navarra.es
Castellano | Euskara | Français | English
Ezagutzera eman
107/1996 Foru Dekretua, otsailaren 12koa, Nafarroako Oihangintzako Kontseilu Aholku-emailea sortzen duena
(Testu bateratua. Jatorrizkoa 1996ko 25. NAOn argitaratua, otsailaren 26an. Aldaketak: 5/1997 Foru Dekretua, urtarrilaren 13koa)
Atarikoa
Nafarroako oihan, baso eta mendien ondarea babestu eta garatzea ezbairik gabe ingurugiro arloko politika bateratu eta bateratzaile baten zati da eta, beraz, gizartearen partehartze handi baten premia duena eta, orobat, inplikatutako sektoreen zati handi batek bereganatu beharrekoa.
Agente sozial garrantzitsuenen eta oihangintza arloko bertze interesatu batzuen partehartze horrek planteiamendu tekniko, sozial, ekologiko eta kulturalei erantzun behar die eta Nafarroako oihangintzaren antolamendua erraztu eta hobetzeko proposamen eta ekimenen formulazioa bultzatu behar du, kasuan kasu, Nafarroako Foru Komunitatearen botere publiko eskudunek hartuko dituzten erabakietan sartuko direnak.
Beharrezko partehartze horri, perspektiba formal nahiz erreal batetik, gorputza emateko asmoz, beharrezkoa ikusi da Nafarroako Oihangintzako Kontseilu Arau-emailea sortzea. Kontsultak egin eta argibideak emateko organo kolegiatu honetan sartuko dira, batetik, Nafarroako Foru Komunitateko Administrazioaren ordezkariak eta, bertzetik, Nafarroako oihan, baso eta mendien ondarea babestu, kudeatu eta garatzearekin zerikusia duten sektoreen ordezkaritza zabala, bertzeak bertze, oihan jabeen elkarteak, zur arloko enpresariak, elkargo ofizialak, natura babesteko elkarteak, toki entitateak eta herrilurretako mendiak administratzeko Nafarroan dauden usadiozko elkarteak.
Horrenbertzez, Ingurugiro, Lurraldearen Antolamendu eta Etxebizitza kontseilariak proposaturik, Nafarroako Gobernuak mila bederatziehun eta lauretan hogeita hamaseiko otsailaren hamabian egindako bilkuran hartutako Erabakiarekin bat etorriz, dekretatu dut:
1. artikulua. Sortzapena.
1. Nafarroako Oihangintzako Kontseilu Arau-emailea sortu da, Nafarroako Foru Komunitatearen Administrazioak Nafarroako oihan, baso eta mendien ondarea babesteko eta garatzeko bultzatzen duen ihardueran argibideak eman eta parte hartzeko organoa modura.
2. Nafarroako Oihangintzako Kontseilu Arau-emailea Ingurugiro, Lurraldearen Antolamendu eta Etxebizitza Departamentuari atxiki zaio.
2. artikulua. Eginkizunak.
Nafarroako Oihangintzako Kontseilu Arau-emailearen eginkizunak ondoko hauek dira:
a) Ingurugiro, Lurraldearen Antolamendu eta Etxebizitza Departamentuari proposatzea, Nafarroako oihan, baso eta mendien ondarearen antolaketari, babesari eta hobekuntzari buruzko iharduketak.
b) Nafarroako Oihangintzako Planaren, Oihanetako Suteak aurrikusteko Planaren eta Natur Baliabideak antolatzeko Planen aurreproiektuen txostenak luzatzea eta Ingurugiro, Lurraldearen Antolamendu eta Etxebizitza Departamentuak oihan, baso eta mendi arloan duen iritzia eman dezan eskatuko dion oro.
c) Ingurugiro, Lurraldearen Antolamendu eta Etxebizitza Departamentuari oihan, baso eta mendien ondarearen arloan proposamenak, ekimenak eta iradokizunak prestatu eta igortzea.
3. artikulua. Osaketa.
1. Oihangintzako Kontseilu Arau-emailearen kideak hauek izanen dira:
a) Kontseiluburua: Ingurugiro zuzendari nagusia.
b) Kontseiluburuordea: Natura Babesteko Zerbitzuko zuzendaria.
c) Barne Zuzendaritza Nagusiko ordezkari bat, suteen kontrako babesaren arloan ezagutzak dituena.
d) Nekazaritza, Abeltzaintza eta Herrien Sustapenerako Departamentuko ordezkari bat, larreen arloan ezagutzak dituena.
e) Nafarroako Udal eta Kontzejuen Federazioko hiru ordezkari.
f) Nekazaritza, Arrantza eta Elikadura Ministerioko ordezkari bat.
g) Tradiziozko administrazio elkarte hauetako ordezkari bana: Aezkoako Ibarra, Erronkariko Ibarreko Mankomunitatea, Zaraitzuko Ibarreko Unibertsitatea, Bardeetako Komunitatea, Limitaciones Mendiaren Batzarrea, Aralarko Batasuna, Bidasoa-Berroarango Administrazio Batzarrea, Lokiz Mendiaren Administrazio Batzarrea eta Kintoko Mankomunitatea.
h) Mendi ingeniarien Elkargo Ofizialeko ordezkari bat.
i) Biologoen Elkargo Ofizialeko ordezkari bat.
j) Oihangintzako ingeniari teknikoen Elkargo Ofizialeko ordezkari bat.
k) Ingurugiroa babestu edo natura ikertzen aritzen diren entitate eta erakundeen bi ordezkari, Nafarroako Ingurugiroaren Kontseiluan entitate eta erakunde horien izenean daudenen artean hautatuak.
l) FORESNA-ZURGAIA Nafarroako Baso Elkartearen ordezkari bat.
m) Nafarroako Zur arloko Enpresarien Elkarteko ordezkari bat.
n) Idazkaria, hizpidearekin eta botoarekin: Oihan Antolamenduko atalburua edo, bera ez dagoenean, Ingurugiro, Lurraldearen Antolamendu eta Etxebizitza Departamentuko teknikari bat.
2. Kontseiluburuak bertze pertsona edo erakunde batzuk ere bilkuretan parte hartzea eska dezake edo, hala behar denean, haietara etortzeko gonbitea egin diezaieke, eztabaidatu behar diren gaien gainean duten ezagutza dela eta.
4. artikulua. Funtzionamendua.
Nafarroako Oihangintzako Kontseilu Arau-emailearen antolaketa eta funtzionamendua Administrazio Publikoen Araubide Juridikoari eta Guztiendako Administrazio Prozedurari buruzko azaroaren 26ko 30/1992 Legeko II. Tituluaren II. Kapituluan Administrazio Publikoen organo kolegiatuetarako xedatutakoari egokituko zaio.
Xedapen Gehigarri Bakarra
Nafarroako Oihangintzako Kontseilu Arau-emailearen txostenak, Nafarroako Ingurugiroaren Kontseiluak eta, hala behar denean, Toki Araubideko Foru Batzordeak eman behar dituztenak baino lehenago emanen dira.
Azken Xedapenetako Lehena
Ingurugiro, Lurraldearen Antolamendu eta Etxebizitza kontseilariari ahalmena eman zaio Foru Dekretu hau garatzeko behar hainbat xedapen eman ditzan.
Azken Xedapenetako Bigarrena
Foru Dekretu honek Nafarroako Aldizkari Ofizialean argitaratu eta biharamunean hartuko du indarra.
