navarra.es
Castellano | Euskara | Français | English
Ezagutzera eman
34/1997 Foru Agindua, martxoaren 20koa, Lehendakaritza kontseilariak emana, hiritarren segurtasunarekin zerikusia duten programa, jarduerak eta inbertsioak burutzeko, toki entitateei eta irabazi asmorik gabeko erakundeei laguntzak ematea arautzen ...
34/1997 FORU AGINDUA, MARTXOAREN 20KOA, LEHENDAKARITZA KONTSEILARIAK EMANA, HIRITARREN SEGURTASUNAREKIN ZERIKUSIA DUTEN PROGRAMA, JARDUERAK ETA INBERTSIOAK BURUTZEKO, TOKI ENTITATEEI ETA IRABAZI ASMORIK GABEKO ERAKUNDEEI LAGUNTZAK EMATEA ARAUTZEN DUENA.
(1997ko 44. NAOn argitaratutako testua, apirilaren 11n)
Atarikoa
Urtarrilaren 31ko 1/1997 Foru Legearen bidez onetsi ziren 1997rako Nafarroako Aurrekontu Orokorrek hiritarren segurtasunarekin zerikusia duten programa, jarduerak eta inbertsioak burutzen dituzten toki entitateei eta irabazi asmorik gabeko erakundeei zuzenduriko transferentzietarako zenbait kontusail ezartzen dute. Beraz, bidezko da behar diren arauak zehaztea aipatu aurrekontuetako kontusailen kargura laguntzak ematea arautzeko.
Aurreko hori guztia dela eta, Herri Babeserako Zerbitzuaren proposamena ikusirik, agindu dut:
I. KAPITULUA. Xedapen orokorrak
1. artikulua
Hiritarren segurtasunarekin zerikusia duten programa, jarduerak eta inbertsioak burutzeko irabazi asmorik gabeko erakunde eta toki entitateei laguntzak emateko erregimena Foru Agindu honetan xedatzen denak manatuko du.
2. artikulua
Ondorio hauetarako, hiritarren segurtasunaren arloko jardueratzat hartuko dira arrazoi natural edo gizaki bidezkoek ondasun edo pertsonei eragindako kalteak aztertu, saihestu eta konpontzera zuzendurikoak, beren baitan bilduz, besteak beste, larrialdietan aritzeko pertsonen prestakuntza eta zerbitzuen antolamendua, ondorengo artikuluetan zehaztuko den moduan.
II. KAPITULUA. Lankidetza hitzarmenak
3. artikulua
Hiritar segurtasunaren alorrean Nafarroako Gobernuarekin dirulaguntzak jasotzeko lankidetza hitzarmena sinatua daukaten erakunde publiko zein pribatuek hitzarmen horietan edo horiek garatzen dituzten protokoloetan ezartzen diren zenbatekoak jasoko dituzte edo bertan aipatu diren modulu edo indizeak aplikatzearen ondorioz dagozkienak. Dirulaguntza horiek emateko prozedura aipatu hitzarmenetan xedaturikoak zuzenduko du eta, ordezko arau gisa, Foru Agindu honetan xedatzen denak.
III. KAPITULUA. Kapital transferentziak
4. artikulua
1. Kapital transferentzien kargura dirulaguntzak eskatzen ahalko dituzte 1997ko urtean ondorengo arlootan inbertsioak egin gogo dituzten toki entitateek:
a) Zezen plazak indarra duten arauek eskatzen dituzten baldintzei egokitzea.
b) Udaltzaingoarentzat drogamenpekotasunaren alorreko ekipamendua erosteko laguntzak.
c) Udaltzainak hornitzeko dotazioa.
2. Dirulaguntzak emateko beharrezkoa izanen da aurretik eskaria egitea inbertsioa deskribatzen duen dokumentazioa sartuz eta, hala denean, behar diren proiektuak. Lehendakaritza eta Barne Departamentuak dirulaguntza emateko baldintza gisa jar lezake inbertsioan bidezko jotzen dituen aldaketak egitea.
IV. KAPITULUA. Denendako xedapenak
5. artikulua
1. Aurreko artikuluetan aipatutako dirulaguntzak eskuratzeko interesa duten erakundeek Foru Agindu hau argitaratu eta hilabeteko epearen barrenean eskatu beharko dituzte, Nafarroako Gobernuko Erregistro Orokorrean eskabidea aurkeztuz, dirulaguntzaren helburuak eta hurrengo ataletan ezarritako baldintzak frogatzen dituzten agiriekin batera.
2. Barne Zuzendaritza Nagusiko zerbitzu teknikoek eskariei buruzko txostena eginen dute eta aurrekontuetako baliabideen arabera baloratuko dituzte.
3. Kapitalak transferitzeko eskarien artean, lehentasunak ezarriko dira, irizpide hauek kontutan hartuz:
a) Toki entitateetako bizilagunak.
b) Inbertsioaren nolakotasuna.
c) Nafarroako Gobernuaren ekintzen plangintza arlo berean.
4. Zezen plazak egokitzeko laguntzetan, diru zenbatekoaren muga, gehienez ere, egindako inbertsioaren % 50 izanen da.
5. Udaltzaingoen dotazioendako eta drogamenpekotasunaren alorrean udaltzaingoek garatzen dituzten programendako laguntzetan, diru zenbatekoaren muga, gehienez ere, egindako inbertsioaren % 50 izanen da.
6. artikulua
Foru Agindu honek aipatzen dituen laguntzen onuradun diren entitateek ondorengo beharkizunok izanen dituzte:
a) Nafarroako Gobernuak jarduera eta datuak noiznahi egiazta ditzan onartzea.
b) Lehendakaritza eta Barne Departamentuak eskatzen dituen argibideak ematea.
c) Laguntza emateko ebazpenean ezartzen diren baldintzak betetzea.
d) Laguntza emateko ebazpenean ezartzen diren exekuzio epeak betetzea.
Beharkizun horietakoren bat ez betetzeak laguntzen iraungitzea ekar lezake.
Xedapen Gehigarri Bakarra
Foru Agindu honetan finkatzen denak eragindako kostua 1997ko ekitaldirako Nafarroako Aurrekontu Orokorretako kontusail hauen kargura finantzatuko da:
-02320/4600/2211, 05340-7 lerroa: "Borondatezko suhiltzaile, sorospen eta larrialdietarako hitzarmenak".
-02320/4810/2211, 05350-4 lerroa: "Sorospen eta larrialdietarako hitzarmenak, irabazi asmorik gabeko entitateekin".
-02320/7600/2211, 05370-9 lerroa: "Udaltzaingoaren programetarako dirulaguntzak".
-02400/7600/2211, 04190-5 lerroa: "Udaltzaingoen programetarako dirulaguntzak".
-02320/7600/2211, 05380-6 lerroa: "Borondatezko suhiltzaile, sorospen eta larrialdietarako hitzarmenak".
-02320/7600/2211, 05390-3 lerroa: "Zezen ikuskizunetarako aretoen segurtasuna hobetzeko dirulaguntzak".
-02320/7810/2211, 05400-4 lerroa: "Sorospen eta larrialdietarako hitzarmenak, irabazi asmorik gabeko entitateekin".
Xedapen Iragankor Bakarra
4.1 artikuluaren a) idazatian aipatu laguntzak jaso ahalko dituzte zezen plazen jabe ez izanik ere, toki horiek kudeatu, berak ez beste inork erabili eta erosketa espedientea hasi duten toki entitateek.
Azken Xedapen Bakarra
Foru Agindu honek Nafarroako Aldizkari Ofizialean argitaratzen den egunean berean hartuko du indarra.
