navarra.es
Castellano | Euskara | Français | English
Ezagutzera eman
196/1993 Foru Agindua, maiatzaren 18koa, Hezkuntza eta Kultura Kontseilariak emana, Nafarroako Foru Komunitateko ikastetxe publiko ez-unibertsitarioen funtzimenduak sortzen dituen dirusarrerak eta gastuak arautzeari buruzko uztailaren 6ko 250/1992...
196/1993 FORU AGINDUA, maiatzaren 18koa, Hezkuntza eta Kultura Kontseilariak emana, Nafarroako Foru Komunitateko ikastetxe publiko ez-unibertsitarioen funtzimenduak sortzen dituen dirusarrerak eta gastuak arautzeari buruzko uztailaren 6ko 250/1992 Foru Dekretuaren zenbait agindu garatzen dituena
(1993ko 69. NAon argitaratutako testua, ekainaren 4an)
Atarikoa
Uztailaren 6ko 250/1992 Foru Dekretuaren bidez Nafarroako Foru Komunitateko ikastetxe publiko ez-unibertsitarioen funtzionamenduak sortzen dituen dirusarrera eta gastuen araubidea arautu zuen. Urriaren 15eko 449/1992 Foru Aginduak arauketa hori garatu zuen.
Aipatu bi arau horiek zehazten duten kontuak emateko sistemak bere baitan hartzen ditu bertze egiaztabiderik ez duten gastuak. Beraz, Ikasleen Gurasoen Elkarteek, Udalek eta bertze entitate batzuek ikastetxeen esku uzten duten dirua, horiek administra dezaten, ikastetxe horietako kudeaketa kontuetatik kanpo gelditzen ahal da, gastu hori fondoak ateratzen diren entitateen aitzinean egiaztatzen bada. Berdintsu gertatzen da Nafarroako Gobernuko administrazio unitate jakin batzuek emandako laguntzak daudenean, fakturak administrazio unitatera igorriz egiaztatzen baitira.
Orain artekoan, dirusarrera eta gastu horiek kudeaketa kontutik kanpo gelditzea legezkoa bazen ere, jadanik egiaztatutako eragiketak baitziren, kudeaketa ekonomikoaren sistema berria abian paratu denetik erakutsitakoak agerian utzi du, arrazoi hori dela kausa, ihardunaren aldetiko okertzeak ematen direla. Kudeaketa kontuak ez du maiz ikastetxeko eragiketa kopuru osoaren azalpen aski argirik ematen eta horren saldoa eta banku kontuan egiazki dagoena ez dira bat izaten. Guzi horrek sortzen ahal duen nahasmendua larriago bihurtzen da ikastetxeak ez baitatoz bat gastu horiek egiaztatzerakoan, horietako batzuek kudeaketa kontuan ikastetxearen eragiketa ekonomiko guziak sartzen baitituzte, edozein izanik ere horien jatorri eta helburua, eta bertze batzuek, berriz, ez.
Egoera hau izanik, beharrezkoa da irizpideak bateratzea, erran nahi baita, ikastetxeko dirusarrera eta gastu guziak, denak batera, kudeaketa kontuan sartzea.
Bertze alde batetik, komenigarri da 250/1992 Foru Dekretuak aurrikusitako araubidea aplikatzeko esparrua argitzea, ezaugarri bereziak dituzten ikastetxeei dagokienean. Horretarako, behar diren egokitzapenak aurrikusiko dira.
Azkenik, Foru Aginduak zenbait gastu zehazten ditu, hain zuzen ere, toki entitateen jabetzako eraikinetan dauden ikastetxeen Kudeaketa Kontuan sartu behar ez direnak, udalek eskola eraikinak mantentzeko dituzten betebeharren barne baitaude.
Horrenbertzez, uztailaren 6ko 250/1992 Foru Dekretuaren Azken Xedapenetako Lehenak aurrikusitakoaren babesean, agindu dut:
Lehena
Nafarroako Foru Komunitateko ikastetxe publiko ez-unibertsitarioen kudeaketa kontuan dirusarrera eta gastu guziak sartuko dira, edozein izanik ere horien helburu eta jatorria, uztailaren 24ko 247/1991 Foru Dekretuan araututako jantokiei, eta ikasleendako egoitzei dagozkienak izan ezik.
Kontu hori gauzatzeko Foru Dekretu horren Eraskinean dagoen eredua erabiliko da.
