navarra.es
Castellano | Euskara | Français | English
Ezagutzera eman
164/1994 Foru Agindua, Lehendakaritza Kontseilariak emana, agiri pribatuak egiaztatzeko eskumena duten organoak arautzen dituena
(1994ko 152. NAOn argitaratutako testua, abenduaren 19an)
Atarikoa
Administrazio Publikoen Araubide Juridikoari eta Guztiendako Administrazio Prozedurari buruzko Legearen 46.1 artikuluak ezartzen du Administrazio Publiko bakoitzak erregelamendu bidez adieraziko dituela agiri publiko eta pribatuen kopia egiaztatuak luzatzeko eskumena duten organoak.
Idazkaritza Teknikoak arautzen dituen maiatzaren 16ko 50/1984 Foru Dekretuak, 2.D.3. artikuluan adierazten du organo horiek eskumena izanen dutela Departamentuan izapidatzen diren espedienteetan ondorioak izanen dituzten agiriak luzatzeko. Kontuan harturik arestian aipaturiko 46. artikuluan adierazitakoa, agiri publikoen egiaztapenari dagokionez, araubide hori aski dateke.
Nafarroako Gobernuak azaroaren 7an 218/1994 Foru Dekretua onetsi du, Nafarroako Foru Administrazioaren eta horren Erakunde Autonomoen agiri eta espedienteen erregistro eta segimendu sistema ezartzeko. Arau honek sistema bakarra eta berdina ezarri du agiriak erregistratzeko, eta bide ematen du Administrazio honetako eta horren Erakunde Autonomoetako organo guztiek erabil dezaten, Administrazio Publikoen Araubide Juridikoari eta Guztiendako Administrazio Prozedurari buruzko Legearen 35 h) eta 38. artikuluekin bat etorriz. Eskubide horiek benetan erabili ahal daitezen eta 46.1 artikuluan ezarritakoa garatzeko asmoz, bidezko da arautzea biztanleek Administrazio honetara ekartzen dituzten agiri pribatuak egiaztatzeko sistema.
Horrenbestez, Lehendakaritzako Idazkaritza Teknikoak proposaturik eta Foru Komunitateko Administrazioa eta Gobernua arautzen dituen apirilaren 11ko 23/1983 Foru Aginduaren 46.5.b. artikuluak ematen dizkidan eskurantzak erabiliz, agindu dut:
Lehena
Hiritarrek Foru Komunitateko Administrazioan edo haren Erakunde Autonomoetan izapidatzeko aurkezten dituzten agiri pribatuen kopiak egiaztatzeko eskumena duten organoak agirien sarrera erregistratzeko ahalmena duten berberak dira, azaroaren 7ko 218/1994 Foru Dekretuan ezarritako moduan.
Bigarrena
Egiaztapena egiteko, zigilu bat paratuko zaio agiriari eta bertan adieraziko da aurkezturiko kopia jatorrizko agiriarekin bat datorrela, zein organok egiaztatzen duen eta egiaztapena egiten duen funtzionarioaren sinadura.
Hirugarrena
Foru Agindu hau Nafarroako Aldizkari Ofizialean argitara ematea eta ohartaraztea indarra hartuko duela argitara eman eta hamabost egun natural iragan ondoren.
