Nafarroako Gobernuak, gaurko bilkuran, zibersegurtasunari, bioteknologiari eta ekonomia zirkularrari buruzko hiru unibertsitate master berri ezartzea baimendu du Nafarroako Unibertsitate Publikoan (NUP). Master horiek 2024-2025 ikasturtean hasiko dira irakasten.

Baimendutako lehenengo titulazioa Zibersegurtasuneko Unibertsitate Masterra (MUCIBER) da, 60 kredituz osatua. Masterraren eragin ekonomikoari buruzko txostenean jasotakoaren arabera, titulazio honek ekintzailetza-ekosistema suspertzen eta start-up berriak sortzen lagun dezake, bai zerbitzuena, bai produktuena, enpresen erresilientzia hobetzen lagunduko dutenak digitalizatzen ari diren une gorenean.

Tituluak, gainera, bat egiten du Nafarroako Espezializazio Adimentsuaren S4 Estrategiarekin. Estrategia horren jarduera-ildoetako bat da prozesuen, produktuen eta zerbitzuen trantsizio digitala sustatzeko beharra, zehazki, 90. lan-ildoan, zibersegurtasunari, biometriari eta identitate digitalari, enpresa-komunikazioen optimizazioari eta informazioaren sekurizazioari buruzkoa. Gaur egun, Iberus Campusaren inguruan ez dago Zibersegurtasunari buruzko masterrik unibertsitate-irakaskuntza publikoaren esparruan.

Gaur baimendutako bigarren titulazioa Ikerketa eta Berrikuntza Bioteknologikoko Unibertsitate Masterra (MUINBIOT) da, eta horren 60 kredituk jarraipena emango diete Bioteknologiako eta Zientzietako graduetako ikasketei.

Bi helbururi erantzuten die: bioteknologian espezializatutako profesionalak prestatzea eta doktoregoan sartzen uztea, ikerketa-karrera hasteko. Ezagutza eta berrikuntza eskaintzen ditu, Nafarroako Espezializazio Adimentsuaren Estrategiak lehentasunezkotzat jotzen dituen ardatzetako batzuei lotuta, hala nola elikadura osasungarri eta jasangarriari eta medikuntza pertsonalizatuari. NUPek 2014. urtera arte eskaini zuen Agrobioteknologiako Unibertsitate Masterraren ordezkoa da.

Azkenik, hirugarren titulazioa Ekonomia Zirkularreko Unibertsitate arteko Masterra (MUEC) da. Iberus Campusean emango da, Lleidako Unibertsitatearekin, Errioxako Unibertsitatearekin eta Zaragozako Unibertsitatearekin batera. Azken horrek koordinatzaile gisa jarduten du. Bere interesa Espainiako Gobernuaren ekintza-plan zirkularrarekin eta Europako Batzordearen jarduera-ildoarekin duen loturatik dator, Nafarroa Zirkular (NZK) estrategian islatzen dena.

Unibertsitate arteko master honek diseinu berri bat eskaintzen du unibertsitate horietan dagoen titulu bererako, eta horren lekukoa hartuko du. Titulu berriak 60 kreditu ditu eta gaztelaniaz eta aurrez aurreko modalitatean emango da. Hala ere, ikasleak fisikoki hainbat zentro desberdinetan egon ahal izango dira, irakaskuntza sinkronoa eta presentziala ahalbidetzeko baliabide teknologiko egokiak erabiliz.

ANECAren eta NUPeko Gizarte Kontseiluaren aldeko ebaluazioa

Hiru titulazio berriei bideragarritasun ekonomikoari buruzko azterketak egin zaizkie, eta Unibertsitateko, Berrikuntzako eta Eraldaketa Digitalako Departamentuko Unibertsitateko Zuzendaritza Nagusiaren eta Unibertsitate Ministerioaren egiaztapenaren oniritzia dute.

Kalitatea Ebaluatu eta Egiaztatzeko Agentzia Nazionalaren (ANECA) Agentzia Nazionalaren aldeko ebaluazioa dute, Unibertsitate Kontseiluak ere positiboki egiaztatu ditu eta Nafarroako Unibertsitate Publikoaren Gizarte Kontseiluak aldeko txostena eman du. Ekonomia Zirkularreko Unibertsitate arteko Masterrak Aragoiko Unibertsitateko Kalitate eta Prospektiba Agentziaren (ACPUA) oniritzia ere badu.

Foru Gobernuak Unibertsitate Politikako Konferentzia Nagusiari eta Unibertsitate Ministerioari helaraziko die gaur hiru master horiei emandako baimena, Espainiako Gobernuari aurkez diezaion titulu horiek modu ofizialean ezartzeko eta Unibertsitate, Zentro eta Tituluen Erregistroan (RUCT) inskribatzeko proposamena.