navarra.es
Castellano | Euskara | Français | English
Ezagutzera eman
27/1994 Foru Dekretua, urtarrilaren 31koa, Nafarroako Lan Osasunaren Institutuari Nafarroako Ospitaleko Epaimahai Medikoaren eskumenak transferitzen dizki eta ezintasun egoerak ebaluatzeko prozedura arautzen duena
(1994ko 20. NAon argitaratutako testua, otsailaren 16an)
Atarikoa
Nafarroako Lan Osasunaren Institutua eratu eta horren egitura organikoa eta funtzionala ezartzen duen abenduaren 28ko 435/1992 Foru Dekretuak bere Laugarren Xedapen Gehigarriko azken lerroaldean xedatzen du Nafarroako Lan Osasunaren Institutuak bere gain hartuko dituela gaurdaino Nafarroako Ospitaleko Epaimahai Medikoaren kargu utzitako eginkizunak.
Nafarroako Foru Diputazioak 1969.eko ekainaren 6an hartutako Erabakiaren bidez, Nafarroako Ospitaleko Epaimahai Medikoaren esku utzi zen Foru Administrazioaren lanpostutarako izangaien azterketa medikoa egin beharra eta bajan dauden funtzionariei buruzko ebazpen medikoak ere, haien lan ezintasuna ebaluatzearren.
Udal funtzionarien eritasun bajak eta orobat ezkontza, ikasketak eta amatasun lizentziak arautzeari buruzko apirilaren 14ko 22/1983 Foru Dekretuaren bidez, Nafarroako Udal Funtzionarien Montepioan sartutako funtzionarien lan ezintasuna ebaluatzeko prozesuan Nafarroako Ospitaleko Epaimahai Medikoaren eskuhartzea aurrikusi zen.
Nafarroako Lan Osasunaren Institutua eratzearekin batera etorri da erakunde autonomo horrek lan osasunaren eta lan ezintasunen ebaluazio medikoaren arloko eskumenak bere esku hartzea. Neurri horri jarraikiz, arestian aipatutako Xedapen Gehigarrian aurrikusi da delako Institutuak bere gain har ditzala eskumen horiek Nafarroako Ospitaleko Epaimahai Medikoaren ordez.
Bestalde, Nafarroako Lan Osasunaren Institutua eratzeak aholkatzen du, halaber, Nafarroako Foru Komunitateko Administrazioaren lanpostutarako izangaien azterketa medikoak Nafarroako Ospitaleko Epaimahai Medikoak egin ordez aipatu erakundeak egin ditzala.
Azkenik, eskumen horiek transferitzearekin batera egoki juzkatu da lan ezintasunak ebaluatzeko prozedura arautzea. Horretan kontuan hartuko dira noiz‑nola hasi eta garatzen diren, bai eta Nafarroako Lan Osasunaren Institutuaren eraketa eta abiadan jartzea ere, aipatu lan egoeren ebaluazio prozesu hori egungo eskakizunetara egokitu dadin. Horretarako, prozedura horretan zehar zein organok esku hartu behar duten zehaztuko da, bai eta horien eskumenak ere.
Horrenbestez, Lehendakaritza Kontseilariak eta Osasunekoak proposatuta eta Nafarroako Gobernuak mila bederatziehun eta lauretan hogeita hamalauko urtarrilaren 31ko bilkuran hartutako Erabakiarekin bat eginez, dekretatu dut:
1. artikulua
Nafarroako Lan Osasunaren Institutuak bere gain hartuko ditu gaur arte Nafarroako Ospitaleko Epaimahai Medikoaren esku utzitako eginkizunak, arlo hauetan: Nafarroako Foru Komunitateko Administrazioko Jubilazio eta Pentsioen Kutxari eta Nafarroako Udal Funtzionarien Montepioari atxikitako funtzionarien lan ezintasunaren arloan, bai eta Nafarroako Foru Komunitateko Administrazioaren eta haren erakunde autonomoen lanpostutarako izangaien azterketa medikoaren arloan ere.
2. artikulua. Lan ezintasuna ebaluatzeko prozedura. Hasmenta.
1. Nafarroako Foru Komunitateko Administrazioaren Jubilazio eta Pentsio Kutxari eta Nafarroako Udal Funtzionarien Montepioari atxikitako funtzionarien lan ezintasuna ebaluatzeko prozedura ofizioz edo interesatuak hala eskatuta hasten ahal da.
2. Prozedura interesatuak eskatu duelako hasten denean, ebaluazio eskaerarekin batera enplegatuak egoki juzkatzen dituen txosten mediko guztiak ere aurkeztuko ditu.
3. Funtzionaria zein Departamentu, erakunde autonomo edo Toki Entitatetan ari den, hango bertako Idazkari Teknikoa nahiz Arduraduna izanen da prozedurari hasiera ofizioz emanen dion organo eskuduna.
4. Nolanahi ere, ebaluazio eskaria Funtzio Publikoaren Zuzendari Nagusiari zuzendu beharko diote Nafarroako Foru Komunitateko Administrazioko funtzionariek eta Toki Administrazioko Zuzendari Nagusiari, aldiz, udaletakoek. Zuzendari Nagusiek behar den Ebazpena emanen dute. Horrekin ebaluazio prozedurari hasiera emanen zaio eta hura Nafarroako Lan Osasunaren Institutura igorriko da.
3. artikulua. Prozeduraren garapena: ihardun behar duten organoen osaketa eta eginkizunak.
