Nafarroako Museoak Oraina aukeratzea da, piezatan eginen dugu proiektua aurkeztu du gaur, proposamen aitzindari bat non 2021ean Nafarroako hamar emakume ilustratzaileren obrak enkargatu eta erosiko diren. Datorren urtean liburu bat argitaratu eta aldi baterako erakusketa bat egingo da.

Ekimena Museoko Arte Obra Garaikideak Eskuratzeko Programaren barruan kokatzen da. Egitasmoa 2020an ezarri zuen Kultura eta Kirol Departamentuak, eta Nafarroako Gobernuaren arte garaikidearen bilduma publikoa handitzea eta osatzea du helburu.

Ilustrazioak eskuratzearen arrazoia "arte bisual mota honen bildumazaletasun publiko ezaz jabetzea da, une garaikidean hain garrantzitsua dena", aurkezpenean azaldu dutenez. Ilustratzaile nafarren obrekin proiektu espezifiko bat garatzeko beharra argi eta garbi ikusi zen Kultura Zuzendaritza Nagusiak 2020an erosi beharreko lanak hautatzeko sortutako batzordean.

Proiektuaren aurkezpenean parte hartu dute Rebeca Esnaola Kultura eta Kirol kontseilariak, Mercedes Jover Nafarroako Museoko zuzendariak, Susana Romanos komisarioak eta Leire Urbeltz ilustratzaileak.

Esnaolak adierazi duenez, "ekintza honek erosketa baino helburu zabalagoa du, eta Nafarroako sorkuntza garaikidearen inguruko bitartekaritza eta programa publikoak sortzea barne hartzen du". Gainera, proiektuak "museo-bildumetan emakume artisten ordezkaritzaren defizit historikoa arintzen" lagunduko duela uste du.

Susana Romanos proiektuaren komisarioak azaldu duenez, ilustrazioa "kontzeptu zabala" eta "fenomeno homogeneoa" da, eta izendatzaile komun bat du: "Marraztutako irudia esanahiz kargatzea, grafikoki eta sinbolikoki lantzea, testuinguru narratibo batean txertatzea irakurketa hobea, zirraragarriagoa lortzeko".

Egileei egindako enkarguari dagokionez, adierazi du "egunerokotasunetik abiatuko dela, orainaren, hemengoaren eta orainaren eraikuntzaz galdetzeko; proiektuak parte-hartzaileak eta publikoa gonbidatzen ditu egunerokotasunaren esperientzia estetikoa eraikitzera eta, aldi berean, Nafarroako Museoak memoria kultural gisa duen ideiarekin jarraitzeko ildo bat planteatzen du".

Honako hauek dira artista gonbidatuak: Myriam Cameros (1978, Iruña); Irati Fernández Gabarain (1981, Iruña); Andrea Ganuza (1988 , Iruña); Liébana Goñi (1986, Iruña); Cristina Jiménez (1981, Iruña); Aizpea Lasa (1985, Iruña); Iratxe López de Muniáin (1985, Iruña); Itziar Repáraz (1990, Iruña); Leire Urbeltz (1985, Iruña); y Natalia Zaratiegui (1981, Iruña).

Liburua eta erakusketa

Proiektua bi adierazpenen bidez garatuko da: aldi baterako erakusketa bat 2022an eta liburu bat, "azken hau ilustrazioen toki naturala". "Garrantzitsua da azpimarratzea argitalpen hau ez dela erakusketaren katalogo bat izango, biak proposamen beraren zati desberdinak baitira: independenteak diren aldi berean osatzen dira", esan du komisarioak.

"Ez da katalogo bat”, gaineratu du Romanosek. “Berez proiektu bat denez, ez da erakusketa baten osagarri. Ez da liburu ilustratu bat ere, kasu honetan ilustrazioak ezinbestekoak baitira. Eta ez da album ilustratu bat, testua eta ilustrazioa aldi berean sortu ohi baitira (kasu askotan, idazlea eta ilustratzailea pertsona bera dira), eta hemen ez da hori gertatzen ".