailaren 21ean.
-Foru Komunitateko Administrazioaren eta haren erakunde autonomoen aldetik:
Lehendakaritza, Justizia eta Barne kontseilaria, Javier Caballero Martínez.
-Sindikatuen aldetik:
AFAPNAko lehendakaria: Juan Carlos Laboreo Viela jauna.
CC OO sindikatuaren ordezkari: Javier Barinaga Adrián jauna.
