Etxebizitza babestuen jabeak. 

Alderdi hauek hartu behar dituzu kontuan, zure etxebizitza babestua alokatzean:

• Ezin diozu etxebizitza edozeini alokatu. Alokatu behar duenak honako baldintza hauek bete behar ditu: 
  • Familiaren diru-sarrera haztatuak ezin dira izan ERREGEROSNA adierazlea halako 6,5 baino handiagoak (errenta egokiagatiko erosahalmena). Kalkulatu zein diren familiaren diru-sarrera haztatuak eta zer baliokidetasun duten ERREGEROSNAn.
  • Ez berak, ez familia-unitateko beste ezein kidek ezin dute jabetzan eduki etxebizitzarik edo zati proportzionalik, ez eta haren gaineko erabilera- edo gozamen-eskubide errealik ere, salbu eta etxebizitza desegokitzat jo bada eta Administrazioari eskaini badiote. Kontsultatu zein etxebizitza diren desegokiak eta nola eskaintzen zaizkien Administrazioari.
• Etxebizitza soilik aloka dezakezu, eranskinik gabe (garajea eta trastelekuak).
• Errespetatu egin behar duzu gehieneko alokairu-prezioa, Nafarroako Gobernuak ezarritakoa.  Prezio txikiagoa adostu dezakezu, baina ez handiagoa. Kalkulatu alokairuaren gehieneko prezioa.
• Fidantza gisa, hileko errentari dagokion kopurua eska dezakezu eskudirutan; ezin duzu eskatu abalik edo berme osagarririk. 
• Kontratuak nahitaez jaso behar ditu klausula hauek:
  • Etxebizitzak debeku eta muga batzuk ditu, Etxebizitza Babestuen Araubidearen ondorioz, eta, horrenbestez, erabilera-baldintzak izanen dira behin betiko kalifikazioan adierazitakoak, eta errenta ez da izanen legez ezarritakoa baino handiagoa. 
  • Errentariak etxebizitza erabiliko du ohiko bizileku iraunkorrerako eta etxebizitza okupatuko du giltzak hartu eta hiru hilabeteko epean, gehienez ere, salbu eta tartean bidezko arrazoirik badago. 
  • Errentatzaileak ikus-onetsitako kontratuaren ale bat eman beharko dio errentariari.
  • Errentatzaileak altzaririk eta objekturik gabe utziko du etxebizitza errentariaren esku edo, altzariak badaude, ez du haiengatik dirurik kobratuko.
  • Kontratua suntsiaraziko da, baldin eta etxebizitza azpierrentan ematen bada osorik edo parte batean.
  • Errentatzaileak ordainduko du beti hiri-lurraren gaineko kontribuzioa, eta ezin izanen du ordainketa hori errentariaren kargu utzi.
• Etxebizitza erosteko dirulaguntza jaso bazenuen, eta alokatzen baduzu behin betiko kalifikaziotik hamar urte igaro baino lehen, itzuli egin beharko dituzu dirulaguntza eta berandutze-interesak. Itzulketa hori etxebizitza alokatu baino lehen egin behar duzu.  Etxebizitza Zerbitzuan esanen dizute nola egin.
  • Gainera, Ogasunean aurre egin behar diezu zerga-ondorioei, baldin eta etxebizitza-kontuko dirua erabili bazenuen hura erosteko edo desgrabaziorik egin baduzu. 
• Etxebizitzak izan behar du energia-efizientziaren ziurtagiria indarrean, 4 hilabetez baino gehiagoz alokatzen baduzu. 
• Maizterrarekin akordioa lortu ondoren, Etxebizitza Zerbitzura bidali behar duzu kontratua, eskatutako gainerako dokumentuekin batera, hark behar diren egiaztapenak egin ditzan eta, hala badagokio, alokairua baimendu edo ikus-onets dezan.

• Eskabide orokorra (bakar-bakarrik baldin eskabidea bulegoetan aurrez aurre aurkezten baduzu)
• Baimena eskatzeko inprimakia
• Kontratuaren kopia, bi alderdiek behar bezala sinatua, orri guztietan.
• Maizter guztien PFEZaren aitorpenaren kopia (pertsona fisikoen errentaren gaineko zerga), epea amaitua duen azken kanpainari dagokiona, soilik baldin eta zerga-aitorpena egin badute Nafarroako Foru Ogasuna ez den beste zerga-administrazio batean.
• Maizterren NANaren edo AIZaren (atzerritarren identifikazio zenbakia) kopia eta, hala badagokio, familia-liburua.
• Dirulaguntzaren itzulketaren ordainketa-gutunaren kopia, hala behar bada.
• Etxebizitzaren eskrituraren kopia, lehenengoz alokatzen baduzu.
• Lehendik ere alokatu baduzu, aurreko kontratua bukatu dela frogatzen duen agiria.

10/2010 Foru Legea, Nafarroan Etxebizitza Izateko Eskubideari buruzkoa.