Nafarroako Lan Osasunaren Institutuko Lan Osasunaren arloko Laguntza Teknikorako Zerbitzuak baloratuko du ebaluazio eskaria, eta funtzionariari eskatuko dio beharrezko azterketa medikoa egitera joan dadin. Komeni bada froga osagarriak edo txostena handitzea eskatzen ahal dira, eta ondoren, beste txosten bat egitea, zeinetan azalduko baita ea funtzionaria sendatzeko bidean dagoen ala ez, ondoko neurriak jarriz:
a) Funtzionaria senda daitekeela uste badu, alta emanen zaio edo lehen zegoen bezala bajan segi dezala adierazi.
b) Sendatzeko bidean ez badago, irekitako espedientea Nafarroako Ezintasunak Baloratzeko Epaimahai Medikora igorriko du. Horixe da, hain zuzen, ondoko artikuluaren gaia.
4. artikulua
1. Nafarroako Ezintasunak Baloratzeko Epaimahai Medikoa eratzen da. Horren helburua da espedientean azaltzen diren puntu guztien balorazioa burutzea, bai eta lehendik jaso ez eta baloratu ez diren beste batzuena ere. Horietaz Ebazpen Mediko bat emanen du Lan arloko Erizpen Klinikoa adieraziz, zeinetan hauek agertuko baitira: enplegatua ohizko lanean egokitzen den ala ez, murriztapen, ondorio eta desegokitzapen funtzionalei buruzko behar diren oharrak eta prozedurarako interesgarri juzkatzen diren beste puntu guztiak.
2. Nafarroako Ezintasunen Epaimahai Medikoa Epaimahaiburuak eta hiru Mahaikidek osatuko dute.
a) Epaimahaiburu Nafarroako Lan Osasunaren Institutuko Osasun Laguntza Teknikorako Zuzendaria izanen da.
b) Mahaikide hiru Mediku Espezialista izanen dira, Osasun Kontseilariak izendatuak, Nafarroako Lan Osasunaren Institutuko Zuzendariak proposatuta. Horietako bat arituko da Epaimahaiko Idazkari lanetan.
Ezintasunak Baloratzeko Epaimahai Medikoaren kide bakoitzak ordezko bat izanen du, aurreko lerroaldekoak izendatzeko erabilitako modu berean izendatuta, titularra ez dagoenean, postua hutsik gelditu nahiz gaixotzen denean, haren lekua hartuko duena.
3. Nafarroako Ezintasunak Baloratzeko Epaimahai Medikoaren ihardute erregimena Epaimahaiaren kideek berek zehaztuko dute.
4. Nafarroako Ezintasunak Baloratzeko Epaimahai Medikoak proposamen hauek egiteko eskumena izanen du:
a) Ezintasun iraunkorra deklaratzeko edo ez deklaratzeko proposamena. Hala behar denean, ezintasuna nola gertatu den eta zein gradutakoa den zehaztu beharko da.
b) Ondorio eta desegokitzapen funtzionalak direla‑eta, funtzionaria lanpostuz aldatzea komeni bada, proposamen hori egitea.
c) Lan istripuen edo eritasun profesionalen ondoriozko lesio, mozketa eta itxuragabetzeak izan direla deklaratzeko proposamena, zehaztuz zein kalte‑ordain dagokion, Gizarte Segurantzako legerian aurrikusitako baremoaren arabera.
d) Eritasun profesionalen kasuan, behaketaldi medikoa luzatzeko proposamena.
5. artikulua
Nafarroako Ezintasunak Baloratzeko Epaimahai Medikoak aurreko artikuluko 4. atalean agertzen diren proposamenetariko bat igorriko dio Funtzio Publikoaren Zuzendari Nagusiari edo Toki Administraziokoari, Nafarroako Foru Komunitateko Administrazioaren funtzionariak edo Udaletakoak direnean, eta Zuzendariek kasu bakoitzari dagokion Ebazpena emanen dute.
Lehendabiziko Xedapen Gehigarria
Nafarroako Ospitaleko Epaimahai Medikoak esleitu zitzaizkion eginkizunetan aritzeari utzi eginen dio eta kideen izendapena indarrik gabe geldituko da Foru Dekretu honek indarra hartu bezain laister. Direlako eginkizunak Nafarroako Foru Diputazioak 1969.eko ekainaren 6an hartutako Erabakiaren bidez esleitu zitzaizkion, bai eta udal funtzionarien eritasun bajak eta orobat ezkontza, ikasketa eta amatasun lizentziak arautzeari buruzko 1983.eko apirilaren 14ko 22/1983 Foru Dekretuaren bidez ere.
Bigarren Xedapen Gehigarria
Nafarroako Administrazio Publikoaren Institutuak bere lankidetza teknikoa eskainiko dio Nafarroako Lan Osasunaren Institutuari Foru Dekretu honetan araututako gaiei buruzko alderdi psikologikoetan.
Hirugarren Xedapen Gehigarria
Iruña, Tafalla eta Tuterako Udal Funtzionarien Montepioek Nafarroako Lan Osasunaren Institutuari lankidetza eskatzen ahal diote, Montepioei atxikitako funtzionarien ezintasun egoerak ebaluatzeko, Foru Dekretu honetan ezarritako prozedurari jarraikiz.
Xedapen Iragankor Bakarra
Foru Dekretu honek indarra hartu baino lehen irekitako ezintasunagatiko jubilazio espedienteak, lehen indarra zuen prozeduraren arabera gauzatuko dira.
Azken Xedapenetan Lehena
Foru Dekretu honetan ezarritakoari aurka egiten dioten lerrun bereko edo beheragoko arau guztiak indarrik gabe geldituko dira.
Azken Xedapenetan Bigarrena
Foru Dekretu honek indarra hartuko du Nafarroako Aldizkari Ofizialean argitaratu eta hurrengo egunean.
