Foru Gobernuak gaurko bilkuran hartutako akordioaren bidez, kanpoan bizi diren Nafarroako herritarrekiko harremanen foru-legearen proiektua onartu da. Ondoren, testua Nafarroako Parlamentura bidaliko da, eztabaidatu eta, hala badagokio, onar dezan. 

Gobernu Bilkuraren osteko prentsaurrekoan Ana Ollo Herritarrekiko Harremanetako kontseilariak adierazi duen bezala, arau honek “lege-hutsune bat estaliko du” esparru honetan. Ekimen honen helburua da, kontseilariaren esanetan, “kanpoan dauden herritar nafarrekiko harreman instituzionalak sendotzea eta oinarrizko jarduketa-lerroei sostengu juridiko bat ematea, kolektibo hori osatzen dutenei laguntza, asistentzia eta babesa errazte aldera”.

Legeak kanpoan dauden nafartarrei honako eskubideak onartzen dizkie, Foru Komunitatean bizi diren herritarrekiko baldintza berdinetan: eskubidea kultura ondarea eskuratzeko; titulartasun edo kudeaketa publikoa duten jolas- eta kirol-gunetan, Nafarroako kultura, hizkuntzak eta historia ikasteko; Administrazioaren arreta jasotzeko Kanpo Arazoetako Nafarroako Komunitatetako Kontseiluaren bidez; eta itzultzeko aukeren gaineko informazioarekin kontatzeko nahiz helburu horretarako aholkua jasotzeko.

Era berean, arauak onartzen du, besteren artean, itzuleratik eratorritako balizko desoreka egoerak prebenitzeko hezkuntzaren konpentsazio planak eskura izatea; baita Nafarroako Gobernuak etxebizitza babestuen esparruan eskaintzen dituen haiek ere, arloko berariazko araudiak bere kasuan eta itzuleraren harira xedatzen dituen baldintzak eta eskakizunak betetzen badira. Itzulera bezala ulertzen da Espainiatik kanpoko herrialde egoiliarretik Nafarroako Foru Komunitatera lekualdatzea, bertan egoitza iraunkorra finkatzeko asmoarekin.

Indarrean dauden prestazio edo onura sozialak eskuratzea bermatzen du

Azken finean legeak xedatzen duena da Gobernuak pertsona horiei bermatuko dietela indarrean dauden prestazioak edo onurak eskuratzeko aukera, esaterako seme-alabak eskolaratzea, etxebizitza publikoaren, osasun zerbitzuen, oinarrizko errentaren eta egoitza-plazen eskaintza, besteren artean.

Horretarako, ez da derrigorrezkoa izango Foru Komunitatean aurretiazko egoitza egiaztatzea, hori eskatzen den kasu haietan, betiere, eskatutako gainerako eskakizunak betetzen direla zainduz, aurretiaz Espainiatik kanpo bizi izan badira emigratzaile ez direnei eskatzen zaien aurretiazko egoitza-epearekiko berdina edo luzeagoa den epe iraunkor batean.

Bestalde, gaur onartutako lege-proiektuak arautzen ditu, halaber, kanpo esparruko komunitate nafarrak eta haien aintzatespen ofiziala, gainera Nafarroako Komunitateetako Kontseilua sortuz, kontsulta- eta partaidetza-erakunde bezala, esparru honetan erakunde arteko lankidetza baliabideak aurreikuste aldera.

NEXT Estrategia

Ollo kontseilariak azpimarratu du proiektuaren jatorria, besteren artean, Foru Komunitatera itzulera boluntarioa errazteko helburuari jarraiki, Herritarrekiko Harremanetako departamentuak sustatutako Kanpo Esparruko Herritar Nafarren NEXT Estrategiari dagokiola.

Ildo horretatik, gogorarazi du, Kanpo Ekintzako Zuzendaritza Orokorretik arlo honetan aholkua ematen duen NEXT leihatilatik, “egiaztatu ahal izan zela kanpo esparruko herritar nafarrek ezin zituztela Administrazio Publikoaren hainbat zerbitzuetako onurak jaso lurraldean bizi diren nafartarren baldintza berdinetan.

Asmoa izanik, besteren artean, egoera hau zuzentzea eta atzerrian bizi diren nafartarrei foru Administraziorako sarbide aukera berdinak eskaintzea, sortu zen –azaldu du- itzulera prozesuan dauden pertsonak aintzat hartzeko ideia, eta gaur onartutako lege-proiektuan hori bermatzen da”.