Enpresak edo enpresa taldeak, Nafar Lansare-Nafarroako Enplegu Zerbitzuarekin (aurrerantzean, NL-NEZ) hitzarmenak sinatu ondoren, beren lantokietan lanekoak ez diren praktikak egin ditzaketenak lan-esperientziarik ez izateagatik enplegagarritasun-arazoak izan ditzaketen gazteentzat. Helburua enplegagarritasun hori hobetzea da. Horretarako, laneko errealitatearekin harremanetan hastea eskainiko zaie, eta lehendik duten prestakuntza osatzen lagunduko.

Gazteek baldintza hauek bete beharko dituzte:

•    18 eta 25 urte bitartekoak izatea, biak barne. Gazte Bermearen Sistema Nazionalean inskribatutako gazteei dagokienez, 29 urte izanen dituzte gehienez, lanekoak ez diren praktika horiek egiteko.
•    Langabezian egotea eta dagokien enplegu agentzian izena emanda egotea.
•    Unibertsitate titulua edo erdi mailako edo goi mailako Lanbide Heziketako titulua izatea, edo arte- edo kirol-irakaskuntzetako goi mailako titulua, edo profesionaltasun ziurtagiria.
•    Jarduera berean hiru hilabetetik gorako lan-harremanik edo bestelako lanbide-esperientziarik ez izatea. Ondorio horietarako, ez dira kontuan hartuko tituluak edo ziurtagiriak lortzeko curriculumetan sartzen diren praktikak.

Praktikak honela eginen dira:

•    Enpresak edo enpresa taldeak Nafarroan dituen lantokietan.
•    Tutore batek zuzendu eta gainbegiratuko ditu.
•    Hiru eta bederatzi hilabete bitarteko epean (baimendutako gehienekora iritsi ez bada, luzapena eska daiteke).
•    Enpresak NL-NEZri aurkeztutako lanekoak ez diren praktiken programaren arabera. Programa horretan, gutxienez, honako hauek jasoko dira: praktiken edukia eta haiekin batera emanen den prestakuntza, praktiken iraupena, eta ebaluazio sistemak eta tutoretzak.

Parte hartzen duten gazteek laguntza beka bat jasoko dute enpresaren edo enpresa-taldeen eskutik. Beka horren zenbatekoa, gutxienez, une bakoitzean indarrean dagoen hileko Ondorio Askotarako Errenta-adierazle Publikoaren (OAEAP) ehuneko 80 izanen da.

Enpresetan lanekoak ez diren praktikak egiteak ez du inola ere berekin ekarriko lan-harremanik egotea enpresaren eta gazte onuradunaren artean.

Lanekoak ez diren praktiketan parte hartzen duten pertsonei urriaren 24ko 1493/2011 Errege Dekretuan Gizarte Segurantzan sartzeko jasotako mekanismoak aplikatuko zaizkie (1493/2011 Errege Dekretua, urriaren 24koa, prestakuntza programetan parte hartzen duten pertsonak Gizarte Segurantzako araubide orokorrean sartzeko baldintzak arautzen dituena). Gizarte Segurantzan kotizatzen da honako kontzeptu hauengatik: kontingentzia arruntak, lan-istripuak eta lanbide-gaixotasunak. Ez da kotizatzeko betebeharrik izanen langabeziagatik, Soldatak Bermatzeko Funtsagatik edo lanbide heziketagatik.

Lanekoak ez diren praktikak amaitutakoan, enpresek, NL-NEZrekin lankidetzan, ziurtagiri bat eman beharko diete praktikak egin dituzten pertsonei.

Hauxe da prozedura:

1. Enpresak edo enpresa taldeak Lanekoak ez diren praktiken hitzarmenaren eta/edo programaren eskaera aurkezten dio NL-NEZri, eta hark berrikusi eta onetsi egiten du.

2. Enpresak eta NL-NEZk hitzarmena sinatzen dute. Hitzarmena indarrean egonen da sinatzen den egunetik aurrera, eta lau urteko epea izanen du (ikusi Hitzarmenaren eredua).

3. Enpresak ez badu hautagairik aurkezten lanekoak ez diren praktiken programa(k) gauzatzeko, NL-NEZk hautagaiak aurrez hautatzeko prozesua gauzatuko du, eta enpresak eginen du hautagaien azken hautaketa prozesua. Ondoren, enpresak hautatutako pertsonen datuak jakinaraziko dizkio NL-NEZri.

Enpresak izangaia aurkezten badu lanekoak ez diren praktiken programa(k) egiteko, izangaiaren datuak jakinaraziko dizkio NL-NEZri, praktikak egiteko egokia den egiaztatzeko.

4. Enpresak ziurtatu beharko du praktikak egiten dituzten pertsonek baldintzak betetzen dituztela praktikak egiten hasten diren unean.

5. Enpresak edo enpresa taldeak eta horietan parte hartzen dutenek Hitzarmena sinatu behar dute. Hitzarmen horrek, gutxienez, honako informazio hau jasoko du:

•    Garatu beharreko praktiken eduki zehatza
•    Iraupena
•    Lanaldiak eta ordutegiak
•    Lantokia(k)
•    Tutoretza sistema zehaztea
•    Praktikak egiteagatik gazteak lortuko duen ziurtagiria.

6. Enpresak alta emanen die parte hartzen dutenei Gizarte Segurantzan, 9923-Lan-harreman Berezian (lanekoak ez diren praktikak enpresetan).

7. Enpresaren eta onuradunaren artean praktikak egiteko sinatutako berariazko hitzarmena jakinaraziko zaio NL-NEZri, hiru egun balioduneko epean, praktikak hasten diren egunetik zenbatzen hasita.

8. Lanekoak ez diren praktikei buruz sinatutako hitzarmenen inguruan  gertatzen den edozer jakinaraziko da, baita horietako edukiaren edozein aldaketa ere, Gorabeheren jakinarazpenaren bidez.

9. Lanekoak ez diren praktiken ziurtagiria jakinaraziko zaio NL-NEZri hiru egun balioduneko epean, praktikak amaitzen diren egunetik zenbatzen hasita. Gutxienez, honako hauek jasoko ditu: egindako praktikak, praktikei lotutako prestakuntza edukiak, iraupena eta praktikaldia.

10. NL-NEZko Enplegua Sustatzeko eta Enpresentzako Zerbitzuetarako Zerbitzuko zuzendariak lanekoak ez diren praktiken ziurtagiria sinatuko du, eta praktikak egin dituenari igorriko dio.

1543/2011 Errege Dekretua, enpresetan lanekoak ez diren praktikak arautzen dituena.