Zein kasutan jotzen da etxebizitza babestu bat desegokitzat?
1) Haren tamaina ez denean egokia familia-unitatearentzat
Zure etxebizitza desegokitzat jotzen da, ezaugarri hauetakoren bat duenean:
- Gela gutxi ditu familia-unitaterako. Etxebizitza batek gela gutxi dituela esaten da, behin betiko kalifikazioa egitean gela kopuru hauek baditu (sukaldeaz, bainugelaz eta egongela-jangelaz gain):
- 1 gela, 3 pertsona edo gehiagorentzat.
- 2 gela, 4 pertsona edo gehiagorentzat.
- 3 gela, 7 pertsona edo gehiagorentzat.
- 4 gela, 9 pertsona edo gehiagorentzat.
- Azalera erabilgarri hau edo txikiagoa badu:
- 30 m², 1 edo 2 pertsonarentzat,
- 50 m², 3 pertsonarentzat,
- 65 m², 4 pertsonarentzat,
- 80 m², 5 edo 6 pertsonarentzat,
- 90 m², 7 pertsonarentzat, eta
- 10 m² gehiago 7tik gorako pertsona bakoitzeko.
- Aurreko edo ondorengo ahaide diren bi pertsonak gela konpartitu behar badute.
2) Ez dagoenean egokituta desgaitasuna duten pertsonen beharretara
Zehazki, honako egoera hauetakoren batean:
- Hanketan % 40ko mugimendu-desgaitasuna edo handiagoa duen pertsona bat bizi bada etxebizitzan, eta bertara iristeko 12 zentimetrotik gorako zenbait maila dauzkaten eskailera batzuetatik igaro beharra badago.
- Etxebizitzan % 65eko desgaitasuna edo handiagoa duen pertsona bat bizi bada, eta etxea haren beharretara egokitzea ezinezkoa bada teknikoki edo ekonomikoki.
Bizikidetzat joko dira 65 urtetik gorakoak, baldin eta hiru baldintza hauek betetzen badituzte:
- Etxebizitza desegokian familia-unitatearekin gutxienez bi urte daramatzate bizitzen.
- Lehen edo bigarren mailako ahaidetasuna dute familia-unitateko kideren batekin.
- Ez dira etxebizitza egoki baten titularrak, eta ez dira izan azken 5 urteetan ere.
Nolakoa da etxebizitza berri bat eskatzeko eta esleitzeko prozesua?
Etxebizitza aldatzeko eskaera egiteko, zure etxebizitza saldu behar diozu Administrazioari. Honako esteka honetan kalkula dezakezu zein den zure etxebizitza saltzeko gehieneko prezioa: Kalkulatu gehieneko salmenta-prezioa.
Eskabidea aurkeztuta, Etxebizitza Zerbitzuak 6 hilabeteko epea izanen du hura erosteko eta zuri beste etxebizitza bat eskaintzeko.
Beste etxebizitza horrek familia-unitatearen beharretara egokitua egon behar du, eta herri berean egon, edo gehienez ere 20 kilometrora, zure egungo etxebizitza dagoen tokitik lerro zuzenean neurtuta.
Genero-indarkeriaren biktima edo erakunde terrorista baten jomuga bazara, beste epe eta kokaleku batzuk ezar daitezke.
Uko egiten badiozu eskainitako etxebizitzari, ezin izanen duzu etxebizitza aldatzeko berriz eskatu, harik eta uko egin zenionetik 12 hilabete igaro arte.