Bigarrena
Ikastetxeek igorri beharreko fakturen kopia konpultsatuak gorde beharko dituzte, Ikasleen Gurasoen Elkarteek, Administrazio Publikoek edo bertze entitate edo administrazio unitate batzuek emandako dirua erabili dela egiaztatu ahal izateko.
Hirugarrena
1.-Lanbide Tailerrak uztailaren 6ko 250/1992 Foru Dekretua aplikatzeko esparruaren barnean sartuko dira.
2.-Tailerren Zuzendariak urteko aurrekontuaren proiektua prestatuko du eta Tailerren Batzordearen azterketa, enmienda eta onespenaren menpe jarriko, behin Foru Komunitateko Administrazioak Tailerren funtzionamendu gastuak babesteko erabiltzen duen dirua ezagun duela.
Zuzendariak kudeaketa kontuaren hiru ale prestaturik, Tailerren Batzordeak onetsi beharko du. Behin kontua onetsirik, Tailerren Batzordeak bi ale Hezkuntza eta Kultura Departamentura igorriko ditu, ondoko hamar laneguneko epean.
250/1992 Foru Dekretuak administratzaile edo Idazkariari edo Eskola Kontseiluko irakasle bati esleitzen dizkion eginkizunak, tailerretako irakasle bati emanen dizkio. Irakasle hori Tailerren Batzordeak izendatuko du.
Laugarrena
1.-Irakasleak Laguntzeko Zentroak uztailaren 6ko 250/1992 Foru Dekretua aplikatzeko esparruaren barnean sartuko dira.
2.-Ikastetxeko Zuzendariak urteko aurrekontuaren proiektua prestatuko du eta Zuzendaritza Kontseiluaren azterketa, enmienda eta onespenaren menpe jarriko, behin Foru Komunitateko Administrazioak ikastetxearen funtzionamendu gastuak babesteko erabiltzen duen dirua ezagun duela.
Zuzendariak kudeaketa kontuaren hiru ale prestaturik, Zuzendaritza Kontseiluak onetsi beharko du. Behin kontua onetsirik, Zuzendaritza Kontseiluak bi ale Hezkuntza eta Kultura Departamentura igorriko ditu, ondoko hamar laneguneko epean.
250/1992 Foru Dekretuak administratzaile edo Idazkariari edo Eskola Kontseiluko irakasle bati esleitzen dizkion eginkizunak, ikastetxean lanean ari den irakasle bati emanen dizkio. Irakasle hori Zuzendariak izendatuko du.
Bosgarrena
1.-Hezkuntza Bereziko Baliabideen Zentroa uztailaren 6ko 250/1992 Foru Dekretua aplikatzeko esparruaren barnean sartuko da.
2.-Ikastetxeko Zuzendariak urteko aurrekontuaren proiektua prestatuko du eta Hezkuntza Zuzendaritza Nagusiaren azterketa, enmienda eta onespenaren menpe jarriko, behin Foru Komunitateko Administrazioak ikastetxearen funtzionamendu gastuak babesteko erabiltzen duen dirua ezagun duela.
Zuzendariak kudeaketa kontuaren hiru ale prestaturik, Hezkuntza Zuzendaritza Nagusira igorriko du, horren onets dezan.
250/1992 Foru Dekretuak administratzaile edo Idazkariari edo Eskola Kontseiluko irakasle bati esleitzen dizkion eginkizunak, Ikastetxean lanean ari den irakasle bati emanen dizkio. Irakasle hori Zuzendariak izendatuko du.
Seigarrena
Hezkuntza Sistemaren Antolamendu Orokorrari buruzko urriaren 3ko 1/1990 Lege Organikoaren Xedapen Gehigarrietako Hamazazpigarrenak aipatzen dituen zainketa, mantenimendu eta begirapeneko gastuen artean ondokoak sartuko dira: garbiketa, berogailua, argindarra, ura, menpeko langileen horniketa eta egoitzak, patioak, material higigarriak eta instalazioak konpondu eta mantentzeko lanak. Beraz, aipatu gastu horiek ez dira Toki Entitateen jabetzako eraikinetan dauden ikastetxeen kudeaketa kontuan sartuko.
Zazpigarrena
Foru Agindu hau Nafarroako Aldizkari Ofizialean argitara dadin agintzea.
