Etxebizitza babestua alokatzeko dirulaguntza

Zer baldintza bete behar dira dirulaguntza jasotzeko?

Gainera, zenbait egoeratan ezin duzu dirulaguntzarik jaso. Zabaldu atal hau gehiago jakiteko.

 

Ez duzu dirulaguntzarik jasotzeko eskubiderik, aurreko ataletan adierazitako baldintzak betetzen badituzu ere, kasu hauetan:

  • Etxebizitza bat saldu edo dohaintzan eman baduzu (osoa edo zati proportzionala) edo azken 5 urteetan etxebizitza bat erabiltzeko edo gozatzeko eskubide erreal bat eskualdatu baduzu eta eskualdaketa horrekin 60.000 eurotik gorako diru-sarrerak sortu badituzu, haiek kobratu nahiz ez kobratu. Nola kalkulatzen dira etxebizitza bat eskualdatzeagatik sortutako diru-sarrerak?
  • 90.000 eurotik gorako ondasun, eskubide edo finantza-aktiboak badituzu, salbu eta ondasun horiek enpresa- edo lanbide-jardueraren bati lotuta daudenean. Adibidez, jarduera hori garatzen den higiezina.
  • Errentaren azken kanpainan 5.000 eurotik gorako zenbatekoa aitortu baduzu aurrezkiaren zati berezian (kapitalaren etekinak eta ondare-irabaziak).

Nola kalkulatzen da dirulaguntzaren zenbatekoa?

Dirulaguntzaren zenbatekoa kalkulatzeko, ehuneko bat aplikatzen zaio alokairuagatik ordaintzen duzun errentari. Ehunekoa familiaren diru-sarrera haztatuen araberakoa da. Taula honetan, kasu bakoitzari dagokion ehunekoa kontsulta dezakezu, familiaren diru-sarrera haztatuen eta ERREGEROSNAn duten baliokidetasunaren arabera.

  ERREGEROSNA halako 1, gehienez ERREGEROSNA halako 1etik 1,4ra ERREGEROSNA halako 1,4tik 1,7ra
Dirulaguntza orokorra % 75 % 50 % 25



Kalkulua urtebeterako egiten da. Aldi horretan egoera ekonomikoa eta familiarena aldatzen bada, urte horretarako aitortutako zenbatekoa ez da aldatuko. Aldaketak kontuan hartuko dira soilik dirulaguntza berritzean, urtea bukatutakoan.  

Genero-indarkeriaren biktima bazara

Alokairuaren lehen urtean % 90eko ehunekoa dagokizu, eta % 75ekoa bigarrenean, zure familiaren diru-sarrerak edozein direla ere. Hirugarren urtetik aurrera, dirulaguntza jasotzeko eskubidea izanen duzu soilik baldin eta oro har ezarritako baldintzak betetzen badituzu. 

60 urtetik gorakoentzako eta desgaitasuna duten pertsonentzako araubide orokorreko edo sustapeneko apartamentu batean bizi bazara

% 25eko ehunekoa dagokizu, betiere zure diru-sarrerak ez badira ERREGEROSNA halako 1,7 baino handiagoak. 

Nola eskatzen da dirulaguntza?

Sustatzaileek eskatzen dute dirulaguntza zure izenean, eta ondoren dagokizun zenbatekoa kentzen diote etxebizitza alokatzeagatik ordaindu behar duzun prezioari. 

Sustatzaileek hemen eskatu behar dute: Etxebizitza babestua alokatzeko dirulaguntza eskatzea.