Industria plana - Industria Navarra
Hazkundea, Eraldaketa Digitala eta Jasangarria
NAFARROAKO INDUSTRIA PLANA 2021-2025ek oinarriak ezartzen ditu Foru Komunitateko industriak etorkizuneko industria-erronka berriei eta Covid-19aren pandemiak sortutako egoerari aurre egin ahal izan diezaien, Nafarroako industriaren eta lurraldearen berezitasunak kontuan hartuta.
Industria Planaren helburua Nafarroako industria Foru Komunitateko politika sozioekonomikoaren Ibilbide Orriaren erdigunean kokatzea da, industria-enpresen hazkundea eta beharrezko eraldaketa bikoitza (digitala eta jasangarria) indartuz.
Horretarako, proiektu eraldatzaileak abian jarriko dira, nitxo berrietako jarduera ekonomikoaren sorrera eta erakartzea bultzatuko dira, eta lehentasunezko balio-kateen inguruko industria-ekosistema indartuko da, pertsonak politiken erdigunean jarriz.
Partaidetza-prozesua
Plana Jendaurreko informazio-prozesuaren mende jarri da Gobernu Irekiaren plataformaren bidez, eta herritarren parte-hartzerako zerbitzuei helarazi zaie, parte-hartzea Nafarroako gizarte osora zabaltzeko. Herritarrek maiatzaren 29ra arte bidali ahal izan dituzte euren ekarpenak. Alegazioak jaso dira, eta horietako batzuk onartu egingo dira; ondorioz, Planaren testuan txertatuko dira, egungo bertsioa aldatuz.
Plana prestatzeko zazpi mahai tematiko eratu dira, eta horietan balio-kateekin lotutako enpresek, klusterrek eta erakundeek parte hartu dute. Gainera, NEXT Generation eta REACT funtsek nabarmen indartuko dituzte hainbat lan-ildo, hala nola digitalizazioa, trantsizio ekologikoa eta energia-eraginkortasuna.
Nafarroako 2021-2025 Industria Planak jarduteko Hiru Helburu argi ditu
- Nafarroako industria-hazkundea eta garapena babestea, bai eta haren beharrezko eraldaketa digitala eta ekologikoa ere.
- Lehentasunezko industria-balio kateetan nitxoko jarduera ekonomiko berriaren sorrera eta/edo erakartzea babestea.
- Lehentasunezko balio kateetako Nafarroako industriaren hazkundea, sendotzea eta eraldaketa babesteko industria-ekosistema indartzea.
Ekintzak
Industria-enpresa gehiagorengana iristea, arreta berezia jarriz enpresa txiki eta ertainetan, dagoeneko finkatuta dauden eta/edo tamaina handiagoko enpresek dituzten laguntza-beharrak ahaztu gabe.
Industriaren eraldaketan etengabe laguntzea, funtsezko bi bektoreetatik abiatuta, digitalizazioa eta jasangarritasuna alegia; horretarako, besteak beste, programa espezifikoak garatuz, irizpide haztatuak txertatuz eta antzeko neurriak ezarriz.
Nazioarteko orientazio argia izatea, bai Nafarroako industriaren ondasun eta zerbitzuak atzerrian merkaturatzearen eta nazioarteko hornitzaileekiko lankidetzaren ikuspegi tradizionaletik, bai Nafarroa atzerriko inbertitzaileen eta nazioarteko talentuaren arreta-gune gisa kokatzearen ikuspegitik ere, enpresa-proiektuak garatzeko eskualde erakargarri gisa.
Nafarroan presentzia duten enpresa multinazionalekin sinergia handiagoak ezartzea, tokiko garapenarekiko haien inplikazioa areagotuz, tokiko industriarekin lankidetza egonkorrak sustatuz, bezero-hornitzaile harremanetatik harago, eraldaketa izaera duten proiektu eta ekimenak babesteko.
Industriarako helburu partekatuak (eraldaketa-proiektuak) definitzea, inbertsio publiko eta pribatuaren optimizazioa ahalbidetuko dutenak, inbertsio horiek eragin handieneko ekimenetara bideratuz.
Nafarroan lurralde-kohesio handiagoa sustatzea, industria-jarduera kohesio hori gidatuko duen bektore gisa hartuta, eskualde bakoitzaren errealitatera eta sektoreetara egokitutako garapen-plan espezifikoen bidez. Plan horiek, 2021-2025 Industrializazio Plana erreferentzia-esparru gisa hartuta, lurralde bakoitzean berariaz garatuko dute haren edukia.
Enpresa-sarean programen eta jardueren eragin positiboak handitzea, besteak beste, eskaera-prozesuak sinplifikatuz, egokia den kasuetan finantzaketa publikoaren kofinantzaketa handituz, eta proiektuen zein deialdien egutegia eta gauzatze-epeak hobetuz.
Finantzaketako ekintzak osatzea, Administrazio publikoa industriaren babes-, lidergo- eta orientazio-eginkizuna betetzen duen eragile gisa ulertuta.
