Isabel Rodriguez Etxebizitza eta Hiri Agenda ministroa Nafarroako hiriburuan izan da gaur goizean, 21 udalerri Etxebizitza Merkatu Tentsionatuko Eremu izendatu berri izana txalotzeko eta Begoña Alfaro Nafarroako Gobernuko hirugarren lehendakariorde eta Etxebizitzako, Gazteriako eta Migrazio Politiketako kontseilariaren ahaleginak eskertzeko, "herritar guztientzako etxebizitza irisgarri eta duina lortzeko". Azpilagañako adinekoentzako apartamentuen eraikina bisitatu du. Nasuvinsak sustatu du, eta eraikuntza jasangarriaren erreferentzia da zurezko egituragatik.

Ministroak adierazi duen bezala, “arazo hori konpontzeko tresnak eta ekintzak gero eta adostuagoak daude, eta etxebizitza lortzea eragozten duten tentsioz beteriko merkatuaren egoera leheneratzeko ekintza zehatzak arautu behar dira; horretarako, laguntza gehiago eman behar zaizkie etxebizitza gehien behar dutenei”. Ildo horretan, “Nafarroari babes berezia emateko” konpromisoa berretsi du, “etxebizitza eskuragarrien parke publikoa handitzeko neurriak aplikatzeko orduan”, esaterako, 21 udalerritan Etxebizitza Merkatuaren Gune Tentsionatua izendatzea, eta Foru Komunitatearen administrazioen arteko lankidetza txalotu du, “ezinbestekoa eta ukaezina baita herritarrei erantzuteko eta etxebizitza eskuratzeko arazoa konpontzeko, ondasun soziala eta eskubidea baita”.

Bestalde, Alfaro lehendakariordeak nabarmendu duenez, “ezinbestekoa da Nafarroako 21 udalerritan Etxebizitza Merkatuaren Gune Tentsionatuaren izendapenarekin batera datorren Neurrien Planean jasotako ekintza guztiak jadanik abian jartzea, lehenengo eta behin merkatua desitxuratu eta etxebizitzen eskaintza eskasa arrazoizko prezioetan arintzeko”. “Nafarroan, Espainiako Estatu ia osoan bezala, ez dugu etxebizitza faltaren arazorik, baizik eta herritar guztiek etxebizitza eskuragarririk ez izatearen arazoa, gero eta pertsona gehiago uzten baititu merkatutik kanpo eta oinarrizko beharrizan batekin, eta eskubide batekin, agerian”, esan du, jarraian erantsiz “Nafarroako Gobernua bere esku dagoen guztia egiten ari dela eskubide subjektibo hori bermatzeko, baina inplikatutako alderdi guztien laguntza behar dela hori lortzeko”.

Bisitan, Joseba Asiron Iruñeko alkateak ere parte hartu du, zeinentzat “Merkatu Gune Tentsionatu izendapena alerta seinale bat den, baina baita bultzada bat ere: gaur bisitatzen dugun eraikin hau posible egin dugun administraziook herritarrak higiezinen gehiegikeriaren aurrean defendatuko dituen politika aktibo batekin konprometituta gaude”. Ildo horretan, “epe laburrean, ertainean eta luzean jarduteko konpromisoa” hartu du, “Iruñean etxebizitza eskuratzeko eskubidea berreskuratzeko. Eta hori lankidetzatik egitea, proiektu honetan bezala, etorriko diren beste askoren hasiera baino ez baita.

Zurezko egituraren erabilera altuerako eraikuntzan

Azpilagañako eraikinak, Nasuvinsak sustatuak, guztira alokairuko 32 apartamentu ditu 60 urtetik gorakoentzat eta desgaitasuna duten pertsonentzat, eta dagoeneko erreferentea da eraikuntza jasangarrian, zurezko egituragatik; izan ere, aerotermina-sistemekin, eguzki-panel hibridoekin eta energia-kudeaketa adimentsu berritzaileekin batera, kontsumo ia nuluko eraikin bihurtzen dute.

Duela gutxi, eraikin horrek akzesit bat jaso du Jardunbide Egokien AVS sarietan, irisgarritasuna, energia-eraginkortasuna eta ingurumen-jasangarritasuna barne hartzen dituen eredua dugulako hizpide. Halaber, aipatu behar da proiektu hau Nasuvinsaren eta Iruñeko Udalaren arteko hitzarmen baten barruan dagoela, eta Next Generation EU programaren Europako funtsekin finantzatu dela, birgaitze jasangarriko eta hiri-berroneratzeko ekimenen barruan.

Bilera Chivite Lehendakariarekin

La Presidenta de Navarra, Maria Chivite Navascues Nafarroako Lehendakaria Isabel Rodríguez Garcia Etxebizitza ministroarekin eta Begoña Alfaro hirugarren lehendakariorde eta Etxebizitza, Gazteria eta Migrazio Politiketako kontseilariarekin bildu da Nafarroako Jauregian. Chivite Lehendakariak Rodriguez ministroarekin partekatu ditu Nafarroako Gobernuak etxebizitzaren arloko politika publikoen inguruan hartutako azken neurriak, esaterako prezioen mugaren hurrengo aplikazioa edo hainbat udalerri tentsioz betetako eremu izendatzea. 

Bilera horretan, gainera, Chivite Lehendakariak ekainaren 6an, ostirala, Bartzelonan egingo den Presidenteen Konferentzian azalduko dituen gaiekin lotutako atalak jorratu dira. Bertan, besteak beste, etxebizitza arrazoizko prezioekin eskuratzearen gaia aztertuko da.