Nafarroako Gobernuak gaur goizean ezohiko bilkuran onartu du, Estatuaren eta Nafarroako Foru Komunitatearen arteko Hitzarmen Ekonomikoa aldatzeko Negoziazio Batzordeak sinatutako akordioa Nafarroako Parlamentura igortzea.

Erabaki hori Ekonomia eta Ogasun Departamentuak talde parlamentarioekin izandako harreman-erronden ondoren etorri da, testua Ganberan onartuko dela bermatzeko beharrezkoa den adostasunaren bila. Horren ondorioz, legea aurrera aterako da, aurkako botorik gabe.

2021eko abenduaren 20an, Estatuaren eta Nafarroaren arteko Negoziazio Batzordeak bilera bat egin zuen. Nafarroako ordezkaritzatik, Parlamentuan ordezkaritza duten indar guztiek parte hartu zuten,  eta aho batez erabaki zuten Hitzarmen Ekonomikoa aldatzea.

Bi administrazioen arteko akordioa lortu ondoren, sinatutako testua Nafarroako Parlamentura bidaltzea onartu zen, aurreikusitako prozeduraren arabera izapidetu zedin. Hala ere, abenduaren 23an, Hitzarmen Ekonomikoaren aldaketa  eztabaidagai izan zen Parlamentuaren Osoko Bilkuran, eta, azkenik, Nafarroako Gobernuak erabaki zuen legearen aldaketa erretiratzea bozkatu aurretik, talde parlamentario batzuek aldeko botoa emateko prest ez zeudela adierazi ondoren.

Horren aurrean, eta azken asteetan, Nafarroako Gobernua talde parlamentario guztietako ordezkariekin harremanetan egon da, legearen aldaketaren edukia zehatz-mehatz azaltzeko eta aldaketa horrek Nafarroako Parlamentuan onartzeko behar diren aldeko botoak jaso ditzan.

Beharrezko laguntzak lortu ondoren, adostutako eguneratzea Nafarroako Parlamentuan eta Gorte Nagusietan onartu beharko da, eta Nafarroaren zein Estatuaren arteko harremanak arautzen dituzten zerga- eta finantza-gaiei buruzko Legearen 28 artikulu, 6 xedapen gehigarri eta 7 iragankor aldatzea dakar.