navarra.es
Castellano | Euskara | Français | English
Ezagutzera eman
202/2004 Foru Agindua, abuztuaren 9koa, Hezkuntza kontseilariak emana. Bigarren Hezkuntzako eta Derrigorrezko Bigarren Hezkuntzako zenbait ikastetxe eta instituturi baimena ematen dio hizkuntzak irakasteko, Bigarren Hezkuntzako atzerriko hizkuntzen..
202/2004 FORU AGINDUA, abuztuaren 9koa, Hezkuntza kontseilariak emana. Bigarren Hezkuntzako eta Derrigorrezko Bigarren Hezkuntzako zenbait ikastetxe eta instituturi baimena ematen dio hizkuntzak irakasteko, Bigarren Hezkuntzako atzerriko hizkuntzen eta euskal hizkuntza eta literaturaren curriculumak Hizkuntzen Urrutiko Irakaskuntza Ofizialaren curriculumarekin bateratuz, Nafarroako Urrutiko Hizkuntza Eskola Ofizialaren koordinaziopean
(2004ko 109. NAOn argitaratutako testua, irailaren 10ean)
Atarikoa
Hezkuntzaren Plangintzako Zerbitzuko zuzendariak adostasun txostena aurkeztu du, Bigarren Hezkuntzako eta Derrigorrezko Bigarren Hezkuntzako zenbait ikastetxe eta instituturi baimena eman dakion hizkuntzak irakasteko, Bigarren Hezkuntzako atzerriko hizkuntzen eta euskal hizkuntza eta literaturaren curriculumak Hizkuntzen Urrutiko Irakaskuntza Ofizialaren curriculumarekin bateratuz, eta Nafarroako Urrutiko Hizkuntza Eskola Ofizialaren koordinaziopean.
Honako hauek kontuan izanik: Nafarroako Foru Eraentza Birrezarri eta Hobetzeari buruzko abuztuaren 10eko 13/1982 Lege Organikoaren 47. artikulua; abuztuaren 31ko 1070/1990 Errege Dekretua, irakaskuntza ez-unibertsitarioaren arloan Estatuak Nafarroako Foru Komunitateari eginbehar eta zerbitzuak eskualdatzea onesten duena; Hezkuntzaren Kalitateari buruzko abenduaren 23ko 10/2002 Lege Organikoaren 50.3, 52.5 eta 54.3 artikuluak; uztailaren 16ko 196/2001 Foru Dekretua, hizkuntzen irakaskuntza espezializatuen oinarrizko zikloa antolatu eta haren curriculuma ezartzen duena; uztailaren 28ko 272/2003 Foru Dekretua, hizkuntzen irakaskuntza espezializatuetako lehen mailako goi zikloa antolatu eta haren curriculuma ezartzen duena; Urrutiko Hezkuntzari egokitutako hizkuntzen irakaskuntza espezializatuen lehen mailako oinarrizko zikloko curriculuma ezartzen duen 1993ko azaroaren 2ko Agindua, eta azaroaren 15eko 339/1993 Foru Dekretua, Nafarroako Urrutiko Hizkuntza Eskola Ofiziala eratu zuena.
Nafarroako Foru Komunitateko Gobernua eta Administrazioa arautzen dituen apirilaren 11ko 23/1983 Foru Legearen 36.2 b) eta c) artikuluak eman dizkidan ahalmenak erabiliz, agindu dut:
Lehena
Baimena ematea 1. eranskinean ageri den Bigarren Hezkuntzako institutuari hizkuntzak irakasteko, 2004/2005 ikasturtetik aurrera, Bigarren Hezkuntzako atzerriko hizkuntzen curriculumak Urrutiko Hezkuntzari egokitutako hizkuntzen irakaskuntza espezializatuarekin bateratuz, Nafarroako Urrutiko Hizkuntza Eskola Ofizialak eta Bigarren Hezkuntzako ikastetxe eta institutuek atzerriko hizkuntzak eta euskara irakasteko egin duten laguntza programaren arabera.
Bigarrena
Baimena ematea 2. eranskinean ageri diren Derrigorrezko Bigarren Hezkuntzako ikastetxe eta institutuei hizkuntzak irakasteko, 2004/2005 ikasturtetik aurrera, Bigarren Hezkuntzako atzerriko hizkuntzen curriculumak Urrutiko Hezkuntzari egokitutako hizkuntzen irakaskuntza espezializatuarekin bateratuz, Nafarroako Urrutiko Hizkuntza Eskola Ofizialak eta Bigarren Hezkuntzako ikastetxe eta institutuek atzerriko hizkuntzak eta euskara irakasteko egin duten laguntza programaren arabera.
Hirugarrena
Baimena ematea 3. eranskinean ageri diren Bigarren Hezkuntzako ikastetxe eta institutuei hizkuntzak irakasteko, 2004/2005 ikasturtetik aurrera, Bigarren Hezkuntzako euskal hizkuntza eta literaturaren curriculumak Urrutiko Hezkuntzari egokitutako hizkuntzen irakaskuntza espezializatuarekin bateratuz, Nafarroako Urrutiko Hizkuntza Eskola Ofizialak eta Bigarren Hezkuntzako ikastetxe eta institutuek atzerriko hizkuntzak eta euskara irakasteko egin duten laguntza programaren arabera.
