Ana Ollo lehendakariorde eta Memoria eta Bizikidetzako, Kanpo Ekintzako eta Euskarako kontseilariak eta Manuel Rodríguez Nafarroako Zientzia Politikoetako eta Soziologiako Doktore eta Lizentziatuen Elkargo Ofizialeko dekanoak bi erakundeen arteko hitzarmena berritu dute berriki.

Hitzarmen hau eta Nafarroako Gobernuak ematen duen 27.500 euroko dirulaguntza 2020az geroztik ezarritako lankidetza-esparruan sartzen dira. Lankidetza horren helburua honako jarduera hauek batera bultzatzea da: ikaskuntzarako gune bat abian jartzea, bizikidetzari buruzko campusa, Nafarroako bizikidetzaren zenbait erronkari buruzko hausnarketa pausatu eta sistematikoa egiteko; Nafarroako I. Bizikidetza Plana ezartzeko ekintzen monitorizazioa eta ebaluazioa; Nafarroako Soziologia eta Politologia Elkargoaren egitura eta baliabideak erabiltzea; Nafarroako I. Bizikidetza Plana ebaluatzeko prozesua eta emaitzak zabaltzeko; edo Nafarroako II. Bizikidetza Planaren diseinuari eta garapenari laguntza teknikoa ematea.

Aurten, Nafarroako Zientzia Politikoetako eta Soziologiako Doktore eta Lizentziatuen Elkargo Ofizialak aurkeztutako proiektuak hainbat ekimen garatuko ditu Nafarroako Gobernuak, zehazki, Memoria eta Bizikidetzako Zuzendaritza Nagusiak, burutzen dituen ebaluazio-prozesuak behatzeko, Nafarroako Bizikidetzaren I. Plan Estrategikoa erreferentziatzat hartuta. Proiektu honek, behaketaren eta etengabeko ikaskuntzaren bidez, hobekuntzak identifikatzeko balioko du, eta horiek aplikatzeko proposamen profesionalak egingo ditu. Era berean, laguntza kualifikatua emango du laster hasiko den Nafarroako II. Bizikidetza Plana diseinatu eta garatzeko.