Epifanio Osoro Icobalceta preso durangarra Nafarroako Gobernuko DNA Bankuak identifikatutako bosgarren pertsona da, 2022ko martxoan Berriozarko udal hilerrian hobitik ateratako gorpuzkien analisiari esker. Hala baieztatu du Foru Gobernuko Memoria eta Bizikidetzako, Kanpo Ekintzako eta Euskarako Departamentuak, Memoriaren Nafarroako Institutuaren bitartez. CNT-ko militante bizkaitarra San Kristobal gotorlekuko 21 presok osatutako talde bateko kidea zen, eta 1936ko azaroaren 1ean epaiz kanpo erahil zituzten. 

Epifanio Osoro Icobalceta Durangoko bizilaguna zen (Bizkaia, Euskadi). Hil zutenean, Epifanio Osorok 22 urte zituen ezkongabea eta, lanbidez, mekanikaria zen. Berarekin erahil zituzten gehienak bezala, Confederación Nacional del Trabajo (CNT) sindikatuan militatzen zuen. Valladolideko Auzitegiak 6 urte, 10 hilabete eta egun bateko espetxe nagusia ezarri zion eta, ondoren, Ezkaba mendigaineko gotorlekuan espetxeratu zuten. 

Errepresaliatuen gorpuzkiak identifikatu dituzten beste kasu batzuetan bezala, lehenengo urratsa senideak aurkitzea izan da, eta prozesu horretan Elena Aliaga eta Jimi Jiménez ikertzaileek paper nabarmena izan dute. Ondoren, lagin genetikoak ematea funtsezkoa izan da, Nafarroako Gobernuko DNA Bankuak erkatu ahal izateko. Banku horren laborategi genetikoa NASERTIC enpresa publikoak kudeatzen du, eta Nafarroako Auzitegi-Medikuntzaren eta Zientzia Kriminalistikoen Institutuaren mende dago. 

Hori dela eta, Memoria eta Bizikidetzako, Kanpo Ekintzako eta Euskarako Departamentuak DNA laginak izatea bereziki garrantzitsua dela azpimarratu du, identifikatu gabe dauden leku horretan aurkitutako gorpuen gorpuzkiak alderatzeko, preso horietako batzuen senideen lagin genetikoak falta baitira. Aurreko deialdien ondoren lagin genetiko berriak lortu dira, baina oraindik batzuk falta dira alderatu ahal izateko. Horregatik, Nafarroako Memoriaren Institutuak gogora ekarri nahi du Berriozarren desobiratutako presoen zerrenda, haien senideekin harremanetan jartzea ezinezkoa izan baita orain arte. 

DNA laginak hartzeko prozesua hasteko, ezinbestekoa da biktimen senideak Memoriaren Nafarroako Institutuarekin harremanetan jartzea ondoko posta elektronikoaren bidez: inm@navarra.es.