Laugarrena
Baimena ematea 4. eranskinean ageri diren Derrigorrezko Bigarren Hezkuntzako ikastetxe eta institutuei hizkuntzak irakasteko, 2004/2005 ikasturtetik aurrera, Bigarren Hezkuntzako euskal hizkuntza eta literaturaren curriculumak Urrutiko Hezkuntzari egokitutako hizkuntzen irakaskuntza espezializatuarekin bateratuz, Nafarroako Urrutiko Hizkuntza Eskola Ofizialak eta Bigarren Hezkuntzako ikastetxe eta institutuek atzerriko hizkuntzak eta euskara irakasteko egin duten laguntza programaren arabera.
Bosgarrena
Foru agindu honen 1, 2, 3 eta 4. puntuetan aipatzen diren Bigarren Hezkuntzako eta Derrigorrezko Bigarren Hezkuntzako ikastetxe eta institutuek baimena izanen dute, beraz, dagozkien hizkuntzak irakasteko, Bigarren Hezkuntzako atzerriko hizkuntzen eta euskal hizkuntza eta literaturen curriculumak Hizkuntzen Urrutiko Irakaskuntza Ofizialekoarekin bateratuz, Nafarroako Urrutiko Hizkuntza Eskola Ofizialak koordinaturik. Hori eginen da Nafarroako Urrutiko Hizkuntza Eskola Ofizialaren antolaketa eta jarduna arautzen duten Jarraibideek kurtso bakoitzerako ematen dituzten arauetan ezarri mailen arabera.
Seigarrena
Baimena duten Bigarren Hezkuntzako eta Derrigorrezko Bigarren Hezkuntzako ikastetxe eta institutuetako ikasleak, nahi izanez gero, beren borondatez sartuko dira Programan, eta matrikula egin beharko dute bai Bigarren Hezkuntzako edo Derrigorrezko Bigarren Hezkuntzako ikastetxean edo institutuan, bai eta Nafarroako Urrutiko Hizkuntza Eskola Ofizialean ere. Ikasleen ebaluazioa era desberdinekoa izanen da ikasketen balio akademikoaren arabera: alde batetik, Atzerriko Hizkuntza eta/edo Euskal Hizkuntza eta Literatura gainditzea Bigarren Hezkuntzako irakaskuntzan, bere ebaluazio prozesuarekin, eta beste aldetik, Urrutiko Hizkuntza Eskola Ofizialaren agiria lortzea, dagokion hizkuntzan.
Zazpigarrena
Programa honetan hasten diren ikasleei Bigarren Hezkuntzako eta Derrigorrezko Bigarren Hezkuntzako ikastetxe eta institutuek bermatuko diete bertan segituko dutela, harik eta Hizkuntzen Irakaskuntza Espezializatuen ikasketak burutu arte, gai horri buruz indarra duen arautegia kontuan harturik.
Zortzigarrena
Hezkuntza Departamentuak bukatutzat eman dezake foru agindu honen 1, 2, 3 eta 4. puntuetan aipatzen den baimena, ondoko kasu hauetan:
-Ikastetxe edo institutuak modu arrazoituan eskatzen duenean, betiere Zerbitzuak Ikuskatzeko eta Ikuskapen Teknikorako Zerbitzuaren eta Nafarroako Urrutiko Hizkuntza Eskola Ofizialaren txostena kontuan hartuta.
-Gorabeherak direla medio, baimenari bukaera ematea komeni denean, horretarako kontuan harturik Nafarroako Urrutiko Hizkuntza Eskola Ofizialak egindako ebaluazioa.
Azken Xedapenetako Lehena. Eskola eta Lanbide Irakaskuntzaren zuzendari nagusiari ahalmena ematen zaio foru agindu honetan ezarritakoa aplikatzeko beharrezkoak diren xedapenak eman ditzan.
Azken Xedapenetako Bigarrena. Foru agindu hau eta eranskinak igortzea Hezkuntzaren Plangintzarako Zerbitzura, Zerbitzuak Ikuskatzeko eta Ikuskapen Teknikorako Zerbitzura, Euskara Zerbitzura, Giza Baliabideen Zerbitzura, Ikastetxeen eta Ikasketetarako Laguntzen Zerbitzura, Ikasketak Antolatzeko Atalera, Araubide Bereziko Irakaskuntzaren Zerbitzura, Hizkuntzen Unitate Teknikora, ikastetxe ukituetara eta Nafarroako Aldizkari Ofizialera, behar diren ondorioak izan ditzaten.
Azken Xedapenetako Hirugarrena. Foru agindu honek eta eranskinek Nafarroako Aldizkari Ofizialean argitaratu eta biharamunean hartuko dute indarra.
1. ERANSKINA
Corellako "Alhama" Bigarren Hezkuntzako institutua: frantsesa.
2. ERANSKINA
Azagrako Derrigorrezko Bigarren Hezkuntzako institutua: frantsesa.
Altsasuko "Sakana Ikastola" Bigarren Hezkuntzako ikastetxe pribatua: ingelesa.
3. ERANSKINA
Leitzako "Amazabal" Bigarren Hezkuntzako institutua: euskara.
Iruñeko "Santo Tomás" Bigarren Hezkuntzako ikastetxe pribatua: euskara.
4. ERANSKINA
Tafallako "Escuelas Pías" Derrigorrezko Bigarren Hezkuntzako ikastetxe pribatua: euskara.
Otsagabiko Derrigorrezko Bigarren Hezkuntzako institutua: euskara.
