Nafarroako Gobernuak, gaurko bilkuran, Carlos III.a noblearen gurutzea eman die “Foru Komunitatearen garapenean, proiekzioan eta prestigioan modu nabarmenean lagundu duten” bost pertsonari, bakoitzaren jardueraren esparrutik.

Zehazki, dagozkien foru-dekretuak onartuta, Exekutiboak David Beriain Amatriain (hil ondoren) eta Florencio Dominguez Iribarren, Terrorismoaren Biktimen Memoriarako Zentroa Fundazioaren egungo zuzendaria, kazetariak kondekoratu ditu.

Halaber, Lorenzo Sarratea Azcarraga abeltzaina eta Erronkariko Jatorri Deituraren Kontseilu Erregulatzaileko presidentea saritu da; baita, Isabel Sola Gurpegui, CSIC-eko ikerlaria eta koronabirusean aditua, eta Helena Taberna Ayerra, zinema zuzendaria, ekoizlea eta gidoilaria ere.

Sarituak

David Beriain pasa den apirilaren 26an erail zuten Burkina Fason, eta Exekutiboak haren “haren ibilbide profesional agorrezina” eta “haren eskuzabaltasuna eta ausardia nabarmendu ditu, bere bizitza arriskuan jartzeagatik, gizarteak beste herrialde batzuetako gatazka nagusiak eta bizi-baldintzak eta errealitatea ezagutzearren”.

Bestalde, Florencio Dominguez kazetariari dagokionean, Nafarroako Gobernuak “haren kazetaritza-lan ona baloratu du, terrorismoaren biktimen esparruan eta haiei laguntza emateko esparruan kokatua, eta, batez ere, kazetaritzako profesionalekin etengabeko lankidetza-zerbitzua egiteagatik zorroztasuna eta analisia bandera gisa hartuta”.

Lorenzo Sarratea Azcarraga abeltzainaren inguruan, Erronkariko Jatorri Deitura bultzatzea eta horren alde 25 urtetik gora lanean aritzea nabarmendu dute; egun, bera da kontseilu erregulatzailearen burua. Era berean, haren bitartez, Gobernuak Deitura bera ere saritu nahi du: “Nafarroako enbaxadorea produktu horien bitartez, eta gure Komunitatea elikagaien lanketan bikaintasunarekin lotzen lagundu duena”.

CSIC-eko (Ikerketa Zientifikoen Kontseilu Gorena) ikertzaile eta koronabirusean aditua den Isabel Solari dagokionez, Carlos III.aren gurutzea eman diote haren ibilbide profesionala kontuan hartuta, eta, bereziki, “COVID-19aren pandemian zehar egindako dibulgazio-lan handiarengatik, lan hori ezinbestekoa baita garai hauetan”.

Azkenik, Helena Taberna zinemagileak kondekorazioa jaso du “kultur munduan, oro har, eta, batik bat, zineman, ibilbide profesional luzea eta arrakastatsua izateagatik eta Nafarroako kulturaren enbaxadore gisa estatuan eta nazioartean egindako lanarengatik”.

1997an sortutako saria

Nafarroako Karlos III.a Noblearen Gurutzea 1997. urtean sortu zuen Foru Gobernuak, Nafarroako gizartearen aurrerapenean edo Komunitatea kanpoan ezagutzera ematen nabarmen lagundu duten pertsonak eta erakundeak saritzeko.

Sariak Karlos III.a Noblearen izena hartu zuen, hots, Nafarroako erregeen artean nabarmendu zen monarkarena, bere izaera baketsu eta adiskidetzailearengatik, Kulturaren eta Artearen aldeko ekimenengatik eta Europako gainerako gorteekin bake- eta adiskidetasun-harremanak ezartzeagatik.

Kondekorazioa gurutze esmaltatu bat da, eta Nafarroako Errege Artxibo Nagusian gordetzen den ezkozko errege-zigiluan agertzen den Karlos III.a eseriaren irudia berregiten da, "Karolus regis navarre" legendaz inguratuta. Atzealdean Nafarroako ezkutua dago, "Nafarroako Foru Komunitatea" adierazpenaren eta "Cruz de Carlos III el Noble de Navarra” legendaren gainean”.