Inskribatu beharra duten elikagai-enpresak eta -establezimenduak.
1. Erregistroan inskribatu behar dira elikagai-enpresen establezimendu guztiak edo, establezimendurik eduki ezean, enpresak berak, honako baldintza hauek betetzen badituzte, bat etorriz Elikagai Enpresen eta Elikagaien Osasun Erregistro Orokorrari buruzko otsailaren 18ko 191/2011 Errege Dekretuaren 2. artikuluan ezarritakoarekin:
a) Nafarroako Foru Komunitatean egotea establezimenduaren egoitza edo establezimendurik ez duen enpresaren egoitza soziala.
b) Jarduerak xede hauetakoren bat izatea:
- Giza kontsumorako elikagaiak edo elikadura-produktuak.
- Elikagaiekin kontaktuan egonen diren materialak eta objektuak.
- Elikagaiak egiteko erabiltzen diren lagungarri teknologikoak.
c) Jarduera honako kategoria hauetakoren batean sailkatuta egotea:
- Ekoizpena, eraldatzea, prestaketa eta/edo ontziratzea.
- Biltegiratzea eta/edo banaketa eta/edo garraioa.
- Europar Batasunetik kanpoko herrialdeetako produktuak inportatzea.
2. Txikizkako merkataritzako establezimenduek ez dute Elikagai Enpresen eta Elikagaien Osasun Erregistro Orokorrean inskribatu beharko, baina kasuan kasuko kontrol ofizialak egiten ahalko zaizkie. Establezimendu horiek definituta daude 1021/2022 Errege Dekretuaren 2. artikuluan (1021/2022 Errege Dekretua, abenduaren 13koa, zeinaren bidez arautzen baitira txikizkako merkataritzako establezimenduetan elikadura-produktuak ekoitzi eta merkaturatzeko zenbait higiene-baldintza). Puntu honetan aipatutako establezimenduak Nafarroako elikagai-enpresen eta -establezimenduen Osasun Erregistroan inskribatu beharko dira.